Read Western Krahn Luu 19 Bible Online

Luu 19 - Western Krahn bible

Luu 19

¹Jusu sǐ-a dǒ Jɛwlekoo i̍-ɛ, nɛ̀ ɔ̍ chɛ̍n wlɔ̀ tìè.

²Nɛ̀ jɔ̍gbau due nɛ dǒ wlɔ̀-a chɛ̀ di̍i̍, ɔ̍ nynɛ̌ bo Saikeɔ. Ɔ̍ nu̍ taa̍sìh sà nyɔ̍-a dlǔtu, iě ɔ̍ pàn.

³Ɔ̍ pɔ̀n Jusu jě-ɛ i̍. Jɛ ɔ̍ kɔǎn ja̍, wɛ̀ nyɔ̍ɔ tìè i̍, sɔ ɔ̍ se̍ ɔ̍ jě-ɛ bɛ̌ɛ.

⁴Ɛ̍ tìh-ɛ, ɔ̍ gba̍ ple̍-ɛ dě wìè nya̍ tà Jusu-a mu̍-a jii-ɛ. Iě ɔ̍ jǎ dě tu̍ ja̍ wɛ̀ ɔ̍ iě Jusu jě.

⁵Jusu nyni̍-a dǒ tà-a chɛ̀-ɛ, iě ɔ̍ gbɛ̀n dě ja̍i̍, wɛ̀ ɔ̍ la̍a̍, “Saikeɔ, tèwe ìè tlìh. Dɛ̍nu̍ɛ, ǐn kɔn iě dě ìn blǐ gbò paɛ sèàn.”

⁶Wɛ̀ Saikeɔ tèwe ɔ̍ tlìh, iě ɔ̍ gba̍ Jusu gbò we̍ dǒ mɔna̍-a sǔh we̍.

⁷Nyɔ̍ kli̍hgbɛ̍ jě-a dɛ̍ la-ɛ, iě u̍h-a wlu-i wɔ̍ɔ̍n i̍. U̍h la̍a̍, “Jɔ̍gbau la, ɔ̍ mu̍ gblɛ̍n sɔ̀ɛ̀n nyɔ̍ blǐ koe la̍ wa.”

⁸Wɛ̀ Saikeɔ nyna i̍, iě ɔ̍ la̍a̍ dě Joi we̍, “Nyɔ̍ klaa, ǎn mu̍ ǎn kɔn-dɛ̍ᵻ kli̍hgbɛ̍-a fɔ̌ nyɔ̍gbà nyɔ̍ nyǐ. Nɛ̀ pò ǐn di̍ nyɔ̍ kanieǐ dǒ dɛ̍-o-dɛ̍ we̍-ɛ, nɛ̀ ǎn mu̍ ɛ̍ gbɔ̍ᵻ nyìɛ̍ wɔ̀ɔ̀ poe.”

⁹Wɛ̀ Jusu la̍a̍ dě ɔ̍ we̍, “Jɔ̍gbau la, ka ɔ̍ nu̍-a Eblaɛɛn-a jǔ ke-ɛ, pǔh-ɛ pa̍ nɔ̌ ɔ̍ blǐ gbò sèàn.

¹⁰Dɛ̍nu̍ɛ, Nyi̍ɔ̍-a Jǔ ji̍ kwlǎ sie nyɔ̍ i̍ pɔ̀n la̍-a ɔ̍ iě u̍h pǔh-i.”

¹¹Ti̍ u̍h-a po̍-a dě Jusu we̍ dounᵻɛ́, dǒ ɔ̍ poe nɛnǎ dě u̍h we̍. Ɔ̍ kɔǎɛn-a Juluslɛn i̍-ɛ, sɔ nyɔ̍ɔ jajeɛ̍ Nyɔsoa-a kmɔ̌ wlu̍ i̍ kɔn-ɛa mu̍ la̍ ji̍ de.

¹²Ɛ̍ tìh-ɛ, Jusu la̍a̍, “Jɔ̍gbau due ɔ̀ sɔ-a dě blǔh baa-a chɛǐ-ɛ bo ɔ̀ mu̍ dakɔ̍ de̍e̍ u̍h iě ɔ̍-e blǔh baa we̍i̍ nu̍, wɛ̀ ɔ̍ iě de̍ ji̍.

¹³Ɔ̍ wɔ̌an mu̍-u tìh-ɛ, iě ɔ̍ dǎ ɔ̍ pòi̍nynuu̍ bla̍-a pùè-ɛ. Jɔ-ɛ, nɛ̀ ɔ̍ nyǐ ɔ̍ kòo̍ wliɛ̍ due. Iě ɔ̍ la̍a̍ dě u̍h we̍, ‘Mɔ̀ po̍-e i̍h pɛlǔh te̍e̍ wɛ̀ iě ji̍.’

¹⁴Jɛ ɔ̍ blǐ nyɔ̍ faɛn ɔ̍-ɛ, ɛ̍ kɔn u̍h dbo̍ ɔ̍ u̍h-a wlu̍ kwa̍ blě nyɔ̍ kɛ̍n i̍. U̍h la̍a̍, ‘À se̍ pɔ̀n jɔ̍gbau la ɔ̍ iě à wlu̍ i̍ kɔn.’

¹⁵“Jɔ̍gbau laa̍ u̍h nu̍ ɔ̍ blǔh baa we̍i̍, iě ɔ̍ ji̍ de̍ka. Wɛ̀ ɔ̍ sèàɛ̍ pòi̍nynuu̍ ɔ̍ nyǐ-a wlǐ-ɛ wlùh u̍h iě dě ɔ̍ we̍ ji̍ ɔ̍ iě dɛ̍ u̍h jě-a dǒ wlǐ laa̍ kɛ̍n-ɛ juo.

¹⁶Jɔ ji̍-a sàǐtòò-ɛ, ɔ̍ la̍a̍, ‘Nyɔ̍ klaa, ǐn jě pùè dǒ due ìn nyǐ-a m-ɛ kɛ̍n.’

¹⁷Wɛ̀ ɔ̍ la̍a̍, ‘Ɛ̍ nmɔ jii̍, mɔ̀ pòi̍ju chɛ̀. Ka nyɔ̍-a tè-a la̍ ìn wlì dǒ dɛ̍ juwɛ we̍-ɛ, àn mu̍ wlɔ̀ᵻ gbàɛ̀ pùè wlu̍ i̍ kɔn.’

¹⁸Iě ɔ̀ po̍-a sɔɔ̌n-ɛ ji̍. Wɛ̀ ɔ̍ la̍a̍, ‘Nyɔ̍ klaa, ǐn jě m̀m̌ dǒ due ìn nyǐ-a m-ɛ kɛ̍n.’

¹⁹Iě ɔ̍ la̍a̍ dě ɔ̍ we̍, ‘Àn mu̍ wlɔ̀ᵻ gbàɛ̀ m̀m̌ wlu̍ i̍ kɔn.’

²⁰Wɛ̀ pòi̍ju dɔɔ ji̍, iě ɔ̍ la̍a̍, ‘Nyɔ̍ klaa, àn wliɛ̍ ìn siee-a m-ɛ la. Ǐn tè ɛ̍ i̍ nɛkɛ̌n nɛkɛ̌n dǒ pàa̍ngbaa mlǎ i̍.

²¹Dɛ̍nu̍ɛ, ìn kma wɔ̍n, ɛ̍ kɔn ǎn ple̍ ìn jǔ. Dɛ̍ ìn se̍-a kɔn-ɛ bo àn dǔ-u, iě àn gbǎn dɛ̍ ìn se̍-a tù-ɛ.’

²²Wɛ̀ ɔ̍ dlǔtu la̍a̍ dě ɔ̍ we̍, ‘Mɔ̀ kà kɔn pòi̍ju. Ǎn mu̍ ìn kɛ̀n sà dǒ àn chɛ̀-a wɔ̍i̍n wlu̍ kɛ̍n. Ìn juo ɛ̍-ɛ ka ǐn kma-a wɔ̍n iě dɛ̍ ǐn se̍-a kɔn-ɛ ǎn dǔ-a ɛ̍-ɛ, wɛ̀ dɛ̍ ǐn se̍-a tù-ɛ ǎn gbǎn-a ɛ̍-ɛ,

²³dɛ̍nu̍ ìn se̍ ǎn wlǐ la dě pɛ̀ɛ̍n po̍ ɛ? Wɛ̀ ǐn ji̍-a ka de̍-ɛ, iě i̍h ke i̍h-a po̍ kɛ̍n i̍ jě de ɛ?’

²⁴Wɛ̀ ɔ̍ dlǔtu la̍a̍ dě nyɔ̍ ùh nyna doǒ i̍-ɛ we̍, ‘Mɔ̀ sà ɔ̍ wliɛ̍ la kwa̍a̍ mɔ̀ iě ɛ̍ ɔ̀ blě-a pùè-ɛ nyǐ.’

²⁵Wɛ̀ u̍h la̍a̍ dě ɔ̍ we̍, ‘Nyɔ̍ klaa, ɔ̍ blě pùè wa.’

²⁶Iě ɔ̍ la̍a̍, ‘Ǎn sèàɛ̍ mɔ̀ wlùh, nyɔ̍ kli̍hgbɛ̍ ùh blě-a dɛ̍-ɛ, nɛ̀ u̍h-a mu̍ dɛ̍ dɔu nyǐ-ɛ. Jɛ nyɔ̍ ɔ̀ se̍-a dɛ̍ blě-ɛ, ɔ̍ dɛ̍ juwɛ-a chɛ̀ ɔ̍ blě-a de-ɛ, ɛ̍ mu̍ ɔ̍ kwa̍a̍ sà-ɛ.

²⁷Jɛ ǎn nyɛ̌-nyɔ̍ laa̍ ùh se̍-a pɔ̀n iě-a u̍h wlu̍ i̍ kɔn-ɛ, u̍h nɔ̀ɔ̍, mɔ̀ ja u̍h mɔ̀ iě u̍h dbǎ da̍a ǐn jlǐhwai.’ ”

²⁸Jusu wɔ̀-a ɛ̀ la bla̍-ɛ, iě ɔ̍ gbǎ dǒ u̍h jǔ ɔ̍ mu̍ Juluslɛn.

²⁹Ɔ̍ kɔǎɛn-a Bɛfaji ke Bɛtani wlɔ̀ i̍ wɛ̀ dǒ Ɔle-Tu̍ᵻá Tlu̍h gbɔ̀ì-ɛ, iě ɔ̍ dbo̍ ɔ̍ kòà sɔɔ̌n nya̍.

³⁰Ɔ̍ la̍a̍, “Mɔ̀ mu̍ dě wlɔ̀ nɛ-a dǒ à jǔ-ɛ di̍i̍. Pò mɔ̀ sǐ wlɔ̀ i̍-ɛ, mɔ̀-a mu̍ soo̍pà jǔ jě ɛ̍ mɔɛ i̍. Nyɔ̍-ɔ se̍a dǒ ɛ̍ kɛ̍n i̍ tè. Mɔ̀ pɔ̀ni ɛ̍ mɔ̀ iě ɛ̍ da̍a ja.

³¹Pò nyɔ̍ tèle mɔ̀ i̍, ‘Dɛ̍nu̍ mɔ̀-a pɔ̀ni ɛ̍ ɛ?’ Nɛ̀ mɔ̀ la̍a̍, ‘Dlǔtu-a pɔ̀n ɛ̍.’ ”

³²Wɛ̀ ùh ɔ̍ dbo̍-a mu̍. Iě ka ɔ̍ nu̍-a u̍h wlùh sèàɛ̍-ɛ, wɛ̀ u̍h nu̍ ɛ̍ la̍a̍n jě-ɛ.

³³U̍h-a pɔ̀ni-a la̍ soo̍pà laa̍-ɛ, iě ɛ̍ kɔn-nyɔ̍ la̍a̍ dě u̍h we̍, “Dɛ̍nu̍ mɔ̀-a pɔ̀ni ɛ̍ ɛ?”

³⁴Wɛ̀ u̍h la̍a̍, “Dlǔtu-a pɔ̀n ɛ̍.”

³⁵Wɛ̀ u̍h ja ɛ̍ Jusu. Iě u̍h slo̍ u̍h-a plɛ̀i̍ᵻ dǒ ɛ̍ kɛ̍n i̍. Wɛ̀ u̍h tè-e Jusu i̍ dǒ ɛ̍ kɛ̍n.

³⁶Ɔ̍ na-ɛa dǒ ɛ̍ kɛ̍n-ɛ, wɛ̀ nyɔ̍ɔ slo̍ u̍h-a plɛ̀i̍ᵻ dǒ wìè-i.

³⁷Jusu kɔǎɛn-ɛa Juluslɛn i̍ wɛ̀-ɛ, dǒ Ɔle-Tu̍ᵻá Tlu̍h tlìh la̍-ɛ, sɔ ɔ̍ kòà tlùgbei̍ laa̍ u̍h-a nu̍ la̍ mɔna̍ sǔh. Iě u̍h-a wǐi i̍, u̍h-a po̍ Nyɔsoa tìhwe̍ dǒ jbaɛdih u̍h jě-a wɛ̀-ɛ we̍.

³⁸U̍h la̍a̍, “Pɔ̀ìě dǒ Blǔh Baa ɔ̀ ji̍-a dǒ Joi-a nynɛ̌ kɛ̍n-ɛ we̍. Wlùh-a i̍ tè-ɛ dě ja̍i̍wlɔ̀, nɛ̀ tìh-a i̍ bɛ̌-ɛ dǒ Nyɔsoa we̍.”

³⁹Wɛ̀ Fɛlesii nyɔ̍-a duuh ùh nɛ-a dě nyɔ̍ tlùgbei̍ laa̍ nynɛ̌-ɛ, u̍h la̍a̍ dě Jusu we̍, “Dlǔtu, po̍ àn kòà la bɔ̌ i̍.”

⁴⁰Jusu la̍a̍, “Bɔ̌ ǐn sèàɛ̍ mɔ̀ wlùh, pò u̍h-a jɛ nɛ tìi̍n-ɛ, sɔɔ̌ᵻá chɛ̀ la i̍h-a mu̍ i̍ wǐi.”

⁴¹Ti̍ Jusu kɔǎɛn-ɛa Juluslɛn i̍-ɛ, ɔ̍ gbɛ̀n-a dě wlɔ̀-ɛ, wɛ̀ ɔ̍ fìn-i ɛ̍ dlǔ i̍.

⁴²Ɔ̍ la̍a̍, “Sèàn weɛ̍ la, ǎn pɔ̀n mɔ̀-a chɛ̀ iě dɛ̍ ɛ̀ blě-a wlùh-a i̍ tè-ɛ juo de. Jɛ ɛ̍ mǎ-ɛ mɔ̀ jlǐh.

⁴³Ɛ̍ mu̍ weɛ̍ kɔn dǒ mɔ̀ we̍, wɛ̀ mɔ̀-a nyɛ̌-nyɔ̍ iě mɔ̀ dě pìe̍e̍ po̍. Nɛ̀ u̍h-a mu̍ mɔ̀ de̍ ke nya̍ kaɛn. Wɛ̀ u̍h iě mɔ̀ gbɛ̍n fɔ̌ kli̍hgbɛ̍ we̍.

⁴⁴U̍h-a mu̍ mɔ̀ ke mɔ̀-a nynuu̍-u gbɔ̀lɔ chɛ̀ɛ̌chɛ̀. U̍h se̍-o mɔ̀-a tɛ̌n si̍e̍ mu̍. Dɛ̍nu̍ɛ, mɔ̀ se̍ ti̍ Nyɔsoa ji̍-a mɔ̀ pǔh-i la̍-a juo.”

⁴⁵Wɛ̀ Jusu mu̍ dě slaǎ sà gbò sɔ̀n. Iě ɔ̍ po̍ dɛ̍ᵻ ple̍-nyɔ̍ sɔ̀n i̍.

⁴⁶Wɛ̀ ɔ̍ la̍a̍ dě u̍h we̍, “Ɛ̍ chlǐh-ɛ dě Nyɔsoa-a wlu̍ di̍i̍. Nyɔsoa la̍a̍, ‘Ǎn gbò-a mu̍ ba̍le gbò nu̍.’ Jɛ mɔ̀-a nui ɛ̍ jlǐ-nyɔ̍-a tè la̍ we̍i̍.”

⁴⁷Ka sɔ̀n-a sɛ̀n-aɛ, nɛ̀ kǎ Jusu-a po̍ nyɔ̍ nǎ dě slaǎ sà gbò sɔ̀n. Sɔ slaǎ sà nyɔ̍ klaaᵻ ke, telě nǎ poe nyɔ̍ ke Juu nyɔ̍-a dlǔtuᵻá pɔ̀n la̍ ɔ̍ dbǎ-a i̍ sǔh.

⁴⁸Jɛ u̍h se̍ flɔn la̍ jě u̍h iě ɛ̍ nu̍. Dɛ̍nu̍ɛ, nɛ̀ nyɔ̍ kli̍hgbɛ̍-a tba̍ dounᵻá gbà blǔh u̍h-a po̍ dě ɔ̍ we̍ dounᵻ.