Read Western Krahn Maɛ 1 Bible Online

Maɛ 1 - Western Krahn bible

Maɛ 1

¹Ɛ̀ la bo ɛ̀ nu̍ pɔ̀n chɛ̀-a gbɔ̀ tè la̍ dǒ Nyɔsoa-a Jǔ Jusu Klai we̍.

²Asaia ɔ̀ nu̍-a Nyɔsoa-a tu̍owli po̍ nyɔ̍-ɛ, kǎ ɔ̍ nu̍ ka ɛ̍ chlǐh-ɛ. “Nyɔsoa la̍a̍, ‘Ǎn mu̍ ǎn tu̍owli po̍ nyɔ̍ nya̍ dbo̍ dě ìn jǔ, ɔ̍ iě àn wìè gba̍a̍ po̍.’

³Nyɔ̍-a we̍le-e dě kwlǎslò we̍, ɔ̍ la̍a̍, ‘Mɔ̀ po̍ wìè gba̍a̍ dǒ Joi we̍, mɔ̀ slɛ̌-ɛ ɛ̍ i̍ dǒ ɔ̍ we̍.’ ”

⁴Wɛ̀ Chɔɔn ɔ̀ po̍-a nyɔ̍ nǐ dlǔ-ɛ ji̍, ɔ̍ wlǔh-i dě kwlǎslò we̍. Dě ɔ̍ poe nyɔ̍ nǐ dlǔ, iě ɔ̍ bla̍ tìh. Ɔ̍ la̍a̍, “Mɔ̀ bǐi i̍, mɔ̀ iě gblɛ̍n sɔ̀ɛ̀n i̍ tǎli, mɔ̀ iě nǐ dlǔ po̍. Nɛ̀ Nyɔsoa-a mu̍ mɔ̀-a gblɛ̍n sɔ̀ɛ̀n-a tìh i̍ tǎli.”

⁵Nyɔ̍ kli̍hgbɛ̍ nɛ-a dě Judia fɔɔ-ɛ ke, juh nɛ-a dǒ Juluslɛn wlɔ̀ di̍i̍-ɛ, u̍h mu̍ dě ɔ̍ we̍ u̍h iě ɔ̍ wlu̍ wɔ̌n. Wɛ̀ u̍h sà u̍h-a gblɛ̍n sɔ̀ɛ̀n gbɔ̀ i̍, iě ɔ̍ po̍ u̍h nǐ dlǔ dǒ Jɔɔdɛn nǐ kɛ̍n.

⁶Jliɛ̍ ɛ̀ Chɔɔn pa̍-aɛ, gbo̍ kɛ̍ɛ̍n bli-a mǐ bo u̍h nui ɛ̍. Nɛ̀ ɔ̍ tù dɛ̍ku wlu̍h we̍, wɛ̀ gbaunᵻ ke du̍h nu̍ ɔ̍ di̍-dɛ̍.

⁷Ɔ̍ bla̍ dɛ̍ dě u̍h we̍, ɔ̍ la̍a̍, “Jɔ mu̍-a ǐn kɛ̍n i̍ ji̍-ɛ, ɔ̍ gbǐh bɛ̌ i̍ ɛ̍ sìì naɛ̍. Ǎn chɛ̀ ǐn se̍ i̍ blaɛ iě ɔ̍ bu̍hdih-a chɛ̀ kwa̍ blě.

⁸Ǐn po̍ mɔ̀ nǐ dlǔ dǒ nǐ we̍, jɛ ɔ̍ nɔ̀ɔ̍, Nyɔsoa-a Sùù bo ɛ̀ mu̍ nǐ nu̍ ɔ̍ iě mɔ̀ dlǔ po̍.”

⁹Dǒ ti̍ laa̍ di̍i̍ bo Jusu sɔ-ɛ dǒ Naaslɔɛ wlɔ̀ di̍i̍ dě Kaladii fɔɔ, wɛ̀ ɔ̍ ji̍. Iě Chɔɔn po̍ ɔ̍ nǐ dlǔ dǒ Jɔɔdɛn nǐ kɛ̍n.

¹⁰Ɔ̍ naɛ àn sɔ dǒ niɔ̍ ka-ɛ, ɔ̍ jě ja̍u̍n ɛ̍ pɔ̀ni wɔ̍i̍n, wɛ̀ Sùù-a ji̍ wlù dǒ ɔ̍ we̍ ka gbɔ̀lǐh-ɛ.

¹¹Dǒ wlu̍ sɔ-ɛ dě ja̍i̍wlɔ̀, ɛ̍ la̍a̍, “Mɔ̀ ǎn tìh kma Jǔ, ǎn wlùh tè i̍ dǒ ìn we̍.”

¹²Dǒ tàdùè laa̍ Sùù nu̍ ɛ̍ iě ɔ̍ mu̍ dě kwlǎslò we̍.

¹³Dě ɔ̍ nɛ dǒ wǐh-a kwela nyìɛ̍ di̍i̍, dě kwlǎ nmi̍i̍ nynɛ̌. Wɛ̀ Setɔn-a pɔ̀n ɔ̍ iě blu̍ja̍a̍ gbǎ. Jɛ Nyɔsoa-a ǐnchɔ̀ ji̍-i, iě i̍h gbǎ ɔ̍ we̍.

¹⁴Ti̍ u̍h po̍-a Chɔɔn kasoo-ɛ, dǒ ti̍ laa̍ di̍i̍ bo Jusu mu̍-i Kaladii fɔɔ, iě ɔ̍ bla̍ Nyɔsoa-a pɔ̀n chɛ̀-a tìh we̍i̍.

¹⁵Ɔ̍ la̍a̍, “Nyɔsoa-a kmɔ̌ wlu̍ i̍ kɔn-ɛ ti̍ kɔǎn we̍ wɛ̀. Mɔ̀ bǐi i̍, mɔ̀ iě pɔ̀n chɛ̀ la tìh chɛ̀ po̍.”

¹⁶Ti̍ Jusu-a naɛ-a pɛ̍nu̍ klaa nɛ-a dě Kaladii-ɛ wɔ̍i̍n-ɛ, dǒ ɔ̍ jě-e smìi̍ dbǎ nyɔ̍ sɔɔ̌n, Samo ke ɔ̍ de̍di̍i̍ Andlu. Nɛ̀ u̍h-a fìle sɔ̍ dǒ niɔ̍.

¹⁷Jusu la̍a̍, “Mɔ̀ gbǎ dǒ ǐn de̍e̍, ǎn mu̍ ɛ̍ nu̍ ka mɔ̀-a nu̍-a smìi̍ wlɔ̀ ja-ɛ, mɔ̀ iě laǎn nyɔ̍ Nyɔsoa we̍ ja-a nu̍ ke.”

¹⁸Dǒ tàdùè laa̍ u̍h si̍e̍ u̍h-a sɔ̍ᵻ, iě u̍h gbǎ dǒ ɔ̍ de̍e̍.

¹⁹Ɔ̍ klɛɛn-a dǒ nya̍ wɛɛ-ɛ, iě ɔ̍ jě de̍di̍i̍ᵻ sɔɔ̌n duuh, Chiin ke Chɔɔn. Sɛɛbedii-a nynuu̍ bo. Nɛ̀ u̍h nɛ dě blǎgbè di̍i̍ u̍h-a po̍ u̍h-a sɔ̍ᵻ gba̍a̍.

²⁰Dǒ ɔ̍ nyna ɔ̍ dǎ u̍h, wɛ̀ u̍h si̍e̍ u̍h baa Sɛɛbedii ke ɔ̍ dbo̍ we̍ nui nyɔ̍ dě blǎgbè di̍i̍, iě u̍h gbǎ dǒ Jusu de̍e̍.

²¹Wɛ̀ u̍h mu̍ dǒ Kepanium wlɔ̀ di̍i̍. Ɛ̍ nu̍-a wlè-weɛ̍-ɛ, iě Jusu mu̍ dě Juu nyɔ̍-a wɛɛ sà gbò sɔ̀n, wɛ̀ ɔ̍ tè nyɔ̍ nǎ po̍-ɛ gbɔ̀.

²²Sɔ ɔ̍ nǎ po̍-ɛ wlǔh i̍ nyɔ̍ nɛ-a doǒ-ɛ de̍e̍. Dɛ̍nu̍ɛ, ɔ̍ se̍ u̍h-a telě nǎ poe nyɔ̍ wɔ̀. Jɛ ɔ̍ nǎ poe-ɛ blě tùn.

²³Kli-a ka-a, nɛ̀ jɔ̍gbau ɔ̀ blě-a jeědih dǒ ɔ̍ de̍e̍-ɛ, nɛ̀ ɔ̍ wlǔh tà wɛ̀ dě u̍h we̍ wɛɛ sà gbò sɔ̀n. Iě ɔ̍ wǐ,

²⁴ɔ̍ la̍a̍, “Naaslɔɛ-a Jusu, ka àn pɔ̀n ìè à tìh nu̍ ɛ? Ìn ji̍-i ìè àɔ̀ gbɔ̀lɔ ae? Ǐn juo m̀, mɔ̀ bo ɔ̀ nu̍ Nɛi̍ Wɛ̀ Nyɔ̍ ɔ̀ sɔ dě Nyɔsoa we̍.”

²⁵Wɛ̀ Jusu po̍ jeědih laa̍ bɔ̌ i̍, ɔ̍ la̍a̍, “Nɛ klìi̍, nɛ̀ ìn sɔ dǒ jɔ̍gbau la de̍e̍.”

²⁶Wɛ̀ ɛ̍ sǐ jɔ̍gbau, iě ɛ̍ plǎn, wɛ̀ ɛ̍ sɔ dǒ ɔ̍ de̍e̍.

²⁷Sɔ ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h-a tèle-e we̍ i̍. U̍h la̍a̍, “Ne̍o, ɔ̍ naɛ nyɔ̍ nǎ po̍-ɛ nɛ dǒ dɔɔ̌, iě ɛ̍ nɛ gbǐh de̍e̍. Pò ɔ̍ wlu dě jeědih we̍-a chɛ̀-ɛ, nɛ̀ i̍h-a nu̍ ɔ̍ wlu̍ ke wa.”

²⁸Sɔ ɛ̍ nu̍ ɛ̍ Jusu-a pɔ̀n sɛ̍ i̍ suei̍ dě Kaladii fɔɔ kli̍hgbɛ̍.

²⁹U̍h sɔ-a dě wɛɛ sà gbò sɔ̀n-ɛ, wɛ̀ Jusu ke Chiin ke Chɔɔn gbɛ̍n Samo ke Andlu blǐ gbò wìè kɛ̍n i̍.

³⁰Nɛ̀ gbèwè gbɛ̍n Samo-a bila̍ nynɔ̌ ɔ̍ pɛ̌n i̍ dǒ klìɔ̀ kɛ̍n. Jusu naɛ àn pa̍ gbò ka-a, nɛ̀ u̍h-a sèàɛ̍ ɔ̍ wlùh ɔ̍ tìh.

³¹Wɛ̀ Jusu mu̍ dǒ ɔ̍ we̍, iě ɔ̍ gbɛ̍n ɔ̍ sɔ̍n i̍, wɛ̀ ɔ̍ dǔ ɔ̍ ja̍i̍. Iě ɔ̍ gbèwè bɔ̌. Wɛ̀ nynɔ̌-a chɛ̀ nu̍ u̍h-a dɛ̍i̍.

³²Ɛ̍ nu̍ wìe̍we̍, nɛ̀ dě nyɔ̍ kɔnɔᵻ mlǎᵻá gbe la̍ i̍, wɛ̀ nyɔ̍gbei ja poa-nyɔ̍ kli̍hgbɛ̍ ke jeědih-a de̍e̍ nɛ nyɔ̍ dǒ Jusu we̍.

³³Iě wlɔ̀ kli̍hgbɛ̍ wɛ̀ de̍ dǒ gbò-a chɛ̀ wɔ̍i̍n.

³⁴Iě Jusu pǔh-i wɛ̌ kaɛn kaɛn-a nu̍ nyɔ̍. Wɛ̀ ɔ̍ sà nyɔ̍ jeědih dɔu de̍e̍ i̍. Jɛ ɔ̍-ɔ wɔ̌n jeědih-i wlu, dɛ̍nu̍ɛ, i̍h juo ɔ̍-ɛ.

³⁵Ɛ̍ nu̍ sɔ̀n wɔ̍i̍n iě Jusu sɔ bloɔ̍, wɛ̀ ɔ̍ sǐ sɔ̀n. Iě ɔ̍ sɔ dǒ wlɔ̀, wɛ̀ ɔ̍ chɛn-ɛ ɔ̍ chɛ̀ gbɔ̍i̍, dě ɔ̍ ba̍le-e Nyɔsoa.

³⁶Wɛ̀ Samo ke ɔ̍ ba̍ᵻ mu̍ ɔ̍ i̍ pɔ̀n la̍.

³⁷Ti̍ u̍h jě-a ɔ̍-ɛ, wɛ̀ u̍h la̍a̍, “Nyɔ̍ kli̍hgbɛ̍-a pɔ̀n ìn i̍ wa.”

³⁸Wɛ̀ ɔ̍ sà u̍h-a wlu̍ pɔ̀n we̍. Ɔ̍ la̍a̍, “Mɔ̀ à mu̍ dě wlɔ̀ᵻ diih di̍i̍ iě tìh bla̍ ke dě u̍h we̍. Ɛ̍ kɔn tìh bo ǐn ji̍.”

³⁹Wɛ̀ ɔ̍ na Kaladii bloa̍ kli̍hgbɛ̍ we̍, ɔ̍ bla̍ Nyɔsoa tìh dě u̍h-a wɛɛ sà gbòᵻ sɔ̀n i̍. Wɛ̀ ɔ̍ sà nyɔ̍ɔ jeědih de̍e̍ i̍ ke.

⁴⁰Jɔ̍gbau ɔ̀ wìèìdih-a nu̍-aɛ, ɔ̍ ji̍ dǒ Jusu we̍. Iě ɔ̍ chlìi i̍ dǒ ɔ̍ jǔ, ɔ̍ la̍a̍, “Nyɔ̍ klaa, pò ìn wɔ̌ɛn ɛ̍-ɛ, nɛ̀ ìn bɛ̌ɛ ɛ̍ nu̍-ɛ iě fɛ̍nɛ wa.”

⁴¹Sɔ ɛ̍ po̍ Jusu wɔɛ kaa̍, wɛ̀ ɔ̍ slɛ̌ɛ sɔ̍n i̍ iě ɔ̍ tǔh ɔ̍ i̍. Ɔ̍ la̍a̍, “Ǐn wɔ̌ɛn ɛ̍-ɛ, fɛ̍nɛ dode̍.”

⁴²Dǒ tàdùè laa̍ ɔ̍ wìèìdih bɔ̌-ɛ.

⁴³Wɛ̀ Jusu la̍a̍, “Sɔ-ɔ ìè mu̍.” Wɛ̀ ɔ̍ gbɛ̍n-ɛ jɔ̍gbau laa̍ wɔ̍i̍n, ɔ̍ la̍a̍,

⁴⁴“Bɔ̌ nyɔ̍-o-nyɔ̍ wlùh sèàɛ̍, jɛ mu̍ ìè àn chɛ̀ Nyɔsoa-a slaǎ sà nyɔ̍ i̍ to. Nɛ̀ ìn sà slaǎ ɛ̀ Mose-a telě la̍ nyɔ̍ iě-a nu̍-ɛ, ɛ̍ iě ɛ̍ to dě nyɔ̍ kli̍hgbɛ̍ we̍ ka ìn fɛ̍nɛ-aɛ.”

⁴⁵Jɛ ɔ̍ mu̍-aɛ, iě ɔ̍ sèàɛ̍ nyɔ̍ kli̍hgbɛ̍ wlùh, iě pɔ̀n laa̍ ɛ̍ sɛ̍ i̍. Sɔ ɛ̍ nu̍ ɛ̍ Jusu-u nyɛ-ɛ ɔ̍ chɛ̀ i̍ dɛ wlɔ̀ᵻ di̍i̍ i̍. Jɛ nɛ̀ tà nɛ̌-a i̍-ɛ bo ɔ̍ nɛ la̍ sǔh. Nɛ̀ kǎ nyɔ̍gbei-a sɔ di̍i̍h i̍ u̍h-a mu̍ dě ɔ̍ we̍.