Read Western Krahn Chɔɔn 1 Bible Online

Chɔɔn 1 - Western Krahn bible

Chɔɔn 1

¹Kmɔ̌ iě-a nui-ɛɛ, nɛ̀ ɔ̀ kɔn nynɛ̌ nu̍-a Wlu̍-ɛ nɛ̀ ɔ̍ nɛ wɛ̀ se̍e̍. Ɔ̍ nɛ dǒ Nyɔsoa we̍, ɔ̍ se̍ nɛ wɛ̀ Nyɔsoa se̍ nɛ.

²Sɔ dě tɔ̀blɔ̍ɔ̍-ɛ, nɛ̀ ɔ̍ nɛ dǒ Nyɔsoa we̍.

³Dě ɔ̍ ja̍a̍ bo Nyɔsoa nui dɛ̍ᵻ kli̍hgbɛ̍. Dɛ̍ ɛ̀ se̍-a nui-ɛ dě ɔ̍ ja̍a̍-ɛ, nɛ̀ ɛ̍ se̍ nɛ.

⁴Dě ɔ̍ ja̍a̍ bo feɛ nɛ. Feɛ laa̍ bo ɛ̀ nu̍ sɔ̀npli dǒ nyi̍ɔ̍ we̍.

⁵Sɔ̀npli laa̍ bo ɛ̀ fa̍n dě kwile-e, wɛ̀ kwile se̍ ɛ̍ mɔ̌-ɛ bɛ̌ɛ.

⁶Jɔ̍gbau due bo Nyɔsoa dbo̍, ɔ̍ nynɛ̌ bo Chɔɔn.

⁷Ɔ̍ ji̍-i ɔ̍ iě sɔ̀npli laa̍ ɛ̍ sàànsi̍i̍h nu̍, wɛ̀ ɔ̍ iě ɛ̍ tìh nyɔ̍ wlùh sèàɛ̍. Nɛ̀ nyɔ̍ kli̍hgbɛ̍-a mu̍ ɔ̍-ɔ jii wɛ̀ u̍h iě ɛ̍ tìh chɛ̀ po̍.

⁸Ɔ̍ chɛ̀ nɔ̀ɔ̍, ɔ̍ se̍ sɔ̀npli, jɛ ɔ̍ ji̍-i wɛ̀ ɔ̍ iě ɛ̍ sàànsi̍i̍h nu̍.

⁹Tìh-a taǐn sɔ̀npli ɛ̀ fa̍n-a dǒ nyɔ̍ kli̍hgbɛ̍ we̍-ɛ, ɛ̍-ɛ bo ɛ̀ ji̍ la̍ nɔ̌ kmɔ̌ we̍.

¹⁰Ɔ̀ kɔn nynɛ̌ nu̍-a Wlu̍-ɛ, ɔ̍ nɛ nɔ̌ kmɔ̌, iě kmɔ̌ nui-ɛ dě ɔ̍ ja̍a̍. Jɛ kmɔ̌-a nyɔ̍ se̍ ɔ̍ juo.

¹¹Ɔ̍ ji̍ dǒ ɔ̍ chɛ̀ blǐ, iě ɔ̍ chɛ̀-a blǐ nyɔ̍ se̍ ɔ̍ tìh i̍ gbɛ̍n.

¹²Jɛ nyɔ̍ juh gbɛ̍n-a ɔ̍ tìh i̍ iě u̍h gbaɛ-a ɔ̍ wlùh-ɛ, ɔ̍ nu̍ ɛ̍ iě u̍h nu̍ Nyɔsoa-a nynuu̍.

¹³Nyɔsoa-a chɛ̀ bo ɔ̀ nu̍ u̍h ɔ̍ nynuu̍ we̍i̍. U̍h se̍ wlǔh plǒai ka. U̍h-a wlǔh-ɛ se̍ dě nyi̍ɔ̍ we̍ sɔ-ɛ.

¹⁴Ɔ̀ kɔn nynɛ̌ nu̍-a Wlu̍-ɛ, ɔ̍ ji̍-i dě nyi̍ɔ̍tu di̍i̍ iě ɔ̍ tǐn nɔ̌ à nynɛ̌. Ɔ̍ toe àɔ̀ blɛ ke tìh-a taǐn kli̍hgbɛ̍ ìh kɔ̍-a dǒ Nyɔsoa pùn i̍-ɛ. Wɛ̀ à jě ɔ̍ tìh-a i̍ bɛ̌-ɛ ɛ̀ kɔn-a dǒ ɔ̍ we̍ ka ɔ̍ nu̍-a Baa Nyɔsoa-a Jǔ jɔɛ̍ due gbài̍-ɛ.

¹⁵Chɔɔn bla̍ ɔ̍ tìh. Ɔ̍ we̍le-aɛ, iě ɔ̍ la̍a̍, “Ɔ̀ la ɔ̍ kɔn tìh bo ǐn bla̍, wɛ̀ na̍a̍, ‘Ɔ̀ mu̍-a ǐn kɛ̍n i̍ ji̍-ɛ, ɔ̍ ku̍ wɔ̍n ɔ̍ sìì m̀. Dɛ̍nu̍ɛ, ɔ̍ nɛ kmɔ̌ sasǎ wɛ̀ ǐn dǔ wlǔh-ɛ.’ ”

¹⁶Blɛ ɛ̀ jǐ-a dě ɔ̍ ja̍a̍-ɛ, ɛ̍ bo ɛ̀ jě-e à kli̍hgbɛ̍ pɔ̀ìě dɔu dɔu.

¹⁷Nyɔsoa-a telě jii dě Mose ja̍a̍, jɛ ɔ̍ blɛ ke tìh-a taǐn kli̍hgbɛ̍ ìh kɔ̍-a dǒ ɔ̍ pùn i̍-ɛ, i̍h jii dě Jusu Klai ja̍a̍ iě à jě i̍h.

¹⁸Nyɔ̍-ɔ se̍a Nyɔsoa jě. Jɛ Jǔ jɔɛ̍ due gbài̍ ɔ̀ nɛ-a dǒ Baa Nyɔsoa pùn-ɛ, ɔ̍-ɔ bo ɔ̀ nɛ kmɔ̌ iě nyɔ̍-a juo Nyɔsoa.

¹⁹Dǒ ti̍ laa̍ di̍i̍-ɛ, iě Juu nyɔ̍-a nyɔ̍ klaaᵻ nɛ-a dǒ Juluslɛn wlɔ̀ di̍i̍-ɛ, u̍h dbo̍ Nyɔsoa-a slaǎ sà nyɔ̍ ke Liifaɛ nynuu̍ dě Chɔɔn we̍, u̍h iě ɔ̍ i̍ tèle-ɛ ka dǎ, “Mɔ̀ nyɔ̍we̍ ɛ?” Ɔ̍ se̍ ɛ̍-ɛ nynii ke, iě ɔ̍ sà u̍h-a wlu̍ pɔ̀n we̍. Ɔ̍ flɔn-ɛ ɛ̍ we̍i̍, ɔ̍ la̍a̍, “Ǐn se̍ Nyɔsoa-a Chèɛ̀ Tba̍ju.”

²⁰

²¹Iě u̍h tèle ɔ̍ i̍ dɛ, u̍h la̍a̍, “Mɔ̀ nyɔ̍we̍ la̍ ɛ? Mɔ̀ Ilaɛja ae?” Wɛ̀ ɔ̍ la̍a̍, “Ǐn se̍ ɔ̍ mɔ.” Iě u̍h la̍a̍, “Mɔ̀ Nyɔsoa-a tu̍owli po̍ nyɔ̍ ɔ̀ kɔn tìh à gbaɛ-a ae?” Wɛ̀ ɔ̍ la̍a̍, “Iěe.”

²²U̍h la̍a̍ dě ɔ̍ we̍, “Mɔ̀ nyɔ̍we̍ ɛ? Flɔn-ɛ dě à di̍i̍ wɛ̀ à iě nyɔ̍ dbo̍-a àɔ̀-ɛ kunǎ wlì gba̍ ka̍ jě. Ka àn tìh nɛ ɛ?”

²³Wɛ̀ Chɔɔn la̍a̍, “Mɔ̍ ɔ̀ nu̍-a Nyɔsoa-a tu̍owli po̍ nyɔ̍ Asaia-a dǎ-a, ‘Ɔ̀ we̍le-a dě kwlǎslò we̍, mɔ̀ slɛ̌-ɛ wìè-i dǒ Joi we̍-ɛ,’ mɔ̍ la.”

²⁴Nyɔ̍ ùh Fɛlesii nyɔ̍ dbo̍-aɛ

²⁵iě u̍h tèle Chɔɔn i̍, u̍h la̍a̍, “Nàa̍ ìn se̍-a Chèɛ̀ Tba̍ju, iě ìn se̍-a Ilaɛja, iě mɔ̀ɔ̍ ìn se̍-a Nyɔsoa-a tu̍owli po̍ nyɔ̍ ke-ɛ, nɛ̀ dɛ̍nu̍ àn po̍ nyɔ̍ nǐ dlǔ la̍ ɛ?”

²⁶Wɛ̀ Chɔɔn la̍a̍, “Ǐn po̍ nyɔ̍ nǐ dlǔ dǒ nǐ we̍, jɛ nyɔ̍ due nyna i̍ dě mɔ̀ nynɛ̌ mɔ̀ se̍ ɔ̍ juo.

²⁷Ɔ̍ bo ɔ̀ mu̍ ǐn kɛ̍n i̍ ji̍. Ǐn se̍ i̍ blaɛ iě ɔ̍ bu̍hdih-a chɛ̀ i̍ tǔh.”

²⁸Ìh kli̍hgbɛ̍ la dǒ Bɛtani wlɔ̀ di̍i̍ bo i̍h nɛ-ɛ dě Jɔɔdɛn nǐ-a fɔ̌ dɛɛ we̍, tà Chɔɔn-a poe-a nyɔ̍ nǐ dlǔ-ɛ.

²⁹Sɔ̀n dɛɛ sɛ̀n-aɛ, wɛ̀ Chɔɔn jě Jusu nɛ̀ ɔ̍ ji̍ ɔ̍ wlì. Iě ɔ̍ la̍a̍, “Gbɛ̀n-e, Nyɔsoa-a Blawɛ̌ Jǔ ɔ̀ sà-a gblɛ̍n sɔ̀ɛ̀n i̍ da̍a kmɔ̌ we̍-ɛ la.

³⁰Ɔ̀ la ɔ̍ kɔn tìh bo ǐn bla̍, wɛ̀ na̍a̍, ‘Ɔ̀ mu̍-a ǐn kɛ̍n i̍ ji̍-ɛ, ɔ̍ ku̍ wɔ̍n ɔ̍ sìì m̀. Dɛ̍nu̍ɛ, ɔ̍ nɛ kmɔ̌ sasǎ wɛ̀ ǐn dǔ wlǔh-ɛ.’

³¹Ǎn chɛ̀ ǐn se̍ ɔ̍ juo de, jɛ ǐn ji̍ i̍ iě ǐn po̍ nyɔ̍ nǐ dlǔ dǒ nǐ we̍, wɛ̀ iě ɔ̍ Eslɔɛ nyɔ̍ tà sà-ɛ.”

³²Wɛ̀ Chɔɔn sà dɛ̍ ɔ̍ jě-a tìh i̍, ɔ̍ la̍a̍, “Ǐn jě Nyɔsoa-a Sùù nɛ̀ ɛ̍ sɔ dě ja̍i̍wlɔ̀ ɛ̍ ji̍ wlù ka gbɔ̀lǐh-ɛ, iě ɛ̍ gbǎ ɔ̍-ɔ.

³³Ǎn chɛ̀ ǐn se̍ ɔ̍ juo de, jɛ ɔ̀ dbo̍-a m iě-a nyɔ̍ nǐ dlǔ po̍ dǒ nǐ we̍-ɛ, ɔ̍ bo ɔ̀ la̍a̍ dě ǐn we̍, ‘Jɔ̍gbau àn mu̍-a jě Nyɔsoa-a Sùù iě-a wlù ji̍ wɛ̀ ɛ̍ iě-a ɔ̍-ɔ gbǎ-ɛ, nɛ̀ ɔ̍-ɔ bo. Nyɔsoa-a Sùù bo ɛ̀ mu̍ nǐ nu̍ ɔ̍ iě mɔ̀ dlǔ po̍.’

³⁴Wɛ̀ ǐn jě ɛ̍ nɛ la̍, iě ǐn nu̍ ɔ̍ sàànsi̍i̍h, na̍ ɔ̀ la Nyɔsoa-a Jǔ bo.”

³⁵Sɔ̀n sɛ̀n-a dɛ-ɛ, nɛ̀ Chɔɔn ke ɔ̍ kòà sɔɔ̌n nyna-ɛ pùn,

³⁶dǒ ɔ̍ jě-e Jusu nɛ̀ ɔ̍ sì-i. Iě ɔ̍ la̍a̍, “Gbɛ̀n-e, ɔ̀ la Nyɔsoa-a Blawɛ̌ Jǔ bo.”

³⁷Dɛ̍ ɔ̍ bla̍-ɛ, ɛ̍ bo ɔ̍ kòà nɛ-a sɔɔ̌n-ɛ u̍h wɔ̌n iě u̍h gbǎ dǒ Jusu de̍e̍.

³⁸Jusu fèàɛ̀, iě ɔ̍ jě u̍h nɛ̀ u̍h wɔ̀ dǒ ɔ̍ de̍e̍. Wɛ̀ ɔ̍ la̍a̍, “Dɛ̍ mɔ̀-a pɔ̀n i̍ ɛ?” U̍h la̍a̍, “Wlaɛbaɛ, tà ìn tǐn ɛ?” (Wlaɛbaɛ-a gbɔ̀ nu̍ Nǎ Po̍ Nyɔ̍.)

³⁹Jusu la̍a̍, “Mɔ̀ ji̍-o jě.” Nɛ̀ jlǔh te̍le i̍ wɛ̀, iě ɔ̍ ke u̍h mu̍, wɛ̀ u̍h jě tà ɔ̍ tǐn-aɛ. Iě u̍h sì weɛ̍-a dɛ̍ sie-aoɛ dǒ ɔ̍ we̍.

⁴⁰Ùh sɔɔ̌n wɔ̌n-a Chɔɔn-a wlu̍ wɛ̀ ùh gbǎ-a dǒ Jusu de̍e̍-ɛ, u̍h-a due-a nynɛ̌ nu̍ Andlu. Samo Pitɛ de̍di̍i̍ bo.

⁴¹Sàǐtòò dɛ̍ Andlu nu̍-aɛ, ɔ̍ pɔ̀n ɔ̍ de̍di̍i̍ Samo i̍ iě ɔ̍ sèàɛ̍ ɔ̍ wlùh. Ɔ̍ la̍a̍, “À jě Nyɔsoa-a Chèɛ̀ Tba̍ju wɛ̀.” (Ɔ̍ nynɛ̌ la ɛ̍ gbɔ̀ nu̍ Klai dě Klii wlu̍ di̍i̍.)

⁴²Wɛ̀ ɔ̍ gba̍ Samo dě Jusu we̍. Jusu gbɛ̀n-a ɔ̍ ja̍-ɛ, iě ɔ̍ la̍a̍, “Mɔ̀ Chɔɔn-a jǔ Samo. Àn nynɛ̌-a mu̍ Sifa nu̍ ti̍laa.” (Nynɛ̌ la ɛ̍ gbɔ̀ nu̍ Pitɛ dě Klii wlu̍ di̍i̍.)

⁴³Sɔ̀n sɛ̀n-a dɛ-ɛ, wɛ̀ Jusu po̍ tìh gbɔ̀ ɔ̍ iě dě Kaladii fɔɔ mu̍. Wɛ̀ ɔ̍ pɔ̀n Felɔ i̍, iě ɔ̍ la̍a̍ dě ɔ̍ we̍, “Gbǎ dǒ ǐn de̍e̍.” (

⁴⁴Bɛseida wlɔ̀ due kɔn di̍i̍ Andlu ke Pitɛ sɔ-aɛ, dǒ Felɔ sɔ-ɔ ke.)

⁴⁵Felɔ pɔ̀n Natanio i̍, iě ɔ̍ la̍a̍ dě ɔ̍ we̍, “Ɔ̀ kɔn tìh Mose sà-a dě telě chlǐh-dɛ̍ di̍i̍ wɛ̀ Nyɔsoa-a tu̍owli po̍ nyɔ̍ sà-a ɔ̍ tìh i̍ ke-ɛ, à jě ɔ̍ wɛ̀. Josɛ-a jǔ Jusu bo, ɔ̍ sɔ dǒ Naaslɔɛ wlɔ̀ di̍i̍.”

⁴⁶Wɛ̀ Natanio la̍a̍, “Dɛ̍ chɛ̀ bɛ̌ɛ ɛ̍ iě dǒ Naaslɔɛ sɔ ae?” Iě Felɔ la̍a̍, “Ji̍ jě sǔh.”

⁴⁷Dǒ Jusu jě-e Natanio nɛ̀ ɔ̍ ji̍ ɔ̍ wlì. Iě Jusu bla̍ ɔ̍ dɛ we̍i̍, ɔ̍ la̍a̍, “Ɔ̀ la bo ɔ̀ nu̍ Eslɔɛ jǔ gbe̍i̍n, si̍h dɛ se̍ dě ɔ̍ ja̍a̍ nɛ.”

⁴⁸Wɛ̀ Natanio tèle ɔ̍ i̍, ɔ̍ la̍a̍, “Ka ìn nu̍ iě ìn juo m ɛ?” Jusu la̍a̍, “Ǐn jě m̀ dǒ fei-tu̍ sɔ̀n sasǎ wɛ̀ Felɔ dǔ ìn dǎ-a.”

⁴⁹Wɛ̀ Natanio la̍a̍, “Dlǔtu, mɔ̀ Nyɔsoa-a Jǔ, mɔ̀ Eslɔɛ nyɔ̍-a Blǔh Baa.”

⁵⁰Wɛ̀ Jusu la̍a̍, “Na̍ ǐn jě m̀ dǒ fei-tu̍ sɔ̀n dɛbo ɛ̍ kɔn ìn gbaɛ ǐn wlùh ae? Bɔ̌, àn mu̍ wɔ̍n ku̍ dɛ̍ᵻ diih jě i̍h iě jɛ la sìì.”

⁵¹Iě ɔ̍ la̍a̍ dě u̍h we̍, “Ǎn sèàɛ̍ mɔ̀ tìh-a taǐn wlùh, mɔ̀-a mu̍ ja̍i̍wlɔ̀ jě ɛ̍ iě wɔ̍i̍n pɔ̀ni, wɛ̀ mɔ̀ iě Nyɔsoa-a ǐnchɔ̀ jě, i̍h iě mu̍ ja̍i̍ ji̍ wlù nu̍ dǒ Nyi̍ɔ̍-a Jǔ dlǔwèàì.”