Read Western Krahn Luu 2 Bible Online

Luu 2 - Western Krahn bible

Luu 2

¹Dǒ ti̍ laa̍ di̍i̍ bo Wloma nyɔ̍-a Bloa̍ Joi Akɔslɔ poe telě u̍h iě nyɔ̍ kli̍hgbɛ̍ nɛ-a dǒ blǔh laa̍ kɛ̍n-ɛ slè.

²U̍h iě-a nyɔ̍ slè-ɛ i̍ sàɛ̀-ɛ, nɛ̀ Kɔwleneɔ bo ɔ̀ nu̍ kɔ̀mla̍ dǒ Siwlia bloa̍ kɛ̍n.

³Iě nyɔ̍ kli̍hgbɛ̍-a mu̍ nynɛ̌ po̍ la̍. Jɔ-ɛ, nɛ̀ ɔ̍ mu̍ dǒ ɔ̍ chɛ̀-a wlɔ̀ di̍i̍ ɔ̍ iě nynɛ̌ po̍.

⁴Wɛ̀ Josɛ sɔ dě Kaladii dǒ Naaslɔɛ wlɔ̀ di̍i̍, iě ɔ̍ mu̍ Judia dǒ Bɛfleɛɛn wlɔ̀ di̍i̍. Bɛfleɛɛn wlɔ̀ bo ɛ̀ nu̍ blǔh baa Depe-a wlɔ̀, wɛ̀ Josɛ nu̍ Depe-a tloemlai. Ɛ̍ kɔn ɔ̍ mu̍-o u̍h iě ɔ̍-o slè-e.

⁵Ɔ̍ wɔ̌an mu̍-u tìh-ɛ, ɔ̍ ke ɔ̍ sɛ̌ dlǔ tù nynɔ̌ Mɛle mu̍, nɛ̀ ɔ̍ nɛ kwlǐ.

⁶Dǒ u̍h nɛ wɛ̀ kwlǐ gbɛ̍n ɔ̍.

⁷Iě ɔ̍ sà ɔ̍ sàǐtòò gbàɔ̀n, ɔ̍ wlǔh-i jɔ̍gbau jǔ, wɛ̀ ɔ̍ pìàɛ̍n ɔ̍ jliɛ̍ i̍, iě ɔ̍ pɛ̌n-ɛ ɔ̍ i̍ dě bliᵻá di̍i̍ di̍-i gblòùn gbà di̍i̍. Dɛ̍nu̍ɛ, u̍h se̍ pɛ̌n la̍ jě dě dihwi̍h gbò di̍i̍.

⁸Ɛ̍ wlù weɛ̍ laa̍ nɛ̀ blawɛ̌ᵻ we̍ i̍ gbɛ̀n nyɔ̍ nɛ dě pibǐ di̍i̍ u̍h-a tù u̍h-a blawɛ̌ᵻ jlǐhɛ̍ dě bloa̍-a fɔ̌ laa̍ we̍.

⁹Dǒ Joi-a ǐnchɔ̀ wlǔh-i u̍h kɛ̍n, iě Joi-a tìh-a i̍ bɛ̌-ɛa fa̍n u̍h de̍e̍ i̍. Sɔ ɛ̍ po̍ u̍h faɔn kaa̍.

¹⁰Wɛ̀ ǐnchɔ̀-a chɛ̀ la̍a̍, “Mɔ̀ bɔ̌ faɔn ple̍-ɛ. Ǐn ja mɔ̀ pɔ̀n chɛ̀ ɛ̀ mu̍-a nyɔ̍ kli̍hgbɛ̍ mɔna̍-a po̍-ɛ.

¹¹Mɔ̀-a Sèìe Nyɔ̍ Klai ɔ̀ nu̍-a Joi-ɛ, ɔ̍-ɔ bo ɔ̀ wlǔh sèàn dǒ Depe blǐ wlɔ̀.

¹²Ɛ̀ mu̍-a juola nu̍-ɛ la, mɔ̀-a mu̍ jǔpliɛ jě jliɛ̍ iě ɔ̍ i̍ pìàɛ̍n, wɛ̀ ɔ̍ iě i̍ pɛ̌n-ɛ dě bliᵻá di̍i̍ di̍-i gblòùn gbà di̍i̍.”

¹³U̍h iě-a kli dǎ-a, nɛ̀ Nyɔsoa-a ǐnchɔ̀ sùɛ̀ sɔ dě ja̍i̍wlɔ̀ i̍h nɛ dǒ ǐnchɔ̀ laa̍ we̍, iě i̍h-a ble̍ Nyɔsoa tìhwe̍ po̍ duǐh. I̍h la̍a̍,

¹⁴“Mɔ̀ à bɛ̌-ɛ Nyɔsoa-a nynɛ̌ i̍, ɔ̀ tǐn-a dě ja̍i̍wlɔ̀-ɛ, nɛ̀ nyɔ̍ ùh-a pɛ̌n-ɛa ɔ̍ wlùh i̍ nɔ̌ bloɔ̍-ɛ, pɔ̀ìě dǒ u̍h we̍.”

¹⁵Ti̍ Nyɔsoa-a ǐnchɔ̀ sɔ-a dǒ u̍h we̍ i̍h mu̍-a de̍ ja̍i̍wlɔ̀-ɛ, wɛ̀ blawɛ̌ᵻ we̍ i̍ gbɛ̀n nyɔ̍ la̍a̍, “Mɔ̀ à mu̍ Bɛfleɛɛn à iě dɛ̍ Joi la̍ ɛ̀ nɛ-a deě-ɛ jě.”

¹⁶Wɛ̀ u̍h tèwe u̍h mu̍, iě u̍h jě Mɛle ke Josɛ, nɛ̀ jǔpliɛ pɛ̌n i̍ dě gblòùn gbà di̍i̍.

¹⁷U̍h jě-a jǔ laa̍-ɛ, wɛ̀ u̍h sèàɛ̍ u̍h wlùh ka Nyɔsoa-a ǐnchɔ̀ nu̍-a ɔ̍ tìh we̍ i̍ sèàɛ̍-ɛ dě u̍h we̍-ɛ.

¹⁸Dɛ̍ blawɛ̌ᵻ we̍ i̍ gbɛ̀n nyɔ̍ sà-a dě u̍h we̍-ɛ, nyɔ̍ kli̍hgbɛ̍ ùh wɔ̌n-a i̍h-ɛ, ɛ̍ flɔn-ɛ u̍h wɔ̍n.

¹⁹Ìh kli̍hgbɛ̍ u̍h bla̍-aɛ, Mɛle gbɛ̍n-ɛ i̍h dounᵻ i̍, iě ɔ̍ naɛ i̍h-a tìh-a wlùh i̍.

²⁰Wɛ̀ blawɛ̌ᵻ we̍ i̍ gbɛ̀n nyɔ̍ blě Nyɔsoa tìhwe̍ po̍ duǐh ble̍-ɛ u̍h mu̍ de̍ dǒ dɛ̍ᵻ kli̍hgbɛ̍ u̍h wɔ̌n-a iě u̍h jě-a we̍. Ɛ̀ kɔn taǐn Nyɔsoa-a ǐnchɔ̀ sà-a dě u̍h we̍-ɛ, ɛ̍ bo ɛ̀ nɛ.

²¹Ɔ̍ wlǔh-aɛ, ɛ̍ nu̍ wǐh mɛ̀ta̍a̍n iě ɔ̍ poe-ɛ plɔ̀n. Wɛ̀ u̍h tùi ɔ̍ Jusu nynɛ̌. Nynɛ̌ laa̍ bo Nyɔsoa-a ǐnchɔ̀ tùi ɔ̍ wɛ̀ Mɛle dǔ ɔ̍ kwlǐ nɛ-ɛ.

²²Ti̍ nyni̍-a Mɛle ke Josɛ iě-a u̍h-a chɛ̀ i̍ dle-ɛ, ɛ̀ Mose-a telě la̍ nyɔ̍ iě-a nu̍-ɛ, wɛ̀ u̍h gba̍ jǔpliɛ laa̍ dǒ Juluslɛn u̍h iě ɔ̍ Joi i̍ to.

²³Dɛ̍nu̍ɛ, Joi-a telě la̍a̍, “Pò nyɔ̍ sà sàǐtòò gbàɔ̀n wɛ̀ ɔ̍ iě jɔ̍gbau wlǔh-iɛ, nɛ̀ ɔ̍ kɔn dǒ Joi we̍.”

²⁴Nɛ̀ u̍h sà-ɛ gbɔ̀lǐhᵻ sɔɔ̌n àe̍e̍ pawo̍o̍ᵻ plɔ̀ᵻ sɔɔ̌n slaǎ-a, ɛ̀ Joi-a telě la̍ nyɔ̍ iě-a nu̍-ɛ.

²⁵Dǒ ti̍ laa̍ di̍i̍-ɛ, nɛ̀ jɔ̍gbau due nɛ dǒ Juluslɛn, ɔ̍ nynɛ̌ nu̍ Simiɔ. Ɔ̍ gblɛ̍n nmɔ jii̍ iě ɔ̍ nu̍ Nyɔsoa nyɔ̍. Iě Nyɔsoa-a Sùù nɛ ɔ̍ we̍. Nɛ̀ ɔ̍ fuo Eslɔɛ nyɔ̍-a pǔh-u ti̍.

²⁶Iě Nyɔsoa-a Sùù sèàɛ̍ ɔ̍ wlùh, ɛ̍ la̍ ɔ̍ se̍ mɛ̌ mu̍ wɛ̀ ɔ̍ iě Joi-a Chèɛ̀ Tba̍ju jě.

²⁷Wɛ̀ Nyɔsoa-a Sùù gba̍ Simiɔ dě slaǎ sà gbò sɔ̀n. Ti̍ laa̍ nɛ̀ Jusu de̍ bei-a gba̍ ɔ̍ deě u̍h iě dɛ̍ telě dǎ-a nu̍ dǒ ɔ̍ we̍.

²⁸Wɛ̀ Simiɔ dǔ jǔpliɛ laa̍ iě ɔ̍ gbàɛ̍ ɔ̍ kwa̍a̍ i̍, wɛ̀ ɔ̍ po̍ Nyɔsoa tlɔ̌. Ɔ̍ la̍a̍,

²⁹“Joi, mɔ̍ àn pòi̍ju. Nu̍ ɛ̍ la̍ sǔh iě mɛ̌ dě wlùh-a i̍ tè-ɛ di̍i̍, ɛ̀ kɔn wlu̍ ìn po̍-a tɔ̀ma̍a̍-ɛ.

³⁰Dɛ̍nu̍ɛ, ǐn tba̍ nyɔ̍ ɔ̀ mu̍-a àn nyɔ̍ sèìe-ɛ jlǐhɛ̍ wɛ̀,

³¹ɔ̀ ìn po̍-a gba̍a̍ nyɔ̍ kli̍hgbɛ̍ iě-a jě-ɛ.

³²Ɔ̍ bo ɔ̀ nu̍ sɔ̀npli ɔ̀ mu̍ àn tìh-a taǐn to dě ùh se̍-a Juu nyɔ̍-ɛ we̍. Wɛ̀ ɔ̍ iě àn tìh-a i̍ bɛ̌-ɛ dě àn Eslɔɛ nyɔ̍ we̍ gba̍.”

³³Sɔ dɛ̍ Simiɔ bla̍-a dǒ jǔpliɛ la pùn-ɛ, ɛ̍ wlǔh i̍ ɔ̍ de̍ ke ɔ̍ baa de̍e̍.

³⁴Iě Simiɔ sà-ɛ u̍h nǐ wɔ̍n. Wɛ̀ ɔ̍ la̍a̍ dě jǔ de̍ Mɛle we̍, “Jǔ la ɔ̍ tìh nyɔ̍ dɔu-a mu̍-u gbɔ̀lɔ-ɛ, iě nyɔ̍ dɔu iě sèìe-ɛ nɔ̌ Eslɔɛ. Ɔ̍ mu̍ juola ɛ̀ sɔ-a dě Nyɔsoa we̍-ɛ nu̍ nyɔ̍ dɔu iě ɔ̍ chla tba̍.

³⁵Ɔ̍ mu̍ u̍h-a wlùh i̍ naɛ dɛ̍ᵻ gbaɛ̍we̍ tè. Nɛ̀ àn pɔluh-a mu̍ wàànwààn nu̍ dǒ wɔɛ we̍, ka nmǎ-a plàn chlɛ̀n-a chɛ̍n dɛ̍ i̍-ɛ.”

³⁶Nɛ̀ dǒ Nyɔsoa-a tu̍owli po̍ nynɔ̌gbau due nɛ, ɔ̍ nynɛ̌ nu̍ Ana. Fanjuwɛ-a jǔ nynɔ̌gbaɔ bo, ɔ̍ sɔ dě Asa-a chɛǐ. Jɛ ɔ̍ tǐn-a jla̍-ɛ, ɛ̍ nu̍ sɔ̀nᵻ mɛ̀sɔɔ̌n gbài̍ iě ɔ̍ nu̍ tèwànynɔ̌.

³⁷Ɔ̍ nu̍ tèwànynɔ̌ te̍e̍ iě ɔ̍ sɔ̀nᵻ nu̍ kwela mɛ̀ta̍a̍n jɔ̌ nyìɛ̍ (84). Jɛ nɛ̀ ɔ̍-ɔ sɔ dě slaǎ sà gbò sɔ̀n kleǐn. Nɛ̀ kǎ ɔ̍ po̍ jlǔh iě ɔ̍ sà wɛɛ ɔ̍ ba̍le wlù ke sɔ̀n.

³⁸Dǒ ti̍-a taǐn laa̍ di̍i̍ bo ɔ̍ ji̍-i iě ɔ̍ po̍ Nyɔsoa tlɔ̌. Wɛ̀ ɔ̍ bla̍ tìh dǒ jǔpliɛ laa̍ ɔ̍ dɛ we̍ dě nyɔ̍ kli̍hgbɛ̍ ùh-a pɔ̀n-a ti̍ Nyɔsoa-a mu̍-a Juluslɛn sèìe-ɛ jě-ɛ i̍-ɛ we̍.

³⁹Josɛ ke Mɛle wɔ̀-a dɛ̍ᵻ kli̍hgbɛ̍ Joi-a telě dǎ-aɛ nu̍-ɛ, wɛ̀ u̍h mu̍ dǒ de̍ Kaladii bloa̍ kɛ̍n dǒ u̍h-a chɛ̀-a Naaslɔɛ wlɔ̀ di̍i̍.

⁴⁰Wɛ̀ jǔ laa̍ ɔ̍ ku̍-i kmu-ɛ ke flɔ̍nwlùh dɔu. Wɛ̀ Nyɔsoa-a blɛ nɛ ɔ̍ we̍.

⁴¹Dǒ sɔ̀n kli̍hgbɛ̍ di̍i̍-ɛ, Jusu de̍ ke ɔ̍ baa-a mu̍ dǒ Juluslɛn wlɔ̀ di̍i̍ u̍h iě Sììkɛ̍n Weɛ̍-a Peě tù.

⁴²Jusu nu̍ sɔ̀nᵻá pùè jɔ̌ sɔɔ̌n wɛ̀ u̍h mu̍ Peě ɛ̀ nu̍-a u̍h-a tǐwai dɛ̍-ɛ kɛ̍n.

⁴³Peě chlà-a dlǔ i̍ u̍h-a mu̍-a la̍ de̍-ɛ, iě Jusu sie dě Juluslɛn. Ɔ̍ de̍ ke ɔ̍ baa se̍ i̍h juo.

⁴⁴U̍h jajeɛ̍ ɔ̍ nɛ dě u̍h blǐ nyɔ̍-a gbɔ̀ù di̍i̍ de. Wɛ̀ u̍h na dǒ weɛ̍ gbàǐ di̍i̍, iě u̍h dǔ ɔ̍ i̍ pɔ̀n-ɛ dě u̍h-a wloa̍ nyɔ̍ ke u̍h ba̍ᵻ nynɛ̌.

⁴⁵Ti̍ u̍h se̍-a ɔ̍ jě wɛ̀-ɛ, iě u̍h blě ɔ̍ i̍ pɔ̀n-ɛ u̍h-a mu̍ de̍ Juluslɛn.

⁴⁶Wǐh ta̍a̍n sì-aɛ, iě u̍h jě ɔ̍ dě Nyɔsoa-a slaǎ sà gbò sɔ̀n, nɛ̀ ɔ̍ tè i̍ dě nǎ po̍ nyɔ̍ nynɛ̌. Nɛ̀ ɔ̍ po̍ dě u̍h we̍ dounᵻ, iě ɔ̍ tèle tìh i̍.

⁴⁷Ka ɔ̍ nu̍-a dɛ̍ɛ̍ i̍ wɔ̌n-ɛ ke nyɔ̍-a wlu̍ pɔ̀n we̍ sà-aɛ, nyɔ̍ kli̍hgbɛ̍ ùh wɔ̌n-a ɔ̍ wlu̍-ɛ, sɔ ɛ̍ wlǔh i̍ u̍h de̍e̍.

⁴⁸U̍h jě-a ɔ̍-ɛ, sɔ ɛ̍ flɔn-ɛ u̍h wɔ̍n. Iě ɔ̍ de̍ la̍a̍ dě ɔ̍ we̍, “Ǎn jǔ, dɛ̍nu̍ ìn nu̍ àɔ̀ dɛ̍ kaɛn la pùn ɛ? Ìn baa ke ǐn ke àn sèò-a nu̍ àɔ̀, à dǔ-a ìn i̍ pɔ̀n-ɛɛ à blě-a.”

⁴⁹Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a pɔ̀n-ɛ ǐn tàdɔ̀ɔ̀ i̍ ɛ? Mɔ̀ se̍ i̍h juo ka ǐn kɔn iě-a nɔ̌ ǐn Baa blǐ gbò nɛ-ɛ ae?”

⁵⁰Jɛ u̍h se̍ dɛ̍ ɔ̍ bla̍-a dě u̍h we̍-ɛ i̍ wɔ̌n.

⁵¹Wɛ̀ ɔ̍ ke u̍h mu̍ de̍ dǒ Naaslɔɛ wlɔ̀ di̍i̍. Ɔ̍ nu̍ u̍h-a wlu̍ ma̍u̍. Wɛ̀ ɔ̍ de̍ blě-e ìh kli̍hgbɛ̍ la dǒ wlùh kɛ̍n.

⁵²Iě Jusu ku̍-i flɔ̍nwlùh. Wɛ̀ ɔ̍ tè-e Nyɔsoa ke wlɔ̀ nyi̍ɔ̍-a wlùh i̍.