Read Western Krahn Luu 17 Bible Online

Luu 17 - Western Krahn bible

Luu 17

¹Wɛ̀ Jusu la̍a̍ dě ɔ̍ kòà we̍, “Dɛ̍ᵻ ìh-a nui-a nyɔ̍ gblɛ̍n sɔ̀ɛ̀n-ɛ, i̍h-a mu̍ nɛ. Jɛ nyɔ̍ ɔ̀ kɔn ja̍a̍ i̍h-a jii-a, chlě dǒ ɔ̍ we̍.

²Ɛ̍ mu̍ i̍ blaɛ u̍h iě ɔ̍ dui-sɔɔ̌ dɔ̍ i̍ sa̍n-ɛ wɛ̀ u̍h iě ɔ̍ dě jbǒ kɛ̍n po̍, ɛ̍ sìì ɔ̍ iě ɛ̍ nu̍ wɛ̀ ùh plìh la u̍h iě fèàɛ̀ dě gblɛ̍n sɔ̀ɛ̀n we̍.

³Ɛ̍ tìh-ɛ, mɔ̀ tù mɔ̀-a nu̍-dɛ̍ᵻ jlǐhɛ̍. “Pò ìn ba̍ nu̍ ìn dɛ̍ sɔ̀n pùn-ɛ, nɛ̀ ìn sèàɛ̍ ɔ̍ wlùh ka ɔ̍ nu̍-a dɛ̍ sɔ̀n-ɛ. Pò ɔ̍ chɛ̍n kɛ̀n-ɛ, nɛ̀ ìn tǎli ɔ̍ dɛ̍ sɔ̀n-a tìh i̍.

⁴Pò ɔ̍ nu̍ ìn dɛ̍ᵻ sɔ̀nᵻ mɛ̀sɔɔ̌n pùn dǒ weɛ̍ due di̍i̍ wɛ̀ ɔ̍ iě laǎn kɛ̀n chɛ̍n-ɛ nu̍-ɛ, nɛ̀ ìn tǎli ɔ̍ dɛ̍ᵻ sɔ̀nᵻá tìh i̍.”

⁵Wɛ̀ gba̍tòà la̍a̍ dě Joi we̍, “Poe à wlùh gbaɛ kɛ̍n.”

⁶Wɛ̀ Joi la̍a̍, “Pò mɔ̀ blě wlùh gbaɛ ɛ̍ wàn i̍ ka jě à dǎɛ majlɛkɛ jɔɛ̍-ɛ, nɛ̀ mɔ̀ bɛ̌ɛ mɔ̀ iě ka dǎ dě tu̍ la we̍, ‘Sɔ wlù ìè-e jbǒ kɛ̍n gbǎ,’ wɛ̀ ɛ̍ iě mɔ̀-a wlu̍ nu̍.”

⁷Jusu la̍a̍, “Pò mɔ̀-a nyɔ̍ blě pòi̍ju wɛ̀ ɔ̍ iě dbo̍ nu̍ dě klè, àe̍e̍ ɔ̍ ja blawɛ̌ᵻ we̍ i̍ gbɛ̀n-ɛ, pò ɔ̍ ji̍ wlɔ̀-ɛ, nɛ̀ ìn se̍ ɔ̍ wlùh sèàɛ̍ mu̍ ɔ̍ iě tèwe ɔ̍ iě dɛ̍ di̍.

⁸Jɛ nɛ̀ àn mu̍ ɔ̍ wlùh sèàɛ̍ ɔ̍ iě àn di̍-dɛ̍ gba̍a̍ po̍, wɛ̀ ɔ̍ iě ìn jǔ dbee, wɛ̀ ìè dɛ̍ di̍. Nɛ̀ pò ìn wɔ̀-ɛ, wɛ̀ ɔ̍ iě dɛ̍ di̍-ɛ dǔ.

⁹Ìn se̍ àn pòi̍ju tlɔ̌ po̍ mu̍ dǒ dɛ̍ ìn sèàɛ̍-a ɔ̍ wlùh iě ɔ̍ nu̍-a ɛ̍-ɛ we̍.

¹⁰Kǎ mɔ̀ nɛ ke, dɛ̍ᵻ kli̍hgbɛ̍ mɔ̀ kɔn mɔ̀ iě-a nu̍-ɛ, pò mɔ̀ wɔ̀ i̍h nu̍-ɛɛ, nɛ̀ mɔ̀ jě mɔ̀-a chɛ̀ plǒai ka. Dɛ̍nu̍ɛ, dɛ̍ mɔ̀ kɔn mɔ̀ iě-a nu̍-ɛ, ɛ̍ taǐn bo mɔ̀ nu̍.”

¹¹Jusu-a mu̍-a Juluslɛn-ɛ, wɛ̀ ɔ̍ jii dǒ Sɛmewlea ke Kaladii bloa̍ nynɛ̌.

¹²Ɔ̍ ji̍-a dǒ wlɔ̀ due di̍i̍ i̍ sǐ la̍-ɛ, wɛ̀ wìèìdih-a nu̍ nyɔ̍ pùè jǎɛ ɔ̍ i̍. Jɛ nɛ̀ u̍h nyna-ɛ nya̍.

¹³Iě u̍h we̍le, u̍h la̍a̍, “Dlǔtu, Jusu, jě à wɔɛ lě.”

¹⁴Jusu jě-a u̍h-ɛ, iě ɔ̍ la̍a̍ dě u̍h we̍, “Mɔ̀ mu̍ mɔ̀ iě mɔ̀-a chɛ̀ Nyɔsoa-a slaǎ sà nyɔ̍ i̍ to.” U̍h nɛ dǒ mu̍ la̍ sǔh wɛ̀ u̍h-a ku̍ fɛ̍nɛ.

¹⁵U̍h-a due jě-a ɛ̍ ka ɔ̍ pǔh-a wɛ̀-ɛ, iě ɔ̍ ji̍ de̍, ɔ̍ blě i̍ wǐi-ɛ ɔ̍ po̍ Nyɔsoa tìhwe̍.

¹⁶Wɛ̀ ɔ̍ chlìi i̍ dǒ Jusu jǔ, iě ɔ̍ po̍ ɔ̍ tlɔ̌. Jɔ̍gbau-a chɛ̀ Sɛmewlea jǔ bo.

¹⁷Wɛ̀ Jusu la̍a̍, “Ɛ̍ se̍ nyɔ̍ pùè ùh se̍ pǔh ae? Tà juh mɛ̀nyìɛ̍ sie-a dǒ de̍-ɛ nɛ ɛ?

¹⁸Dɛ̍nu̍ dakɔ̍ pàìn la wɛ̀ ɔ̍ nɛ due-a ji̍ de̍ ɔ̍ iě Nyɔsoa tlɔ̌ po̍ ɛ?”

¹⁹Wɛ̀ Jusu la̍a̍ dě ɔ̍ we̍, “Sɔ bloɔ̍ ìè àn dɛ̍ mu̍. Àn wlùh gbaɛ-ɛ bo ɛ̀ pǔh-i m̀.”

²⁰Fɛlesii nyɔ̍ tèle Jusu i̍, u̍h la̍a̍, “Ti̍we̍ Nyɔsoa-a kmɔ̌ wlu̍ i̍ kɔn ti̍-a mu̍ ji̍ ɛ?” Wɛ̀ ɔ̍ sà u̍h-a wlu̍ pɔ̀n we̍. Ɔ̍ la̍a̍, “Nyɔsoa-a kmɔ̌ wlu̍ i̍ kɔn-ɛ se̍ ji̍ mu̍ wɛ̀ nyɔ̍ iě ɛ̍ jě.

²¹Nyɔ̍ se̍ ka dǎ mu̍, ‘Gbɛ̀n-e, ɛ̍-ɛ la da̍a,’ àe̍e̍ ‘Ɛ̍-ɛ nɛ-a dě de̍à.’ Dɛ̍nu̍ɛ, Nyɔsoa-a kmɔ̌ wlu̍ i̍ kɔn-ɛ nɛ dě mɔ̀ ja̍a̍.”

²²Wɛ̀ ɔ̍ la̍a̍ dě ɔ̍ kòà we̍, “Ti̍-a ji̍ la̍-ɛ, wɛ̀ mɔ̀ iě Nyi̍ɔ̍-a Jǔ-a weɛ̍ due jě-ɛ i̍ pɔ̀n. Jɛ mɔ̀ se̍ ɛ̍ jě mu̍.

²³U̍h-a mu̍ ka dǎ dě mɔ̀ we̍, ‘Gbɛ̀n-e, ɔ̍-ɔ nɛ-a de̍à,’ àe̍e̍ ‘Ɔ̍-ɔ la da̍a.’ Jɛ nɛ̀ mɔ̀ bɔ̌ dǒ u̍h de̍e̍ gbǎ la̍-a mu̍-ɛ.

²⁴Dɛ̍nu̍ɛ, ka nǐ-a nu̍-a jlǐh chlɛ-ɛ, wɛ̀ ɛ̍ tɛ̀àn-a wɔ̀-a dě ja̍u̍n wlì dlǔ-ɛ, kǎ Nyi̍ɔ̍-a Jǔ-a ji̍-i weɛ̍-a mu̍ nɛ ke.

²⁵Jɛ sàǐtòò-ɛ, ɔ̍ kɔn ɔ̍ iě jua̍i̍ sàɛ̀ kaa̍, wɛ̀ ti̍laa nyɔ̍ iě ɔ̍ chla tba̍.

²⁶Dɛ̍ ɛ̀ nɛ-a dǒ Nɔa-a ti̍ we̍-ɛ, ɛ̍ kɔn ba̍ bo ɛ̀ mu̍ nɛ ke dǒ Nyi̍ɔ̍-a Jǔ-a ji̍ la̍.

²⁷Nɛ̀ nyɔ̍ kli̍hgbɛ̍-a di̍ dɛ̍ iě u̍h-a nǎ. Wɛ̀ jɔ̍gbauᵻ ke nynɔ̌gbaɔᵻá tǐn i̍ blǐ. I̍h bo u̍h nɛ dǒ nu̍ la̍ dǒ weɛ̍ laa̍ di̍i̍ wɛ̀ Nɔa pa̍ dě blǎgbè di̍i̍. Wɛ̀ jǐ-nǐ ji̍ iě ɛ̍ gbɔ̀lɔ u̍h-u kli̍hgbɛ̍.

²⁸Ka ɛ̍ nɛ-a dǒ Laa-a ti̍ we̍-ɛ, kǎ ɛ̍ mu̍ nɛ-ɛ nu̍ ke. Nyɔ̍ɔ-a di̍ dɛ̍, iě u̍h-a nǎ, u̍h-a tɛ̀n dɛ̍ᵻ, iě u̍h-a ple̍ dɛ̍ᵻ, u̍h-a tù dɛ̍ᵻ, iě u̍h-a po̍ gbòᵻ.

²⁹Jɛ weɛ̍ Laa sɔ-a dǒ Sɔdɔm wlɔ̀ di̍i̍-ɛ, wɛ̀ nɛ̍ ke pɔ̀nɔ̌-a sɔ dě ja̍i̍wlɔ̀ iě i̍h-a wlǎ. Wɛ̀ i̍h gbɔ̀lɔ u̍h kli̍hgbɛ̍ nɛ-a dǒ wlɔ̀-ɛ.

³⁰Kǎ ɛ̍ mu̍ nɛ ke dǒ weɛ̍ Nyi̍ɔ̍-a Jǔ-a mu̍-a tà wlǔh-ɛ di̍i̍.

³¹“Dǒ weɛ̍ laa̍ di̍i̍-ɛ, nɛ̀ nyɔ̍ ɔ̀ nɛ-a dě gbò pɛ̍lɛ dlǔ-i kɛ̍n-ɛ, dě ɔ̍ iě waɛn la̍ sǔh, jɛ nɛ̀ ɔ̍ bɔ̌ dɛ̍-ɛ dǔ la̍ mu̍-ɛ dɛ dě gbò. Nɛ̀ nyɔ̍ ɔ̀ nɛ-a dě klè-ɛ, ɔ̍ bɔ̌ de̍ wlɔ̀ ji̍-ɛ ke.

³²Mɔ̀ nu̍ dɛ̍ ɛ̀ nɛ-a Laa-a nynɔ̌ pùn-ɛ wlùh we̍.

³³Nyɔ̍ jɔ fɔ̀n-a ɔ̍ feɛ sèìe dɛ we̍-ɛ, nɛ̀ ɔ̍ mu̍ ɛ̍ mǎ-ɛ. Jɛ nyɔ̍ jɔ mu̍-a ɔ̍ feɛ mǎ-ɛ, nɛ̀ ɔ̍ mu̍ ɛ̍ tɛ̌n tè.

³⁴Ǎn sèàɛ̍ mɔ̀ wlùh, dǒ maɔ̍ weɛ̍ laa̍ di̍i̍-ɛ, nyɔ̍ sɔɔ̌n-a mu̍ tàdùè i̍ pɛ̌n, wɛ̀ due iě-e dǔ-iɛ, iě due iě-o sie.

³⁵Nynɔ̌gbaɔᵻ sɔɔ̌n-a mu̍ dǒ dɛ̍ du̍ la̍ plɛɛn, wɛ̀ due iě-e dǔ-iɛ, iě due iě-o sie.” [

³⁶Nɛ̀ jɔ̍gbauᵻ sɔɔ̌n-a mu̍ dě klè nɛ, wɛ̀ due iě-e dǔ-iɛ, iě due iě-o sie.]

³⁷Wɛ̀ ɔ̍ kòà tèle ɔ̍ i̍. U̍h la̍a̍, “Joi, tàwe̍ bo ɛ?” Jusu la̍a̍ dě u̍h we̍, “Tà mɛ̌-ɛ kǔ nɛ-aɛ, nɛ̀ dě-e bo chìsǐᵻá gbòe i̍.”