Read Western Krahn Luu 8 Bible Online

Luu 8 - Western Krahn bible

Luu 8

¹Ɛ̍ se̍-o wlè wɛ̀ Jusu na tùgbàwlɔ̀ᵻ ke wlɔ̀ᵻ plìh di̍i̍ i̍. Wɛ̀ ɔ̍ bla̍ pɔ̀n chɛ̀ dǒ Nyɔsoa-a kmɔ̌ wlu̍ i̍ kɔn dɛ we̍. Nɛ̀ ɔ̍ ke ɔ̍ kòà-a pùè jɔ̌ sɔɔ̌n

²ke, nynɔ̌gbaɔᵻ duuh na, ùh ɔ̍ sà-a jeědih de̍e̍ i̍, wɛ̀ ɔ̍ bɔ̌-ɛ u̍h-a wɛ̌ᵻɛ́. U̍h-a nynɛ̌ nu̍ Mɛle ɔ̀ Jusu sà-a jeědih mɛ̀sɔɔ̌n de̍e̍ u̍h-a dǎɛ-a Makalin-ɛ,

³ɛ̍ ke Joana ɔ̀ kɔn kɔan Kusa nu̍-a Ɛlo-a kɔn-dɛ̍ᵻ we̍ i̍ gbɛ̀n nyɔ̍-a klaa-ɛ, ɛ̍ ke Susana ke. U̍h ke nynɔ̌gbaɔᵻ dɔu duuh bo ùh gbǎ Jusu ke ɔ̍ kòà we̍ dǒ u̍h-a chɛ̀-a sɔ̍n kɛ̍n.

⁴Nyɔ̍ tlùgbei̍ gbǎ tàdùè iě nyɔ̍ɔ sɔ wlɔ̀ᵻ di̍i̍ i̍ u̍h mu̍ dě Jusu we̍. Dǒ ɔ̍ poe nɛnǎ. Ɔ̍ la̍a̍,

⁵“Jɔ̍gbau due bo ɔ̀ mu̍ dɛ̍ᵻ jɔ̌ gbà la̍-a. Ɔ̍ gbà-a i̍h dě klè-ɛ, diih gbǎ dǒ wìè gblùh i̍. Wɛ̀ nyɔ̍gbei na i̍h kɛ̍n i̍, iě na̍wɛ̍ᵻ di̍ i̍h.

⁶Diih gbǎ dǒ sɔɔ̌ paɔ kɛ̍n. I̍h wlǔh-aɛ, wɛ̀ i̍h wlɔ̍. Dɛ̍nu̍ɛ, i̍h-i jě nǐ.

⁷Wɛ̀ diih gbǎ dě klàɛ̀n di̍i̍, iě i̍h ke wiǎᵻ ku̍-i tàdùè. Wɛ̀ i̍h mɔɛ i̍h dlǔ i̍.

⁸Wɛ̀ diih gbǎ dǒ gbablu̍h i̍, iě i̍h nmɔ, wɛ̀ jɛ-ɛ, nɛ̀ ɛ̍ blě jɔ̌-a kmɛ due.” Jusu wɔ̌an chlà-a tìh-ɛ, ɔ̍ la̍a̍, “Nyɔ̍ flɔn-a dounᵻɛ́, nɛ̀ ɔ̍ po̍-e dounᵻ.”

⁹Wɛ̀ Jusu-a kòà tèle ɔ̍ i̍ ɔ̍ iě nɛnǎ la gbɔ̀ sà dě u̍h we̍.

¹⁰Iě ɔ̍ la̍a̍, “Mɔ̀ɔ̍ nɔ̀ɔ̍, Nyɔsoa nu̍ ɛ̍ wɛ̀ dɛ̍ᵻ ìh nɛ-a dě kwile de dě ɔ̍ kmɔ̌ wlu̍ i̍ kɔn-ɛ di̍i̍-ɛ, wɛ̀ mɔ̀ juo i̍h. Jɛ dǒ nyɔ̍ duuh we̍-ɛ, nɛ̀ i̍h nɛ dě nɛnǎᵻ di̍i̍. Sɔ nɛ̀ u̍h-a gbèɛ̀ɛ̍n i̍, jɛ u̍h-u jě i̍. U̍h-a pu̍e̍e dounᵻ i̍, jɛ u̍h-u wɔ̌n dɛ̍ɛ̍ i̍.

¹¹“Nɛnǎ-a chɛ̀ ɛ̍ gbɔ̀ la. Dɛ̍ᵻ jɔ̌ bo ìh nu̍ Nyɔsoa-a wlu̍.

¹²Dɛ̍ᵻ jɔ̌ ìh gbǎ-a dǒ wìè gblùh i̍-ɛ, nyɔ̍ ùh wɔ̌n-a Nyɔsoa-a wlu̍ iě Kǔ ji̍-a ɛ̍ sà-a ɛ̍ dǒ u̍h wlùh kɛ̍n-ɛ, u̍h bo i̍h wɔ̀. Wɛ̀ u̍h-u je̍e wlùh gbaɛ blě, nɛ̀ u̍h-a mu̍ la̍ pǔh.

¹³Jih gbǎ-a dǒ sɔɔ̌ paɔ kɛ̍n-ɛ, i̍h bo ìh wɔ̀ nyɔ̍ ùh wɔ̌n-a Nyɔsoa-a wlu̍ iě u̍h gbɛ̍n-a ɛ̍ i̍ dǒ mɔna̍ we̍-ɛ. Jɛ ɛ̍ se̍ sɛ̌n po̍ dě u̍h ku̍sɔ̀n. Ɛ̍ kɔn u̍h blě wlùh gbaɛ dǒ ti̍ gbɔ̀ di̍i̍. Jɛ nyɔ̍ i̍ tɛ̀n-ɛ ji̍-aɛ, iě u̍h ple̍.

¹⁴Jih gbǎ-a dě klàɛ̀n di̍i̍-ɛ, i̍h wɔ̀ nyɔ̍ ùh wɔ̌n-a Nyɔsoa-a wlu̍-ɛ. Jɛ ti̍ gbɔ̍ sì-aɛ, wɛ̀ kmɔ̌-a sèò ke pàn-dɛ̍ᵻ i̍ jbɛɛ-ɛ ke gbale̍e̍ gbǎ-a mɔɛ u̍h dlǔ i̍. Ɛ̍ kɔn u̍h-a buǒᵻ fǒ.

¹⁵Jih gbǎ-a dǒ gbablu̍h i̍-ɛ, i̍h bo ìh wɔ̀ nyɔ̍ ùh wɔ̌n-a Nyɔsoa-a wlu̍ iě u̍h gbɛ̍n-a ɛ̍ i̍ dǒ wlùh ɛ̀ nmɔ-a jii̍ chɛ̀ɛ̌chɛ̀-ɛ we̍-ɛ. Wɛ̀ u̍h se̍ se̍a̍, iě u̍h tlo.

¹⁶“Nyɔ̍-ɔ tba̍ nape̍ wɛ̀ nɛ̀ po̍ ɛ̍ dě too sɔ̀n, àe̍e̍ dě kɛ̍n pɛ̌n dɛ̍ sɔ̀n. Jɛ nyɔ̍-a pèle ɛ̍ ja̍i̍, wɛ̀ nyɔ̍ ùh-a pa̍-a gbò-ɛ, iě u̍h-a jě i̍.

¹⁷“Dɛ̍-o-dɛ̍ ɛ̀ sìle-aɛ, ɛ̍ mu̍ tà wlǔh. Nɛ̀ dɛ̍ ɛ̀ nɛ-a dě kwile-ɛ, ɛ̍ mu̍ dǒ gbaɛ̍we̍ ji̍.

¹⁸“Ka mɔ̀-a nu̍-a dɛ̍-ɛ wɔ̌n-ɛɛ, mɔ̀ nu̍ dǒ-a nɛnɛ̌. Dɛ̍nu̍ɛ, nyɔ̍ ɔ̀ blě-a dɛ̍-ɛ, nɛ̀ ɔ̍ mu̍ dɛ̍ dɔu nyǐ-ɛ. Jɛ nyɔ̍ ɔ̀ se̍-a dɛ̍ blě-ɛ, nɛ̀ dɛ̍ juwɛ-a chɛ̀ ɔ̍ la̍ ɔ̍ blě-a, ɛ̍ mu̍ ɔ̍ kwa̍a̍ sà-ɛ.”

¹⁹Wɛ̀ Jusu de̍ ke ɔ̍ de̍di̍i̍ᵻ jɔ̍gbauᵻ ji̍ dǒ ɔ̍ we̍. Jɛ u̍h se̍ dě ɔ̍ we̍ nyni̍-ɛ bɛ̌ɛ. Dɛ̍nu̍ɛ, nɛ̀ nyɔ̍ tìè i̍.

²⁰Wɛ̀ nyɔ̍ sèàɛ̍ ɔ̍ wlùh, u̍h la̍a̍, “Ìn de̍ ke ìn de̍di̍i̍ᵻ nyna i̍ dě sɔ̀n u̍h-a pɔ̀n ìn jě-ɛ i̍.”

²¹Jɛ Jusu la̍a̍ dě u̍h kli̍hgbɛ̍ we̍, “Nyɔ̍ ùh wɔ̌n-a Nyɔsoa-a wlu̍ wɛ̀ u̍h-a nu̍-a ɛ̍-ɛ, u̍h-u bo ùh nu̍ ǐn de̍ ke ǐn de̍di̍i̍ᵻ.”

²²Dǒ weɛ̍ due di̍i̍ wɛ̀ Jusu ke ɔ̍ kòà gbǎ dě blǎgbè di̍i̍. Iě ɔ̍ la̍a̍ dě u̍h we̍, “Mɔ̀ à tàn à iě dě pɛ̍nu̍ klaa la ɛ̍ fɔ̌ dɛɛ we̍ mu̍.” Wɛ̀ u̍h-a mu̍-e.

²³U̍h-a mu̍-a la̍-ɛ, wɛ̀ Jusu gbǎ nyinɔ̍ i̍. Iě tìlèè poɔ ji̍ dǒ pɛ̍nu̍ kɛ̍n. Wɛ̀ nǐ-a wlǎ dě blǎgbè di̍i̍. Sɔ ɛ̍ nu̍ kanɛa dɛ̍ dǒ u̍h we̍.

²⁴Wɛ̀ ɔ̍ kòà mu̍ dě ɔ̍ we̍. Iě u̍h bla̍ ɔ̍ kɛ̍n i̍, u̍h la̍a̍, “Dlǔtu, à ji̍ mɛ̌ la̍-a wa.” Wɛ̀ Jusu sɔ bloɔ̍, iě ɔ̍ po̍ poɔ ke pɛ̍nu̍-a je̍ɔ̍ dǒ bɔ̌ i̍. Iě poɔ ke dǒ nɛ tùàa̍n.

²⁵Wɛ̀ ɔ̍ la̍a̍ dě u̍h we̍, “Dɛ̍nu̍ mɔ̀ se̍ wlùh gbaɛ blě ɛ?” Sɔ ɛ̍ po̍ u̍h faɔn iě ɛ̍ wlǔh i̍ u̍h de̍e̍, wɛ̀ u̍h-a tèle-e we̍ i̍. U̍h la̍a̍, “Dɛ̍-ɛ jɔ̍gbau we̍ la ɛ? Ɔ̍ po̍ poɔ ke dǒ bei bɔ̌ i̍, wɛ̀ i̍h-a jě ɔ̍ dɛ̍ɛ̍ wa.”

²⁶Wɛ̀ Jusu ke ɔ̍ kòà nyni̍ dě Kɛwlasa bloa̍ kɛ̍n, ɛ̀ nɛ-a dǒ Kaladii-a blaɛjlǐh-ɛ.

²⁷Jusu jǎ-a dǒ gbuǔh kɛ̍n ka-ɛ, wɛ̀ jɔ̍gbau ɔ̀ jeědih nɛ-a dǒ de̍e̍ ɔ̀ tǐn-a dǒ wlɔ̀ laa̍ di̍i̍ de-ɛ ji̍ ɔ̍ wlì. Nɛ̀ ɔ̍ bɔ̌-a dɛ̍ gbɔ̀ tba̍ tìh-ɛ, ɛ̍ ti̍ tɛ̀n dlǔ wɛ̀. Ɔ̍-ɔ tǐn dě gbò, dě kǔ i̍ tè wɔ̍ᵻ di̍i̍ bo ɔ̍ tǐn.

²⁸Ɔ̍ jě-a Jusu-ɛ, wɛ̀ ɔ̍ wǐ, iě ɔ̍ chlìi i̍ dǒ ɔ̍ jǔ. Iě ɔ̍ la̍a̍, “Jusu, Nyɔ̍ Wɔ̍n Sìì Nyɔsoa-a Jǔ, ka àn pɔ̀n ìè ǎn tìh nu̍ ɛ? Ǎn ba̍le m̀, bɔ̌ ǐn kàn gbɛ̍n-ɛ.”

²⁹Ɔ̍ bla̍ ɛ̀ la, dɛ̍nu̍ɛ, Jusu sèàɛ̍ jeědih laa̍ wlùh ɛ̍ iě dǒ ɔ̍ de̍e̍ sɔ. Dǒ ti̍ dɔu di̍i̍-ɛ, ɛ̍ sǐ ɔ̍ kɛ̍n. Nɛ̀ u̍h-a gbɛ̍n ɔ̍-ɛ, iě u̍h-a sa̍n-ɛ ɔ̍ jɔɔdbǔᵻ. Jɛ nɛ̀ ɔ̍ chɛ̍n i̍h, wɛ̀ ɛ̍ gba̍ ɔ̍ dě kwlǎslò we̍.

³⁰Iě Jusu tèle ɔ̍ i̍, ɔ̍ la̍a̍, “Àn nynɛ̌ ɛ?” Iě ɔ̍ la̍a̍, “Ǎn nynɛ̌ bo Sùɛ̀.” Dɛ̍nu̍ɛ, jeědih dɔu nɛ dǒ ɔ̍ de̍e̍.

³¹Iě jeědih ba̍le Jusu, ɔ̍-ɔ je̍e i̍h dě kàn gbɛ̍n biě di̍i̍ dbo̍.

³²Nɛ̀ be̍e̍ᵻ dɔu nɛ dǒ gbɔ̍ɔ̍-a chɛ̀ i̍h-a di̍ dɛ̍ dǒ tlu̍h gbèɛ̀n i̍. Wɛ̀ jeědih ba̍le Jusu ɔ̍ iě i̍h dǒ be̍e̍ᵻ de̍e̍ po̍. Iě ɔ̍ sà i̍h wlu̍ kɛ̍n.

³³Wɛ̀ i̍h sɔ dǒ jɔ̍gbau laa̍ de̍e̍, iě i̍h gbǎ dǒ be̍e̍ᵻ de̍e̍. Wɛ̀ be̍e̍ᵻ sùɛ̀ laa̍ i̍h sà ple̍-ɛ dě gbuǔh tɔ̀ɔ̀n kɛ̍n, iě i̍h wlǎ dǒ pɛ̍nu̍ klaa kɛ̍n, wɛ̀ i̍h sie niɔ̍.

³⁴Ùh-a gbɛ̀n-a dǒ be̍e̍ᵻ laa̍ we̍ i̍-ɛ, u̍h jě-a dɛ̍ ɛ̀ nɛ-a i̍h pùn-ɛ, iě u̍h gba̍ ple̍-ɛ wlɔ̀. Wɛ̀ u̍h po̍ i̍h-a kunǎ dǒ wlɔ̀ ɛ̍ ke u̍h-a bloa̍ kli̍hgbɛ̍ kɛ̍n i̍ ke.

³⁵Wɛ̀ nyɔ̍gbei mu̍ dɛ̍ ɛ̀ nɛ-aɛ jě la̍-a. Iě u̍h nyni̍ dǒ Jusu we̍. Wɛ̀ u̍h jě jɔ̍gbau ɔ̀ jeědih sɔ-a dǒ de̍e̍-ɛ, nɛ̀ ɔ̍ ji̍ ɔ̍ chɛ̀ we̍ wɛ̀ ɔ̍ tè i̍ dǒ Jusu jǔ. Ɔ̍ pa̍ dɛ̍-ɛ nmɔ jii̍. Sɔ ɛ̍ po̍ u̍h kli̍hgbɛ̍ faɔn.

³⁶Nyɔ̍ ùh jě-a ka jɔ̍gbau jeědih nɛ-a dǒ de̍e̍ de-ɛ ɔ̍ nu̍-a pǔh-ɛɛ, iě u̍h sèàɛ̍ nyɔ̍gbei wlùh.

³⁷Wɛ̀ nyɔ̍ kli̍hgbɛ̍ ùh sɔ-a dě Kɛwlasa bloa̍-a fɔ̌ la-a we̍-ɛ, u̍h sèàɛ̍ Jusu wlùh ɔ̍ iě dǒ u̍h we̍-e sɔ. Dɛ̍nu̍ɛ, ɛ̍ po̍ u̍h faɔn kaa̍. Wɛ̀ Jusu gbǎ dě de̍ blǎgbè di̍i̍ iě ɔ̍ mu̍ de̍.

³⁸Jɔ̍gbau ɔ̀ jeědih sɔ-a dǒ de̍e̍-ɛ, ɔ̍ ba̍le Jusu ɔ̍ ke ɔ̍ iě mu̍. Jɛ Jusu dbo̍ ɔ̍ de̍, ɔ̍ la̍a̍,

³⁹“Mu̍ de̍ dǒ ìn blǐ wlɔ̀ wɛ̀ ìè dɛ̍ chɛ̀ Nyɔsoa nu̍-a ìn jii̍-ɛ we̍i̍ bla̍.” Wɛ̀ jɔ̍gbau mu̍ iě ɔ̍ ple̍ wlɔ̀ kli̍hgbɛ̍ we̍, wɛ̀ dɛ̍ Jusu nu̍-a ɔ̍ jii̍-ɛ, iě ɔ̍ bla̍ ɛ̍ we̍i̍.

⁴⁰Jusu mu̍-a de̍-ɛ, iě nyɔ̍ dɔu laa̍ u̍h gbɛ̍n ɔ̍ tìh i̍. Dɛ̍nu̍ɛ, nɛ̀ u̍h kli̍hgbɛ̍ u̍h-a fuo ɔ̍ kɛ̍ɛ̍n.

⁴¹Wɛ̀ jɔ̍gbau due ji̍, ɔ̍ nynɛ̌ bo Jaleɔ. Ɔ̍-ɔ bo ɔ̀ kɔn Juu nyɔ̍-a wɛɛ sà gbò wlu̍ i̍. Wɛ̀ ɔ̍ chlìi i̍ dǒ Jusu jǔ. Wɛ̀ ɔ̍ ba̍le ɔ̍, ɔ̍ iě dě ɔ̍ blǐ gbò mu̍.

⁴²Dɛ̍nu̍ɛ, ɔ̍ nynɔ̌gbaɔ jǔ due gbài̍ ɔ̍ blě-aɛ, ɔ̀ kɔn sɔ̀nᵻ nu̍-a pùè jɔ̌ sɔɔ̌n-ɛ, nɛ̀ ɔ̍ bo ɔ̀ ji̍ mɛ̌ la̍-a. Jusu-a mu̍-a deě-ɛ, nɛ̀ nyɔ̍ tlùgbei̍ po̍ ɔ̍ dě pìe̍e̍.

⁴³Nɛ̀ nynɔ̌ due ɔ̀ nmi̍i̍wlì wɛ̌-a nu̍-a dǒ sɔ̀nᵻá pùè jɔ̌ sɔɔ̌n di̍i̍-ɛ nɛ-o. Ɔ̍ ple̍ ɔ̍ wlǐ kli̍hgbɛ̍ dě kwɛ̍i̍n nyɔ̍ we̍. Jɛ nyɔ̍ se̍ ɔ̍ pǔh-iɛ bɛ̌ɛ.

⁴⁴Wɛ̀ ɔ̍ jii dě Jusu de̍e̍, iě ɔ̍ tǔh ɔ̍ plɛ̀i̍-a mlǎ i̍. Dǒ tàdùè laa̍ ɔ̍ nymɔ̍ kǎ-ɛ.

⁴⁵Wɛ̀ Jusu la̍a̍, “Nyɔ̍ bo ɔ̀ tǔh ǐn i̍ ɛ?” Nyɔ̍ kli̍hgbɛ̍ tòlo-e. Iě Pitɛ la̍a̍, “Dlǔtu, nyɔ̍ tlùgbei̍ la ùh po̍-a ìn dě pìe̍e̍-ɛ bo ùh-a tǔh ìn i̍.”

⁴⁶Jɛ Jusu la̍a̍, “Nyɔ̍ tǔh ǐn i̍ tìh-àn-wlu. Dɛ̍nu̍ɛ, ǐn juo-o dɛ̍ i̍ ka gbǐh sɔ-a dě ǐn ja̍a̍-ɛ.”

⁴⁷Nynɔ̌ gbɛ̀n-a ɛ̍ ja̍ ka ɛ̍ se̍-a sìle-ɛ, iě ɔ̍ ku̍ blě tlɛ̍-ɛ ɔ̍ ji̍, wɛ̀ ɔ̍ chlìi i̍ dǒ Jusu jǔ. Wɛ̀ ɔ̍ sèàɛ̍ ɛ̍ we̍ i̍ dǒ nyɔ̍ kli̍hgbɛ̍ jlǐhwai dɛ̍ kɔn tìh ɔ̍ tǔh-a Jusu i̍ wɛ̀ ɔ̍ pǔh-a dǒ tàdùè laa̍-ɛ.

⁴⁸Wɛ̀ Jusu la̍a̍ dě ɔ̍ we̍, “Nynɔ̌ chɛ̀, àn wlùh gbaɛ bo ɛ̀ nu̍ ɛ̍ wɛ̀ ìn pǔh. Mu̍ pɛlɛpɛ.”

⁴⁹Jusu-a bla̍-a ɛ̀ la-ɛ, iě jɔ̍gbau due sɔ dě Jaleɔ blǐ gbò, ɔ̍ la̍a̍, “Àn nynɔ̌gbaɔ jǔ mɛ̌ wɛ̀. Bɔ̌ Dlǔtu wɔ̍ɔ̍n i̍ bɛ̌ɛ dɛ.”

⁵⁰Jɛ Jusu wɔ̌n-a ɔ̍ wlu̍-ɛ, iě ɔ̍ la̍a̍ dě Jaleɔ we̍, “Bɔ̌ faɔn ple̍-ɛ, wlùh gbaɛ nɛ due bo ìè blě, nɛ̀ ɔ̍ mu̍ pǔh.”

⁵¹Jusu nyni̍-a dě Jaleɔ blǐ gbò-ɛ, ɔ̍ se̍ wɔ̌n ɔ̍ ke nyɔ̍ duuh iě-e gbò pa̍. Pitɛ ke Chɔɔn ke Chiin ke nynɔ̌gbaɔ jǔ de̍ ke ɔ̍ baa bo ùh ke ɔ̍ pa̍.

⁵²Nɛ̀ nyɔ̍ kli̍hgbɛ̍-a fìn-i u̍h-a we̍le nynɔ̌gbaɔ jǔ-a tìh. Wɛ̀ Jusu la̍a̍, “Mɔ̀ bɔ̌ fìn-ɛ, ɔ̍ se̍ mɛ̌. Jɛ ɔ̍ mɔ̌-ɛ.”

⁵³Wɛ̀ u̍h kli̍hgbɛ̍ kǐhlɛ Jusu. Dɛ̍nu̍ɛ, u̍h juo i̍h ka ɔ̍ mɛ̌-aɛ.

⁵⁴Jɛ Jusu gbɛ̍n ɔ̍ sɔ̍n i̍, wɛ̀ ɔ̍ plǎn, ɔ̍ la̍a̍, “Nynɔ̌gbaɔ jǔ, sɔ bloɔ̍.”

⁵⁵Wɛ̀ ɔ̍ feɛ ji̍ ɔ̍ we̍ dode̍, iě ɔ̍ sɔ bloɔ̍ dǒ tàdùè laa̍. Wɛ̀ Jusu sèàɛ̍ u̍h wlùh u̍h iě ɔ̍ di̍-dɛ̍ nyǐ ɔ̍ iě di̍.

⁵⁶Sɔ ɛ̍ wlǔh i̍ ɔ̍ de̍ ke ɔ̍ baa de̍e̍. Jɛ Jusu nɛ̌ɛ u̍h wlu̍ dounᵻ i̍ u̍h-u je̍e nyɔ̍-o-nyɔ̍ wlùh sèàɛ̍ dǒ ɛ̀ nɛ-aɛ we̍.