Read Western Krahn Matio 27 Bible Online

Matio 27 - Western Krahn bible

Matio 27

¹Nyɔsoa-a slaǎ sà nyɔ̍ klaaᵻ kli̍hgbɛ̍ ke nyɔ̍ klaaᵻ duuh gbèɛ̀ɛn klàɛ̍we̍ gbàìn, iě u̍h po̍ wlu̍ gbɔ̀ u̍h iě Jusu dbǎ.

²Iě u̍h sa̍n ɔ̍, wɛ̀ u̍h sǐ i̍ ɔ̍ sɔ̀n. Wɛ̀ u̍h sà ɔ̍ kwlǎ dě Pale we̍, ɔ̀ nu̍-a Wloma nyɔ̍-a kɔ̀mla̍-a.

³Juda ɔ̀ sà-ɛa Jusu nyɔ̍ kwlǎ-ɛ, ɔ̍ juo-ao dɛ̍ i̍ ka u̍h-a mu̍-a la̍ Jusu dbǎ-ɛ, sɔ ɔ̍ wlùh fèàɛ̀ dode̍. Iě ɔ̍ gba̍ u̍h-a sebla̍ wlǐ-a kwela ta̍a̍n laa̍ de̍ dě slaǎ sà nyɔ̍ klaaᵻ ke nyɔ̍ klaaᵻ we̍.

⁴Ɔ̍ la̍a̍, “Ǐn nu̍ dɛ̍ sɔ̀n, nyɔ̍ ɔ̀-ɔ nu̍-a dɛ̍ sɔ̀n-ɛ bo ǐn sà kwlǎ u̍h iě dbǎ.” U̍h la̍a̍, “Wɛ̀ ka à nɔ̀ɔ̍ à iě nu̍ ɛ? Ɛ̍ sie dě ìn we̍.”

⁵Wɛ̀ Juda po̍ wlǐ laa̍ i̍ dě Nyɔsoa-a slaǎ sà gbò sɔ̀n. Wɛ̀ ɔ̍ mu̍ iě ɔ̍ pèle ɔ̍ chɛ̀.

⁶Wɛ̀ slaǎ sà nyɔ̍ klaaᵻ dǔ wlǐ laa̍, iě u̍h la̍a̍, “À telě bo, wlǐ i̍ nɛ nymɔ̍ i̍ wɛ̀ à-a po̍ i̍h dě slaǎ sà gbò-a pànkɛ̍ɛ̍n.”

⁷Wɛ̀ u̍h pu̍e̍e tìh, iě u̍h tɛ̀n-ɛ wlǐ laa̍ blǔh u̍h-a dǎɛ-a mɛ̌-nyɔ̍-a blǔh-ɛ, ɛ̍ iě dakɔ̍ pàɔ̀n-a wlèà nu̍.

⁸Ɛ̍ kɔn tìh u̍h-a dǎɛ blǔh-a chɛ̀ Nymɔ̍ Blǔh sèàn.

⁹Dɛ̍ ɛ̀ Nyɔsoa-a tu̍owli po̍ nyɔ̍ Jɛlemaɛa bla̍-aɛ, ɛ̍ nu̍ tìh-a taǐn. Ɔ̍ la̍a̍, “U̍h dǔ sebla̍ wlǐ-a kwela ta̍a̍n laa̍ ìh Eslɔɛ nyɔ̍ poe-a ɔ̍ pɛlǔh-ɛ.

¹⁰Wlǐ laa̍ bo u̍h tɛ̀n-ɛ blǔh dě mɛ̌-nyɔ̍ kwa̍a̍. Kǎ Joi Nyɔsoa nu̍ ǐn wlùh sèàɛ̍-ɛ.”

¹¹Dǒ ti̍ laa̍ di̍i̍ nɛ̀ Jusu nyna i̍ dǒ kɔ̀mla̍ jǔ, iě kɔ̀mla̍ tèle ɔ̍ i̍, ɔ̍ la̍a̍, “Mɔ̀ bo ɔ̀ nu̍ Juu nyɔ̍-a blǔh baa ae?” Jusu la̍a̍, “Mɔ̀ bo ɔ̀ dǎ laǎn.”

¹²Ti̍ Nyɔsoa-a slaǎ sà nyɔ̍ klaaᵻ ke nyɔ̍ klaaᵻá blaɛ-a Jusu tìh i̍-ɛ, ɔ̍ se̍ u̍h tɔ̍n-ɔ sà.

¹³Wɛ̀ Pale tèle ɔ̍ i̍, ɔ̍ la̍a̍, “Ìh dɔu la u̍h-a bla̍-a dǒ ìn pùn-ɛ, nɛ̀ wɔ̌n i̍h ae?”

¹⁴Jɛ Jusu se̍ wɔ̍n-a fuɛn nu̍ dǒ dɛ̍ᵻ kli̍hgbɛ̍-a chɛ̀ u̍h bla̍-a dǒ ɔ̍ pùn-ɛ we̍. Sɔ ɛ̍ wlǔh i̍ kɔ̀mla̍ laa̍ de̍e̍ ɛ̍ sìì-o dɛ̍ i̍.

¹⁵Nɛ̀ ɛ̍ nu̍ kɔ̀mla̍ laa̍ ɔ̍ naɛ tǐwai dɛ̍, pò ɛ̍ nu̍ Sììkɛ̍n-a Peě-ɛ, gbɛ̍n-nyɔ̍ ɔ̀ nyɔ̍gbei-a pɔ̀n-a ɔ̀ iě-a dě kasoo sɔ dǒ weɛ̍ laa̍ di̍i̍-ɛ, nɛ̀ ɔ̍ bo ɔ̍ sèìe.

¹⁶Ɛ̍ ti̍ laa̍ nɛ̀ u̍h blě jɔ̍gbau kɔn dɛ̍ᵻ sɔ̀nᵻ nu̍ tìh nyɔ̍ kli̍hgbɛ̍ juo-aɛ dě kasoo. Ɔ̍ nynɛ̌ bo Bawlaba.

¹⁷Ti̍ nyɔ̍ tlùgbei̍ gbǎ-a tàdùè dǒ Pale jǔ-ɛ, wɛ̀ ɔ̍ tèle u̍h i̍, ɔ̍ la̍a̍, “Jɔwe̍ bo mɔ̀-a pɔ̀n iě sèìe dǒ mɔ̀ we̍ ɛ? Bawlaba ɛɛ, àe̍e̍ Jusu u̍h-a dǎɛ Nyɔsoa-a Chèɛ̀ Tba̍ju-ɛ ae?”

¹⁸Ɔ̍ juo-o dɛ̍ i̍ ke kleǐn, wlɛ̀n bo ɛ̀ nu̍ ɛ̍ wɛ̀ Nyɔsoa-a slaǎ sà nyɔ̍ klaaᵻ sà Jusu kwlǎ dě ɔ̍ we̍.

¹⁹Ti̍ Pale tè-a i̍ wɛ̀ dě ɔ̍ taɔ pa̍ gbalǎ di̍i̍-ɛ, wɛ̀ ɔ̍ nynɔ̌ dbo̍ wlu̍ dě ɔ̍ we̍. Ɔ̍ la̍a̍, “Jǔ laa̍ ɔ̀-ɔ nu̍-a dɛ̍ sɔ̀n-ɛ, bɔ̌ ɔ̍ dɛ̍ nui-ɛ, dɛ̍nu̍ɛ, ja̍ ǐn ja-a wìe̍ dǒ ɔ̍ pùn-ɛ, ɛ̍ po̍ ǐn faɔn kaa̍.”

²⁰Jɛ slaǎ sà nyɔ̍ klaaᵻ ke nyɔ̍ klaaᵻ gbɛ̍n-ɛ nyɔ̍ tlùgbei̍ laa̍ wɔ̍i̍n u̍h iě Pale wlùh sèàɛ̍ ɔ̍ iě Bawlaba sèìe, wɛ̀ ɔ̍ iě Jusu dbǎ.

²¹Wɛ̀ Pale tèle u̍h i̍, ɔ̍ la̍a̍, “U̍h nɛ-a sɔɔ̌n-ɛ, jɔwe̍ mɔ̀-a pɔ̀n iě sèìe dǒ mɔ̀ we̍ ɛ?” U̍h la̍a̍, “Bawlaba bo ìè sèìe.”

²²Wɛ̀ Pale tèle u̍h i̍, ɔ̍ la̍a̍, “Jusu u̍h-a dǎɛ-a Chèɛ̀ Tba̍ju-ɛ, nɛ̀ ka iě ɔ̍ nɔ̀ɔ̍ ɔ̍ tìh nu̍ ɛ?” Iě u̍h kli̍hgbɛ̍ la̍a̍, “Kɔ̍ ɔ̍ dǒ gbàɛ̍ kɛ̍n i̍ tu̍ wlì.”

²³Wɛ̀ Pale tèle u̍h i̍, ɔ̍ la̍a̍, “Dɛ̍ ɛ? Dɛ̍ sɔ̀n we̍ ɔ̍ nu̍ ɛ?” Sɔ u̍h sà slɛ̀ wɔ̍n dɛ chɛ̀ɛ̌chɛ̀, u̍h la̍a̍, “À la̍a̍, kɔ̍ ɔ̍ dǒ gbàɛ̍ kɛ̍n i̍ tu̍ wlì.”

²⁴Pale gbɛ̀n-a ɛ̍ ja̍-ɛ, sɔ ɔ̍ wlu̍-u chɛ̍n-o dɛ̍. Jɛ nɛ̀ u̍h-a pɔ̀n ɔ̍ slɛ̀ dlǔ i̍ sàɛ̀ i̍. Wɛ̀ ɔ̍ dǔ nǐ-i dǒ nyɔ̍ kli̍hgbɛ̍ jlǐhwai, iě ɔ̍ dle kwa̍. Iě ɔ̍ la̍a̍, “Jǔ la ɔ̍ dbǎ dɛ mɔ̀-a nu̍-aɛ, ǎn sɔ̍n se̍-o nɛ o, ɔ̍ tìh tè dǒ mɔ̀ dlǔ i̍ o.”

²⁵Iě u̍h kli̍hgbɛ̍ la̍a̍, “À wɔ̌n-ɛ, ɔ̍ mɛ̌ɛ tìh tè dǒ à ke à nynuu̍ dlǔ i̍.”

²⁶Wɛ̀ Pale sèìe Bawlaba dǒ u̍h we̍. Iě ɔ̍ sà nyɔ̍ wɛ̀ u̍h bla̍ Jusu. Wɛ̀ ɔ̍ dǔ ɔ̍ kwlǎ sà-a dě fledlǔ we̍ u̍h iě ɔ̍ dǒ gbàɛ̍ kɛ̍n i̍ tu̍ wlì kɔ̍-ɛ.

²⁷Wɛ̀ Pale-a fledlǔ dǔ Jusu-u iě u̍h gba̍ ɔ̍ dě kɔ̀mla̍-a gbò sɔ̀n. Wɛ̀ u̍h gbòe fledlǔ sùɛ̀ i̍, iě u̍h dlɛ̌ ɔ̍.

²⁸Iě u̍h sà ɔ̍ jlii̍ i̍, wɛ̀ u̍h paɛ ɔ̍ dɛ̍wlo̍o̍ sàɛ̀n.

²⁹Wɛ̀ u̍h dba̍ wiǎᵻá blawɛ̌ iě u̍h tèè ɔ̍. Wɛ̀ u̍h tù klǐ-kɔu̍ dě ɔ̍ di̍na̍ kwa̍a̍, iě u̍h chlìi i̍ dǒ ɔ̍ jǔ u̍h-a nui ɔ̍ jlii̍h kɛ̍n i̍. U̍h la̍a̍, “À tba̍ àn sɔ̍n o Juu nyɔ̍-a Blǔh Baa.”

³⁰Wɛ̀ u̍h wla̍n ɔ̍ tɔ̍n, iě u̍h dǔ tu̍-u u̍h-a bla̍-ɛ ɛ̍ dǒ ɔ̍ dlǔ.

³¹U̍h wɔ̀-a ɔ̍ jlii̍h kɛ̍n i̍ nui-ɛ, wɛ̀ u̍h sà ɔ̍ dɛ̍wlo̍o̍ laa̍ i̍. Iě u̍h paɛ ɔ̍ ɔ̍ chɛ̀-a jlii̍ dode̍. Wɛ̀ u̍h sǐ-i ɔ̍ sɔ̀n. Iě u̍h dǔ ɔ̍ dǒ gbàɛ̍ kɛ̍n i̍ tu̍ wlì kɔ̍ la̍ gba̍-a.

³²U̍h-a sɔ-a dǒ wlɔ̀-ɛ, wɛ̀ u̍h jɛɛ jɔ̍gbau due ɔ̍ sɔ Saiwlein bloa̍ kɛ̍n. Ɔ̍ nynɛ̌ bo Samo. Wɛ̀ u̍h nu̍ ɔ̍ kloǒ iě ɔ̍ gba̍ gbàɛ̍ kɛ̍n i̍ tu̍ laa̍.

³³Iě u̍h nyni̍ tà u̍h-a dǎɛ Kaokota-a, ɛ̍ gbɔ̀ nu̍ dlǔgba tlu̍h.

³⁴Dě-e bo u̍h poe nmɔ̍ nɛ̍nɛ dɛ̍ᵻ we̍ Jusu iě nǎ. Jɛ ɔ̍ tɛ̀n-a ɛ̍ wɔ̍n-ɛ, iě ɔ̍ se̍ ɛ̍ nǎ.

³⁵Ti̍ u̍h wɔ̀-a ɔ̍ kɔ̍-ɛ dǒ gbàɛ̍ kɛ̍n i̍ tu̍ wlì-ɛ, wɛ̀ u̍h gblè ɔ̍ jlii̍ dǒ nibo fɔ̀n-ɛa sǔh we̍.

³⁶U̍h wɔ̀-a ìh laa̍ nu̍-ɛɛ, iě u̍h tè i̍ u̍h-a tù ɔ̍ jlǐhɛ̍ we̍.

³⁷Wɛ̀ dɛ̍ kɔn tìh u̍h dbǎ-a ɔ̍-ɛ, iě u̍h chlǐh ɛ̍ dǒ ɔ̍ dlǔwèàì. Ɛ̍ wlu̍ la̍a̍, “Ɔ̀ la Jusu bo, ɔ̀ nu̍-a Juu nyɔ̍-a Blǔh Baa-ɛ.”

³⁸U̍h kɔ̍-ɛ ɔ̍ ke jlǐ-nyɔ̍ sɔɔ̌n tàdùè. Due nɛ dǒ ɔ̍ di̍na̍ we̍, iě dɔɔ nɛ dǒ ɔ̍ kwe̍na̍ we̍.

³⁹Nyɔ̍ ùh-a sì-aɛ, u̍h-a fùna dlǔ iě u̍h-a chɛ̀ ɔ̍ we̍.

⁴⁰U̍h la̍a̍, “Mɔ̀ ɔ̀ la̍ ɔ̀ mu̍-a Nyɔsoa-a slaǎ sà gbò wlǎ wɛ̀ ìè-a ɛ̍ po̍ dǒ wǐh ta̍a̍n di̍i̍-ɛ, pò ìn tù Nyɔsoa-a Jǔ chɛ̀ɛ̌chɛ̀-ɛ, nɛ̀ ìn sèìe àn chɛ̀ la̍, ìè dǒ gbàɛ̍ kɛ̍n i̍ tu̍ wlì sɔ.”

⁴¹Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ ke nyɔ̍ klaaᵻ laa̍ kǎ u̍h nu̍ ɔ̍ jlii̍h kɛ̍n i̍ nui-ɛ ke.

⁴²U̍h la̍a̍, “Ɔ̍ pǔh-i nyɔ̍ duuh, jɛ ɔ̍ se̍ ɔ̍ chɛ̀ pǔh-iɛ bɛ̌ɛ. Ɔ̍ se̍ la̍ ɔ̍-ɔ Eslɔɛ nyɔ̍-a Blǔh Baa ae? Ɔ̍ sɔ dǒ gbàɛ̍ kɛ̍n i̍ tu̍ wlì la̍ ɔ̍ iě tlìh, nɛ̀ à mu̍ ɔ̍ tìh chɛ̀ po̍.

⁴³Ka ɔ̍ la̍ ɔ̍ nu̍-a Nyɔsoa-a Jǔ, iě ɔ̍ gbaɛ-a Nyɔsoa wlùh-ɛ, pò Nyɔsoa kma ɔ̍ tìh-ɛ, nɛ̀ ɔ̍ sèìe ɔ̍ la̍ à iě jě.”

⁴⁴Ɛ̀ kɔn taǐn nyɔ̍ laa̍ u̍h nu̍-a ɔ̍ we̍ chɛ̀-ɛ, jlǐ-nyɔ̍ sɔɔ̌n ke ɔ̍ plɛɛn-a dǒ ja̍i̍-ɛ, kǎ u̍h nu̍ ɔ̍ we̍ chɛ̀-ɛ ke.

⁴⁵Jlǔh blaɛ dǒ wìè dlǔ i̍ sǔh, wɛ̀ kwile gbǎ dǒ blǔh kli̍hgbɛ̍-a chɛ̀ kɛ̍n. Kǎ ɛ̍ nɛ te̍e̍ wɛ̀ jlǔh te̍le i̍.

⁴⁶Jlǔh te̍le-a i̍ wɛ̀-ɛ, wɛ̀ Jusu wǐ, ɔ̍ la̍a̍, “Ila, Ila, lama sabatani?” Ɛ̍ gbɔ̀ nu̍, “Ǎn Nyɔsoa, ǎn Nyɔsoa, dɛ̍nu̍ ìn sà ǐn jlǐhɛ̍ we̍ ɛ?”

⁴⁷Nyɔ̍ ùh nyna-a doǒ i̍-ɛ, ti̍ u̍h wɔ̌n-a ɔ̍ wlu̍-ɛ, iě u̍h la̍a̍, “Ɔ̍ we̍le Ilaɛja wa.”

⁴⁸Wɛ̀ u̍h-a due gba̍ ple̍-ɛ suei̍, iě ɔ̍ po̍ fuu̍ gba̍n nmɔ̍ i̍ iě ɔ̍ tù ɛ̍ tu̍ i̍, ɔ̍ te ɛ̍ Jusu i̍ ɔ̍ iě ɛ̍ nǎ.

⁴⁹Jɛ juh sie-a dǒ de̍-ɛ, u̍h la̍a̍, “Mɔ̀ à chlì-o i̍ à iě jě, pò Ilaɛja-a mu̍ ji̍ ɔ̍ iě ɔ̍ pǔh-i kɔ̌ɔ.”

⁵⁰Wɛ̀ Jusu wǐ dɛ dode̍, iě ɔ̍ dǔ feɛ chɛ̍n-ɛ.

⁵¹Wɛ̀ jliɛ̍ ɛ̀ pèle-a dě Nyɔsoa-a slaǎ sà gbò-a gblǒ wɔ̍i̍n-ɛ, iě ɛ̍ gblè fɔ̌ᵻ sɔɔ̌n. Ɛ̍ sà fǎle-ɛ dě ɛ̍ dlǔ we̍ wɛ̀ ɛ̍ nyni̍ nɔ̌ ɛ̍ gbɔ̀ we̍. Wɛ̀ wlù poɔ sèke blǔh i̍, iě sɔɔ̌ᵻ gblè fɔ̌ᵻ.

⁵²Wɛ̀ gbàlɔ̍ᵻ wa̍ i̍, wɛ̀ Nyɔsoa nyɔ̍ dɔu ùh mɛ̌-aɛ, iě u̍h wlǔh-e dode̍.

⁵³U̍h sɔ dě u̍h-a gbàlɔ̍ biěᵻ di̍i̍ i̍. Jusu wlǔh-aeɛ, wɛ̀ u̍h dǔ Juluslɛn mu̍-ɛ, ɛ̀ nu̍-a tùgbàwlɔ̀ kɔn-a dǒ Nyɔsoa we̍-ɛ. Iě nyɔ̍ dɔu jě u̍h.

⁵⁴Wloma-a fledlǔ-a chape ɔ̀ ke u̍h-a tù-a Jusu jlǐhɛ̍-ɛ, ti̍ u̍h jě-a wlù poɔ ɛ̀ ji̍-aɛ, ɛ̍ ke dɛ̍ᵻ dɔu diih ìh-a nɛ-aɛ, sɔ ɛ̍ po̍ u̍h faɔn kaa̍. Iě u̍h la̍a̍, “Ɔ̀ la Nyɔsoa-a Jǔ bo chɛ̀.”

⁵⁵Ɛ̍ ti̍ laa̍ nɛ̀ nynɔ̌gbaɔᵻ dɔu nɛ dǒ tà-a chɛ̀. U̍h ke Jusu sɔ Kaladii fɔɔ u̍h iě ɔ̍ sɔ̍n-ɔ sà. Nɛ̀ u̍h nynaɛ nya̍ iě u̍h-a jě dɛ̍ᵻ ìh-a nɛ-aɛ.

⁵⁶Nɛ̀ u̍h ke Mɛle Makalin nɛ-o, nɛ̀ Chiin ke Josɛ de̍ Mɛle nɛ-o ke, ɛ̍ ke Sɛɛbedii-a nynɔ̌ ke.

⁵⁷Ti̍ ɛ̍ nu̍-a la̍ flìwe̍-ɛ, wɛ̀ pàn-a jɔ̍gbau due ji̍. Ɔ̍ nynɛ̌ bo Josɛ, ɔ̍ sɔ dǒ Awlematia wlɔ̀ di̍i̍. Ɔ̍ chɛ̀ ɔ̍ nu̍ Jusu-a kòà ke.

⁵⁸Ɔ̍ bo ɔ̀ mu̍ dě Pale we̍, iě ɔ̍ jbǎ Jusu-a kǔ. Wɛ̀ Pale po̍ nyɔ̍ slǔh u̍h iě Jusu-a kǔ laa̍ Josɛ nyǐ.

⁵⁹Josɛ dǔ kǔ laa̍ iě ɔ̍ pìàɛ̍n ɛ̍ flɛmɛ̍ delee dlǔ i̍.

⁶⁰Josɛ-a gbàlɔ̍ biě delee ɔ̍ blě-a, iě ɔ̍ tè Jusu i̍ dě ɛ̍ di̍i̍. Gbàlɔ̍ biě-a chɛ̀ ɔ̍ blǔ ɛ̍-ɛ dǒ sɔɔ̌ wlì. Wɛ̀ ɔ̍ kli̍bo sɔɔ̌ gbo̍ klaa dɛɛ iě ɔ̍ kaɛn ɛ̍ dǒ gbàlɔ̍ biě-a chɛ̀ wɔ̍i̍n. Wɛ̀ ɔ̍ dǔ mu̍-ɛ.

⁶¹Nɛ̀ Mɛle Makalin ke Mɛle dɔɔ tè i̍ dǒ biě-a chɛ̀ jǔ.

⁶²Sɔ̀n sɛ̀n-aɛ, nɛ̀ ɛ̍ nu̍ Juu-a wlè-weɛ̍. Wɛ̀ Nyɔsoa-a slaǎ sà nyɔ̍ klaaᵻ ke Fɛlesii nyɔ̍ mu̍ dě Pale we̍.

⁶³U̍h la̍a̍, “Nyɔ̍ klaa, si̍h tmɔ̌-dɛ̍ laa̍ ti̍ ɔ̍ nɛ-a kmɔ̌-ɛ, ɔ̍ la̍ pò ɔ̍ mɛ̌-ɛ, wǐh ta̍a̍n sì-ɛ, nɛ̀ ɔ̍ mu̍-e wlǔh dode̍. I̍h bo ìh sǐ dǒ à wlì i̍, ɛ̍ kɔn à ji̍ nɔ̌ ìn we̍,

⁶⁴ìè nyɔ̍ slǔh po̍ u̍h iě ɔ̍ gbàlɔ̍ laa̍ jlǐhɛ̍ tù te̍e̍ wɛ̀ wǐh ta̍a̍n laa̍ i̍h iě wɛ̀. Wɛ̀ ɔ̍ kòà-a je̍e ɔ̍ kǔ laa̍ jlǐ. Jɛ pò u̍h jlǐ ɛ̍-ɛ, nɛ̀ u̍h-a mu̍ nyɔ̍gbei wlùh sèàɛ̍ u̍h iě ka nu̍ ɔ̍ wlǔh-e. Nɛ̀ bɔ̌ɛ-o si̍h u̍h-a mu̍-a ka tmɔ̌-ɛ, ɛ̍ mu̍ sàǐtòò naɛ sìì.”

⁶⁵Wɛ̀ Pale la̍a̍, “Mɔ̀ dǔ fledlǔ mɔ̀ iě u̍h gba̍, u̍h iě gbàlɔ̍ laa̍ jlǐhɛ̍ tù, ka mɔ̀-a pɔ̀n-a u̍h iě-a ɛ̍ jlǐhɛ̍ tù-ɛ nu̍-ɛ.”

⁶⁶Wɛ̀ u̍h tù nyɔ̍-ɔ je̍e gbàlɔ̍ biě-a chɛ̀ wɔ̍i̍n pɔ̀ni tìh-ɛ, iě u̍h sa̍n sɔɔ̌ nɛ-a dǒ ɛ̍ wɔ̍i̍n-ɛ. Wɛ̀ u̍h dǔ fledlǔ dǒ ɛ̍ wɔ̍i̍n sie-ɛ, u̍h iě ɛ̍ jlǐhɛ̍ tù.