Read Western Krahn Matio 20 Bible Online

Matio 20 - Western Krahn bible

Matio 20

¹Jusu la̍a̍, “Nyɔsoa-a kmɔ̌ wlu̍ i̍ kɔn-ɛ ke nɛnǎ la wɔ̀ɛ. Jɔ̍gbau due bo ɔ̀ tlùìn ɔ̀ sɔ bloɔ̍ klàɛ̍we̍. Wɛ̀ ɔ̍ sǐ sɔ̀n ɔ̍ iě nyɔ̍-ɔ dǔ u̍h iě dě ɔ̍ blǐ klè dbo̍ nui.

²Iě ɔ̍ wɔ̌n ɔ̍ iě u̍h pɛ̌ɛ dǒ wliɛ̍ u̍h-a pɛ̌ɛ-a nyɔ̍ se̍e̍ dǒ weɛ̍ we̍-ɛ pɛ̌ɛ. Wɛ̀ ɔ̍ dbo̍ u̍h dě ɔ̍ blǐ klè.

³Jlǔh-a ji̍ la̍ wɔ̍n ku̍ la̍ sǔh wɛ̀ ɔ̍ mu̍ dě dɔɔ̌ gbale̍e̍, dě ɔ̍ jě-e nyɔ̍ duuh u̍h se̍ dɛ̍wɛ-a chɛ̀ nu̍, u̍h nynaɛ i̍.

⁴Iě ɔ̍ la̍a̍, ‘Mɔ̀ mu̍ dě ǐn blǐ klè mɔ̀ iě-e dbo̍ nui ke. Ǎn mu̍ mɔ̀ pɛ̌ɛ nmɔ jii̍.’

⁵Wɛ̀ u̍h mu̍. Ti̍ ɛ̍ nu̍-a jlǔh gbàɔ̀-ɛ, ɛ̀ due laa̍ bo ɔ̍ nu̍ dɛ. Ti̍ jlǔh te̍le-a i̍-ɛ, kǎ ɔ̍ nu̍ nyɔ̍ duuh dɛ.

⁶Jlǔh pɛ̌n tu̍ᵻ wɛ̀ sǔh iě ɔ̍ mu̍ wɛ̀ ɔ̍ jě nyɔ̍ duuh nɛ̀ u̍h nynaɛ i̍ dě dɔɔ̌ gbale̍e̍. Wɛ̀ ɔ̍ tèle u̍h i̍, ɔ̍ la̍a̍, ‘Dɛ̍nu̍ mɔ̀ nynaɛ i̍ da̍a weɛ̍ gbàǐ la di̍i̍ wɛ̀ mɔ̀ se̍ dɛ̍ nu̍ ɛ?’

⁷U̍h la̍a̍, ‘Dɛ̍nu̍ɛ, nyɔ̍ se̍ à dǔ à iě dbo̍ nu̍.’ Iě ɔ̍ la̍a̍ dě u̍h we̍, ‘Iě nɛ̀ mɔ̀ mu̍ dě ǐn blǐ klè ke mɔ̀ iě-e dbo̍ nui.’

⁸“Ti̍ ɛ̍ nu̍-a wìe̍we̍ wɛ̀-ɛ, wɛ̀ ɔ̍ sèàɛ̍ ɔ̍ klè we̍ i̍ gbɛ̀n nyɔ̍ wlùh, ɔ̍ la̍a̍, ‘Dǎ dbo̍ nu̍ nyɔ̍ laa̍ ìè u̍h pɛ̌ɛ. Nyɔ̍ ùh ǐn bɔ̌ɛ-a dǔ-ɛɛ, u̍h bo ìè pɛ̌ɛ sàǐtòò wɛ̀ ìè sàǐtòò nyɔ̍ pɛ̌ɛ-ɛ dǔ.’

⁹Nyɔ̍ ùh bɔ̌ɛ-a ji̍-ɛ dǒ jlǔh-a tu̍ᵻ pɛ̌n la̍-ɛ, jɔ-ɛ, nɛ̀ ɔ̍ jě weɛ̍ gbàǐ-a wliɛ̍.

¹⁰Nyɔ̍ ùh dǔ-ia sàì-ɛ, u̍h naɛ pɛ̌ɛ ti̍ nyni̍-a doǒ-ɛ, sɔ u̍h gbàɛ̀ wlǐ dɔu jě tìh de ɛ̍ iě juh laa̍ sìì. Jɛ weɛ̍ due-a wliɛ̍ laa̍, jɔ-ɛ, nɛ̀ ɛ̍ bo ɔ̍ jě ke.

¹¹Ti̍ u̍h jě-a u̍h-a wlǐ-ɛ, sɔ u̍h-a chɛ̀ la̍ klè joi laa̍ we̍ sǔh.

¹²U̍h la̍a̍, ‘Àɔ̀ juh dǔ-a dbo̍ nu̍-ɛ sèàn da̍a tɛ̀n-jlǔh la̍ we̍ wɛ̀ wlù wɔ̀-a wɛ̀-ɛ, iě nyɔ̍ juh bɔ̌ɛ-a de̍ dǒ jlǔh-a tu̍ᵻ pɛ̌n la̍-ɛ, wɛ̀ u̍h ke à pɛ̌ɛ la-a nɛ due ae?’

¹³Wɛ̀ klè joi la̍a̍ dě u̍h-a due we̍, ‘Ǎn chɛ̀-a nyɔ̍, ǐn se̍ mɔ̀ kanieǐ di̍ wa. Na̍a̍, wliɛ̍ u̍h-a pɛ̌ɛ-a nyɔ̍ se̍e̍ dǒ weɛ̍ we̍-ɛ, ɛ̍ kɔn wlu̍ bo mɔ̀ ke ǐn ke à nu̍ lě.

¹⁴Ɛ̍ tìh-ɛ, dǔ àn wlǐ ìè mu̍. Nyɔ̍ la ùh bɔ̌ɛ-a ji̍-ɛ, ɛ̀ kɔn taǐn ǐn nyǐ-a mɔ̀-ɛ, ɛ̍ bo ǎn pɔ̀n iě u̍h nyǐ ke dɛbo.

¹⁵Àe̍e̍ dɛ̍ ǎn pɔ̀n-a iě-a nu̍ dǒ ǎn wlǐ we̍-ɛ, ǐn se̍ i̍ blaɛ iě ɛ̍ nu̍ dɛbo ae? Àe̍e̍ dɛ̍ ǎn nmɔ-a wlùh-ɛ, ɛ̍ bo ɛ̀ po̍ mɔ̀ wlɛ̀n di̍i̍ ae?’ ”

¹⁶Jusu wɔ̌an chlà-a tìh-ɛ, ɔ̍ la̍a̍, “Ɛ̍ tìh-ɛ, nyɔ̍ ùh wɔ̀-a ka nya̍-ɛ, u̍h-a mu̍ de̍ wɔ̀, wɛ̀ ùh wɔ̀-a de̍-ɛ, u̍h iě nya̍ wɔ̀.”

¹⁷Ti̍ Jusu bei-a mu̍-a dǒ Juluslɛn wlɔ̀ di̍i̍-ɛ, wɛ̀ ɔ̍ chɛn-ɛ ɔ̍ kòà-a pùè jɔ̌ sɔɔ̌n laa̍ gbɔ̍i̍ dǒ wìè-i, iě ɔ̍ wlu dě u̍h we̍.

¹⁸Ɔ̍ la̍a̍, “Juluslɛn à mu̍-a ka-ɛ, Nyi̍ɔ̍-a Jǔ-a mu̍ kwlǎ sà-ɛ dě Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ kwa̍a̍. Wɛ̀ u̍h iě ɔ̍ dbǎ-a tìh dlǔ po̍,

¹⁹wɛ̀ u̍h iě ɔ̍ ùh se̍-a Juu nyɔ̍-ɛ kwlǎ sà-ɛ. Wɛ̀ u̍h iě ɔ̍ jlii̍h kɛ̍n i̍ nui, u̍h iě ɔ̍ bla̍, wɛ̀ u̍h iě ɔ̍ dǒ gbàɛ̍ kɛ̍n i̍ tu̍ wlì kɔ̍-ɛ dǔ. Jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”

²⁰Wɛ̀ Sɛɛbedii-a nynɔ̌ ke ɔ̍ jɔ̍gbauᵻ nynuu̍ sɔɔ̌n ji̍ dǒ Jusu we̍, wɛ̀ ɔ̍ chlìi i̍ dǒ ɔ̍ jǔ. Iě ɔ̍ ba̍le ɔ̍ ɔ̍ iě dɛ̍ nu̍ dǒ ɔ̍ we̍.

²¹Wɛ̀ Jusu la̍a̍, “Dɛ̍ àn pɔ̀n ɛ?” Nynɔ̌ la̍a̍, “Ǎn pɔ̀n ìè wlu̍ tɔ̀ma̍a̍ po̍ dǒ ǎn nynuu̍ sɔɔ̌n la we̍. Ti̍ àn mu̍-a kmɔ̌ la wlu̍ i̍ kɔn-ɛ, due iě dǒ ìn di̍na̍ we̍ i̍ tè. Wɛ̀ dɔɔ iě dǒ ìn kwe̍na̍ we̍ i̍ tè.”

²²Wɛ̀ ɔ̍ la̍a̍ dě u̍h we̍, “Dɛ̍ mɔ̀-a sà-aɛ, mɔ̀ se̍ ɛ̍ juo. Kàu̍n ǎn mu̍-a di̍i̍ nǎ-ɛɛ, mɔ̀ bɛ̌ɛ ɛ̍ di̍i̍ nǎ-ɛ ae?” Iě u̍h la̍a̍, “À bɛ̌ɛ ɛ̍.”

²³Iě ɔ̍ la̍a̍ dě u̍h we̍, “Ǎn kàu̍n nɔ̀ɔ̍, mɔ̀-a mu̍ ɛ̍ di̍i̍ nǎ-ɛ, jɛ dǒ mɔ̀-a ǎn di̍na̍ ke ǎn kwe̍na̍ we̍ i̍ tè-ɛ nɔ̀ɔ̍, ǐn se̍ ɛ̍ gbǐh blě. I̍h nɔ̀ɔ̍-ɛ, ǐn Baa po̍ i̍h gba̍a̍ wɛ̀ se̍e̍ dǒ nyɔ̍ ùh-a mu̍-a doǒ i̍ tè-ɛ we̍.”

²⁴Kòà pùè juh sie-a dǒ de̍-ɛ, ti̍ u̍h wɔ̌n-a dɛ̍ la-ɛ, sɔ u̍h gbǎ-ɛ de̍di̍i̍ᵻ sɔɔ̌n laa̍ jlu̍h sǔh.

²⁵Wɛ̀ Jusu dǎ u̍h dǒ ɔ̍ we̍, iě ɔ̍ la̍a̍, “Mɔ̀ juo ɛ̍-ɛ, nyɔ̍ ùh kɔn-a kmɔ̌ we̍ nyɔ̍ wlu̍ i̍-ɛ, u̍h nɛ dǒ u̍h dlǔwèàì. Iě u̍h-a gbaɛ u̍h gbǐh.

²⁶Jɛ ɛ̍ bɔ̌ laǎn nɛ-ɛ dě mɔ̀ nynɛ̌. Jɛ pò mɔ̀-a nyɔ̍ ja pɔ̀n ɔ̍ iě wɔ̍n ku̍ dě mɔ̀ nynɛ̌-ɛ, nɛ̀ ɔ̍ bo ɔ̀ iě pòi̍ju nu̍ dǒ ɔ̍ ba̍ᵻ we̍.

²⁷Nɛ̀ pò mɔ̀-a nyɔ̍ ja pɔ̀n ɔ̍ iě nyɔ̍ kwa̍ blě-ɛ, nɛ̀ ɔ̍ bo ɔ̀ iě mɔ̀-a kèi̍ nu̍.

²⁸Nyi̍ɔ̍-a Jǔ se̍ ji̍ nyɔ̍ iě ɔ̍ pòi̍ju nu̍. Jɛ ɔ̍ ji̍-i wɛ̀ ɔ̍ chɛ̀ iě pòi̍ju nu̍. Wɛ̀ ɔ̍ iě ɔ̍ feɛ i̍ pɛ̌n-ɛ, ɛ̍ iě nyɔ̍ dɔu kɛ̍ɛ̍n pùhbɔ. Ɛ̍ kɔn ba̍ mɔ̀ iě nu̍ ke.”

²⁹Ti̍ Jusu ke ɔ̍ kòà-a sɔ-a dǒ Jɛwlekoo-ɛ, sɔ nyɔ̍ tlùgbei̍ wɔ̀ dǒ u̍h de̍e̍.

³⁰Nɛ̀ dɔ̌-nyɔ̍ sɔɔ̌n tè i̍ dǒ wìè wɔ̍i̍n, wɛ̀ u̍h wɔ̌n i̍h ka Jusu-a sì-aɛ, sɔ u̍h-a we̍le la̍-ɛ sǔh. U̍h la̍a̍, “Depe-a Jǔ, jě à wɔɛ lě.”

³¹Wɛ̀ nyɔ̍gbei-a po̍ u̍h bɔ̌ i̍, u̍h iě tìi̍n nɛ. Jɛ u̍h gbǎ dě de̍ i̍ dǒ we̍le la̍. U̍h la̍a̍, “Depe-a Jǔ, jě à wɔɛ lě o.”

³²Wɛ̀ Jusu nyna i̍ iě ɔ̍ dǎ u̍h, ɔ̍ la̍a̍, “Dɛ̍ mɔ̀-a pɔ̀n iě nu̍ dǒ mɔ̀ we̍ ɛ?”

³³U̍h la̍a̍, “Nyɔ̍ klaa, à pɔ̀n ìè à jlǐh pɔ̀ni.”

³⁴Sɔ ɛ̍ po̍ Jusu wɔɛ iě ɔ̍ tǔh u̍h-a jlǐh i̍. Dǒ i̍h nyna iě i̍h pɔ̀ni, sɔ u̍h-a jě la̍ i̍ sǔh. Wɛ̀ u̍h gbǎ dǒ Jusu de̍e̍.