Read Western Krahn Matio 21 Bible Online

Matio 21 - Western Krahn bible

Matio 21

¹Ti̍ Jusu ke ɔ̍ kòà-a nyni̍-a la̍ dǒ Juluslɛn-ɛ, wɛ̀ u̍h sǐ dǒ Bɛfaji i̍. Wlɔ̀-a chɛ̀ nɛ dǒ Ɔle-Tu̍ᵻá Tlu̍h gbɔ̀ì. Iě Jusu dbo̍ ɔ̍ kòà sɔɔ̌n nya̍ dǒ wlɔ̀-a chɛ̀ di̍i̍.

²Ɔ̍ la̍a̍ dě u̍h we̍, “Mɔ̀ mu̍ dě wlɔ̀ nɛ-a dǒ à jǔ-ɛ di̍i̍. Pò mɔ̀ sǐ wlɔ̀ i̍ ka-ɛ, mɔ̀-a mu̍ soo̍pà jě u̍h mɔɛ ɛ̍ i̍, iě ɛ̍ jǔ nyna ɛ̍ pùn. Mɔ̀ pɔ̀ni ɛ̍ mɔ̀ iě i̍h ǐn ja.

³Pò nyɔ̍ nɛ doǒ wɛ̀ ɔ̍ iě wlu-ɛ, nɛ̀ mɔ̀ la̍a̍, ‘Dlǔtu-a pɔ̀n i̍h.’ Nɛ̀ ɔ̍ se̍-o wlu̍ tba̍ mu̍.”

⁴Ɛ̀ la ɛ̍ nɛ-ɛ, wɛ̀ Nyɔsoa-a tu̍owli po̍ nyɔ̍-a wlu̍ iě tìh-a taǐn nu̍.

⁵Wlu̍-a chɛ̀ la̍a̍, “Sèàɛ̍ Juluslɛn nyɔ̍ wlùh, ‘Nàa̍, mɔ̀ gbɛ̀n-e, mɔ̀-a Blǔh Baa-a ji̍ dě mɔ̀ we̍. Ɔ̍ gbɛ̍n gba̍n, iě ɔ̍ naɛ dě soo̍pà kɛ̍n, ɛ̍ ke ɛ̍ jǔ plɔ̀ ke.’ ”

⁶Wɛ̀ kòà laa̍ u̍h mu̍ iě u̍h nu̍ dɛ̍ Jusu dǎ-a u̍h iě-a nu̍-ɛ.

⁷Wɛ̀ u̍h ja soo̍pà ke ɛ̍ jǔ, iě u̍h slo̍ u̍h-a plɛ̀i̍ᵻ dǒ i̍h kɛ̍n i̍. Wɛ̀ Jusu jǎ, iě ɔ̍ tè i̍ dǒ i̍h kɛ̍n.

⁸Nyɔ̍ tlùgbei̍ laa̍ duuh-a slo̍ u̍h-a plɛ̀i̍ᵻ dǒ wìè-i, nɛ̀ kǎ duuh-a chɛ̍n kǎfanᵻ u̍h-a slo̍ i̍h dǒ wìè-i.

⁹Nɛ̀ nyɔ̍ tlùgbei̍ ùh wɔ̀-a dǒ ɔ̍ jǔ-ɛ ke juh wɔ̀-a dǒ ɔ̍ de̍e̍-ɛ, u̍h-a wǐi i̍. U̍h la̍a̍, “Depe-a Jǔ bo ɔ̀ nu̍ tìhwe̍ po̍ nyɔ̍. Pɔ̀ìě dǒ nyɔ̍ ɔ̀ ji̍-a dǒ Joi-a nynɛ̌ kɛ̍n-ɛ we̍, Nyɔsoa bo ɔ̀ nu̍ tìhwe̍ po̍ nyɔ̍ dě ja̍i̍wlɔ̀.”

¹⁰Ti̍ Jusu sǐ-a dǒ Juluslɛn-iɛ, sɔ wlɔ̀-a chɛ̀ sìka i̍ sǔh. Iě u̍h la̍a̍, “Ɔ̀ la ɔ̍ nynɛ̌ ɛ?”

¹¹Wɛ̀ nyɔ̍ tlùgbei̍ laa̍ u̍h la̍a̍, “Ɔ̀ la̍ Nyɔsoa-a tu̍owli po̍ nyɔ̍ Jusu bo, ɔ̍ sɔ Naaslɔɛ dě Kaladii bloa̍ kɛ̍n.”

¹²Wɛ̀ Jusu pa̍ dě Nyɔsoa-a slaǎ sà gbò sɔ̀n. Iě ɔ̍ po̍ dɛ̍ᵻ ple̍-nyɔ̍ ke dɛ̍ᵻ tɛ̀n-nyɔ̍ nɛ-a dě ɛ̍ di̍i̍-ɛ sɔ̀n i̍. Wɛ̀ ɔ̍ chlìi wlǐ we̍ sìi̍ nyɔ̍-a teble̍ᵻ i̍, ɛ̍ ke pawo̍o̍ᵻ ple̍-nyɔ̍-a kɛ̍n tè dɛ̍ᵻ ke.

¹³Wɛ̀ Jusu la̍a̍ dě u̍h we̍, “Ɛ̍ chlǐh-ɛ dě Nyɔsoa-a wlu̍ di̍i̍. Nyɔsoa la̍a̍, ‘Ǎn gbò kɔn ɛ̍ iě ba̍le gbò nu̍.’ Jɛ mɔ̀-a nui ɛ̍ jlǐ-nyɔ̍-a tè la̍ we̍i̍.”

¹⁴Wɛ̀ dɔ̌-nyɔ̍ ke klɔ-nyɔ̍ mu̍ dě ɔ̍ we̍ slaǎ sà gbò sɔ̀n, iě ɔ̍ pǔh-i u̍h.

¹⁵Dɛ̍ᵻ Jusu nu̍-a i̍-ɛ, i̍h flɔn-ɛ nyɔ̍ wɔ̍n. Nɛ̀ nynuu̍plìh-a wǐi i̍ dě slaǎ sà gbò sɔ̀n. U̍h la̍a̍, “Mɔ̀ po̍ Depe-a Jǔ tìhwe̍.” Jɛ slaǎ sà nyɔ̍ klaaᵻ ke telě nǎ poe nyɔ̍ jě-a dɛ̍ᵻ Jusu nu̍-a i̍-ɛ, ɛ̍ ke nynuu̍plìh-a i̍ wǐi-ɛ ke-ɛ, sɔ u̍h gbǎ jlu̍h sǔh.

¹⁶Wɛ̀ u̍h tèle Jusu i̍, u̍h la̍a̍, “Dɛ̍ nynuu̍plìh la u̍h-a bla̍-aɛ, àn wɔ̌n i̍h ae?” Ɔ̍ la̍a̍, “I̍i̍n. Mɔ̀-ɔ se̍-a Nyɔsoa-a wlu̍ la slè sàì ae? Ɛ̍ la̍a̍, ‘Àn sà nynuu̍plìh ke nynuu̍pli wlu̍ di̍i̍ iě u̍h-a po̍ ìn tìhwe̍.’ ”

¹⁷Wɛ̀ ɔ̍ sɔ dǒ u̍h we̍-e, iě ɔ̍ mu̍ dǒ Bɛtani dě ɔ̍ pɛ̌n.

¹⁸Ti̍ Jusu tlùìn-a klàɛ̍we̍ ɔ̍ mu̍-a la̍ dě de̍ tùgbàwlɔ̀ di̍i̍-ɛ, nɛ̀ mɔ̌-a nu̍ ɔ̍-ɛ dǒ wìè-i.

¹⁹Dǒ ɔ̍ jě-e fei-tu̍, wɛ̀ ɔ̍ mu̍ dě ɛ̍ we̍. Jɛ ɔ̍ se̍ ɛ̍ buǒ ja̍ jɛɛ, wlɔ̍nᵻá sǔh bo ìh nɛ dě ɛ̍ ja̍. Wɛ̀ ɔ̍ la̍a̍ dě ɛ̍ we̍, “Ìn se̍ gba̍ buǒ po̍ dɛ-o.” Tu̍ laa̍ dǒ ɛ̍ nyna iě ɛ̍ klǎn.

²⁰Ti̍ ɔ̍ kòà jě-a dɛ̍ la-ɛ, sɔ ɛ̍ wlǔh i̍ u̍h de̍e̍. Wɛ̀ u̍h la̍a̍, “Dɛ̍nu̍ fei-tu̍ la ɛ̍ nu̍ la̍a̍n klǎn-a suei̍ ɛ?”

²¹Iě ɔ̍ la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, pò mɔ̀-a wlùh gbaɛ se̍ kɛ̍ i̍ nɛ-ɛ, nɛ̀ dɛ̍ ǐn nu̍-a dǒ fei-tu̍ la pùn-ɛ, nɛ̀ mɔ̀-a mu̍ ɛ̍ nu̍ ke. Nɛ̀ mɔ̀ se̍ ɛ̍ fei-tu̍ nɛ due pùn nu̍ mu̍, jɛ nɛ̀ pò mɔ̀ wlu dě tlu̍h we̍ ɛ̍ iě gbààn wlǔh-i ɛ̍ iě jbǒ kɛ̍n gbǎ-ɛ, nɛ̀ ɛ̍ mu̍ ɛ̍ nu̍.

²²Pò mɔ̀ blě wlùh gbaɛ wɛ̀ mɔ̀ iě dɛ̍-a tìh i̍ tèle dě ba̍le-ɛ di̍i̍-ɛ, nɛ̀ mɔ̀-a mu̍ ɛ̍ jě.”

²³Iě Jusu mu̍ dě Nyɔsoa-a slaǎ sà gbò sɔ̀n. Ɔ̍ nɛ dǒ nyɔ̍ nǎ po̍ la̍ sǔh, wɛ̀ slaǎ sà nyɔ̍ klaaᵻ ke u̍h-a nyɔ̍ klaaᵻ mu̍ dě ɔ̍ we̍. Iě u̍h tèle ɔ̍ i̍, u̍h la̍a̍, “Nyɔ̍we̍ bo ɔ̀ nyǐ ìn tùn wɛ̀ àn nu̍ ìh la ɛ? Nyɔ̍ ɔ̀ nyǐ-a ìn tùn-ɛ, sǐ ɔ̍ nynɛ̌.”

²⁴Wɛ̀ ɔ̍ la̍a̍, “Ǎn mu̍ mɔ̀ dɛ̍ due i̍ tèle ke. Pò mɔ̀ sà ɛ̍ pɔ̀n we̍-ɛ, nyɔ̍ ɔ̀ nyǐ-a ǐn tùn wɛ̀ ǎn nu̍-a ìh la-ɛ, nɛ̀ ǎn mu̍ ɔ̍ nynɛ̌ sǐ.

²⁵Nyɔ̍ bo ɔ̀ nyǐ Chɔɔn tùn wɛ̀ ɔ̍ po̍ nyɔ̍ nǐ dlǔ ɛ? Nyɔsoa bo ɛɛ, àe̍e̍ wlɔ̀ nyi̍ɔ̍ bo ae?” Wɛ̀ u̍h-a sǔh-a pu̍e̍e ɛ̍ wɔ̍ɔ̍n i̍. U̍h la̍a̍, “Pò à la̍a̍, ‘Nyɔsoa bo-ɛ,’ nɛ̀ ɔ̍ mu̍ ka nu̍, ‘Dɛ̍nu̍ mɔ̀ se̍ ɔ̍ tìh chɛ̀ po̍ la̍ ɛ?’

²⁶Iě pò à la̍a̍, ‘Wlɔ̀ nyi̍ɔ̍ bo-ɛ,’ nɛ̀ à ple̍ nyɔ̍ la u̍h-a faɔn, dɛ̍nu̍ɛ, u̍h kli̍hgbɛ̍ u̍h-a slè-e Chɔɔn Nyɔsoa-a tu̍owli po̍ nyɔ̍.”

²⁷Wɛ̀ u̍h la̍a̍ dě Jusu we̍, “À se̍ ɔ̍ juo.” Wɛ̀ Jusu la̍a̍ dě u̍h we̍, “Iě nɛ̀ nyɔ̍ ɔ̀ nyǐ-a ǐn tùn wɛ̀ ǎn nu̍-a ìh la-ɛ, nɛ̀ ǐn se̍ ɔ̍ nynɛ̌ sǐ mu̍ ke.”

²⁸Jusu la̍a̍ dě u̍h we̍, “Ǎn pɔ̀n iě mɔ̀ naɛ flɔ̍nwlùh juo. Jɔ̍gbau due bo ɔ̀ blě nynuu̍ sɔɔ̌n. Wɛ̀ ɔ̍ mu̍ dě klaa naɛ we̍ iě ɔ̍ la̍a̍, ‘Ǎn jǔ, mu̍ dě ǎn tlo-dɛ̍ᵻá klè di̍i̍ sèàn ìè-e dbo̍ nui o.’

²⁹Wɛ̀ ɔ̍ la̍a̍, ‘Ǐn se̍-e mu̍ mu̍ o.’ Jɛ ɔ̍ chlì-a doǒ i̍-ɛ, wɛ̀ ɔ̍ fèàɛ̀ ɔ̍ wlùh i̍ dode̍, iě ɔ̍ mu̍ dě klè laa̍.

³⁰Wɛ̀ u̍h baa mu̍ dě wɛ naɛ we̍, iě ɔ̍ sèàɛ̍ ɔ̍ dɛ̍ due laa̍ wlùh ɔ̍ iě dě klè mu̍. Iě ɔ̍ la̍a̍, ‘Ào̍, ǎn mu̍-e mu̍ o ma̍à.’ Jɛ ɔ̍ se̍-e mu̍.

³¹Nɛ̀ u̍h nɛ-a sɔɔ̌n-ɛ, nyɔ̍ bo ɔ̀ nu̍ ɔ̍ baa-a wlu̍ ɛ?” U̍h la̍a̍, “Klaa naɛ bo ɔ̀ nu̍ ɔ̍ wlu̍.” Wɛ̀ Jusu la̍a̍ dě u̍h we̍, “Bɔ̌ ǐn sèàɛ̍ mɔ̀ tìh-a taǐn wlùh, taa̍sìh sà nyɔ̍ ke kàìà nynɔ̌gbaɔᵻá mu̍ la̍ mɔ̀ jǔ dě Nyɔsoa-a kmɔ̌ wlu̍ i̍ kɔn-ɛ di̍i̍.

³²Dɛ̍nu̍ɛ, Chɔɔn ɔ̀ po̍-a nyɔ̍ nǐ dlǔ-ɛ ji̍ nɔ̌ mɔ̀ we̍ ɔ̍ iě mɔ̀ wìè slɛ̌ i̍ toe, iě mɔ̀ se̍ ɔ̍ tìh chɛ̀ po̍. Jɛ taa̍sìh sà nyɔ̍ ke kàìà nynɔ̌gbaɔᵻ nɔ̀ɔ̍, u̍h po̍ ɔ̍ wlu̍ tìh chɛ̀. Mɔ̀ jě-a dɛ̍-a chɛ̀ la u̍h nu̍-aɛ, ɛ̍ se̍ mɔ̀-a wlùh fèàɛ̀ mɔ̀ iě ɔ̍ tìh chɛ̀ po̍ ke.”

³³Jusu la̍a̍, “Mɔ̀ po̍ nɔ̌ nɛnǎ dɛɛ we̍ dounᵻ. Jɔ̍gbau due bo ɔ̀ blě blǔh, dǒ ɔ̍ nui tlo-dɛ̍ᵻá klè ɔ̍ iě nmɔ̍ nu̍. Wɛ̀ ɔ̍ sìì ɛ̍ gbàɛ̍gbà de̍e̍ i̍, iě ɔ̍ blǔ biě dǒ sɔɔ̌ kɛ̍n nmɔ̍ iě-e i̍ tè. Wɛ̀ ɔ̍ nu̍ gbàsla dǒ klè jlǐhɛ̍ tù-ɛ we̍. Ɔ̍ wɔ̌an dihwa̍a̍ mu̍ tìh-ɛ, wɛ̀ ɔ̍ si̍e̍ klè laa̍ dě klè i̍ gbɛ̍n nyɔ̍ kwa̍a̍.

³⁴Ti̍ tlo-dɛ̍ᵻ laa̍ i̍h-a gbǎn-a ti̍ nyni̍-a doǒ-ɛ, wɛ̀ ɔ̍ dbo̍ ɔ̍ pòi̍nynuu̍ dě klè i̍ gbɛ̍n nyɔ̍ laa̍ we̍, u̍h iě ɔ̍ naɛ tlo-dɛ̍ᵻá buǒᵻ ja.

³⁵Wɛ̀ klè i̍ gbɛ̍n nyɔ̍-a chɛ̀ gbɛ̍n ɔ̍ pòi̍nynuu̍ laa̍. Wɛ̀ u̍h bla̍ due, u̍h dbǎ dɔɔ, iě u̍h tbaɛ ta̍a̍n naɛ sɔɔ̌ᵻ i̍.

³⁶Wɛ̀ ɔ̍ dbo̍ ɔ̍ pòi̍nynuu̍ duuh u̍h tìè i̍ u̍h sìì sàì naɛ. Jɛ dɛ̍ due laa̍ bo u̍h nu̍ u̍h jii̍ ke.

³⁷Jɛ bɔ̌ɛ-a doǒ-ɛ, ɔ̍ dbo̍ ɔ̍ chɛ̀-a jǔ dě u̍h we̍. Ɔ̍ la̍a̍, ‘Ǐn juo ɛ̍-ɛ, ǎn jǔ nɔ̀ɔ̍, u̍h-a mu̍ ɔ̍ dɛ̍ɛ̍ jě.’

³⁸Jɛ klè i̍ gbɛ̍n nyɔ̍ jě-a jǔ laa̍-ɛ, iě u̍h la̍a̍, ‘Ɔ̍ tèwlìɛ̍ bo ɔ̀ ji̍-a dě de̍à. Mɔ̀ ji̍ à iě ɔ̍ dbǎ, nɛ̀ kɔn-dɛ̍ᵻ la i̍h-a mu̍ à i̍ wɛ̀ɛ̀.’

³⁹Wɛ̀ u̍h gbɛ̍n ɔ̍, iě u̍h sà ɔ̍ dǒ klè, wɛ̀ u̍h dǔ ɔ̍ dbǎ-a.”

⁴⁰Wɛ̀ Jusu tèle u̍h i̍, ɔ̍ la̍a̍, “Kaka la̍, pò klè joi-a chɛ̀ ji̍-ɛ, nɛ̀ dɛ̍ ɔ̍ mu̍ ka klè i̍ gbɛ̍n nyɔ̍ laa̍ nui ɛ?”

⁴¹U̍h la̍a̍, “Kǔ-a wlùh blě nyɔ̍ laa̍ nɛ̀ ɔ̍ mu̍ u̍h dbǎ. Wɛ̀ ɔ̍ iě klè-a chɛ̀ nyɔ̍ duuh nyǐ. Wɛ̀ pò tlo-dɛ̍ᵻá gbǎn ti̍ nyni̍-oɛ, wɛ̀ u̍h iě ɔ̍ naɛ ɔ̍ nyǐ.”

⁴²Jusu la̍a̍ dě u̍h we̍, “Mɔ̀-ɔ se̍-a Nyɔsoa-a wlu̍ slè sàì ae? Ɛ̍ la̍a̍, ‘Sɔɔ̌ ɛ̀ gbò po̍ nyɔ̍ tba̍-a chla-ɛ, ɛ̍ bo ɛ̀ bɔ̌ɛ-a gbò-a sìtù nu̍-ɛ wɛ̀. Joi bo ɔ̀ nu̍ ɛ̀ la. Sɔ ɛ̍ nu̍ nyɔ̍ wɔ̍n flɔn-ɛ dɛ̍ dǒ à we̍.’

⁴³“Ɛ̍ tìh-ɛ, bɔ̌ ǐn sèàɛ̍ mɔ̀ wlùh, Nyɔsoa-a kmɔ̌ wlu̍ i̍ kɔn-ɛa mu̍ mɔ̀ kwa̍a̍ sà-ɛ, nɛ̀ nyɔ̍ mu̍-a ɛ̍ buǒᵻ poe-ɛ, u̍h bo ɛ̍ mu̍ nyǐ-ɛ. [

⁴⁴Nɛ̀ nyɔ̍ ɔ̀ mu̍-a i̍ kà dǒ sɔɔ̌ la kɛ̍n-ɛ, nɛ̀ ɔ̍ mu̍ ja̍ i̍ chlà-ɛ. Jɛ nyɔ̍ ɔ̀ sɔɔ̌-a chɛ̀-a mu̍-a kɛ̍n gbǎ-ɛ, nɛ̀ ɔ̍ mu̍ i̍ waɛ.]”

⁴⁵Ti̍ slaǎ sà nyɔ̍ klaaᵻ ke Fɛlesii nyɔ̍ wɔ̌n-a Jusu-a nɛnǎᵻ la-ɛ, sɔ u̍h juo-o dɛ̍ i̍ ka u̍h bo ɔ̍ dǎ-aɛ.

⁴⁶Sɔ u̍h-a pɔ̀n jii la̍ i̍ u̍h iě ɔ̍ gbɛ̍n, jɛ u̍h-a ple̍ nyɔ̍ tlùgbei̍ laa̍ jǔ. Dɛ̍nu̍ɛ, nyɔ̍gbei slè-e ɔ̍ Nyɔsoa-a tu̍owli po̍ nyɔ̍.