Read Western Krahn Matio 18 Bible Online

Matio 18 - Western Krahn bible

Matio 18

¹Ɛ̍ se̍-o wlè iě Jusu-a kòà ji̍ dǒ ɔ̍ we̍. Wɛ̀ u̍h tèle ɔ̍ i̍ u̍h la̍a̍, “Dě Nyɔsoa-a kmɔ̌ wlu̍ i̍ kɔn-ɛ di̍i̍, nyɔ̍ bo ɔ̀ mu̍ wɔ̍n ku̍ dǒ ɔ̍ ba̍ᵻ kɛ̍n ɛ?”

²Sɔ Jusu dǎ jǔwɛ due sǔh, wɛ̀ ɔ̍ nynaɛ ɔ̍ i̍ dǒ u̍h jǔ.

³Iě ɔ̍ la̍a̍, “Tìh-a taǐn ǎn sèàɛ̍ mɔ̀ wlùh, pò nyɔ̍ se̍ gblɛ̍n i̍ bǐi ɔ̍ iě jǔwɛ la wɔ̀-ɛ, nɛ̀ ɔ̍ se̍ dě Nyɔsoa-a kmɔ̌ wlu̍ i̍ kɔn-ɛ di̍i̍ nɛ mu̍.

⁴Ɛ̍ tìh-ɛ, nyɔ̍ ɔ̀ mu̍-a ɔ̍ chɛ̀ wlù ja wɛ̀ ɔ̍ iě-a jǔwɛ la wɔ̀-ɛ, nɛ̀ ɔ̍ bo ɔ̀ ku̍ wɔ̍n dǒ ɔ̍ ba̍ᵻ kɛ̍n dě Nyɔsoa-a kmɔ̌ wlu̍ i̍ kɔn-ɛ di̍i̍.

⁵Nyɔ̍-o-nyɔ̍ ɔ̀ gbɛ̍n-a jǔwɛ la ɔ̍ tìh i̍ dǒ ǎn nynɛ̌ kɛ̍n-ɛ, nɛ̀ ɔ̍ gbɛ̍n ǎn tìh i̍ wɛ̀ ke.”

⁶Jusu la̍a̍, “Jɛ ùh plìh la ùh gbaɛ-a ǐn wlùh-ɛ, nyɔ̍-o-nyɔ̍ ɔ̀ mu̍-a u̍h-a wlùh fèàɛ̀ dě gblɛ̍n sɔ̀ɛ̀n we̍-ɛ, nɛ̀ ɛ̍ mu̍ i̍ blaɛ u̍h iě nyɔ̍ kaɛn laa̍ dui-sɔɔ̌ dɔ̍ i̍ sa̍n-ɛ, wɛ̀ u̍h iě ɔ̍ jbǒ kɛ̍n po̍.

⁷Chlě dǒ kmɔ̌ la we̍, dɛ̍nu̍ɛ, dě ɛ̍ di̍i̍ bo dɛ̍ᵻá jii wɛ̀ i̍h-a fèàɛ̀ nyɔ̍-a wlùh dě gblɛ̍n sɔ̀ɛ̀n we̍. Ìh la i̍h-a nɛ-ɛa chɛ̀ gbɔ̀gbɔ̀, jɛ nyɔ̍ ɔ̀ kɔn ja̍a̍ i̍h-a jii-a, chlě dǒ ɔ̍ we̍.

⁸“Ɛ̍ tìh-ɛ, pò àn sɔ̍n àe̍e̍ àn bu̍h ja àn wlùh fèàɛ̀ dě gblɛ̍n sɔ̀ɛ̀n we̍-ɛ, nɛ̀ ìn chɛ̍n ɛ̍ i̍ ìè ɛ̍ de̍ po̍. Ɛ̍ nmɔ jii̍ ìè i̍ kɔ̌ wɛ̀ ìè feɛ blě, ɛ̍ sìì blě sɔ̍nᵻ sɔɔ̌n ke bu̍hᵻ sɔɔ̌n wɛ̀ ìn gbǎ dě nɛ̍ ɛ̀ se̍-a mɔ̌ la̍ kɔn-ɛ di̍i̍.

⁹Nɛ̀ pò àn jlǐhɛ̍ ja àn wlùh fèàɛ̀ dě gblɛ̍n sɔ̀ɛ̀n we̍-ɛ, nɛ̀ ìn sà ɛ̍ kɔ̌n ìè ɛ̍ de̍ po̍. Ɛ̍ nmɔ jii̍ ìè jlǐhɛ̍ due blě wɛ̀ ìè feɛ blě, ɛ̍ sìì blě jlǐh sɔɔ̌n iě ìn gbǎ dě kàn nɛ̍ di̍i̍.”

¹⁰Jusu la̍a̍, “Mɔ̀ nu̍ nɛnɛ̌ ùh plìh la mɔ̀-ɔ je̍e u̍h-a nyɔ̍ due jlǐhɛ̍ dlǔ bla̍. Bɔ̌ ǐn sèàɛ̍ mɔ̀ wlùh, dɛ̍nu̍ɛ, u̍h-a Nyɔsoa-a ǐnchɔ̀ nɛ-a dě ja̍i̍wlɔ̀-ɛ, i̍h ke ǐn Baa-a jiěe te̍e̍ deě. [

¹¹Dɛ̍nu̍ɛ, Nyi̍ɔ̍-a Jǔ ji̍-i ɔ̍ iě kwlǎ sie nyɔ̍ pǔh-i.]

¹²“Pò nyɔ̍ blě blawɛ̌ᵻá kmɛ due wɛ̀ due iě ɔ̍ jlǐh mǎ-ɛ dě i̍h nynɛ̌-ɛ, nɛ̀ ka ɔ̍ mu̍ nu̍ ɛ? Nɛ̀ ɔ̍ se̍ blawɛ̌ᵻá kwela mɛ̀nyìɛ̍ jɔ̌ mɛ̀nyìɛ̍ (99) laa̍ dě tlu̍hᵻ kɛ̍n sie mu̍ wɛ̀ ɔ̍ iě due laa̍ i̍ pɔ̀n ae?

¹³Tìh-a taǐn ǎn sèàɛ̍ mɔ̀ wlùh, pò ɔ̍ jě ɛ̍-ɛ, nɛ̀ ɔ̍ mu̍ mɔna̍-a gbǎ kaa̍ dǒ blawɛ̌ due laa̍ we̍ ɛ̍ iě kwela mɛ̀nyìɛ̍ jɔ̌ mɛ̀nyìɛ̍ jih se̍-a mǎ-a sìì.

¹⁴Kǎ ɛ̍ nu̍ nɛ-ɛ ke, mɔ̀ Baa nɛ-a dě ja̍i̍wlɔ̀-ɛ, ɔ̍ se̍ pɔ̀n ùh plìh la u̍h-a due iě kwlǎ sie.”

¹⁵Jusu la̍a̍, “Pò ìn ba̍ nu̍ ìn dɛ̍ sɔ̀n jii̍-ɛ, nɛ̀ ìn nɛ due mu̍ dě ɔ̍ we̍ ìè ɔ̍ wlùh sèàɛ̍ ka ɔ̍ nu̍-a ìn dɛ̍ sɔ̀n jii̍-ɛ. Nɛ̀ pò ɔ̍ wɔ̌n àn wlu̍ i̍ wɛ̀ ɔ̍ iě kɛ̀n chɛ̍n-ɛ, nɛ̀ mɔ̀-a wlu̍ wɔɛ̌ɛn i̍ wɛ̀ dode̍.

¹⁶Jɛ pò ɔ̍ se̍ àn wlu̍ i̍ wɔ̌n-ɛ, nɛ̀ ìn po̍ àn chɛ̀ nyɔ̍ due ke sɔɔ̌n duuh kɛ̍n mɔ̀ iě dě ɔ̍ we̍ mu̍. Wɛ̀ dɛ̍ kli̍hgbɛ̍ mɔ̀-a mu̍-a bla̍-ɛ, ɛ̍ iě sàànsi̍i̍h sɔɔ̌n ke ta̍a̍n blě.

¹⁷Nɛ̀ pò ɔ̍ se̍ u̍h-a wlu̍ i̍ wɔ̌n ke-ɛ, nɛ̀ ìn gba̍ ɔ̍ kunǎ dě chɔchi̍h-i. Nɛ̀ pò ɔ̍ se̍ chɔchi̍h-a wlu̍ i̍ wɔ̌n ke-ɛ, nɛ̀ ka mɔ̀-a nu̍-a se̍ Nyɔsoa juo nyɔ̍ ke taa̍sìh sà nyɔ̍ jě-ɛɛ, kǎ mɔ̀ iě ɔ̍ jě-ɛ nu̍ ke.

¹⁸“Bɔ̌ ǐn sèàɛ̍ mɔ̀ wlùh, dɛ̍ mɔ̀ dbǎ-a i̍ nɔ̌ bloɔ̍-ɛ, nɛ̀ ɛ̍ mu̍ i̍ dbǎ-ɛ ke dě ja̍i̍wlɔ̀. Nɛ̀ dɛ̍ mɔ̀ pɔ̀ni-a nɔ̌ bloɔ̍-ɛ, nɛ̀ ɛ̍ mu̍ pɔ̀ni-ɛ ke dě ja̍i̍wlɔ̀.

¹⁹“Bɔ̌ ǐn sèàɛ̍ mɔ̀ dɛ̍ dɛɛ wlùh, pò mɔ̀-a nyɔ̍ sɔɔ̌n blě wlùh due nɔ̌ bloɔ̍ wɛ̀ u̍h iě dɛ̍-a tìh ba̍le-ɛ, nɛ̀ ǐn Baa nɛ-a dě ja̍i̍wlɔ̀-ɛ, ɔ̍ mu̍ ɛ̍ nu̍ dǒ u̍h we̍.

²⁰Dɛ̍nu̍ɛ, nyɔ̍ ùh wɔ̌ɛn-a ǎn tìh i̍-ɛ, tà u̍h-a sɔɔ̌n ke ta̍a̍n-a mu̍-a tàdùè gbǎ-ɛɛ, nɛ̀ ǐn nɛ dě u̍h nynɛ̌.”

²¹Wɛ̀ Pitɛ ji̍ dǒ Jusu we̍ iě ɔ̍ tèle ɔ̍ i̍. Ɔ̍ la̍a̍, “Joi, pò ǐn ba̍ ja ǐn dɛ̍ sɔ̀n pùn nu̍ te̍e̍-ɛ, nɛ̀ gbɔ̍ᵻ tìèwe̍ iě ɔ̍ dɛ̍ sɔ̀n-a tìh i̍ tǎli-i ɛ? Gbɔ̍ᵻ mɛ̀sɔɔ̌n bo iě nu̍ ae?”

²²Wɛ̀ Jusu la̍a̍ dě ɔ̍ we̍, “Bɔ̌ gbɔ̍ᵻ mɛ̀sɔɔ̌n nu̍-ɛ, jɛ kwela mɛ̀sɔɔ̌n-a gbɔ̍ᵻ mɛ̀sɔɔ̌n bo ìè nu̍.

²³Dɛ̍nu̍ɛ, Nyɔsoa-a kmɔ̌ wlu̍ i̍ kɔn-ɛ ke blǔh baa due-a nu̍-dɛ̍ᵻ wɔ̀ɛ-ɛ. Ɛ̍ nu̍ ti̍ due wɛ̀ ɔ̍ slè ɔ̍ wlǐ ìh nɛ-a dě ɔ̍ pòi̍nynuu̍ di̍i̍-ɛ.

²⁴Ɔ̍ tè ɛ̍ nu̍-ɛ gbɔ̀ sǔh wɛ̀ u̍h ja pòi̍ju due ɔ̀ di̍-a ɔ̍ pɔu̍nᵻá poa (1,000,000) dɔu-ɛ.

²⁵Jɛ pòi̍ju laa̍ ɔ̍ se̍ dɛ̍-a sà la̍ kɔn wɛ̀ ɔ̍ iě wlǐ laa̍ pɛ̌ɛ. Iě blǔh baa po̍ nyɔ̍ slǔh u̍h iě ɔ̍ ke ɔ̍ nynɔ̌ ke ɔ̍ nynuu̍ ple̍, ɛ̍ ke ɔ̍ kɔn-dɛ̍ᵻ kli̍hgbɛ̍ ke. Wɛ̀ ɔ̍ iě ɔ̍ wlǐ laa̍ jě.

²⁶Wɛ̀ pòi̍ju laa̍ ɔ̍ chlìi i̍ dǒ ɔ̍ jǔ, iě ɔ̍ ba̍le ɔ̍. Ɔ̍ la̍a̍, ‘Dbǎkà, gbɛ̍n wlùh i̍, ǎn mu̍ àn wlǐ laa̍ pɛ̌ɛ kli̍hgbɛ̍.’

²⁷Iě ɔ̍ dlǔtu jě ɔ̍ wɔɛ, wɛ̀ ɔ̍ wa̍n wlǐ-a chɛ̀ kɛ̍n. Wɛ̀ ɔ̍ tǎli ɔ̍ i̍ ɔ̍ mu̍.

²⁸“Jɛ pòi̍ju laa̍ ɔ̍ sǐ-a sɔ̀n-ɛ, dǒ ɔ̍ jě-e ɔ̍ ba̍ pòi̍ju due ɔ̀ blě-a ɔ̍ pɔu̍nᵻ jɔ̌ wei-ɛ. Wɛ̀ ɔ̍ gbɛ̍n-ɛ ɔ̍ plùn gba̍i̍ngba̍i̍n, iě ɔ̍ la̍a̍, ‘Pɛ̌ɛ ǎn wlǐ ìn gbɛ̍n-a i̍-ɛ.’

²⁹Wɛ̀ ɔ̍ ba̍ laa̍ ɔ̍ chlìi i̍ dǒ ɔ̍ jǔ iě ɔ̍ ba̍le ɔ̍. Ɔ̍ la̍a̍, ‘Dbǎkà, gbɛ̍n wlùh i̍, ǎn mu̍ àn wlǐ laa̍ pɛ̌ɛ wa.’

³⁰Jɛ ɔ̍ se̍ wɔ̌n. Wɛ̀ ɔ̍ po̍ nyɔ̍ slǔh u̍h iě ɔ̍ ba̍ laa̍ kasoo po̍, ɔ̍ iě deě nɛ te̍e̍ wɛ̀ ɔ̍ iě ɔ̍ gba̍ laa̍ sà-a wɔ̀.

³¹Ti̍ ɔ̍ ba̍ᵻ pòi̍nynuu̍ jě-a dɛ̍ ɔ̍ nu̍-a ɔ̍ ba̍ laa̍ jii̍-ɛ, sɔ ɛ̍ po̍ u̍h-a wlùh dě de̍ i̍. Iě u̍h mu̍ u̍h po̍ u̍h-a dlǔtu kunǎ.

³²Wɛ̀ u̍h-a dlǔtu dǎ pòi̍ju laa̍ dě gbò. Ɔ̍ la̍a̍, ‘Mɔ̀ la, dɛ̍nu̍ àn gblɛ̍n nyni jii̍ ka ɛ? Ǎn wlǐ ìn di̍-aɛ, ìn ba̍le m wɛ̀ ǐn wa̍n i̍h kli̍hgbɛ̍ kɛ̍n dě ìn di̍i̍.

³³Ka ǐn nu̍-a ìn wɔɛ jě-ɛɛ, kǎ ìn kɔn ìè ìn ba̍ pòi̍ju wɔɛ jě-ɛ nu̍ ke de.’

³⁴Sɔ ɛ̍ po̍ u̍h-a dlǔtu laa̍ jlǔh-u kaa̍. Iě ɔ̍ po̍ pòi̍ju laa̍ kasoo, dě kàn kwa̍a̍ ɔ̍ iě-e nɛ te̍e̍ wɛ̀ ɔ̍ iě wlǐ kli̍hgbɛ̍ pɛ̌ɛ.

³⁵“Ɛ̍ tìh-ɛ, mɔ̀-a nyɔ̍ jɔ se̍-a ɔ̍ ba̍-a dɛ̍ sɔ̀n-a tìh i̍ tǎli mu̍ dě ɔ̍ wlùh di̍i̍-ɛ, nɛ̀ ǐn Baa nɛ-a dě ja̍i̍wlɔ̀-ɛ, kǎ ɔ̍ mu̍ ɔ̍ tìh nu̍ ke.”