Read Western Krahn Matio 1 Bible Online

Matio 1 - Western Krahn bible

Matio 1

¹Jusu Klai baa-a baaᵻá nynɛ̌ la. Depe nu̍ Eblaɛɛn-a tloemlai, wɛ̀ Jusu nu̍ Depe naɛ tloemlai.

²Eblaɛɛn wlǔh-i Ase, Ase wlǔh-i Jekɔ, Jekɔ wlǔh-i Juda ke ɔ̍ de̍di̍i̍ᵻ,

³Juda wlǔh-i Pɛwlɛ ke Sɛɛwla, u̍h de̍ nu̍ Tamaa. Pɛwlɛ wlǔh-i Ɛslɔn, Ɛslɔn wlǔh-i Wlaan,

⁴Wlaan wlǔh-i Aminada, Aminada wlǔh-i Naseɔn, Naseɔn wlǔh-i Saomɔ,

⁵Saomɔ wlǔh-i Boaa, ɔ̍ de̍ nu̍ Wleaa, Boaa wlǔh-i Obɛ, ɔ̍ de̍ nu̍ Wluu. Obɛ wlǔh-i Jɛse,

⁶Jɛse wlǔh-i Depe ɔ̀ nu̍-a blǔh baa-a. Depe ke Juwlaɛɔ-a nynɔ̌ soa wlǔh-i Sɔlɔma,

⁷Sɔlɔma wlǔh-i Wlioboan, Wlioboan wlǔh-i Abaija, Abaija wlǔh-i Esa,

⁸Esa wlǔh-i Jɛosefa, Jɛosefa wlǔh-i Jɔwlam, Jɔwlam wlǔh-i Usaia,

⁹Usaia wlǔh-i Jotɛɛn, Jotɛɛn wlǔh-i Eaa, Eaa wlǔh-i Ɛsekaea,

¹⁰Ɛsekaea wlǔh-i Manasɛ, Manasɛ wlǔh-i Emɔn, Emɔn wlǔh-i Josaia,

¹¹Josaia wlǔh-i Jɛkonaia ke ɔ̍ de̍di̍i̍ᵻ. Dǒ ti̍ laa̍ di̍i̍ bo tu̍h gbɛ̍n-ɛ u̍h kli̍hgbɛ̍, iě ɛ̍ gba̍ u̍h Babeloun bloa̍ kɛ̍n.

¹²Ti̍ u̍h gba̍-a u̍h Babeloun-ɛ, wɛ̀ Jɛkonaia dǔ Seɛotiɔ wlǔh-iɛ. Iě Seɛotiɔ wlǔh-i Sɛwlɔbɔbo,

¹³Sɛwlɔbɔbo wlǔh-i Abaio, Abaio wlǔh-i Ilaɛkɛm, Ilaɛkɛm wlǔh-i Esɔ,

¹⁴Esɔ wlǔh-i Sadɔ, Sadɔ wlǔh-i Akɛm, Akɛm wlǔh-i Ɛlaiu,

¹⁵Ɛlaiu wlǔh-i Ɛlieisa, Ɛlieisa wlǔh-i Matɔn, Matɔn wlǔh-i Jekɔ,

¹⁶Jekɔ wlǔh-i Josɛ ɔ̀ nu̍-a Mɛle-a kɔan-ɛ. Mɛle bo ɔ̀ wlǔh-ia Jusu, ɔ̀ nu̍-a Nyɔsoa-a Chèɛ̀ Tba̍ju.

¹⁷Ɛ̍ tìh-ɛ, sɔ dě Eblaɛɛn we̍ wɛ̀ ìè Depe jɛɛ ɛ̍ nu̍ jǎɛ-o nyɔ̍-a dlǔᵻ gbɔ̍ᵻá pùè jɔ̌ nyìɛ̍. Wɛ̀ sɔ-o Depe we̍ wɛ̀ ɛ̍ iě-a u̍h-a Babeloun mu̍-ɛ jɛɛ-ɛ, ɛ̍ nu̍ jǎɛ-o nyɔ̍-a dlǔᵻ gbɔ̍ᵻá pùè jɔ̌ nyìɛ̍ dɛ. Wɛ̀ ɛ̀ sɔ-a dě u̍h-a Babeloun gba̍ la̍ wɛ̀ ɛ̍ iě-a Chèɛ̀ Tba̍ju laa̍ ɔ̍ wlǔh-ɛ jɛɛ-ɛ, ɛ̍ nu̍ jǎɛ-o nyɔ̍-a gbɔ̍ᵻá pùè jɔ̌ nyìɛ̍ dɛ ke.

¹⁸Kǎ Jusu Klai-a wlǔh-ɛ nu̍ ka nɛ-ɛ. Mɛle ɔ̀ wlǔh-ia Jusu-ɛ, Josɛ bo ɔ̀ tù ɔ̍ sɛ̌ dlǔ. Jɛ ɔ̍ se̍ jla̍ mu̍ sǔh, wɛ̀ ɔ̍ juo-o dɛ̍ i̍ ka Nyɔsoa-a Sùù-a gbǐh-a mu̍-a ɛ̍ nu̍ wɛ̀ ɔ̍ iě-a jǔ wlǔh-iɛ. Iě ɔ̍ nɛ kwlǐ.

¹⁹Jɛ Josɛ nu̍ tìh i̍ gbɛ̍n nyɔ̍, ɛ̍ kɔn ɔ̍ wɔ̌n-a Mɛle-a kwlǐ nɛ pɔ̀n-ɛ, wɛ̀ ɔ̍ la̍ nɛ̀ ɔ̍ se̍ ɔ̍ ja̍a̍i̍ po̍ mu̍. Jɛ ɔ̍ mu̍ ɔ̍ tìh i̍ tǎli wlɛ sǔh.

²⁰Ɛ̀ laa̍ bo ɔ̍ nɛ dǒ wlùh i̍ naɛ la̍ sǔh, wɛ̀ Joi-a ǐnchɔ̀ jii ɔ̍ dlǔ we̍, ɛ̍ la̍a̍, “Depe-a tloemlai Josɛ, bɔ̌ Mɛle bɔ̌-ɛ, dǔ ɔ̍, ɔ̍ iě àn nynɔ̌ nu̍. Dɛ̍nu̍ɛ, Nyɔsoa-a Sùù-a gbǐh bo ɛ̀ nu̍ ɛ̍ wɛ̀ ɔ̍ nɛ kwlǐ la̍.

²¹Ɔ̍ mu̍ jɔ̍gbau jǔ wlǔh-i, nɛ̀ ìn dǎɛ ɔ̍ Jusu, ɛ̍ gbɔ̀ nu̍ Nyɔsoa sèìe àɔ̀. Dɛ̍nu̍ɛ, ɔ̍ mu̍ ɔ̍ nyɔ̍ sèìe dě u̍h-a gblɛ̍n sɔ̀ɛ̀n di̍i̍.”

²²Joi Nyɔsoa-a tu̍owli po̍ nyɔ̍-a wlu̍ iě tìh-a taǐn nu̍ dɛbo, ɛ̍ kɔn ìh kli̍hgbɛ̍ la i̍h nɛ.

²³Ɔ̍ la̍a̍, “Mɔ̀ tù ɛ̍ jlǐhɛ̍, jǔ nynɔ̌nyaa ɔ̀ se̍-a dɛ̍ i̍ juo-ɛ, ɔ̍ mu̍ sùù kɛ̍n nɛ wɛ̀ ɔ̍ iě jɔ̍gbau jǔ wlǔh-i, nɛ̀ ɔ̍ nynɛ̌-a mu̍ Imajɔɛ nu̍.” Ɛ̍ gbɔ̀ nu̍ Nyɔsoa nɛ à we̍.

²⁴Ti̍ Josɛ wlǔh-a nyinɔ̍ i̍-ɛ, iě ɔ̍ nu̍ dɛ̍ Joi Nyɔsoa-a ǐnchɔ̀ sèàɛ̍-a ɔ̍ wlùh-ɛ, wɛ̀ ɔ̍ dǔ Mɛle-e dode̍.

²⁵Jɛ ɔ̍ ke ɔ̍ se̍ dlǔ tàdùè i̍ po̍ te̍e̍ wɛ̀ ɔ̍ sà jǔ laa̍ ɔ̍ gbàɔ̀n. Iě Josɛ tùi ɔ̍ Jusu nynɛ̌.