Read Western Krahn Maɛ 9 Bible Online

Maɛ 9 - Western Krahn bible

Maɛ 9

¹Wɛ̀ ɔ̍ la̍a̍ dě u̍h we̍, “Tìh-a taǐn ǎn sèàɛ̍ mɔ̀ wlùh, nyɔ̍ duuh nyna i̍ da̍a u̍h se̍ mɛ̌ mu̍ te̍e̍ wɛ̀ u̍h iě Nyɔsoa-a kmɔ̌ wlu̍ i̍ kɔn-ɛa ji̍ la̍ jě dǒ gbǐh we̍.”

²Wǐh mɛ̀o̍ sì-aɛ, wɛ̀ Jusu dǔ Pitɛ ke, Chiin ke Chɔɔn, iě ɔ̍ gba̍ u̍h dě tlu̍h tɔ̀ɔ̀n due kɛ̍n. Dě u̍h-a sǔh nɛ, wɛ̀ ɔ̍ sàɛ̀ dǒ u̍h jlǐhwai.

³Nɛ̀ ɔ̍ jlii̍ nɛ pɔ̀ɔ̀, wɛ̀ i̍h-a po̍ slaɛn. Ɛ̀ i̍h nu̍-a plǔ-ɛɛ, nyɔ̍ se̍ ɛ̍ we̍ dɛ̍ wɔ̍lɔ-ɛ bɛ̌ɛ da̍a kmɔ̌ la we̍.

⁴Dǒ u̍h jě-e Ilaɛja ke Mose, nɛ̀ u̍h ke Jusu-a chɛ̍n sɔ̀ìn.

⁵Wɛ̀ Pitɛ la̍a̍ dě Jusu we̍, “Dlǔtu, ɛ̍ nmɔ jii̍ wɛ̀ à nɛ da̍a. Bɔ̌ à po̍ wɛ̀ɛ̀ sɔ̍n wlù ta̍a̍n, ìn kɔn due, Mose kɔn due, nɛ̀ Ilaɛja kɔn due.”

⁶Ɛ̍ wa̍ u̍h dɛ̍we̍ kaa̍, sɔ dɛ̍ ɔ̍ iě-a bla̍-ɛ, ɔ̍ se̍ ɛ̍ juo.

⁷Wɛ̀ nǐgban ji̍ iě ɛ̍ kaɛn dǒ u̍h dlǔwèàì. Dǒ wlu̍ sɔ-ɛ dě ɛ̍ di̍i̍, ɛ̍ la̍a̍, “Ɔ̀ la ǎn tìh kma Jǔ bo. Mɔ̀ tù ɔ̍ wlu̍ dounᵻ.”

⁸U̍h gbèɛ̀ɛ̍n-a i̍ u̍h iě-a kli dǎ-a, nɛ̀ u̍h-u jě nyɔ̍ dɔɔ dɛ dǒ u̍h we̍. Nɛ̀ Jusu nɛ due bo u̍h-a jě la̍.

⁹Ti̍ u̍h-a sɔ-a la̍ dě tlu̍h kɛ̍n-ɛ, wɛ̀ Jusu gbɛ̍n-ɛ u̍h wɔ̍i̍n, ɔ̍ la̍a̍, “Dɛ̍ mɔ̀ jě-a tiɔ-ɛ, mɔ̀ bɔ̌ nyɔ̍ dɔɔ wlùh sèàɛ̍ te̍e̍ wɛ̀ Nyi̍ɔ̍-a Jǔ iě-e wlǔh o.”

¹⁰U̍h nu̍ ɔ̍ wlu̍ laa̍, jɛ nɛ̀ u̍h-a pu̍e̍e ɛ̍ wlùh i̍, u̍h la̍a̍, “Dě-e wlǔh tìh ɔ̍ sà-aɛ, ɛ̍ gbɔ̀-a nynɛ̌ ɛ?”

¹¹Wɛ̀ u̍h tèle ɔ̍ i̍, u̍h la̍a̍, “Dɛ̍nu̍ telě nǎ poe nyɔ̍ la̍ Ilaɛja bo ɔ̀ kɔn ɔ̀ iě ji̍ sàì ɛ?”

¹²Wɛ̀ Jusu sà u̍h-a wlu̍ pɔ̀n we̍, ɔ̍ la̍a̍, “Ilaɛja-a mu̍ ji̍ sàǐtòò wɛ̀ ɔ̍ iě dɛ̍ᵻ kli̍hgbɛ̍ gba̍a̍ po̍. Jɛ dɛ̍ bo ɛ̀ nu̍ ɛ̍ wɛ̀ Nyɔsoa-a wlu̍ la̍ Nyi̍ɔ̍-a Jǔ-a mu̍ jua̍i̍ sàɛ̀ dɛ̍ dɔu wɛ̀ ɔ̍ iě chla tba̍-ɛ ɛ?

¹³Jɛ ǎn sèàɛ̍ mɔ̀ wlùh, Ilaɛja ji̍ wɛ̀, iě u̍h nu̍ ɔ̍ kà i̍ ka u̍h-a pɔ̀n-a u̍h iě-a ɔ̍ kà i̍ nu̍-ɛ nu̍-ɛ. Kǎ ɛ̍ nu̍ chlǐh-ɛ gbɛɛ dě Nyɔsoa-a wlu̍ di̍i̍ dǒ ɔ̍ pùn.”

¹⁴Ti̍ Jusu bei-a ji̍-a kòà juh laa̍ nynɛ̌ gbǎ la̍ dode̍-ɛ, dǒ u̍h jě-e nyɔ̍ tlùgbei̍ nɛ̀ u̍h dlɛ̌ u̍h. Nɛ̀ u̍h ke telě nǎ poe nyɔ̍-a sà wɔ̍ɔ̍n i̍.

¹⁵Dǒ u̍h nɛ wɛ̀ u̍h jě Jusu bei. Sɔ ɛ̍ kèle u̍h i̍ kaa̍. Iě u̍h gba̍ ple̍-ɛ, u̍h po̍ ɔ̍ wlu̍ i̍.

¹⁶Wɛ̀ Jusu tèle ɔ̍ kòà i̍, ɔ̍ la̍a̍, “Dɛ̍ɛ tìh u̍h ke mɔ̀-a sà wɔ̍ɔ̍n i̍ ɛ?”

¹⁷Jɔ̍gbau due nɛ-a dě nyɔ̍ tlùgbei̍ laa̍ nynɛ̌-ɛ, ɔ̍ la̍a̍, “Dlǔtu, ǎn jǔ jɔ̍gbau bo ǐn ja nɔ̌ ìn we̍. Jeědih nɛ ɔ̍ de̍e̍, ɛ̍ nu̍ ɛ̍ ɔ̍-ɔ wlu.

¹⁸Pò ɛ̍ sǐ ɔ̍ kɛ̍n-ɛ, nɛ̀ ɛ̍ kà ɔ̍ i̍ dǒ bloɔ̍. Nɛ̀ ɔ̍ slɛ̌ɛ tàɔn, wɛ̀ fùǔ-a tè ɔ̍ wɔ̍i̍n, iě ɔ̍ di̍ nynɛ̌ kìàǎnkìàǎn. Wɛ̀ ǐn ba̍le àn kòà u̍h iě ɔ̍ jeědih la de̍e̍ sà, jɛ u̍h se̍ ɛ̍ bɛ̌ɛ.”

¹⁹Wɛ̀ Jusu la̍a̍ dě u̍h we̍, “Mɔ̀ɔ̍ ti̍laa nyɔ̍ la, mɔ̀ se̍ wlùh gbaɛ blě. Ti̍ tìèwe̍ iě da̍a mɔ̀ we̍ nu̍ ke̍ gbɔ̀ɔ ɛ? Ka iě mɔ̀-a tìh nu̍ ɛ? Mɔ̀ ja jǔwɛ laa̍ nɔ̌ ǐn we̍.”

²⁰Wɛ̀ u̍h gba̍ ɔ̍ dě ɔ̍ we̍. Jeědih tba̍-a Jusu jlǐhɛ̍ ka-ɛ, sɔ ɛ̍ sǐ jǔ laa̍ sǔh. Wɛ̀ ɔ̍ kà i̍ dǒ bloɔ̍ ɔ̍ sue-e. Nɛ̀ fùǔ tè ɔ̍ wɔ̍i̍n bɔuu.

²¹Wɛ̀ Jusu la̍a̍ dě ɔ̍ baa we̍, “Ti̍ tìèwe̍ ɛ̍ nu̍ wɛ̀ dǒ ɔ̍ pùn ɛ?” Ɔ̍ baa la̍a̍, “Ɛ̍ ke ɔ̍ sɔ dě jǔwɛ blǐ.

²²Ɛ̍ pɔ̀n ǎn jǔ la dbǎ-a i̍, dɛ̍nu̍ɛ, ɛ̍ po̍ ɔ̍ dě jlǐh ke dě niɔ̍ chɛ̍chɛ̍. Pò ìn bɛ̌ɛ ɛ̍ nu̍-ɛɛ, nɛ̀ ìn jě à wɔɛ ìè à we̍ gbǎ.”

²³Jusu la̍a̍, “Nàà pò ǐn bɛ̌ɛ ɛ̍ nu̍-ɛ ae? Nyɔ̍ ɔ̀ gbaɛ-a Nyɔsoa wlùh-ɛ, nɛ̀ dɛ̍-o-dɛ̍ se̍ kmu dǒ ɔ̍ we̍.”

²⁴Jusu iě-a chlà-a, jɔ̍gbau wǐ-i kleǐn. Ɔ̍ la̍a̍, “Ǐn blě wlùh gbaɛ-ɛ, jɛ nu̍ ɛ̍, ɛ̍ iě kɛ̍n gbǎ.”

²⁵Jusu gbɛ̀n-a ɛ̍ ja̍-ɛ, sɔ nyɔ̍ dɔu-a gboǎɛ kɛ̍n i̍ kaa̍. Wɛ̀ ɔ̍ wǐi jeědih laa̍ dlǔ i̍, ɔ̍ la̍a̍, “Mɔ̀ jeědih la ɛ̀ nu̍-a bo̍bo̍, ɛ̀ sǔn-aɛ, ǎn sèàɛ̍ ìn wlùh, sɔ dǒ jǔ la de̍e̍. Nɛ̀ ìn bɔ̌ dǒ ɔ̍ de̍e̍ gbǎ-a dɛ kleǐnklein.”

²⁶Wɛ̀ jeědih wǐ, iě ɛ̍ sǐ jǔ laa̍ kàka̍, wɛ̀ ɛ̍ sɔ dǒ ɔ̍ de̍e̍. Sɔ pò ìn jě ɔ̍-ɛ, ka mɛ̌-ɛ kǔ-ɛ. Ɛ̍ kɔn nyɔ̍ dɔu la̍a̍, “Ɔ̍ mɛ̌-ɛ.”

²⁷Jɛ Jusu gbɛ̍n ɔ̍ sɔ̍n i̍, wɛ̀ ɔ̍ dǔ ɔ̍ ja̍i̍, iě ɔ̍ nyna i̍.

²⁸Ti̍ Jusu mu̍-a dě gbò-ɛ, wɛ̀ ɔ̍ kòà chɛn gbɔ̍i̍ iě u̍h tèle ɔ̍ i̍. U̍h la̍a̍, “Dɛ̍nu̍ àɔ̀ nɔ̀ɔ̍, wɛ̀ à se̍ jeědih i̍ nu̍-ɛ bɛ̌ɛ ɛ?”

²⁹Wɛ̀ Jusu la̍a̍ dě u̍h we̍, “Jeědih kaɛn la, ba̍le-ɛ due gbài̍ bo ɛ̀ nu̍ ɛ̍ i̍, dɛ̍ dɛɛ se̍ ɛ̍ bɛ̌ɛ.”

³⁰Wɛ̀ Jusu ke ɔ̍ kòà wlǔh-i gbààn, iě u̍h jii Kaladii fɔɔ. Jɛ ɔ̍ se̍ pɔ̀n nyɔ̍ iě ɔ̍ tìh juo,

³¹dɛ̍nu̍ɛ, nɛ̀ ɔ̍ po̍ ɔ̍ kòà nǎ. Ɔ̍ la̍a̍, “Nyi̍ɔ̍-a Jǔ-a mu̍ kwlǎ sà-ɛ dě nyɔ̍ɔ kwa̍a̍, wɛ̀ u̍h iě ɔ̍ dbǎ. Nɛ̀ pò wǐh ta̍a̍n sì-ɛ, nɛ̀ ɔ̍ mu̍-e wlǔh.”

³²Jɛ dɛ̍ ɔ̍ bla̍-aɛ, u̍h se̍ ɛ̍ i̍ wɔ̌n, iě u̍h-a ple̍ faɔn u̍h iě ɔ̍ i̍ tèle.

³³Wɛ̀ Jusu ke ɔ̍ kòà sǐ dǒ Kepanium i̍. Ti̍ u̍h pa̍-a dě gbò-ɛ, iě Jusu tèle u̍h i̍. Ɔ̍ la̍a̍, “Dɛ̍-ɛ tìh mɔ̀-a pu̍e̍e tiɔ dǒ wìè-i ɛ?”

³⁴Jɛ u̍h nɛ tìi̍n, dɛ̍nu̍ɛ, nyɔ̍ ku̍ wɔ̍n dǒ ɔ̍ ba̍ᵻ kɛ̍n-ɛ tìh bo u̍h pu̍e̍e dǒ wìè-i.

³⁵Wɛ̀ ɔ̍ tè i̍, iě ɔ̍ dǎ kòà-a pùè jɔ̌ sɔɔ̌n laa̍. Wɛ̀ ɔ̍ la̍a̍ dě u̍h we̍, “Pò mɔ̀-a nyɔ̍ ja pɔ̀n ɔ̍ iě nya̍ wɔ̀-ɛ, nɛ̀ ɔ̍ bo ɔ̀ iě nyɔ̍ kli̍hgbɛ̍-a de̍ gbɔ̀ ke pòi̍ju nu̍.”

³⁶Wɛ̀ ɔ̍ dǔ jǔwɛ due-e, iě ɔ̍ gbà ɔ̍ wlì dě u̍h nynɛ̌ we̍. Wɛ̀ ɔ̍ la̍a̍ dě u̍h we̍,

³⁷“Nyɔ̍-o-nyɔ̍ ɔ̀ gbɛ̍n-a jǔwɛ la ɔ̍ tìh i̍ dǒ ǎn nynɛ̌ kɛ̍n-ɛ, nɛ̀ ɔ̍ gbɛ̍n ǎn tìh i̍ wɛ̀ ke. Nɛ̀ nyɔ̍-o-nyɔ̍ ɔ̀ gbɛ̍n-a ǎn tìh i̍-ɛ, nɛ̀ ɛ̍ se̍ ǎn tìh ɔ̍ se̍ i̍ gbɛ̍n, jɛ nɛ̀ nyɔ̍ ɔ̀ dbo̍-a m-ɛ, ɔ̍ kɔn tìh bo ɔ̍ gbɛ̍n i̍ wɛ̀.”

³⁸Wɛ̀ Chɔɔn la̍a̍ dě ɔ̍ we̍, “Dlǔtu, à jě jɔ̍gbau due nɛ̀ ɔ̍ gba̍ àn nynɛ̌, wɛ̀ ɔ̍ sà nyɔ̍ɔ jeědih de̍e̍ i̍. Iě à po̍ ɔ̍ bɔ̌ i̍, dɛ̍nu̍ɛ, ɔ̍ ke à se̍ due nɛ.”

³⁹Wɛ̀ Jusu la̍a̍ dě u̍h we̍, “Mɔ̀ bɔ̌ ɔ̍ bɔ̌ i̍ po̍-ɛ, dɛ̍nu̍ɛ, nyɔ̍ se̍ jbaɛdih po̍-ɛ wɔ̀ mu̍ dǒ ǎn nynɛ̌ kɛ̍n wɛ̀ ɔ̍ iě ǎn tìh sɔ̀nᵻ sà.

⁴⁰Dɛ̍nu̍ɛ, nyɔ̍ ɔ̀ se̍-a à bu̍hᵻ i̍ tbaɛ-ɛ, nɛ̀ ɔ̍ ke à dɛ nɛ due.

⁴¹Tìh-a taǐn ǎn sèàɛ̍ mɔ̀ wlùh, nyɔ̍-o-nyɔ̍ ɔ̀ mu̍-a mɔ̀ nǐ kàu̍n nyǐ mɔ̀-a Klai-a nynɛ̌ gba̍ tìh-ɛ, nɛ̀ ɔ̍ naɛ jě-dɛ̍ se̍ mǎ la̍ kɔn dɛ.

⁴²“Jɛ ùh plìh la ùh gbaɛ-a ǐn wlùh-ɛ, nyɔ̍-o-nyɔ̍ ɔ̀ mu̍-a u̍h-a wlùh fèàɛ̀ dě gblɛ̍n sɔ̀ɛ̀n we̍-ɛ, nɛ̀ ɛ̍ mu̍ i̍ blaɛ u̍h iě nyɔ̍ kaɛn laa̍ dui-sɔɔ̌ dɔ̍ i̍ sa̍n-ɛ, wɛ̀ u̍h iě ɔ̍ jbǒ kɛ̍n po̍.

⁴³Ɛ̍ tìh pò àn sɔ̍n ja pɔ̀n ìè wlùh gbaɛ-ɛ i̍ tǎli-ɛ, nɛ̀ ìn chɛ̍n ɛ̍ i̍. Ɛ̍ nmɔ jii̍ ìè àn dalǔh due mǎ-ɛ, wɛ̀ ìè kmɔ̌ sie feɛ jě, ɛ̍ sìì àn sɔ̍nᵻ kli̍hgbɛ̍ gbà i̍, wɛ̀ ìn mu̍ dě kàn nɛ̍ di̍i̍, [

⁴⁴tà ‘chai̍n nɛ-a, i̍h se̍-a mɛ̌ la̍ kɔn, iě nɛ̍ nɛ-a deě-ɛ, ɛ̍ se̍-a mɔ̌ la̍ kɔn-ɛ’].

⁴⁵Nɛ̀ pò àn bu̍h ja pɔ̀n ìè wlùh gbaɛ-ɛ i̍ tǎli-ɛ, nɛ̀ ìn chɛ̍n ɛ̍ i̍. Ɛ̍ nmɔ jii̍ ìè i̍ kɔ̌, wɛ̀ ìè kmɔ̌ sie feɛ jě, ɛ̍ sìì àn bu̍hᵻ gbà i̍, wɛ̀ ìn mu̍ dě kàn nɛ̍ di̍i̍, [

⁴⁶tà ‘chai̍n nɛ-a, i̍h se̍-a mɛ̌ la̍ kɔn, iě nɛ̍ nɛ-a deě-ɛ, ɛ̍ se̍-a mɔ̌ la̍ kɔn-ɛ’].

⁴⁷Nɛ̀ pò àn jlǐhɛ̍ ja pɔ̀n ìè wlùh gbaɛ-ɛ i̍ tǎli-ɛ, nɛ̀ ìn sà ɛ̍ kɔ̌n-ɔ. Ɛ̍ nmɔ jii̍ ìè jlǐhɛ̍ due blě, wɛ̀ ìè dě Nyɔsoa-a kmɔ̌ wlu̍ i̍ kɔn-ɛ di̍i̍ nɛ, ɛ̍ sìì àn jlǐh gbà i̍ wɛ̀ ìn gbǎ dě kàn nɛ̍ di̍i̍,

⁴⁸tà ‘chai̍n nɛ-a, i̍h se̍-a mɛ̌ la̍ kɔn, iě nɛ̍ nɛ-a deě-ɛ, ɛ̍ se̍-a mɔ̌ la̍ kɔn-ɛ.’

⁴⁹“Nɛ̍ bo ɛ̀ mu̍ nyɔ̍ kli̍hgbɛ̍ mlɔ̌ i̍ wɔ̀, ka tɔ̌n-a wɔ̀ slaǎ sà-ɛ dɛ̍ mlɔ̌ i̍-ɛ.

⁵⁰“Tɔ̌n nmɔ jii̍, jɛ pò ɛ̍ wɛ̀ wɔ̍n-ɛ, nɛ̀ nyɔ̍ se̍ ɛ̍ wɔ̍n nmɔ-ɛ bɛ̌ɛ dɛ. “Ɛ̍ tìh-ɛ, mɔ̀ blě tɔ̌n dě mɔ̀-a chɛ̀ ja̍a̍, iě wlùh-a i̍ tè-ɛ iě dǒ mɔ̀ nynɛ̌ nɛ.”