Read Western Krahn Matio 12 Bible Online

Matio 12 - Western Krahn bible

Matio 12

¹Dode̍-ɛ, nɛ̀ Jusu ke ɔ̍ kòà na iě u̍h-a jii dě klè due di̍i̍, nɛ̀ mɔ̌-a nu̍ u̍h i̍. Wɛ̀ ɔ̍ kòà gbǎn kwǐ kɛnɛ̌ u̍h-a di̍. Nɛ̀ ɛ̍ nu̍ Juu-a wlè-weɛ̍.

²Jɛ Fɛlesii nyɔ̍ jě-a u̍h-ɛ, iě u̍h la̍a̍ dě Jusu we̍, “Gbɛ̀n-e, dɛ̍ àn kòà-a nu̍-aɛ, nɛ̀ u̍h-a wa̍ wlè-weɛ̍-a telě.”

³Wɛ̀ Jusu sà u̍h-a wlu̍ pɔ̀n we̍, ɔ̍ la̍a̍, “Ti̍ mɔ̌-a nu̍-a Depe ke ɔ̍ na-nyɔ̍-ɛ, dɛ̍ ɔ̍ nu̍-a mɔ̀-ɔ se̍a ɛ̍ slè dě Nyɔsoa-a wlu̍ di̍i̍ ae?

⁴Dě à telě di̍i̍-ɛ, blèe̍ jɛ u̍h sà-ɛa Nyɔsoa kwlǎ-ɛ, nɛ̀ nyɔ̍ dɔɔ-ɔ di̍ ɛ̍ dɛ. Nɛ̀ slaǎ sà nyɔ̍ nɛ due bo ɔ̀ di̍ ɛ̍. Jɛ Depe pa̍-a dě Nyɔsoa-a gbò sɔ̀n-ɛ, iě ɔ̍ ke ɔ̍ ba̍ᵻ di̍ blèe̍ laa̍.

⁵Mɔ̀-ɔ se̍a Nyɔsoa-a telě la slè sàǐtòò ae? Ɛ̍ la̍ slaǎ sà nyɔ̍ ùh nɛ-a dě Nyɔsoa-a slaǎ sà gbò sɔ̀n-ɛ, pò u̍h wa̍ wlè-weɛ̍-a telě-ɛ, nɛ̀ u̍h se̍-a dɛ̍ sɔ̀n nu̍-ɛ, mɔ̀-ɔ se̍a ɛ̍ slè ae?

⁶Jɛ ǎn sèàɛ̍ mɔ̀ wlùh, jɛ nɛ-a da̍a-ɛ, ɛ̍ ku̍ wɔ̍n ɛ̍ sìì slaǎ sà gbò.

⁷Wlu̍ la ɛ̀ la̍a̍, ‘Wɔɛ bo ǎn pɔ̀n, ǐn se̍ slaǎ sà-a pɔ̀n,’ pò mɔ̀ juo ɛ̍ gbɔ̀ de-ɛ, nɛ̀ nyɔ̍ se̍-a dɛ̍ sɔ̀n nu̍-ɛ, mɔ̀ se̍ u̍h tìh dlǔ po̍ mu̍ de.

⁸Ɛ̍ tìh-ɛ, Nyi̍ɔ̍-a Jǔ bo ɔ̀ nu̍ Joi dǒ wlè-weɛ̍ we̍.”

⁹Wɛ̀ Jusu wlǔh-i gbààn, iě ɔ̍ mu̍ dě Juu nyɔ̍-a wɛɛ sà gbò sɔ̀n.

¹⁰Ɔ̍ iě-a mu̍-ɛ, nɛ̀ jɔ̍gbau due nɛ dě gbò-a chɛ̀ sɔ̀n ɔ̍ sɔ̍n kɔ̌ i̍. Nɛ̀ nyɔ̍ duuh nɛ deě u̍h-a pɔ̀n jii la̍ i̍ u̍h iě Jusu tìh gbɛ̍n-ɛ. Wɛ̀ u̍h tèle ɔ̍ i̍ u̍h la̍a̍, “Pò ɛ̍ nu̍ wlè-weɛ̍ wɛ̀ nyɔ̍ iě nyɔ̍ pǔh-i dǒ ɛ̍ di̍i̍-ɛ, nɛ̀ ɔ̍ wa̍ telě ae?”

¹¹Iě ɔ̍ la̍a̍, “Pò mɔ̀-a nyɔ̍ blě blawɛ̌ wɛ̀ ɛ̍ iě biě gbǎ dǒ wlè-weɛ̍ di̍i̍-ɛ, nɛ̀ ɔ̍ se̍ ɛ̍-e sà mu̍ ae?

¹²Nɛ̀ nyi̍ɔ̍ ke blawɛ̌ ke jɔwe̍ gbǎ dɛ̍kɛ̍n ɔ̀ sìì ɔ̍ ba̍ ɛ? Ɛ̍ tìh-ɛ, à telě sà à wlu̍ kɛ̍n à iě dɛ̍ chɛ̀ nu̍ dǒ wlè-weɛ̍ di̍i̍.”

¹³Iě ɔ̍ la̍a̍ dě jɔ̍gbau laa̍ we̍, “Slɛ̌ɛ àn kɔba i̍.” Wɛ̀ ɔ̍ slɛ̌ɛ ɛ̍ i̍, iě ɔ̍ kɔba nmɔ jii̍ dode̍, wɛ̀ ɛ̍ ke jɛ sie-a dǒ de̍-ɛ wɔ̀ɛ.

¹⁴Jɛ Fɛlesii nyɔ̍ sǐ-a dǒ sɔ̀n i̍-ɛ, iě u̍h sɔ̌ u̍h iě Jusu dbǎ.

¹⁵Jɛ Jusu juo-ao dɛ̍ i̍-ɛ, iě ɔ̍ wlǔh-i gbààn ɔ̍ sɔ dǒ tà-a chɛ̀. Wɛ̀ nyɔ̍ dɔu wɔ̀ dǒ ɔ̍ de̍e̍, iě ɔ̍ bɔ̌-ɛ u̍h-a wɛ̌ᵻ kli̍hgbɛ̍.

¹⁶Wɛ̀ ɔ̍ nɛ̌ɛ jeědih laa̍ wlu̍ dounᵻ i̍ i̍h-i je̍e ɔ̍ nynɛ̌ wlɔ̀ we̍ po̍.

¹⁷Dɛ̍ Nyɔsoa-a tu̍owli po̍ nyɔ̍ Asaia bla̍-aɛ, ɛ̍ iě tìh-a taǐn nu̍. Ɛ̍ kɔn we̍ wlu̍ bo Jusu bla̍-a.

¹⁸Nyɔsoa wlu-ia dě Asaia ja̍a̍-ɛ, ɔ̍ la̍a̍, “Ǎn pòi̍ju ǐn tba̍-a chèɛ̀-ɛ la, ǐn kma ɔ̍ tìh iě ǎn wlùh tè i̍ dǒ ɔ̍ we̍. Ǎn mu̍ ǎn Sùù dě ɔ̍ ja̍a̍ po̍, wɛ̀ ɔ̍ iě i̍ slɛ̌-ɛ tìh bla̍ dě kmɔ̌-nyɔ̍ we̍.

¹⁹Ɔ̍ se̍ chɛ̀ mu̍, ɔ̍ se̍-e i̍ wǐi mu̍ ke, nyɔ̍ se̍ ɔ̍ wlu̍ wɔ̌n mu̍ dǒ wlɔ̀gbàɛ̀.

²⁰Pelu̍u̍hgbau ɛ̀ klǐ-aɛ, ɔ̍ se̍ ɛ̍ chlà mu̍. Nɛ̀ nape̍ ɛ̀ po̍-a daluh ɛ̀ iě-a mɔ̌-ɛ, ɔ̍ se̍ ɛ̍ mɔ̌-ɛ mu̍. Ɛ̍ bo ɔ̍ mu̍-u nɛ te̍e̍ wɛ̀ ɔ̍ i̍ slɛ̌-ɛ iě tu̍h du̍.

²¹Ɔ̍ nynɛ̌ bo kmɔ̌ kli̍hgbɛ̍-a mu̍ wlì tè.”

²²Wɛ̀ u̍h ja jɔ̍gbau due dǒ Jusu we̍ nɛ̀ jeědih nɛ ɔ̍ de̍e̍. Ɛ̍ nu̍ ɛ̍ wɛ̀ ɔ̍ dɔ̌, iě ɔ̍-ɔ wlu. Wɛ̀ Jusu pǔh-i ɔ̍, sɔ ɔ̍ jě i̍, iě ɔ̍ wlu.

²³Sɔ ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h la̍a̍, “Ɔ̀ la wɛ̀ ɔ̍ iě Depe-a Jǔ nu̍ ae?”

²⁴Jɛ Fɛlesii nyɔ̍ wɔ̌n-a pɔ̀n la-ɛ, iě u̍h la̍a̍, “Jeědih-a dlǔtu u̍h-a dǎɛ-a Biɛsibo-ɛ, ɛ̍ bo ɛ̀ nyǐ jǔ la gbǐh wɛ̀ ɔ̍ sà nyɔ̍ jeědih de̍e̍ i̍.”

²⁵Sɔ Jusu juo dɛ̍ u̍h-a naɛ-a wlùh i̍-ɛ, iě ɔ̍ la̍a̍, “Pò blǔh nyɔ̍-a sǔh ja fɔ̀n-ɛ, nɛ̀ blǔh laa̍ ɛ̍ mu̍ wa̍. Nɛ̀ pò wlɔ̀ nyɔ̍-a sǔh ja fɔ̀n-ɛ, nɛ̀ wlɔ̀ laa̍ ɛ̍ mu̍ wa̍. Pò gbò nyɔ̍-a sǔh ja fɔ̀n-ɛ, nɛ̀ u̍h se̍ i̍ nyna mu̍ dǒ u̍h-a chɛ̀ we̍.

²⁶Nɛ̀ pò Setɔn ja la̍ ɛ̍ chɛ̀ we̍ fɔ̀n-ɛ, nɛ̀ ɛ̍ gblè-e ɛ̍ chɛ̀ i̍ wɛ̀ bo. Nɛ̀ ɛ̍ bloa̍-a mu̍ la̍ wa̍.

²⁷Nɛ̀ pò ɛ̍ tù Biɛsibo iě jeědih i̍ nu̍-iɛ, nɛ̀ nyɔ̍we̍ bo ɔ̀ nyǐ mɔ̀ naɛ nyɔ̍ gbǐh ke wɛ̀ u̍h-a nu̍ jeědih i̍ ɛ? Ka ɛ̍ nɛ-a ka-ɛ, mɔ̀-a chɛ̀-a nyɔ̍ bo ùh-a mu̍ tìh-a chɛ̀ i̍ chɛ̍n.

²⁸Jɛ pò ɛ̍ tù Nyɔsoa-a Sùù-a gbǐh iě jeědih i̍ nui-ɛ, nɛ̀ mɔ̀ juo ɛ̍ ka Nyɔsoa-a kmɔ̌ wlu̍ i̍ kɔn-ɛ nɛ-a da̍a mɔ̀ we̍ wɛ̀-ɛ.

²⁹“Ɛ̍ se̍ nyɔ̍ kɔn ɔ̍ iě dě kmu-nyɔ̍ blǐ gbò pa̍ wɛ̀ ɔ̍ iě ɔ̍ kɔn-dɛ̍ᵻ dǔ. Pò ɔ̍ iě ɛ̍ nu̍-ɛ, nɛ̀ ɔ̍ mu̍ kmu-nyɔ̍ laa̍ gbɛ̍n ɔ̍ iě ɔ̍ sa̍n ke̍ sàǐtòò, wɛ̀ ɔ̍ iě ɔ̍ gbò wa̍-a dǔ.

³⁰“Nyɔ̍ jɔ ɔ̀ se̍-a ǎn dɛ kɛ̍n nɛ-ɛ, nɛ̀ ɔ̍ tbaɛ ǐn bu̍hᵻ i̍ dɛbo. Nɛ̀ nyɔ̍ ɔ̀ se̍-a ǐn we̍ gbǎ à iě-a dɛ̍ tàdùè po̍-ɛ, nɛ̀ ɔ̍ gbà dɛ̍ ja̍i̍.

³¹Jɛ ǎn sèàɛ̍ mɔ̀ wlùh, gblɛ̍n sɔ̀ɛ̀n ke Nyɔsoa-a nynɛ̌ jii̍ nyni-ɛ kli̍hgbɛ̍ i̍h-a tìh-a mu̍ i̍ tǎli-ɛ. Jɛ nyɔ̍ ɔ̀ mu̍-a Nyɔsoa-a Sùù wɔ̍n blaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh se̍ i̍ tǎli la̍ kɔn.

³²Nyɔ̍ ɔ̀ mu̍-a Nyi̍ɔ̍-a Jǔ wlu̍ sɔ̀n pùn po̍-ɛ, ɔ̍ gblɛ̍n sɔ̀ɛ̀n-a tìh-a mu̍ i̍ tǎli-ɛ. Jɛ nyɔ̍ ɔ̀ mu̍-a Nyɔsoa-a Sùù wɔ̍n blaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh se̍ i̍ tǎli-ɛ mu̍ kaka ke nɔ̌ kmɔ̌-a kmɔ̌.”

³³Jusu la̍a̍, “Pò ìn blě tu̍ chɛ̀-ɛ, nɛ̀ àn mu̍ tu̍-a buǒ chɛ̀ blě. Pò ìn blě tu̍ sɔ̀n-ɛ, nɛ̀ àn mu̍ tu̍-a buǒ sɔ̀n blě. Dɛ̍nu̍ɛ, tu̍-a buǒ bo nyɔ̍-a juo-e ɛ̍ i̍.

³⁴Mɔ̀ wɔ̀ sɛ̍ᵻ, mɔ̀-a nu̍-a dɛ̍ᵻ sɔ̀nᵻɛ́, nɛ̀ ka mɔ̀-a mu̍ dɛ̍ chɛ̀-ɛ sà-a nu̍ ɛ? Dɛ̍nu̍ɛ, dɛ̍ ɛ̀ nɛ-a dě nyɔ̍ wlùh di̍i̍-ɛ, ɛ̍ bo wɔ̍n-a sà-a.

³⁵Dě nyɔ̍ chɛ̀ ja̍a̍ bo dɛ̍ chɛ̀-a sɔ-ɛ, dɛ̍nu̍ɛ, dɛ̍ chɛ̀ bo ɔ̍ naɛ wlùh i̍. Nɛ̀ dě nyɔ̍ sɔ̀n ja̍a̍ bo dɛ̍ sɔ̀n-a sɔ-ɛ, dɛ̍nu̍ɛ, dɛ̍ sɔ̀n bo ɔ̍ naɛ wlùh i̍.

³⁶“Jɛ bɔ̌ ǐn sèàɛ̍ mɔ̀ wlùh, ti̍ ɛ̍ mu̍-a sàwi̍h sì ti̍ nu̍ dǒ Nyɔsoa jǔ-ɛ, nyɔ̍ kli̍hgbɛ̍-a mu̍ tìh we̍ i̍ sèàɛ̍ dǒ se̍o̍nɛ kli̍hgbɛ̍ u̍h bla̍-a we̍.

³⁷Nɛ̀ dǒ àn chɛ̀-a wlu̍ kɛ̍n bo àn kɛ̀n nyǐ-ɛ ke àn kɛ̀n sà-a mu̍ sɔ.”

³⁸Wɛ̀ Fɛlesii nyɔ̍ ke telě nǎ poe nyɔ̍ la̍a̍ dě Jusu we̍, “Dlǔtu, po̍ jbaɛdih à iě jě.”

³⁹Iě ɔ̍ la̍a̍, “Ti̍laa nyɔ̍ la u̍h nyni gblɛ̍n-ɛ, iě u̍h-a blaɛ Nyɔsoa wɔ̍n. U̍h-a pɔ̀n jbaɛdih i̍, jɛ i̍h se̍ poe-ɛ mu̍. Jbaɛdih u̍h-a mu̍-a jě sǔh-ɛ, i̍h bo ìh nɛ-a Nyɔsoa-a tu̍owli po̍ nyɔ̍ Jona pùn.

⁴⁰Ka Jona nu̍-a sɔ̀n-wǐh ta̍a̍n ke wlù-wǐh ta̍a̍n dě smìɛ̍ klaa di̍i̍ nu̍-ɛɛ, kǎ Nyi̍ɔ̍-a Jǔ-a mu̍ sɔ̀n-wǐh ta̍a̍n ke wlù-wǐh ta̍a̍n nu̍-ɛ nu̍ ke dě wlù.

⁴¹Ti̍ ɛ̍ mu̍-a sàwi̍h sì ti̍ nu̍-ɛ, nɛ̀ Ninifa nyɔ̍-a mu̍ i̍ nyna u̍h iě ti̍laa nyɔ̍ la tìh dlǔ po̍. Dɛ̍nu̍ɛ, u̍h nɔ̀ɔ̍, ti̍ Jona bla̍-a tìh dě u̍h we̍-ɛ, wɛ̀ u̍h bǐi i̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Jona-a, ɛ̍ nɛ da̍a wɛ̀.

⁴²Ti̍ ɛ̍ mu̍-a sàwi̍h sì ti̍ nu̍-ɛ, nynɔ̌ ɔ̀ kɔn-a Siba bloa̍ wlu̍ i̍-ɛ, nɛ̀ ɔ̍ mu̍ i̍ nyna ɔ̍ iě ti̍laa nyɔ̍ la tìh dlǔ po̍. Dɛ̍nu̍ɛ, ɔ̍ sɔ dě bloa̍-a kɔ̍ la̍-a, wɛ̀ ɔ̍ ji̍ blǔh baa Sɔlɔma-a flɔ̍nwlùh dounᵻ we̍ po̍ la̍. Jɛ kaka la̍, dɛ̍ ɛ̀ ku̍-a wɔ̍n ɛ̀ sìì-a Sɔlɔma-a, ɛ̍ nɛ da̍a wɛ̀.”

⁴³Jusu la̍a̍, “Pò jeědih sɔ dǒ nyɔ̍ de̍e̍ wɛ̀ ɛ̍ iě tǐn la̍ i̍ pɔ̀n la̍ mu̍ dě pòɛ̍ɛ̍ kɛ̍n wɛ̀ ɛ̍ se̍-e tǐn la̍ jě-ɛ,

⁴⁴nɛ̀ ɛ̍ mu̍ ka dǎ, ‘Gbò kɔn di̍i̍ ǐn sɔ-aɛ, ǎn mu̍-e de̍ mu̍.’ Ɛ̍ iě-a de̍ mu̍-ɛ, nɛ̀ dě gbò-a chɛ̀ wo̍lo-ɛ i̍, nyɔ̍ dɔɔ se̍-a deě tǐn, iě dɛ̍ᵻ kli̍hgbɛ̍ po̍-eɛ gba̍a̍.

⁴⁵Wɛ̀ ɛ̍ mu̍ iě ɛ̍ ja jeědih mɛ̀sɔɔ̌n diih ìh kɔn gblɛ̍n nyni-a jii̍ ìh sìì-a ɛ̍ chɛ̀-ɛ. Wɛ̀ i̍h mu̍ iě i̍h tǐn deě. Sɔ tu̍ jɔ̍gbau laa̍ ɔ̍ bɔ̌ɛ-a dě di̍i̍ nɛ-ɛɛ, ɛ̍ nyni jii̍ ɛ̍ sìì sàì naɛ. Kǎ ɛ̍ mu̍ nɛ ke dǒ ti̍laa nyɔ̍ la ùh kɔn gblɛ̍n nyni-a jii̍-ɛ we̍.”

⁴⁶Jusu nɛ dǒ nyɔ̍ tlùgbei̍ laa̍ we̍ wlu la̍ sǔh, iě ɔ̍ de̍ ke ɔ̍ de̍di̍i̍ᵻ ji̍ u̍h nyna i̍ dě sɔ̀n u̍h-a pɔ̀n ɔ̍ we̍ wlu-ɛ i̍.

⁴⁷Wɛ̀ nyɔ̍ sèàɛ̍ ɔ̍ wlùh, u̍h la̍a̍, “Ìn de̍ ke ìn de̍di̍i̍ᵻ nyna i̍ dě sɔ̀n u̍h-a pɔ̀n dě ìn we̍ wlu-ɛ i̍”.

⁴⁸Iě ɔ̍ la̍a̍, “Nyɔ̍ bo ɔ̀ nu̍ ǐn de̍ ɛ? Nyɔ̍ bo ùh nu̍ ǐn de̍di̍i̍ᵻ ɛ?”

⁴⁹Wɛ̀ ɔ̍ te ɔ̍ kòà chèɛ̀ i̍, iě ɔ̍ la̍a̍, “Ùh la bo ùh nu̍ ǐn de̍ ke ǐn de̍di̍i̍ᵻ jɔ̍gbauᵻ.

⁵⁰Dɛ̍nu̍ɛ, nyɔ̍ ɔ̀ nu̍-a ǐn Baa nɛ-a dě ja̍i̍wlɔ̀-ɛ ɔ̍ wlùh dɛ̍-ɛ, nɛ̀ ɔ̍-ɔ bo ɔ̀ nu̍ ǐn de̍di̍i̍ jɔ̍gbau ke ǐn de̍di̍i̍ nynɔ̌gbaɔ ke ǐn de̍.”