Read Western Krahn Maɛ 14 Bible Online

Maɛ 14 - Western Krahn bible

Maɛ 14

¹Ɛ̍ si̍e̍-o wǐh sɔɔ̌n wɛ̀ ɛ̍ iě blèe̍ ɛ̀ se̍-a fù-i dɛ̍ᵻ we̍ poe-ɛ ke Sììkɛ̍n-a Peě nu̍. Nɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍-a pɔ̀n jiila̍ i̍ u̍h iě Jusu gbɛ̍n soɛɛ, u̍h iě ɔ̍ dbǎ.

²Wɛ̀ u̍h la̍a̍, “Nɛ̀ mɔ̀ à bɔ̌ ɛ̍ nu̍-ɛ da̍a peě kɛ̍n, wɛ̀ nyɔ̍gbei je̍e à slɛ̀ dlǔ i̍ sà-ɛ.”

³Samo ɔ̀ wìèìdih-a nu̍-a de-ɛ, dě ɔ̍ blǐ gbò bo Jusu sǐi-o dɛ̍ di̍ la̍ dǒ Bɛtani wlɔ̀ di̍i̍ wɛ̀ nynɔ̌ due ji̍. Nɛ̀ ɔ̍ blě-e chlǎn dě sɔɔ̌ u̍h-a dǎɛ-a alebasla-a ɛ̍ sòlɛ̀ di̍i̍. Tu̍ ɛ̀ u̍h nui-a dɛ̍kɛ̍n gbǎ chlǎn wlihwlǐh-a chɛ̀-ɛ, ɛ̍ nynɛ̌ bo naa. Wɛ̀ ɔ̍ chɛ̍n ɛ̍ sòlɛ̀ wɔ̍i̍n, iě ɔ̍ chɛ̌li ɛ̍ dǒ Jusu dlǔ.

⁴Sɔ nyɔ̍ ùh nɛ-a doǒ-ɛ, ɛ̍ se̍ u̍h-a duuh gbǐh po̍, iě u̍h-a pu̍e̍e ɛ̍ wɔ̍ɔ̍n i̍. U̍h la̍a̍, “Dɛ̍nu̍ nynɔ̌ la ɔ̍ gbɔ̀lɔ chlǎn la-a ɛ?

⁵Pò nyɔ̍ ple̍ ɛ̍-ɛ, ɛ̍ bɛ̌ɛ sebla̍ wlǐ-a kmɛ ta̍a̍n (300) kɛ̍n sì-ɛ, wɛ̀ i̍h iě nyɔ̍gbà nyɔ̍ nyǐ-ɛ de wa.” Sɔ u̍h-a wlaɛ ɔ̍ la̍-ɛ sǔh.

⁶Iě Jusu la̍a̍, “Dɛ̍nu̍ mɔ̀-a gba̍ nynɔ̌ la ɔ̍ dounᵻ de̍i̍ ɛ? Dɛ̍ ɔ̍ nu̍-a dǒ ǐn we̍-ɛ, ɛ̍ nmɔ jii̍. Ɛ̍ tìh-ɛ, mɔ̀ sà dǒ ɔ̍ we̍ wlu̍.

⁷Nyɔ̍gbà nyɔ̍ nɔ̀ɔ̍, u̍h ke mɔ̀-a mu̍ da̍a nɛ ma̍u̍. Ti̍-o-ti̍ mɔ̀-a pɔ̀n-a u̍h dɛ̍ chɛ̀ pùn nu̍-ɛ i̍-ɛ, mɔ̀-a mu̍ ɛ̍ nu̍. Jɛ mɔ̍ɔ-ɛ, mɔ̀ ke ǐn ke à se̍ da̍a nɛ mu̍ ma̍u̍.

⁸Chlǎn nynɔ̌ la ɔ̍ po̍-a ǐn dlǔ-ɛ, pò u̍h ja ǐn i̍ tè la̍ gba̍-ɛ, ɔ̍ naɛ ɔ̍ bɛ̌ɛ-a nu̍-ɛɛ, ɛ̍ bo ɔ̍ nu̍-a duedɛ.

⁹Tìh-a taǐn ǎn sèàɛ̍ mɔ̀ wlùh, tà nyɔ̍gbei-a mu̍-a Nyɔsoa-a pɔ̀n chɛ̀ la bla̍-ɛ nɔ̌ kmɔ̌ kli̍hgbɛ̍ la we̍-ɛ, nɛ̀ dɛ̍ nynɔ̌ la ɔ̍ nu̍-aɛ, u̍h-a mu̍ ɛ̍-ɛ sà ke, wɛ̀ nyɔ̍gbei iě ɔ̍ wlùh we̍ nu̍.”

¹⁰Wɛ̀ Juda Ɛkɛlia ɔ̀ nu̍-a kòà-a pùè jɔ̌ sɔɔ̌n laa̍ u̍h-a due-ɛ, ɔ̍ mu̍ dě Nyɔsoa-a slaǎ sà nyɔ̍ klaaᵻ we̍, ɔ̍ iě u̍h Jusu kwlǎ sà-ɛ.

¹¹U̍h wɔ̌n-a ɔ̍ wlu̍-ɛ, sɔ ɛ̍ pɛ̌n-ɛ u̍h-a pɔluh i̍. Wɛ̀ u̍h po̍ wlu̍ tɔ̀ma̍a̍ u̍h iě ɔ̍ wlǐ nyǐ. Sɔ Juda-a pɔ̀n la̍ jiila̍ i̍ sǔh ɔ̍ iě Jusu kwlǎ sà.

¹²Peě u̍h-u poe-a blèe̍ fù-i dɛ̍ᵻ we̍-ɛ, dǒ ɛ̍ sàǐtòò weɛ̍ di̍i̍, dǒ-o bo u̍h-a sà-ɛ Sììkɛ̍n-a blawɛ̌ plɔ̀ slaǎ. Iě Jusu-a kòà tèle ɔ̍ i̍. U̍h la̍a̍, “Tàwe̍ àn pɔ̀n à iě mu̍ wɛ̀ à iě Sììkɛ̍n la ɛ̍ di̍-dɛ̍ᵻ gba̍a̍ po̍ dǒ ìn we̍ ɛ?”

¹³Dǒ ɔ̍ dbo̍-e ɔ̍ kòà sɔɔ̌n, ɔ̍ la̍a̍ dě u̍h we̍, “Mɔ̀ mu̍ dě tùgbàwlɔ̀ di̍i̍, jɔ̍gbau ɔ̀ ke mɔ̀-a mu̍-a ja̍ wlǎɛ-ɛ, ɔ̍ tè tee̍ dlǔ. Nɛ̀ mɔ̀ wɔ̀ dǒ ɔ̍ de̍e̍.

¹⁴Gbò kɔn di̍i̍ ɔ̍ mu̍-a pa̍-ɛ, nɛ̀ mɔ̀ sèàɛ̍ gbò joi wlùh, mɔ̀ la̍a̍, ‘À Dlǔtu la̍ toe àɔ̀ dihwi̍h gbòju, tà ɔ̍ ke ɔ̍ kòà-a mu̍-a Sììkɛ̍n Peě-a di̍-dɛ̍ᵻ di̍-iɛ.’

¹⁵Nɛ̀ ɔ̍ mu̍ mɔ̀ ja̍i̍ gbòju klaa ɛ̀ dɛ̍ᵻ kli̍hgbɛ̍ nɛ-a dě di̍i̍-ɛ toe. Dě mɔ̀ iě dɛ̍ᵻ kli̍hgbɛ̍ gba̍a̍ po̍-e dǒ àɔ̀ we̍.”

¹⁶Wɛ̀ kòà laa̍ u̍h sɔ-ɔ, iě u̍h mu̍ dě tùgbàwlɔ̀ laa̍ di̍i̍. Wɛ̀ u̍h jě dɛ̍ᵻ kli̍hgbɛ̍ ìh kɔn taǐn Jusu sèàɛ̍-a u̍h wlùh-ɛ. Wɛ̀ u̍h po̍ Sììkɛ̍n Peě-a di̍-dɛ̍ᵻ gba̍a̍.

¹⁷Ti̍ ɛ̍ nu̍-a wìe̍we̍-ɛ, wɛ̀ Jusu ke ɔ̍ kòà-a pùè jɔ̌ sɔɔ̌n ji̍.

¹⁸U̍h nɛ-a dǒ dɛ̍ di̍ la̍ dǒ teble̍ gbɔ̀-ɛ, wɛ̀ Jusu la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, mɔ̀ɔ̍ ùh ke ǐn ke à di̍-ia dɛ̍ tàdùè-ɛ, mɔ̀-a nyɔ̍ due-a mu̍ ǐn kwlǎ sà.”

¹⁹Sɔ ɛ̍ po̍ ɔ̍ kòà-a wlùh seɔn, iě u̍h-a nu̍ jɔ gbǎ-o ɔ̍ tèle ɔ̍ i̍. Jɔ nu̍ ka-a, “Ɛ̍ se̍ mɔ̍ ae?”

²⁰Wɛ̀ Jusu la̍a̍ dě u̍h we̍, “Mɔ̀ɔ̍ nu̍-a pùè jɔ̌ sɔɔ̌n-ɛ, mɔ̀-a due bo. Ɔ̀ ke ǐn ke à di̍-ia blewe̍ɛ̍ due di̍i̍-ɛ bo.

²¹Nyi̍ɔ̍-a Jǔ-a mu̍ mɛ̌ dǒ ka Nyɔsoa-a wlu̍ dǎ-a we̍. Jɛ nyɔ̍ ɔ̀ sà-a ɔ̍ kwlǎ-ɛ, chlě dǒ ɔ̍ we̍. Nyɔ̍ laa̍ pò ɔ̍ se̍ wlǔh de-ɛ, nɛ̀ ɛ̍ nmɔ jii̍ dǒ ɔ̍ we̍.”

²²Ti̍ Jusu ke ɔ̍ kòà-a di̍-a dɛ̍-ɛ, wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ ɔ̍ kòà. Ɔ̍ la̍a̍, “Mɔ̀ gbɛ̍n i̍, ɛ̀ la ǎn ku̍ bo.”

²³Wɛ̀ ɔ̍ dǔ kàu̍n-u, iě ɔ̍ po̍ Nyɔsoa tlɔ̌. Wɛ̀ ɔ̍ nyǐ ɛ̍ u̍h, iě u̍h kli̍hgbɛ̍ nǎ-ɛ ɛ̍ di̍i̍.

²⁴Jusu la̍a̍ dě u̍h we̍, “Ɛ̀ la ǎn nymɔ̍ bo. Nymɔ̍ la bo ɛ̀ nu̍ ku̍o̍ Nyɔsoa po̍. Ɛ̍ wlǎ i̍ dǒ nyɔ̍ dɔu we̍.

²⁵Tìh-a taǐn ǎn sèàɛ̍ mɔ̀ wlùh, ǐn se̍ nmɔ̍ la nǎ mu̍ dɛ. Weɛ̍ ǎn mu̍-a ɛ̍ nǎ-a delee i̍ po̍-ɛ, nɛ̀ ɛ̍ mu̍ dě Nyɔsoa-a kmɔ̌ wlu̍ i̍ kɔn-ɛ di̍i̍ nu̍.”

²⁶Wɛ̀ u̍h ble̍ Nyɔsoa duǐh, iě u̍h sǐ sɔ̀n u̍h mu̍ dě Ɔle-Tu̍ᵻá Tlu̍h kɛ̍n.

²⁷Jusu la̍a̍ dě ɔ̍ kòà we̍, “Mɔ̀ kli̍hgbɛ̍ mɔ̀-a mu̍ ple̍ mɔ̀ iě ǐn si̍e̍. Dɛ̍nu̍ɛ, kǎ ɛ̍ nu̍ ka chlǐh-ɛ, ‘Ǎn mu̍ blawɛ̌ᵻ we̍ i̍ gbɛ̀n nyɔ̍ dbǎ, nɛ̀ blawɛ̌ᵻá mu̍ ja̍i̍ gbà.’

²⁸Jɛ ǐn wɔ̀-e wlǔh-ɛɛ, wɛ̀ iě mɔ̀ jǔ mu̍ dě Kaladii fɔɔ.”

²⁹Wɛ̀ Pitɛ la̍a̍ dě ɔ̍ we̍, “Juh sie-a dǒ de̍-ɛ, pò u̍h-a jɛ ja ple̍-ɛ, mɔ̍ɔ-ɛ, ǐn se̍ ple̍ mu̍.”

³⁰Iě Jusu la̍a̍ dě ɔ̍ we̍, “Bɔ̌ ǐn sèàɛ̍ ìn tìh-a taǐn wlùh, wlù weɛ̍ la àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛa sɔɔ̌n nu̍.”

³¹Jɛ Pitɛ nyɛ̌ɛn ɛ̍ wlu̍ i̍, iě ɔ̍ la̍a̍, “Pò ǎn jɛ ja ìn we̍ mɛ̌-ɛ mu̍-ɛ, jɛ ǐn se̍ àn tìh-i tòlo mu̍.” Kòà kli̍hgbɛ̍ sie-a dode̍-ɛ, kǎ u̍h dǎ ke.

³²Wɛ̀ u̍h mu̍ dě tà u̍h-a dǎɛ-a Kɛsɛmani-ɛ. Iě Jusu la̍a̍ dě ɔ̍ kòà we̍, “Ka ǎn mu̍-a ba̍le la̍-ɛ, mɔ̀ tè i̍ da̍a.”

³³Ɔ̍ wɔ̌an mu̍-u tìh-ɛ, ɔ̍ dǔ Pitɛ ke, Chiin ke Chɔɔn ɔ̍ gba̍ u̍h. Nɛ̀ dɛ̍-a wa̍ ɔ̍ we̍, wɛ̀ dě ɔ̍ di̍i̍-a si̍n.

³⁴Iě ɔ̍ la̍a̍ dě u̍h we̍, “Wɔɛ nɛ-a dě ǐn wlùh di̍i̍-ɛ, ɛ̍ wɛ̀la ɛ̍-ɛ dbǎ m̌. Mɔ̀ sie da̍a mɔ̀ iě ǐn de̍e̍ i̍ tè.”

³⁵Ɔ̍ klɛɛn-a dǒ nya̍-ɛ, wɛ̀ ɔ̍ chlìi i̍ dǒ bloɔ̍. Iě ɔ̍ ba̍le, ɔ̍ la̍ pò ɛ̍ nɛ ɛ̍ ka̍-ɛ, nɛ̀ tìh jě ti̍ la ɛ̍ sì ɔ̍ jii̍.

³⁶Ɔ̍ la̍a̍, “Baa, ǐn Baa, ka ìn bɛ̌ɛ-a dɛ̍ᵻ kli̍hgbɛ̍ nu̍-ɛɛ, sà ǐn kàu̍n la wɔ̍i̍n lě. Gbɔ̀gbɔ̀-ɛ, bɔ̌ naɛ̍ wlùh nu̍-ɛ, nu̍ àn chɛ̀-a wlùh.”

³⁷Ɔ̍ iě-a de̍ mu̍-ɛ, nɛ̀ kòà ta̍a̍n laa̍ u̍h-a mɔ̌-ɛ. Iě ɔ̍ la̍a̍ dě Pitɛ we̍, “Samo, àn mɔ̌-ɛ ae? Ìn se̍ nyinɔ̍ jlǐh i̍ sà-a bɛ̌ɛ dǒ ti̍ gbɔ̍ di̍i̍ ae?”

³⁸Iě ɔ̍ la̍a̍ dě u̍h we̍, “Mɔ̀ tù ba̍le-ɛ jlǐhɛ̍, wɛ̀ mɔ̀-ɔ je̍e blu̍ja̍a̍ gbǎ. Mɔ̀-a pɔ̀n i̍ slɛ̌ dɛ̍ nu̍-ɛ i̍ de, jɛ mɔ̀ se̍ ɛ̍ we̍ gbǐh blě.”

³⁹Iě ɔ̍ mu̍ ba̍le la̍ dode̍, wlu̍ due laa̍ bo ɔ̍ bla̍.

⁴⁰Ɔ̍ ji̍-a de̍ka-ɛ, ɔ̍ jɛɛ ɔ̍ kòà laa̍ mɔ̌ la̍ i̍ dɛ, dɛ̍nu̍ɛ, u̍h-a jlǐh ku̍ᵻ ku kwa̍ kaa̍. Sɔ dɛ̍ u̍h iě-a bla̍ dě ɔ̍ we̍-ɛ, u̍h se̍ ɛ̍ juo.

⁴¹Gbɔ̍ᵻ ta̍a̍n naɛ ɔ̍ ja-a de̍-ɛ, iě ɔ̍ la̍a̍ dě u̍h we̍, “Mɔ̀-a sà-e gbǔh mɔ̀-a mɔ̌ ke̍ sǔh ae? Mɔ̀ gbɛ̀n-e, ti̍ la ɛ̍ nɛ à i̍ wɛ̀. Nyi̍ɔ̍-a Jǔ sà-ɛ kwlǎ wɛ̀ dě gblɛ̍n sɔ̀ɛ̀n nyɔ̍ kwa̍a̍.

⁴²Mɔ̀ sɔ-ɔ à iě mu̍ la̍ sǔh. Ɔ̀ mu̍-a ǐn kwlǎ sà-ɛ, ɔ̍ nɛ à i̍ wɛ̀.”

⁴³Jusu nɛ dǒ wlu la̍ sǔh, wɛ̀ Juda ji̍. Ɔ̍ kòà-a pùè jɔ̌ sɔɔ̌n laa̍ u̍h-a due bo. Nɛ̀ ɔ̍ ke nyɔ̍ tlùgbei̍ na. U̍h blě plàn chlɛ̀nᵻ ke gbòmina̍ᵻ kwa̍ i̍. Nɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ ke nyɔ̍ klaaᵻ bo ùh dbo̍ u̍h.

⁴⁴Wɛ̀ ɔ̀ nu̍-a nyɔ̍ kwlǎ sà nyɔ̍-ɛ, iě ɔ̍ toe u̍h juola. Ɔ̍ la̍a̍, “Nyɔ̍ ǎn mu̍-a gblèè-ɛ, nɛ̀ ɔ̀ mɔ̀-a pɔ̀n-a i̍-ɛ bo. Nɛ̀ mɔ̀ gbɛ̍n ɔ̍ la̍ sǔh. Jɛ mɔ̀ tù ɔ̍ jlǐhɛ̍ o.”

⁴⁵Juda sǐ-a dǒ u̍h we̍ i̍-ɛ, ɔ̍ slɛ̌ i̍ ɔ̍ mu̍ Jusu wlì. Ɔ̍ la̍a̍, “Dlǔtu,” sɔ ɔ̍ gblèè ɔ̍-ɛ sǔh.

⁴⁶Wɛ̀ u̍h wlǎ Jusu kɛ̍n, iě u̍h gbɛ̍n ɔ̍.

⁴⁷Iě nyɔ̍ ùh nyna-a doǒ i̍-ɛ, u̍h-a due chlì ɔ̍ plàn chlɛ̀n, wɛ̀ ɔ̍ tba̍ slaǎ sà nyɔ̍-a dlǔtu-a kèi̍ dɛ̍, iě ɔ̍ chɛ̍n ɔ̍ doun i̍.

⁴⁸Wɛ̀ Jusu la̍a̍ dě u̍h we̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ ji̍-a ǐn gbɛ̍n la̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ.

⁴⁹Ka sɔ̀n-a sɛ̀n-aɛ, mɔ̀ ke ǐn ke à nɛ dě Nyɔsoa-a slaǎ sà gbò sɔ̀n ǎn po̍ nyɔ̍ nǎ, dǒ-o nɔ̀ɔ̍, mɔ̀ se̍-o ǐn gbɛ̍n-ɛ. Jɛ Nyɔsoa-a wlu̍ kɔn ɛ̍ iě tìh-a taǐn nu̍.”

⁵⁰Wɛ̀ ɔ̍ kòà kli̍hgbɛ̍ ple̍, u̍h si̍e̍ ɔ̍.

⁵¹Nɛ̀ jǔgbèlà due ke Jusu na, jɛ nɛ̀ flɛmɛ̍ jliɛ̍ nɛ due bo ɔ̍ gbà. Wɛ̀ u̍h gbɛ̍n ɔ̍,

⁵²jɛ ɔ̍ jliɛ̍ bo ɛ̀ sie dě u̍h kwa̍a̍. Iě ɔ̍ chɛn gbaǎn ɔ̍ ple̍.

⁵³Wɛ̀ u̍h gba̍ Jusu dě Nyɔsoa-a slaǎ sà nyɔ̍-a dlǔtu we̍. Nɛ̀ dě-e bo slaǎ sà nyɔ̍ klaaᵻ ke, nyɔ̍ klaaᵻ ke, telě nǎ poe nyɔ̍ kli̍hgbɛ̍ gbòe.

⁵⁴Nɛ̀ Pitɛ wɔ̀ dǒ ɔ̍ de̍e̍, jɛ nɛ̀ ɔ̍ nynaɛ nya̍. Iě ɔ̍ pa̍ dě slaǎ sà nyɔ̍-a dlǔtu-a gbò-a gbaɛ̍we̍. Wɛ̀ ɔ̍ tè i̍ dǒ gbò jlǐhɛ̍ tù nyɔ̍ we̍, ɔ̍ wěla.

⁵⁵Sɔ slaǎ sà nyɔ̍ klaaᵻ ke taɔ kli̍hgbɛ̍-a pɔ̀n la̍ sàànsi̍i̍h i̍ u̍h iě Jusu tìh i̍ blaɛ-ɛ, wɛ̀ u̍h iě ɔ̍ dbǎ. Jɛ u̍h se̍ nyɔ̍ wɛ-a chɛ̀ jě.

⁵⁶Sàànsi̍i̍h dɔu tmɔ̌-ɛ ɔ̍ si̍h i̍, jɛ u̍h-a wlu̍ se̍ due nɛ.

⁵⁷Wɛ̀ nyɔ̍ duuh nyna i̍, iě u̍h tmɔ̌-ɛ ɔ̍ si̍h i̍, u̍h la̍a̍,

⁵⁸“À wɔ̌n ɔ̍ wlu̍ ɔ̍ la̍a̍, ‘Ǎn mu̍ Nyɔsoa-a slaǎ sà gbò la u̍h poe-a sɔ̍n-ɛ wlǎ. Nɛ̀ pò wǐh ta̍a̍n sì-ɛ, nɛ̀ ǎn mu̍ dɛɛ po̍, ɛ̀ sɔ̍n-a wɔ̀ɔ̀ se̍-a i̍ nɛ mu̍-ɛ.’ ”

⁵⁹U̍h-a chɛ̀, u̍h-a wlu̍ se̍ due nɛ ke.

⁶⁰Wɛ̀ slaǎ sà nyɔ̍-a dlǔtu nyna i̍ dǒ nyɔ̍ kli̍hgbɛ̍ jlǐhwai, iě ɔ̍ tèle Jusu i̍. Ɔ̍ la̍a̍, “Dɛ̍ nyɔ̍ la u̍h-a bla̍-a dǒ ìn pùn-ɛ, ìn se̍ ɛ̍ pɔ̀n we̍ sà mu̍ ae?”

⁶¹Jɛ Jusu se̍ u̍h tɔ̍n-ɔ sà, ɔ̍ nɛ tìi̍n kleǐn. Wɛ̀ slaǎ sà nyɔ̍-a dlǔtu tèle ɔ̍ i̍ dɛ. Ɔ̍ la̍a̍, “Mɔ̀ bo ɔ̀ nu̍ Chèɛ̀ Tba̍ju, ɔ̀ nu̍-a Pɔ̀ìě Nyɔsoa-a Jǔ-ɛ ae?”

⁶²Jusu la̍a̍, “I̍i̍n, mɔ̍ bo, nɛ̀ mɔ̀-a mu̍ Nyi̍ɔ̍-a Jǔ jě ɔ̍ iě i̍ tè dǒ Gbǐh Kli̍hgbɛ̍ Blě Nyɔ̍-a di̍na̍ we̍, wɛ̀ ɔ̍ iě nǐgbanᵻ kɛ̍n naɛ blě dě ja̍u̍n wlì ɔ̍ iě ji̍.”

⁶³Wɛ̀ slaǎ sà nyɔ̍-a dlǔtu gbǎ jlu̍h-u, wɛ̀ ɔ̍ fǎle ɔ̍ chɛ̀-a jliɛ̍. Iě ɔ̍ la̍a̍, “Dɛ̍ kɔn sàànsi̍i̍h à pɔ̀n i̍ dɛ ɛ?

⁶⁴Na̍a̍, mɔ̀-a wɔ̌n ɔ̍ Nyɔsoa-a nynɛ̌ jii̍ nyni wlu̍ lě. Ka mɔ̀ dǎ ɛ?” U̍h kli̍hgbɛ̍ la̍ ɔ̍ se̍ kɛ̀n gba̍, ɔ̍ kɔn ɔ̍ iě dbǎ-ɛ.

⁶⁵Sɔ u̍h-a duuh-a gbà la̍ ɔ̍ tɔ̍n sǔh, wɛ̀ u̍h kaɛn ɔ̍ dɛ̍ jlǐh. Pò u̍h tba̍ ɔ̍ dɛ̍-ɛ, nɛ̀ u̍h la̍a̍, “Po̍ gbànwli, nyɔ̍ bo ɔ̀ tba̍ ìn dɛ̍ ɛ?” Wɛ̀ taɔ-a jlǐhɛ̍ tù nyɔ̍ dǔ ɔ̍ iě u̍h bla̍ ɔ̍.

⁶⁶Nɛ̀ kǎ Pitɛ nɛ dǒ bloɔ̍ ke dǒ gbò-a gbaɛ̍we̍. Wɛ̀ nynɔ̌gbaɔ jǔ ɔ̀ nu̍-a pòi̍ju dǒ slaǎ sà nyɔ̍-a dlǔtu we̍-ɛ, iě ɔ̍ ji̍.

⁶⁷Dǒ ɔ̍ jě-e Pitɛ, nɛ̀ ɔ̍ wěla-ɛ. Iě ɔ̍ la̍a̍, “Mɔ̀ la, Jusu ɔ̀ sɔ-a Naaslɔɛ wlɔ̀ di̍i̍-ɛ, ɔ̍ ke àn na ke o.”

⁶⁸Jɛ Pitɛ tòlo-e, ɔ̍ la̍a̍, “Dɛ̍ àn sà-aɛ, ǐn se̍ ɛ̍ juo, nɛ̌ wɔ̌n ɛ̍-ɛ i̍.” Iě ɔ̍ mu̍ dě pa̍la̍ wɔ̍n we̍, dǒ suuh slò-e.

⁶⁹Nynɔ̌gbaɔ jǔ ɔ̀ nu̍-a pòi̍ju-ɛ, ɔ̍ jě Pitɛ. Wɛ̀ ɔ̍ sèàɛ̍ nyɔ̍ ùh nyna-a doǒ i̍-ɛ wlùh dɛ. Ɔ̍ la̍a̍, “Jɔ̍gbau la u̍h-a due bo o.”

⁷⁰Jɛ ɔ̍ tòlo-e dɛ. Ɛ̍ wlè-o wɛɛ, iě nyɔ̍ ùh nyna-a ɔ̍ pùn-ɛ, u̍h la̍a̍, “Mɔ̀ u̍h-a nyɔ̍ due chɛ̀ka, dɛ̍nu̍ɛ, mɔ̀ Kaladii jǔ ke.”

⁷¹Wɛ̀ Pitɛ po̍ di̍h wlu̍we̍i̍, iě ɔ̍ slɛ̀ɛ̀n dě u̍h we̍. Ɔ̍ la̍a̍, “Jɔ̍gbau mɔ̀-a dǎ-aɛ, ǐn se̍ ɔ̍ dɛ̍ i̍ juo.”

⁷²Dǒ suuh nyna ɛ̍ slò gbɔ̍ᵻ sɔɔ̌n naɛ. Wɛ̀ dɛ̍ ɛ̀ Jusu bla̍-a dě ɔ̍ we̍-ɛ, iě ɛ̍ sǐ dǒ ɔ̍ wlì i̍. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛa sɔɔ̌n nu̍.” Wàa̍, sɔ Pitɛ wǐ-i fìn-i wlu̍ sǔh.