Read Western Krahn Matio 10 Bible Online

Matio 10 - Western Krahn bible

Matio 10

¹Wɛ̀ Jusu dǎ ɔ̍ kòà-a pùè jɔ̌ sɔɔ̌n dǒ ɔ̍ we̍. Iě ɔ̍ nyǐ u̍h gbǐh u̍h iě nyɔ̍ jeědih de̍e̍ i̍ sà. Wɛ̀ u̍h iě nyɔ̍gbei-a poa dɛ̍ᵻ ke wɛ̌ᵻ kli̍hgbɛ̍ bɔ̌ɛ.

²Ɔ̍ gba̍tòà-a pùè jɔ̌ sɔɔ̌n-a chɛ̀, u̍h-a nynɛ̌ la. U̍h-a sàǐtòò nyɔ̍-a nynɛ̌ nu̍ Samo, ɔ̀ u̍h-a dǎɛ-a Pitɛ-ɛ. Ɛ̍ ke ɔ̍ de̍di̍i̍ Andlu ke. Nɛ̀ Sɛɛbedii-a nynuu̍, Chiin ke ɔ̍ de̍di̍i̍ Chɔɔn ke.

³Nɛ̀ Felɔ ke Batalamio ke Tɔmɔ ke Matio ɔ̀ nu̍-a taa̍sìh sà nyɔ̍-ɛ, ɛ̍ ke Afia-a jǔ Chiin ke Tadiɔ ke.

⁴Ɛ̍ ke Samo ɔ̀ fɔ̀n-a bloa̍-a tìh we̍ de-ɛ ke. Nɛ̀ Juda Ɛkɛlia ɔ̀ sàɛ̀-a Jusu nyɔ̍ kwlǎ-a ke.

⁵Wlu̍ la bo Jusu dbo̍-e kòà-a pùè jɔ̌ sɔɔ̌n laa̍. Ɔ̍ la̍a̍, “Mɔ̀ bɔ̌ dě ùh se̍-a Juu nyɔ̍-ɛ nynɛ̌ we̍ mu̍-ɛ, nɛ̀ mɔ̀ bɔ̌ Sɛmewlea nyɔ̍-a wlɔ̀ᵻ di̍i̍-i mu̍-ɛ ke.

⁶Jɛ Eslɔɛ nyɔ̍ ùh wɔ̀-a mǎ-a blawɛ̌ᵻɛ́, dě u̍h we̍ mɔ̀ ìè mu̍.

⁷Pò mɔ̀ mu̍-ɛ, mɔ̀ po̍ tu̍owli la. Nɛ̀ mɔ̀ la̍a̍, ‘Nyɔsoa-a kmɔ̌ wlu̍ i̍ kɔn ti̍ kɔǎn we̍ wɛ̀.’

⁸Nɛ̀ mɔ̀ pǔh-i poa-nyɔ̍, mɔ̀ iě-e mɛ̌-nyɔ̍ sà, mɔ̀ nu̍ ɛ̍ wìèìdih-a nu̍ nyɔ̍ iě pǔh, mɔ̀ iě jeědih i̍ nu̍. Ka ǐn nyǐ-a mɔ̀ gbǐh la bu̍ɛ̍i̍-ɛ, nɛ̀ mɔ̀ nui i̍h dbo̍ ke bu̍ɛ̍i̍.

⁹Mɔ̀ ja mu̍-ɛ, mɔ̀ bɔ̌ wliɛ̍ jɔɛ̍-a chɛ̀ dě mɔ̀-a fànti̍gbli di̍i̍ po̍-ɛ.

¹⁰Mɔ̀ bɔ̌ gbèèkǔ gba̍-a, nɛ̀ mɔ̀ bɔ̌ wola̍ sie gbɔ̍ɔ̍ i̍ gba̍-a, nɛ̀ mɔ̀ bɔ̌ bu̍h-u po̍-dɛ̍ ke kɔu̍ gba̍-a ke. Dɛ̍nu̍ɛ, tà nyɔ̍ nui-a dbo̍-ɛ, dǒ àn jě-dɛ̍ nɛ.

¹¹“Pò mɔ̀ sǐ dǒ wlɔ̀ jɛ di̍i̍ i̍-ɛ, nɛ̀ mɔ̀ pɔ̀n nyɔ̍ chɛ̀ i̍ mɔ̀ iě ɔ̍ blǐ koe te̍e̍ wɛ̀ mɔ̀ iě dǒ wlɔ̀ laa̍ di̍i̍ sɔ.

¹²Pò mɔ̀ ja dě gbò-a pa̍-ɛ, nɛ̀ mɔ̀ sà u̍h nyinɔ̍ i̍.

¹³Nɛ̀ pò gbò kɔn nyɔ̍ gbɛ̍n mɔ̀-a tìh i̍-ɛ, nɛ̀ mɔ̀ sà-ɛ u̍h nǐ wɔ̍n. Jɛ pò u̍h se̍ mɔ̀-a tìh i̍ gbɛ̍n-ɛ, nɛ̀ mɔ̀ bɔ̌ u̍h nǐ wɔ̍n sà-ɛɛ.

¹⁴Nɛ̀ pò nyɔ̍ se̍ mɔ̀-a tìh i̍ gbɛ̍n, iě u̍h se̍ mɔ̀-a wlu̍ dounᵻ we̍ po̍-ɛ, pò mɔ̀ ja dě gbò àe̍e̍ dǒ wlɔ̀ laa̍ di̍i̍ sɔ-ɛ, nɛ̀ mɔ̀ gbàbo blǔh bu̍h sɔ̀n i̍, wɛ̀ mɔ̀ iě-o sɔ.

¹⁵Ǎn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍-ɛ, Nyɔsoa-a mu̍ Sɔdɔm ke Kɔmowla wlɔ̀ᵻ wɔɛ jě ɛ̍ iě wlɔ̀ laa̍ sìì.”

¹⁶Ɔ̍ la̍a̍, “Ǎn dbo̍ mɔ̀ ka nyɔ̍-a dbo̍ blawɛ̌ᵻ dě gbɛ̍n-nmi̍i̍ nynɛ̌ we̍-ɛ. Ɛ̍ tìh-ɛ, mɔ̀ klǐhbih jlǐh i̍ ka nǐ plǐn la̍ smìɛ̍-ɛ, wɛ̀ mɔ̀ iě gba̍n gbɛ̍n ke.

¹⁷Jɛ mɔ̀ nu̍ nɛnɛ̌, dɛ̍nu̍ɛ, nyɔ̍gbei-a mu̍ mɔ̀ gbɛ̍n u̍h iě mɔ̀ dě taɔ jǔ gba̍. Wɛ̀ u̍h iě mɔ̀ bla̍ dě wɛɛ sà gbòᵻ sɔ̀n i̍.

¹⁸Ǎn tìh-ɛ, u̍h-a mu̍ mɔ̀ dě kɔ̀mla̍ᵻ ke blǔh baaᵻ we̍ gba̍. Nɛ̀ dǒ mɔ̀ iě u̍h ke ùh se̍-a Juu nyɔ̍-ɛ pɔ̀n chɛ̀ la ɛ̍ tìh wlùh sèàɛ̍.

¹⁹Jɛ pò u̍h gbɛ̍n mɔ̀-ɛ, sèò bɔ̌ mɔ̀ nu̍-ɛ dǒ dɛ̍ mɔ̀-a mu̍-a bla̍-a we̍. Ɛ̍ ke ka mɔ̀-a mu̍-a ɛ̍ bla̍-a nu̍-ɛ ke. Dɛ̍ mɔ̀-a mu̍-a bla̍-a, mɔ̀-a mu̍ ɛ̍ juo dǒ ti̍ laa̍ di̍i̍.

²⁰Dɛ̍nu̍ɛ, ɛ̍ se̍ mɔ̀-a chɛ̀ ùh se̍ wlu mu̍, jɛ Sùù Baa Nyɔsoa-a mu̍-a dbo̍-ɛ, ɛ̍ bo ɛ̀ mu̍ mɔ̀ɔ̍ jii ɛ̀ iě wlu.

²¹“De̍di̍i̍ᵻá mu̍ u̍h-a chɛ̀-a de̍di̍i̍ᵻ nyɔ̍ kwlǎ sà-ɛ u̍h iě u̍h dbǎ. Kǎ baaᵻá mu̍ u̍h-a nynuu̍ nu̍ ke. Nɛ̀ nynuu̍-a mu̍ u̍h de̍ᵻ ke baaᵻ faɛn, wɛ̀ u̍h iě u̍h dbǎ.

²²Nɛ̀ ǎn tìh-ɛ nyɔ̍ kli̍hgbɛ̍-a mu̍ mɔ̀ faɛn. Jɛ nyɔ̍ ɔ̀ mu̍-ae klì i̍ ku̍ wɛ̀ ɛ̍ iě-a dlǔ i̍ chlà-ɛ, nɛ̀ ɔ̍ mu̍ pǔh.

²³Pò u̍h ja mɔ̀ klě jěe dǒ tà jɛ-ɛ, nɛ̀ mɔ̀ ple̍ mɔ̀ iě tàdɔ̀ɔ̀ mu̍. Tìh-a taǐn ǎn sèàɛ̍ mɔ̀ wlùh, mɔ̀ se̍ dbo̍ la i̍ wɔ̀ mu̍ dě Eslɔɛ nyɔ̍-a wlɔ̀ᵻ gbàɛ̀ kli̍hgbɛ̍ di̍i̍ i̍ wɛ̀ Nyi̍ɔ̍-a Jǔ iě ji̍.

²⁴“Ɛ̍ se̍ sùku̍u̍ jǔ kɔn ɔ̍ iě wɔ̍n ku̍ ɔ̍ iě ɔ̍ nǎ po̍ nyɔ̍ sìì. Nɛ̀ pòi̍ju-u ku̍ wɔ̍n wɛ̀ ɔ̍-ɔ sìì ɔ̍ dlǔtu ke.

²⁵Ɛ̍ mu̍ i̍ blaɛ sǔh sùku̍u̍ jǔ iě ɔ̍ nǎ po̍ nyɔ̍ wɔ̀, wɛ̀ pòi̍ju iě ɔ̍ dlǔtu wɔ̀. Nyɔ̍ ɔ̀ nu̍-a gbò-a dlǔtu-ɛ, pò u̍h ja ɔ̍ jeědih-a dlǔtu Biɛsibo dǎɛ-ɛ, nɛ̀ à ji̍ gbò kli̍hgbɛ̍-a chɛ̀ jě lě.”

²⁶Jusu la̍a̍, “Jɛ mɔ̀ bɔ̌ ɛ̍ tìh tù-ɛ, wɛ̀ mɔ̀ bɔ̌ u̍h jǔ ple̍-ɛ. Dɛ̍ ɛ̀ sìle-aɛ, ɛ̍ mu̍ tà wlǔh. Nɛ̀ dɛ̍ nyɔ̍ sà-a dě slǎn-a, ɛ̍ mu̍ dǒ gbaɛ̍we̍ ji̍.

²⁷Dɛ̍ ǐn sèàɛ̍-a mɔ̀ wlùh dě kwile-ɛ, nɛ̀ mɔ̀ gba̍ ɛ̍ dǒ gbaɛ̍we̍ wɛ̀ mɔ̀ iě ɛ̍ bla̍. Nɛ̀ dɛ̍ ǐn paɛ-a mɔ̀ slǎn-a, nɛ̀ mɔ̀ bla̍ ɛ̍, mɔ̀-a wlu̍ iě dě gbò tɔ̀u̍nwe̍ jii.

²⁸Ɛ̍ tìh-ɛ, nyɔ̍ ùh-a mu̍-a mɔ̀-a nyi̍ɔ̍tu nɛ due dbǎ-a, mɔ̀ bɔ̌ u̍h jǔ ple̍-ɛ. Dɛ̍nu̍ɛ, u̍h se̍ mɔ̀-a sùù nɔ̀ɔ̍ dbǎ mu̍. Jɛ Nyɔsoa bo mɔ̀ ìè jǔ ple̍. Dɛ̍nu̍ɛ, ɔ̍-ɔ bo ɔ̀ bɛ̌ɛ mɔ̀-a sùù ke mɔ̀-a nyi̍ɔ̍tu dě kàn nɛ̍ di̍i̍ po̍-ɛ, wɛ̀ i̍h iě-e gbɔ̀lɔ.

²⁹Gbɛ̀n-e, kèlǎᵻ sɔɔ̌n bo ìh blaɛ we̍ wɛ̀ i̍h po̍ kaba̍ jɔɛ̍ due. Jɛ pò i̍h-a due iě i̍ kà dǒ bloɔ̍-ɛ, mɔ̀ Baa Nyɔsoa-a mu̍-o dɛ̍ i̍ juo gbɔ̀gbɔ̀.

³⁰Mɔ̀-a mǐ-a chɛ̀ nɛ-a dǒ mɔ̀ dlǔ-ɛ, i̍h bo Nyɔsoa ju̍o̍e we̍ i̍ kli̍hgbɛ̍.

³¹Ɛ̍ tìh-ɛ, mɔ̀ bɔ̌ faɔn ple̍-ɛ, mɔ̀ gbǎ dɛ̍kɛ̍n mɔ̀ sìì kèlǎᵻ dɔu.”

³²Ɔ̍ la̍a̍, “Nyɔ̍ jɔ ɔ̀ mu̍-a jlǔh nyna wɛ̀ ɔ̀ iě-a ǎn tìh i̍ wɔ̌ɛn-ɛ, nɛ̀ ǎn mu̍ jlǔh nyna ke dǒ ǐn Baa nɛ-a dě ja̍i̍wlɔ̀-ɛ jǔ, wɛ̀ iě ɔ̍ tìh i̍ wɔ̌ɛn ke.

³³Jɛ nyɔ̍ ɔ̀ mu̍-a jlǔh nyna wɛ̀ ɔ̀ iě-a ǐn chla tba̍-ɛ, nɛ̀ ǎn mu̍ jlǔh nyna ke dǒ ǐn Baa nɛ-a dě ja̍i̍wlɔ̀-ɛ jǔ wɛ̀ iě ɔ̍ chla tba̍.”

³⁴Jusu la̍a̍, “Dɛ̍ mɔ̀ iě-a jlǐhɛ̍ tù-ɛ, ɛ̍ nu̍ ǐn se̍ nɔ̌ kmɔ̌ we̍ ji̍ iě kmɔ̌ i̍ gbe̍ɛ̍ɛn. Ǐn se̍ kmɔ̌ i̍ gbe̍ɛ̍ɛn la̍ ji̍, jɛ plàn chlɛ̀n bo ǐn ja.

³⁵Ǐn ji̍-i iě ɛ̍ nu̍ wɛ̀ jɔ̍gbauᵻ nynuu̍ ke u̍h baaᵻ je̍e wlu̍ i̍ wɔɛ̌ɛn, wɛ̀ nynɔ̌gbaɔᵻ nynuu̍ ke u̍h de̍ᵻ je̍e wlu̍ i̍ wɔɛ̌ɛn, wɛ̀ nynɔ̌gbaɔᵻ ke u̍h-a kɔanᵻ de̍ᵻ je̍e wlu̍ i̍ wɔɛ̌ɛn.

³⁶Nyɔ̍ ɔ̀ nu̍-a nyɔ̍-a nyɛ̌-nyɔ̍-ɛ, ɔ̍ sɔ dě nyɔ̍-a chɛ̀ gbɔ̀ɔ̀.

³⁷“Nyɔ̍ jɔ ɔ̀ kma-a ɔ̍ de̍ ke ɔ̍ baa-a tìh wɛ̀ ɛ̍ sìì-a m̀-ɛ, nɛ̀ ɔ̍ se̍ i̍ blaɛ ɔ̍ iě ǎn kòà nu̍. Nɛ̀ nyɔ̍ jɔ ɔ̀ kma-a ɔ̍ jɔ̍gbau jǔ ke ɔ̍ nynɔ̌gbaɔ jǔ-a tìh wɛ̀ ɛ̍ sìì-a m̀-ɛ, nɛ̀ ɔ̍ se̍ i̍ blaɛ ɔ̍ iě ǎn kòà nu̍.

³⁸Nyɔ̍ ɔ̀ se̍-a ɔ̍ naɛ gbàɛ̍ kɛ̍n i̍ tu̍-u dǔ mu̍, wɛ̀ ɔ̍ iě-a dǒ ǐn de̍e̍ gbǎ-a dǔ-ɛ, nɛ̀ ɔ̍ se̍ i̍ blaɛ ɔ̍ iě ǎn kòà nu̍.

³⁹Nɛ̀ nyɔ̍ jɔ mu̍-a ɔ̍ feɛ-a tìh kma-ɛ, nɛ̀ ɛ̍ mu̍ ɔ̍ kwa̍ mǎ-ɛ. Jɛ nyɔ̍ ɔ̀ mu̍-a ǎn tìh tù wɛ̀ ɔ̀ se̍-a ɔ̍ feɛ-a tìh kma mu̍-ɛ, nɛ̀ ɔ̍ mu̍ ɛ̍ blě.”

⁴⁰Jusu la̍a̍, “Nyɔ̍ ɔ̀ mu̍-a mɔ̀-a tìh i̍ gbɛ̍n-ɛ, nɛ̀ ɔ̍ gbɛ̍n ǎn tìh i̍ wɛ̀ ke. Nɛ̀ nyɔ̍ ɔ̀ gbɛ̍n-a ǎn tìh i̍-ɛ, nɛ̀ nyɔ̍ ɔ̀ dbo̍-a m-ɛ, ɔ̍ tìh bo ɔ̍ gbɛ̍n i̍ wɛ̀ ke.

⁴¹Nyɔ̍ jɔ ɔ̀ mu̍-a Nyɔsoa-a tu̍owli po̍ nyɔ̍-a tìh i̍ gbɛ̍n ɔ̍ Nyɔsoa-a tu̍owli po̍ nyɔ̍ nu̍ tìh-ɛ, nɛ̀ dɛ̍ tu̍owli po̍ nyɔ̍-a mu̍-a jě-ɛ, ɛ̍ kɔn ba̍ bo ɔ̍ mu̍ jě ke. Nɛ̀ nyɔ̍ ɔ̀ mu̍-a Nyɔsoa-a wlùh nu̍ nyɔ̍-a tìh i̍ gbɛ̍n ɔ̍ Nyɔsoa-a wlùh nu̍ tìh-ɛ, nɛ̀ dɛ̍ Nyɔsoa-a wlùh nu̍ nyɔ̍-a mu̍-a jě-ɛ, nɛ̀ ɛ̍ kɔn ba̍ bo ɔ̍ mu̍ jě ke.

⁴²Nɛ̀ pò nyɔ̍ nyǐ ùh plìh la nǐ seɔn-a kàu̍n weɛ̍ u̍h-a ǎn kòà nu̍ tìh-ɛ, mɔ̀ tù ɛ̍ jlǐhɛ̍, nɛ̀ ɔ̍ naɛ jě-dɛ̍ se̍ mǎ la̍ kɔn dɛ.”