Read Western Krahn Matio 22 Bible Online

Matio 22 - Western Krahn bible

Matio 22

¹Wɛ̀ Jusu wlu u̍h we̍ dɛ dě nɛnǎᵻ di̍i̍.

²Ɔ̍ la̍a̍, “Kǎ Nyɔsoa-a kmɔ̌ wlu̍ i̍ kɔn-ɛ nu̍ ka nɛ-ɛ. Ɛ̍ wɔ̀ blǔh baa due ɔ̀ po̍-a dɛ̍ᵻ gba̍a̍-ɛ. Wɛ̀ ɔ̍ iě ɔ̍ jǔ jɔ̍gbau-a nynɔ̌ jla̍ ja peě tù.

³Wɛ̀ ɔ̍ dbo̍ ɔ̍ pòi̍nynuu̍ u̍h iě nyɔ̍ ɔ̍ dǎ-a dǒ peě laa̍ kɛ̍n-ɛ wlùh sèàɛ̍ u̍h iě ji̍. Jɛ u̍h la̍ u̍h se̍ ji̍ mu̍.

⁴Wɛ̀ ɔ̍ dbo̍ ɔ̍ pòi̍nynuu̍ duuh dɛ, ɔ̍ la̍a̍, ‘Nyɔ̍ ǐn dǎ-a peě la kɛ̍n-ɛ, mɔ̀ sèàɛ̍ u̍h wlùh u̍h iě ji̍, di̍-dɛ̍ᵻ wɛ̀ i̍ wɛ̀. Ǐn dbǎ ǎn chlǎn bliᵻ bei ke i̍h-a nynuu̍ wɛ̀, dɛ̍ᵻ kli̍hgbɛ̍ gbǎ gba̍a̍ wɛ̀. U̍h ji̍ à iě peě la tù.’

⁵Jɛ u̍h se̍ ɔ̍ pòi̍nynuu̍ dounᵻ we̍ po̍. Tà jɔ kɔn-ɛ, nɛ̀ ɔ̍ mu̍-o. Due mu̍ dě ɔ̍ blǐ klè, dɔɔ mu̍ dě ɔ̍ dɛ̍ ple̍ gbò sɔ̀n.

⁶Wɛ̀ duuh gbɛ̍n pòi̍nynuu̍ laa̍. Iě u̍h nu̍ u̍h kà i̍, wɛ̀ u̍h dbǎ u̍h.

⁷Sɔ blǔh baa laa̍ ɔ̍ sɔ̀n-ɛ dǒ jlu̍h we̍. Wɛ̀ ɔ̍ dbo̍ ɔ̍ fledlǔ, iě u̍h dbǎ ùh-a poe-a nyɔ̍ gbe̍ja̍a̍-ɛ, wɛ̀ u̍h fɔ̍n u̍h-a tùgbàwlɔ̀.

⁸Wɛ̀ ɔ̍ la̍a̍ dě ɔ̍ pòi̍nynuu̍ duuh we̍, ‘Nynɔ̌ peě la ɛ̍ ti̍ nyni̍ wɛ̀. Jɛ nyɔ̍ ǐn dbo̍-a wlu̍ we̍ i̍-ɛ, u̍h se̍ ɛ̍ ka̍ nɛ.

⁹Mɔ̀ mu̍ dě wlɔ̀gbàɛ̀, juh mɔ̀ jě-ɛ, mɔ̀ dǎ u̍h, u̍h iě peě la kɛ̍n ji̍.’

¹⁰Iě ɔ̍ pòi̍nynuu̍ mu̍ dě wlɔ̀gbàɛ̀, wɛ̀ u̍h po̍ nyɔ̍ chɛ̀ ke nyɔ̍ sɔ̀ɛ̀n kli̍hgbɛ̍ u̍h jě-aɛ tàdùè. Sɔ peě tù-i gbò-a chɛ̀ jǐ-i dǒ dihwi̍hᵻ we̍.

¹¹“Jɛ ti̍ blǔh baa ji̍-a dihwi̍hᵻá chɛ̀ jě la̍-ɛ, dǒ ɔ̍ jě-e jɔ̍gbau due dě u̍h nynɛ̌, nɛ̀ ɔ̍ se̍ nynɔ̌ jla̍ ja jlii̍-i pa̍.

¹²Wɛ̀ ɔ̍ tèle ɔ̍ i̍, ɔ̍ la̍a̍, ‘Jɔ̍gbau chɛ̀, ìn se̍-a nynɔ̌ jla̍ ja jlii̍-i pa̍-ɛ, ka ìn nu̍ wɛ̀ ìn pa̍ gbò ɛ?’ Jɛ jɔ̍gbau se̍ wɔ̍n-a fuɛn nu̍.

¹³Wɛ̀ blǔh baa la̍a̍ dě ɔ̍ pòi̍nynuu̍ we̍, ‘Mɔ̀ sa̍n ɔ̍ bu̍hᵻ ke ɔ̍ sɔ̍nᵻ. Nɛ̀ mɔ̀ po̍ ɔ̍ sɔ̀n dě kwile. Dě ɔ̍ mu̍ fìn-i, ɔ̍ iě nynɛ̌ di̍ kìàǎnkìàǎn.’

¹⁴“Dɛ̍nu̍ɛ, nyɔ̍ dɔu dǎ-ɛ de, jɛ jɔ̌ wei bo ùh tba̍-ɛ chèɛ̀.”

¹⁵Wɛ̀ Fɛlesii nyɔ̍ dbǎ wlu̍ i̍, iě u̍h mu̍ u̍h iě Jusu dǒ ɔ̍ chɛ̀-a wlu̍ kɛ̍n gbɛ̍n-ɛ.

¹⁶Iě u̍h dbo̍ u̍h-a kòà ke nyɔ̍ sɔ-a dě blǔh baa Ɛlo naɛ gbɔ̀ù di̍i̍-ɛ dě Jusu we̍. U̍h la̍a̍, “Dlǔtu, à juo ɛ̍-ɛ mɔ̀ bo ɔ̀ sà tìh-a taǐn, dɛ̍nu̍ɛ, nɛ̀ gbǎ nyɔ̍-a wlu̍ we̍, iě nɛ̀ ple̍ nyɔ̍-a jua̍a̍ jǔ ke. Jɛ tìh-a taǐn bo àn poe nyɔ̍ nǎ dǒ Nyɔsoa dɛ we̍.

¹⁷Ɛ̍ tìh-ɛ, sèàɛ̍ à wlùh, à telě sà à wlu̍ kɛ̍n à iě taa̍sìh sà dě Wloma nyɔ̍-a Bloa̍ Joi we̍ ɛɛ, àe̍e̍ ɛ̍ se̍ à wlu̍ kɛ̍n sà ae? Ka ɛ̍ nɛ ke dě ìn wlùh we̍ ɛ?”

¹⁸Jɛ dɛ̍ sɔ̀n u̍h pu̍e̍e-aɛ, ɔ̍ juo ɛ̍ i̍. Wɛ̀ ɔ̍ la̍a̍, “Mɔ̀-ɔ la ùh nɛ-a mɛɔ sɔɔ̌n wɔ̍ɔ̍n-ɛ, dɛ̍nu̍ mɔ̀-a pɔ̀n ǎn gbɛ̍n-ɛ la̍ i̍ ɛ?

¹⁹Wliɛ̍-a chɛ̀ mɔ̀-a sà-ɛa taa̍sìh-ɛ, mɔ̀ ja ɛ̍ iě ɛ̍ jě.” Wɛ̀ u̍h ja ɛ̍ ɔ̍.

²⁰Iě ɔ̍ tèle u̍h i̍, ɔ̍ la̍a̍, “Nyɔ̍ kɔn dlǔ ke nynɛ̌ bo ìh nɛ da̍a ɛ̍ kɛ̍n ɛ?”

²¹U̍h la̍a̍, “Bloa̍ Joi bo.” Wɛ̀ ɔ̍ la̍a̍ dě u̍h we̍, “Dɛ̍ ɛ̀ kɔn-a dǒ Bloa̍ Joi we̍-ɛ, nɛ̀ mɔ̀ nyǐ ɛ̍ Bloa̍ Joi. Nɛ̀ dɛ̍ ɛ̀ kɔn-a dǒ Nyɔsoa we̍-ɛ, mɔ̀ nyǐ ɛ̍ Nyɔsoa.”

²²U̍h wɔ̌n-a ɔ̍ wlu̍ la-ɛ, sɔ ɛ̍ wlǔh i̍ u̍h de̍e̍. Iě u̍h sɔ dǒ ɔ̍ we̍-e u̍h mu̍.

²³Dǒ weɛ̍ due laa̍ di̍i̍ wɛ̀ Sadiusii nyɔ̍ ùh la̍ nyɔ̍ se̍-ae wlǔh mu̍ dode̍-ɛ, u̍h ji̍ Jusu i̍ tèle la̍.

²⁴U̍h la̍a̍, “Dlǔtu, Mose-a telě la̍ pò jɔ̍gbau blě nynɔ̌ iě u̍h se̍ jǔ wlǔh-i wɛ̀ ɔ̍ iě mɛ̌-ɛ, nɛ̀ ɔ̍ de̍di̍i̍ kɔn ɔ̍ iě nynɔ̌ laa̍ blě, wɛ̀ u̍h iě nynuu̍ wlǔh-i dǒ ɔ̍ de̍di̍i̍ mɛ̌-aɛ we̍.

²⁵Nɛ̀ɛ̍ à blě de̍di̍i̍ᵻ jɔ̍gbauᵻ mɛ̀sɔɔ̌n nɔ̌ à nynɛ̌. Wɛ̀ klaa naɛ blě nynɔ̌, jɛ u̍h se̍ jǔ wlǔh-i iě ɔ̍ mɛ̌. Ɛ̍ kɔn ɔ̍ de̍di̍i̍ blě nynɔ̌ laa̍.

²⁶Ɛ̀ due laa̍ bo ɛ̀ nɛ sɔɔ̌n naɛ jii̍. Wɛ̀ ɛ̍ nu̍ ɛ̍ ta̍a̍n naɛ jii̍. Kǎ ɛ̍ nu̍ te̍e̍ wɛ̀ ɛ̍ nyni̍ dě mɛ̀sɔɔ̌n naɛ we̍.

²⁷Ɛ̍ se̍-o siee, nynɔ̌-a chɛ̀ mɛ̌-ɛ.

²⁸Nɛ̀ɛ̍, ka ɔ̍ dǔ-a u̍h nɛ-a mɛ̀sɔɔ̌n-ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ nyɔ̍ kɔn nynɔ̌ ɔ̍ mu̍ nu̍ gbe̍i̍n ɛ?”

²⁹Wɛ̀ Jusu la̍a̍, “Dɛ̍ mɔ̀-a bla̍-aɛ, ɛ̍ se̍-o wìè-i nɛ, jɛ mɔ̀ se̍ Nyɔsoa-a wlu̍ ke ɔ̍ gbǐh juo dɛbo.

³⁰Dɛ̍nu̍ɛ, ti̍ mɛ̌-nyɔ̍-a mu̍-ae wlǔh-ɛ, nɛ̀ u̍h-a mu̍ Nyɔsoa-a ǐnchɔ̀ wɔ̀ dě ja̍i̍wlɔ̀, u̍h se̍ blǐ tǐn-i mu̍.

³¹Ɛ̀ tba̍-a dǒ mɛ̌-nyɔ̍-ae wlǔh dɛ pùn i̍-ɛ, dɛ̍ ɛ̀ Nyɔsoa bla̍-a dě mɔ̀ we̍-ɛ, mɔ̀-ɔ se̍a ɛ̍ slè ae?

³²Ɔ̍ la̍a̍, ‘Mɔ̍ Eblaɛɛn ke, Ase ke Jekɔ-a Nyɔsoa.’ Ɔ̍ se̍ Nyɔsoa dǒ mɛ̌-nyɔ̍ we̍. Jɛ ɔ̍-ɔ Nyɔsoa dǒ kmɔ̌ i̍ tè nyɔ̍ we̍.”

³³Ti̍ nyɔ̍ tlùgbei̍ wɔ̌n-a wlu̍ la-ɛ, sɔ ɔ̍ nyɔ̍ nǎ po̍-ɛ wlǔh i̍ u̍h de̍e̍.

³⁴Ti̍ Fɛlesii nyɔ̍ wɔ̌n-a i̍h ka Jusu sà-a Sadiusii nyɔ̍-a wɔ̍n klèɛ̍-ɛ, wɛ̀ u̍h gbòe i̍.

³⁵U̍h-a due ɔ̀ juo-a telě kaa̍-ɛ, iě ɔ̍ ji̍ ɔ̍ iě Jusu dǒ ɔ̍ chɛ̀-a wlu̍ kɛ̍n gbɛ̍n-ɛ.

³⁶Ɔ̍ la̍a̍, “Dlǔtu, Nyɔsoa-a telě jɛwe̍ bo ɛ̀ ku̍ wɔ̍n ɛ?”

³⁷Wɛ̀ Jusu la̍a̍, “ ‘Jbɛɛ àn Joi Nyɔsoa-a dǒ àn pɔluh kli̍hgbɛ̍ we̍, dǒ àn kmɔ̌ kli̍hgbɛ̍ we̍, ɛ̍ ke àn wlùh kli̍hgbɛ̍ ke.’

³⁸Ɛ̀ la bo ɛ̀ nu̍ sàǐtòò telě iě ɛ̍ gbǎ dɛ̍kɛ̍n ɛ̍ sìì ɛ̍ ba̍ᵻ kli̍hgbɛ̍.

³⁹Nɛ̀ ɛ̀ po̍-a sɔɔ̌n-ɛ, ɛ̍ ke ɛ̍ wɔ̀ɛ-ɛ. Ɛ̍ la̍a̍, ‘Jbɛɛ ìn pònyɔ̍-ɔ ka àn chɛ̀-ɛ.’

⁴⁰Telě sɔɔ̌n la i̍h bo Mose-a telě ke Nyɔsoa-a tu̍owli po̍ nyɔ̍-a nǎ po̍-ɛ kli̍hgbɛ̍ pèle i̍.”

⁴¹Ti̍ Fɛlesii nyɔ̍ gbǎ-a tàdùè-ɛ, wɛ̀ Jusu tèle u̍h i̍.

⁴²Ɔ̍ la̍a̍, “Dɛ̍ bo ɛ̀ nu̍ mɔ̀ naɛ flɔ̍nwlùh ke dǒ Nyɔsoa-a Chèɛ̀ Tba̍ju la we̍ ɛ? Nyɔ̍ kɔn tloemlai bo ɛ?” U̍h la̍a̍, “Depe-a tloemlai bo.”

⁴³Wɛ̀ ɔ̍ la̍a̍ dě u̍h we̍, “Wɛ̀ dɛ̍nu̍ Sùù po̍ Depe wlu̍ wɔ̍ɔ̍n, wɛ̀ ɔ̍ dǎɛ ɔ̍ Joi ɛ? Dɛ̍nu̍ɛ, Depe la̍a̍,

⁴⁴‘Joi la̍a̍ dě ǎn Joi we̍, Tè i̍ da̍a ǎn di̍na̍ we̍ te̍e̍ iě ɛ̍ nu̍ ìè àn nyɛ̌-nyɔ̍ kɛ̍n i̍ na.’

⁴⁵Nɛ̀ pò Depe-a chɛ̀ dǎɛ ɔ̍ Joi-ɛ, nɛ̀ dɛ̍ bo ɛ̀ nu̍ ɔ̍ Depe-a tloemlai we̍i̍ ɛ?”

⁴⁶Sɔ u̍h-a nyɔ̍ se̍ wɔ̍n pɔ̀ni-ɛ bɛ̌ɛ ɔ̍ iě ɔ̍ wlu̍ pɔ̀n we̍ sà. Sɔ dǒ weɛ̍ laa̍ di̍i̍-ɛ, nyɔ̍ se̍ ɔ̍ dɛ̍ i̍ tèle-ɛ bɛ̌ɛ dɛ.