Read Western Krahn Maɛ 8 Bible Online

Maɛ 8 - Western Krahn bible

Maɛ 8

¹Ɛ̍ se̍-o wlè wɛ̀ nyɔ̍ tlùgbei̍ duuh gbǎ tàdùè dǒ Jusu we̍. Sɔ dɛ̍ u̍h iě-a di̍-ɛ se̍ nɛ. Wɛ̀ Jusu dǎ ɔ̍ kòà dě ɔ̍ we̍, ɔ̍ la̍a̍,

²“Nyɔ̍ la u̍h-a po̍ ǐn wɔɛ, dɛ̍nu̍ɛ, wǐh ta̍a̍n bo u̍h nu̍ wɛ̀ da̍a ǐn we̍ wɛ̀ u̍h-a di̍-dɛ̍ᵻ wɛ̀ ka.

³Nɛ̀ pò ǐn se̍ u̍h di̍-dɛ̍ nyǐ wɛ̀ iě u̍h de̍ i̍ dbo̍-ɛ, nɛ̀ u̍h-a juh sɔ-a tà tɔ̀ɔ̀n-ɛ, u̍h-a mu̍ jlɛ̌wɛ.”

⁴Wɛ̀ ɔ̍ kòà tèle ɔ̍ i̍, u̍h la̍a̍, “Nɔ̌ kwlǎslò we̍ la tà di̍-dɛ̍-a mu̍-u sɔ wɛ̀ à iě ùh kli̍hgbɛ̍ la nyǐ ɛ?”

⁵Wɛ̀ Jusu la̍a̍, “Blèe̍ gba̍nᵻ tìèwe̍ mɔ̀ blě ɛ?” U̍h la̍a̍, “I̍h nɛ mɛ̀sɔɔ̌n.”

⁶Wɛ̀ Jusu sèàɛ̍ nyɔ̍ tlùgbei̍ laa̍ wlùh u̍h iě i̍ tìèe̍ dǒ bloɔ̍. Wɛ̀ ɔ̍ dǔ blèe̍ gba̍nᵻ mɛ̀sɔɔ̌n laa̍, iě ɔ̍ po̍ Nyɔsoa tlɔ̌ dǒ i̍h we̍. Wɛ̀ ɔ̍ chɛɛn i̍h i̍, iě ɔ̍ nyǐ i̍h ɔ̍ kòà u̍h iě i̍h nyɔ̍ laa̍ jii̍ gblè. Wɛ̀ ɔ̍ kòà gblè i̍h u̍h jii̍.

⁷Nɛ̀ u̍h blě smìi̍ plìh jɔ̌ wei ke, wɛ̀ ɔ̍ po̍ Nyɔsoa tlɔ̌ ke dǒ i̍h we̍. Wɛ̀ ɔ̍ nyǐ i̍h ɔ̍ kòà u̍h iě i̍h u̍h jii̍ gblè ke.

⁸Nyɔ̍ kli̍hgbɛ̍ di̍ dɛ̍ wɛ̀ u̍h dbo̍. Nyɔ̍ ùh di̍-a dɛ̍-ɛ, u̍h bɛ̌ɛ u̍h iě nyɔ̍-a wlǔ nyìɛ̍ (4,000) nu̍. U̍h wɔ̀-aɛ, iě ɔ̍ kòà tɛ̌n blèe̍ chɛblih sie-a i̍-ɛ, wɛ̀ i̍h jǐ taaᵻ mɛ̀sɔɔ̌n.

¹⁰Wɛ̀ Jusu dǔ nyɔ̍ laa̍ de̍ i̍ dbo̍-ɛ. Dǒ ɔ̍ ke ɔ̍ kòà nyna u̍h gbǎ dě blǎgbè di̍i̍. Iě u̍h mu̍ dě Damanuta fɔɔ.

¹¹Wɛ̀ Fɛlesii nyɔ̍ ji̍, iě u̍h-a bɛ̌ɛ Jusu wɔ̍ɔ̍n i̍. U̍h-a pɔ̀n ɔ̍ blu̍ja̍a̍ po̍-ɛ i̍. Ɛ̍ kɔn u̍h la̍ ɔ̍ ji̍ ɔ̍ iě jbaɛdih po̍ pò Nyɔsoa-a gbǐh nɛ dě ɔ̍ ja̍a̍ chɛ̀-ɛ.

¹²Wɛ̀ Jusu wlǎ flɛ̀n i̍, iě ɔ̍ la̍a̍, “Dɛ̍nu̍ ti̍laa nyɔ̍ la u̍h-a pɔ̀n jbaɛdih jě-ɛ i̍ ɛ? Bɔ̌ ǐn sèàɛ̍ mɔ̀ tìh-a taǐn wlùh, nyɔ̍ se̍ jbaɛdih po̍ mu̍ dǒ mɔ̀ we̍.”

¹³Wɛ̀ ɔ̍ sɔ dǒ u̍h we̍ iě ɔ̍ gbǎ dě de̍ blǎgbè di̍i̍, wɛ̀ ɔ̍ tàn, ɔ̍ gbǎ dě pɛ̍nu̍ laa̍ ɛ̍ fɔ̌ dɛɛ we̍.

¹⁴Jusu-a kòà mǎle-e, u̍h se̍ blèe̍ dɔu gba̍ iě ɔ̍ ke u̍h gbǎ dě blǎgbè di̍i̍. Jɛ nɛ̀ u̍h blě gba̍n due gbài̍.

¹⁵Wɛ̀ Jusu-a tù u̍h slɛ̌n, ɔ̍ la̍a̍, “Mɔ̀ tù mɔ̀-a chɛ̀ jlǐhɛ̍. Mɔ̀ nu̍ nɛnɛ̌ dǒ Fɛlesii nyɔ̍ ke Blǔh Baa Ɛlo-a blèe̍ fù-i dɛ̍ᵻ we̍.”

¹⁶Sɔ u̍h-a sǔh-a pu̍e̍e ɛ̍ la̍-ɛ sǔh, u̍h la̍a̍, “À se̍ blèe̍ dɔu ja dɛbo ɛ̍ kɔn ɔ̍ bla̍ dɛ̍ la.”

¹⁷Sɔ Jusu juo dɛ̍ u̍h-a sà-aɛ, iě ɔ̍ la̍a̍, “Dɛ̍ kɔn se̍ blèe̍ dɔu ja tìh mɔ̀-a pu̍e̍e ɛ? Mɔ̀ se̍-o dɛ̍ i̍ juo ɛɛ, àe̍e̍ mɔ̀-ɔ wɔ̌n dɛ̍ɛ̍ i̍ ke̍ ae? Tìh-a dlɔ̍ dě mɔ̀ dounᵻ ae?

¹⁸Mɔ̀ blě jlǐh wɛ̀ mɔ̀-ɔ jě i̍, iě mɔ̀ blě dounᵻ wɛ̀ mɔ̀-ɔ wɔ̌n i̍.

¹⁹Ti̍ iě-a blèe̍ gba̍nᵻ m̀m̌ laa̍ i̍ chɛɛn dǒ nyɔ̍-a wlǔ m̀m̌ (5,000) we̍-ɛ, i̍h se̍ dǒ mɔ̀ wlì i̍ sǐ ae? Ìh u̍h seaɛ-aɛ, mɔ̀ wɔ̀-a i̍h tɛ̌n-ɛ, taaᵻ tìèwe̍ bo mɔ̀ jǐ-i dǒ i̍h-a chɛblih we̍ ɛ?” U̍h la̍a̍, “Pùè jɔ̌ sɔɔ̌n bo.”

²⁰Iě ɔ̍ la̍a̍, “Iě-a gba̍nᵻ mɛ̀sɔɔ̌n i̍ chɛɛn dǒ nyɔ̍-a wlǔ nyìɛ̍ (4,000) we̍-ɛ, ìh u̍h seaɛ-aɛ, mɔ̀ wɔ̀-a i̍h tɛ̌n-ɛ, taaᵻ tìèwe̍ bo mɔ̀ jǐ-i dǒ i̍h-a chɛblih we̍ ɛ?” U̍h la̍a̍, “Mɛ̀sɔɔ̌n bo.”

²¹Wɛ̀ Jusu la̍a̍, “Mɔ̀ se̍ dɛ̍ɛ̍ i̍ wɔ̌n ke̍ sǔh ae?”

²²Ti̍ Jusu bei mu̍-a dǒ Bɛseida wlɔ̀ di̍i̍-ɛ, wɛ̀ nyɔ̍gbei ja dɔ̌-nyɔ̍ dǒ ɔ̍ we̍. Iě u̍h ba̍le ɔ̍, ɔ̍ iě ɔ̍ sɔ̍n dlǔ tè.

²³Wɛ̀ ɔ̍ gbɛ̍n jɔ̍gbau laa̍ ɔ̍ sɔ̍n i̍, iě ɔ̍ gbǎ-ɛ ɔ̍ dě wìè-i. Wɛ̀ ɔ̍ wla̍n tɔ̍n dě ɔ̍ jlǐh, iě ɔ̍ tè ɔ̍ sɔ̍n dlǔ. Wɛ̀ Jusu la̍a̍, “Àn jě i̍ ae?”

²⁴Wɛ̀ ɔ̍ gbèɛ̀ɛ̍n i̍, iě ɔ̍ la̍a̍, “Ǎn jě nyɔ̍, jɛ nɛ̀ ka tu̍ᵻá na-ɛ.”

²⁵Wɛ̀ ɔ̍ tè ɔ̍ sɔ̍n jlǐh kɛ̍ɛ̍n dɛ. Ɔ̍ wlò-a jlǐh i̍-ɛ, iě i̍h pɔ̀ni. Sɔ ɔ̍ jě la̍ dɛ̍ᵻ kli̍hgbɛ̍ jii̍ sǔh.

²⁶Wɛ̀ Jusu la̍a̍, “Sɔ-ɔ ìè ìn blǐ mu̍, jɛ bɔ̌ dǒ de̍ wlɔ̀ paɛ-ɛ.”

²⁷Wlɔ̀ᵻ ìh nɛ-a Sɛsewlia Felepai wlɔ̀ de̍e̍ i̍-ɛ, ti̍ Jusu ke ɔ̍ kòà-a mu̍-a i̍h di̍i̍ i̍-ɛ, wɛ̀ ɔ̍ tèle u̍h i̍ dǒ wìè-i, ɔ̍ la̍a̍, “Nyɔ̍gbei la̍ mɔ̍ nyɔ̍we̍ ɛ?”

²⁸U̍h la̍a̍, “Nyɔ̍ duuh la̍ mɔ̀ Chɔɔn ɔ̀ po̍-a nyɔ̍ nǐ dlǔ-ɛ. Iě duuh la̍ mɔ̀ Ilaɛja, wɛ̀ duuh la̍ mɔ̀ Nyɔsoa-a tu̍owli po̍ nyɔ̍-a due.”

²⁹Jusu la̍a̍, “À wɔ̌n dě mɔ̀ we̍ ke, mɔ̀ la̍ mɔ̍ nyɔ̍we̍ ke ɛ?” Pitɛ la̍a̍, “Mɔ̀ Nyɔsoa-a Chèɛ̀ Tba̍ju.”

³⁰Wɛ̀ Jusu gbɛ̍n-ɛ u̍h wɔ̍i̍n, ɔ̍ la̍a̍, “Kǎ ǐn nu̍-a Chèɛ̀ Tba̍ju-ɛ, mɔ̀ bɔ̌ nyɔ̍ dɔɔ wlùh sèàɛ̍ o.”

³¹Ɛ̍ nu̍ ti̍ due wɛ̀ Jusu po̍ ɔ̍ kòà nǎ. Ɔ̍ la̍a̍, “Nyi̍ɔ̍-a Jǔ kɔn ɔ̍ iě jua̍i̍ sàɛ̀ dɛ̍blɔ, wɛ̀ nyɔ̍ klaaᵻ ke, Nyɔsoa-a slaǎ sà nyɔ̍ klaaᵻ ke telě nǎ poe nyɔ̍ iě ɔ̍ chla tba̍. Nɛ̀ ɔ̍ mu̍ dbǎ-ɛ, jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”

³²Ɔ̍ flɔn-ɛ ɛ̍ we̍i̍ te̍gbe̍i̍n dě u̍h we̍. Wɛ̀ Pitɛ gbaɛ ɔ̍ fɔ̌-i, iě ɔ̍ la̍a̍, “Bɔ̌ à wɔ̌n i̍.”

³³Wɛ̀ Jusu fèàɛ̀, iě ɔ̍ gbɛ̀n ɔ̍ kòà ja̍, wɛ̀ ɔ̍ bla̍ Pitɛ wlu̍ wɔ̍ɔ̍n. Ɔ̍ la̍a̍, “Pitɛ, mɔ̀ Setɔn, sɔ da̍a ǐn jua̍a̍ i̍. Ìn se̍ Nyɔsoa wlùh blě, kmɔ̌ nyɔ̍-a wlùh bo ìn blě.”

³⁴Wɛ̀ Jusu dǎ nyɔ̍ tlùgbei̍ laa̍ ke ɔ̍ kòà dǒ ɔ̍ we̍. Iě ɔ̍ la̍a̍ dě u̍h we̍, “Pò nyɔ̍-o-nyɔ̍ ja̍ pɔ̀n ɔ̍ iě dǒ ǐn de̍e̍ gbǎ-ɛ, nɛ̀ ɔ̍ tǎli ɔ̍ chɛ̀-a wlùh gbɛ̍n dɛ̍ᵻ i̍, ɔ̍ iě ɔ̍ naɛ gbàɛ̍ kɛ̍n i̍ tu̍-u dǔ, wɛ̀ ɔ̍ iě dǒ ǐn de̍e̍ gbǎ.

³⁵Dɛ̍nu̍ɛ, nyɔ̍ jɔ pɔ̀n-a ɔ̍ feɛ sèìe-ɛ i̍-ɛ, nɛ̀ ɛ̍ mu̍ ɔ̍ kwa̍ mǎ-ɛ. Jɛ nyɔ̍ jɔ se̍-a ɔ̍ feɛ sèìe mu̍ ǐn ke pɔ̀n chɛ̀-a tìh-ɛ, nɛ̀ ɔ̍ mu̍ ɛ̍ pǔh-i.

³⁶Pò nyɔ̍ blě dɛ̍ᵻ kli̍hgbɛ̍ da̍a kmɔ̌ la we̍ wɛ̀ ɔ̍ iě ɔ̍ feɛ mǎ-ɛɛ, nɛ̀ dɛ̍ ɛ̍ mu̍ ɔ̍-o po̍ ɛ?

³⁷Nɛ̀ dɛ̍ dɛɛ se̍ dǒ de̍ nɛ ɔ̍ iě to wɛ̀ ɔ̍ iě ɔ̍ feɛ de̍ jě.

³⁸Nyɔ̍-o-nyɔ̍ ɔ̀ mu̍-a ǐn ke ǎn nǎ poe wlu̍ tɛ̀n i̍ ple̍-e da̍a Nyɔsoa wɔ̍n blaɛ ke gblɛ̍n sɔ̀ɛ̀n kmɔ̌ la di̍i̍-ɛ, nɛ̀ ti̍ Nyi̍ɔ̍-a Jǔ ke Nyɔsoa-a ǐnchɔ̀-a mu̍-a ji̍ dě ɔ̍ Baa-a tìh-a i̍ bɛ̌-ɛ di̍i̍-ɛ, nɛ̀ ɔ̍ mu̍ nyɔ̍ laa̍ tɛ̀n i̍ ple̍-e ke.”