Read Western Krahn Matio 14 Bible Online

Matio 14 - Western Krahn bible

Matio 14

¹Dǒ-o bo blǔh baa Ɛlo wɔ̌n-ɛ Jusu-a pɔ̀n.

²Sɔ ɔ̍ jajeɛ̍ Chɔɔn ɔ̍ dbǎ-a tɛin-ɛ, ɔ̍ bo de. Wɛ̀ ɔ̍ la̍a̍ dě ɔ̍ dbo̍ sɔ̀n nui nyɔ̍ we̍, “Ɔ̀ la Chɔɔn ɔ̀ po̍-a nyɔ̍ nǐ dlǔ-ɛ bo ɔ̀ wlǔh-e, ɛ̍ kɔn ɔ̍ blě gbǐh iě ɔ̍ po̍ jbaɛdih.”

³Ɛ̀ kɔn tìh Ɛlo-a bla̍-a dɛ̍ la-ɛ, ɔ̍ bo ɔ̀ gbɛ̍n Chɔɔn tɛin Ɛlodia tìh. Ɛlodia ɔ̀ nu̍-a Ɛlo deǐ Felɔ-a nynɔ̌-ɛ, ɔ̍ bo Ɛlo sà Felɔ kwa̍a̍. Wɛ̀ Chɔɔn la̍ nɛ̀ ɛ̍ se̍ i̍ slɛ̌ Ɛlo iě ɔ̍ deǐ nynɔ̌ kwa̍a̍ sà. Ɛ̍ kɔn tìh Ɛlo gbɛ̍n ɔ̍ wɛ̀ ɔ̍ sa̍n ɔ̍, iě ɔ̍ po̍ ɔ̍ kasoo.

⁵Ɛlo-a pɔ̀n ɔ̍ dbǎ i̍ de, jɛ ɔ̍ ple̍ Juu nyɔ̍ jǔ, dɛ̍nu̍ɛ, u̍h-a slè-e Chɔɔn Nyɔsoa-a tu̍owli po̍ nyɔ̍.

⁶Ti̍ Ɛlo dǎ-a peě dǒ ɔ̍ wlǔh-weɛ̍ di̍i̍-ɛ, dǒ-o bo Ɛlodia-a jǔ nynɔ̌gbaɔ de̍le-e dǒ u̍h we̍, sɔ ɛ̍ pɛ̌n-ɛ Ɛlo-a pɔluh i̍ kaa̍.

⁷Iě ɔ̍ po̍ wlu̍ tɔ̀ma̍a̍ wɛ̀ ɔ̍ slɛ̀ɛ̀n. Ɔ̍ la̍ dɛ̍ nynɔ̌gbaɔ jǔ-a mu̍-a jbǎ-ɛ, ɔ̍ mu̍ ɛ̍ ɔ̍ nyǐ.

⁸Sɔ slɛ̌ ɔ̍ de̍ po̍-a bo ɔ̍ mu̍ we̍, iě ɔ̍ jbǎ Chɔɔn-a dlǔ. Ɔ̍ la̍a̍, “Chɔɔn ɔ̀ po̍-a nyɔ̍ nǐ dlǔ-ɛ, po̍ ɔ̍ dlǔ dě plɛ̌ɛ di̍i̍ da̍a ìè ɛ̍ ǐn nyǐ.”

⁹Sɔ ɛ̍ po̍ blǔh baa-a wlùh dě de̍i̍, jɛ ɔ̍ se̍ dlǔ fùna-a bɛ̌ɛ, dɛ̍nu̍ɛ, ɔ̍ po̍ wlu̍ tɔ̀ma̍a̍ dǒ ɔ̍ dihwi̍hᵻ jlǐhwai. Ɛ̍ kɔn ɔ̍ wɔ̌n ɛ̍ iě laǎn nɛ.

¹⁰Wɛ̀ ɔ̍ dbo̍ nyɔ̍ iě u̍h chɛ̍n Chɔɔn dlǔ i̍ dě kasoo.

¹¹Wɛ̀ u̍h blě-e ɔ̍ dlǔ dě plɛ̌ɛ di̍i̍, iě u̍h nyǐ ɛ̍ nynɔ̌gbaɔ jǔ laa̍, iě ɔ̍ nyǐ ɛ̍ ɔ̍ de̍.

¹²Wɛ̀ Chɔɔn-a kòà mu̍, iě u̍h dǔ ɔ̍ kǔ-u, wɛ̀ u̍h tè ɔ̍ i̍. Wɛ̀ u̍h mu̍ u̍h sèàɛ̍ Jusu wlùh.

¹³Ti̍ Jusu wɔ̌n-a Chɔɔn-a mɛ̌ɛ pɔ̀n-ɛ, wɛ̀ ɔ̍ wlǔh-i gbààn, iě ɔ̍ gbǎ dě blǎgbè di̍i̍ wɛ̀ ɔ̍ chɛn-ɛ ɔ̍ chɛ̀ gbɔ̍i̍. Nyɔ̍gbei wɔ̌n-a pɔ̀n la-ɛ, wɛ̀ u̍h sà bloɔ̍ i̍ na-a wlɔ̀ᵻ i̍ u̍h mu̍ ɔ̍ kɛ̍n i̍.

¹⁴Jusu sɔ-a dě blǎgbè di̍i̍ ka-ɛ, ɔ̍ jě nyɔ̍ tlùgbei̍ laa̍. Sɔ u̍h-a po̍ ɔ̍ wɔɛ kaa̍, wɛ̀ ɔ̍ bɔ̌-ɛ u̍h-a wɛ̌ᵻ.

¹⁵Ti̍ dě nyɔ̍ kɔnɔᵻ mlǎᵻá ji̍-a i̍ gbe la̍-ɛ, wɛ̀ Jusu-a kòà mu̍ dě ɔ̍ we̍, u̍h la̍a̍, “Nɔ̀ɔ̍ la nɔ̌ tɛn-ɛ, nɔ̌ chɛn gbɔ̍i̍, wɛ̀ ti̍-a sì la̍-ɛ. Dbo̍ nyɔ̍ la de̍ i̍, u̍h iě u̍h-a chɛ̀-a di̍-dɛ̍ᵻ tɛ̀n la̍ mu̍ wlɔ̀ᵻ di̍i̍ i̍.”

¹⁶Wɛ̀ Jusu la̍a̍, “U̍h se̍ kɔn u̍h iě de̍ i̍ mu̍. Mɔ̀-a chɛ̀ nyǐ u̍h di̍-dɛ̍ᵻ u̍h iě di̍.”

¹⁷U̍h la̍a̍ dě ɔ̍ we̍, “Blèe̍ gba̍nᵻ m̀m̌ ke smìi̍ sɔɔ̌n gbài̍ bo à blě da̍a.”

¹⁸Wɛ̀ ɔ̍ la̍a̍, “Mɔ̀ ja i̍h da̍a ǐn we̍.”

¹⁹Wɛ̀ ɔ̍ sèàɛ̍ nyɔ̍ laa̍ wlùh u̍h iě i̍ tìèe̍ dǒ pei kɛ̍n. Wɛ̀ ɔ̍ dǔ blèe̍ gba̍nᵻ m̀m̌ ke smìi̍ sɔɔ̌n laa̍, iě ɔ̍ gbɛ̀n dě ja̍i̍, wɛ̀ ɔ̍ po̍ Nyɔsoa tlɔ̌. Iě ɔ̍ chɛɛn blèe̍ laa̍ i̍, wɛ̀ ɔ̍ nyǐ i̍h ɔ̍ kòà. Iě u̍h gblè i̍h nyɔ̍ laa̍ jii̍.

²⁰Nyɔ̍ kli̍hgbɛ̍ di̍ dɛ̍ wɛ̀ u̍h dbo̍. U̍h wɔ̀-aɛ, iě ɔ̍ kòà tɛ̌n blèe̍ chɛblih sie-a i̍-ɛ, wɛ̀ i̍h jǐ taaᵻá pùè jɔ̌ sɔɔ̌n.

²¹Nyɔ̍ ùh di̍-a dɛ̍-ɛ, pò ìn slè u̍h-ɛ, u̍h bɛ̌ɛ jɔ̍gbauᵻá wlù m̀m̌ (5,000) nu̍-ɛ. Nynɔ̌gbaɔᵻ ke nynuu̍plìh nɔ̀ɔ̍, u̍h se̍ slè-ɛ.

²²U̍h wɔ̀-a dɛ̍ di̍-ɛ, wɛ̀ Jusu po̍ ɔ̍ kòà dě blǎgbè di̍i̍ u̍h iě ɔ̍ jǔ mu̍ dě pɛ̍nu̍ klaa de̍e̍. Nɛ̀ kǎ ɔ̍ dbo̍ nyɔ̍ laa̍ de̍ i̍ ke.

²³Ɔ̍ wɔ̀-a u̍h de̍ i̍ dbo̍-ɛ, wɛ̀ ɔ̍ mu̍ dě tlu̍hᵻ di̍i̍ ɔ̍ iě ba̍le. Dě ɔ̍ nɛ due nɛ wɛ̀ wlù wɔ̀.

²⁴Nɛ̀ blǎgbè ti̍ɛ̍ɛn gbuǔh we̍ i̍ wɛ̀ dǒ ti̍ laa̍ di̍i̍. Nɛ̀ blǎgbè-a chɛ̀ ɛ̍ sèke-e kleǐn dǒ pɛ̍nu̍ laa̍ ɛ̍ dǒ we̍, dɛ̍nu̍ɛ, poɔ bo ɛ̀ poe ɛ̍ dǒ.

²⁵Ɛ̍ nu̍ sɔ̀n wɔ̍i̍n, wɛ̀ Jusu blě nǐ kɛ̍n i̍ na-a ɔ̍ mu̍ dě ɔ̍ kòà we̍.

²⁶Dǒ u̍h jě-e ɔ̍, nɛ̀ ɔ̍ na nǐ kɛ̍n i̍. Sɔ ɛ̍ po̍ u̍h faɔn kaa̍. Iě u̍h-a wǐi i̍, u̍h la̍a̍, “Kǔpàùn bo.”

²⁷Jɛ Jusu tèwe ɔ̍ wlu, ɔ̍ la̍a̍, “Mɔ̀ dbǎ ku̍, mɔ̍ bo, mɔ̀ bɔ̌ faɔn ple̍-ɛ.”

²⁸Wɛ̀ Pitɛ la̍a̍, “Joi, pò ɛ̍ tù mɔ̀ chɛ̀ ka-ɛ, nɛ̀ ìn wlu la̍ iě ìn we̍ ji̍ dǒ nǐ kɛ̍n.”

²⁹Wɛ̀ ɔ̍ la̍a̍, “Ji̍.” Wɛ̀ Pitɛ sɔ dě blǎgbè di̍i̍ ɔ̍ sǐ dǒ nǐ kɛ̍n i̍. Iě ɔ̍ blě na-a ɔ̍ mu̍ Jusu wlì.

³⁰Jɛ dɛ̍ poɔ-a nu̍-a la̍ ji̍-ɛ, sɔ ɛ̍ po̍ ɔ̍ faɔn. Sɔ ɔ̍ pa̍ la̍ nǐ wlù sǔh. Wɛ̀ ɔ̍ wǐ, ɔ̍ la̍a̍, “Joi, sèìe m lě.”

³¹Wɛ̀ Jusu tèwe ɔ̍ po̍ ɔ̍ sɔ̍n we̍, iě ɔ̍ gbɛ̍n ɔ̍. Iě ɔ̍ la̍a̍, “Àn wlùh gbaɛ se̍ i̍ ku̍, dɛ̍ bo ɛ̀ po̍ ìn kɛ̍-ɛ ɛ?”

³²Wɛ̀ u̍h jǎ dě blǎgbè di̍i̍ dode̍, sɔ poɔ bɔ̌-ɛ sǔh.

³³Wɛ̀ ɔ̍ kòà nɛ-a dě blǎgbè di̍i̍-ɛ, iě u̍h-a sà ɔ̍ wɛɛ, u̍h la̍a̍, “Mɔ̀ la mɔ̀ Nyɔsoa-a Jǔ chɛ̀.”

³⁴Ti̍ u̍h tàn-a nǐ-ɛ, dě Kɛnɛslɔɛ fɔɔ bo u̍h kɔ̍-ɛ gbuǔh.

³⁵Nyɔ̍ ùh nɛ-a dě fɔ̌ laa̍ we̍-ɛ, ti̍ u̍h juo-a Jusu i̍-ɛ, wɛ̀ u̍h dbo̍ tu̍owli blǔh kli̍hgbɛ̍ sì-a u̍h de̍ i̍-ɛ kɛ̍n i̍. Wɛ̀ u̍h ja u̍h-a poa-nyɔ̍ kli̍hgbɛ̍ dǒ ɔ̍ we̍.

³⁶Iě u̍h ba̍le ɔ̍, ɛ̍ tù ɔ̍ plɛ̀i̍-a mlǎ-a chɛ̀-ɛ, poa-nyɔ̍ iě ɛ̍ i̍ tǔh. Sɔ nyɔ̍ kli̍hgbɛ̍ ùh tǔh-a ɛ̍ i̍-ɛ, u̍h pǔh-i.