Read Western Krahn Luu 4 Bible Online

Luu 4 - Western Krahn bible

Luu 4

¹Jusu iě-a dǒ Jɔɔdɛn nǐ wɔ̍i̍n sɔ-ɛ, nɛ̀ Nyɔsoa-a Sùù jǐi ɔ̍-ɔ i̍. Iě ɛ̍ gba̍ ɔ̍ dě kwlǎslò we̍.

²Dě ɔ̍ nɛ dǒ wǐh-a kwela nyìɛ̍ di̍i̍ ɔ̍ se̍ di̍-dɛ̍ wɔ̍n tɛ̀n. Nɛ̀ kǎ Kǔ-a pɔ̀n ɔ̍ blu̍ja̍a̍ po̍-ɛ i̍ ke. Jɛ wǐh laa̍ i̍h iě-a dlǔ i̍ chlà-ɛ, nɛ̀ mɔ̌-a nu̍ ɔ̍ la̍-ɛ.

³Wɛ̀ Kǔ la̍a̍ dě ɔ̍ we̍, “Pò ìn tù Nyɔsoa-a Jǔ chɛ̀-ɛ, nɛ̀ ìn sèàɛ̍ sɔɔ̌ la wlùh ɛ̍ iě blèe̍ gba̍n sàɛ̀.”

⁴Wɛ̀ Jusu sà ɛ̍ wlu̍ pɔ̀n we̍, ɔ̍ la̍a̍, “Ɛ̍ chlǐh-ɛ dě Nyɔsoa-a wlu̍ di̍i̍, ɛ̍ la̍a̍, ‘Nyi̍ɔ̍-a feɛ se̍ di̍-dɛ̍ nɛ due wlì tè.’ ”

⁵Iě Kǔ gba̍ ɔ̍ dě ja̍i̍. Kli-a ka-aɛ, nɛ̀ ɛ̍ wɔ̀ ɔ̍ bloa̍ kli̍hgbɛ̍ toe-ɛ wɛ̀.

⁶Wɛ̀ ɛ̍ la̍a̍ dě Jusu we̍, “Ǎn mu̍ ìn gbǐh nyǐ ìè kɔn-dɛ̍ᵻ kli̍hgbɛ̍ la ke i̍h-a tìh-a i̍ bɛ̌-ɛ wlu̍ i̍ kɔn. Dɛ̍nu̍ɛ, i̍h kli̍hgbɛ̍ nyǐ-ɛ m. Ɛ̍ tìh-ɛ, nyɔ̍-o-nyɔ̍ ǎn pɔ̀n-a i̍h nyǐ-ɛ i̍-ɛ, ɔ̍ bo ǎn mu̍ i̍h nyǐ.

⁷Pò ìn ja ǐn wɛɛ sà mu̍-ɛ, nɛ̀ mɔ̀ bo ǎn mu̍ ìh kli̍hgbɛ̍ la nyǐ.”

⁸Wɛ̀ Jusu sà ɛ̍ wlu̍ pɔ̀n we̍, ɔ̍ la̍a̍, “Nyɔsoa-a wlu̍ la̍a̍, ‘Sà àn Joi Nyɔsoa wɛɛ, nɛ̀ ɔ̍ nɛ due gbài̍ bo ìè jǔ dbee.’ ”

⁹Wɛ̀ Kǔ gba̍ ɔ̍ dǒ Juluslɛn wlɔ̀ di̍i̍. Iě ɛ̍ tè-e ɔ̍ i̍ dě Nyɔsoa-a slaǎ sà gbò-a tɔ̀u̍n we̍. Iě ɛ̍ la̍a̍, “Pò ìn tù Nyɔsoa-a Jǔ chɛ̀-ɛ, nɛ̀ ìn po̍ àn chɛ̀ sɔ̀n.

¹⁰Dɛ̍nu̍ɛ, ɛ̍ chlǐh-ɛ dě Nyɔsoa-a wlu̍ di̍i̍, ɛ̍ la̍a̍, ‘Nyɔsoa-a mu̍ ɔ̍ ǐnchɔ̀ dbo̍ i̍h iě dǒ ìn we̍ i̍ gbɛ̀n.’

¹¹Nɛ̀ ɛ̍ chlǐh-ɛ ke, ‘I̍h-a mu̍ ìn kwa̍ blě wɛ̀ sɔɔ̌ je̍e àn boɔ-a chɛ̀ i̍ kwǐi.’ ”

¹²Iě Jusu sà ɛ̍ wlu̍ pɔ̀n we̍, ɔ̍ la̍a̍, “Nyɔsoa-a wlu̍ la̍a̍, ‘Nyɔsoa ɔ̀ nu̍-a mɔ̀-a Joi-ɛ, nyɔ̍ bɔ̌ ɔ̍ i̍ tɛ̀n-ɛ.’ ”

¹³Ti̍ Kǔ-a Jusu blu̍ja̍a̍ po̍-ɛ i̍ pɔ̀n-ɛ kli̍hgbɛ̍ chlà-a dlǔ i̍ wɛ̀-ɛ, iě ɛ̍ sɔ dǒ ɔ̍ we̍-e dǒ ti̍ gbɔ̍ di̍i̍.

¹⁴Wɛ̀ Jusu ji̍ dǒ dě Kaladii fɔɔ, nɛ̀ Nyɔsoa-a Sùù-a gbǐh nɛ ɔ̍ kɛ̍n. Iě ɔ̍ pɔ̀n sɛ̍ i̍ dě bloa̍-a fɔ̌ kli̍hgbɛ̍ laa̍ we̍.

¹⁵Wɛ̀ ɔ̍ po̍ nyɔ̍ nǎ dě Juu nyɔ̍-a wɛɛ sà gbòᵻ sɔ̀n i̍. Iě nyɔ̍ kli̍hgbɛ̍ po̍ ɔ̍ tìhwe̍.

¹⁶Wɛ̀ Jusu mu̍ dě Naaslɔɛ wlɔ̀ di̍i̍, tà ɔ̍ ku̍-iaɛ. Iě ɔ̍ mu̍ dě Juu nyɔ̍-a wɛɛ sà gbò sɔ̀n dǒ u̍h-a wlè-weɛ̍ di̍i̍, ka ɔ̍ nu̍-a se̍e̍-ɛ. Wɛ̀ ɔ̍ nyna i̍ ɔ̍ iě Nyɔsoa-a wlu̍ slè.

¹⁷Wɛ̀ u̍h nyǐ ɔ̍ chlǐh-dɛ̍ ɛ̀ Nyɔsoa-a tu̍owli po̍ nyɔ̍ Asaia chlǐh-aɛ. Ɔ̍ pɔ̀ni-a ɛ̍ wɔ̍i̍n-ɛ, iě ɔ̍ jě tà wlu̍ la ɛ̍ chlǐh-aɛ. Ɛ̍ la̍a̍,

¹⁸“Joi-a Sùù nɛ ǐn we̍. Dɛ̍nu̍ɛ, ɔ̍ tba̍ ǐn chèɛ̀ iě pɔ̀n chɛ̀-a tìh we̍i̍ bla̍ dě nyɔ̍gbà nyɔ̍ we̍. Ɔ̍ dbo̍ m iě i̍h i̍ sà ka kèi̍ᵻ sèìe-a wɛ̀-ɛ, wɛ̀ iě dɔ̌-nyɔ̍-a i̍ jě-e tìh i̍ sà ke dě u̍h we̍. Wɛ̀ iě nyɔ̍ ùh-a jě-a tìh-ɛ tìh jě-ɛ kɛ̍n sà.

¹⁹Wɛ̀ iě sɔ̀n Joi-a mu̍-a blɛ nɛ dǒ ɔ̍ nyɔ̍ we̍-ɛ, ɛ̍ tìh we̍i̍ bla̍.”

²⁰Wɛ̀ Jusu ka̍n chlǐh-dɛ̍-a chɛ̀ wɔ̍i̍n. Iě ɔ̍ nyǐ ɛ̍ nyɔ̍ ɔ̀ kɔn-a dǒ ɛ̍ dɛ we̍-ɛ, wɛ̀ ɔ̍ tè i̍. Nɛ̀ nyɔ̍ kli̍hgbɛ̍ nɛ-a dě wɛɛ sà gbò sɔ̀n-ɛ u̍h-a jlǐh nɛ klɛ̀ìn dě ɔ̍ ja̍.

²¹Wɛ̀ ɔ̍ la̍a̍ dě u̍h we̍, “Ka mɔ̀ wɔ̌n-a wlu̍ la-ɛ, nɛ̀ Nyɔsoa-a wlu̍ gbǎ chɛ̀-ɛ wɛ̀ sèàn.”

²²Wlu̍ sɔ-a dě ɔ̍ wɔ̍ɔ̍n-ɛ, ka ɛ̍ nu̍-a wɔ̍n nmɔ-ɛ, sɔ ɛ̍ wlǔh i̍ u̍h de̍e̍. Iě u̍h po̍ ɔ̍ wlu̍ tìh chɛ̀-ɛ. Wɛ̀ u̍h la̍a̍, “Na̍ ɔ̀ la ɔ̍ se̍ Josɛ-a jǔ ae?”

²³Iě ɔ̍ la̍a̍ dě u̍h we̍, “Ǐn juo i̍h kleǐn ka mɔ̀-a mu̍-a ka ǐn nɛnǎ i̍ poe wɛ̀ mɔ̀ iě-a ka dǎ-ɛ, ‘Kwɛ̍i̍n nyɔ̍, pǔh-i àn chɛ̀.’ Dɛ̍ᵻ mɔ̀ wɔ̌n-a ǐn nu̍-a dě Kepanium wlɔ̀ di̍i̍-ɛ, mɔ̀-a mu̍ ǐn wlùh sèàɛ̍ iě i̍h nu̍ ke da̍a ǎn chɛ̀-a wlɔ̀ di̍i̍.

²⁴Tìh-a taǐn ǎn sèàɛ̍ mɔ̀ wlùh, Nyɔsoa-a tu̍owli po̍ nyɔ̍-ɔ tè-ɛ ja̍ dǒ ɔ̍ chɛ̀ blǐ wlɔ̀.

²⁵Jɛ tìh-a taǐn ǎn sèàɛ̍ mɔ̀ wlùh, ti̍ Nyɔsoa-a tu̍owli po̍ nyɔ̍ Ilaɛja nɛ-a kmɔ̌-ɛ, wɛ̀ nǐ se̍ dba̍ dǒ sɔ̀nᵻ ta̍a̍n chǔhᵻ mɛ̀o̍ di̍i̍. Ɛ̍ nu̍ ɛ̍ mɔ̌ gbǎ bloa̍ kli̍hgbɛ̍ kɛ̍n i̍. Nɛ̀ tèwànynɔ̌gbaɔᵻ dɔu nɛ dǒ Eslɔɛ bloa̍ kɛ̍n dǒ ti̍ laa̍ di̍i̍.

²⁶Nyɔsoa se̍ Ilaɛja dbo̍ dě u̍h-a nyɔ̍ we̍. Jɛ tèwànynɔ̌ ɔ̀ nɛ-a dě Saidɔn bloa̍ kɛ̍n dǒ Sawlɛfa wlɔ̀ di̍i̍-ɛ, dě ɔ̍ we̍ bo ɔ̍ dbo̍ Ilaɛja.

²⁷Nɛ̀ wìèìdih-a nu̍ nyɔ̍ dɔu nɛ dě Eslɔɛ dǒ Nyɔsoa-a tu̍owli po̍ nyɔ̍ Ilaɛseɔ-a ti̍ we̍. Jɛ u̍h-a nyɔ̍ wɛ-a chɛ̀ se̍ fɛ̍nɛ. Niimɛ nu̍-a Siwlia jǔ-ɛ, ɔ̍ nɛ due bo ɔ̀ fɛ̍nɛ.”

²⁸U̍h wɔ̌n-a wlu̍ la-ɛ, nyɔ̍ kli̍hgbɛ̍ nɛ-a dě wɛɛ sà gbò sɔ̀n-ɛ, sɔ u̍h nɛ tɛtɛ dǒ jlu̍h we̍.

²⁹Iě u̍h wa̍n bloɔ̍, u̍h gbɛ̍n Jusu u̍h blě ɔ̍ i̍ klǎ-a u̍h sà ɔ̍ dǒ wlɔ̀. Wɛ̀ u̍h gba̍ ɔ̍ dě tlu̍h kɔn gbɔ̀ì u̍h-a wlɔ̀ poe-aɛ dě ɛ̍ dlugbɔ̌ u̍h iě ɔ̍ sɔ̀n po̍.

³⁰Jɛ ɔ̍ jii dě nyɔ̍ tlùgbei̍ laa̍ nynɛ̌ wɛ̀ ɔ̍ mu̍ ɔ̍ dɛ̍.

³¹Wɛ̀ Jusu mu̍ dě Kepanium wlɔ̀ di̍i̍ dě Kaladii bloa̍ kɛ̍n. Iě ɔ̍ po̍ nyɔ̍ nǎ dě Juu nyɔ̍-a wɛɛ sà gbò sɔ̀n dǒ u̍h-a wlè-weɛ̍ di̍i̍.

³²Sɔ ɔ̍ nǎ po̍-ɛ wlǔh i̍ nyɔ̍ kli̍hgbɛ̍ laa̍ de̍e̍. Dɛ̍nu̍ɛ, ɔ̍ nǎ poe-ɛ blě tùn.

³³Nɛ̀ jɔ̍gbau ɔ̀ jeědih nɛ-a dǒ de̍e̍-ɛ, ɔ̍ nɛ dě wɛɛ sà gbò-a chɛ̀ sɔ̀n. Wɛ̀ ɔ̍ wǐ, ɔ̍ la̍a̍,

³⁴“Naaslɔɛ-a Jusu, ka àn pɔ̀n ìè à tìh nu̍ ɛ? Ìn ji̍-i ìè à-a gbɔ̀lɔ ae? Ǐn juo m, mɔ̀ bo ɔ̀ nu̍ Nɛi̍ Wɛ̀ Nyɔ̍ ɔ̀ sɔ dě Nyɔsoa we̍.”

³⁵Wɛ̀ Jusu po̍ jeědih laa̍ bɔ̌ i̍, ɔ̍ la̍a̍, “Nɛ klìi̍, nɛ̀ ìn sɔ dǒ jɔ̍gbau la de̍e̍.” Wɛ̀ jeědih du̍ jɔ̍gbau laa̍ dǒ u̍h jlǐhwai, iě ɛ̍ sɔ dǒ ɔ̍ de̍e̍. Ɛ̍ se̍ ɔ̍ dɛ̍ tba̍.

³⁶Ɛ̍ wlǔh i̍ nyɔ̍ kli̍hgbɛ̍ de̍e̍, iě u̍h-a tèle-e we̍ i̍. U̍h la̍a̍, “Nǎ po̍-ɛ jɛwe̍ la ɛ? Tùn ke gbǐh bo ɔ̍ wlu-i dě jeědih we̍ wɛ̀ i̍h-a sɔ dǒ nyɔ̍gbei de̍e̍ wa.”

³⁷Wɛ̀ Jusu-a pɔ̀n sɛ̍ i̍ dě bloa̍-a fɔ̌ kli̍hgbɛ̍ laa̍ we̍.

³⁸Wɛ̀ Jusu sɔ dě Juu nyɔ̍-a wɛɛ sà gbò sɔ̀n, ɔ̍ mu̍ dě Samo blǐ gbò. Ɔ̍ iě-a mu̍-ɛ, nɛ̀ gbèwè gbɛ̍n Samo-a bila̍ nynɔ̌. Iě u̍h wlu dě Jusu we̍ ɔ̍ tìh.

³⁹Wɛ̀ ɔ̍ nyna nynɔ̌ laa̍ dlǔ, iě ɔ̍ wlu-i dě gbèwè we̍, iě ɛ̍ sɔ ɔ̍ kɛ̍n-ɛ. Wɛ̀ ɔ̍ nyna-o ɔ̍ sɔ bloɔ̍, iě ɔ̍ nu̍ Jusu bei-a dɛ̍i̍.

⁴⁰Ti̍ jlǔh-a gbǎ-a la̍-ɛ, wɛ̀ nyɔ̍ kli̍hgbɛ̍ ùh blě-a poa-nyɔ̍ dǒ wɛ̌ᵻ kaɛn kaɛn we̍-ɛ, iě u̍h ja u̍h dǒ Jusu we̍. Wɛ̀ ɔ̍ tè u̍h kli̍hgbɛ̍ sɔ̍n dlǔ, iě ɔ̍ pǔh-i u̍h.

⁴¹Wɛ̀ jeědih sɔ dǒ nyɔ̍ dɔu de̍e̍ i̍ ke, iě i̍h-a wǐi i̍. I̍h la̍a̍, “Mɔ̀ Nyɔsoa-a Jǔ.” Jusu po̍ i̍h bɔ̌ i̍, sɔ ɔ̍-ɔ wɔ̌n i̍h-i po̍ wlu̍ i̍. Dɛ̍nu̍ɛ, i̍h juo ka ɔ̍ nu̍-a Nyɔsoa-a Chèɛ̀ Tba̍ju-ɛ.

⁴²Sɔ̀n sɛ̀n-aɛ, wɛ̀ Jusu sɔ dǒ wlɔ̀ ɔ̍ mu̍ tà chɛn-a gbɔ̍i̍-ɛ. Wɛ̀ nyɔ̍gbei pɔ̀n ɔ̍ i̍. U̍h jě-a ɔ̍-ɛ, iě u̍h la̍ nɛ̀ ɔ̍ bɔ̌ dǒ u̍h we̍-e sɔ-ɛ.

⁴³Jɛ ɔ̍ la̍a̍ dě u̍h we̍, “Ǐn kɔn iě Nyɔsoa-a kmɔ̌ wlu̍ i̍ kɔn-ɛa tìh-a pɔ̀n chɛ̀ la bla̍ ke dě wlɔ̀ᵻ diih di̍i̍. Dɛ̍nu̍ɛ, ɛ̍ kɔn tìh bo Nyɔsoa dbo̍ m.”

⁴⁴Wɛ̀ ɔ̍ bla̍ Nyɔsoa-a tìh dě Juu nyɔ̍-a wɛɛ sà gbòᵻ sɔ̀n i̍ dě u̍h-a bloa̍ kɛ̍n.