Read Western Krahn Matio 13 Bible Online

Matio 13 - Western Krahn bible

Matio 13

¹Dǒ weɛ̍ due laa̍ di̍i̍ bo Jusu sǐ-i sɔ̀n, wɛ̀ ɔ̍ mu̍ ɔ̍ tè i̍ dǒ pɛ̍nu̍ klaa wɔ̍i̍n.

²Sɔ nyɔ̍ tlùgbei̍ gbǎ tàdùè dǒ ɔ̍ we̍, iě u̍h dlɛ̌ ɔ̍. Ɛ̍ nu̍ ɛ̍ iě ɔ̍ gbǎ dě blǎgbè di̍i̍ ɔ̍ tè i̍. Wɛ̀ nyɔ̍gbei laa̍ u̍h nyna i̍ dǒ gbuǔh kɛ̍n.

³Wɛ̀ ɔ̍ sèàɛ̍ u̍h dɛ̍ᵻ dɔu wlùh dě nɛnǎᵻ di̍i̍. Ɔ̍ la̍a̍, “Jɔ̍gbau due bo ɔ̀ mu̍ dɛ̍ᵻ jɔ̌ gbà la̍-a.

⁴Ɔ̍ gbà-a i̍h dě klè-ɛ, diih gbǎ dǒ wìè gblùh i̍, wɛ̀ diih gbǎ dǒ sɔɔ̌ᵻ blǔh kɛ̍n. Wɛ̀ diih gbǎ dě klàɛ̀n di̍i̍, wɛ̀ diih gbǎ dǒ gbablu̍h-u. Jih gbǎ-a dǒ wìè gblùh i̍-ɛ, na̍wɛ̍ᵻ di̍ i̍h. Jih gbǎ-a dǒ blǔh sɔɔ̌ nɛ-a dě sɔ̀n-ɛ kɛ̍n-ɛ, i̍h po̍ kɔɔ̌nᵻ suei̍, dɛ̍nu̍ɛ, i̍h-a blǔh chɛ̀wlɛ di̍i̍. Sɔ i̍h-a sɛ̌n-ɛ jě wlù mu̍ ka̍. Jɛ jlǔh kma-a i̍-ɛ, wɛ̀ i̍h wlɔ̍. Jih gbǎ-a dě klàɛ̀n di̍i̍-ɛ, i̍h ke wiǎᵻ ku̍-i tàdùè. Wɛ̀ wiǎᵻ mɔɛ i̍h dlǔ i̍. Jih gbǎ-a dǒ gbablu̍h i̍-ɛ, i̍h nmɔ-ɛ, wɛ̀ i̍h wa̍. Diih blě jɔ̌-a kmɛ, wɛ̀ diih blě kwela mɛ̀o̍, iě diih blě kwela ta̍a̍n.”

⁹Wɛ̀ Jusu la̍a̍, “Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.”

¹⁰Wɛ̀ ɔ̍ kòà ji̍ dǒ ɔ̍ we̍ iě u̍h tèle ɔ̍ i̍, u̍h la̍a̍, “Dɛ̍nu̍ pò ìn ja dě nyɔ̍ la we̍ wlu-ɛ, wɛ̀ àn po̍ nɛnǎᵻ sǔh ɛ?”

¹¹Wɛ̀ Jusu la̍a̍, “Mɔ̀ɔ̍ nɔ̀ɔ̍, Nyɔsoa nu̍ ɛ̍ wɛ̀ dɛ̍ᵻ ìh nɛ-a dě kwile de dě ɔ̍ kmɔ̌ wlu̍ i̍ kɔn-ɛ di̍i̍-ɛ, wɛ̀ mɔ̀ juo i̍h. Jɛ u̍h nɔ̀ɔ̍, u̍h se̍ i̍h-a dɛ̍ i̍ juo.

¹²Dɛ̍nu̍ɛ, nyɔ̍ ɔ̀ blě-a dɛ̍-ɛ, nɛ̀ ɔ̍ mu̍ dɛ̍ dɔu nyǐ-ɛ, wɛ̀ ɔ̍ iě tlùgbei̍ blě. Jɛ nyɔ̍ ɔ̀ se̍-a dɛ̍ blě-ɛ, nɛ̀ dɛ̍ juwɛ-a chɛ̀ ɔ̍ blě-a de-ɛ, ɛ̍ mu̍ ɔ̍ kwa̍a̍ sà-ɛ.

¹³Ɛ̀ nu̍-a ɛ̍ wɛ̀ pò ǐn ja dě u̍h we̍ wlu-ɛ, iě ǎn po̍-a nɛnǎᵻɛ́, ɛ̍ nu̍, u̍h-a gbèɛ̀ɛn i̍, jɛ u̍h-u jě i̍, u̍h-a pu̍e̍e dounᵻ i̍, jɛ u̍h-u wɔ̌n i̍, u̍h wɔ̍-ɔ wɔ̌n dɛ̍ɛ̍ i̍ ke.

¹⁴U̍h nu̍ ɛ̍ wɛ̀ Asaia-a tu̍owli nu̍ tìh-a taǐn. Ɔ̍ la̍a̍, ‘U̍h-a gbèɛ̀ɛn i̍, jɛ u̍h-u jě i̍. U̍h-a pu̍e̍e dounᵻ i̍, jɛ u̍h-u wɔ̌n dɛ̍ɛ̍ i̍.

¹⁵Dɛ̍nu̍ɛ, nyɔ̍ la u̍h ku̍ dlǔ. Iě u̍h-a sà nyɔ̍ dounᵻ. Iě u̍h ka̍n u̍h-a jlǐh. Pò ɛ̍ se̍ la̍a̍n nɛ de-ɛ, nɛ̀ u̍h-a jlǐh-a mu̍ i̍ jě de, u̍h-a dounᵻ iě i̍ wɔ̌n de, iě u̍h-a wlùh iě dɛ̍ɛ̍ i̍ wɔ̌n de. Nɛ̀ u̍h-a mu̍ nɔ̌ ǐn we̍ i̍ bǐi de wɛ̀ iě u̍h pǔh-i, kǎ Nyɔsoa dǎ.’

¹⁶“Jɛ mɔ̀ɔ̍ nɔ̀ɔ̍, mɔ̀ nmɔ i̍, mɔ̀-a dounᵻá wɔ̌n i̍, iě mɔ̀-a jlǐh-a jě i̍.

¹⁷Tìh-a taǐn ǎn sèàɛ̍ mɔ̀ wlùh, ìh mɔ̀ jě-aɛ, Nyɔsoa-a tu̍owli po̍ nyɔ̍ dɔu ke Nyɔsoa-a wlùh nu̍ nyɔ̍-a pɔ̀n i̍h jě-ɛ i̍ de, jɛ u̍h se̍ i̍h jě. U̍h-a pɔ̀n ìh mɔ̀ wɔ̌n-aɛ wɔ̌n-ɛ i̍ de, jɛ u̍h se̍ i̍h wɔ̌n.”

¹⁸Jusu la̍a̍, “Mɔ̀ po̍-e dounᵻ la̍ sǔh iě dɛ̍ᵻ jɔ̌ gbà nyɔ̍-a nɛnǎ ǐn po̍-aɛ gbɔ̀ sà.

¹⁹Nyɔ̍ ùh wɔ̌n-a Nyɔsoa-a kmɔ̌ wlu̍ i̍ kɔn-ɛa tu̍owli wɛ̀ u̍h se̍-a ɛ̍ i̍ wɔ̌n-ɛ, nɛ̀ Nyɔ̍ Sɔ̀n laa̍ bo ɔ̀ ji̍ wɛ̀ ɔ̍ sà ɛ̍ dǒ u̍h wlùh kɛ̍n. Ɛ̍ bo ɛ̀ nu̍-a dɛ̍ᵻ jɔ̌ ìh gbǎ-a dǒ wìè gblùh i̍ laa̍ na̍wɛ̍ᵻ sà-o.

²⁰Ìh gbǎ-a i̍ dǒ sɔɔ̌ᵻ blǔh kɛ̍n-ɛ, i̍h bo ìh wɔ̀ nyɔ̍ ùh wɔ̌n-a Nyɔsoa-a tu̍owli la sàǐtòò-ɛ, wɛ̀ u̍h gbɛ̍n-ɛ ɛ̍ sɔ̍nᵻ sɔɔ̌n i̍.

²¹Jɛ ɛ̍ se̍ sɛ̌n po̍ dě u̍h ku̍sɔ̀n, ɛ̍ kɔn klě jě-ɛ ji̍-a Nyɔsoa-a tu̍owli tìh-ɛ, wɛ̀ u̍h ple̍ suei̍.

²²Jɔ̌ jih gbǎ-a dě klàɛ̀n di̍i̍-ɛ, i̍h bo ìh wɔ̀ nyɔ̍ ùh wɔ̌n-a tu̍owli la wɛ̀ kmɔ̌-a sèò ke ɛ̍ pàn-dɛ̍ᵻ i̍ jbɛɛ-ɛ mɔɛ tu̍owli laa̍ dlǔ i̍. Ɛ̍ kɔn u̍h se̍ tlo.

²³Jɔ̌ ìh gbǎ-a i̍ dǒ gbablu̍h kɛ̍n-ɛ, i̍h bo ìh wɔ̀ nyɔ̍ ùh wɔ̌n-a tu̍owli iě u̍h wɔ̌n-a dě ɛ̍ di̍i̍ i̍-ɛ. U̍h bo ùh tlo-a jɔ̌ dɔu, wɛ̀ jɔ̌ diih nu̍-a kmɛ, diih nu̍-a kwela mɛ̀o̍, iě diih nu̍-a kwela ta̍a̍n.”

²⁴Jusu po̍ nɛnǎ dɛɛ dě u̍h we̍, ɔ̍ la̍a̍, “Nyɔsoa-a kmɔ̌ wlu̍ i̍ kɔn-ɛ ke nɛnǎ la wɔ̀ɛ. Jɔ̍gbau due bo ɔ̀ tù dɛ̍ᵻ jɔ̌ chɛ̀ dě ɔ̍ blǐ klè.

²⁵Ɔ̍ wɔ̀-a klèwa̍ po̍-ɛ, nyɔ̍ kli̍hgbɛ̍-a mɔ̌ la̍-ɛ sǔh, wɛ̀ ɔ̍ nyɛ̌-nyɔ̍ mu̍ dě klè-a chɛ̀ tòloo, iě ɔ̍ tù pei jɔ̌ dě ɔ̍ kwǐ kɛnɛ̌ laa̍ nynɛ̌ we̍, wɛ̀ ɔ̍ mu̍.

²⁶Ti̍ i̍h-a wa̍-a la̍-ɛ, sɔ pei laa̍ i̍h-a wa̍ la̍-ɛ ke sǔh. Iě i̍h dǔ tà wlǔh-ɛ.

²⁷Wɛ̀ klè kɔn nyɔ̍-a pòi̍nynuu̍ mu̍ dě ɔ̍ we̍, wɛ̀ u̍h la̍a̍, ‘Nyɔ̍ klaa, na̍a̍ dɛ̍ᵻ jɔ̌ chɛ̀ bo ìn tù dě klè laa̍ lě. Tà pei sɔ-ɔ wɛ̀ i̍h nɛ dě i̍h nynɛ̌ we̍ ɛ?’

²⁸Ɔ̍ la̍a̍, ‘Ǎn nyɛ̌-nyɔ̍ bo ùh nu̍ dɛ̍ la.’ U̍h la̍a̍, ‘Àn pɔ̀n à iě i̍h sà la̍ mu̍ ae?’

²⁹Ɔ̍ la̍a̍, ‘Iěe, dɛ̍nu̍ɛ, pò mɔ̀ ja i̍h sà-ɛ, nɛ̀ mɔ̀-a mu̍ kɛnɛ̌ laa̍ wlù i̍ sà ke.

³⁰Mɔ̀ tǎli i̍h i̍, i̍h iě tàdùè ku̍ i̍ te̍e̍ wɛ̀ ɛ̍ iě i̍h-a chɛ̍n-ɛ jɛɛ. Nɛ̀ ǎn mu̍ i̍h-a chɛ̍n-nyɔ̍ wlùh sèàɛ̍ u̍h iě pei laa̍ wlù i̍ sà sàǐtòò u̍h iě i̍h-a pǔnᵻ sa̍n, wɛ̀ i̍h iě fɔ̍n-ɛ. Wɛ̀ u̍h iě kɛnɛ̌ laa̍ chɛ̍n-ɛ dǔ, u̍h iě i̍h ja wɛ̀ à iě i̍h slǎ po̍.’ ”

³¹Jusu po̍ nɛnǎ dɛɛ dě u̍h we̍, ɔ̍ la̍a̍, “Jě à dǎɛ majlɛkɛ jɔɛ̍ bo jɔ̍gbau due tù dě ɔ̍ blǐ klè. Ɛ̍ wàn i̍ ɛ̍ sìì dɛ̍ᵻ jɔ̌ kli̍hgbɛ̍ nyɔ̍-a tù-aɛ gbɛɛ, jɛ pò ɛ̍ ku̍-ɛ, nɛ̀ ɛ̍ nu̍ tu̍ slìì dǒ ɛ̍ ba̍ᵻ kɛ̍n dě klè. Wɛ̀ na̍wɛ̍ᵻá ji̍ iě i̍h-a po̍ tlěᵻ dě ɛ̍ kàgblih nynɛ̌. Kǎ Nyɔsoa-a kmɔ̌ wlu̍ i̍ kɔn-ɛa tìh nɛ.”

³²

³³Jusu po̍ nɛnǎ dɛɛ dɛ dě u̍h we̍, ɔ̍ la̍a̍, “Nyɔsoa-a kmɔ̌ wlu̍ i̍ kɔn-ɛ wɔ̀ blèe̍ fù-i dɛ̍ᵻ ìh nynɔ̌ due dǔ-a iě ɔ̍ po̍-a i̍h blèe̍ pèbèè dɔu we̍-ɛ. Wɛ̀ ɔ̍ sìàɛ̍n i̍h-i, iě i̍h fù-i blèe̍ gbo̍-a chɛ̀.”

³⁴Ìh kli̍hgbɛ̍ la Jusu-a wlu-a dě nyɔ̍ tlùgbei̍ la we̍-ɛ, dě nɛnǎᵻ di̍i̍ bo ɔ̍ jaɛ i̍h. Ɔ̍-ɔ ja dɛ̍-ɛ sà dě u̍h we̍ wɛ̀ ɔ̍-ɔ se̍ nɛnǎ po̍.

³⁵Ɔ̍ nu̍ ìh la wɛ̀ Nyɔsoa-a tu̍owli po̍ nyɔ̍-a wlu̍ iě tìh-a taǐn nu̍. Wlu̍-a chɛ̀ la̍a̍, “Ǐn ja dě u̍h we̍ wlu-ɛ, nɛnǎᵻ bo ǎn mu̍ po̍. Dɛ̍ᵻ ìh nyɔ̍ se̍-a juo sɔ dě kmɔ̌-a gbɔ̀ tè la̍-ɛ, i̍h bo ǎn mu̍-u sà dě u̍h we̍.”

³⁶Wɛ̀ Jusu sɔ dǒ nyɔ̍ tlùgbei̍ laa̍ we̍ iě ɔ̍ mu̍ dě gbò. Wɛ̀ ɔ̍ kòà mu̍ ɔ̍ kɛ̍n i̍, iě u̍h la̍a̍, “À pɔ̀n pei ìh nɛ-a dě klè laa̍ ìè i̍h-a nɛnǎ we̍ i̍ sèàɛ̍ dě à we̍.”

³⁷Wɛ̀ ɔ̍ la̍a̍, “Ào̍. Jɔ̍gbau ɔ̀ tù-a dɛ̍ᵻ jɔ̌ chɛ̀-ɛ, ɔ̍ bo ɔ̀ nu̍ Nyi̍ɔ̍-a Jǔ.

³⁸Klè bo ɛ̀ nu̍ kmɔ̌, nɛ̀ dɛ̍ᵻ jɔ̌ chɛ̀ laa̍ bo ìh nu̍ nyɔ̍ ùh kɔn-a dǒ Nyɔsoa-a kmɔ̌ wlu̍ i̍ kɔn-ɛ we̍-ɛ. Pei laa̍ bo ìh nu̍ nyɔ̍ ùh kɔn-a dǒ Nyɔ̍ Sɔ̀n laa̍ we̍-ɛ.

³⁹À nyɛ̌-nyɔ̍ Kǔ bo ɛ̀ tù i̍h. Nɛ̀ kɛnɛ̌ chɛ̍n-ɛ nu̍ kmɔ̌-a dlǔ i̍ chlà-a. Wɛ̀ i̍h-a chɛ̍n-nyɔ̍ nu̍ Nyɔsoa-a ǐnchɔ̀.

⁴⁰Ɛ̀ kɔn ba̍ u̍h nu̍-a pei laa̍ wlù i̍ sà-a wɛ̀ u̍h fɔ̍n-a i̍h-ɛ, ɛ̍ kɔn ba̍ bo ɛ̀ mu̍ nɛ ke dě kmɔ̌-a dlǔ i̍ chlà la̍.

⁴¹Nyi̍ɔ̍-a Jǔ-a mu̍ ɔ̍ ǐnchɔ̀ dbo̍, wɛ̀ nyɔ̍ kli̍hgbɛ̍ ùh-a po̍-a nyɔ̍gbei dɛ̍ᵻ sɔ̀nᵻ kɛ̍n, ɛ̍ ke juh kli̍hgbɛ̍-a nu̍-a gblɛ̍n sɔ̀ɛ̀n dě Nyɔsoa-a kmɔ̌ wlu̍ i̍ kɔn-ɛ di̍i̍-ɛ, wɛ̀ i̍h iě u̍h wlù i̍ sà.

⁴²Wɛ̀ i̍h iě u̍h dě kàn nɛ̍ di̍i̍ po̍. Dě u̍h-a mu̍ nɛ u̍h iě fìn, u̍h iě nynɛ̌ di̍ kìàǎnkìàǎn.

⁴³Nɛ̀ Nyɔsoa-a wlùh nu̍ nyɔ̍-a mu̍ fa̍n ka jlǔh-ɛ dě u̍h Baa Nyɔsoa-a kmɔ̌ wlu̍ i̍ kɔn-ɛ di̍i̍. Nyɔ̍ ɔ̀ flɔn-a dounᵻɛ́, nɛ̀ ɔ̍ po̍-e dounᵻ.”

⁴⁴Jusu la̍a̍, “Dɛ̍ ɛ̀ ke Nyɔsoa-a kmɔ̌ wlu̍ i̍ kɔn-ɛ wɔ̀ɛ-a, ɛ̍ la. Pàn-dɛ̍ due bo ɛ̀ nɛ dǒ kwlǎ gbɔ̍ di̍i̍ ɛ̀ sìle, wɛ̀ jɔ̍gbau due tɛ̌n ɛ̍ i̍. Wɛ̀ ɔ̍ kaɛn ɛ̍ dɛ̍ kɛ̍n dode̍. Iě ɔ̍ blě mɔna̍ nu̍-ɛ ɔ̍ mu̍ wlɔ̀. Wɛ̀ ɔ̍ ple̍ ɔ̍ kɔn-dɛ̍ᵻ kli̍hgbɛ̍, iě ɔ̍ tɛ̀n kwlǎ gbɔ̍ laa̍.”

⁴⁵Jusu la̍a̍, “Dɛ̍ dɛɛ ɛ̀ ke Nyɔsoa-a kmɔ̌ wlu̍ i̍ kɔn-ɛ wɔ̀ɛ-a, ɛ̍ la. Dɛ̍ ple̍-nyɔ̍ due bo ɔ̀ pɔ̀n pɛ̀ɛ̀-dɛ̍ᵻ chɛ̀ i̍. Pɛ̀ɛ̀-dɛ̍ᵻá chɛ̀ ke wli̍h mu̍i we̍, wɛ̀ i̍h gbǎ dɛ̍kɛ̍n.

⁴⁶Ti̍ ɔ̍ jě-a i̍h-a due ɛ̀ ku̍-a wɔ̍n-ɛ, iě ɔ̍ mu̍ wɛ̀ ɔ̍ ple̍ ɔ̍ kɔn-dɛ̍ᵻ kli̍hgbɛ̍, iě ɔ̍ tɛ̀n ɛ̍.”

⁴⁷Jusu la̍a̍, “Nɛnǎ la ɛ̍ ke Nyɔsoa-a kmɔ̌ wlu̍ i̍ kɔn-ɛ wɔ̀ɛ dɛ ke. Sɔ̍ bo smìi̍ dbǎ nyɔ̍ tè dǒ pɛ̍nu̍ klaa kɛ̍n, wɛ̀ ɛ̍ gbɛ̍n smìi̍ kaɛn kaɛn kli̍hgbɛ̍ nɛ-a dě niɔ̍-ɛ.

⁴⁸Ti̍ sɔ̍ jǐ-a wɛ̀-ɛ, wɛ̀ u̍h chlì ɛ̍ dǒ gbuǔh kɛ̍n. Wɛ̀ u̍h tè i̍ nmɔ jii̍, iě u̍h-a tɛ̌n smìi̍ laa̍ we̍ i̍. Wɛ̀ u̍h-a po̍ i̍h-a chɛ̀ naɛ dě blewi̍h di̍i̍, iě u̍h-a po̍ i̍h-a pɔ̀ɔ̍pìe̍ naɛ de̍.

⁴⁹Kǎ ɛ̍ mu̍ nɛ dǒ kmɔ̌-a dlǔ i̍ chlà la̍. Nyɔsoa-a ǐnchɔ̀-a mu̍ ji̍ wɛ̀ i̍h iě gblɛ̍n sɔ̀ɛ̀n nyɔ̍ ke Nyɔsoa-a wlùh nu̍ nyɔ̍ we̍ sèàɛ̍.

⁵⁰Wɛ̀ i̍h iě gblɛ̍n sɔ̀ɛ̀n nyɔ̍ dě kàn nɛ̍ di̍i̍ po̍. Dě u̍h-a mu̍ nɛ u̍h iě fìn, u̍h iě nynɛ̌ di̍ kìàǎnkìàǎn.”

⁵¹Wɛ̀ Jusu tèle ɔ̍ kòà i̍, ɔ̍ la̍a̍, “Ìh kli̍hgbɛ̍ la ǐn bla̍-aɛ, mɔ̀ wɔ̌n i̍h-i ae?” Iě u̍h la̍a̍, “I̍i̍n, à wɔ̌n i̍h-i.”

⁵²Wɛ̀ ɔ̍ la̍a̍ dě u̍h we̍, “Ɛ̍ kɔn tìh pò telě nǎ poe nyɔ̍ laa̍ pò ɔ̍ poe-ɛ slɛ̌ chèɛ̀ i̍ wɛ̀ dǒ Nyɔsoa-a kmɔ̌ wlu̍ i̍ kɔn dɛ we̍-ɛ, nɛ̀ ɔ̍ wɔ̀ gbò joi wɛ̀. Nɛ̀ ɔ̍ bo ɔ̀ mu̍ la̍ blewi̍h delee ke i̍h-a soaᵻ naɛ dě dɛ̍ i̍ tè gbò di̍i̍ sà ɔ̍ iě i̍h sɔ̀n sǐ-i.”

⁵³Ti̍ Jusu wɔ̀-a nɛnǎᵻ laa̍ po̍-ɛ, iě ɔ̍ sɔ dě tà-a chɛ̀.

⁵⁴Ɔ̍ ji̍-a de̍ dǒ ɔ̍ blǐ wlɔ̀-ɛ, wɛ̀ ɔ̍ po̍ nyɔ̍gbei nǎ dě Juu nyɔ̍-a wɛɛ sà gbò sɔ̀n. Sɔ ɛ̍ wlǔh i̍ u̍h de̍e̍. Wɛ̀ u̍h-a tèle-e we̍ i̍, u̍h la̍a̍, “Jbaɛdih klaaᵻ la ke flɔ̍nwlùh dɔu la tà jǔ la ɔ̍ sà i̍h ɛ?

⁵⁵Ɛ̍ se̍ ɔ̀ nu̍-a kɔ̍-nyɔ̍-a jǔ-ɛ ae? Ɛ̍ se̍ ɔ̀ kɔn de̍ nu̍-a Mɛle-ɛ ae? Jǔ la ɛ̍ se̍ ɔ̀ kɔn de̍di̍i̍ᵻ nu̍-a Chiin ke Josɛ ke Samo ke Juda-a ae?

⁵⁶Ɛ̍ se̍ ɔ̀ kɔn de̍di̍i̍ᵻ nynɔ̌gbaɔᵻ kli̍hgbɛ̍ nɛ-a da̍a à we̍-ɛ ae? Nɛ̀ tà ɔ̍ sà ìh dɔu la wɛ̀ ɔ̍ nu̍ i̍h ɛ?”

⁵⁷Sɔ u̍h se̍ ɔ̍ jě-ɛ jbǎ. Wɛ̀ Jusu la̍a̍ dě u̍h we̍, “U̍h-a tè Nyɔsoa-a tu̍owli po̍ nyɔ̍ ja̍ tà kli̍hgbɛ̍. Jɛ dǒ ɔ̍ blǐ wlɔ̀ ke dě ɔ̍ blǐ gbò nyɔ̍ gbài̍ bo u̍h-u tè ɔ̍ ja̍.”

⁵⁸Sɔ ɔ̍ se̍-o jbaɛdih dɔu poe, dɛ̍nu̍ɛ, nyɔ̍ nɛ-a doǒ-ɛ, u̍h se̍ ɔ̍ wlùh gbaɛ.