Read Western Krahn Luu 22 Bible Online

Luu 22 - Western Krahn bible

Luu 22

¹Blèe̍ ɛ̀ se̍-a fù-i dɛ̍ᵻ we̍ poe-ɛ, ɛ̍ peě kɔǎn we̍ wɛ̀, ɛ̀ u̍h-a dǎɛ-a Sììkɛ̍n-a Peě-ɛ.

²Wɛ̀ Nyɔsoa-a slaǎ sà nyɔ̍ klaaᵻ ke telě nǎ poe nyɔ̍-a pɔ̀n jii la̍ i̍ u̍h iě Jusu dbǎ soɛɛ, dɛ̍nu̍ɛ, u̍h-a ple̍ nyɔ̍gbei jǔ.

³Wɛ̀ Juda u̍h-a dǎɛ-a Ɛkɛlia-ɛ, iě Setɔn gbǎ dě ɔ̍ ja̍a̍. Kòà-a pùè jɔ̌ sɔɔ̌n laa̍ u̍h-a due bo.

⁴Wɛ̀ ɔ̍ mu̍ dě Nyɔsoa-a slaǎ sà nyɔ̍ klaaᵻ ke slaǎ sà gbò-a chape we̍. Iě ɔ̍ ke u̍h pu̍e̍e tìh ka ɔ̍ mu̍-a Jusu kwlǎ sà-a nu̍ dě u̍h we̍-ɛ.

⁵Ɛ̍ tè-e u̍h-a wlùh i̍, iě u̍h po̍ wlu̍ tɔ̀ma̍a̍ u̍h iě wlǐ pɛ̌ɛ.

⁶Wɛ̀ Juda wɔ̌n. Sɔ ɔ̍ pɔ̀n la̍ jii la̍ i̍ sǔh ɔ̍ iě Jusu kwlǎ sà dě u̍h we̍ wɛ̀ nyɔ̍gbei je̍e la̍a̍n jě.

⁷Blèe̍ ɛ̍ se̍-a fù-i dɛ̍ᵻ we̍ poe-ɛ, wɛ̀ ɛ̍ weɛ̍-a peě nyni̍-o. Dǒ ɛ̍ di̍i̍ bo nyɔ̍-a sà-ɛ Sììkɛ̍n-a blawɛ̌ jǔ slaǎ.

⁸Iě Jusu dbo̍ Pitɛ ke Chɔɔn. Ɔ̍ la̍a̍ dě u̍h we̍, “Mɔ̀ mu̍ mɔ̀ iě Sììkɛ̍n Weɛ̍-a Peě-a di̍-dɛ̍ᵻ gba̍a̍ po̍ dǒ àɔ̀ we̍ à iě di̍.”

⁹Wɛ̀ u̍h la̍a̍ dě ɔ̍ we̍, “Tàwe̍ àn pɔ̀n à iě i̍h gba̍a̍ po̍-e ɛ?”

¹⁰Iě ɔ̍ la̍a̍, “Pò mɔ̀ nyni̍ wlɔ̀-ɛ, mɔ̀ ke jɔ̍gbau due-a mu̍ gbèɛ̀ɛn, ɔ̍ tè tee̍ dlǔ. Nɛ̀ mɔ̀ wɔ̀ dǒ ɔ̍ de̍e̍ mɔ̀ iě dě gbò kɔn di̍i̍ ɔ̍ mu̍-a mu̍-ɛ pa̍.

¹¹Nɛ̀ mɔ̀ sèàɛ̍ gbò joi wlùh, mɔ̀ la̍a̍, ‘À Dlǔtu la̍ toe àɔ̀ dihwi̍h gbòju, tà ɔ̍ ke ɔ̍ kòà-a mu̍-a Sììkɛ̍n Peě-a di̍-dɛ̍ᵻ di̍-iɛ.’

¹²Nɛ̀ ɔ̍ mu̍ mɔ̀ ja̍i̍ gbòju klaa ɛ̀ dɛ̍ᵻ kli̍hgbɛ̍ nɛ-a dě di̍i̍-ɛ toe. Dě mɔ̀ iě dɛ̍ᵻ kli̍hgbɛ̍ gba̍a̍ po̍-e.”

¹³Wɛ̀ u̍h mu̍, iě u̍h jě ìh kɔn taǐn Jusu sèàɛ̍-a u̍h wlùh-ɛ. Wɛ̀ u̍h po̍ Sììkɛ̍n Peě-a di̍-dɛ̍ᵻ gba̍a̍.

¹⁴Ti̍ nyni̍-aɛ, wɛ̀ Jusu ke ɔ̍ gba̍tòà tìèe̍ i̍ dǒ teble̍ gbɔ̀.

¹⁵Iě ɔ̍ la̍a̍ dě u̍h we̍, “Ɛ̍ nu̍ ǎn wlùh dɛ̍ kaa̍ mɔ̀ ke ǐn ke à iě Sììkɛ̍n Peě-a di̍-dɛ̍ᵻ di̍ sasǎ wɛ̀ iě tìh jě-ɛ dǔ.

¹⁶Dɛ̍nu̍ɛ, ǎn sèàɛ̍ mɔ̀ wlùh, ǐn se̍ i̍h di̍ mu̍ dɛ te̍e̍ wɛ̀ dɛ̍ᵻ ìh kɔ̍-a dǒ ǐn pùn i̍-ɛ, i̍h iě nɛ dě Nyɔsoa-a kmɔ̌ wlu̍ i̍ kɔn-ɛ di̍i̍.”

¹⁷Wɛ̀ Jusu dǔ kàu̍n-u, iě ɔ̍ po̍ Nyɔsoa tlɔ̌. Ɔ̍ la̍a̍, “Mɔ̀ dǔ ɛ̀ la-a mɔ̀ iě ɛ̍ mɔ̀-a chɛ̀ jii̍ gblè.

¹⁸Ǎn sèàɛ̍ mɔ̀ wlùh, sɔ da̍a sèàn blǐ ǐn se̍ nmɔ̍ la nǎ mu̍ dɛ te̍e̍ wɛ̀ Nyɔsoa-a kmɔ̌ wlu̍ i̍ kɔn-ɛ iě ji̍.”

¹⁹Wɛ̀ ɔ̍ dǔ blèe̍ gba̍n-a, iě ɔ̍ po̍ Nyɔsoa tlɔ̌. Wɛ̀ ɔ̍ chɛɛn ɛ̍ i̍, iě ɔ̍ nyǐ ɛ̍ ɔ̍ kòà. Ɔ̍ la̍a̍, “Ɛ̀ la ǎn ku̍ bo [ɛ̍ sà-ɛ slaǎ dǒ mɔ̀ we̍. Mɔ̀ di̍ ɛ̀ la wɛ̀ ǎn tìh iě dǒ mɔ̀ wlì i̍ sǐ.”

²⁰U̍h wɔ̀-a dɛ̍ di̍-ɛɛ, wɛ̀ ɔ̍ nyǐ u̍h kàu̍n laa̍ ke. Iě ɔ̍ la̍a̍, “Kàu̍n la, ɛ̍ bo ɛ̀ nu̍ ku̍o̍ delee Nyɔsoa po̍ dǒ ǎn nymɔ̍ ɛ̀ wlǎ-a i̍ dǒ mɔ̀ we̍-ɛ we̍.]

²¹“Jɛ nyɔ̍ ɔ̀ mu̍-a ǐn kwlǎ sà-ɛ, ɔ̍ bo ɔ̀ ke ǐn ke à gbo̍a̍ɛ-a sɔ̍n jǔ da̍a teble̍ kɛ̍n.

²²Nyi̍ɔ̍-a Jǔ-a mu̍ mɛ̌ dǒ ka Nyɔsoa nu̍-a ɛ̍ i̍ dbǎ-a we̍. Jɛ nyɔ̍ ɔ̀ sà-a ɔ̍ kwlǎ-ɛ, chlě dǒ ɔ̍ we̍.”

²³Wɛ̀ u̍h tè we̍ i̍ tèle-ɛ gbɔ̀, pò u̍h-a nyɔ̍we̍ bo ɔ̀ mu̍ ɛ̍ nu̍ kɔ̌ɔ.

²⁴Wɛ̀ wɔ̍ɔ̍n i̍ sà-a gbǎ dě kòà nynɛ̌ dǒ u̍h-a nyɔ̍ jɔ ku̍-a wɔ̍n ɔ̀ sìì-a ɔ̍ ba̍ᵻ kli̍hgbɛ̍-ɛ dɛ we̍.

²⁵Iě Jusu la̍a̍ dě u̍h we̍, “Ùh se̍-a Juu nyɔ̍-ɛ u̍h-a blǔh baaᵻá nui u̍h-a nyɔ̍ bloa̍ joi dɛ kɛ̍n i̍. Wɛ̀ nyɔ̍ ùh blě-a tùn dǒ u̍h dlǔwèàì-ɛ, iě u̍h-a dǎɛ u̍h-a chɛ̀ dɛ̍ᵻ chɛ̀ nu̍ nyɔ̍.

²⁶Jɛ ɛ̍ se̍-o mɔ̀ɔ̍ nɔ̀ɔ̍ nynɛ̌ i̍ nmɔ. Iě pò nyɔ̍ ku̍ wɔ̍n dě mɔ̀ nynɛ̌ ɔ̍ sìì ɔ̍ ba̍ᵻ i̍-ɛ, nɛ̀ ɔ̍ bo ɔ̀ iě jǔwɛ wɔ̀ dě mɔ̀ nynɛ̌, wɛ̀ dlǔtu iě pòi̍ju wɔ̀.

²⁷Jɔ tè-a i̍ dǒ teble̍ gbɔ̀ u̍h-a dbee-a jǔ-ɛ ke, jɔ dbee-a nyɔ̍ jǔ-ɛ, u̍h nɛ-a sɔɔ̌n-ɛ, jɔwe̍ bo ɔ̀ ku̍ wɔ̍n ɛ? Jɔ tè-a i̍-ɛ bo ɔ̀ ku̍ wɔ̍n. Jɛ ǐn nɛ nɔ̌ mɔ̀ nynɛ̌ ka nyɔ̍ jǔ dbee nyɔ̍-ɛ.

²⁸“Mɔ̀ɔ̍ bo ùh nyna ǐn de̍e̍ i̍ dě ǎn jua̍i̍ sàɛ̀-ɛ kli̍hgbɛ̍ di̍i̍.

²⁹Ɛ̍ tìh-ɛ, ka ǐn Baa nu̍-a ǐn nyɔ̍ wlu̍ i̍ kɔn-ɛ kwa̍ tèè-ɛɛ, kǎ ǐn nu̍ ɛ̍ mɔ̀ kwa̍ tèè-ɛ ke.

³⁰Wɛ̀ mɔ̀ iě dǒ ǎn teble̍ kɛ̍n dɛ̍ di̍-i, mɔ̀ iě nǎ dě ǎn kmɔ̌ wlu̍ i̍ kɔn-ɛ di̍i̍. Wɛ̀ mɔ̀ iě dǒ nynɛ̌ gbalǎᵻ kɛ̍n i̍ tìèe̍, wɛ̀ mɔ̀ iě Eslɔɛ nyɔ̍-a chɛ̌tu-a pùè jɔ̌ sɔɔ̌n wlu̍ i̍ kɔn.”

³¹Jusu la̍a̍, “Samo, Samo, Setɔn sà-ɛ wlu̍ kɛ̍n ɛ̍ iě mɔ̀-ɔ slɛ̌n ka klè joi-a fùn kwǐ kɛnɛ̌ i̍-ɛ.

³²Jɛ ǐn ba̍le dǒ àn tàà wɛ̀ àn wlùh gbaɛ je̍e ìn si̍h wɔ̍n po̍. Nɛ̀ pò ìn fèàɛ̀ nɔ̌ ǐn we̍ dode̍-ɛ, nɛ̀ ìn po̍ ìn de̍di̍i̍ᵻ gbǐh ku̍u̍ ke o.”

³³Iě Pitɛ la̍a̍, “Joi, ǐn gbàɛ̀ iě dě ìn we̍ kasoo gbǎ wɛ̀ iě-e mɛ̌-ɛ.”

³⁴Jusu la̍a̍, “Pitɛ, ǎn sèàɛ̍ ìn wlùh, àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀nwɔ̍i̍n.”

³⁵Wɛ̀ Jusu la̍a̍ dě ɔ̍ kòà we̍, “Ti̍ ǐn dbo̍-a mɔ̀ wɛ̀ mɔ̀ se̍-a pɔsɛ̍ ke, gbèèkǔ ke bu̍h-u po̍-dɛ̍ᵻ gba̍-ɛ, dɛ̍ bo ɛ̀ kɔn tìh nu̍ mɔ̀ i̍ ɛ?” Iě u̍h la̍a̍, “Dɛ̍-a tìh se̍ à i̍ nu̍.”

³⁶Jusu la̍a̍, “Jɛ kaka la̍ nyɔ̍ ɔ̀ blě-a pɔsɛ̍ ke gbèèkǔ-ɛ, nɛ̀ ɔ̍ dǔ ɛ̍-ɛ. Nɛ̀ nyɔ̍ ɔ̀ se̍-a plàn chlɛ̀n blě-ɛ, ɔ̍ ple̍ ɔ̍ dɛ̍wlo̍o̍ ɔ̍ iě due tɛ̀n.

³⁷Nyɔsoa-a chlǐh-wlu̍ la̍a̍, ‘U̍h-a mu̍ ɔ̍ dɛ̍ᵻ sɔ̀nᵻ nyɔ̍ slè-e.’ Bɔ̌ ǐn sèàɛ̍ mɔ̀ wlùh, ɛ̍ kɔn ɛ̍ iě chɛ̀-ɛ gbǎ dǒ ǐn pùn. Dɛ̍nu̍ɛ, dɛ̍ᵻ ìh chlǐh-a dǒ ǎn dɛ we̍-ɛ, i̍h-a nɛ la̍-ɛ.”

³⁸Wɛ̀ ɔ̍ kòà la̍a̍, “Joi, gbɛ̀n-e, plàn chlɛ̀nᵻ sɔɔ̌n la.” Iě ɔ̍ la̍a̍, “I̍h tìè i̍.”

³⁹Wɛ̀ Jusu sɔ dǒ wlɔ̀, iě ɔ̍ mu̍ dě Ɔle-Tu̍ᵻá Tlu̍h kɛ̍n ɔ̍ ke ɔ̍ kòà ke, ɛ̀ nu̍-a ɔ̍ tǐwai dɛ̍ se̍e̍-ɛ.

⁴⁰Ɔ̍ nyni̍-aɛ, iě ɔ̍ la̍a̍ dě u̍h we̍, “Mɔ̀ ba̍le wɛ̀ mɔ̀-ɔ je̍e blu̍ja̍a̍ gbǎ.”

⁴¹Iě ɔ̍ sɔ dǒ u̍h we̍ ɔ̍ mu̍ tà nyɔ̍ po̍ sɔɔ̌ gbo̍-ɛ, ɛ̍ mu̍-a nyni̍-ɛ. Wɛ̀ ɔ̍ po̍ kɔlu̍ᵻ wlù iě ɔ̍ ba̍le.

⁴²Ɔ̍ la̍a̍, “Baa, pò ìn wɔ̌n-ɛ, nɛ̀ ìn sà ǐn kàu̍n la wɔ̍i̍n. Jɛ dɛ̍ àn pɔ̀n-a bo ɛ̀ ìè nɛ, ɛ̍ se̍ naɛ̍ ǐn se̍ dǎ.” [

⁴³Wɛ̀ Nyɔsoa-a ǐnchɔ̀ sɔ dě ja̍i̍wlɔ̀ ɛ̍ wlǔh-i ɔ̍ i̍. Iě ɛ̍ po̍ ɔ̍ gbǐh ku̍u̍.

⁴⁴Wɛ̀ ɔ̍ ba̍le dɛ̍blɔ, dɛ̍nu̍ɛ, nɛ̀ ɛ̍ chlɛ̌n-ɛ ɔ̍ wlùh. Nɛ̀ ka nymɔ̍-a tǒ dǒ bloɔ̍-ɛ, kǎ sù ɛ̀ wlǔh-a ɔ̍-ɛ, ɛ̍ nu̍ tǒ-ɛ.]

⁴⁵Ɔ̍ wɔ̀-a ba̍le-ɛ, iě ɔ̍ mu̍ dě ɔ̍ kòà we̍. Ɔ̍ iě-a mu̍-ɛ, nɛ̀ u̍h gboǎɛ nyinɔ̍ i̍ wɛ̀ dǒ wɔɛ-a sǔh we̍.

⁴⁶Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀-a mɔ̌ ɛ? Mɔ̀ sɔ bloɔ̍ mɔ̀ iě ba̍le, wɛ̀ mɔ̀-ɔ je̍e blu̍ja̍a̍ gbǎ.”

⁴⁷Jusu nɛ dǒ wlu la̍ wɛ̀ nyɔ̍ tlùgbei̍ ji̍. Nɛ̀ Juda ɔ̀ po̍-a Jusu-a kòà pùè jɔ̌ sɔɔ̌n-ɛ, ɔ̍ bo ɔ̀ blě u̍h kwa̍. Wɛ̀ ɔ̍ mu̍ Jusu wlì ɔ̍ iě ɔ̍ gblèè.

⁴⁸Wɛ̀ Jusu la̍a̍ dě ɔ̍ we̍, “Juda, nyɔ̍ gblèè-ɛ bo àn mu̍ Nyi̍ɔ̍-a Jǔ kwlǎ sà-ɛ ae?”

⁴⁹Kòà ùh ke Jusu na-aɛ, u̍h juo dɛ̍ ɛ̀ mu̍-a nɛ-ɛ, iě u̍h la̍a̍, “Joi, à nu̍ à plàn chlɛ̀nᵻ à iě u̍h we̍ fɔ̀n ae?”

⁵⁰Iě u̍h-a due tba̍ Nyɔsoa-a slaǎ sà nyɔ̍-a dlǔtu-a kèi̍ dɛ̍, ɔ̍ chɛ̍n ɔ̍ di̍na̍ doun i̍.

⁵¹Jɛ Jusu la̍a̍, “Bɔ̌ ɛ̍ ba̍ nu̍-ɛ dɛ.” Iě ɔ̍ tǔh jɔ̍gbau laa̍ ɔ̍ doun i̍, wɛ̀ ɛ̍ bɔ̌.

⁵²Wɛ̀ Jusu la̍a̍ dě slaǎ sà nyɔ̍-a klaaᵻ ke, slaǎ sà gbò-a chapeᵻ ke nyɔ̍ klaaᵻ ùh ji̍-a ɔ̍ gbɛ̍n la̍-ɛ we̍, “Ɛ̀ mɔ̀ nu̍-a plàn chlɛ̀nᵻ ke gbòmina̍ᵻ kwa̍ i̍ blě-ɛ wɛ̀ mɔ̀ nu̍-a ji̍-ɛ, nɛ̀ ka nyɔ̍ la̍ mɔ̍ jlǐ-nyɔ̍-ɛ.

⁵³Ka sɔ̀n-a sɛ̀n-aɛ, kǎ ǎn nɛ dě mɔ̀ we̍ Nyɔsoa-a slaǎ sà gbò sɔ̀n, dǒ-o nɔ̀ɔ̍, mɔ̀ se̍ ǐn sɔ̍n pùn gba̍. Jɛ nɛ̀ jɛwɛ̀ mɔ̀-a ti̍ nyni̍ dɛbo, ɛ̍ ke kwile naɛ gbǐh ke.”

⁵⁴Wɛ̀ u̍h gbɛ̍n Jusu iě u̍h gba̍ ɔ̍ dě slaǎ sà nyɔ̍-a dlǔtu blǐ gbò. Iě Pitɛ wɔ̀ dǒ u̍h de̍e̍, jɛ nɛ̀ ɔ̍ ti̍ɛ̍ɛn u̍h we̍ i̍.

⁵⁵U̍h tbà nɛ̍ dǒ gbò-a gbàɛ̍gbà-a wèa̍, iě u̍h tìèe̍ tàdùè i̍. Wɛ̀ Pitɛ tè i̍ dě u̍h nynɛ̌,

⁵⁶iě nynɔ̌gbaɔ jǔ due ɔ̀ nu̍-a pòi̍ju-ɛ jě ɔ̍. Wɛ̀ ɔ̍ gbɛ̀n Pitɛ ja̍ sòo̍sòo̍, iě ɔ̍ la̍a̍, “Jɔ̍gbau la ɔ̍ ke Jusu-a na ke o.”

⁵⁷Jɛ Pitɛ tòlo-e, ɔ̍ la̍a̍, “Nynɔ̌ chɛ̀, ǐn se̍ ɔ̍ juo o.”

⁵⁸Ɛ̍ wlè-o wɛɛ iě nyɔ̍ dɔɔ jě ɔ̍. Wɛ̀ ɔ̍ la̍a̍, “Mɔ̀ la, mɔ̀ nyɔ̍ la u̍h-a due ke o.” Jɛ Pitɛ la̍a̍, “Jɔ̍gbau chɛ̀, ɛ̍ se̍ mɔ̍ o.”

⁵⁹Ɛ̍ wlè-o chɛ̀gbɛɛ iě jɔ̍gbau dɔɔ bla̍ dlǔ i̍, ɔ̍ la̍a̍, “Ǐn juo ɛ̍ kleǐn jɔ̍gbau la ɔ̍ ke Jusu na. Dɛ̍nu̍ɛ, ɔ̍-ɔ Kaladii jǔ ke.”

⁶⁰Jɛ Pitɛ la̍a̍, “Jɔ̍gbau chɛ̀, ìh àn bla̍-aɛ, ǐn se̍ i̍h-a dɛ i̍ juo.” Dǒ tàdùè laa̍, wlu̍ sǐi dě ɔ̍ wɔ̍ɔ̍n sǔh iě suuh slò.

⁶¹Wɛ̀ Joi fèàɛ̀, iě ɔ̍ gbɛ̀n Pitɛ ja̍. Iě wlu̍ ɔ̍ bla̍-a dě Pitɛ we̍-ɛ ɛ̍ dǔ dǒ ɔ̍ wlì i̍ sǐ-ɛ. Ɔ̍ la̍a̍, “Àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀nwɔ̍i̍n.”

⁶²Pitɛ sǐ-a sɔ̀n-ɛ, iě ɔ̍ fìn dɛ̍blɔ dɛ.

⁶³Nyɔ̍ ùh-a tù-a Jusu jlǐhɛ̍-ɛ, u̍h nui ɔ̍ jlii̍h kɛ̍n i̍ iě u̍h bla̍ ɔ̍.

⁶⁴Wɛ̀ u̍h bla̍ ɔ̍ jliɛ̍ jlǐh, iě u̍h tèle ɔ̍ i̍, u̍h la̍a̍, “Po̍ gbànwli à iě jě. Nyɔ̍ bo ɔ̀ tba̍ ìn dɛ̍ ɛ?”

⁶⁵Wɛ̀ u̍h po̍ ɔ̍ wlu̍ dɔu diih pùn i̍.

⁶⁶Sɔ̀n sɛ̀n-aɛ, wɛ̀ nyɔ̍ klaaᵻ ke, Nyɔsoa-a slaǎ sà nyɔ̍ ke telě nǎ poe nyɔ̍ gbǎ tàdùè. Iě u̍h ja Jusu dǒ u̍h jǔ. Wɛ̀ u̍h la̍a̍,

⁶⁷“Pò ìn tù Nyɔsoa-a Chèɛ̀ Tba̍ju-ɛ, nɛ̀ ìn sèàɛ̍ à wlùh.” Jɛ ɔ̍ la̍a̍ dě u̍h we̍, “Pò ǐn sèàɛ̍ mɔ̀ wlùh-ɛ, mɔ̀ se̍ ɛ̍ tìh chɛ̀-ɛ po̍ mu̍.

⁶⁸Nɛ̀ pò ǐn tèle mɔ̀ dɛ̍ i̍-ɛ, mɔ̀ se̍ ǎn wlu̍ pɔ̀n we̍ sà mu̍.

⁶⁹Jɛ sɔ da̍a sèàn blǐ-ɛ, Nyi̍ɔ̍-a Jǔ-a mu̍ i̍ tè dǒ Nyɔsoa ɔ̀ Blě-a Gbǐh Kli̍hgbɛ̍-ɛ di̍na̍ we̍.”

⁷⁰Wɛ̀ u̍h kli̍hgbɛ̍ la̍a̍, “Nɛ̀ɛ̍, mɔ̀ Nyɔsoa-a Jǔ ae?” Iě ɔ̍ la̍a̍ dě u̍h we̍, “Mɔ̀ɔ̍ bo ùh dǎ laǎn.”

⁷¹Wɛ̀ u̍h la̍a̍, “À se̍ sàànsi̍i̍h dɔɔ i̍ pɔ̀n dɛ. À chɛ̀ wɔ̌n ɔ̍ wlu̍ wɛ̀.”