Read Western Krahn Matio 16 Bible Online

Matio 16 - Western Krahn bible

Matio 16

¹Wɛ̀ Fɛlesii nyɔ̍ ke Sadiusii nyɔ̍ ji̍ dǒ Jusu we̍. Wɛ̀ u̍h tɛ̀n ɔ̍, u̍h la̍a̍, “Ji̍ ìè jbaɛdih po̍ à iě jě pò Nyɔsoa-a gbǐh nɛ dě ìn ja̍a̍ kɔ̌ɔ.”

²Wɛ̀ ɔ̍ la̍a̍, “Pò ɛ̍ nu̍ flìwe̍-ɛ, nɛ̀ mɔ̀ la̍a̍, ‘Dě ja̍i̍-a mu̍ la̍ i̍ che̍ɛ̍ɛn ke̍ o, dɛ̍nu̍ɛ, ja̍u̍n sàni i̍.’

³Nɛ̀ pò ɛ̍ nu̍ klàɛ̍we̍-ɛ, nɛ̀ mɔ̀ la̍a̍, ‘Nǐ-a mu̍ dba̍ sèàn, dɛ̍nu̍ɛ, dě ja̍i̍ nɛ tùɛ̌ntùɛ̌n.’ Pò mɔ̀ gbɛ̀n ja̍u̍n ja̍-ɛ, nɛ̀ ka ɛ̍ mu̍-a nu̍-ɛ, mɔ̀-a sèàɛ̍ ɛ̍ we̍ i̍. Jɛ dɛ̍ᵻ ìh-a nɛ-a ka da̍a ti̍ la di̍i̍-ɛ, mɔ̀ se̍ i̍h-a dɛ̍ we̍ i̍ sèàɛ̍ bɛ̌ɛ.

⁴Ti̍laa nyɔ̍ la u̍h nyni gblɛ̍n-ɛ, iě u̍h-a blaɛ Nyɔsoa wɔ̍n. U̍h-a pɔ̀n jbaɛdih i̍, jɛ i̍h se̍ poe-ɛ mu̍. Jbaɛdih u̍h-a mu̍-a jě sǔh-ɛ, i̍h bo ìh nɛ-a Jona pùn.” Wɛ̀ Jusu sɔ dǒ u̍h we̍, ɔ̍ mu̍ ɔ̍ dɛ̍.

⁵Jɛ ti̍ Jusu ke ɔ̍ kòà tàn-a u̍h gbǎ-a dě pɛ̍nu̍ klaa de̍e̍-ɛ, sɔ ɔ̍ kòà mǎle-e u̍h se̍ blèe̍ gba̍.

⁶Wɛ̀ Jusu la̍a̍ dě u̍h we̍, “Mɔ̀ tù mɔ̀-a chɛ̀ jlǐhɛ̍, mɔ̀ nu̍ nɛnɛ̌ dǒ Fɛlesii nyɔ̍ ke Sadiusii nyɔ̍-a blèe̍ fù-i dɛ̍ᵻ we̍.”

⁷Iě u̍h-a sǔh-a pu̍e̍e wlùh i̍, u̍h la̍a̍, “Nɛ̀ à se̍ blèe̍ ja dɛbo ɛ̍ kɔn ɔ̍ bla̍ dɛ̍ la kɔ̌ɔ-a.”

⁸Sɔ ɔ̍ juo-o dɛ̍ i̍, wɛ̀ ɔ̍ tèle u̍h i̍. Ɔ̍ la̍a̍, “Dɛ̍ kɔn se̍ blèe̍ ja tìh mɔ̀-a sǔh-a pu̍e̍e ɛ? Mɔ̀-a wlùh gbaɛ se̍ i̍ ku̍ gbɛɛ̍.

⁹Mɔ̀ se̍ dɛ̍ɛ̍ i̍ wɔ̌n ke̍ sǔh ae? Blèe̍ gba̍nᵻ m̀m̌ laa̍ jɔ̍gbauᵻá wlǔ m̀m̌ (5,000) di̍-aɛ, i̍h-a tìh se̍ dǒ mɔ̀ wlì i̍ sǐ ae? Sɔ taaᵻ tìèwe̍ mɔ̀ jǐ-i dǒ i̍h-a chɛblih we̍ ɛ?

¹⁰Nɛ̀ mɔ̀ à wɔ̌n dě gba̍nᵻ mɛ̀sɔɔ̌n laa̍ we̍ ke, ìh jɔ̍gbauᵻá wlǔ nyìɛ̍ (4,000) di̍-aɛ, sɔ taaᵻ tìèwe̍ mɔ̀ jǐ-i dɛ ke dǒ i̍h-a chɛblih we̍ ɛ?

¹¹Ti̍ na̍a̍ mɔ̀ nu̍ nɛnɛ̌ dǒ Fɛlesii nyɔ̍ ke Sadiusii nyɔ̍-a blèe̍ fù-i dɛ̍ᵻ we̍-ɛ, nɛ̀ ɛ̍ se̍-a blèe̍ chɛ̀ɛ̌chɛ̀ ǐn se̍-a dǎ-a, mɔ̀ se̍-o dɛ̍ i̍ juo ae?”

¹²Sɔ u̍h juo-o dɛ̍ i̍ ka ɔ̍ se̍-a u̍h slɛ̌n tù dǒ blèe̍ fù-i dɛ̍ᵻ chɛ̀ɛ̌chɛ̀ we̍-ɛ. Jɛ ka u̍h iě-a Fɛlesii ke Sadiusii nyɔ̍-a nyɔ̍ nǎ po̍-ɛa nɛnɛ̌ nu̍-ɛ, ɛ̍ bo ɔ̍ dǎ.

¹³Ti̍ Jusu ke ɔ̍ kòà mu̍-a dě Sɛsewlia Felepai fɔɔ-ɛ, wɛ̀ ɔ̍ tèle u̍h i̍. Ɔ̍ la̍a̍, “Ɔ̀ nu̍-a Nyi̍ɔ̍-a Jǔ-ɛ, nyɔ̍gbei la̍ ɔ̍-ɔ nyɔ̍we̍ ɛ?”

¹⁴Ɔ̍ kòà la̍a̍, “Nyɔ̍ duuh la̍ mɔ̀ Chɔɔn ɔ̀ po̍-a nyɔ̍ nǐ dlǔ-ɛ. Iě duuh la̍ mɔ̀ Ilaɛja, nɛ̀ kǎ duuh-a dǎɛ m̀ Jɛlemaɛa, wɛ̀ duuh la̍ mɔ̀ Nyɔsoa-a tu̍owli po̍ nyɔ̍-a due.”

¹⁵Ɔ̍ la̍a̍, “À wɔ̌n dě mɔ̀ we̍ ke, mɔ̀ la̍ mɔ̍ nyɔ̍we̍ ke ɛ?”

¹⁶Wɛ̀ Samo Pitɛ la̍a̍, “Mɔ̀ Chèɛ̀ Tba̍ju, ɔ̀ nu̍-a kmɔ̌ nɛ Nyɔsoa-a Jǔ-ɛ.”

¹⁷Wɛ̀ Jusu la̍a̍, “Jona-a jǔ Samo, ìn nmɔ i̍, dɛ̍nu̍ɛ, ɛ̍ se̍ wlɔ̀ nyi̍ɔ̍ ùh se̍ ìn nǎ po̍ dǒ tìh-a taǐn la we̍. Jɛ ǐn Baa nɛ-a dě ja̍i̍wlɔ̀-ɛ bo ɔ̀ toe ìn ìh la.

¹⁸Jɛ Pitɛ, ǎn sèàɛ̍ ìn wlùh, mɔ̀ bo ɔ̀ nu̍ sɔɔ̌, dǒ sɔɔ̌ la kɛ̍n bo ǎn mu̍ ǎn chɔchi̍h poe. Nɛ̀ mɛ̌ɛ se̍ ɛ̍ klà sà mu̍.

¹⁹Nɛ̀ ǎn mu̍ ìn Nyɔsoa-a kmɔ̌ wlu̍ i̍ kɔn-ɛa kɔɛ̍n nyǐ. Dɛ̍ ìn dbǎ-a i̍ nɔ̌ bloɔ̍-ɛ, nɛ̀ ɛ̍ mu̍ i̍ dbǎ-ɛ ke dě ja̍i̍wlɔ̀. Nɛ̀ dɛ̍ ìn pɔ̀ni-a nɔ̌ bloɔ̍-ɛ, nɛ̀ ɛ̍ mu̍ pɔ̀ni-ɛ ke dě ja̍i̍wlɔ̀.”

²⁰Wɛ̀ ɔ̍ nɛ̌ɛ ɔ̍ kòà wlu̍ dounᵻ i̍, u̍h-u je̍e nyɔ̍ dɔɔ wlùh sèàɛ̍ ka ɔ̍ nu̍-a Nyɔsoa-a Chèɛ̀ Tba̍ju-ɛ.

²¹Sɔ dǒ ti̍ laa̍ di̍i̍-ɛ, ka Jusu kɔn ɔ̍ iě-a dǒ Juluslɛn wlɔ̀ di̍i̍ mu̍ wɛ̀ ɔ̍ iě-a jua̍i̍ sàɛ̀ dɛ̍blɔ dě nyɔ̍ klaaᵻ ke, Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ kwa̍a̍-ɛ, sɔ ɔ̍ flɔn-ɛ la̍ dě ɔ̍ kòà di̍i̍ i̍ sǔh. Wɛ̀ ka pò u̍h dbǎ ɔ̍ wǐh ta̍a̍n sì-ɛ, nɛ̀ ɔ̍ mu̍-ae wlǔh-ɛ, wɛ̀ ɔ̍ sèàɛ̍ u̍h wlùh.

²²Wɛ̀ Pitɛ gbaɛ Jusu fɔ̌ i̍, iě ɔ̍ la̍a̍, “Joi, bɔ̌ à wɔ̌n i̍, Nyɔsoa se̍ ɛ̍ wɔ̌ɛn mu̍, ɛ̍ se̍ ìn pùn nɛ mu̍.”

²³Wɛ̀ Jusu fèàɛ̀, iě ɔ̍ la̍a̍, “Pitɛ, mɔ̀ Setɔn, sɔ da̍a ǐn jua̍a̍ i̍. Àn ka̍n ǎn wìè. Ìn se̍ Nyɔsoa wlùh blě, kmɔ̌ nyɔ̍-a wlùh bo ìn blě.”

²⁴Wɛ̀ ɔ̍ la̍a̍ dě ɔ̍ kòà we̍, “Pò nyɔ̍-o-nyɔ̍ ja pɔ̀n ɔ̍ iě dǒ ǐn de̍e̍ gbǎ-ɛ, nɛ̀ ɔ̍ tǎli ɔ̍ chɛ̀-a wlùh gbɛ̍n dɛ̍ᵻ i̍, ɔ̍ iě ɔ̍ naɛ gbàɛ̍ kɛ̍n i̍ tu̍-u dǔ, wɛ̀ ɔ̍ iě dǒ ǐn de̍e̍ gbǎ.

²⁵Dɛ̍nu̍ɛ, nyɔ̍ jɔ pɔ̀n-a ɔ̍ feɛ sèìe-ɛ i̍-ɛ, nɛ̀ ɛ̍ mu̍ ɔ̍ kwa̍ mǎ-ɛ. Jɛ nyɔ̍ jɔ se̍-a ɔ̍ feɛ sèìe mu̍ ǎn tìh-ɛ, nɛ̀ ɔ̍ mu̍ ɛ̍ blě.

²⁶Pò nyɔ̍ blě dɛ̍ᵻ kli̍hgbɛ̍ da̍a kmɔ̌ la we̍ wɛ̀ ɔ̍ iě ɔ̍ feɛ mǎ-ɛɛ, nɛ̀ dɛ̍ ɛ̍ mu̍ ɔ̍-o po̍ ɛ? Nɛ̀ dɛ̍ dɛɛ se̍ dǒ de̍ nɛ ɔ̍ iě to wɛ̀ ɔ̍ iě ɔ̍ feɛ de̍ jě.

²⁷Dɛ̍nu̍ɛ, Nyi̍ɔ̍-a Jǔ-a mu̍ de̍ka ji̍ dě ɔ̍ Baa-a tìh-a i̍ bɛ̌-ɛ di̍i̍, ɔ̍ ke ɔ̍ ǐnchɔ̀ ke. Dǒ ti̍ laa̍ di̍i̍-ɛ, ka jɔ-a nu̍-dɛ̍ nɛ-aɛ, nɛ̀ kǎ ɔ̍ Nyɔsoa kwa̍a̍ jě dɛ̍-a mu̍ nɛ.

²⁸Tìh-a taǐn ǎn sèàɛ̍ mɔ̀ wlùh, nyɔ̍ duuh nyna i̍ da̍a u̍h se̍ mɛ̌ mu̍ te̍e̍ wɛ̀ u̍h iě Nyi̍ɔ̍-a Jǔ jě ɔ̍ iě ɔ̍ kmɔ̌ wlu̍ i̍ kɔn la̍ ji̍.”