Read Western Highland Purepecha Apocalipsis 7 Bible Online

Apocalipsis 7 - Western Highland Purepecha bible

Apocalipsis 7

¹Ka isï tátsekua, t'ámu ánjelichani exeaspka t'apuru parhakpenirhu pírhukutinksï jarhani, anhaxurhitini tarhiatanksï p'ínguni jarhani, eska écherirhu ka japundarhu ka anhatapuecharhu no tarhiapiringa.

²Ka máteru ánjelini exespka tata jurhiata andarakuarhisï, enga karhanchentani jápka Diósï tsípitiri selluni jupikatini, ka t'ámu ánjelichani uinhachakuasïrempti engaksï sésikua intsïnhapka parhakpenini ka japundani ikichakua úni.

³Arhiaparini: “Echerini ka japundani ka anhatapuechani átki ikichakua ua je, engaksï jamberi juchari Diósïri jántspirichani sellu jatsirhukuauaka.”

⁴Ka kurhaspka 144 mílinhani, sellu jatsikukatecha iámenduksï Israeli iretespti:

⁵Judiouechaksï témbeni tsimani mílispti sellu jukaricha, ka Rubenichaksï témbeni tsimani mílispti, ka Gádichaksï témbeni tsimani mílispti,

⁶ka Aserichaksï témbeni tsimani mílispti, ka Neftalichaksï témbeni tsimani mílispti, ka Manasesichaksï témbeni tsimani mílispti,

⁷ka Simeonichaksï témbeni tsimani mílispti, ka Lebichaksï témbeni tsimani mílispti, ka Isakarichaksï témbeni tsimani mílispti,

⁸Ka Sabulonichaksï témbeni tsimani mílispti, ka Josechaksï témbeni tsimani mílispti, ka Benjaminichaksï témbeni tsimani mílispti.

⁹Tátsekua íni ambe nitamatinia, eraaspka uáni k'uiripu janhani, enga jamberi nónema úempka miuani, ma parhakpeni anapuecha, ka k'uiripu mámaru járhaticha, ka mámaru jásï uandaricha, K'éri uaxantskuaniksi ka Karichinksï urhepani anhaxurhikutini jakuni, Urapitiksï xukuparhantatini ka pímuksï jupikatini.

¹⁰Ka uinhachasïremptiksï uandani: “P'ímutantskua juchari Diósïristi enga k'éri uaxantskuarhu uaxakatini jaka, ka Karichiriri.”

¹¹Ka iámendu ánjelicha engaksï k'éri uaxantskuani ka achamasïchani ka tsípiti manakorherichani uirhipandatini anhandaapka, tinguixurhikusptiksï k'éri uaxantskuani tsérhukua andaskuererani, ka Diósïnksï k'éri ambe arhini

¹²arhiparinksï: “¡Ísïsti! Újchakurakua ka t'íntskua ka mímixekua ka nitatarhekua ka janhaharhikua ka uinhapekua ka juramukua, juchari Diósïristi méntkisï ¡Jo ísïsti!”

¹³Jimajkani achamasï márini kurhamarhespti: Inde engaksï urapiti xukuparhatini jaka, ¿Néskiksï ka nani uératinksï jurhaski?

¹⁴Ka ji arhintaspka, “Acha jucheti, t'úri míteskia” ka imarini arhispti: Indeksïsï xáni nósesi kángateti; ka xukuparhakuechanksï jupakorhiantastia ka t'uput'upujkuantastiksïa karichiri iurhiri jimbo.

¹⁵Jimboksïsï Diósïri k'éri uaxantskuarhu urhepani jati, ka chúrekua ka jurhiakua imeri k'umanchekuarhuksï marhuakusïndi; ka ima enga k'éri uaxantskuarhu uaxakatini jaka, jima irestauati.

¹⁶Ka nóteruksï k'arhimaati o k'arhichani, ka tsánda nóteru arhiauati, ka niteru ma jásï aparhekorheta;

¹⁷jimboka Karichi enga terujkani k'éri uaxantskuarhu jaka kuájchakuaxati ka itsï tsípekueri uérakuarhu páuati, ka Diósï imecheri uekua kutsunharhikuauati.