Read Western Krahn Luu 24 Bible Online

Luu 24 - Western Krahn bible

Luu 24

¹Ɛ̍ nu̍ Sɔnde̍ bla-a klàɛ̍we̍ gbàìn, wɛ̀ nynɔ̌gbaɔᵻ laa̍ u̍h mu̍ dě Jusu-a gbàlɔ̍ we̍. U̍h gba̍ nɔ̌-dɛ̍ᵻ ìh u̍h po̍-a gba̍a̍-ɛ.

²U̍h gbɛ̀n-a deě-ɛ, nɛ̀ sɔɔ̌ ɛ̀ nɛ-a dǒ gbàlɔ̍ biě wɔ̍i̍n-ɛ, ɛ̍ sɔ-o.

³U̍h pa̍-a dě ɛ̍ di̍i̍-ɛ, u̍h se̍ Joi Jusu-a kǔ jě.

⁴Sɔ ɛ̍ gbe-e dě u̍h di̍i̍ i̍. Kli-a ka-ɛ, nɛ̀ jɔ̍gbauᵻ sɔɔ̌n nɛ dě jlii̍ plǔᵻ di̍i̍ i̍h-a fa̍n, wɛ̀ u̍h nyna u̍h pùn.

⁵Ɛ̍ po̍ nynɔ̌gbaɔᵻ laa̍ faɔn kaa̍, sɔ u̍h bla̍ jii̍ wlù wɛ̀ sǔh. Wɛ̀ jɔ̍gbauᵻ laa̍, u̍h la̍a̍ dě u̍h we̍, “Dɛ̍nu̍ mɔ̀-a pɔ̀n kmɔ̌ nɛ nyɔ̍ i̍ nɔ̌ mɛ̌-nyɔ̍ nynɛ̌ ɛ?

⁶Ɔ̍ se̍ da̍a nɛ dɛ, ɔ̍ wlǔh-ee wɛ̀. Ti̍ ɔ̍ nɛ-a Kaladii ke̍-ɛ, dɛ̍ ɔ̍ sà-a dě mɔ̀ we̍-ɛ, ɛ̍ mɔ̀ iě wlùh we̍ nu̍.

⁷Ɔ̍ la̍a̍, ‘Nyi̍ɔ̍-a Jǔ kɔn ɔ̍ iě kwlǎ sà-ɛ dě gblɛ̍n sɔ̀ɛ̀n nyɔ̍ kwa̍a̍, wɛ̀ u̍h iě ɔ̍ kɔ̍ dǒ gbàɛ̍ kɛ̍n i̍ tu̍ wlì. Jɛ pò wǐh ta̍a̍n sì-ɛ, nɛ̀ ɔ̍ mu̍-e wlǔh.’ ”

⁸Wɛ̀ ɔ̍ wlu̍ dǔ dǒ u̍h wlì i̍ sǐ-ɛ.

⁹U̍h mu̍-a de̍ wlɔ̀-ɛ, wɛ̀ u̍h sèàɛ̍ i̍h we̍ i̍ dě gba̍tòà-a pùè jɔɛ̍ due ke u̍h ba̍ᵻ duuh we̍.

¹⁰Mɛle Makalin ke, Joana ke, Chiin de̍ Mɛle ke, u̍h-u bo ùh ke nynɔ̌gbaɔᵻ duuh na, wɛ̀ u̍h sèàɛ̍ gba̍tòà ìh la wlùh.

¹¹Jɛ u̍h-a wlu̍ la, ɛ̍ wɔ̀ pàɔ̀n tmɔ̌-ɛ dě gba̍tòà dounᵻ. Ɛ̍ kɔn u̍h se̍ i̍h tìh dǎɛ.

¹²Wɛ̀ Pitɛ sɔ bloɔ̍, iě ɔ̍ gba̍ ple̍-ɛ dě gbàlɔ̍ biě we̍. Wɛ̀ ɔ̍ bla̍ jii̍ wlù ɔ̍ gbɛ̀n dě ɛ̍ di̍i̍, iě ɔ̍ jě flɛmɛ̍ jlii̍-a sǔh. Wɛ̀ ɔ̍ blě wlùh i̍ pu̍e̍e-ɛ ɔ̍ mu̍ wlɔ̀ dǒ dɛ̍ ɛ̀ nɛ-aɛ we̍.

¹³Dǒ weɛ̍-a taǐn laa̍ di̍i̍ bo Jusu-a kòà sɔɔ̌n mui dǒ wlɔ̀ due di̍i̍, ɛ̍ nynɛ̌ bo Ɛmeɛ. Sɔ dǒ Juluslɛn ìè mu̍, ɛ̍ wɛ̀ tlu̍hᵻ gbɔ̍ɔ̍ᵻ mɛ̀sɔɔ̌n nu̍-ɛ.

¹⁴Dɛ̍ᵻ kli̍hgbɛ̍ ìh nɛ-aɛ, wɛ̀ u̍h-a sǔh blě i̍h i̍ sà-a u̍h-a mu̍.

¹⁵U̍h-a wlu-aɛ nɛ̀ kǎ u̍h-a pu̍e̍e tìh, iě Jusu-a chɛ̀ jɛɛ u̍h kɛ̍n, wɛ̀ ɔ̍ ke u̍h-a mui wìè-i.

¹⁶Jɛ u̍h se̍ ɔ̍ i̍ juo.

¹⁷Iě Jusu la̍a̍ dě u̍h we̍, “Dɛ̍-ɛ tìh mɔ̀ blě-e sà-a sǔh mɔ̀-a na ɛ?” Wɛ̀ u̍h nyna-ɛ i̍, jɛ nɛ̀ u̍h gbǎ seɔn.

¹⁸Wɛ̀ u̍h-a due ɔ̀ kɔn nynɛ̌ nu̍-a Kliopa-ɛ tèle ɔ̍ i̍. Ɔ̍ la̍a̍, “Ìn nɛ due bo ɔ̀ nu̍ dihwi̍h dǒ Juluslɛn ɔ̀ se̍ dɛ̍ᵻ ìh gbǎ-a ka-o wǐh sɔɔ̌n la-ɛ juo ae?”

¹⁹Iě ɔ̍ la̍a̍, “I̍h-a nynɛ̌ ɛ?” Wɛ̀ u̍h la̍a̍ dě ɔ̍ we̍, “Dɛ̍ᵻ ìh nɛ-a Jusu ɔ̀ sɔ-a dǒ Naaslɔɛ wlɔ̀ di̍i̍-ɛ pùn-ɛ, i̍h-i bo à dǎ. Ɔ̍ nu̍ Nyɔsoa-a tu̍owli po̍ nyɔ̍, iě ɔ̍ blě gbǐh dǒ wɔ̍i̍n wlu̍ ke ɔ̍ nu̍-dɛ̍ᵻ we̍ dě Nyɔsoa ke nyɔ̍ kli̍hgbɛ̍ jlǐh.

²⁰À slaǎ sà nyɔ̍ klaaᵻ ke nyɔ̍ klaaᵻ sà ɔ̍ kwlǎ, ɔ̍ iě dbǎ-ɛ. Iě u̍h kɔ̍ ɔ̍ dǒ gbàɛ̍ kɛ̍n i̍ tu̍ wlì.

²¹Jɛ à tè ɛ̍ wlì de-ɛ, ɔ̍-ɔ bo ɔ̀ mu̍ Eslɔɛ nyɔ̍ sèìe. Ɛ̍ se̍-o siee, dɛ̍ la ɛ̍ gbǎ-aɛ, ɛ̍ wǐh ta̍a̍n sèàn.

²²Dode̍-ɛ, nynɔ̌gbaɔᵻ duuh nɛ-a nɔ̌ à gbɔ̀ù di̍i̍-ɛ, dɛ̍ u̍h bla̍-aɛ ɛ̍ wlǔh i̍ à de̍e̍. U̍h tlùìn dě ɔ̍ gbàlɔ̍ biě we̍ klàɔ̍,

²³iě u̍h se̍ ɔ̍ kǔ jě. U̍h ji̍-a de̍-ɛ, iě u̍h sà i̍h-i ka u̍h ja-a se̍ mɔ̌ ja̍, wɛ̀ u̍h jě-a Nyɔsoa-a ǐnchɔ̀-ɛ. Iě ǐnchɔ̀ sèàɛ̍ u̍h wlùh ka Jusu nɛ-a kmɔ̌-ɛ.

²⁴Wɛ̀ à nyɔ̍ duuh mu̍ dě gbàlɔ̍ biě-a chɛ̀ we̍. Wɛ̀ u̍h jě ɛ̀ kɔn taǐn nynɔ̌gbaɔᵻ laa̍ u̍h dǎ-aɛ. Jɛ u̍h se̍ ɔ̍ chɛ̀ jě.”

²⁵Wɛ̀ Jusu la̍a̍ dě u̍h we̍, “Mɔ̀ boe iě mɔ̀-a pɔluh kma dɛ̍-ɛ i̍ wɔ̌n-ɛɛ. Ɛ̍ kɔn ìh kli̍hgbɛ̍ Nyɔsoa-a tu̍owli po̍ nyɔ̍ bla̍-aɛ, mɔ̀ se̍ i̍h tìh chɛ̀ po̍.

²⁶Nyɔsoa-a Chèɛ̀ Tba̍ju se̍ kɔn ɔ̍ iě ka jua̍i̍ sàɛ̀ nu̍, wɛ̀ ɔ̍ iě dě ɔ̍ tìh-a i̍ bɛ̌-ɛ di̍i̍ mu̍ dɛbo ae?”

²⁷Wɛ̀ ìh tba̍-a dǒ ɔ̍ chɛ̀ pùn i̍ dě Nyɔsoa-a wlu̍ kli̍hgbɛ̍ di̍i̍, sɔ dě Mose we̍ wɛ̀ ɛ̍ iě-a Nyɔsoa-a tu̍owli po̍ nyɔ̍ kli̍hgbɛ̍ jɛɛ-ɛ, iě ɔ̍ sèàɛ̍ i̍h we̍ i̍.

²⁸U̍h-a nyni̍-a la̍ wlɔ̀ kɔn di̍i̍ u̍h-a mu̍-aɛ, sɔ ka nyɔ̍ mu̍ wlɔ̀ tìè-e chɛ̍n-ɛ nɛ̀ kǎ Jusu-a nu̍ la̍ na-a.

²⁹Jɛ u̍h sà ɔ̍ wìè-i. U̍h la̍a̍, “Pɛ̌n da̍a àɔ̀ we̍, dɛ̍nu̍ɛ, flì wlǎ i̍ wɛ̀. Wlù-a chɛ̀ wɔ̀ wɛ̀ muɔ.” Wɛ̀ ɔ̍ mu̍ ɔ̍ ke u̍h iě i̍ pɛ̌n.

³⁰Ɔ̍ ke u̍h tè-a i̍ u̍h iě-a dɛ̍ di̍-ɛ, iě ɔ̍ dǔ blèe̍-e, wɛ̀ ɔ̍ po̍ Nyɔsoa tlɔ̌. Iě ɔ̍ chɛɛn ɛ̍ i̍, wɛ̀ ɔ̍ nyǐ ɛ̍ u̍h.

³¹Sɔ dě u̍h jlǐh flɔn-ɛ, iě u̍h juo ɔ̍ i̍. Wɛ̀ ɔ̍ mǎ-ɛ u̍h jlǐh.

³²Wɛ̀ u̍h-a sǔh-a wlu, u̍h la̍a̍, “Na̍ ti̍ ɔ̍ iě-a sɔ̀ìn chɛ̍n dě àɔ̀ we̍ dǒ wìè-i wɛ̀ ɔ̍ iě-a Nyɔsoa-a wlu̍ we̍ i̍ sèàɛ̍-ɛ, nɛ̀ dě àɔ̀ di̍i̍-a si̍n-i lě.”

³³Wɛ̀ u̍h wa̍n bloɔ̍, iě u̍h mu̍ dǒ de̍ Juluslɛn. Dě u̍h jɛɛ kòà-a pùè jɔɛ̍ due laa̍, ɛ̍ ke nyɔ̍ duuh ùh ke u̍h gbǎ-a tàdùè-ɛ ke.

³⁴Wɛ̀ u̍h la̍a̍, “Joi wlǔh-e chɛ̀. Ɔ̍ wlǔh-i Samo i̍.”

³⁵Iě nynuu̍ sɔɔ̌n laa̍ u̍h sèàɛ̍ ka ɛ̍ nu̍-a nɛ-ɛ dǒ wìè-iɛ we̍ i̍, ɛ̍ ke ka u̍h nu̍-a ɔ̍ i̍ juo-ɛ dǒ ɔ̍ blèe̍ i̍ chɛɛn la̍-ɛ ke.

³⁶U̍h nɛ dǒ ɛ̀ la bla̍ la̍ sǔh iě Jusu-a chɛ̀ nyna i̍ dě u̍h nynɛ̌. Iě ɔ̍ la̍a̍, “Wlùh-a i̍ tè-ɛ dǒ mɔ̀ we̍.”

³⁷Sɔ dɛ̍ wa̍ u̍h we̍, iě faɔn gbɛ̍n u̍h. U̍h jajeɛ̍ kǔpàùn bo u̍h jě de.

³⁸Iě ɔ̍ la̍a̍ dě u̍h we̍, “Dɛ̍ ɛ̀ nui mɔ̀ sèò ɛ? Dɛ̍nu̍ nyɔ̍ di̍i̍ i̍ gbe-e dɛ̍ᵻ gbǎ dǒ mɔ̀ wlùh kɛ̍n ɛ?

³⁹Mɔ̀ gbɛ̀n ǎn sɔ̍nᵻ ke ǎn bu̍hᵻ ja̍ mɔ̀ iě jě ka ɛ̍ nu̍-a mɔ̍-ɛ. Mɔ̀ tǔh ǐn i̍ mɔ̀ iě jě. Dɛ̍nu̍ɛ, kǔpàùn se̍ plǎᵻ dlǔ i̍ nɛ, iě ɛ̍ se̍ gbǎᵻ blě ke, i̍h bo mɔ̀-a jě-a m ǐn blě-a.”

⁴⁰Ɔ̍ wɔ̀-a ɛ̀ la bla̍-aɛ, iě ɔ̍ to u̍h ɔ̍ kɔbaᵻ ke ɔ̍ bu̍hᵻ i̍.

⁴¹Jɛ ɛ̍ flɔn-ɛ u̍h wɔ̍n, iě mɔna̍ jǐi u̍h i̍. Sɔ ka dɛ̍ nɛ si̍h i̍-ɛ, kǎ u̍h-a nu̍ ɛ̍ jě-ɛ. Wɛ̀ Jusu la̍a̍ dě u̍h we̍, “Mɔ̀ blě di̍-dɛ̍ da̍a ae?”

⁴²Wɛ̀ u̍h nyǐ ɔ̍ jli̍-i smìɛ̍ tile.

⁴³Iě ɔ̍ dǔ ɛ̍-ɛ, wɛ̀ ɔ̍ di̍ ɛ̍ dǒ u̍h jlǐhwai.

⁴⁴Wɛ̀ ɔ̍ la̍a̍ dě u̍h we̍, “Ti̍ mɔ̀ ke ǐn ke à na-aɛ, ìh kɔn taǐn ǐn bla̍-a dě mɔ̀ we̍-ɛ, i̍h bo ìh-a nɛ-a. Na̍ dɛ̍ᵻ kli̍hgbɛ̍ ìh chlǐh-a dě Mose-a telě chlǐh-dɛ̍ᵻ ke, Nyɔsoa-a tu̍owli po̍ nyɔ̍ naɛ ke Duǐh Chlǐh-dɛ̍ di̍i̍-ɛ, i̍h kɔn i̍h iě chɛ̀-ɛ gbǎ.”

⁴⁵Wɛ̀ ɔ̍ flɔn-ɛ u̍h-a wlùh wɔ̍n u̍h iě Nyɔsoa-a wlu̍ i̍ wɔ̌n.

⁴⁶Iě ɔ̍ la̍a̍ dě u̍h we̍, “Kǎ Nyɔsoa-a wlu̍ nu̍ ka chlǐh-ɛ, ɛ̍ la̍ ɔ̍ Chèɛ̀ Tba̍ju-a mu̍ dbǎ-ɛ, wɛ̀ pò wǐh ta̍a̍n sì-ɛ, ɔ̍ iě-e wlǔh.

⁴⁷Wɛ̀ gblɛ̍n sɔ̀ɛ̀n-a tìh i̍ tǎli-ɛ ke i̍ bǐi-ɛa tìh iě bla̍-ɛ bloa̍ kli̍hgbɛ̍ kɛ̍n i̍ dǒ ɔ̍ nynɛ̌ kɛ̍n. Dǒ Juluslɛn bo ɛ̍ mu̍ gbɔ̀ tè-ɛ.

⁴⁸Mɔ̀ nu̍ sàànsi̍i̍h dǒ i̍h we̍.

⁴⁹Nɛ̀ɛ̍, ǎn mu̍ ɛ̀ kɔn wlu̍ ǐn Baa po̍-a tɔ̀ma̍a̍-ɛ mɔ̀ we̍ dbo̍. Jɛ mɔ̀ nɛ da̍a wlɔ̀ te̍e̍ wɛ̀ gbǐh sɔ-a dě ja̍i̍wlɔ̀-ɛ, ɛ̍ iě mɔ̀-ɔ gbǎ.”

⁵⁰Wɛ̀ Jusu sà u̍h dǒ wlɔ̀ ɔ̍ gba̍ u̍h Bɛtani fɔɔ. Iě ɔ̍ te sɔ̍nᵻ ja̍i̍, wɛ̀ ɔ̍ sà-ɛ u̍h nǐ wɔ̍n.

⁵¹Ɔ̍ nɛ dǒ u̍h nǐ wɔ̍n sà-ɛ la̍ wɛ̀ ɔ̍ sɔ dǒ u̍h we̍. Iě ɔ̍ gba̍-ɛ dě ja̍i̍wlɔ̀.

⁵²Wɛ̀ u̍h sà ɔ̍ wɛɛ, iě u̍h blě mɔna̍ dɔu nu̍-ɛ u̍h mu̍ dode̍ Juluslɛn.

⁵³Sɔ Nyɔsoa-a tlɔ̌ po̍ la̍ mu̍-ɛ dě slaǎ sà gbò sɔ̀n bo u̍h-a nu̍ la̍ ma̍u̍ kleǐn.