Read Western Krahn Matio 11 Bible Online

Matio 11 - Western Krahn bible

Matio 11

¹Ti̍ Jusu wɔ̀-a ɔ̍ kòà-a pùè jɔ̌ sɔɔ̌n laa̍ slǔh po̍-ɛɛ, wɛ̀ ɔ̍ wlǔh-i gbààn ɔ̍ mu̍ dě wlɔ̀ᵻ diih di̍i̍ ɔ̍ iě nǎ po̍, wɛ̀ ɔ̍ iě Nyɔsoa tìh bla̍ dě nyɔ̍gbei we̍.

²Chɔɔn ɔ̀ po̍-a nyɔ̍ nǐ dlǔ-ɛ, ti̍ ɔ̍ nɛ-a dě kasoo-ɛ, dǒ ɔ̍ wɔ̌n-ɛ Klai-a nu̍-dɛ̍ᵻá pɔ̀n, wɛ̀ ɔ̍ dbo̍ ɔ̍ kòà dě ɔ̍ we̍.

³U̍h mu̍-aa, iě u̍h la̍a̍, “Mɔ̀ Chɔɔn la̍ ɔ̀ mu̍-a ji̍-ɛ, mɔ̀ bo ae? Àe̍e̍ à gbàɛ̀ nyɔ̍ dɔɔ-a tìh ke̍ dɛ dǒ ìn de̍e̍ ae?”

⁴Wɛ̀ Jusu la̍a̍, “Mɔ̀ mu̍ de̍ mɔ̀ iě Chɔɔn kunǎ po̍ dǒ dɛ̍ᵻ mɔ̀ jě-a ke dɛ̍ᵻ mɔ̀ wɔ̌n-a we̍.

⁵Dɔ̌-nyɔ̍-a jě la̍ i̍, klɔ-nyɔ̍-a na la̍-ɛ, wìèìdih-a nu̍ nyɔ̍ fɛ̍nɛ wɛ̀, sǔn-nyɔ̍-a wɔ̌n la̍ i̍, mɛ̌-nyɔ̍-a wlǔh la̍-e, iě pɔ̀n chɛ̀-a bla̍-ɛ la̍ dě nyɔ̍gbà nyɔ̍ we̍.

⁶Nyɔ̍ ɔ̀ se̍-a se̍a̍ dǒ ǎn wlùh gbaɛ we̍-ɛ, nɛ̀ ɔ̍ nmɔ i̍.”

⁷Chɔɔn-a kòà-a sɔ-a la̍-oɛ, wɛ̀ Jusu tè wlu-ɛ gbɔ̀ dě nyɔ̍ tlùgbei̍ laa̍ we̍ Chɔɔn tìh. Ɔ̍ la̍a̍, “Ti̍ mɔ̀ mu̍-a dě Chɔɔn we̍ kwlǎslò we̍-ɛ, dɛ̍ mɔ̀ mu̍ jě la̍ ɛ? Dli̍h wlɔ̍nᵻ ìh poɔ-a gba̍-a, i̍h bo mɔ̀ mu̍ jě la̍ ae?

⁸Pò ɛ̍ se̍ la̍a̍n nɛ-ɛ, nɛ̀ dɛ̍ we̍ bo mɔ̀ mu̍ jě la̍ ɛ? Àe̍e̍ mɔ̀ mu̍ jlii̍ chɛ̀-ɛ pa̍ nyɔ̍ jě la̍ sǔh ae? Iěe, nyɔ̍ ɔ̀ pa̍-a jlii̍ chɛ̀-ɛ, nɛ̀ dě blǔh baa-a gbò sɔ̀n bo ɔ̍ nɛ.

⁹Nɛ̀ dɛ̍ mɔ̀ mu̍ jě la̍-a la̍ ɛ? Nyɔsoa-a tu̍owli po̍ nyɔ̍ bo mɔ̀ mu̍ jě la̍ ae? I̍i̍n, kǎ ɛ̍ nɛ, jɛ jɔ mɔ̀ jě-a ka-ɛ, ɔ̍ sìì Nyɔsoa-a tu̍owli po̍ nyɔ̍-a chɛ̀.

¹⁰Ɔ̀ la ɔ̍ kɔn tìh bo Nyɔsoa-a wlu̍ la̍a̍, ‘Ǎn mu̍ ǎn tu̍owli po̍ nyɔ̍ nya̍ dbo̍ dě ìn jǔ, ɔ̍ iě àn wìè gba̍a̍ po̍.’

¹¹Ɛ̍ se̍ pàɔ̀n, ǎn sèàɛ̍ mɔ̀ wlùh, nyɔ̍-ɔ se̍a nɔ̌ kmɔ̌ la we̍ nɛ ɔ̀ iě-a wɔ̍n ku̍ ɔ̀ iě-a Chɔɔn ɔ̀ po̍-a nyɔ̍ nǐ dlǔ-ɛ sìì-ɛ. Jɛ ɔ̀ se̍-a dɛ̍kɛ̍n gbǎ kaa̍ dě Nyɔsoa-a kmɔ̌ wlu̍ i̍ kɔn-ɛ di̍i̍-ɛ, ɔ̍ ku̍ wɔ̍n ɔ̍ sìì Chɔɔn.

¹²Sɔ dě Chɔɔn-a ti̍ we̍ wɛ̀ ɛ̍ iě-a ti̍ la jɛɛ-ɛ, dǒ Nyɔsoa-a kmɔ̌ wlu̍ i̍ kɔn-ɛ sà tìh jě-ɛ. Iě dɛ̍ᵻá kloǒ nu̍ nyɔ̍-a pɔ̀n ɛ̍ klànklàn gbɛ̍n-ɛ i̍.

¹³Dɛ̍nu̍ɛ, Nyɔsoa-a tu̍owli po̍ nyɔ̍ kli̍hgbɛ̍ ke telě sà Nyɔsoa-a wlu̍ i̍ kɔn-kmɔ̌ la ɛ̍ tìh i̍ te̍e̍ iě ɛ̍ dǔ Chɔɔn jɛɛ-ɛ.

¹⁴Ilaɛja ɔ̀ kɔn ɔ̀ iě-a ji̍-ɛ, ɔ̍ bo ɔ̀ nu̍-a Chɔɔn. Mɔ̀ wɔ̌ɛn ɛ̍ we̍ ae?

¹⁵Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.

¹⁶“Dɛ̍ we̍ bo iě ti̍laa nyɔ̍ la i̍ blaɛ ɛ? U̍h wɔ̀ nynuu̍plìh ùh nɛ-a dě dɔɔ̌ gbale̍e̍-ɛ, wɛ̀ u̍h-a nu̍-a po̍-e ìn ba̍ we̍ wlu̍ ìn ba̍ po̍-e ìn we̍ wlu̍-ɛ.

¹⁷U̍h la̍a̍, ‘À ble̍ mɔ̀-a nynɔ̌ jla̍ ja duǐh, wɛ̀ mɔ̀ se̍ de̍le. Wɛ̀ à ble̍ kǔ-a mɛ̌-duǐh, wɛ̀ mɔ̀ se̍ fìn.’

¹⁸Chɔɔn ji̍-aɛ, ɔ̍ po̍ jlǔh iě ɔ̍ se̍ nǎ. Wɛ̀ nyɔ̍ɔ la̍ nɛ̀ ɔ̍ blě jeědih dǒ ɔ̍ de̍e̍.

¹⁹Nyi̍ɔ̍-a Jǔ ji̍-aɛ, iě ɔ̍ di̍ dɛ̍ wɛ̀ ɔ̍ nǎ. Iě u̍h la̍a̍, ‘Ɔ̍ nyni wɔ̍i̍n iě ɔ̍ sìèè ɔ̍ chɛ̀ nmɔ̍ wlì. Gbɛ̀n-e, ɔ̍ ke taa̍sìh sà nyɔ̍ ke gblɛ̍n sɔ̀ɛ̀n nyɔ̍ jbɛɛ.’ Jɛ Nyɔsoa-a flɔ̍nwlùh-a flɔn-ɛ ɛ̍ chɛ̀ we̍ i̍ dǒ ɛ̍ nu̍-dɛ̍ we̍.”

²⁰Iě wlɔ̀ᵻ gbàɛ̀ Jusu dǔ-a jbaɛdih dɔu di̍i̍ i̍ poe-ɛ, wɛ̀ i̍h-i se̍-a i̍ bǐi-ɛ, sɔ ɔ̍ chɛ̀ la̍ i̍h we̍ sǔh.

²¹Ɔ̍ la̍a̍, “Kɔwlasiin wlɔ̀, chlě dǒ ìn we̍. Bɛseida wlɔ̀, chlě dǒ ìn we̍ ke. Dɛ̍nu̍ɛ, jbaɛdih ìh dǔ-a poe-ɛ mɔ̀ di̍i̍ i̍-ɛ, pò i̍h poe-ɛ dě Taiɛ ke Saidɔn wlɔ̀ᵻ di̍i̍ de-ɛ, nɛ̀ nyɔ̍ nɛ-a dǒ i̍h di̍i̍-ɛ, u̍h-a mu̍ dlǐh jlii̍ pa̍ u̍h iě bii dlǔ po̍ de tɛin, wɛ̀ ɛ̍ iě ɛ̍ to ka u̍h bǐi-a i̍-ɛ.

²²Jɛ ǎn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Nyɔsoa-a mu̍ Taiɛ ke Saidɔn wlɔ̀ᵻ wɔɛ jě ɛ̍ iě mɔ̀ sìì.

²³Kepanium wlɔ̀, mɔ̀ bo ɔ̀ pɔ̀n wɔ̍n ku̍-ɛ i̍ ae? Iěe, àn mu̍ wlù ji̍ ìè dě kàn nɛ̍ di̍i̍ gbǎ. Jbaɛdih ìh poe-a dǒ ìn di̍i̍-ɛ, wɛ̀ i̍h iě poe-ɛ dǒ Sɔdɔm wlɔ̀ di̍i̍ de-ɛ, nɛ̀ ɛ̍ se̍-e gbɔ̀lɔ mu̍ sèàn de.

²⁴Ǎn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍-ɛ, Nyɔsoa-a mu̍ Sɔdɔm wlɔ̀ wɔɛ jě ɛ̍ iě ìn sìì.”

²⁵Dǒ ti̍ laa̍ di̍i̍ bo Jusu wlu-i, ɔ̍ la̍a̍, “Baa, mɔ̀ ɔ̀ nu̍-a bloa̍ ke ja̍u̍n-a Joi-ɛ, ǐn po̍ ìn tlɔ̌. Dɛ̍nu̍ɛ, dɛ̍ᵻ ìn sìle-a flɔ̍nwlùh kɔn nyɔ̍ ke dɛ̍ juo nyɔ̍ jii̍-ɛ, i̍h bo ìn toe ka plǒai nyɔ̍.

²⁶I̍i̍n, Baa, àn gbǐh po̍ dɛ̍ bo.”

²⁷Ɔ̍ la̍a̍, “Ǐn Baa nyǐ ǐn dɛ̍ᵻ kli̍hgbɛ̍ wɛ̀. Nyɔ̍ dɔɔ se̍ Jǔ juo. Jɛ Baa nɛ due kɔn tɛ̀ ǐn sà-o. Iě nyɔ̍ dɔɔ wɔ̍ se̍ Baa juo ke. Jɛ Jǔ nɛ due kɔn tɛ̀ ǐn sà-o, ɛ̍ ke nyɔ̍ ùh Jǔ tba̍-a chèɛ̀ ɔ̍ iě-a Baa toe-ɛ ke.

²⁸“Nyɔ̍ ùh gbɛ̀-ɛ bla̍-a ke ùh kɔn gbǐh-a nu̍-a sɔɔn-ɛ, mɔ̀ ji̍ nɔ̌ ǐn we̍. Ǎn mu̍ ɛ̍ nu̍ mɔ̀ iě feɛ i̍ jě.

²⁹Mɔ̀ gba̍ ǎn kɛ̌n wìè mɔ̀ iě ǐn dɛ̍ we̍ cheǎn-ɛ, dɛ̍nu̍ɛ, ǐn gbɛ̍n gba̍n, wɛ̀ ǐn ja ǎn chɛ̀ wlù. Pò mɔ̀ nu̍ la̍a̍n-ɛ, nɛ̀ mɔ̀-a wlùh-a mu̍ i̍ tè.

³⁰Ǎn kɛ̌n wìè bo ɛ̀ se̍ gba̍-a kma, wɛ̀ ǎn gbɛ̀ fěle kwa̍.”