Read Western Krahn Matio 3 Bible Online

Matio 3 - Western Krahn bible

Matio 3

¹Sɔ̀nᵻ gbɔ̍ sì-aɛ, wɛ̀ Chɔɔn ɔ̀ po̍-a nyɔ̍ nǐ dlǔ-ɛ ji̍, iě ɔ̍ bla̍ Nyɔsoa-a tìh dě kwlǎslò we̍, dě Judia fɔɔ.

²Ɔ̍ la̍a̍, “Mɔ̀ bǐi i̍, mɔ̀ iě gblɛ̍n sɔ̀ɛ̀n kɛ̍n i̍ poe. Dɛ̍nu̍ɛ, Nyɔsoa-a kmɔ̌ wlu̍ i̍ kɔn ti̍ kɔǎn we̍ wɛ̀.”

³Chɔɔn la ɔ̍ kɔn tìh bo Nyɔsoa-a tu̍owli po̍ nyɔ̍ Asaia sà-a. Ɔ̍ la̍a̍, “Nyɔ̍-a we̍le-e dě kwlǎslò we̍, ɔ̍ la̍a̍, ‘Mɔ̀ po̍ wìè gba̍a̍ dǒ Joi we̍, mɔ̀ slɛ̌-ɛ ɛ̍ i̍ dǒ ɔ̍ we̍.’ ”

⁴Jliɛ̍ ɛ̀ Chɔɔn chlɛɛ-aɛ, gbo̍ kɛ̍ɛ̍n bli-a mǐ bo u̍h nui ɛ̍, wɛ̀ ɔ̍ tù dɛ̍ku-a wlu̍h we̍. Nɛ̀ ɔ̍ di̍ gbaunᵻ ke du̍h.

⁵Wɛ̀ nyɔ̍ sɔ dǒ Juluslɛn, iě duuh sɔ dě Judia fɔɔ, wɛ̀ nyɔ̍ sɔ bloa̍ kli̍hgbɛ̍ nɛ-a Jɔɔdɛn nǐ wɔ̍i̍n-ɛ di̍i̍ i̍, u̍h mu̍ dě ɔ̍ we̍.

⁶Dě u̍h sà-ɛ u̍h-a gblɛ̍n sɔ̀ɛ̀n gbɔ̀ i̍, wɛ̀ ɔ̍ po̍ u̍h nǐ dlǔ dǒ Jɔɔdɛn nǐ kɛ̍n.

⁷Jɛ Chɔɔn jě Fɛlesii nyɔ̍ ke Sadiusii nyɔ̍ dɔu-a ji̍ dǒ ɔ̍ we̍ u̍h iě nǐ dlǔ po̍. Wɛ̀ ɔ̍ la̍a̍ dě u̍h we̍, “Mɔ̀ na̍a̍ mɔ̀ flɔn di̍i̍ i̍ kǎ mɔ̀ dǎ. Nyɔ̍ kàn gbɛ̍n-ɛ ɛ̀ Nyɔsoa-a mu̍-a dbo̍-ɛ, mɔ̀ jajeɛ̍ mɔ̀-a mu̍ ɛ̍ i̍ pǔh de ae?

⁸Mɔ̀ nu̍ dɛ̍ᵻ i̍h iě ɛ̍ to ka mɔ̀ poe-a gblɛ̍n sɔ̀ɛ̀n kɛ̍n i̍ wɛ̀-ɛ.

⁹Mɔ̀ bɔ̌ ka nu̍, ‘Àɔ̀ Eblaɛɛn-a nynuu̍, nɛ̀ Nyɔsoa se̍ à kàn gbɛ̍n mu̍,’ ɛ̍ nɔ̀ɔ̍, mɔ̀ bɔ̌ ɛ̍ dě di̍i̍ i̍ po̍-ɛ, dɛ̍nu̍ɛ, Nyɔsoa bɛ̌ɛ sɔɔ̌ᵻ la Eblaɛɛn-a nynuu̍ we̍i̍ nu̍-ɛ. Ɛ̍ kɔn ǎn sèàɛ̍ mɔ̀ wlùh,

¹⁰tòɛ̀-a chɛ̀ jě ti̍ wɛ̀ kaka ɛ̍ iě tu̍ᵻ bloɔ̍ gblǔn i̍. Ɛ̍ tìh-ɛ, tu̍ jɛ se̍-a buǒᵻ chɛ̀ po̍-ɛ, nɛ̀ ɛ̍ mu̍ dba̍-ɛ, wɛ̀ u̍h iě ɛ̍ jlǐh po̍.

¹¹Ǎn po̍ mɔ̀ nǐ dlǔ dǒ nǐ we̍ ɛ̍ iě ɛ̍ to ka mɔ̀ poe-a mɔ̀-a gblɛ̍n sɔ̀ɛ̀n kɛ̍n i̍-ɛ. Jɛ jɔ mu̍-a ǐn kɛ̍n i̍ ji̍-ɛ, ɔ̍ gbǐh bɛ̌ i̍ ɛ̍ sìì naɛ̍. Ǎn chɛ̀ ǐn se̍ i̍ blaɛ iě ɔ̍ bu̍hdih-a chɛ̀ kwa̍ blě. Ɔ̍ nɔ̀ɔ̍, ɔ̍ mu̍ mɔ̀ nǐ dlǔ po̍ dǒ Nyɔsoa-a Sùù ke nɛ̍ we̍.

¹²Ɔ̍ blě dɛ̍ i̍ bla̍ tu̍ kwa̍ wɛ̀ ɔ̍ iě dɛ̍ i̍ bla̍, nɛ̀ ɔ̍ mu̍ ɔ̍ kwǐ kɛnɛ̌-a chɛ̀ dě slǎ po̍. Jɛ ɔ̍ mu̍ i̍h-a fli̍h dě nɛ̍ ɛ̀ se̍-a mɔ̌ la̍ kɔn-ɛ di̍i̍ po̍.”

¹³Dǒ ti̍ laa̍ di̍i̍ Jusu sɔ Kaladii bloa̍ kɛ̍n ɔ̍ ji̍ dǒ Chɔɔn we̍ Jɔɔdɛn nǐ wɔ̍i̍n Chɔɔn iě ɔ̍ nǐ dlǔ po̍.

¹⁴Sɔ Chɔɔn-a pɔ̀n ɔ̍ iě ɔ̍ bɔ̌ i̍ po̍, iě Chɔɔn la̍a̍, “Mɔ̀ jɔ iě-a ǐn nǐ dlǔ po̍-ɛ, wɛ̀ àn ji̍ nɔ̌ ǐn we̍ iě ìn nǐ dlǔ po̍ ae?”

¹⁵Jɛ Jusu la̍a̍, “Kaka la̍ kǎ ɛ̍ iě nɛ. Dɛ̍nu̍ɛ, pò à nu̍ la̍a̍n-ɛ, nɛ̀ dɛ̍ᵻ kli̍hgbɛ̍ Nyɔsoa-a pɔ̀n-a bo à nu̍-a.” Wɛ̀ Chɔɔn dǔ wɔ̌n-ɛ.

¹⁶Ti̍ Chɔɔn wɔ̀-a Jusu nǐ dlǔ po̍-ɛɛ, Jusu naɛ àn jǎ dǒ tlu̍h kɛ̍n ka-a, sɔ ja̍u̍n pɔ̀ni wɔ̍i̍n dǒ ɔ̍ we̍ sǔh, iě ɔ̍ jě Nyɔsoa-a Sùù-a ji̍ wlù dǒ ɔ̍ we̍ ka gbɔ̀lǐh-a ji̍ gbǎ la̍-ɛ.

¹⁷Dǒ wlu̍ sɔ-ɛ dě ja̍i̍wlɔ̀. Ɛ̍ la̍a̍, “Ɔ̀ la ǎn tìh kma Jǔ bo, ǎn wlùh tè i̍ dǒ ɔ̍ we̍.”