Read Western Krahn Matio 7 Bible Online

Matio 7 - Western Krahn bible

Matio 7

¹Jusu la̍a̍, “Mɔ̀ bɔ̌ nyɔ̍ duuh tìh pùn tù-ɛ, nɛ̀ Nyɔsoa se̍ mɔ̀ tìh pùn tù mu̍ ke.

²Dɛ̍nu̍ɛ, ka mɔ̀ nu̍-a nyɔ̍ duuh tìh pùn tù-ɛɛ, kǎ Nyɔsoa-a mu̍ mɔ̀ tìh pùn tù-ɛ nu̍ ke. Dbee dɛ̍ mɔ̀ nyǐ-a nyɔ̍ duuh-ɛ, dbee dɛ̍ laa̍ bo Nyɔsoa-a mu̍ mɔ̀ nyǐ ke.

³Tu̍ fɔ̌ jɛ nɛ-a dě ìn jlǐh-ɛ, dɛ̍nu̍ nɛ̀ gbɛ̀n ɛ̍ ja̍ wɛ̀ àn gbɛ̀n ìn ba̍ naɛ sɛɛɛ̍n ja̍ dě ɔ̍ jlǐh ɛ?

⁴Dɛ̍nu̍ nàɛ̀ tu̍ fɔ̌ nɛ-a dě ìn jlǐh-ɛ, wɛ̀ ìn poe ɛ̍ kɛ̍n i̍ wɛ̀ nàa̍ ìè ìn ba̍ naɛ sɛɛɛ̍n dě ɔ̍ jlǐh sà ke̍ ɛ?

⁵Mɔ̀ la ɔ̀ nɛ-a mɛɔ sɔɔ̌n wɔ̍ɔ̍n-ɛ, sà nàɛ̀ tu̍ fɔ̌ nɛ-a dě ìn jlǐh-ɛ ke̍ sàǐtòò. Nɛ̀ àn mu̍ i̍ jě nmɔ jii̍, wɛ̀ ìè ɔ̍ naɛ sɛɛɛ̍n dě ɔ̍ jlǐh sà-a dǔ.

⁶“Dɛ̍ ɛ̀ kɔn-a dǒ Nyɔsoa we̍-ɛ, mɔ̀ bɔ̌ ɛ̍ gbèᵻ nyǐ-ɛ. Mɔ̀-a jɛ nyǐ ɛ̍ i̍h-ɛ, i̍h-a mu̍ kwa̍ i̍ bǐi sǔh i̍h iě mɔ̀ nmu̍. Nɛ̀ mɔ̀ bɔ̌ mɔ̀-a pɛ̀ɛ̀ dɛ̍ᵻ ìh gbǎ-a dɛ̍kɛ̍n-ɛ dǒ be̍e̍ᵻ jǔ i̍ po̍-ɛ, i̍h se̍ i̍h-a dɛ̍ i̍ juo. Ɛ̍ tìh-ɛ, i̍h-a mu̍ i̍h kɛ̍n i̍ na sǔh.”

⁷Ɔ̍ la̍a̍, “Mɔ̀ jbǎ dɛ̍, nɛ̀ ɛ̍ mu̍ mɔ̀ kwa̍a̍ gbǎ. Mɔ̀ pɔ̀n dɛ̍ i̍, nɛ̀ mɔ̀-a mu̍ ɛ̍ jě. Mɔ̀ bla̍ gbaba, nɛ̀ ɛ̍ mu̍ pɔ̀ni dǒ mɔ̀ we̍.

⁸Dɛ̍nu̍ɛ, nyɔ̍ jɔ jbǎ-a dɛ̍-ɛ, nɛ̀ ɛ̍ gbǎ ɔ̍ kwa̍a̍. Nɛ̀ nyɔ̍ ɔ̀ pɔ̀n-a dɛ̍ i̍-ɛ, nɛ̀ ɔ̍ jě ɛ̍. Nɛ̀ nyɔ̍ ɔ̀ bla̍-a gbaba-ɛ, nɛ̀ ɛ̍ mu̍ pɔ̀ni dǒ ɔ̍ we̍.

⁹Nyɔ̍we̍ bo ɔ̀ kɔn jǔ jɔ̍gbau jbǎ-ɛ ɔ̍ blèe̍, wɛ̀ ɔ̍ nyǐ ɔ̍ sɔɔ̌ gbo̍ ɛ?

¹⁰Àe̍e̍ pò ɔ̍ jbǎ-ɛ ɔ̍ smìɛ̍-ɛ, nɛ̀ ɔ̍ mu̍ ɔ̍ sɛ̍ nyǐ ae?

¹¹Mɔ̀ɔ̍ juh kɔn gblɛ̍n nyni-a jii̍-ɛ, pò mɔ̀ juo mɔ̀-a nynuu̍ dɛ̍ᵻ chɛ̀ nyǐ-ɛɛ, jɛ nɛ̀ mɔ̀ Baa Nyɔsoa nɛ-a dě ja̍i̍wlɔ̀-ɛ, ɔ̍ bo ɔ̀ se̍ nyɔ̍ jbǎ-ɛa ɔ̍ dɛ̍ᵻ chɛ̀-ɛ nyǐ mu̍ ae?

¹²“Dɛ̍ mɔ̀ jbɛɛ-a nyɔ̍ iě-a mɔ̀ pùn nu̍-ɛ, ɛ̍ bo mɔ̀ iě nyɔ̍ pùn nu̍ ke. Ɛ̍ bo ɛ̀ nu̍ Nyɔsoa-a telě, wɛ̀ ɔ̍ tu̍owli po̍ nyɔ̍ poe ɛ̍ nǎ dɛ ke.”

¹³Jusu la̍a̍, “Gbàɛ̍gbà wɔ̍n ɛ̀ nɛ-a sɔɔ̌sɔ-ɛ, ɛ̍ bo mɔ̀ iě dě di̍i̍ jii. Dɛ̍nu̍ɛ, gbàɛ̍gbà wɔ̍n jɛ bɛ̌-a we̍ i̍-ɛ, ɛ̍ wìè se̍ gba̍-a kma. Ɛ̍ tìh-ɛ, nyɔ̍ dɔu-a gba̍ wìè-a chɛ̀. Jɛ ɛ̍ gba̍ nyɔ̍ dě kàn nɛ̍ di̍i̍.

¹⁴Jɛ gbàɛ̍gbà wɔ̍n jɛ nɛ-a sɔɔ̌sɔ-ɛ, ɛ̍ wìè-a gba̍ nyɔ̍ dě kmɔ̌ chɛ̀ɛ̌chɛ̀ di̍i̍. Jɛ ɛ̍ kma gba̍-a. Ɛ̍ tìh-ɛ, nyɔ̍ wei bo ùh-a gba̍ ɛ̍.”

¹⁵Ɔ̍ la̍a̍, “Mɔ̀ nu̍ nɛnɛ̌ dǒ Nyɔsoa-a tu̍owli po̍ nyɔ̍-a si̍h naɛ we̍. Pò u̍h ja dǒ nyɔ̍ we̍ ji̍ sàǐtòò-ɛ, nɛ̀ u̍h gbɛ̍n tìh i̍ ka blawɛ̌-ɛ. Jɛ nɛ̀ u̍h wɔ̀ gbɛ̍n-nmi̍i̍ dě u̍h di̍i̍ ka.

¹⁶U̍h-a nu̍-dɛ̍ᵻ bo mɔ̀-a mu̍ u̍h i̍ juo-e. Mɔ̀ se̍ wiǎ tu̍ jě mu̍ ɛ̍ iě tòmai-a buǒᵻ po̍. Nɛ̀ mɔ̀ se̍ mukwa̍ pei jě mu̍ i̍h iě gbòu̍gbò-a buǒᵻ po̍ ke.

¹⁷Tu̍ chɛ̀-a po̍ buǒᵻ chɛ̀. Nɛ̀ tu̍ sɔ̀n-a po̍ buǒᵻ sɔ̀ɛ̀n.

¹⁸Tu̍ chɛ̀-ɛ po̍ tu̍ sɔ̀n-a buǒᵻ. Tu̍ sɔ̀n wɔ̍-ɔ po̍ tu̍ chɛ̀-a buǒᵻ ke.

¹⁹Ɛ̍ tìh-ɛ, tu̍ jɛ se̍-a buǒᵻ chɛ̀ po̍-ɛ, nɛ̀ ɛ̍ mu̍ dba̍-ɛ, wɛ̀ u̍h iě ɛ̍ jlǐh po̍.

²⁰Nɛ̀ɛ̍, u̍h-a nu̍-dɛ̍ᵻ bo mɔ̀-a mu̍ u̍h i̍ juo-e.”

²¹Jusu la̍a̍, “Ɛ̍ se̍ nyɔ̍ kli̍hgbɛ̍ ùh-a nu̍-a, ‘Joi, Joi-ɛ,’ ùh se̍ dě Nyɔsoa-a kmɔ̌ wlu̍ i̍ kɔn la nyni̍ mu̍. Jɛ nyɔ̍ ɔ̀ mu̍-a ǐn Baa nɛ-a dě ja̍i̍wlɔ̀-ɛ, ɔ̍ wlùh nu̍-ɛ, ɔ̍ bo ɔ̀ mu̍ deě nyni̍.

²²Ti̍ sàwi̍h sì ti̍-a mu̍-a nyni̍ dǒ Nyɔsoa jǔ-ɛ, nɛ̀ nyɔ̍ dɔu-a mu̍ ǐn dǎ, ‘Joi, Joi, ɛ̍ se̍ àɔ̀ mɔ̀ à se̍ Nyɔsoa-a tu̍owli po̍ dǒ àn nynɛ̌ kɛ̍n, wɛ̀ à se̍ nyɔ̍ jeědih de̍e̍ i̍ sà ae? Ɛ̍ se̍ àɔ̀ due laa̍ à se̍ jbaɛdih po̍ dǒ àn nynɛ̌ kɛ̍n dɛ ke ae?’

²³Nɛ̀ ǎn mu̍ ka dǎ dě u̍h we̍, ‘Mɔ̀ɔ̍ gblɛ̍n sɔ̀ɛ̀n nu̍ nyɔ̍. Ǐn se̍ mɔ̀-a dɛ̍ i̍ juo, mɔ̀ sì ǐn jii̍.’ ”

²⁴Ɔ̍ la̍a̍, “Ɛ̍ tìh-ɛ, ìh la ǎn bla̍-aɛ, nyɔ̍ ɔ̀ wɔ̌n-a ǎn wlu̍ i̍-ɛ, nɛ̀ ɔ̍ wɔ̀ di̍i̍ i̍ flɔn nyɔ̍ ɔ̀ po̍-a ɔ̍ gbò dǒ sɔɔ̌ kɛ̍n-ɛ.

²⁵Iě nǐ dba̍, wɛ̀ tègbè tè. Wɛ̀ poɔ dɔu ji̍ dǒ gbò laa̍ kɛ̍n, jɛ ɛ̍ se̍ blu̍. Dɛ̍nu̍ɛ, ɔ̍ poe ɛ̍ dǒ sɔɔ̌ kɛ̍n dɛbo.

²⁶“Jɛ ìh la ǎn bla̍-aɛ, nyɔ̍ ɔ̀ se̍-a ǎn wlu̍ i̍ wɔ̌n-ɛ, nɛ̀ ɔ̍ wɔ̀ bo-nyɔ̍ ɔ̀ po̍-a ɔ̍ gbò dǒ penɔ̍ɔ̍ kɛ̍n-ɛ.

²⁷Wɛ̀ nǐ dba̍, iě tègbè tè. Wɛ̀ poɔ dɔu ji̍ dǒ gbò laa̍ kɛ̍n, iě ɛ̍ blu̍. Wɛ̀ ɛ̍ waɛ i̍ flɛ̀ɛ̌nflɛ̀ɛ̌n.”

²⁸Ti̍ Jusu wɔ̀-a ìh la bla̍-aɛ, sɔ ɔ̍ nǎ po̍-ɛ wlǔh i̍ nyɔ̍ tlùgbei̍ laa̍ de̍e̍.

²⁹Dɛ̍nu̍ɛ, ɔ̍ se̍ u̍h-a telě nǎ poe nyɔ̍ wɔ̀. Jɛ ɔ̍ nǎ poe-ɛ blě tùn.