Read Western Krahn Chɔɔn 13 Bible Online

Chɔɔn 13 - Western Krahn bible

Chɔɔn 13

¹Ɛ̍ si̍e̍-o weɛ̍ due wɛ̀ ɛ̍ iě Sììkɛ̍n Weɛ̍-a Peě nu̍. Dǒ Jusu juo-e dɛ̍ i̍ ka ti̍ nyni̍-a wɛ̀ ɔ̍ iě-a da̍a kmɔ̌ la we̍ sɔ ɔ̍ iě-a Baa we̍ mu̍-ɛ. Nyɔ̍ ùh kɔn-a dǒ ɔ̍ we̍ nɔ̌ kmɔ̌-ɛ, u̍h-a jbɛɛ ɔ̍ sà-a dě bloɔ̍ i̍-ɛ, ɛ̍ bo ɔ̍ chlà-ɛ ɛ̍ dlǔ i̍.

²Jusu ke ɔ̍ kòà iě-a dǒ wìe̍dɛ di̍ la̍ nɛ-ɛ, Juda Ɛkɛlia ɔ̀ nu̍-a Samo-a jǔ-ɛ, nɛ̀ Kǔ gbǎ dǒ ɔ̍ wlùh kɛ̍n wɛ̀ se̍e̍ ɔ̍ iě Jusu kwlǎ sà.

³Jusu juo i̍h ka Baa po̍-a dɛ̍ᵻ kli̍hgbɛ̍ dě ɔ̍ kwa̍a̍, iě ɔ̍ sɔ-a dě Nyɔsoa we̍ wɛ̀ ɔ̍ mu̍-a la̍ dě de̍ Nyɔsoa we̍-ɛ.

⁴Wɛ̀ Jusu sɔ bloɔ̍ dǒ teble̍ gbɔ̀, iě ɔ̍ sà plɛ̀i̍ i̍. Wɛ̀ ɔ̍ tù dle-e baɔ we̍.

⁵Iě ɔ̍ chɛ̌li nǐ dě pani̍ di̍i̍, sɔ ɔ̍ dle la̍ ɔ̍ kòà-a bu̍hᵻ sǔh. Wɛ̀ ɔ̍ nu̍ dle-e baɔ ɔ̍ tù-a we̍-ɛ, iě ɔ̍ slǎn i̍h ja̍i̍.

⁶Ɔ̍ jɛɛ-a Samo Pitɛ-ɛ, iě Pitɛ la̍a̍, “Joi, àn ji̍ ǎn bu̍hᵻ dle la̍ ke ae?”

⁷Wɛ̀ Jusu la̍a̍ dě ɔ̍ we̍, “Dɛ̍ ǎn nu̍-aɛ, ìn se̍ ɛ̍ juo kaka. Jɛ bɔ̌, àn mu̍ ɛ̍ we̍ i̍ ju̍o̍e dě nya̍.”

⁸Pitɛ la̍a̍, “Tlùǔmà, ìn se̍ ǎn bu̍hᵻ dle mu̍ o.” Jusu la̍a̍, “Pò ǐn se̍ àn bu̍hᵻ dle-ɛ, nɛ̀ ìn ke ǐn ke à se̍ we̍ nɛ̍aɛ mu̍ dɛ.”

⁹Samo Pitɛ la̍a̍, “Joi, pò ɛ̍ ja laan nɛ mu̍-ɛ, nɛ̀ ɛ̍ se̍ ǎn bu̍hᵻ nɛ due ìn se̍ dle mu̍. Jɛ nɛ̀ ǎn sɔ̍nᵻ ke ǎn dlǔ bei kli̍hgbɛ̍ bo ìè dle.”

¹⁰Wɛ̀ Jusu la̍a̍ dě ɔ̍ we̍, “Nyɔ̍ jɔ dle-aɛ nɔ̀ɔ̍, nɛ̀ ɔ̍ wɛ̀ flɛ̀n wɛ̀. Nɛ̀ ɔ̍ bu̍hᵻ nɛ due bo ɔ̍ mu̍ la̍ dle sǔh. Mɔ̀ wɛ̀ flɛ̀n wɛ̀, jɛ ɛ̍ se̍ mɔ̀ kli̍hgbɛ̍.”

¹¹Nɛ̀ Jusu juo nyɔ̍ ɔ̀ mu̍-a ɔ̍ kwlǎ sà-a wɛ̀ se̍e̍. Ɛ̍ kɔn ɔ̍ la̍a̍, “Ɛ̍ se̍ mɔ̀ kli̍hgbɛ̍ ùh se̍ flɛ̀n wɛ̀.”

¹²Ɔ̍ wɔ̀-a u̍h-a bu̍hᵻ dle-ɛ, wɛ̀ ɔ̍ pa̍ ɔ̍ plɛ̀i̍ dode̍, iě ɔ̍ mu̍ dǒ ɔ̍ tèla̍. Iě ɔ̍ la̍a̍, “Dɛ̍ ǐn nu̍-a mɔ̀ pùn da̍a tiɔ-ɛ, mɔ̀ juo ɛ̍ gbɔ̀ ae?

¹³Mɔ̀-a dǎɛ ǐn Dlǔtu ke Joi, mɔ̀ blaɛ i̍, dɛ̍nu̍ɛ, mɔ̍ bo chɛ̀.

¹⁴Ka mɔ̍ jɔ nu̍-a mɔ̀-a Joi ke Dlǔtu, wɛ̀ ǎn dle-a la̍ mɔ̀-a bu̍hᵻɛ́, nɛ̀ mɔ̀ kɔn mɔ̀ iě bu̍hᵻ we̍ dle-e ke.

¹⁵Ɛ̀ ǎn nu̍-a mɔ̀ pùn-ɛ, nɛ̀ wìè bo ǎn toe mɔ̀, wɛ̀ mɔ̀ iě-e ǎn wɔ̀ɔ̀ i̍ sà.

¹⁶Tìh-a taǐn ǎn sèàɛ̍ mɔ̀ wlùh, pòi̍ju-u ku̍ wɔ̍n ɔ̍-ɔ sìì ɔ̍ dlǔtu. Nɛ̀ dbo̍ju se̍ wɔ̍n ku̍ ɔ̍ se̍ jɔ dbo̍-a ɔ̍-ɛ sìì.

¹⁷Ka mɔ̀ juo-a ìh la-ɛ, pò mɔ̀ ja i̍h nu̍-ɛ, nɛ̀ mɔ̀ nmɔ i̍ wɛ̀.

¹⁸“Ɛ̍ se̍ mɔ̀ kli̍hgbɛ̍ ǐn se̍ dǎ, juh ǐn tba̍-a chèɛ̀-ɛ, ǐn juo u̍h-i. Jɛ ɛ̍ iě Nyɔsoa-a wlu̍ kɛ̀ǐn po̍ dɛbo, ɛ̀ la̍a̍, ‘Nyɔ̍ ɔ̀ di̍-a ǎn dɛ̍-ɛ, ɔ̍ bo ɔ̀ poe ǐn gbɔ̀là.’

¹⁹Ǎn sèàɛ̍ la̍ mɔ̀ wlùh duedɛ, wɛ̀ ɛ̍ iě nɛ-ɛ dǔ. Ti̍ ɛ̍ mu̍-a nɛ-ɛ, nɛ̀ mɔ̀-a mu̍ ɛ̍ tìh chɛ̀ po̍ ka ‘Mɔ̍ bo ɔ̀ nu̍-a Ɔ̍-ɛ.’

²⁰Tìh-a taǐn ǎn sèàɛ̍ mɔ̀ wlùh, nyɔ̍-o-nyɔ̍ ǐn dbo̍-a, nyɔ̍ jɔ gbɛ̍n-a ɔ̍ tìh i̍-ɛ, nɛ̀ ɔ̍ gbɛ̍n ǎn tìh i̍ wɛ̀. Nyɔ̍ ɔ̀ gbɛ̍n-a ǎn tìh i̍-ɛ, nɛ̀ ɔ̀ dbo̍-a m-ɛ, ɔ̍ tìh bo ɔ̍ gbɛ̍n i̍ wɛ̀ ke.”

²¹Jusu wɔ̀-a wlu-ɛɛ, nɛ̀ dǒ ɔ̍ wlì-a nu̍ gbɛ̀ùgbɛ̀ù. Iě ɔ̍ wlu dɛ, ɔ̍ la̍a̍, “Bɔ̌ ǐn sèàɛ̍ mɔ̀ tìh-a taǐn wlùh, mɔ̀-a nyɔ̍ due-a mu̍ ǐn kwlǎ sà.”

²²Iě ɔ̍ kòà-a gbèɛ̀ɛ̍n jlǐh, pò nyɔ̍ ɔ̍ dǎ kɔ̌ɔ.

²³Jusu-a kòà due ɔ̀ kɔn tìh ɔ̍ kma-ɛ, nɛ̀ ɔ̍ tè i̍ dǒ ɔ̍ pùn.

²⁴Wɛ̀ Samo Pitɛ po̍ jlǐh dě ɔ̍ we̍, ɔ̍ la̍a̍, “Tèle Jusu laa̍ i̍ pò nyɔ̍ ɔ̍ dǎ kɔ̌ɔ.”

²⁵Iě ɔ̍ klɛɛn dǒ Jusu we̍ wɛ̀ ɔ̍ tèle ɔ̍ i̍, ɔ̍ la̍a̍, “Joi, ɔ̍ nynɛ̌ ɛ?”

²⁶Jusu la̍a̍, “Pò ǐn tba̍ blèe̍ tile la smǎ i̍-ɛ, nyɔ̍ ǎn mu̍-a ɛ̍ nyǐ-ɛ, nɛ̀ ɔ̍-ɔ bo.” Wɛ̀ ɔ̍ tba̍ ɛ̍ smǎ i̍, iě ɔ̍ nyǐ ɛ̍ Samo-a jǔ Juda Ɛkɛlia.

²⁷Juda dǔ-a blèe̍ laa̍ ka-ɛ, Setɔn gbǎ dě ɔ̍ ja̍a̍ kleǐn. Jusu la̍a̍ dě ɔ̍ we̍, “Dɛ̍ àn ji̍-a nu̍ la̍-ɛ, nu̍ ɛ̍ suei̍.”

²⁸Jɛ dɛ̍ kɔn tìh ɔ̍ bla̍-a dɛ̍ laa̍ dě Juda we̍-ɛ, u̍h kli̍hgbɛ̍ nɛ-a dǒ teble̍ gbɔ̀-ɛ, u̍h se̍ ɛ̍ gbɔ̀ juo.

²⁹Sɔ dɛ̍ laa̍ Juda nu̍-a wlǐ i̍ tè nyɔ̍-ɛ, u̍h-a duuh jajeɛ̍ dɛ̍ᵻ u̍h-a pɔ̀n-a i̍ dǒ peě laa̍ kɛ̍n-ɛ, i̍h bo Jusu-a sèàɛ̍ ɔ̍ wlùh ɔ̍ iě tɛ̀n la̍-a mu̍ de, àe̍e̍ ɔ̍ iě nyɔ̍gbà nyɔ̍ dɛ̍ nyǐ de.

³⁰Juda gbɛ̍n-a blèe̍ laa̍ i̍-ɛ, dǒ ɔ̍ nyna ɔ̍ sǐ sɔ̀n, nɛ̀ wlù wɔ̀ wɛ̀.

³¹Juda sǐ-a sɔ̀n wɛ̀-ɛ, wɛ̀ Jusu la̍a̍, “Jɛwɛ̀ Nyi̍ɔ̍-a Jǔ-a nynɛ̌-a ji̍ i̍ bɛ̌ la̍-a. Iě ɔ̍ bɛ̌-ɛ Nyɔsoa-a nynɛ̌ i̍ ke.

³²Nɛ̀ pò ɔ̍ bɛ̌-ɛ Nyɔsoa-a nynɛ̌ i̍ wɛ̀-ɛ, nɛ̀ Nyɔsoa-a chɛ̀-a mu̍ ɔ̍ nynɛ̌ i̍ bɛ̌-ɛ ke. Nyɔsoa-a mu̍ ɛ̍ nu̍ suei̍.

³³Ǎn jbɛɛ nyɔ̍, ti̍ ǎn mu̍-a da̍a mɔ̀ we̍ nu̍-ɛ, ɛ̍ se̍ dlǔ tɛn dɛ. Nɛ̀ mɔ̀-a mu̍ ǐn i̍ pɔ̀n, jɛ dɛ̍ due ǐn sèàɛ̍-a Juu nyɔ̍-a nyɔ̍ klaaᵻ wlùh-ɛ, ɛ̍ bo ǎn ji̍ la̍ mɔ̀ wlùh sèàɛ̍ la̍ ke. Na̍a̍, ‘Tà ǎn mu̍-aɛ, mɔ̀ se̍-e mu̍-ɛ bɛ̌ɛ mu̍.’

³⁴Mɔ̀ jbɛɛ we̍, ɛ̍ bo ɛ̀ nu̍ slǔh delee ǎn po̍ mɔ̀. Ka ǐn nu̍-a mɔ̀-ɔ jbɛɛ-ɛ, kǎ mɔ̀ iě we̍ jbɛɛ nu̍ ke.

³⁵Pò mɔ̀ jbɛɛ we̍-ɛ, nɛ̀ nyɔ̍ kli̍hgbɛ̍-a mu̍ ɛ̍ i̍ juo ka mɔ̀ nu̍-a ǎn kòà-ɛ.”

³⁶Wɛ̀ Samo Pitɛ la̍a̍ dě ɔ̍ we̍, “Joi, tà àn mu̍ ɛ?” Jusu la̍a̍, “Tà ǎn mu̍-aɛ, ìn se̍ dǒ ǐn de̍e̍ gbǎ-a bɛ̌ɛ kaka. Jɛ àn mu̍ dǒ ǐn de̍e̍ gbǎ dě nya̍.”

³⁷Iě Pitɛ la̍a̍ dě ɔ̍ we̍, “Dɛ̍nu̍ ǐn se̍ dǒ ìn de̍e̍ gbǎ-a bɛ̌ɛ kaka ɛ? Ǐn gbàɛ̀ iě ìn we̍ mɛ̌-ɛ.”

³⁸Jusu la̍a̍, “Nàa̍ ìn gbàɛ̀ ìè ǐn we̍ mɛ̌-ɛ ae? Tìh-a taǐn ǎn sèàɛ̍ ìn wlùh, àn mu̍ ǎn tìh-i tòlo ìè gbɔ̍ᵻ ta̍a̍n nu̍ sasǎ wɛ̀ suuh iě slò-ɛ dǔ sɔ̀n wɔ̍i̍n.”