Read Western Krahn Maɛ 7 Bible Online

Maɛ 7 - Western Krahn bible

Maɛ 7

¹Fɛlesii nyɔ̍ ke telě nǎ poe nyɔ̍ duuh ùh sɔ-a dǒ Juluslɛn wlɔ̀ di̍i̍-ɛ, u̍h gbǎ tàdùè dǒ Jusu we̍.

²Wɛ̀ u̍h jě ɔ̍ kòà duuh nɛ̀ u̍h wa̍ Juu nyɔ̍-a telě. U̍h se̍ kwa̍ dle iě u̍h-a di̍ dɛ̍.

³Dɛ̍nu̍ɛ, Fɛlesii nyɔ̍ ke Juu nyɔ̍ kli̍hgbɛ̍ nɔ̀ɔ̍, pò u̍h iě dɛ̍ di̍-ɛ, nɛ̀ u̍h-a dle kwa̍ sasǎ. Ɛ̍ bo ɛ̀ nu̍ u̍h baaᵻá telě u̍h po̍.

⁴Pò u̍h sɔ dě dɔɔ̌-ɛ, nɛ̀ u̍h-a dle i̍ sasǎ wɛ̀ u̍h-a di̍ dɛ̍. U̍h blě telě dɔu diih. U̍h-a wɔ̍lɔ tìɛ̀n jawih ke, kàu̍nᵻ ke plěaᵻ kɛ̍n i̍, ɛ̍ ke tike̍ᵻ bei ke.

⁵Ɛ̍ bo Fɛlesii nyɔ̍ ke telě nǎ poe nyɔ̍ tèle ɔ̍ i̍, u̍h la̍a̍, “Dɛ̍nu̍ àn kòà la wɛ̀ u̍h-u tè-o à baaᵻá telě i̍ ɛ? U̍h se̍ kwa̍ dle wɛ̀ u̍h-a di̍ dɛ̍.”

⁶Wɛ̀ ɔ̍ la̍a̍ dě u̍h we̍, “Mɔ̀-ɔ la ùh nɛ-a mɛɔ sɔɔ̌n wɔ̍ɔ̍n-ɛ, dɛ̍ Nyɔsoa-a tu̍owli po̍ nyɔ̍ Asaia bla̍-a dǒ mɔ̀ pùn-ɛ, ɛ̍ blaɛ i̍. Kǎ ɛ̍ nu̍ ka chlǐh-ɛ, ‘Nyɔ̍ la u̍h-a wɔ̍n-a sǔh bo u̍h-a tè-e ǐn ja̍, jɛ u̍h-a wlùh ti̍ɛ̍ɛn ǐn we̍ i̍.

⁷U̍h-a sà ǐn wɛɛ bu̍ɛ̍i̍. Wlɔ̀ nyi̍ɔ̍-a telě bo u̍h-a poe nyɔ̍ nǎ u̍h-a dǎɛ naɛ̍.’ ”

⁸Jusu la̍a̍, “Mɔ̀ poe Nyɔsoa-a telě kɛ̍n i̍ wɛ̀ mɔ̀-a tè-o wlɔ̀ nyi̍ɔ̍-a nàɛ̀ i̍.”

⁹Ɔ̍ la̍a̍ dě u̍h we̍, “Mɔ̀-a po̍ gblàa̍ Nyɔsoa-a telě iě dǒ bloɔ̍ i̍ gbǎ wɛ̀ mɔ̀ naɛ nǎ iě-o sie.

¹⁰Dɛ̍nu̍ɛ, Mose la̍a̍, ‘Tè ìn de̍ ke ìn baa ja̍. Nɛ̀ nyɔ̍ jɔ mu̍-a ɔ̍ baa àe̍e̍ ɔ̍ de̍ chlèe-ɛ, nɛ̀ ɔ̍ kɔn ɔ̍ iě dbǎ-ɛ.’

¹¹Jɛ mɔ̀ la̍ pò nyɔ̍ blě dɛ̍ ɔ̍ iě ɔ̍ de̍ ke ɔ̍ baa nyǐ-ɛ, nɛ̀ ɔ̍ la̍a̍, ‘Dɛ̍ ǎn mu̍-a mɔ̀ nyǐ de-ɛ, ǐn nyǐ ɛ̍ Nyɔsoa wɛ̀.’ Ɛ̍ bo Juu nyɔ̍-a dǎɛ koben dě Iblu wlu̍ di̍i̍.

¹²Ɛ̀ laa̍ nɛ̀ mɔ̀-a sà u̍h wìè-i, u̍h-u je̍e dɛ̍ nu̍ dǒ u̍h de̍ bei we̍.

¹³Mɔ̀-a po̍ nǎ iě ɛ̍ sà Nyɔsoa-a wlu̍ dǒ wìè-i. Wɛ̀ nɛka dɔu diih nɛ dǒ de̍ mɔ̀-a nu̍.”

¹⁴Wɛ̀ Jusu dǎ nyɔ̍ tlùgbei̍ laa̍ dɛ, iě ɔ̍ la̍a̍ dě u̍h we̍, “Mɔ̀ kli̍hgbɛ̍ mɔ̀ po̍ nɔ̌ ǐn we̍ dounᵻ wɛ̀ mɔ̀ iě dɛ̍ɛ̍ i̍ wɔ̌n.

¹⁵Dɛ̍ jɛ mu̍-a dě nyɔ̍ di̍i̍-ɛ, ɛ̍-ɛ nyni-i nyɔ̍ dě Nyɔsoa jlǐh i̍. Jɛ wlu̍ ɛ̀ sɔ-a dě nyɔ̍ wɔ̍ɔ̍n-ɛ, ɛ̍ bo ɛ̀ nu̍ ɛ̍ wɛ̀ nyɔ̍-a nyni dě Nyɔsoa jlǐh i̍. [

¹⁶Nyɔ̍ ɔ̀ pɔ̀n-a tìh wɔ̌n-ɛ i̍-ɛ, nɛ̀ ɔ̍ po̍-e dounᵻ.]”

¹⁷Wɛ̀ Jusu sɔ dǒ u̍h we̍ iě ɔ̍ mu̍ gbò we̍. Wɛ̀ ɔ̍ kòà tèle ɔ̍ i̍ nɛnǎ la ɛ̍ tìh.

¹⁸Wɛ̀ Jusu la̍a̍ dě u̍h we̍, “Mɔ̀ɔ̍ nɔ̀ɔ̍, mɔ̀ se̍ ɛ̍-ɛ i̍ wɔ̌n ke ae? Mɔ̀ se̍ ɛ̍ juo ka dɛ̍ ɛ̀ mu̍-a dě nyɔ̍ di̍i̍-ɛ, ɛ̍ se̍-a nyɔ̍ dě Nyɔsoa jlǐh i̍ nyni-i mu̍-ɛ ae?

¹⁹Ka i̍h se̍-a dǒ ɔ̍ wlùh kɛ̍n mu̍, wɛ̀ i̍h mu̍-a dě ɔ̍ wùò di̍i̍-ɛ, nɛ̀ i̍h-a mu̍ sɔ̀n sǐ dě ɔ̍ de̍e̍.” Dɛ̍ Jusu-a bla̍-ɛ, ɛ̍ nu̍ di̍-dɛ̍ᵻ kli̍hgbɛ̍ nmɔ jii̍ nyɔ̍ iě i̍h di̍.

²⁰Wɛ̀ ɔ̍ la̍a̍, “Dɛ̍ ɛ̀ sɔ-a dě nyɔ̍ ku̍sɔ̀n-ɛ, ɛ̍ bo ɛ̀ nyni-i nyɔ̍ dě Nyɔsoa jlǐh i̍.

²¹Dɛ̍nu̍ɛ, dǒ nyɔ̍ wlùh kɛ̍n bo dɛ̍ᵻ sɔ̀nᵻ wlùh i̍ naɛ-a sɔ. I̍h bo ìh nu̍-a gbǎn nu̍-ɛ ke, jlǐ-ɛ ke, nyɔ̍ gbe̍ja̍a̍ po̍-ɛ ke, nynɛ̌à nu̍-ɛ ke,

²²klǎn kɔn-ɛ ke, kà kɔn-ɛ ke, gblàa̍ ke, jii̍ ku̍-ɛ ke, wlɛ̀n ke, nyɔ̍-a wlu̍ wɔ̍i̍n nyni-ɛ ke, blɔ̌-ɛ ke, ɛ̍ ke we̍i̍ bo-ɛ ke.

²³Dɛ̍ᵻ sɔ̀nᵻ kli̍hgbɛ̍ la i̍h-a sɔ dě nyɔ̍ di̍i̍, wɛ̀ i̍h-a nu̍ ɛ̍ nyɔ̍-a nyni-e Nyɔsoa jlǐh i̍.”

²⁴Wɛ̀ Jusu wlǔh-i gbààn, iě ɔ̍ mu̍ dě Taiɛ fɔɔ dǒ wlɔ̀ due di̍i̍. Wɛ̀ ɔ̍ nu̍ soɛɛ ɔ̍ pa̍ dě gbò nyɔ̍-ɔ je̍e ɔ̍ jě. Jɛ ɛ̍ kma-a ɔ̍ iě nyɔ̍ jii̍ sìle.

²⁵Dǒ nynɔ̌ due nyna ɔ̍ wɔ̌n ɔ̍ nynɛ̌. Nɛ̀ jeědih nɛ dǒ ɔ̍ jǔ nynɔ̌gbaɔ de̍e̍. Wɛ̀ ɔ̍ ji̍ dǒ Jusu we̍, iě ɔ̍ gbɛ̍n ɔ̍ bu̍hᵻ i̍.

²⁶Nynɔ̌-a chɛ̀ ɔ̍ se̍ Juu nynɔ̌, ɔ̍ sɔ Fɔnisia fɔɔ dě Siwlia bloa̍ kɛ̍n. Wɛ̀ ɔ̍ ba̍le Jusu ɔ̍ iě ɔ̍ jǔ jeědih de̍e̍ sà.

²⁷Jɛ Jusu la̍a̍ dě ɔ̍ we̍, “Bɔ̌, nynuu̍plìh bo ùh iě di̍-dɛ̍ jě ke sàǐtòò. Ɛ̍ se̍ i̍ slɛ̌ nyɔ̍ iě nynuu̍plìh-a di̍-dɛ̍ᵻ dǒ gbèᵻ jǔ i̍ wèla.”

²⁸Wɛ̀ ɔ̍ la̍a̍, “I̍i̍n, nyɔ̍ klaa, kǎ ɛ̍ nɛ, jɛ gbèᵻá chɛ̀ pò i̍h nɛ dě teble̍ sɔ̀n-ɛ, nɛ̀ i̍h-a di̍ nynuu̍plìh-a di̍h gbàɛ̀ nɔ̀ɔ̍.”

²⁹Wɛ̀ Jusu la̍a̍ dě ɔ̍ we̍, “Ka ìn nu̍-a ǎn wlu̍ la pɔ̀n we̍ sà-aɛ, ɛ̍ po̍ ǐn gbǐh. Ɛ̍ tìh-ɛ, mu̍ gbò we̍ ìè àn jǔ jě, jeědih sɔ dǒ ɔ̍ de̍e̍ wɛ̀.”

³⁰Nynɔ̌ iě-a gbò we̍ mu̍-ɛ, taǐntain, nɛ̀ jeědih sɔ dǒ ɔ̍ jǔ de̍e̍ wɛ̀. Nɛ̀ ɔ̍ pɛ̌n i̍ dǒ bèe̍ kɛ̍n.

³¹Wɛ̀ Jusu sɔ dě Taiɛ fɔɔ, iě ɔ̍ jii dě Saidɔn ke bloa̍ blě-a Wlɔ̀ᵻ Pùè-ɛ kɛ̍n. Wɛ̀ ɔ̍ mu̍ dě pɛ̍nu̍ klaa nɛ-a dě Kaladii fɔɔ-ɛ wɔ̍i̍n.

³²Dě-e bo u̍h ja-ɛ jɔ̍gbau due ɔ̀ sǔn-aɛ dǒ ɔ̍ we̍. Ɛ̍ kma-a jɔ̍gbau-a chɛ̀ iě wlu. Wɛ̀ u̍h ba̍le Jusu ɔ̍ iě ɔ̍ sɔ̍n dlǔ tè.

³³Wɛ̀ Jusu sà ɔ̍ dě nyɔ̍ɔ nynɛ̌, iě ɔ̍ chɛn-ɛ ɔ̍ gbɔ̍i̍. Wɛ̀ ɔ̍ gba̍ ɔ̍ chèɛ̀ᵻ dě jɔ̍gbau dounᵻ. Iě ɔ̍ po̍ tɔ̍n kwa̍ i̍, wɛ̀ ɔ̍ tǔh ɔ̍ mɛɔ i̍ dɛ ke.

³⁴Wɛ̀ Jusu gbɛ̀n dě ja̍u̍n we̍, iě ɔ̍ wlǎ flɛ̀n i̍. Wɛ̀ ɔ̍ la̍a̍ dě jɔ̍gbau we̍, “Ɛfata,” ɛ̍ gbɔ̀ nu̍, pɔ̀ni.

³⁵Wɛ̀ ɔ̍ dounᵻ pɔ̀ni, iě ɔ̍ mɛɔ gbàli-ɛ. Sɔ ɔ̍ wlu la̍-ɛ gbài̍gbài̍ sǔh.

³⁶Wɛ̀ Jusu gbɛ̍n-ɛ u̍h wɔ̍i̍n u̍h-u je̍e nyɔ̍-o-nyɔ̍ wlùh sèàɛ̍. Jɛ ka ɔ̍ gbɛ̍n-ɛa u̍h wɔ̍i̍n u̍h-u je̍e-a nyɔ̍ wlùh sèàɛ̍-ɛ, nɛ̀ kǎ u̍h-a dlɛɛ ɛ̍ pɛ̍n nǐ i̍ ke sǔh.

³⁷Sɔ ɛ̍ wlǔh i̍ nyɔ̍ kli̍hgbɛ̍ de̍e̍ kaa̍ka. Iě u̍h la̍a̍, “Jɔ̍gbau la dɛ̍ᵻ kli̍hgbɛ̍ ɔ̍ nu̍-aɛ, i̍h bo ìh nmɔ jii̍. Ɔ̍ nu̍ ɛ̍ sǔn-nyɔ̍-a wɔ̌n i̍, wɛ̀ bo̍bo̍ bei-a wlu.”