Read Western Krahn Matio 2 Bible Online

Matio 2 - Western Krahn bible

Matio 2

¹Ti̍ Jusu wlǔh-a dǒ Bɛfleɛɛn wlɔ̀ di̍i̍ dě Judia bloa̍ kɛ̍n-ɛ, nɛ̀ Ɛlo nu̍ blǔh baa. Dǒ-o bo dɛ̍ jlǐhɛ̍ tù-i nyɔ̍ sɔ-ɛ dě blǔh-a fɔ̌ kɔn we̍ tà jlǔh-a wlǔh-ia kwlǎ-a u̍h ji̍ dǒ Juluslɛn. U̍h la̍a̍,

²“Jǔpliɛ ɔ̀ wlǔh-a ɔ̀ iě-a blǔh baa nu̍ dǒ Juu nyɔ̍ we̍-ɛ, tà ɔ̍ nɛ ɛ? Dɛ̍nu̍ɛ, à jě ɔ̍ chǔhtlɛ̀n dě jlǔh-a kwlǎ wlǔh la̍-a, ɛ̍ kɔn à ji̍ à iě ɔ̍ wɛɛ sà.”

³Ti̍ Ɛlo wɔ̌n-a pɔ̀n la-ɛ, sɔ ɛ̍ nui ɔ̍ sèò kaa̍, ɛ̍ ke Juluslɛn wlɔ̀ kli̍hgbɛ̍ ke.

⁴Wɛ̀ ɔ̍ gbòe Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ kli̍hgbɛ̍ i̍, wɛ̀ ɔ̍ tèle u̍h i̍, ɔ̍ la̍a̍, “Nyɔsoa-a Chèɛ̀ Tba̍ju la, tà ɔ̍ mu̍ wlǔh-i ɛ?”

⁵Wɛ̀ u̍h sèàɛ̍ ɔ̍ wlùh, u̍h la̍a̍, “Dě Bɛfleɛɛn dě Judia bloa̍ kɛ̍n. Kǎ Nyɔsoa-a tu̍owli po̍ nyɔ̍ nu̍ ka ɛ̍ chlǐh-ɛ. Ɔ̍ la̍a̍,

⁶‘Bɛfleɛɛn wlɔ̀, mɔ̀ nɛ-a dě Judia bloa̍ kɛ̍n-ɛ, wlɔ̀ᵻ gbàɛ̀ klaaᵻ ìh gbǎ-a dɛ̍kɛ̍n-ɛ, ìn se̍ i̍ wàn dě i̍h nynɛ̌. Dɛ̍nu̍ɛ, dǒ ìn di̍i̍ bo dlǔtu-a mu̍ sɔ, wɛ̀ ɔ̍ iě dǒ ǎn chɛ̌ Eslɔɛ nyɔ̍ we̍ i̍ gbɛ̀n.’ ”

⁷Ti̍ Ɛlo wɔ̌n-a u̍h-a wlu̍-ɛ, wɛ̀ ɔ̍ dǎ dɛ̍ jlǐhɛ̍ tù-i nyɔ̍ laa̍ dě slǎn iě ɔ̍ tèle u̍h i̍, ɔ̍ la̍a̍, “Ti̍ we̍ mɔ̀ jě chǔhtlɛ̀n la ɛ?” Iě u̍h sèàɛ̍ ɔ̍ wlùh.

⁸Wɛ̀ ɔ̍ la̍a̍, “Pò mɔ̀ mu̍ Bɛfleɛɛn-ɛ, nɛ̀ mɔ̀ pɔ̀n jǔ laa̍ i̍ chɛ̀gbɛɛ. Pò mɔ̀ jě ɔ̍-ɛ, nɛ̀ mɔ̀ ji̍ mɔ̀ iě ǐn wlùh sèàɛ̍, wɛ̀ ǎn chɛ̀ iě ɔ̍ wɛɛ sà la̍ mu̍ ke.”

⁹U̍h sɔ-a dě slǎn-a, iě u̍h mu̍. U̍h gbǎ-a dě wìè-iɛ, chǔhtlɛ̀n ɛ̀ u̍h jě-a dě jlǔh-a kwlǎ wlǔh la̍-a wɛ̀ u̍h iě-a ji̍-ɛ dǔ-ɛ, ɛ̍ gbǎ dǒ u̍h jǔ dɛ. U̍h jě-a chǔhtlɛ̀n laa̍-ɛ, sɔ u̍h gbǎ mɔna̍ dɛ kaa̍. Iě ɛ̍ mu̍ u̍h jǔ te̍e̍ wɛ̀ ɛ̍ nyna i̍ dǒ gbò kɔn di̍i̍ jǔpliɛ nɛ-a dlǔwèàì.

¹¹Wɛ̀ u̍h pa̍ dě gbò. Iě u̍h jě jǔ-a chɛ̀ ke ɔ̍ de̍ Mɛle, wɛ̀ u̍h chlìi i̍ iě u̍h sà ɔ̍ wɛɛ. Wɛ̀ u̍h pɔ̀ni u̍h-a gbèèkǔᵻ, dě u̍h sà kòo̍ ke nɔ̌-dɛ̍ᵻ chɛ̀, ìh ke chò ke sùè-chlǎn wɔ̀ɛ-ɛa, iě u̍h nyǐ i̍h ɔ̍.

¹²Jɛ u̍h se̍ dě Ɛlo we̍ jii dode̍, iě u̍h gba̍ wìè dɛɛ u̍h mu̍ u̍h blǐ. Dɛ̍nu̍ɛ, Nyɔsoa sèàɛ̍ u̍h wlùh dě nyinɔ̍ i̍ u̍h-u je̍e dě ɔ̍ we̍ jii dode̍.

¹³Ti̍ dɛ̍ jlǐhɛ̍ tù-i nyɔ̍ mu̍-a wɛ̀-ɛ, wɛ̀ Joi-a ǐnchɔ̀ jii Josɛ dlǔ we̍, ɛ̍ la̍a̍, “Sɔ-ɔ, dǔ jǔ la ke ɔ̍ de̍-e. Mɔ̀ ple̍, mɔ̀ iě Iche bloa̍ kɛ̍n mu̍. Dě mɔ̀ iě nɛ te̍e̍ wɛ̀ iě mɔ̀ wlùh sèàɛ̍ wɛ̀ mɔ̀ iě-e sɔ-ɛ dǔ. Dɛ̍nu̍ɛ, Ɛlo-a mu̍ jǔ la i̍ pɔ̀n ɔ̍ iě ɔ̍-ɔ gbɔ̀lɔ bu̍ɛ̍i̍.”

¹⁴Wɛ̀ ɔ̍ sɔ-ɔ, iě ɔ̍ dǔ jǔ laa̍ ke ɔ̍ de̍-e maɔ̍ iě u̍h mu̍ Iche.

¹⁵Dě u̍h nɛ te̍e̍ wɛ̀ Ɛlo mɛ̌. Ɛ̀ la ɛ̍ nɛ-ɛ wɛ̀ dɛ̍ Joi bla̍-a dě ɔ̍ tu̍owli po̍ nyɔ̍ ja̍a̍-ɛ, ɛ̍ iě tìh-a taǐn nu̍. Ɔ̍ la̍a̍, “Ǐn dǎ ǎn jǔ ɔ̍ iě Iche sɔ.”

¹⁶Jɛ ti̍ Ɛlo juo-ao dɛ̍ i̍ ka dɛ̍ jlǐhɛ̍ tù-i nyɔ̍ poe-a ɔ̍ gblàa̍ i̍-ɛ, sɔ ɔ̍ nɛ tɛtɛ dǒ jlu̍h we̍. Wɛ̀ ɔ̍ dbo̍ fledlǔ u̍h iě dě Bɛfleɛɛn ke wlɔ̀ᵻ nɛ-a ɛ̍ de̍e̍ i̍-ɛ di̍i̍-i mu̍ u̍h iě jɔ̍gbauᵻ nynuu̍pli kli̍hgbɛ̍ dbǎ, sɔ dǒ chǔh due we̍ ìè sɔ̀nᵻ sɔɔ̌n jɛɛ. Ɔ̍ tba̍ nynuu̍ tu̍ laa̍ chèɛ̀, dɛ̍nu̍ɛ, ti̍ dɛ̍ jlǐhɛ̍ tù-i nyɔ̍ jě-a chǔhtlɛ̀n laa̍-ɛ, ɛ̍ tɛn dlǔ wɛ̀ gbɛɛ.

¹⁷Sɔ ɛ̍ nu̍ ɛ̍-ɛ dɛ̍ Nyɔsoa-a tu̍owli po̍ nyɔ̍ Jɛlemaɛa bla̍-aɛ, ɛ̍ nu̍ tìh-a taǐn. Ɔ̍ la̍a̍,

¹⁸“Fìn-i wlu̍-a sɔ dě Wlaama wlɔ̀ di̍i̍. Wlechɔ-a we̍le dlǔgba we̍ ɔ̍ fìn ɔ̍ nynuu̍. Ɔ̍ se̍ pɔ̀n nyɔ̍ iě ɔ̍ gbòɛ̀ i̍ blaɛ, dɛ̍nu̍ɛ, u̍h se̍ nɛ dɛ.”

¹⁹Ti̍ Ɛlo mɛ̌-a wɛ̀-ɛ, dǒ-o bo Joi-a ǐnchɔ̀ jii Josɛ dlǔ we̍ dě Iche, ɛ̍ la̍a̍,

²⁰“Sɔ bloɔ̍, dǔ jǔ la ke ɔ̍ de̍-e mɔ̀ iě dě Eslɔɛ bloa̍ kɛ̍n mu̍. Dɛ̍nu̍ɛ, ùh-a pɔ̀n-a jǔ la dbǎ-a i̍ de-ɛ, u̍h mɛ̌ wɛ̀.”

²¹Wɛ̀ ɔ̍ sɔ bloɔ̍ iě ɔ̍ dǔ jǔ laa̍ ke ɔ̍ de̍-e wɛ̀ u̍h mu̍ dě de̍ Eslɔɛ.

²²Jɛ ɔ̍ wɔ̌n pɔ̀n ka Akeleɔ nu̍-a blǔh baa dǒ ɔ̍ baa wɔ̀ɔ̀ we̍-ɛ, sɔ ɛ̍ po̍ ɔ̍ faɔn ɔ̍ iě-e mu̍. Wɛ̀ Nyɔsoa sèàɛ̍ ɔ̍ wlùh dě nyinɔ̍ i̍ dɛ ke. Sɔ ɛ̍ nu̍ ɛ̍ iě ɔ̍ sàɛ̀ kɛ̍n dě Kaladii fɔɔ.

²³Iě ɔ̍ mu̍ ɔ̍ tǐn dǒ Naaslɔɛ wlɔ̀ di̍i̍. Sɔ ɛ̍ nu̍ ɛ̍ dɛ̍ Nyɔsoa bla̍-a dě ɔ̍ tu̍owli po̍ nyɔ̍ ja̍a̍-ɛ, ɛ̍ nu̍ tìh-a taǐn. U̍h la̍a̍, jǔ la, “U̍h-a mu̍ ɔ̍ Naaslɔɛ jǔ dǎɛ.”