Read Western Krahn Maɛ 3 Bible Online

Maɛ 3 - Western Krahn bible

Maɛ 3

¹Wɛ̀ Jusu mu̍ dě de̍ wɛɛ sà gbò sɔ̀n, nɛ̀ jɔ̍gbau due nɛ-e ɔ̍ kɔba kɔ̌ i̍.

²Nɛ̀ nyɔ̍ duuh nɛ dě gbò sɔ̀n u̍h-a klǎɛ Jusu jlǐhɛ̍ pò ɔ̍ mu̍ telě wa̍ ɔ̍ iě ɔ̍ pǔh-i dǒ wlè-weɛ̍ di̍i̍ kɔ̌ɔ, wɛ̀ u̍h iě ɔ̍ tìh gbɛ̍n-ɛ.

³Wɛ̀ Jusu la̍a̍ dě jɔ̍gbau laa̍ we̍, “Ji̍ nɔ̌ nya̍ ka nɔ̍ɔ̀ ìè i̍ nyna.”

⁴Wɛ̀ Jusu tèle u̍h i̍, ɔ̍ la̍a̍, “Ɛ̍ slɛ̌ i̍ dě à telě di̍i̍ à iě dɛ̍ chɛ̀ nu̍ dǒ wlè-weɛ̍ di̍i̍ ɛɛ, àe̍e̍ ɛ̍ slɛ̌ i̍ à iě dɛ̍ sɔ̀n nu̍ ae? À iě nyɔ̍ pǔh-i ɛɛ, àe̍e̍ à iě nyɔ̍-ɔ gbɔ̀lɔ ae?” Jɛ u̍h-a nyɔ̍ se̍ fuɛn nu̍.

⁵Wɛ̀ ɔ̍ gbèɛ̀ɛ̍n u̍h ja̍ i̍, jɛ nɛ̀ ɔ̍ gbǎ jlu̍h-u. Sɔ nɛ̀ dɛ̍ u̍h nu̍-a dlǔ ku̍-ɛ, ɛ̍ po̍ ɔ̍ kà di̍i̍. Wɛ̀ ɔ̍ la̍a̍ dě jɔ̍gbau we̍, “Slɛ̌ɛ àn kɔba i̍.” Wɛ̀ ɔ̍ slɛ̌ɛ ɛ̍ i̍, iě ɔ̍ kɔba nmɔ jii̍ dode̍.

⁶Wɛ̀ Fɛlesii nyɔ̍ laa̍ u̍h sǐ sɔ̀n. Iě u̍h tèwe u̍h mu̍, wɛ̀ u̍h ke nyɔ̍ nɛ-a dě Ɛlo naɛ gbɔ̀ù di̍i̍-ɛ sɔ̌ u̍h iě Jusu dbǎ.

⁷Wɛ̀ Jusu ke ɔ̍ kòà mu̍ dě pɛ̍nu̍ klaa wɔ̍i̍n, iě nyɔ̍ tlùgbei̍ sɔ Kaladii fɔɔ u̍h wɔ̀ dǒ ɔ̍ de̍e̍. Wɛ̀ duuh sɔ Judia fɔɔ ke,

⁸Juluslɛn wlɔ̀ ke, Idomia fɔɔ, iě duuh sɔ dě Jɔɔdɛn nǐ de̍e̍ ke, Taiɛ ke Saidɔn wlɔ̀ de̍e̍ i̍. U̍h kli̍hgbɛ̍ u̍h-a ji̍ dǒ ɔ̍ we̍, dɛ̍nu̍ɛ, u̍h-a wɔ̌n ɔ̍ nu̍-dɛ̍ᵻá pɔ̀n.

⁹Jɛ dɛ̍ ɔ̍ nu̍-a la̍ nyɔ̍ dɔu pǔh-iɛ, sɔ wɛ̌ᵻ nyɔ̍ kli̍hgbɛ̍-a klɛɛn la̍ dě ɔ̍ we̍ u̍h iě ɔ̍ i̍ tǔh. Ɛ̍ bo ɛ̀ nu̍ ɛ̍ wɛ̀ ɔ̍ sèàɛ̍ ɔ̍ kòà wlùh u̍h iě blǎgbè gba̍a̍ po̍ dǒ ɔ̍ we̍, wɛ̀ u̍h je̍e ɔ̍ nɛ̌ɛ.

¹¹Nyɔ̍ ùh blě-a jeědih dǒ u̍h de̍e̍-ɛ, ti̍ kli̍hgbɛ̍ we̍ pò u̍h jě Jusu-ɛ, nɛ̀ jeědih kà u̍h i̍ dǒ ɔ̍ jǔ, iě u̍h-a wǐ. Nɛ̀ u̍h la̍a̍, “Mɔ̀ Nyɔsoa-a Jǔ.”

¹²Wɛ̀ ɔ̍ nɛ̌ɛ jeědih laa̍ wlu̍ dounᵻ i̍ kaa̍ i̍h-i je̍e ɔ̍ nynɛ̌ wlɔ̀ we̍ po̍.

¹³Wɛ̀ Jusu mu̍ dě tlu̍h kɛ̍n, iě ɔ̍ dǎ nyɔ̍ ɔ̍ pɔ̀n-aɛ dě ɔ̍ we̍. Wɛ̀ u̍h mu̍ dě ɔ̍ we̍.

¹⁴Iě ɔ̍ tba̍ nyɔ̍-a pùè jɔ̌ sɔɔ̌n chèɛ̀ dě u̍h nynɛ̌ u̍h ke ɔ̍ iě na. Wɛ̀ u̍h iě ɔ̍ gba̍tòà nu̍, ɔ̍ iě u̍h dbo̍ u̍h iě Nyɔsoa tìh bla̍.

¹⁵Nɛ̀ u̍h-a mu̍ gbǐh blě u̍h iě nyɔ̍gbei jeědih de̍e̍ i̍ sà.

¹⁶Ùh ɔ̍ tba̍-a chèɛ̀-ɛ, u̍h-a nynɛ̌ la, Samo, ɔ̀ Jusu-a dǎɛ-a Pitɛ-ɛ ke,

¹⁷Sɛɛbedii-a jǔ Chiin ke, ɔ̍ de̍di̍i̍ Chɔɔn, u̍h-u bo Jusu-a dǎɛ Boanɔji, ɛ̍ gbɔ̀ nu̍ Tɛ̀n Jɔ̍gbauᵻ,

¹⁸nɛ̀ Andlu ke, Felɔ ke, Batalamio ke, Matio ke, Tɔmɔ ke, Afia-a jǔ Chiin ke, Tadiɔ ke, Samo ɔ̀ fɔ̀n-a bloa̍ tìh we̍-ɛ ke,

¹⁹ɛ̍ ke Juda Ɛkɛlia jɔ sà-a Jusu kwlǎ-a ke.

²⁰Wɛ̀ Jusu mu̍ gbò we̍, iě nyɔ̍ dɔu gbǎ tàdùè dɛ dǒ ɔ̍ we̍. Sɔ ɔ̍ ke ɔ̍ kòà ke u̍h-u jě dɛ̍ di̍ ka̍.

²¹Ti̍ ɔ̍ chɛ̌ wɔ̌n-a pɔ̀n la-ɛ, wɛ̀ u̍h mu̍ ɔ̍ bola̍a̍, dɛ̍nu̍ɛ, nyɔ̍ɔ la̍ ɔ̍ wlùh mǎ-ɛ.

²²Telě nǎ poe nyɔ̍ ùh sɔ-a Juluslɛn-ɛ, u̍h la̍a̍, “Biɛsibo ɛ̀ nu̍-a jeědih-a dlǔtu-ɛ, ɛ̍ bo ɛ̀ nɛ Jusu de̍e̍. Ɛ̍ bo ɔ̍ sà-ɛ nyɔ̍ɔ jeědih de̍e̍ i̍.”

²³Wɛ̀ Jusu dǎ u̍h dě ɔ̍ we̍, iě ɔ̍ la̍a̍, “Ka Setɔn nɔ̀ɔ̍ ɛ̍ nu̍ Setɔn i̍ ke ɛ?

²⁴Nyɔ̍ ùh nɛ-a dǒ blǔh due kɛ̍n-ɛ, pò u̍h-a sǔh ja fɔ̀n-ɛ, nɛ̀ u̍h-a bloa̍-a mu̍ wa̍.

²⁵Nɛ̀ pò gbò nyɔ̍-a sǔh ja fɔ̀n-ɛ, nɛ̀ u̍h-a gbò se̍ gbɛ̍n mu̍. Jɛ nɛ̀ ɛ̍ mu̍ wa̍.

²⁶Nɛ̀ pò Setɔn ja la̍ ɛ̍ chɛ̀-a nyɔ̍ we̍ fɔ̀n-ɛ, nɛ̀ i̍h gblè-ɛ i̍ wɛ̀. Nɛ̀ ɛ̍ se̍ gba̍n kɔn mu̍, jɛ nɛ̀ ɛ̍ kmɔ̌-a mu̍ ja̍i̍ gbà.

²⁷“Ɛ̍ se̍ nyɔ̍ kɔn ɔ̍ iě dě kmu-nyɔ̍ blǐ gbò pa̍ wɛ̀ ɔ̍ iě ɔ̍ kɔn-dɛ̍ᵻ dǔ. Pò ɔ̍ iě ɛ̍ nu̍-ɛ, nɛ̀ ɔ̍ mu̍ kmu-nyɔ̍ laa̍ gbɛ̍n ɔ̍ iě ɔ̍ sa̍n ke̍ sàǐtòò, wɛ̀ ɔ̍ iě ɔ̍ gbò wa̍-a dǔ.

²⁸“Ɛ̍ se̍ pàɔ̀n, gblɛ̍n sɔ̀ɛ̀n kli̍hgbɛ̍ ke nyɔ̍ wlu̍ pùn i̍ po̍-ɛa tìh-a mu̍ i̍ tǎli-ɛ,

²⁹jɛ nyɔ̍ ɔ̀ mu̍-a Nyɔsoa-a Sùù wɔ̍n blaɛ-ɛ, nɛ̀ ɔ̍ gblɛ̍n sɔ̀ɛ̀n-a tìh se̍ i̍ tǎli la̍ kɔn. Dɛ̍nu̍ɛ, ɛ̍ tìh se̍ i̍ wɛ̀ mu̍.”

³⁰Ɔ̍ bla̍ ɛ̀ la dɛ̍nu̍ɛ, nyɔ̍gbei la̍a̍, “Ɔ̍ blě jeědih dǒ ɔ̍ de̍e̍.”

³¹Wɛ̀ Jusu de̍ ke ɔ̍ de̍di̍i̍ᵻ ji̍. Iě u̍h nyna i̍ dǒ gbò wɔ̍i̍n, wɛ̀ u̍h dbo̍ nyɔ̍ dě gbò u̍h iě ɔ̍ dǎ.

³²Nɛ̀ nyɔ̍ tlùgbei̍ dlɛ̌ ɔ̍-ɛ tlììh. Wɛ̀ u̍h la̍a̍, “Ìn de̍ ke ìn de̍di̍i̍ᵻá tèle àn tìh i̍ dě sɔ̀n.”

³³Wɛ̀ ɔ̍ tèle u̍h i̍, ɔ̍ la̍a̍, “Nyɔ̍ bo ùh nu̍ ǐn de̍ ke ǐn de̍di̍i̍ᵻ ɛ?”

³⁴Nyɔ̍ ùh dlɛ̌-a ɔ̍-ɛ, wɛ̀ ɔ̍ gbèɛ̀ɛ̍n u̍h ja̍ i̍. Iě ɔ̍ la̍a̍, “Mɔ̀ gbɛ̀n-e, ùh la bo ùh nu̍ ǐn de̍ ke ǐn de̍di̍i̍ᵻ.

³⁵Nyɔ̍ ɔ̀ nu̍-a Nyɔsoa-a wlùh dɛ̍-ɛ, nɛ̀ ɔ̍-ɔ bo ɔ̀ nu̍ ǐn de̍di̍i̍ jɔ̍gbau ke ǐn de̍di̍i̍ nynɔ̌gbaɔ ke ǐn de̍.”