Read Western Krahn Luu 6 Bible Online

Luu 6 - Western Krahn bible

Luu 6

¹Ɛ̍ nu̍ Juu nyɔ̍-a wlè-weɛ̍ wɛ̀ Jusu ke ɔ̍ kòà-a jii dǒ kwǐ kɛnɛ̌-a klè due di̍i̍. Wɛ̀ ɔ̍ kòà klɔ̍ i̍h, iě u̍h těla i̍h kwa̍a̍ i̍, u̍h-a di̍ i̍h-a jaɔ.

²Wɛ̀ Fɛlesii nyɔ̍-a duuh la̍a̍, “Dɛ̍nu̍ mɔ̀-a nu̍ dɛ̍ ɛ̀ à telě la̍ nyɔ̍ bɔ̌-a nu̍-ɛ dǒ wlè-weɛ̍ di̍i̍ ɛ?”

³Iě Jusu sà u̍h-a wlu̍ pɔ̀n we̍. Ɔ̍ la̍a̍, “Ti̍ mɔ̌-a nu̍-a Depe ke ɔ̍ na-nyɔ̍-ɛ, dɛ̍ ɔ̍ nu̍-a mɔ̀-ɔ se̍a ɛ̍ slè dě Nyɔsoa-a wlu̍ di̍i̍ ae?

⁴Dě à telě di̍i̍-ɛ, blèe̍ jɛ u̍h sà-ɛa Nyɔsoa kwlǎ-ɛ, nɛ̀ nyɔ̍ dɔɔ-ɔ di̍ ɛ̍ dɛ. Nɛ̀ slaǎ sà nyɔ̍ nɛ due bo ɔ̀ di̍ ɛ̍. Jɛ Depe pa̍-a dě Nyɔsoa-a gbò sɔ̀n-ɛ, iě ɔ̍ ke ɔ̍ ba̍ᵻ di̍ blèe̍ laa̍.”

⁵Wɛ̀ Jusu la̍a̍ dě u̍h we̍, “Ɛ̍ tìh-ɛ, Nyi̍ɔ̍-a Jǔ bo ɔ̀ nu̍ Joi dǒ wlè-weɛ̍ we̍.”

⁶Dǒ Juu nyɔ̍-a wlè-weɛ̍ dɛɛ di̍i̍ wɛ̀ Jusu mu̍ dě u̍h-a wɛɛ sà gbò sɔ̀n ɔ̍ po̍ nyɔ̍ nǎ. Nɛ̀ jɔ̍gbau due nɛ-e ɔ̍ di̍na̍ kɔba mɛ̌-ɛ.

⁷Iě telě nǎ poe nyɔ̍ ke Fɛlesii nyɔ̍-a klǎɛ Jusu jlǐhɛ̍, pò ɔ̍ ja nyɔ̍ pǔh-i mu̍ dǒ wlè-weɛ̍ di̍i̍-ɛ, wɛ̀ u̍h iě ɔ̍ tìh gbɛ̍n-ɛ.

⁸Jɛ Jusu juo dɛ̍ u̍h-a naɛ-a wlùh i̍-ɛ. Iě ɔ̍ la̍a̍ dě jɔ̍gbau ɔ̀ kɔn kɔba mɛ̌-aɛ we̍, “Ji̍ ìè i̍ nyna da̍a.” Wɛ̀ ɔ̍ sɔ bloɔ̍ iě ɔ̍ nyna doǒ i̍.

⁹Iě Jusu la̍a̍ dě u̍h we̍, “Ǎn tèle mɔ̀ i̍-o, ɛ̍ slɛ̌ i̍ dě à telě di̍i̍ à iě dɛ̍ chɛ̀ nu̍ dǒ wlè-weɛ̍ di̍i̍ ɛɛ, àe̍e̍ ɛ̍ slɛ̌ i̍ à iě dɛ̍ sɔ̀n nu̍ ae? À iě nyɔ̍ pǔh-i ɛɛ, àe̍e̍ à iě nyɔ̍-ɔ gbɔ̀lɔ ae?”

¹⁰Wɛ̀ Jusu gbèɛ̀ɛ̍n u̍h kli̍hgbɛ̍ ja̍i̍. Iě ɔ̍ la̍a̍ dě jɔ̍gbau laa̍ we̍, “Slɛ̌-ɛ àn kɔba i̍.” Wɛ̀ ɔ̍ slɛ̌-ɛ ɛ̍ i̍, iě ɔ̍ kɔba nmɔ jii̍ dode̍.

¹¹Sɔ u̍h nɛ tɛtɛ dǒ jlu̍h we̍, iě u̍h-a sǔh-a pu̍e̍e dɛ̍ u̍h iě-a Jusu pùn nu̍-ɛ.

¹²Dǒ ti̍ laa̍ di̍i̍ bo Jusu mu̍-i dě tlu̍h kɛ̍n ɔ̍ iě Nyɔsoa ba̍le. Iě ɔ̍ ba̍le dǒ maɔ̍ weɛ̍ gbàǐ laa̍ di̍i̍.

¹³Sɔ̀n sɛ̀n-aɛ, wɛ̀ ɔ̍ dǎ ɔ̍ kòà. Iě ɔ̍ tba̍ nyɔ̍-a pùè jɔ̌ sɔɔ̌n chèɛ̀ dě u̍h nynɛ̌, u̍h bo ɔ̍ dǎɛ gba̍tòà.

¹⁴U̍h-a nynɛ̌ la, Samo ɔ̀ Jusu-a dǎɛ-a Pitɛ-ɛ, ɛ̍ ke ɔ̍ de̍di̍i̍ Andlu ke, ɛ̍ ke Chiin ke, Chɔɔn ke, Felɔ ke Batalamio ke.

¹⁵Nɛ̀ Matio ke, Tɔmɔ ke, Afia-a jǔ Chiin ke Samo ɔ̀ u̍h-a dǎɛ-a Bloa̍-a dɛ we̍ Fɔ̀n Nyɔ̍-ɛ ke.

¹⁶Ɛ̍ ke Chiin dɔɔ-a jǔ Juda ke Juda Ɛkɛlia jɔ sà-ɛa Jusu nyɔ̍ kwlǎ-ɛ ke.

¹⁷Jusu ke ɔ̍ gba̍tòà sɔ-a dě tlu̍h kɛ̍n-ɛ, iě ɔ̍ nyna i̍ dǒ tà pɛ̍lɛ-a i̍-ɛ, nɛ̀ dǒ ɔ̍ kòà tlùgbei̍ nɛ ke. Nɛ̀ nyɔ̍ sùɛ̀ sɔ Judia bloa̍ kli̍hgbɛ̍ kɛ̍n i̍, ɛ̍ ke dǒ Juluslɛn wlɔ̀ di̍i̍ ke. Nyɔ̍ sɔ dǒ jbǒ wɔ̍i̍n dǒ Taiɛ ke Saidɔn wlɔ̀ᵻ di̍i̍ ke

¹⁸u̍h ji̍ ɔ̍ wlu̍ wɔ̌n la̍-a, wɛ̀ u̍h iě u̍h-a wɛ̌ᵻ i̍ pǔh ke. Nyɔ̍ ùh jeědih nɛ-a dǒ de̍e̍-ɛ ji̍-i ke, iě u̍h pǔh.

¹⁹Wɛ̀ nyɔ̍ kli̍hgbɛ̍-a pɔ̀n ɔ̍ i̍ tǔh-ɛ i̍, dɛ̍nu̍ɛ, gbǐh-a sɔ dě ɔ̍ ja̍a̍ iě ɛ̍ pǔh-i nyɔ̍ kli̍hgbɛ̍.

²⁰Wɛ̀ Jusu gbɛ̀n ɔ̍ kòà ja̍ iě ɔ̍ la̍a̍, “Mɔ̀ɔ̍ ùh pa̍-a nyɔ̍gbà-ɛ, mɔ̀ nmɔ i̍. Dɛ̍nu̍ɛ, Nyɔsoa-a kmɔ̌ wlu̍ i̍ kɔn-ɛ kɔn dǒ mɔ̀ we̍.

²¹“Mɔ̀ɔ̍ ùh mɔ̌-a nu̍-a kaka-ɛ, mɔ̀ nmɔ i̍. Dɛ̍nu̍ɛ, mɔ̀-a wlùh-a mu̍ i̍ tè-ɛ. “Mɔ̀ɔ̍ ùh-a fìn-a kaka-ɛ, mɔ̀ nmɔ i̍. Dɛ̍nu̍ɛ, mɔ̀-a mu̍ kǐhlɛ.

²²“Mɔ̀ɔ̍ ùh nyɔ̍ɔ faɛn-a, u̍h-a chlèe-a u̍h-a dǎɛ-a dɛ̍ᵻ sɔ̀nᵻ nyɔ̍ wɛ̀ u̍h se̍-a jě-ɛ jbǎ Nyi̍ɔ̍-a Jǔ tìh-ɛ, nɛ̀ mɔ̀ nmɔ i̍.

²³Nɛ̀ mɔ̀ nu̍ mɔna̍ dɛ̍blɔ dǒ ti̍ laa̍ di̍i̍ mɔ̀ iě ja̍ de̍le. Dɛ̍nu̍ɛ, mɔ̀-a jě-dɛ̍ ku̍ wɔ̍n dě ja̍i̍wlɔ̀. Kǎ u̍h baaᵻ nu̍ Nyɔsoa-a tu̍owli po̍ nyɔ̍ ke.

²⁴“Jɛ chlě dǒ mɔ̀ɔ̍ ùh pàn-aɛ we̍. Dɛ̍nu̍ɛ, mɔ̀ wɔ̀ mɔ̀ naɛ kmɔ̌ chɛ̀ jě-ɛ wɛ̀.

²⁵“Chlě dǒ mɔ̀ɔ̍ ùh-a dbo̍-a kaka-ɛ we̍. Dɛ̍nu̍ɛ, mɔ̌-a mu̍ mɔ̀ nu̍. “Chlě dǒ mɔ̀ɔ̍ ùh-a kǐhlɛ-a kaka-ɛ we̍. Dɛ̍nu̍ɛ, mɔ̀-a mu̍ sùàɛ̀n pa̍ mɔ̀ iě fìn.

²⁶“Chlě dǒ mɔ̀ɔ̍ kɔn tìh chɛ̀ nyɔ̍ kli̍hgbɛ̍-a sà-aɛ we̍. Dɛ̍nu̍ɛ, kǎ u̍h baaᵻ nu̍ Nyɔsoa-a tu̍owli po̍ nyɔ̍-a si̍h naɛ-a tìh chɛ̀-ɛ sà-a ke.

²⁷“Jɛ na̍a̍, mɔ̀ɔ̍ juh ùh-a wɔ̌n-a ǎn wlu̍ i̍-ɛ, mɔ̀ jbɛɛ mɔ̀-a nyɛ̌-nyɔ̍-ɔ. Nɛ̀ mɔ̀ nu̍ dɛ̍ chɛ̀ dǒ nyɔ̍ ùh faɛn-a mɔ̀-ɛ we̍.

²⁸Tèle Nyɔsoa i̍ ɔ̍ iě nyɔ̍ ùh-a po̍-a mɔ̀ wlu̍we̍i̍-ɛ pɔ̀ìě nyǐ. Ba̍le dǒ nyɔ̍ ùh-a chlèe-a mɔ̀-ɛ u̍h-a tàà.

²⁹Pò nyɔ̍ tba̍ ìn gbǎ kèkà i̍-ɛ, nɛ̀ ìn to kèkà sie-a dǒ de̍-ɛ, ɔ̍ iě ɛ̍ gbǎ tba̍ ke. Pò nyɔ̍ sà àn dɛ̍wlo̍o̍ ìn kwa̍a̍-ɛ, nɛ̀ ìn nyǐ ɔ̍ àn wola̍ ke.

³⁰Nyɔ̍ kli̍hgbɛ̍ ùh-a mu̍-a ìn dɛ̍ jbǎ-ɛ, nyǐ ɛ̍ u̍h. Nɛ̀ pò nyɔ̍ gba̍ dɛ̍ ìn kɔn-aɛ, nɛ̀ ìn bɔ̌ ɛ̍ jbǎ-a dɛ.

³¹Dɛ̍ mɔ̀ jbɛɛ-a nyɔ̍ iě-a mɔ̀ pùn nu̍-ɛ, ɛ̍ bo mɔ̀ iě nyɔ̍ pùn nu̍ ke.

³²“Nyɔ̍ ùh jbɛɛ-a mɔ̀ɔ̍-ɛ, pò mɔ̀ jbɛɛ u̍h nɛ due we̍-ɛ, nɛ̀ dɛ̍ ɛ̍ mu̍-o mɔ̀ po̍ ɛ? Gblɛ̍n sɔ̀ɛ̀n nyɔ̍-a chɛ̀-a jbɛɛ nyɔ̍ ùh jbɛɛ-a u̍h-ɛ ke.

³³Pò mɔ̀ nu̍ dɛ̍ chɛ̀ dǒ nyɔ̍ ùh-a nu̍-a mɔ̀ dɛ̍ chɛ̀ pùn-ɛ nɛ due we̍-ɛ, nɛ̀ dɛ̍ ɛ̍ mu̍-o mɔ̀ po̍ ɛ? Gblɛ̍n sɔ̀ɛ̀n nyɔ̍-a chɛ̀-a nu̍ la̍a̍n ke.

³⁴Nyɔ̍ mɔ̀ po̍ gba̍-aɛ ùh-a mu̍-a ɛ̍ sà-ɛ, pò mɔ̀ po̍ u̍h nɛ due gba̍-aɛ, nɛ̀ dɛ̍ ɛ̍ mu̍-o mɔ̀ po̍ ɛ? Gblɛ̍n sɔ̀ɛ̀n nyɔ̍-a chɛ̀, u̍h-a po̍ gblɛ̍n sɔ̀ɛ̀n nyɔ̍ gba̍-a ke, dɛ̍nu̍ɛ, u̍h juo ɛ̍ u̍h-a gba̍-a mu̍ sà-ɛ dode̍.

³⁵Jɛ mɔ̀ jbɛɛ mɔ̀-a nyɛ̌-nyɔ̍-ɔ, nɛ̀ mɔ̀ nu̍ u̍h dɛ̍ chɛ̀ pùn. Mɔ̀ po̍ u̍h gba̍-aɛ, nɛ̀ mɔ̀ bɔ̌ ɛ̍ sà-a tìh gbàɛ̀. Nɛ̀ mɔ̀-a jě-dɛ̍-a mu̍ wɔ̍n ku̍, wɛ̀ mɔ̀ iě Sìì Nyɔ̍ Wɔ̍n Nyɔsoa-a nynuu̍ nu̍. Dɛ̍nu̍ɛ, ɔ̍ nmɔ gblɛ̍n-ɛa chɛ̀ dǒ nyɔ̍-a nynɛ̌ kɔ̌-ɛ nyɔ̍ ke kà kɔn nyɔ̍ we̍.

³⁶Ka mɔ̀ Baa Nyɔsoa-a jě-a nyɔ̍ wɔɛ, nɛ̀ kǎ mɔ̀ iě nu̍ ke.

³⁷“Mɔ̀ bɔ̌ nyɔ̍ duuh tìh pùn tù-ɛ, nɛ̀ Nyɔsoa se̍ mɔ̀ tìh pùn tù mu̍ ke. Mɔ̀ bɔ̌ nyɔ̍ duuh kɛ̀n sà-a, nɛ̀ Nyɔsoa se̍ mɔ̀ kɛ̀n sà mu̍ ke. Dɛ̍ᵻ sɔ̀nᵻ nyɔ̍ duuh nu̍-a mɔ̀ pùn-ɛ, mɔ̀ tǎli i̍h i̍, nɛ̀ Nyɔsoa-a mu̍ mɔ̀ naɛ i̍ tǎli ke.

³⁸Nyǐ nyɔ̍ duuh dɛ̍, nɛ̀ Nyɔsoa-a mu̍ mɔ̀ dɛ̍ nyǐ ke. Nɛ̀ ɛ̍ mu̍ i̍ tìè, ɛ̍ iě kwlǐh-i jǐi plɛplɛ ɛ̍ iě sɔ̀n i̍ wlǎ-ɛɛ. Nɛ̀ ɛ̍ bo ɛ̀ mu̍ chɛ̌li-ɛ dě mɔ̀ kwa̍a̍. Dbee dɛ̍ mɔ̀ nyǐ-a nyɔ̍ duuh-ɛ, dbee dɛ̍ laa̍ bo Nyɔsoa-a mu̍ mɔ̀ nyǐ ke.”

³⁹Wɛ̀ Jusu po̍ nɛnǎ la ke dě u̍h we̍. Ɔ̍ la̍a̍, “Dɔ̌-nyɔ̍ bɛ̌ɛ ɔ̍ iě dɔ̌-nyɔ̍-ɔ na-ɛ ae? Nɛ̀ u̍h nɛ-a sɔɔ̌n-ɛ, u̍h se̍ biě gbǎ mu̍ ae?

⁴⁰Sùku̍u̍ jǔ se̍ wɔ̍n ku̍ ɔ̍ se̍ ɔ̍ nǎ po̍ nyɔ̍ sìì. Jɛ pò nyɔ̍ poe-ɛ nǎ chɛ̀ɛ̌chɛ̀-ɛ, nɛ̀ ɔ̍ mu̍ ɔ̍ nǎ po̍ nyɔ̍ wɔ̀.

⁴¹“Tu̍ fɔ̌ jɛ nɛ-a dě ìn jlǐh-ɛ, dɛ̍nu̍ nɛ̀ gbɛ̀n ɛ̍ ja̍ wɛ̀ àn gbɛ̀n ìn ba̍ naɛ sɛɛɛ̍n ja̍ dě ɔ̍ jlǐh ɛ?

⁴²Dɛ̍nu̍ nàɛ̀ tu̍ fɔ̌ nɛ-a dě ìn jlǐh-ɛ, wɛ̀ ìn poe ɛ̍ kɛ̍n i̍ wɛ̀ nàa̍ ìè ìn ba̍ naɛ sɛɛɛ̍n dě ɔ̍ jlǐh sà ke̍ ɛ? Mɔ̀ la ɔ̀ nɛ-a mɛɔ sɔɔ̌n wɔ̍ɔ̍n-ɛ, sà nàɛ̀ tu̍ fɔ̌ nɛ-a dě ìn jlǐh-ɛ ke̍ sàǐtòò. Nɛ̀ àn mu̍ i̍ jě nmɔ jii̍, wɛ̀ ìè ɔ̍ naɛ sɛɛɛ̍n dě ɔ̍ jlǐh sà-a dǔ.

⁴³“Tu̍ chɛ̀-ɛ po̍ buǒᵻ sɔ̀nᵻ, nɛ̀ tu̍ sɔ̀n wɔ̍ po̍ buǒᵻ chɛ̀ ke.

⁴⁴Tu̍-a buǒ bo nyɔ̍-a juo-e tu̍ i̍. Mɔ̀ se̍ fei-tu̍ᵻá buǒᵻ jě mu̍ dě wiǎ-tu̍ᵻ ja̍. Nɛ̀ mɔ̀ se̍ mukwa̍ pei jě mu̍ i̍h iě gbòu̍gbò buǒᵻ po̍ ke.

⁴⁵Dě nyɔ̍ chɛ̀ ja̍a̍ bo dɛ̍ chɛ̀-a sɔ-ɛ, dɛ̍nu̍ɛ, dɛ̍ chɛ̀ bo ɔ̍ naɛ wlùh i̍. Nɛ̀ dě nyɔ̍ sɔ̀n ja̍a̍ bo dɛ̍ sɔ̀n-a sɔ-ɛ, dɛ̍nu̍ɛ, dɛ̍ sɔ̀n bo ɔ̍ naɛ wlùh i̍. Dɛ̍nu̍ɛ, dɛ̍ ɛ̀ nɛ-a dě nyɔ̍ wlùh di̍i̍-ɛ, ɛ̍ bo ɔ̍ wɔ̍n-a sà-a.

⁴⁶“Dɛ̍nu̍ mɔ̀-a dǎɛ ǐn Joi wɛ̀ mɔ̀-ɔ nu̍ dɛ̍ ǎn sèàɛ̍-a mɔ̀ wlùh ɛ?

⁴⁷Nyɔ̍-o-nyɔ̍ ɔ̀ mu̍-a dǒ ǐn de̍e̍ gbǎ-ɛ, pò ɔ̍ wɔ̌n ǎn wlu̍ wɛ̀ ɔ̍ iě dɛ̍ ǐn bla̍-ɛ nu̍-ɛ,

⁴⁸nɛ̀ ɔ̍ wɔ̀ jɔ̍gbau ɔ̀ ji̍-a gbò po̍ la̍-ɛ. Ɔ̍ blǔ biě tɔ̀ɔ̀n dǒ sɔɔ̌ kɛ̍n, dǒ ɔ̍ poe gbò laa̍ wlù i̍. Wɛ̀ tègbè tè, iě ɛ̍ du̍ gbò laa̍ we̍, wɛ̀ gbò-a chɛ̀ se̍ i̍ tǐhlɔ. Dɛ̍nu̍ɛ, ɛ̍ poe-ɛ kèi̍nkèi̍n.

⁴⁹Jɛ nyɔ̍ ɔ̀ wɔ̌n-a ǎn wlu̍ wɛ̀ ɔ̀ se̍-a ɛ̍ nu̍-ɛ, nɛ̀ ɔ̍ wɔ̀ jɔ̍gbau ɔ̀ po̍-a ɔ̍ gbò dǒ bloɔ̍, iě ɔ̍ se̍-a ɛ̍ wlù i̍ po̍-ɛ. Sɔ tègbè tè-aɛ, wɛ̀ ɛ̍ du̍ gbò laa̍ we̍, iě ɛ̍ nyna-o ɛ̍ blu̍, wɛ̀ ɛ̍ waɛ i̍ flɛ̀ɛ̌nflɛ̀ɛ̌n.”