Read Western Krahn Luu 1 Bible Online

Luu 1 - Western Krahn bible

Luu 1

¹Ǎn jbɛɛ nyɔ̍ Tiɔfelɔ, nyɔ̍ dɔu fɔ̀n dɛ̍ we̍ wɛ̀ u̍h chlǐh dɛ̍ᵻ ìh gbǎ-a dě à nynɛ̌ we̍-ɛ.

²Nyɔ̍ ùh jě-a ìh la sɔ dě i̍h-a gbɔ̀ tè la̍-ɛ, iě u̍h bla̍-a Nyɔsoa-a pɔ̀n chɛ̀-ɛ, ìh kɔn taǐn u̍h sèàɛ̍-a àɔ̀ wlùh-ɛ, i̍h bo nyɔ̍ dɔu laa̍ u̍h chlǐh.

³Jɔ̍pòo̍ Tiɔfelɔ, dɛ̍ᵻ kli̍hgbɛ̍ ìh sɔ-a dě ìh la i̍h-a gbɔ̀ tè la̍-ɛ, ka ǐn juo-a i̍h-a gbɔ̀ wɛ̀-ɛ, nɛ̀ ɛ̍ mu̍ jii̍ nmɔ ka i̍h nu̍-a nɛ-ɛ iě i̍h-a taǐn chlǐh ke dǒ ìn we̍.

⁴Ǎn chlǐh ìh la̍ wɛ̀ dɛ̍ᵻ u̍h poe-a ìn nǎ-ɛ, ìè i̍h-a gblangbai̍ wɔ̌n.

⁵Ti̍ Ɛlo nu̍-a blǔh baa dě Judia bloa̍ kɛ̍n-ɛ, nɛ̀ u̍h blě Nyɔsoa-a slaǎ sà nyɔ̍ due, ɔ̍ nynɛ̌ bo Sɛɛkewlaɛɔ. Ɔ̍ sɔ dě Abaija-a slaǎ sà chɛǐ, wɛ̀ Ewlɔn-a jǔ Ilesebɛ nu̍ ɔ̍ nynɔ̌.

⁶U̍h nɛ-a sɔɔ̌n-ɛ, u̍h-a nu̍-dɛ̍ slɛ̌ i̍ dě Nyɔsoa jlǐh. U̍h-a tè-o Joi-a telě kli̍hgbɛ̍ i̍.

⁷Jɛ u̍h se̍ jǔ blě. Dɛ̍nu̍ɛ, Ilesebɛ sie slàmàɛ̀, wɛ̀ u̍h nɛ-a sɔɔ̌n-ɛ u̍h nɛ̍.

⁸Ti̍ ɛ̍ nu̍-a Sɛɛkewlaɛɔ naɛ dbo̍ nu̍ ti̍ dě Nyɔsoa-a gbò sɔ̀n-ɛ, iě ɔ̍ mu̍ ɛ̍ nu̍ la̍-a.

⁹Dɛ̍nu̍ɛ, u̍h tèle-a dɛ̍ i̍-ɛ, sɔ ɔ̍-ɔ bo wǐh jɛɛ ɔ̍ iě dě Joi-a slaǎ sà gbò sɔ̀n mu̍ ɔ̍ iě nɔ̌-dɛ̍ᵻ fɔ̍n.

¹⁰Wɛ̀ nyɔ̍ tlùgbei̍-a ba̍le nɔ̌ sɔ̀n ti̍ ɔ̍ fɔ̍n-a nɔ̌-dɛ̍ᵻɛ́.

¹¹Wɛ̀ Joi-a ǐnchɔ̀ wlǔh-i ɔ̍ i̍. Nɛ̀ ǐnchɔ̀ nyna i̍ dǒ nɔ̌-dɛ̍ᵻ kɛ̍n fɔ̍n-ɛ gblǒ-a di̍na̍ we̍.

¹²Sɛɛkewlaɛɔ jě-a ɛ̍-ɛ, sɔ ɛ̍ wa̍ ɔ̍ dɛ̍ we̍, iě faɔn-a nu̍ ɔ̍.

¹³Jɛ Joi-a ǐnchɔ̀ la̍a̍ dě ɔ̍ we̍, “Sɛɛkewlaɛɔ, bɔ̌ faɔn ple̍-ɛ. Nyɔsoa wɔ̌n àn ba̍le wlu̍ wɛ̀. Àn nynɔ̌ Ilesebɛ-a mu̍ jɔ̍gbau jǔ wlǔh-i dǒ ìn we̍, nɛ̀ ìn dǎɛ ɔ̍ Chɔɔn.

¹⁴Wɛ̀ ìè nmɔ ìè mɔna̍ nu̍, nɛ̀ nyɔ̍ dɔu-a mu̍ ɔ̍ wlǔh tìh-a mɔna̍ nu̍.

¹⁵Ɔ̍ mu̍ wɔ̍n ku̍ nyɔ̍ nu̍ dǒ Joi we̍. Ɔ̍ bɔ̌ nmɔ̍ nǎ-a, nɛ̀ ɔ̍ bɔ̌ nyɔ̍ nu̍-dɛ̍ᵻ kli̍hgbɛ̍ nǎ-a ke. Sɔ dě ɔ̍ wlǔh la̍-ɛ, Nyɔsoa-a Sùù-a mu̍ ɔ̍ i̍ jǐi.

¹⁶Nɛ̀ ɔ̍ mu̍ Eslɔɛ nynuu̍ dɔu i̍ bǐi dě u̍h-a Joi Nyɔsoa we̍.

¹⁷Ɔ̍ mu̍ Joi jǔ mu̍ wɛ̀ ɔ̍ iě kmu-u gbǐh blě ke ka Nyɔsoa-a tu̍owli po̍ nyɔ̍ Ilaɛja-ɛ, wɛ̀ ɔ̍ iě baaᵻá wlùh i̍ bǐi dě u̍h-a nynuu̍ we̍. Nɛ̀ ɔ̍ mu̍ ɛ̍ nu̍ nyɔ̍ wɔ̍n blaɛ nyɔ̍ iě i̍ slɛ̌-nyɔ̍-a flɔ̍nwlùh blě. Ɔ̍ mu̍ Joi-a nyɔ̍ gba̍a̍ po̍ dǒ ɔ̍ we̍.”

¹⁸Wɛ̀ Sɛɛkewlaɛɔ la̍a̍ dě Joi-a ǐnchɔ̀ we̍, “Pò ɛ̀ la ɛ̍ ja nɛ mu̍-ɛ, nɛ̀ ka ǎn mu̍-o dɛ̍ i̍ juo-ɛ nu̍ ɛ? Dɛ̍nu̍ɛ, ǐn nu̍ taɔju, iě ǎn nynɔ̌ nɛ̍ wɛ̀ ke.”

¹⁹Wɛ̀ Joi-a ǐnchɔ̀ sà ɔ̍ wlu̍ pɔ̀n we̍, ɛ̍ la̍a̍, “Mɔ̍ Keblɛ, ǐn nyna i̍ dǒ Nyɔsoa jǔ. Ɔ̍ dbo̍ m iě wlu dě ìn we̍, iě ìn pɔ̀n chɛ̀ la wlùh sèàɛ̍.

²⁰Jɛ ka ìn se̍-a ǎn wlu̍ tìh chɛ̀ po̍-ɛ, nɛ̀ àn mu̍ bo̍bo̍ nu̍ te̍e̍ wɛ̀ àn jǔ iě wlǔh, iě dɛ̍ ǐn dǎ-aɛ ɛ̍ iě nɛ dǒ ti̍-a taǐn di̍i̍.”

²¹Nɛ̀ nyɔ̍gbei laa̍ u̍h-a fuo-e Sɛɛkewlaɛɔ. Sɔ dɛ̍ ɔ̍ nu̍-a dě slaǎ sà gbò sɔ̀n wlè-ɛ wɛ̀-ɛ, ɛ̍ gbe-e u̍h di̍i̍ i̍.

²²Ti̍ ɔ̍ sǐ-a sɔ̀n-ɛ, ɔ̍ se̍ dě u̍h we̍ wlu-ɛ bɛ̌ɛ. Sɔ u̍h juo-o dɛ̍ i̍ ka ɔ̍ ja-a se̍ mɔ̌ ja̍ dě slaǎ sà gbò sɔ̀n-ɛ. Nɛ̀ ɔ̍ se̍ wlu-ɛ bɛ̌ɛ, sɔ sɔ̍nᵻ po̍-ɛ bo ɛ̀ nu̍ ɔ̍ wlu-ɛ.

²³Ti̍ ɔ̍ dbo̍ nu̍ ti̍ chlà-a dlǔ i̍-ɛ, wɛ̀ ɔ̍ mu̍ dě ɔ̍ blǐ gbò.

²⁴Ti̍ gbɔ̍ sì-aɛ, wɛ̀ ɔ̍ nynɔ̌ Ilesebɛ nɛ kwlǐ. Iě ɔ̍ se̍ sɔ̀n sǐ dǒ chǔhᵻ m̀m̌ di̍i̍.

²⁵Wɛ̀ Ilesebɛ la̍a̍, “Joi se̍ ǎn tìh we̍ mǎle, ɛ̍ kɔn ɔ̍ nu̍ ǐn wlùh we̍ nɔ̌ nya̍. Wɛ̀ ɔ̍ sà ǐn tɛ̀n jii̍ nɔ̌ ǐn ba̍ᵻ nynɛ̌.”

²⁶Ilesebɛ-a kwlǐ nu̍ chǔhᵻ mɛ̀o̍ sǔh, wɛ̀ Nyɔsoa dbo̍ ɔ̍ ǐnchɔ̀ Keblɛ dě Kaladii bloa̍ kɛ̍n dǒ Naaslɔɛ wlɔ̀ di̍i̍.

²⁷Wɛ̀ ɛ̍ mu̍ dě jǔ nynɔ̌nyaa ɔ̀ se̍-a dɛ̍ i̍ juo-ɛ we̍, ɔ̍ nynɛ̌ bo Mɛle. Ɔ̍-ɔ laa̍, nɛ̀ Depe-a tloemlai Josɛ bo ɔ̀ tù ɔ̍ sɛ̌ dlǔ.

²⁸Wɛ̀ Nyɔsoa-a ǐnchɔ̀ ji̍ dǒ ɔ̍ we̍. Iě ɛ̍ la̍a̍, “Wlùh-a i̍ tè-ɛ dǒ ìn we̍. Joi nɛ ìn we̍ iě ɔ̍ nyǐ ìn pɔ̀ìě klaa.”

²⁹Sɔ ɛ̍ gbe-e dě Mɛle di̍i̍ i̍ kaa̍, iě ɔ̍ pu̍e̍e wlùh i̍. Ɔ̍ la̍ nɛ̀ nyɔ̍ nyinɔ̍ i̍ sà-a kaɛn la, ɛ̍ gbɔ̀-a nynɛ̌ ɛ wèè.

³⁰Iě Nyɔsoa-a ǐnchɔ̀ la̍a̍, “Bɔ̌ faɔn ple̍-ɛ, dɛ̍nu̍ɛ, àn tè-e Nyɔsoa-a wlùh i̍.

³¹Àn mu̍ sùù kɛ̍n nɛ, wɛ̀ ìè jɔ̍gbau jǔ wlǔh-i. Nɛ̀ ìn dǎɛ ɔ̍ Jusu.

³²Ɔ̍ mu̍ wɔ̍n ku̍, wɛ̀ nyɔ̍gbei iě ɔ̍ Sìì Nyɔ̍ Wɔ̍n Nyɔsoa-a Jǔ dǎɛ. Nɛ̀ Joi Nyɔsoa-a mu̍ ɔ̍ blǔh baa we̍ i̍ nu̍ dǒ ɔ̍ baa Depe wɔ̀ɔ̀.

³³Nɛ̀ ɔ̍ mu̍ blǔh baa nu̍ dǒ Eslɔɛ nyɔ̍ we̍ nɔ̌ kmɔ̌-a kmɔ̌. Ɔ̍ kmɔ̌ wlu̍ i̍ kɔn-ɛ se̍ siee la̍ kɔn mu̍.”

³⁴Iě Mɛle la̍a̍ dě ǐnchɔ̀ we̍, “Ǐn se̍-a dɛ̍ i̍ juo-ɛ, nɛ̀ ka ɛ̍ mu̍ nɛ-ɛ nu̍ ɛ?”

³⁵Iě ǐnchɔ̀ la̍a̍ dě ɔ̍ we̍, “Nyɔsoa-a Sùù-a mu̍ ìn kɛ̍ɛ̍n ji̍, wɛ̀ Sìì Nyɔ̍ Wɔ̍n Nyɔsoa-a gbǐh iě ìn kɛ̍n nɛ. Ɛ̍ tìh-ɛ, jǔ ɔ̀ mu̍-a wlǔh-ɛ, ɔ̍ mu̍ Nyɔsoa-a Jǔ nu̍, wɛ̀ ɔ̍ iě ɔ̍ jǔ dbee.

³⁶Nu̍ wlùh, àn wloa̍ nyɔ̍ Ilesebɛ ɔ̀ nɛ̍-a wɛ̀-ɛ, ɔ̍ nɛ kwlǐ kaka. Ɔ̀ u̍h la̍ ɔ̀ sie-a slàmàɛ̀ de-ɛ, ɔ̍ kwlǐ-a chǔhᵻ mɛ̀o̍ sèàn.

³⁷Dɛ̍-o-dɛ̍ se̍ kmu dǒ Nyɔsoa we̍.”

³⁸Iě Mɛle la̍a̍, “Mɔ̍ Joi-a pòi̍ju. Ǎn sà nǐ wɔ̍n, ka ìn dǎ-aɛ, ɛ̍ iě laǎn nɛ dǒ ǐn we̍.” Wɛ̀ ǐnchɔ̀ sɔ dǒ ɔ̍ we̍.

³⁹Dǒ wǐh laa̍ di̍i̍ Mɛle tèwe-e, wɛ̀ Judia bloa̍ ɛ̀ blě-a tlu̍hᵻɛ́, ɔ̍ mu̍ dě ɛ̍ kɛ̍n dǒ Ilesebɛ we̍ wlɔ̀. Iě ɔ̍ pa̍ dě Sɛɛkewlaɛɔ blǐ gbò, wɛ̀ ɔ̍ sà Ilesebɛ nyinɔ̍ i̍.

⁴⁰

⁴¹Ilesebɛ wɔ̌n-a Mɛle-a ɔ̍ nyinɔ̍ i̍ sà wlu̍-ɛ, jǔpliɛ nɛ-a dě ɔ̍ di̍i̍-ɛ, sɔ ɔ̍ buǒ mu̍-o ja̍i̍ sǔh, iě Nyɔsoa-a Sùù jǐi Ilesebɛ-ɛ i̍.

⁴²Iě ɔ̍ wǐ, ɔ̍ la̍a̍, “Nyɔsoa nyǐ ìn pɔ̀ìě dě nynɔ̌gbaɔᵻ kli̍hgbɛ̍ nynɛ̌, wɛ̀ ɔ̍ nyǐ jǔ àn mu̍-a wlǔh-iɛ pɔ̀ìě ke.

⁴³Dɛ̍ bo ɛ̀ sà-e ǎn jua̍a̍ wɛ̀ ǎn Joi de̍-a ji̍ nɔ̌ ǐn we̍ i̍ nala ɛ?

⁴⁴Ǐn wɔ̌n-a àn ǐn nyinɔ̍ i̍ sà wlu̍-ɛ, jǔpliɛ nɛ-a dě ǐn di̍i̍-ɛ, ɔ̍ buǒ mu̍-o ja̍i̍ kleǐn dǒ mɔna̍ we̍.

⁴⁵Mɔ̀ nynɔ̌ jɔ Joi wlu-a dě we̍ wɛ̀ ɔ̀ dǎɛ ɛ̍ tìh-ɛ, nɛ̀ ìn nmɔ i̍.”

⁴⁶Iě Mɛle la̍a̍, “Ǎn bɛ̌-ɛ Joi-a nynɛ̌ i̍.

⁴⁷Ǎn nmɔ-ɛ dǒ ǎn Nyɔsoa ɔ̀ nu̍-a ǎn Sèìe Nyɔ̍-ɛ we̍.

⁴⁸Mɔ̍ nu̍-a ɔ̍ plǒai pòi̍ju-ɛ, ɔ̍ se̍ ǎn tìh we̍ mǎle. Sɔ da̍a sèàn blǐ-ɛ, nyɔ̍ kli̍hgbɛ̍-a mu̍ ǐn i̍ nmɔ nynɔ̌ dǎɛ.

⁴⁹Dɛ̍nu̍ɛ, Sìì Nyɔ̍ Wɔ̍n Nyɔsoa ɔ̀ wɛ̀-a gblɛ̍ja̍i̍-ɛ, ɔ̍ nu̍ wɔ̍n ku̍ dɛ̍ᵻ dǒ ǐn we̍.

⁵⁰Nyɔ̍ ùh-a tè-a ɔ̍ ja̍-ɛ, u̍h-u bo ɔ̍ jě wɔɛ, sɔ dǒ jǎɛ-o nyɔ̍ we̍ ìè jǎɛ-o nyɔ̍ we̍ mu̍.

⁵¹Ɔ̍ kmu-u gbǐh bo ɔ̍ nu̍, iě ùh-a chɛ̍n-a blɔ̌-ɛa di̍i̍chì-ɛ, ɔ̍ gbà u̍h ja̍i̍.

⁵²Ɔ̍ sà nyɔ̍ ùh ku̍-a wɔ̍n-ɛ dǒ u̍h-a nynɛ̌ gbalǎᵻ kɛ̍n, wɛ̀ ɔ̍ dǔ nyɔ̍ ùh ja-a u̍h-a chɛ̀ wlù-ɛ ja̍i̍.

⁵³Ɔ̍ nyǐ mɔ̌-a nu̍ nyɔ̍ dɛ̍ᵻ chɛ̀ chɛ̀, jɛ pàn-nyɔ̍ nɔ̀ɔ̍, u̍h nɛ kwa̍a̍ i̍ palǎpalǎ wɛ̀ u̍h mu̍.

⁵⁴Eslɔɛ nyɔ̍ ùh-a dbee-a ɔ̍ jǔ-ɛ, ɔ̍ naɛ u̍h sɔ̍nᵻ we̍ i̍, ka ɔ̍ nu̍-a wlu-ɛ dě à baaᵻá baaᵻ we̍-ɛ.

⁵⁵Eblaɛɛn ke ɔ̍ tloemlai wɔɛ jě tìh se̍ dǒ ɔ̍ wlì i̍ wɛ̀ nɔ̌ kmɔ̌-a kmɔ̌.”

⁵⁶Mɛle bɛ̌ɛ ɔ̍ iě chǔhᵻ ta̍a̍n nu̍ dǒ Ilesebɛ we̍, iě ɔ̍ dǔ ɔ̍ blǐ mu̍-ɛ.

⁵⁷Iě kwlǐ gbɛ̍n Ilesebɛ, wɛ̀ ɔ̍ sà gbàɔ̀n ɔ̍ wlǔh-i jɔ̍gbau jǔ.

⁵⁸Ka Joi nu̍-a gblɛ̍n-ɛ nmɔ-ɛ kaa̍ dǒ ɔ̍ we̍-ɛ, i̍h bo nyɔ̍ ke ɔ̍ nɛ-a dǒ gbò wɔ̍ɔ̍n-ɛ ke ɔ̍ wloa̍ nyɔ̍ wɔ̌n. Iě u̍h ke ɔ̍ nu̍ ɛ̍ mɔna̍.

⁵⁹Jǔpliɛ laa̍ ɔ̍ nu̍ wǐh mɛ̀ta̍a̍n, iě u̍h mu̍ ɔ̍ plɔ̀n po̍ la̍ wɛ̀ u̍h iě ɔ̍ ɔ̍ baa Sɛɛkewlaɛɔ-a nynɛ̌ tùi.

⁶⁰Jɛ ɔ̍ de̍ la̍a̍, “Iěe, mɔ̀ dǎɛ ɔ̍ Chɔɔn.”

⁶¹Wɛ̀ u̍h la̍a̍ dě ɔ̍ we̍, “Jɛ àn wloa̍ nyɔ̍-a nyɔ̍ se̍ nynɛ̌ la tù.”

⁶²Wɛ̀ u̍h po̍ sɔ̍nᵻ dě ɔ̍ baa we̍ u̍h-a tèle ɔ̍ i̍, nynɛ̌ jihwe̍ ɔ̍ pɔ̀n-a u̍h iě-a ɔ̍ dǎɛ-ɛ.

⁶³Iě Sɛɛkewlaɛɔ jbǎ gblu̍ pɔ̌ u̍h-a chlǐh-a kɛ̍n i̍-ɛ. Wɛ̀ ɔ̍ chlǐh dǒ ɛ̍ kɛ̍n, “Ɔ̍ nynɛ̌ bo Chɔɔn.” Sɔ ɛ̍ flɔn-ɛ u̍h kli̍hgbɛ̍ wɔ̍n.

⁶⁴Dǒ tàdùè laa̍ ɔ̍ mɛɔ gbàli-ɛ, iě ɔ̍ bɛ̌ɛ wlu-ɛ dode̍, wɛ̀ ɔ̍ po̍ Nyɔsoa tlɔ̌.

⁶⁵Wɛ̀ faɔn gbɛ̍n nyɔ̍ kli̍hgbɛ̍ ke u̍h nɛ-a dǒ gbò wɔ̍ɔ̍n-ɛ. Iě pɔ̀n laa̍ ɛ̍ sɛ̍ Judia bloa̍ kli̍hgbɛ̍ ɛ̀ blě-a tlu̍hᵻɛ́ kɛ̍n i̍.

⁶⁶Nyɔ̍ kli̍hgbɛ̍ ùh wɔ̌n-a ìh la-ɛ, u̍h-a naɛ ɛ̍ wlùh i̍. Iě u̍h la̍a̍, “Dɛ̍ jǔ la ɔ̍ mu̍ nu̍ ɛo?” Dɛ̍nu̍ɛ, Joi-a gbǐh nɛ ɔ̍ we̍.

⁶⁷Iě Nyɔsoa-a Sùù jǐi Chɔɔn baa Sɛɛkewlaɛɔ i̍, wɛ̀ ɔ̍ po̍ Nyɔsoa-a tu̍owli, ɔ̍ la̍a̍,

⁶⁸“Joi ɔ̀ nu̍-a Eslɔɛ nyɔ̍-a Nyɔsoa-ɛ, mɔ̀ à po̍ ɔ̍ tìhwe̍. Ɔ̍ ji̍ ɔ̍ nyɔ̍ we̍ gbǎ laa̍, iě ɔ̍ pùhbɔ u̍h kɛ̍ɛ̍n.

⁶⁹Ɔ̍ nyǐ àɔ̀ Sèìe Nyɔ̍ ɔ̀ blě-a gbǐh-ɛ wɛ̀, ɔ̀ nu̍-a ɔ̍ pòi̍ju Depe-a tloemlai-ɛ.

⁷⁰Ɛ̍ kɔn wlu̍ bo ɔ̍ po̍ tɔ̀ma̍a̍ tɛin se̍e̍ dě ɔ̍ tu̍owli po̍ nyɔ̍ ja̍a̍,

⁷¹ɔ̍ iě à sèìe dě à nyɛ̌-nyɔ̍ kwa̍a̍, ɛ̍ ke nyɔ̍ kli̍hgbɛ̍ ùh faɛn-ɛa àɔ̀-ɛ ke.

⁷²Ɔ̍ chɛ̀-a ku̍o̍ bo ɔ̍ nu̍ wlùh we̍, wɛ̀ ɔ̍ jě à baaᵻ wɔɛ.

⁷³Wlu̍ bo ɔ̍ po̍ tɔ̀ma̍a̍, iě ɔ̍ slɛ̀ɛ̀n dě à baa Eblaɛɛn we̍

⁷⁴ɔ̍ iě àɔ̀ sèìe dě à nyɛ̌-nyɔ̍ kwa̍a̍. Wɛ̀ à-a je̍e faɔn ple̍ dǒ ɔ̍ jǔ dbee la̍.

⁷⁵Wɛ̀ à iě Nyɔsoa i̍ wɛ̀ɛ̀, à iě i̍ slɛ̌ dǒ ɔ̍ jlǐhwai dǒ wǐh kli̍hgbɛ̍ à mu̍-a nu̍ nɔ̌ kmɔ̌ we̍-ɛ di̍i̍.

⁷⁶“Ǎn jǔ, mɔ̀ bo ɔ̀ mu̍ Sìì Nyɔ̍ Wɔ̍n Nyɔsoa-a tu̍owli po̍ nyɔ̍ nu̍. Dɛ̍nu̍ɛ, àn mu̍ dǒ Joi jǔ wɔ̀ ìè ɔ̍ wìè gba̍a̍ po̍.

⁷⁷Wɛ̀ ìè ɔ̍ nyɔ̍ wlùh sèàɛ̍ ka u̍h-a mu̍-a pǔh-ɛ, pò u̍h-a gblɛ̍n sɔ̀ɛ̀n-a tìh tǎli-ɛ i̍-ɛ.

⁷⁸À Nyɔsoa nɛ blɛ, iě ɔ̍ kɔn wɔɛ. Ɛ̍ kɔn ɔ̍ mu̍ ɛ̍ nu̍ sɔ̀n chɛ̀ ɛ̀ sɔ-a dě ja̍i̍wlɔ̀-ɛ ɛ̍ iě à sɛ̀n-ɛ, wɛ̀ à iě pǔh.

⁷⁹Wɛ̀ ɔ̍ iě nyɔ̍ ùh tè-a dě kwile i̍-ɛ ke dě mɛ̌ɛ-a sùù di̍i̍-ɛ sɔ̀npli nyǐ, ɔ̍ iě à sɔ̍nᵻ we̍ i̍ naɛ dǒ wìè ɛ̀ gba̍-a nyɔ̍ dě wlùh-a i̍ tè-ɛ di̍i̍-ɛ we̍.”

⁸⁰Iě jǔ laa̍ ɔ̍ ku̍, iě ɔ̍ kmu dě ɔ̍ sùù di̍i̍. Wɛ̀ ɔ̍ nɛ dě kwlǎslò we̍ te̍e̍ iě ɔ̍ dǔ ɔ̍ chɛ̀ gbaɛ̍we̍ tè-ɛ dě Eslɔɛ nyɔ̍ we̍.