Read Western Krahn Maɛ 16 Bible Online

Maɛ 16 - Western Krahn bible

Maɛ 16

¹Juu-a wlè-weɛ̍ sì-aɛ, wɛ̀ Mɛle Makalin ke, Chiin de̍ Mɛle ke Salomi tɛ̀n nɔ̌ chlǎn kaɛn kaɛn u̍h iě i̍h Jusu-a kǔ i̍ tli̍ la̍ gba̍.

²Wɛ̀ u̍h tlùìn u̍h mu̍ dě ɔ̍ gbàlɔ̍ we̍ Sɔnde̍ bla, nɛ̀ jlǔh-a ji̍ kwlǎ wlǔh la̍.

³U̍h-a mu̍-a la̍-ɛ, iě u̍h la̍a̍, “Nyɔ̍ bo ɔ̀ mu̍ sɔɔ̌ gbo̍ nɛ-a dǒ gbàlɔ̍ biě wɔ̍i̍n-ɛ kli̍bo ɔ̀ iě àɔ̀ nyǐ ɛ?”

⁴Jɛ u̍h iě-ae gbɛ̀n-ɛ, nɛ̀ sɔɔ̌ gbo̍ klaa laa̍ ɛ̍ kli̍bo-ɛ, ɛ̍ sɔ dǒ biě-a chɛ̀ wɔ̍i̍n wɛ̀.

⁵Wɛ̀ u̍h pa̍ deě, dě u̍h jě-e jǔgbèlà due nɛ̀ ɔ̍ tè i̍ dǒ ɛ̍ di̍na̍ fɔ̌ we̍. Ɔ̍ pa̍ plɛ̀i̍ plǔ-u. Sɔ ɛ̍ tlɛ̍-ɛ u̍h-a ku̍.

⁶Wɛ̀ ɔ̍ la̍a̍ dě u̍h we̍, “Mɔ̀-a ku̍ bɔ̌ tlɛ̍-ɛ, ǐn juo ɛ̍-ɛ Jusu ɔ̀ sɔ-a dǒ Naaslɔɛ ɔ̀ u̍h kɔ̍-a dǒ gbàɛ̍ kɛ̍n i̍ tu̍ wlì-ɛ, ɔ̍-ɔ bo mɔ̀-a pɔ̀n i̍. Jɛ ɔ̍ wlǔh-e wɛ̀, ɔ̍ se̍ da̍a nɛ dɛ. Mɔ̀ ji̍ tà u̍h pɛ̌n-ɛa ɔ̍ i̍ de-ɛ jě.

⁷Ɛ̍ tìh-ɛ, mɔ̀ mu̍, mɔ̀ iě ɔ̍ kòà Pitɛ tè-ae di̍i̍-ɛ wlùh sèàɛ̍, ɔ̍ mu̍ la̍ u̍h jǔ dě Kaladii fɔɔ. Dě u̍h-a mu̍ ɔ̍ jě-e, kǎ ɔ̍ dǎ se̍e̍ dě u̍h we̍.”

⁸Wɛ̀ u̍h sǐ sɔ̀n, u̍h sà ple̍-ɛ dǒ gbàlɔ̍ biě wɔ̍i̍n. Nɛ̀ dɛ̍-a wa̍ u̍h we̍, iě u̍h-a ku̍-a tlɛ̍. Nɛ̀ u̍h-u sèàɛ̍ wɔ̍i̍n dě nyɔ̍-o-nyɔ̍ we̍, dɛ̍nu̍ɛ, faɔn-a nu̍ u̍h-i. [

⁹Ti̍ Jusu wlǔh-ae Sɔnde̍-a klàɛ̍we̍ gbàìn-ɛ, Mɛle Makalin ɔ̍ sà-a jeědih mɛ̀sɔɔ̌n de̍e̍-ɛ, ɔ̍-ɔ bo ɔ̀ nu̍ sàǐtòò nyɔ̍ ɔ̍ wlǔh-i i̍.

¹⁰Ùh ke ɔ̍ na-aɛ, u̍h nɛ dǒ sùàɛ̀n pa̍ la̍ u̍h-a fìn, wɛ̀ Mɛle mu̍ iě ɔ̍ sèàɛ̍ u̍h wlùh.

¹¹Nyɔ̍ laa̍ u̍h wɔ̌n i̍h ka ɔ̍ nɛ-a kmɔ̌ wɛ̀ Mɛle jě-a ɔ̍-ɛ, jɛ u̍h se̍ ɛ̍ tìh chɛ̀ po̍.

¹²Ɛ̀ la ɛ̍ wɔ̀-a nɛ-ɛ, wɛ̀ Jusu wlǔh-i ɔ̍ kòà sɔɔ̌n kɛ̍n dě tu̍ dɛɛ di̍i̍, nɛ̀ u̍h-a mu̍ dě u̍h blǐ fɔɔ.

¹³Wɛ̀ u̍h mu̍ de̍ iě u̍h sèàɛ̍ u̍h ba̍ᵻ sie-a dǒ de̍-ɛ wlùh. Jɛ u̍h se̍ u̍h-a wlu̍ tìh chɛ̀ po̍.

¹⁴Jɛ bɔ̌ɛ-a doǒ-ɛ, u̍h nu̍-a pùè jɔɛ̍ due-ɛ sǐi dǒ dɛ̍ di̍ la̍ sǔh wɛ̀ Jusu wlǔh-i u̍h kɛ̍n. Wɛ̀ ɔ̍ nui u̍h tɛ̀n dǒ u̍h-a nɛ̀ po̍ dɛ̍ tìh chɛ̀ ke dlǔ ku̍ dɛ we̍. Dɛ̍nu̍ɛ, ti̍ ɔ̍ wlǔh-aeɛ, nyɔ̍ ùh jě-a ɔ̍-ɛ bo u̍h se̍ tìh chɛ̀ po̍.

¹⁵Wɛ̀ ɔ̍ la̍a̍ dě u̍h we̍, “Mɔ̀ mu̍, mɔ̀ ple̍ kmɔ̌ la we̍, mɔ̀ iě pɔ̀n chɛ̀ la ɛ̍ tìh we̍i̍ bla̍ dě nyɔ̍ kli̍hgbɛ̍ we̍.

¹⁶Nyɔ̍ ɔ̀ po̍-a ɛ̍ tìh chɛ̀ wɛ̀ ɔ̍ iě nǐ dlǔ po̍-ɛ, nɛ̀ ɔ̍ mu̍ pǔh. Jɛ nyɔ̍ ɔ̀ se̍-a ɛ̍ tìh chɛ̀ po̍-ɛ, nɛ̀ kɛ̀n-a mu̍ ɔ̍ kwa̍a̍ sɔ.

¹⁷Jbaɛdih la bo wlùh gbaɛ blě nyɔ̍-a mu̍ po̍. U̍h-a mu̍ jeědih i̍ nu̍ dǒ ǎn nynɛ̌ kɛ̍n, u̍h-a mu̍ wlu̍ diih po̍,

¹⁸u̍h-a mu̍ sɛ̍ᵻ i̍ gbɛ̍n, nɛ̀ pò u̍h nǎ kanɛa nǐ ɛ̀ dbǎ-a nyɔ̍-ɛ, ɛ̍ se̍ u̍h dɛ̍ nui mu̍. Nɛ̀ pò u̍h tè poa-nyɔ̍ sɔ̍n dlǔ-ɛ, nɛ̀ u̍h-a mu̍ pǔh.”

¹⁹Ti̍ Joi Jusu wɔ̀-a ɔ̍ kòà we̍ wlu-ɛɛ, wɛ̀ ɔ̍ gba̍-ɛ dě ja̍i̍wlɔ̀. Iě ɔ̍ tè i̍ dǒ Nyɔsoa-a di̍na̍ we̍.

²⁰Wɛ̀ u̍h mu̍ tà kli̍hgbɛ̍ u̍h-a bla̍ Nyɔsoa tìh. Nɛ̀ kǎ Joi-a po̍ u̍h sɔ̍n we̍ dǒ jbaɛdih po̍ la̍, wɛ̀ u̍h-a bla̍-a tìh iě gbɔ̀ i̍ ku̍.]