Read Western Krahn Maɛ 5 Bible Online

Maɛ 5 - Western Krahn bible

Maɛ 5

¹Wɛ̀ Jusu ke ɔ̍ kòà tàn pɛ̍nu̍ klaa laa̍ u̍h nyni̍ dě ɛ̍ fɔ̌ dɛɛ we̍, dě Kɛwlasa fɔɔ.

²Jusu naɛ àn sɔ dě blǎgbè di̍i̍ ka-ɛ, nɛ̀ jɔ̍gbau ɔ̀ blě-a jeědih dǒ ɔ̍ de̍e̍-ɛ, ɔ̍ sɔ dě nyɔ̍ i̍ tè wɔ̍ᵻ di̍i̍ wɛ̀ ɔ̍ ji̍ dǒ Jusu we̍.

³Dě wɔ̍ᵻ laa̍ di̍i̍ bo jɔ̍gbau la ɔ̍ tǐn. Nyɔ̍ se̍ ɔ̍ sa̍n-a bɛ̌ɛ, jɔɔdbǔ-a chɛ̀ bo nyɔ̍ se̍ ɔ̍ sa̍n-ɛ bɛ̌ɛ.

⁴U̍h-a sa̍n ɔ̍ bu̍hᵻ ke ɔ̍ sɔ̍nᵻ chɛ̍chɛ̍, jɛ nɛ̀ ɔ̍ chɛ̍n jɔɔdbǔᵻá chɛ̀ nɛ-a ɔ̍ sɔ̍nᵻ i̍-ɛ, iě ɔ̍ chlà-ɛ nɛ̍ne̍ɛ̍ nɛ-a dě ɔ̍ bu̍hᵻ i̍-ɛ. Sɔ ɔ̍ kmu-u tìh nyɔ̍ se̍ ɔ̍ gbè we̍ gbɛ̍n-ɛ bɛ̌ɛ.

⁵Wlù ke sɔ̀n-ɛ, ɔ̍ nɛ dě wɔ̍ᵻ laa̍ nynɛ̌ ke dě tlu̍hᵻ di̍i̍, wɛ̀ ɔ̍ wǐi i̍ iě ɔ̍ tbaɛ ɔ̍ chɛ̀ sɔɔ̌ᵻ i̍.

⁶Ɔ̍ nɛ dě nya̍ wɛ̀ ɔ̍ po̍ Jusu jlǐhɛ̍-ɛ, wɛ̀ ɔ̍ gba̍ ple̍-ɛ dě ɔ̍ we̍. Iě ɔ̍ po̍ kɔlu̍ᵻ wlù dǒ ɔ̍ jǔ.

⁷Wɛ̀ ɔ̍ plǎn, ɔ̍ la̍a̍, “Jusu, Nyɔ̍ Wɔ̍n Sìì Nyɔsoa-a Jǔ, ka àn pɔ̀n ìè ǎn tìh nu̍ ɛ? Ǎn ba̍le m̀, po̍-e Nyɔsoa we̍ wlùh, bɔ̌ ǐn kàn gbɛ̍n-ɛ.”

⁸Dɛ̍nu̍ɛ, Jusu sèàɛ̍ jeědih la wlùh ɛ̍ iě dǒ jɔ̍gbau la de̍e̍ sɔ, ɛ̍ kɔn ɛ̍ bla̍ dɛ̍ la.

⁹Wɛ̀ Jusu tèle ɔ̍ i̍, ɔ̍ la̍a̍, “Àn nynɛ̌ ɛ?” Wɛ̀ jɔ̍gbau la̍a̍, “Ǎn nynɛ̌ bo Sùɛ̀, dɛ̍nu̍ɛ, à tìè i̍.”

¹⁰Wɛ̀ ɔ̍ ba̍le Jusu dɛ̍blɔ ɔ̍-ɔ je̍e jeědih dě fɔ̌ laa̍ we̍ sà.

¹¹Ɛ̍ ti̍ laa̍ nɛ̀ fùùh be̍e̍ᵻ kɔǎn-ɛ dǒ tà-a chɛ̀ i̍, i̍h-a di̍ dɛ̍ dě tlu̍h gbèɛ̀n i̍.

¹²Wɛ̀ jeědih ba̍le Jusu ɔ̍ iě i̍h dě be̍e̍ᵻ ku̍u̍ dbo̍, wɛ̀ i̍h iě-e gbǎ.

¹³Wɛ̀ ɔ̍ sà jeědih laa̍ wlu̍ kɛ̍n. Iě i̍h sɔ dǒ jɔ̍gbau laa̍ de̍e̍ wɛ̀ i̍h gbǎ dě be̍e̍ᵻ ku̍u̍. Be̍e̍ᵻá chɛ̀ bɛ̌ɛ wlǔ sɔɔ̌n (2,000) nu̍-ɛ. Wɛ̀ i̍h wa̍n dě gbuǔh tɔ̀ɔ̀n kɛ̍n i̍ iě i̍h gbǎ pɛ̍nu̍ klaa kɛ̍n, wɛ̀ i̍h sie niɔ̍ kli̍hgbɛ̍.

¹⁴Wɛ̀ ùh-a gbɛ̀n-a dǒ be̍e̍ᵻá chɛ̀ we̍ i̍-ɛ ple̍, u̍h gba̍ kunǎ dě wlɔ̀ ke klèᵻ we̍ i̍ kli̍hgbɛ̍. Wɛ̀ nyɔ̍gbei wɛ̀-e i̍ u̍h mu̍, u̍h iě dɛ̍ ɛ̀ gbǎ-a jě.

¹⁵Ti̍ u̍h nyni̍-a dǒ Jusu we̍-ɛ, wɛ̀ u̍h jě jɔ̍gbau ɔ̀ jeědih dɔu nɛ-a dǒ de̍e̍ de-ɛ, nɛ̀ ɔ̍ ji̍ ɔ̍ chɛ̀ we̍, iě ɔ̍ pa̍ dɛ̍ɛ̍ nmɔ jii̍ ɔ̍ tè i̍. Sɔ ɛ̍ po̍ u̍h faɔn.

¹⁶Dɛ̍ la ɛ̀ gbǎ-aɛ, nyɔ̍ ùh jě-a ɛ̍-ɛ, u̍h bo ùh sèàɛ̍ nyɔ̍gbei wlùh, ɛ̍ ke ka be̍e̍ᵻ nu̍-a niɔ̍ sie-ɛ ke.

¹⁷Wɛ̀ u̍h-a ba̍le Jusu ɔ̍ iě dě u̍h we̍ fɔɔ sɔ.

¹⁸Ti̍ Jusu-a gbǎ-a la̍ dě de̍ blǎgbè di̍i̍-ɛ, wɛ̀ jɔ̍gbau ɔ̀ jeědih nɛ-a dǒ de̍e̍ de-ɛ, ɔ̍ ba̍le Jusu ɔ̍ ke ɔ̍ iě mu̍.

¹⁹Jusu la̍a̍, “Iěe, bɔ̌ mu̍-ɛ, jɛ mu̍ wlɔ̀ wɛ̀ ka Joi nu̍-a ìn wɔɛ jě-ɛ, iě ɔ̍ nu̍-a ìn dɛ̍ we̍-ɛ, ìè àn chɛ̌ wlùh sèàɛ̍.”

²⁰Iě jɔ̍gbau laa̍ ɔ̍ mu̍. Wɛ̀ fɔ̌ u̍h-a dǎɛ-a Wlɔ̀ᵻ Pùè-ɛ, ɔ̍ na ɛ̍ we̍ kli̍hgbɛ̍. Iě ɔ̍ bla̍ dɛ̍ᵻ kli̍hgbɛ̍ ìh Jusu nu̍-a ɔ̍ pùn-ɛ. Sɔ ɛ̍ wlǔh i̍ nyɔ̍ kli̍hgbɛ̍ ùh wɔ̌n-a i̍h-ɛ de̍e̍.

²¹Ti̍ Jusu tàn-a ɔ̍ mu̍-a dě de̍ pɛ̍nu̍ klaa de̍e̍-ɛ, wɛ̀ nyɔ̍ dɔu gbǎ tàdùè dǒ ɔ̍ we̍ pɛ̍nu̍ wɔ̍i̍n.

²²Iě jɔ̍gbau due ji̍, ɔ̍ nynɛ̌ bo Jaleɔ. Ɔ̍ nu̍ wɛɛ sà gbò wlu̍ i̍ kɔn nyɔ̍-a due. Ɔ̍ jě-a Jusu-ɛ, wɛ̀ ɔ̍ chlìi i̍ dǒ ɔ̍ jǔ.

²³Iě ɔ̍ gbɛ̍n Jusu-a bu̍h i̍, ɔ̍ ba̍le ɔ̍. Ɔ̍ la̍a̍, “Ǎn jǔ nynɔ̌gbaɔ-a ji̍ mɛ̌ la̍, dbǎkà, ji̍ ìè ɔ̍ sɔ̍n dlǔ tè ɔ̍ iě pǔh, wɛ̀ ɔ̍ iě kmɔ̌ nɛ.”

²⁴Wɛ̀ Jusu gbǎ dǒ Jaleɔ de̍e̍ u̍h-a mu̍. Nɛ̀ nyɔ̍ tlùgbei̍ po̍ ɔ̍ dě pìe̍e̍ u̍h-a mu̍ dě Jaleɔ blǐ gbò.

²⁵Nɛ̀ nynɔ̌ due nɛ dǒ gbɔ̍ɔ̍ laa̍ nmi̍i̍wlì wɛ̌-a nu̍ ɔ̍. Ɛ̍ nu̍ ɔ̍ wɛ̀ dǒ sɔ̀nᵻá pùè jɔ̌ sɔɔ̌n di̍i̍.

²⁶Nɛ̀ kǎ ɔ̍ sàɛ̀ jua̍i̍ ɔ̍ mu̍ kwɛ̍i̍n nyɔ̍ we̍i̍ ke sǔh. Ɔ̍ tu̍ ɛ̍ tìh ɔ̍ ple̍ ɔ̍ wlǐ kli̍hgbɛ̍ wɛ̀, jɛ ɛ̍-ɛ chɛ̍n-o dɛ̍, ɛ̍ gbǎ dě de̍i̍ sǔh.

²⁷Nynɔ̌ laa̍ sɔ ɔ̍ wɔ̌n Jusu-a pɔ̀n, wɛ̀ ɔ̍ pa̍ dě nyɔ̍ tlùgbei̍ laa̍ nynɛ̌ dǒ ɔ̍ de̍e̍.

²⁸Iě ɔ̍ la̍a̍ dě ɔ̍ chɛ̀ we̍, “Pò ɛ̍ tù ɔ̍ plɛ̀i̍-a mlǎ-a chɛ̀ iě i̍ tǔh-ɛ, nɛ̀ ǎn mu̍ pǔh.”

²⁹Wɛ̀ ɔ̍ tǔh Jusu-a plɛ̀i̍ i̍, sɔ ɔ̍ nmi̍i̍wlì kǎ-ɛ sǔh. Iě ɔ̍ juo-o dɛ̍ i̍ dě ɔ̍ ku̍sɔ̀n ka ɔ̍ wɛ̌ bɔ̌-a wɛ̀-ɛ.

³⁰Dǒ tàdùè laa̍ Jusu juo-o dɛ̍ i̍ ka gbǐh sɔ-a dě ɔ̍ ku̍sɔ̀n-ɛ. Wɛ̀ ɔ̍ fèàɛ̀ dě nyɔ̍ tlùgbei̍ laa̍ nynɛ̌, iě ɔ̍ la̍a̍, “Nyɔ̍ bo ɔ̀ tǔh ǎn jliɛ̍ i̍ ɛ?”

³¹Ɔ̍ kòà la̍a̍, “Nɛ̀ jě nyɔ̍ dɔu la ùh po̍-a ìn dě pìe̍e̍-ɛ, wɛ̀ nàà nɛ̀ nyɔ̍ bo ɔ̀ tǔh ìn i̍ ɛ?”

³²Jɛ nɛ̀ kǎ Jusu-a gbèɛ̀ɛ̍n i̍ sǔh, ɔ̍ iě nyɔ̍ nu̍-a dɛ̍ laa̍ jě.

³³Sɔ nynɔ̌ juo dɛ̍ ɛ̀ nɛ-a ɔ̍ pùn-ɛ, wɛ̀ ɔ̍ ku̍ blě tlɛ̍-ɛ dǒ faɔn we̍, iě ɔ̍ chlìi i̍ dǒ Jusu jǔ. Wɛ̀ ka ɛ̍ nu̍-a nɛ-ɛɛ, iě ɔ̍ sèàɛ̍ ɛ̍ we̍ i̍ kli̍hgbɛ̍ dě Jusu we̍.

³⁴Wɛ̀ Jusu la̍a̍, “Nynɔ̌ chɛ̀, àn wlùh gbaɛ bo ɛ̀ nu̍ ɛ̍ wɛ̀ ìn pǔh. Mu̍ pɛlɛpɛ, ìn pǔh wɛ̀ kleǐnklein.”

³⁵Jusu-a bla̍-a ɛ̀ la-ɛ, nɛ̀ nyɔ̍-a sɔ dě Jaleɔ blǐ gbò, u̍h la̍a̍, “Àn nynɔ̌gbaɔ jǔ mɛ̌ wɛ̀. Dɛ̍nu̍ àn bɛ̌ɛ Dlǔtu wɔ̍ɔ̍n i̍ ke̍ sǔh ɛ?”

³⁶Jɛ nɛ̀ Jusu-a sà u̍h-a wlu̍ dounᵻ i̍. Wɛ̀ ɔ̍ la̍a̍ dě Jaleɔ we̍, “Bɔ̌ faɔn ple̍-ɛ, wlùh gbaɛ nɛ due bo ìè blě.”

³⁷Wɛ̀ Jusu sà nyɔ̍ duuh wìè-i. Ɔ̍ gba̍ Pitɛ ke, Chɔɔn ke ɔ̍ de̍di̍i̍ Chiin. Kǎ u̍h tìè kleǐn u̍h mu̍.

³⁸Wɛ̀ u̍h nyni̍ dě Jaleɔ blǐ gbò. Nɛ̀ nyɔ̍gbei-a fìn-i u̍h-a we̍le, wɛ̀ ɔ̍ jɛɛ u̍h kɛ̍n.

³⁹Iě ɔ̍ pa̍ gbò, wɛ̀ ɔ̍ la̍a̍ dě u̍h we̍, “Dɛ̍ bo ɛ̀ po̍ mɔ̀-a wlùh dě de̍i̍ wɛ̀ mɔ̀-a fìn ɛ? Nynɔ̌gbaɔ jǔ la ɔ̍ se̍ mɛ̌, jɛ ɔ̍ mɔ̌-ɛ.”

⁴⁰Sɔ u̍h-a kǐhlɛ ɔ̍ la̍-ɛ sǔh. Iě ɔ̍ po̍ u̍h kli̍hgbɛ̍ sɔ̀n i̍. Wɛ̀ ɔ̍ dǔ jǔ de̍ ke ɔ̍ baa, ɛ̍ ke ɔ̍ kòà nɛ-a ta̍a̍n-a ke. Iě u̍h pa̍ dě gbòju kɔn di̍i̍ nynɔ̌gbaɔ jǔ pɛ̌n-a i̍-ɛ.

⁴¹Wɛ̀ ɔ̍ gbɛ̍n nynɔ̌gbaɔ jǔ-a sɔ̍n i̍, wɛ̀ ɔ̍ la̍a̍, “Talita kum,” ɛ̍ gbɔ̀ nu̍, “Nynɔ̌gbaɔ jǔ, ǎn sèàɛ̍ ìn wlùh ìè bloɔ̍ sɔ.”

⁴²Sɔ nynɔ̌gbaɔ jǔ wa̍n bloɔ̍ sǔh, iě ɔ̍ na. Nynɔ̌gbaɔ jǔ-a chɛ̀ ɔ̍ sɔ̀nᵻ nu̍ pùè jɔ̌ sɔɔ̌n. Sɔ ɛ̍ wlǔh i̍ u̍h de̍e̍ kaa̍.

⁴³Wɛ̀ Jusu gbɛ̍n-ɛ u̍h wɔ̍i̍n u̍h-u je̍e nyɔ̍-o-nyɔ̍ wlùh sèàɛ̍. Iě ɔ̍ la̍a̍, “Mɔ̀ nyǐ ɔ̍ dɛ̍ ɔ̍ iě di̍.”