Read Western Krahn Maɛ 2 Bible Online

Maɛ 2 - Western Krahn bible

Maɛ 2

¹Wǐh gbɔ̍ sì-aɛ, wɛ̀ Jusu ji̍ dǒ de̍ Kepanium. Iě ɔ̍ pɔ̀n sɛ̍ i̍ ka ɔ̍ nɛ-a dǒ wlɔ̀-ɛ.

²Wɛ̀ nyɔ̍ dɔu wɛ̀ de̍, sɔ dě gbò jǐ-i, iě flɔn la̍ se̍ dǒ gbò wɔ̍i̍n-a chɛ̀ nɛ. Wɛ̀ ɔ̍ bla̍ Nyɔsoa-a tìh dě u̍h we̍.

³Wɛ̀ jɔ̍gbauᵻ nyìɛ̍ ja klɔ-nyɔ̍ dǒ ɔ̍ we̍.

⁴Jɛ nɛ̀ u̍h se̍ dě Jusu we̍ nyni̍-ɛ bɛ̌ɛ, dɛ̍nu̍ɛ, nyɔ̍ tlùgbei̍ nɛ dǒ gbò wɔ̍i̍n. Ɛ̍ kɔn u̍h sà biě dě gbò tɔ̀u̍n we̍ tà ɔ̍ bla̍ɛ-a i̍-ɛ. U̍h wɔ̀-a ɛ̍ sà-ɛ, iě klɔ-nyɔ̍ sǐi dě sabli̍ di̍i̍ wɛ̀ u̍h ja ɔ̍ wlù dǒ Jusu we̍.

⁵Dɛ̍ nyɔ̍ laa̍ u̍h nu̍-a wlùh gbaɛ blě-ɛ, ɛ̍ bo Jusu jě. Iě ɔ̍ la̍a̍ dě klɔ-nyɔ̍ we̍, “Ǎn jǔ, àn gblɛ̍n sɔ̀ɛ̀n-a tìh tǎli-ɛ i̍ wɛ̀.”

⁶Nɛ̀ telě nǎ poe nyɔ̍ duuh tè-o i̍. Wɛ̀ u̍h-a pu̍e̍e ɛ̍ wlùh i̍,

⁷u̍h la̍a̍, “Jɔ̍gbau la dɛ̍nu̍ ɔ̍ nu̍ la̍a̍n wlu-ɛ ɛ? Ɔ̍ blaɛ Nyɔsoa wɔ̍n. Nyɔ̍ dɔɔ se̍a gblɛ̍n sɔ̀ɛ̀n-a tìh i̍ tǎli, Nyɔsoa due gbài̍ bo ɔ̀ nu̍ ɛ̍.”

⁸Sɔ dɛ̍ u̍h-a naɛ-a wlùh i̍-ɛ, ɛ̍ sùù sǐ Jusu-u dǒ tàdùè laa̍. Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a naɛ dɛ̍ kaɛn la wlùh i̍ ɛ?

⁹Jɔ̍gbau la ɔ̍ gblɛ̍n sɔ̀ɛ̀n-a tìh i̍ tǎli-ɛ jɛ ǎn sà-a ka dǒ wɔ̍i̍n-ɛ ke, jɛ ǎn mu̍-a ka sɔ bloɔ̍ ìè na nu̍-ɛ, jɛwe̍ bo ɛ̍ pe̍ɛ i̍ ɛ?

¹⁰Jɛ ǎn pɔ̀n mɔ̀ iě ɛ̍ i̍ juo ka Nyi̍ɔ̍-a Jǔ blě-a tùn nɔ̌ bloɔ̍ ɔ̍ iě-a gblɛ̍n sɔ̀ɛ̀n-a tìh i̍ tǎli-ɛ.” Iě ɔ̍ la̍a̍ dě klɔ-nyɔ̍ we̍,

¹¹“Ǎn sèàɛ̍ ìn wlùh, sɔ bloɔ̍, dǔ àn sabli̍-i ìè gbò we̍ mu̍.”

¹²Wɛ̀ ɔ̍ sɔ bloɔ̍, iě ɔ̍ dǔ ɔ̍ sabli̍-i dǒ nyɔ̍ kli̍hgbɛ̍ jlǐhwai, wɛ̀ ɔ̍ mu̍. Sɔ ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h-a po̍ Nyɔsoa tìhwe̍. Wɛ̀ u̍h la̍a̍, “À-a se̍a dɛ̍ nɛka la jě sàì.”

¹³Wɛ̀ Jusu mu̍ dě de̍ pɛ̍nu̍ klaa nɛ-a dě Kaladii fɔɔ-ɛ wɔ̍i̍n dɛ. Wɛ̀ nyɔ̍ tlùgbei̍ mu̍ dě ɔ̍ we̍, iě ɔ̍ po̍ u̍h nǎ dě Nyɔsoa dɛ di̍i̍.

¹⁴Ti̍ ɔ̍ sì-aɛ, dǒ ɔ̍ jě-e Afia-a jǔ Liifaɛ. Nɛ̀ ɔ̍ tè i̍ dǒ ɔ̍ taa̍sìh sà gbò juwɛ sɔ̀n. Wɛ̀ Jusu la̍a̍ dě ɔ̍ we̍, “Gbǎ dǒ ǐn de̍e̍.” Liifaɛ sɔ bloɔ̍, iě ɔ̍ gbǎ dǒ ɔ̍ de̍e̍.

¹⁵Ti̍ Jusu-a di̍-a dɛ̍ dě Liifaɛ blǐ gbò-ɛ, wɛ̀ taa̍sìh sà nyɔ̍ dɔu ke gblɛ̍n sɔ̀ɛ̀n nyɔ̍ gbǎ ɔ̍ ke ɔ̍ kòà nynɛ̌ u̍h-a di̍ dɛ̍. Dɛ̍nu̍ɛ, nyɔ̍ dɔu-a na ɔ̍ we̍.

¹⁶Fɛlesii nyɔ̍ duuh ùh-a po̍-a nyɔ̍ nǎ dǒ telě we̍-ɛ, wɛ̀ u̍h jě u̍h ke Jusu-a dɛ̍ tàdùè di̍-i la̍. Iě u̍h tèle ɔ̍ kòà i̍, u̍h la̍a̍, “Dɛ̍nu̍ ɔ̍ ke taa̍sìh sà nyɔ̍ ke gblɛ̍n sɔ̀ɛ̀n nyɔ̍-a di̍-i dɛ̍ tàdùè ɛ?”

¹⁷Jusu wɔ̌n-a u̍h-a wlu̍-ɛ, iě ɔ̍ la̍a̍ dě u̍h we̍, “Nyɔ̍ ùh nɛ-a blee-ɛ, u̍h se̍ kwɛ̍i̍n nyɔ̍ i̍ pɔ̀n. Jɛ poa-nyɔ̍ nɔ̀ɔ̍, u̍h-a pɔ̀n ɔ̍ i̍. Ǐn se̍ i̍ slɛ̌-nyɔ̍ i̍ pɔ̀n la̍-a ji̍, jɛ gblɛ̍n sɔ̀ɛ̀n nyɔ̍ bo ǐn ji̍ i̍ pɔ̀n la̍-a.”

¹⁸Ɛ̍ nu̍ ti̍ due nɛ̀ Chɔɔn-a kòà ke Fɛlesii nyɔ̍-a po̍ jlǔh dě Nyɔsoa dɛ di̍i̍. Wɛ̀ nyɔ̍gbei mu̍ dě Jusu we̍, u̍h la̍a̍, “Dɛ̍nu̍ Chɔɔn-a kòà ke Fɛlesii nyɔ̍-a kòà-a po̍ jlǔh wɛ̀ nàɛ̀ nɔ̀ɔ̍, u̍h-u po̍ jlǔh ɛ?”

¹⁹Iě Jusu la̍a̍ dě u̍h we̍, “Pò nynɔ̌ delee-a kɔan nɛ dǒ nynɔ̌ jla̍ ja peě kɛ̍n-ɛ, nɛ̀ dihwi̍hᵻ se̍ jlǔh po̍ mu̍.

²⁰Jɛ ɛ̍ mu̍ ti̍ kɔn wɛ̀ nynɔ̌ delee-a kɔan iě dě u̍h nynɛ̌ we̍ sà-ɛ, wɛ̀ u̍h iě jlǔh po̍.

²¹“Nyɔ̍ se̍ kɔn ɔ̍ iě jliɛ̍ delee-a fɔ̌ plɛ̀i̍ soa pǎ-ɛ. Pò nyɔ̍ nu̍ ɛ̍ wɛ̀ jliɛ̍ delee iě-e jeǎ-ɛɛ, nɛ̀ ɛ̍ mu̍ plɛ̀i̍ soa-a fǎle-ɛ dě de̍i̍ po̍.

²²Nɛ̀ nyɔ̍ se̍ kɔn ɔ̍ iě nmɔ̍ delee dě dɛ̍ku sòlɛ̀ soa di̍i̍ po̍ ke. Pò nyɔ̍ nu̍ ɛ̍-ɛ, nɛ̀ ɛ̍ mu̍ sòlɛ̀ laa̍ wa̍, nɛ̀ nmɔ̍-a chɛ̀ ke sòlɛ̀-a mu̍-u gbɔ̀lɔ. Ɛ̍ tìh-ɛ, dě dɛ̍ku sòlɛ̀ delee di̍i̍ bo nmɔ̍ delee iě gbǎ.”

²³Dǒ ti̍ due di̍i̍ nɛ̀ ɛ̍ nu̍ Juu-a wlè-weɛ̍, wɛ̀ Jusu ke ɔ̍ kòà-a jii dě kwǐ kɛnɛ̌-a klè di̍i̍. U̍h-a sì-aɛ, wɛ̀ ɔ̍ kòà chɛ̍n i̍h dlǔ i̍.

²⁴Wɛ̀ Fɛlesii nyɔ̍ la̍a̍ dě ɔ̍ we̍, “Gbɛ̀n-e, àn kòà-a wa̍-a à wlè-weɛ̍-a telě-ɛ, nɛ̀ jě u̍h ae?”

²⁵Wɛ̀ ɔ̍ la̍a̍ dě u̍h we̍, “Ti̍ mɔ̌-a nu̍-a Depe ke ɔ̍ na-nyɔ̍ u̍h-a pɔ̀n-a di̍-dɛ̍ i̍-ɛ, dɛ̍ ɔ̍ nu̍-a mɔ̀-ɔ se̍a ɛ̍ slè dě Nyɔsoa-a wlu̍ di̍i̍ ae?

²⁶Dě à telě di̍i̍-ɛ, blèe̍ jɛ u̍h sà-ɛa Nyɔsoa kwlǎ-a, nɛ̀ nyɔ̍ dɔɔ-ɔ di̍ ɛ̍ dɛ. Nɛ̀ slaǎ sà nyɔ̍ nɛ due bo ɔ̀ di̍ ɛ̍. Jɛ ti̍ Abaeata nu̍-a slaǎ sà nyɔ̍ klaa-ɛ, Depe pa̍-a dě Nyɔsoa-a gbò sɔ̀n-ɛ, iě ɔ̍ ke ɔ̍ ba̍ᵻ di̍ blèe̍ laa̍.”

²⁷Jusu wɔ̌an chlà-a tìh-ɛ, ɔ̍ la̍a̍, “Nyɔsoa nu̍ wlè-weɛ̍ dǒ nyi̍ɔ̍ we̍, jɛ ɔ̍ se̍ nyi̍ɔ̍ nu̍ dǒ wlè-weɛ̍ we̍.

²⁸Ɛ̍ tìh-ɛ, Nyi̍ɔ̍-a Jǔ bo ɔ̀ nu̍ Joi dǒ wlè-weɛ̍ we̍.”