Read Western Krahn Matio 26 Bible Online

Matio 26 - Western Krahn bible

Matio 26

¹Ti̍ Jusu wɔ̀-a ìh kli̍hgbɛ̍ la bla̍-ɛ, wɛ̀ ɔ̍ la̍a̍ dě ɔ̍ kòà we̍,

²“Mɔ̀-a chɛ̀ juo ɛ̍-ɛ, ɛ̍ si̍e̍-o wǐh sɔɔ̌n ɛ̍ iě Sììkɛ̍n Weɛ̍-a Peě nu̍. Dǒ-o bo Nyi̍ɔ̍-a Jǔ-a mu̍ kwlǎ sà-ɛ, wɛ̀ ɔ̍ iě kɔ̍-ɛ dǒ gbàɛ̍ kɛ̍n i̍ tu̍ wlì.”

³Dǒ ti̍ laa̍ di̍i̍ nɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻá gbǎ tàdùè dě u̍h-a slaǎ sà nyɔ̍-a dlǔtu Kaifa-a tùnàgbò di̍i̍.

⁴Iě u̍h sɔ̌, u̍h iě Jusu gbɛ̍n soɛɛ u̍h iě ɔ̍ dbǎ.

⁵Wɛ̀ u̍h la̍a̍, “Jɛ mɔ̀ à bɔ̌ ɛ̍ nu̍-ɛ dǒ peě kɛ̍n, nɛ̀ nyɔ̍gbei-a mu̍ slɛ̀ ja̍ sà.”

⁶Ti̍ Jusu nɛ-a dǒ Bɛtani-ɛ, nɛ̀ ɔ̍ di̍ dɛ̍ dě Samo blǐ gbò, ɔ̀ wìèìdih-a nu̍-a de-ɛ.

⁷Dǒ-o bo nynɔ̌ due ji̍-i dǒ ɔ̍ we̍. Nɛ̀ nɔ̌ chlǎn ɛ̀ gbǎ-a dɛ̍kɛ̍n-ɛ, sɔɔ̌ u̍h-a dǎɛ-a alebasla-a, dě ɛ̍ sòlɛ̀ di̍i̍ bo ɔ̍ blě-e ɛ̍. Ɛ̍ bo ɔ̍ po̍ dǒ Jusu dlǔ. Nɛ̀ Jusu slo̍e i̍ dǒ teble̍ gbɔ̀.

⁸Ti̍ ɔ̍ kòà jě-a dɛ̍ nynɔ̌ laa̍ ɔ̍ nu̍-aɛ, sɔ ɛ̍ nyaɛ u̍h wɔ̍i̍n. Iě u̍h la̍a̍, “Dɛ̍nu̍ ɔ̍ gbɔ̀lɔ chlǎn la-a ɛ?

⁹Nɔ̌ chlǎn la pò ɛ̍ ple̍-ɛɛ, nɛ̀ ɛ̍ mu̍ wlǐ dɔu jě de, wɛ̀ i̍h iě nyɔ̍gbà nyɔ̍ nyǐ-ɛ.”

¹⁰Sɔ Jusu juo dɛ̍ u̍h-a bla̍-aɛ, iě ɔ̍ la̍a̍ dě u̍h we̍, “Dɛ̍nu̍ mɔ̀-a bɛ̌ɛ nynɔ̌ la wɔ̍ɔ̍n i̍ ɛ? Dɛ̍ chɛ̀ bo ɔ̍ nu̍ dǒ ǐn we̍.

¹¹Nyɔ̍gbà nyɔ̍ nɔ̀ɔ̍, u̍h ke mɔ̀-a mu̍ da̍a nɛ ma̍u̍. Jɛ mɔ̍ɔ-ɛ, mɔ̀ ke ǐn ke à se̍ da̍a nɛ mu̍ ma̍u̍.

¹²Pò u̍h ja ǐn i̍ tè la̍ gba̍-ɛ, nɔ̌ chlǎn u̍h-a mu̍-a ǐn i̍ tli̍-ɛ, ɛ̍ bo ɔ̍ tli̍ ǐn i̍ wɛ̀ duedɛ.

¹³Tìh-a taǐn ǎn sèàɛ̍ mɔ̀ wlùh, tà nyɔ̍gbei-a mu̍-a Nyɔsoa-a pɔ̀n chɛ̀ la bla̍-ɛ nɔ̌ kmɔ̌ kli̍hgbɛ̍ la we̍-ɛ, nɛ̀ dɛ̍ nynɔ̌ la ɔ̍ nu̍-aɛ, u̍h-a mu̍ ɛ̍-ɛ sà ke, wɛ̀ nyɔ̍gbei iě ɔ̍ wlùh we̍ nu̍.”

¹⁴Dǒ-o bo ɔ̍ kòà-a pùè jɔ̌ sɔɔ̌n laa̍ u̍h-a due u̍h-a dǎɛ-a Juda Ɛkɛlia-a mu̍ dě Nyɔsoa-a slaǎ sà nyɔ̍ klaaᵻ we̍.

¹⁵Iě ɔ̍ tèle u̍h i̍, ɔ̍ la̍a̍, “Jusu la pò ǐn sà ɔ̍ kwlǎ dě mɔ̀ we̍-ɛ, nɛ̀ dɛ̍ mɔ̀-a mu̍ ǐn nyǐ ɛ?” Wɛ̀ u̍h slè sebla̍ wlǐ-a kwela ta̍a̍n u̍h nyǐ ɔ̍.

¹⁶Sɔ dǒ ti̍ laa̍ di̍i̍-ɛ, Juda-a pɔ̀n la̍ jiila̍ i̍ sǔh ɔ̍ iě Jusu kwlǎ sà.

¹⁷Peě nyɔ̍-ɔ poe-a blèe̍ fù-i dɛ̍ᵻ we̍-ɛ, dǒ ɛ̍ sàǐtòò weɛ̍ di̍i̍ wɛ̀ Jusu-a kòà mu̍ dě ɔ̍ we̍. Iě u̍h tèle ɔ̍ i̍, u̍h la̍a̍, “Sììkɛ̍n-a di̍-dɛ̍ᵻ la, tàwe̍ àn pɔ̀n à iě i̍h gba̍a̍ po̍-e dǒ ìn we̍ ɛ?”

¹⁸Wɛ̀ ɔ̍ la̍a̍, “Mɔ̀ mu̍ dě tùgbàwlɔ̀ di̍i̍. Jɔ̍gbau due nɛ-a deě-ɛ, mɔ̀ sèàɛ̍ ɔ̍ wlùh. Mɔ̀ la̍a̍, ‘À dlǔtu la̍ ɔ̍ ti̍ kɔǎn we̍ wɛ̀, ɔ̍ ke ɔ̍ kòà-a ji̍ Sììkɛ̍n-a Peě blě la̍-a nɔ̌ ìn blǐ gbò.’ ”

¹⁹Wɛ̀ ɔ̍ kòà nu̍ slɛ̌ ɔ̍ po̍-a u̍h chèɛ̀ i̍-ɛ, iě u̍h po̍ Sììkɛ̍n-a di̍-dɛ̍ᵻ gba̍a̍.

²⁰Ti̍ ɛ̍ nu̍-a flìwe̍-ɛ, wɛ̀ Jusu ke ɔ̍ kòà-a pùè jɔ̌ sɔɔ̌n tìèe̍ i̍ u̍h iě dɛ̍ di̍.

²¹Ti̍ u̍h-a di̍-a la̍ dɛ̍-ɛ, iě ɔ̍ la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, mɔ̀-a nyɔ̍ due-a mu̍ ǐn kwlǎ sà.”

²²Sɔ ɛ̍ po̍ u̍h-a wlùh seɔn kaa̍. Ɛ̍ tìh jɔ-ɛ, nɛ̀ ɔ̍ tèle Jusu i̍, “Joi, mɔ̍ bo ae?”

²³Wɛ̀ Jusu la̍a̍, “Nyɔ̍ ɔ̀ ke ǐn ke à gbà-a nɔ̌ boo̍ due di̍i̍-ɛ, ɔ̍-ɔ bo ɔ̀ mu̍ ǐn kwlǎ sà.

²⁴Nyi̍ɔ̍-a Jǔ-a mu̍ mɛ̌ dǒ ka Nyɔsoa-a wlu̍ dǎ-a we̍. Jɛ nyɔ̍ ɔ̀ sà-a ɔ̍ kwlǎ-a, chlě dǒ ɔ̍ we̍. Nyɔ̍ laa̍ pò ɔ̍ se̍ wlǔh de-ɛ, nɛ̀ ɛ̍ nmɔ jii̍ de dǒ ɔ̍ we̍.”

²⁵Wɛ̀ Juda ɔ̀ mu̍-a Jusu kwlǎ sà-a, iě ɔ̍ la̍a̍, “Dlǔtu, mɔ̍ bo ae?” Jusu la̍a̍, “Ka ìn dǎ-ɛ, nɛ̀ kǎ ɛ̍ nɛ.”

²⁶Ti̍ Jusu ke ɔ̍ kòà-a di̍-a dɛ̍-ɛ, wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ u̍h. Ɔ̍ la̍a̍, “Mɔ̀ gbɛ̍n i̍ mɔ̀ iě di̍, ɛ̀ la̍ ǎn ku̍ bo.”

²⁷Wɛ̀ ɔ̍ dǔ kàu̍n-u, iě ɔ̍ po̍ Nyɔsoa tlɔ̌. Wɛ̀ ɔ̍ nyǐ ɛ̍ u̍h, ɔ̍ la̍a̍, “Mɔ̀ kli̍hgbɛ̍ mɔ̀ nǎ ɛ̍.

²⁸Ɛ̀ la ǎn nymɔ̍ bo. Nymɔ̍ la bo ɛ̀ nu̍ ku̍o̍ Nyɔsoa po̍. Ɛ̍ wlǎ i̍ dǒ nyɔ̍ dɔu-a gblɛ̍n sɔ̀ɛ̀n-a tìh i̍ tǎli-ɛ we̍.

²⁹Ǎn sèàɛ̍ mɔ̀ wlùh, ǐn se̍ nmɔ̍ la nǎ mu̍ dɛ. Weɛ̍ ǎn mu̍-a ɛ̍ nǎ-a delee i̍ po̍-ɛ nɛ̀ ɛ̍ mu̍ dě ǐn Baa-a kmɔ̌ wlu̍ i̍ kɔn-ɛ di̍i̍ nu̍.”

³⁰Wɛ̀ u̍h ble̍ Nyɔsoa duǐh, iě u̍h sǐ sɔ̀n u̍h mu̍ dě Ɔle-Tu̍ᵻá Tlu̍h kɛ̍n.

³¹Wɛ̀ Jusu la̍a̍ dě ɔ̍ kòà we̍, “Wlù weɛ̍ la mɔ̀ kli̍hgbɛ̍ mɔ̀-a mu̍ kwlǎ gbǎ mɔ̀ iě ǐn si̍e̍. Dɛ̍nu̍ɛ, kǎ ɛ̍ nu̍ chlǐh-ɛ dě Nyɔsoa-a wlu̍ di̍i̍. Ɛ̍ la̍a̍, ‘Ǎn mu̍ blawɛ̌ᵻ we̍ i̍ gbɛ̀n nyɔ̍ dbǎ, nɛ̀ blawɛ̌ᵻ gbà la ɛ̍ mu̍ ja̍i̍ gbà.’

³²Jɛ ǐn wɔ̀-e wlǔh-ɛɛ, wɛ̀ iě mɔ̀ jǔ mu̍ dě Kaladii fɔɔ.”

³³Wɛ̀ Pitɛ la̍a̍, “Pò juh kli̍hgbɛ̍ la u̍h gbǎ kwlǎ-a chɛ̀ àn tìh-ɛ, mɔ̍ɔ, ǐn se̍ gba̍ kwlǎ gbǎ nɔ̌ kmɔ̌.”

³⁴Wɛ̀ Jusu la̍a̍, “Bɔ̌ ǐn sèàɛ̍ ìn tìh-a taǐn wlùh, wlù weɛ̍ la àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ.”

³⁵Wɛ̀ Pitɛ la̍a̍, “Pò ǎn jɛ ja ìn we̍ mɛ̌-ɛ mu̍-a chɛ̀-ɛ, jɛ ǐn se̍ àn tìh-i tòlo mu̍.” Kòà kli̍hgbɛ̍ sie-a dode̍-ɛ, kǎ u̍h dǎ ke.

³⁶Wɛ̀ Jusu ke ɔ̍ kòà mu̍ tà u̍h-a dǎɛ-a Kɛsɛmani-ɛ. Iě ɔ̍ la̍a̍ dě u̍h we̍, “Ka ǎn mu̍-a de̍à iě-a ba̍le-ɛ, mɔ̀ tè i̍ da̍a.”

³⁷Wɛ̀ ɔ̍ dǔ Pitɛ ke Sɛɛbedii-a nynuu̍ sɔɔ̌n u̍h ke ɔ̍ mu̍. Jɛ nɛ̀ wɔɛ-a nu̍ ɔ̍-ɛ, iě ɔ̍ wlùh gbǎ dě de̍i̍.

³⁸Wɛ̀ ɔ̍ la̍a̍ dě u̍h we̍, “Wɔɛ nɛ-a dě ǐn wlùh di̍i̍-ɛ, ɛ̍ wɛ̀la ɛ̍-ɛ dbǎ m̌. Mɔ̀ sie da̍a mɔ̀ iě ǐn de̍e̍ i̍ tè.”

³⁹Ɔ̍ klɛɛn-a dǒ nya̍ wɛɛ-ɛ, wɛ̀ ɔ̍ chlìi i̍ gbìi̍i dǒ bloɔ̍ iě ɔ̍ ba̍le. Ɔ̍ la̍a̍, “Ǐn Baa, pò ɛ̍ nɛ ɛ̍ ka̍-ɛ, nɛ̀ ìn sà ǐn kàu̍n la wɔ̍i̍n lě. Jɛ dɛ̍ ìn wɔ̌ɛn-a kɛ̍n i̍-ɛ, ɛ̍ bo ìè nu̍, ɛ̍ se̍ naɛ̍ ǐn se̍ dǎ.”

⁴⁰Wɛ̀ ɔ̍ ji̍ de̍ dǒ ɔ̍ kòà laa̍ we̍, iě ɔ̍ jɛɛ u̍h nyinɔ̍ i̍. Ɔ̍ la̍a̍, “Pitɛ, mɔ̀ se̍ nyinɔ̍ jlǐh i̍ ku̍-ɛ bɛ̌ɛ dǒ ti̍ gbɔ̍ wei di̍i̍ ae?

⁴¹Mɔ̀ tù ba̍le-ɛ jlǐhɛ̍, wɛ̀ mɔ̀-ɔ je̍e blu̍ja̍a̍ gbǎ. Mɔ̀-a pɔ̀n i̍ slɛ̌ dɛ̍ nu̍-ɛ i̍ de, jɛ mɔ̀ se̍ ɛ̍ we̍ gbǐh blě.”

⁴²Gbɔ̍ᵻ sɔɔ̌n naɛ ɔ̍ gba̍-a de̍-ɛ, iě ɔ̍ ba̍le, ɔ̍ la̍a̍, “Ǐn Baa, pò kàu̍n la ɛ̍ se̍ dǒ ǐn wɔ̍i̍n sà ka̍ nɛ jɛ ǐn kɔn iě ɛ̍ nǎ gbɔ̀gbɔ̀-ɛ, nɛ̀ dɛ̍ àn pɔ̀n-aɛ bo ɛ̀ iě nɛ.”

⁴³Ɔ̍ ji̍-a de̍ka-a, ɔ̍ jɛɛ ɔ̍ kòà laa̍ mɔ̌ la̍ i̍ dɛ, dɛ̍nu̍ɛ, u̍h-a jlǐh ku̍ᵻ ku kwa̍.

⁴⁴Wɛ̀ ɔ̍ sɔ dǒ u̍h we̍-e, iě ɔ̍ mu̍ de̍ dɛ dode̍. Wɛ̀ ɔ̍ ba̍le gbɔ̍ᵻ ta̍a̍n naɛ. Wlu̍ due laa̍ bo ɔ̍ bla̍ dɛ.

⁴⁵Wɛ̀ ɔ̍ mu̍ dě de̍ ɔ̍ kòà we̍ iě ɔ̍ la̍a̍ dě u̍h we̍, “Mɔ̀-a sà-e gbǔh mɔ̀-a mɔ̌ ke̍ sǔh ae? Mɔ̀ gbɛ̀n-e, ti̍ la ɛ̍ nɛ à i̍ wɛ̀. Nyi̍ɔ̍-a Jǔ sà-ɛ kwlǎ wɛ̀ dě gblɛ̍n sɔ̀ɛ̀n nyɔ̍ kwa̍a̍.

⁴⁶Mɔ̀ sɔ-ɔ à iě mu̍ la̍ sǔh. Ɔ̀ mu̍-a ǐn kwlǎ sà-a, ɔ̍ nɛ à i̍ wɛ̀.”

⁴⁷Jusu nɛ dǒ wlu la̍ sǔh, wɛ̀ Juda ji̍. Ɔ̍ kòà-a pùè jɔ̌ sɔɔ̌n laa̍ u̍h-a due bo. Nɛ̀ ɔ̍ ke nyɔ̍ tlùgbei̍ na. U̍h blě plàn chlɛ̀nᵻ ke gbòmina̍ᵻ kwa̍ i̍. Nɛ̀ Nyɔsoa-a slaǎ sà nyɔ̍ klaaᵻ ke nyɔ̍ klaaᵻ bo ùh dbo̍ u̍h.

⁴⁸Wɛ̀ ɔ̀ nu̍-a nyɔ̍ kwlǎ sà nyɔ̍-ɛ, iě ɔ̍ toe u̍h juola. Ɔ̍ la̍a̍, “Nyɔ̍ ǎn mu̍-a gblèè-ɛ, nɛ̀ ɔ̀ mɔ̀-a pɔ̀n-a i̍-ɛ bo. Nɛ̀ mɔ̀ gbɛ̍n ɔ̍ la̍ sǔh.”

⁴⁹Wɛ̀ Juda slɛ̌ i̍ ɔ̍ mu̍ Jusu wlì, wɛ̀ ɔ̍ gblèè ɔ̍, ɔ̍ la̍a̍, “Dlǔtu, ǐn jɛɛ m̀ o.”

⁵⁰Wɛ̀ Jusu la̍a̍, “Ǎn chɛ̀-a nyɔ̍, dɛ̍ ìn ji̍-a we̍-ɛ bo ìè nu̍ lě.” Iě nyɔ̍ laa̍ u̍h wlǎ dě Jusu ja̍, wɛ̀ u̍h gbɛ̍n ɔ̍.

⁵¹Wɛ̀ ùh ke Jusu na-aɛ, u̍h-a due chlì ɔ̍ plàn chlɛ̀n. Wɛ̀ ɔ̍ tba̍ slaǎ sà nyɔ̍-a dlǔtu-a kèi̍ dɛ̍, iě ɔ̍ chɛ̍n ɔ̍ doun i̍.

⁵²Wɛ̀ Jusu la̍a̍ dě ɔ̍ we̍, “Tà àn plàn chlɛ̀n la ɛ̍ sɔ-aɛ, po̍ ɛ̍ dǒ de̍. Dɛ̍nu̍ɛ, nyɔ̍ ùh-a fɔ̀n-ɛa plàn chlɛ̀nᵻɛ́, u̍h-a mu̍ plàn chlɛ̀nᵻ i̍ mɛ̌-ɛ.

⁵³Ìn jajeɛ̍ pò ǐn tèle ǐn Baa i̍ ɔ̍ iě ǐn ǐnchɔ̀-a fùùh we̍ dbo̍ i̍h iě ǐn we̍ gbǎ-ɛ, nɛ̀ ɔ̍ se̍-o nyna mu̍ ɔ̍ iě ɛ̍ nu̍ ae?

⁵⁴Jɛ pò ǐn nu̍ la̍a̍n-ɛ, nɛ̀ ka Nyɔsoa-a wlu̍-a mu̍ chɛ̀-ɛ gbǎ-a nu̍ ɛ? Dɛ̍nu̍ɛ, ɛ̍ la̍ kǎ ɛ̍ kɔn ɛ̍ iě ka nɛ-ɛ nu̍.”

⁵⁵Dǒ-o bo Jusu wlu-i dě nyɔ̍ tlùgbei̍ laa̍ we̍. Ɔ̍ la̍a̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ ji̍-a ǐn gbɛ̍n la̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ. Ka sɔ̀n-a sɛ̀n-aa, kǎ ǎn nɛ dě mɔ̀ we̍ Nyɔsoa-a slaǎ sà gbò sɔ̀n ǎn po̍ nyɔ̍ nǎ, doǒ nɔ̀ɔ̍, mɔ̀ se̍-o ǐn gbɛ̍n-ɛ.

⁵⁶Jɛ ìh kli̍hgbɛ̍ Nyɔsoa-a tu̍owli po̍ nyɔ̍ chlǐh-aɛ, i̍h iě tìh-a taǐn nu̍ dɛbo, ɛ̍ kɔn ìh la i̍h-a nɛ.” Wɛ̀ ɔ̍ kòà kli̍hgbɛ̍ ple̍ u̍h si̍e̍ ɔ̍.

⁵⁷Nyɔ̍ ùh gbɛ̍n-a Jusu-ɛ, u̍h gba̍ ɔ̍ dě Kaifa blǐ gbò, ɔ̀ nu̍-a Nyɔsoa-a slaǎ sà nyɔ̍-a dlǔtu-ɛ, nɛ̀ dě-e bo telě nǎ poe nyɔ̍ ke nyɔ̍ klaaᵻ kli̍hgbɛ̍ gbòe i̍.

⁵⁸Nɛ̀ Pitɛ wɔ̀ dǒ ɔ̍ de̍e̍ iě u̍h-a mu̍ slaǎ sà nyɔ̍-a dlǔtu laa̍ ɔ̍ gbò-a gbàɛ̍gbà wlì, jɛ nɛ̀ ɔ̍ nynaɛ nya̍. Iě ɔ̍ pa̍ dě gbàɛ̍gbà laa̍ di̍i̍ wɛ̀ ɔ̍ tè i̍ dǒ gbò jlǐhɛ̍ tù nyɔ̍ we̍, ɔ̍ iě tìh-a chɛ̀ i̍h-a siee la̍ jě.

⁵⁹Sɔ slaǎ sà nyɔ̍ klaaᵻ ke taɔ kli̍hgbɛ̍-a pɔ̀n la̍ sàànsi̍i̍h i̍ u̍h iě Jusu si̍h-i tmɔ̌-ɛ, wɛ̀ u̍h iě ɔ̍ dbǎ.

⁶⁰Jɛ u̍h se̍ nyɔ̍ chɛ̀ɛ̌chɛ̀ jě. Gbɔ̀gbɔ̀ sǔh-ɛ, nyɔ̍ duuh ji̍-i iě u̍h tmɔ̌-ɛ ɔ̍ si̍h-i. Ɛ̀ bɔ̌ɛ-a doǒ-ɛ, jɔ̍gbauᵻ sɔɔ̌n ji̍-i.

⁶¹Iě u̍h la̍a̍, “Jɔ̍gbau la ɔ̍ la̍ ɔ̍ bɛ̌ɛ ɔ̍ iě Nyɔsoa-a slaǎ sà gbò wlǎ wɛ̀ ɔ̍ iě ɛ̍ po̍ dode̍ dǒ wǐh ta̍a̍n di̍i̍.”

⁶²Wɛ̀ slaǎ sà nyɔ̍-a dlǔtu nyna i̍, iě ɔ̍ la̍a̍ dě Jusu we̍, “Dɛ̍ nyɔ̍ la u̍h-a bla̍-a dǒ ìn pùn-ɛ, ìn se̍ ɛ̍ pɔ̀n we̍ sà mu̍ ae?”

⁶³Jɛ Jusu se̍ fuɛn nu̍. Wɛ̀ slaǎ sà nyɔ̍-a dlǔtu la̍a̍ dě ɔ̍ we̍, “Ji̍ ìè kmɔ̌ nɛ Nyɔsoa slɛ̀ɛ̀n pò ìn tù Chèɛ̀ Tba̍ju ɔ̀ nu̍-a Nyɔsoa-a Jǔ-ɛ, ìè à wlùh sèàɛ̍.”

⁶⁴Wɛ̀ Jusu la̍a̍, “Ka ìn dǎ-ɛ, nɛ̀ kǎ ɛ̍ nɛ. Jɛ bɔ̌ ǐn sèàɛ̍ mɔ̀ kli̍hgbɛ̍ wlùh, dě nya̍-ɛ, mɔ̀-a mu̍ Nyi̍ɔ̍-a Jǔ jě ɔ̍ iě i̍ tè dǒ Gbǐh Kli̍hgbɛ̍ Blě Nyɔ̍-a di̍na̍ we̍, wɛ̀ ɔ̍ iě nǐgbanᵻ kɛ̍n naɛ blě dě ja̍u̍n wlì ɔ̍ iě ji̍.”

⁶⁵Wɛ̀ slaǎ sà nyɔ̍-a dlǔtu gbǎ jlu̍h-u, wɛ̀ ɔ̍ fǎle ɔ̍ chɛ̀-a jliɛ̍. Iě ɔ̍ la̍a̍, “Jǔ la ɔ̍ nyni-i Nyɔsoa-a nynɛ̌ jii̍. Na̍a̍, mɔ̀-a wɔ̌n ɔ̍ Nyɔsoa-a nynɛ̌ jii̍ nyni wlu̍ lě. Dɛ̍ kɔn sàànsi̍i̍h à pɔ̀n i̍ dɛ ɛ?

⁶⁶Nɛ̀ ka à iě ɔ̍ tìh nu̍ ɛ?” U̍h la̍a̍, “Ɔ̍ nu̍ dɛ̍ sɔ̀n, ɔ̍ kɔn ɔ̍ iě mɛ̌.”

⁶⁷Wɛ̀ u̍h-a wla̍n tɔ̍n dǒ ɔ̍ jua̍i̍ iě u̍h-a tbaɛ ɔ̍ gbunaᵻ i̍. Iě duuh-a tbaɛ ɔ̍ gbǎᵻ i̍.

⁶⁸Iě u̍h la̍a̍, “Nyɔsoa-a Chèɛ̀ Tba̍ju, ji̍ ìè gbànwli po̍. Nyɔ̍ bo ɔ̀ tba̍ ìn dɛ̍ ɛ?”

⁶⁹Ɛ̍ ti̍ laa̍ nɛ̀ kǎ Pitɛ tè i̍ ke sǔh dě gbò-a gbàɛ̍gbà di̍i̍. Wɛ̀ nynɔ̌gbaɔ jǔ ɔ̀ nu̍-a pòi̍ju-ɛ ji̍ dǒ ɔ̍ we̍ ɔ̍ la̍a̍, “Jusu la ɔ̀ sɔ-a Kaladii fɔɔ-ɛ, ɔ̍ ke àn na ke o.”

⁷⁰Jɛ Pitɛ tòlo-e dǒ nyɔ̍ kli̍hgbɛ̍ jlǐhwai. Ɔ̍ la̍a̍, “Dɛ̍ àn sà-aɛ, ǐn se̍ ɛ̍ i̍ juo.”

⁷¹Wɛ̀ ɔ̍ sɔ dě u̍h nynɛ̌ ɔ̍ mu̍ dě gbàɛ̍gbà-a wɔ̍n we̍. Dě-e bo nynɔ̌gbaɔ jǔ dɔɔ jě-e ɔ̍ iě ɔ̍ la̍a̍ dě nyɔ̍ nɛ-a doǒ-ɛ we̍, “Jɔ̍gbau la Jusu ɔ̀ sɔ-a dǒ Naaslɔɛ wlɔ̀-ɛ, ɔ̍ ke ɔ̍ na o.”

⁷²Pitɛ slɛ̀ɛ̀n iě ɔ̍ tòlo dɛ. Ɔ̍ la̍a̍, “Ǐn se̍ jɔ̍gbau la juo.”

⁷³Ɛ̍ wlè-o chɛ̀gbɛɛ, wɛ̀ nyɔ̍ ùh nyna-a doǒ i̍-ɛ mu̍ dǒ Pitɛ we̍. U̍h la̍a̍, “À po̍ i̍h chɛ̀ nyɔ̍ ùh ke Jusu na-ɛ, mɔ̀ u̍h-a nyɔ̍ due. Dɛ̍nu̍ɛ, àn wlu̍ bo ɛ̀ sà ìn gbɔ̀.”

⁷⁴Wɛ̀ Pitɛ po̍ di̍h wlu̍we̍i̍, iě ɔ̍ slɛ̀ɛ̀n dě u̍h we̍. Ɔ̍ la̍a̍, “Jɔ̍gbau la ǐn se̍ ɔ̍ dɛ̍ i̍ juo.” Dǒ tàdùè laa̍ suuh slò-e.

⁷⁵Iě wlu̍ Jusu bla̍-ɛ, wɛ̀ ɛ̍ dǔ dǒ Pitɛ wlì i̍ sǐ-ɛ. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ.” Pitɛ sǐ-a sɔ̀n-ɛ, iě ɔ̍ fìn dɛ̍blɔ dɛ.