Read Western Krahn Matio 23 Bible Online

Matio 23 - Western Krahn bible

Matio 23

¹Wɛ̀ Jusu la̍a̍ dě nyɔ̍ tlùgbei̍ ke ɔ̍ kòà we̍,

²“Telě nǎ poe nyɔ̍ ke Fɛlesii nyɔ̍-a sà-e Mose-a wlu̍ i̍.

³Ɛ̍ tìh-ɛ, mɔ̀ jě u̍h dɛ̍ɛ̍, nɛ̀ dɛ̍-o-dɛ̍ u̍h-a mu̍-a mɔ̀ wlùh sèàɛ̍-ɛ, mɔ̀ nu̍ ɛ̍. Jɛ dɛ̍ u̍h-a nu̍-aɛ, mɔ̀ bɔ̌ ɛ̍ nu̍-ɛ. Dɛ̍nu̍ɛ, dɛ̍ u̍h-a bla̍-aɛ, u̍h-a chɛ̀-ɛ nu̍ ɛ̍.

⁴Kwa̍ ku gbɛ̀ᵻ bo u̍h-a po̍ dǒ nyɔ̍ kleǐ. Jɛ nɛ̀ u̍h-u wɔ̌ɛn nyɔ̍ sɔ̍n we̍ po̍ tìh i̍ u̍h iě gbɛ̀ᵻá chɛ̀ gba̍.

⁵Ìh kli̍hgbɛ̍ u̍h-a nu̍-aɛ, u̍h-a nu̍ i̍h u̍h iě nyɔ̍-a jlǐh gbɛ̍n. Nyɔsoa-a wlu̍-a dɛ̍ku seeɛ u̍h bla̍-a dlǔ iě u̍h pìàɛ̍n-a sɔ̍n i̍-ɛ, i̍h bo mɔ̀ iě ja̍ gbɛ̀n sǔh mɔ̀ iě jě. Ɛ̍ ke u̍h-a dɛ̍wlo̍o̍-a baie tɔ̀ɔ̀nᵻ ke.

⁶U̍h-a pɔ̀n tà chɛ̀ i̍ tè-ɛ i̍ ma̍u̍ dě peě kɛ̍n ke dě wɛɛ sà gbòᵻ sɔ̀n i̍.

⁷U̍h-a pɔ̀n nyɔ̍ iě u̍h ja̍ tè dǒ u̍h nyinɔ̍ i̍ sà la̍ dě dɔɔ̌ gbale̍e̍ wɛ̀ nyɔ̍ iě u̍h dlǔtu dǎɛ.

⁸Jɛ mɔ̀ɔ̍ nɔ̀ɔ̍, mɔ̀ bɔ̌ wɔ̌n-ɛ nyɔ̍ bɔ̌ mɔ̀ dlǔtu dǎɛ-ɛ, dɛ̍nu̍ɛ, mɔ̀-ɔ de̍di̍i̍ᵻ iě mɔ̀-a dlǔtu nɛ due gbài̍.

⁹Nɛ̀ mɔ̀ bɔ̌ nyɔ̍ dɔɔ baa dǎɛ nɔ̌ bloɔ̍, dɛ̍nu̍ɛ, mɔ̀ blě baa due gbài̍ dě ja̍i̍wlɔ̀.

¹⁰Nɛ̀ mɔ̀ bɔ̌ wɔ̌n-ɛ nyɔ̍ bɔ̌ mɔ̀ fààmlà dǎɛ, dɛ̍nu̍ɛ, mɔ̀-a fààmlà nɛ due gbài̍. Ɔ̍ bo ɔ̀ nu̍-a Nyɔsoa-a Chèɛ̀ Tba̍ju.

¹¹Pò mɔ̀-a nyɔ̍ ja pɔ̀n ɔ̍ iě wɔ̍n ku̍-ɛ, nɛ̀ ɔ̍ nu̍ ɔ̍ ba̍ᵻá pòi̍ju.

¹²Nyɔ̍ jɔ dǔ-a ɔ̍ chɛ̀ ja̍i̍-ɛ, nɛ̀ ɔ̍ mu̍ wlù ja-ɛ. Nɛ̀ nyɔ̍ jɔ ja-a ɔ̍ chɛ̀ wlù-ɛ, nɛ̀ ɔ̍ mu̍ ja̍i̍ dǔ-iɛ.”

¹³Wɛ̀ Jusu la̍a̍, “Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Mɔ̀-a ka̍n Nyɔsoa-a kmɔ̌ wlu̍ i̍ kɔn-ɛa wìè dǒ nyɔ̍gbei we̍. Mɔ̀-a chɛ̀ wɔ̍-ɔ sǐ deě-i, iě juh-a pɔ̀n-a deě mu̍-ɛ i̍-ɛ, mɔ̀-ɔ wɔ̌n u̍h-u sǐ deě-i ke. [

¹⁴Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Mɔ̀-a bla̍ tèwànynɔ̌gbaɔᵻ jlǐhɛ̍ dlǔ, iě mɔ̀-a jǎ u̍h-a kɔn-dɛ̍ᵻ kɛ̍n. Ɛ̍ tìh mɔ̀-a tɛn-ɛ ba̍le-ɛ dlǔ wɛ̀ mɔ̀ iě mɔ̀-a chɛ̀ dě nyɔ̍ jlǐh i̍ nmɔ-ɛ. Ɛ̍ tìh-ɛ, mɔ̀ naɛ kàn gbɛ̍n-ɛa mu̍-o dɛ̍ i̍ sìì.]

¹⁵“Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Nyɔ̍ due iě mɔ̀ de̍e̍ gbǎ tìh-ɛ, nɛ̀ mɔ̀-a na blǔh we̍. Nɛ̀ pò ɔ̍ gbǎ dǒ mɔ̀ de̍e̍-ɛ, nɛ̀ nu̍-dɛ̍ᵻ ìh-a gba̍-a nyɔ̍ dě kàn nɛ̍ di̍i̍-ɛ, wɛ̀ mɔ̀-a nu̍ ɛ̍ iě ɔ̍ nu̍ i̍h ɔ̍ sìì mɔ̀-a chɛ̀.

¹⁶“Mɔ̀ɔ̍ ùh kɔn jlǐh gbe-a dǒ nyɔ̍-ɔ naɛ we̍-ɛ, chlě dǒ mɔ̀ we̍. Mɔ̀ la̍a̍, ‘Pò nyɔ̍ slɛ̀ɛ̀n Nyɔsoa-a slaǎ sà gbò-ɛ, nɛ̀ tìh se̍ ɔ̍ i̍ gbɛ̍n ke̍ ɔ̍ iě dɛ̍ laa̍ nu̍. Jɛ pò ɔ̍ slɛ̀ɛ̀n kòo̍ ìh nɛ-a dě slaǎ sà gbò-a chɛ̀ sɔ̀n-ɛ wɛ̀-ɛ, nɛ̀ jɛwɛ̀ tìh gbɛ̍n ɔ̍ i̍ ɔ̍ iě dɛ̍ laa̍ nu̍.’

¹⁷Mɔ̀ɔ̍ bo-nyɔ̍ la ùh kɔn jlǐh gbe-aɛ, slaǎ sà gbò jɛ nɛ-a kmɔ̌ wɛ̀ kòo̍ tè-a Nyɔsoa ka̍-ɛ, nɛ̀ ɛ̍ ke kòo̍ ke jɛwe̍ ku̍ wɔ̍n ɛ?

¹⁸Mɔ̀ɔ̍ due laa̍ mɔ̀ la̍a̍, ‘Pò nyɔ̍ slɛ̀ɛ̀n gblǒ kɔn kɛ̍n nyɔ̍-a nyǐ-a Nyɔsoa-a dɛ̍-ɛ, nɛ̀ tìh se̍ ɔ̍ i̍ gbɛ̍n ke̍. Jɛ pò ɔ̍ slɛ̀ɛ̀n nyǐ-dɛ̍ nɛ-a dǒ gblǒ kɛ̍n-ɛ wɛ̀-ɛ, nɛ̀ jɛwɛ̀ tìh gbɛ̍n ɔ̍ i̍ ɔ̍ iě dɛ̍ laa̍ nu̍.’

¹⁹Mɔ̀ɔ̍ jlǐh-a gbe nyɔ̍ la, gblǒ jɛ nɛ-a kmɔ̌ wɛ̀ nyǐ-dɛ̍ tè-a Nyɔsoa-a ka̍-ɛ, nɛ̀ ɛ̍ ke nyǐ-dɛ̍ ke jɛwe̍ ku̍ wɔ̍n ɛ?

²⁰Ɛ̍ tìh-ɛ, nyɔ̍ ɔ̀ slɛ̀ɛ̀n-a gblǒ-ɛ, nɛ̀ dɛ̍ᵻ ìh nɛ-a dǒ ɛ̍ kɛ̍n-ɛ bo ɔ̍ slɛ̀ɛ̀n wɛ̀ ke.

²¹Nɛ̀ nyɔ̍ ɔ̀ slɛ̀ɛ̀n-a Nyɔsoa-a slaǎ sà gbò-ɛ, nɛ̀ ɛ̍ ke Nyɔsoa ɔ̀ tǐn-a dě ɛ̍ sɔ̀n-ɛ bo ɔ̍ slɛ̀ɛ̀n wɛ̀.

²²Nɛ̀ɛ̍, nyɔ̍ ɔ̀ slɛ̀ɛ̀n-a ja̍i̍wlɔ̀-ɛ, nɛ̀ Nyɔsoa-a nynɛ̌ gbalǎ bo ɔ̍ slɛ̀ɛ̀n ɛ̍ ke nyɔ̍ ɔ̀ tè-a dě ɛ̍ di̍i̍ i̍-ɛ ke.

²³“Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Dɛ̍ᵻ pùè kli̍hgbɛ̍ mɔ̀-a jě-aɛ, mɔ̀-a sà-o due dǒ Nyɔsoa we̍. Smǎ chɛn-dɛ̍ᵻ plìh bei-a chɛ̀ mɔ̀-a nu̍ ɛ̍ i̍h pùn. Jɛ i̍ slɛ̌-ɛ ke wɔɛ kɔn-ɛ ke nu̍-dɛ̍-a dǒ wìè-i nɛ-ɛ jih nu̍-a dɛ̍kɛ̍n gbǎ telě-ɛ, wɛ̀ i̍h nɔ̀ɔ̍, mɔ̀ tǎli i̍. Ǐn se̍ la̍ mɔ̀ iě i̍h sɔ̍n we̍ sà, jɛ jih la mɔ̀ nu̍ i̍h ke.

²⁴Mɔ̀ɔ̍ la ùh kɔn jlǐh gbe-a dǒ nyɔ̍-ɔ naɛ-ɛ we̍-ɛ, mɔ̀-a tɛ̌n-e telě plìh i̍, ka nyɔ̍ sà sɛɛn plìh dě nǐ we̍ i̍ wɛ̀ ɔ̍ si̍e̍-e klaaᵻ naɛ-ɛ.

²⁵“Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Mɔ̀-a wɔ̍lɔ dǒ kàu̍n ke plɛ̌ɛ kɛ̍n i̍, jɛ nɛ̀ dě i̍h di̍i̍ jǐ-i dǒ flɛ̀n we̍. Kǎ klǎn kɔn-ɛ ke dɛ̍ᵻá kloǒ nu̍-ɛ nu̍ dě mɔ̀ di̍i̍ jǐ-ɛ.

²⁶Jlǐh-a gbe Fɛlesii nyɔ̍ la, mɔ̀ wɔ̍lɔ dě kàu̍n ke plɛ̌ɛ di̍i̍-i ke̍ sàǐtòò, wɛ̀ dǒ i̍h kɛ̍n iě fɛ̍nɛ-ɛ dǔ.

²⁷“Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Mɔ̀ wɔ̀ gbàlɔ̍ᵻ ìh u̍h po̍-a pɛ̍ntɛ̍n plǔ-ɛ. Nɔ̌ i̍h-a sɔ̀n ka nɛ maloo, jɛ nɛ̀ nyɔ̍ gbǎᵻ ke chai̍n-a sǔh jǐ dě i̍h di̍i̍.

²⁸Kǎ mɔ̀ nɛ ke, pò mɔ̀ wlǔh-i nyɔ̍ kɛ̍n-ɛ, nɛ̀ mɔ̀ nmɔ kɛ̍n i̍ dě u̍h jlǐh ka i̍ slɛ̌-nyɔ̍-ɛ. Jɛ nɛ̀ dě mɔ̀ di̍i̍ jǐ-i dǒ kà kɔn-ɛ ke mɛɔ sɔɔ̌n wɔ̍ɔ̍n nɛ-ɛ we̍.

²⁹“Mɔ̀ɔ̍ telě nǎ poe nyɔ̍ ke Fɛlesii nyɔ̍ la, chlě dǒ mɔ̀ we̍. Mɔ̀ nɛ mɛɔ sɔɔ̌n wɔ̍ɔ̍n. Mɔ̀-a po̍ gbàlɔ̍ᵻ biěᵻá gbòᵻ dǒ Nyɔsoa-a tu̍owli po̍ nyɔ̍ we̍. Iě mɔ̀-a pɛ̀ɛ̀ gbàlɔ̍ᵻ biěᵻ dǒ i̍ slɛ̌-nyɔ̍ we̍.

³⁰Iě mɔ̀ la̍a̍, ‘Pò à nɛ kmɔ̌ de tɛin dǒ à baaᵻá ti̍ we̍-ɛ, nɛ̀ àɔ̀ nɔ̀ɔ̍, à se̍ u̍h we̍ gbǎ mu̍ à iě Nyɔsoa-a tu̍owli po̍ nyɔ̍ dbǎ de.’

³¹Nɛ̀ɛ̍ nyɔ̍ ùh-a poe-a Nyɔsoa-a tu̍owli po̍ nyɔ̍ gbe̍ja̍a̍-ɛ, ka mɔ̀ nu̍-a u̍h-a nynuu̍-ɛ, nɛ̀ mɔ̀ sà mɔ̀-a chɛ̀ gbɔ̀ i̍ wɛ̀.

³²Mɔ̀ gbɛ̀n doǒ i̍ la̍ sǔh mɔ̀ iě-e mɔ̀ baaᵻá wɔ̀ɔ̀ i̍ sà.

³³Mɔ̀ɔ̍ sɛ̍ᵻá nynuu̍ la, pò mɔ̀-a sàwi̍h sì-ɛ ji̍ dǒ kàn nɛ̍ di̍i̍ gbǎ dɛ we̍-ɛ, nɛ̀ ka mɔ̀-a mu̍ ɛ̍ i̍ pǔh-ɛ nu̍ ɛ?

³⁴Ɛ̍ tìh-ɛ, ǎn mu̍ Nyɔsoa-a tu̍owli po̍ nyɔ̍ ke di̍i̍-i flɔn nyɔ̍ ke nǎ po̍ nyɔ̍ dě mɔ̀ we̍ dbo̍. Nɛ̀ mɔ̀-a mu̍ duuh dbǎ, mɔ̀ iě duuh dǒ gbàɛ̍ kɛ̍n i̍ tu̍ wlì kɔ̍-ɛ. Nɛ̀ mɔ̀-a mu̍ duuh bla̍ dě mɔ̀-a wɛɛ sà gbòᵻ sɔ̀n i̍, wɛ̀ mɔ̀ iě duuh i̍ nu̍ wlɔ̀ᵻ di̍i̍ i̍.

³⁵Ka ɛ̍ nɛ-a ka-ɛ, i̍ slɛ̌-nyɔ̍ ùh kɔn nymɔ̍ wlǎ-a i̍ nɔ̌ bloɔ̍-ɛ, ɛ̀ sɔ-a dě i̍ slɛ̌-nyɔ̍ Ebɛ we̍ wɛ̀ ɛ̍ iě-a Bɛwlekaɛ-a jǔ Sɛɛkewlaɛɔ jɛɛ-ɛ, ɔ̀ mɔ̀ poe-a gbe̍ja̍a̍ dǒ gblǒ ke Nyɔsoa-a slaǎ sà gbò nynɛ̌ we̍-ɛ, u̍h-a tìh-a mu̍ dǒ mɔ̀ dlǔ i̍ tè.

³⁶Bɔ̌ ǐn sèàɛ̍ mɔ̀ wlùh, nyɔ̍ gbe̍ja̍a̍ poe-ɛ la, ɛ̍ tìh-a mu̍ dǒ nyɔ̍ ùh tè-a ka kmɔ̌ i̍-ɛ dlǔ i̍ tè.”

³⁷Wɛ̀ ɔ̍ la̍a̍, “À, Juluslɛn, Juluslɛn, mɔ̀ bo ɔ̀ dbǎ Nyɔsoa-a tu̍owli po̍ nyɔ̍ wɛ̀ ìn tbaɛ nyɔ̍ ɔ̍ dbo̍-a dě ìn we̍-ɛ sɔɔ̌ᵻ i̍. Ti̍ kli̍hgbɛ̍ we̍ ǎn pɔ̀n àn nynuu̍ la tàdùè po̍-ɛ i̍, iě u̍h kɛ̍n kaɛn de ka gbàn nynɔ̌ suuh-a flùì ɛ̍ nynuu̍ kɛ̍n-ɛ. Jɛ nɛ̀ wɔ̌ɛn ɛ̍-ɛ.

³⁸Gbɛ̀n-e, mɔ̀-a gbò-a mu̍ jlǐhɛ̍ we̍ sà-ɛ wɛ̀ ɛ̍ iě fɔ̍ɔ̍ sie.

³⁹Ǎn sèàɛ̍ mɔ̀ wlùh, mɔ̀ se̍ ǐn jě mu̍ dɛ te̍e̍ wɛ̀ mɔ̀ iě ka dǎ, ‘Nyɔ̍ ɔ̀ ji̍-a dǒ Joi-a nynɛ̌ kɛ̍n-ɛ, pɔ̀ìě dǒ ɔ̍ we̍.’ ”