Read Western Krahn Chɔɔn 14 Bible Online

Chɔɔn 14 - Western Krahn bible

Chɔɔn 14

¹Jusu sèàɛ̍ ɔ̍ kòà dɛ̍ wlùh, ɔ̍ la̍a̍, “Mɔ̀-a wlùh bɔ̌ i̍ na-a. Mɔ̀ gbaɛ Nyɔsoa wlùh, nɛ̀ mɔ̀ gbaɛ ǐn wlùh ke.

²Gbòᵻ nynuu̍ dɔu nɛ dě ǐn Baa blǐ gbò. Nɛ̀ ǎn mu̍-i wɛ̀ iě tà gba̍a̍ po̍ dǒ mɔ̀ we̍. Pò ɛ̍ se̍ la̍a̍n nɛ-ɛ, nɛ̀ ǐn se̍ mɔ̀ wlùh sèàɛ̍ mu̍ de.

³Nɛ̀ pò ǐn mu̍ wɛ̀ iě tà gba̍a̍ po̍ dǒ mɔ̀ we̍-ɛ, nɛ̀ ǎn mu̍ de̍ ji̍ dɛ, wɛ̀ iě mɔ̀ dě ǐn we̍ gba̍. Wɛ̀ tà ǐn nɛ-aɛ, mɔ̀ iě-o nɛ ke.

⁴Tà ǎn mu̍-aɛ, wìè mu̍-a deě-ɛ, mɔ̀ juo ɛ̍-ɛ.”

⁵Wɛ̀ Tɔmɔ la̍a̍, “Joi, tà àn mu̍-aɛ, à se̍-o juo. Ka à mu̍ wìè ɛ̀ mu̍-a deě-ɛ juo-ɛ nu̍ ɛ?”

⁶Jusu la̍a̍ dě ɔ̍ we̍, “Mɔ̍ bo ɔ̀ nu̍ wìè, ɔ̀ nu̍ tìh-a taǐn, ɛ̍ ke feɛ ke. Nyɔ̍ se̍ dě ǐn ja̍a̍ jii-ɛ, nɛ̀ ɔ̍-ɔ mu̍ dě ǐn Baa we̍.

⁷Pò mɔ̀ juo m-ɛ, nɛ̀ mɔ̀ juo ǐn Baa wɛ̀ ke. Sɔ da̍a sèàn blǐ, mɔ̀ juo ɔ̍-ɛ, iě mɔ̀ jě ɔ̍ wɛ̀.”

⁸Wɛ̀ Felɔ la̍a̍, “Joi, Baa-a chɛ̀ bo ìè àɔ̀ toe, wɛ̀ à wlùh iě i̍ tè.”

⁹Iě Jusu la̍a̍, “Felɔ, ǐn wlè nɔ̌ mɔ̀ nynɛ̌ wɛ̀ de gbɛɛ̍. Ìn se̍ ǐn juo ke̍ sǔh ae? Nyɔ̍ jɔ jě-a m-ɛ, nɛ̀ ɔ̍ wɔ̀ ǐn Baa jě-ɛ wɛ̀. Ka ɛ̍ nu̍ wɛ̀ nàa̍ iě mɔ̀ Baa toe ke̍ gbɔ̀ɔ ɛ?

¹⁰Ka ǐn nɛ-a ǐn Baa wɛ̀ ǐn Baa nɛ-a m-ɛ, ìn se̍ ɛ̍ tìh chɛ̀ po̍ ae? Wlu̍ ǎn wlu-ia dě mɔ̀ we̍-ɛ, ɛ̍ se̍ ǎn chɛ̀-a gbǐh ǐn se̍-e wlu-i. Jɛ Baa ɔ̀ nɛ-a dě ǐn ja̍a̍-ɛ, ɔ̍ bo ɔ̀ nu̍ ɔ̍ dbo̍.

¹¹Mɔ̀ po̍ ɛ̍ tìh chɛ̀ ka ǐn nɛ-a ǐn Baa wɛ̀ ǐn Baa nɛ-a m-ɛ. Pò mɔ̀ se̍ la̍a̍n nu̍-ɛ, nɛ̀ dbo̍ la ǎn nu̍-aɛ ɛ̍ tìh bo mɔ̀ iě ǐn tìh chɛ̀ po̍.

¹²Bɔ̌ ǐn sèàɛ̍ mɔ̀ gblangbai̍ wlùh, nyɔ̍ jɔ gbaɛ-a ǐn wlùh-ɛ, dbo̍ ǎn nu̍-aɛ, nɛ̀ ɔ̍ mu̍ ɛ̍ nu̍ ke. Nɛ̀ ɔ̍ naɛ-a mu̍ wɔ̍n ku̍ i̍h iě jih la sìì. Dɛ̍nu̍ɛ, ǎn mu̍ dě Baa we̍.

¹³Nɛ̀ dɛ̍-o-dɛ̍ mɔ̀-a mu̍-a jbǎ dǒ ǎn nynɛ̌ kɛ̍n-ɛ, ǎn mu̍ ɛ̍ nu̍. Wɛ̀ Jǔ iě Baa-a nynɛ̌ i̍ bɛ̌-ɛ.

¹⁴Pò mɔ̀ jbǎ-ɛ ǐn dɛ̍-o-dɛ̍-ɛ, nɛ̀ ǎn mu̍ ɛ̍ nu̍.

¹⁵“Pò mɔ̀ jbɛɛ m-ɛ, nɛ̀ mɔ̀-a mu̍-o ǎn telě i̍ tè,

¹⁶wɛ̀ iě Baa i̍ tèle ɔ̍ iě mɔ̀ Sùù ɛ̀ naɛ-a nyɔ̍ sɔ̍nᵻ we̍ i̍-ɛ we̍ dbo̍. Wɛ̀ Sùù ɛ̀ sèàɛ̍-a nyɔ̍ Nyɔsoa-a tìh-a taǐn tìh wlùh-ɛ ɛ̍ iě dǒ mɔ̀ we̍ nɛ kleǐnklein. Ɛ̀ kɔn tìh kmɔ̌ nyɔ̍ se̍-a ɛ̍ tìh i̍ wɔ̌ɛn-ɛ, ɛ̍ nu̍, u̍h-u se̍a ɛ̍ jě, iě u̍h se̍ ɛ̍ juo. Jɛ mɔ̀ɔ̍ nɔ̀ɔ̍, mɔ̀ juo ɛ̍-ɛ, dɛ̍nu̍ɛ, ɛ̍ nɛ dǒ mɔ̀ we̍, iě ɛ̍ mu̍ dě mɔ̀ ja̍a̍ nɛ ma̍u̍.

¹⁸“Ǐn se̍ mɔ̀ kwie̍ sie mu̍, ǎn mu̍ mɔ̀ we̍ ji̍ dode̍.

¹⁹Ɛ̍ mu̍-o wlè wɛɛ, nɛ̀ kmɔ̌-a nyɔ̍ se̍ ǐn jě mu̍ dɛ. Jɛ mɔ̀ɔ̍ nɔ̀ɔ̍, mɔ̀-a mu̍ ǐn jě. Ǐn nɛ kmɔ̌, ɛ̍ tìh-ɛ, mɔ̀-a mu̍ kmɔ̌ nɛ ke.

²⁰Dǒ weɛ̍ laa̍ di̍i̍ dǒ mɔ̀-a mu̍ ɛ̍ i̍ juo-e ka ǐn nɛ-a ǐn Baa, wɛ̀ mɔ̀ nɛ-a m, iě ǐn nɛ-a mɔ̀ɔ̍-ɛ.

²¹“Nyɔ̍ jɔ tè-ao telě ǐn po̍-a i̍-ɛ, nɛ̀ ɔ̍-ɔ bo ɔ̀ jbɛɛ m. Nyɔ̍ ɔ̀ jbɛɛ-a m-ɛ, nɛ̀ ǐn Baa-a mu̍ ɔ̍-ɔ jbɛɛ ke. Nɛ̀ ǎn mu̍ ɔ̍-ɔ jbɛɛ ke, wɛ̀ iě ǎn chɛ̀ tà sà dě ɔ̍ we̍.”

²²Wɛ̀ Juda ɔ̀ se̍-a Ɛkɛlia naɛ jǔ-ɛ, ɔ̍ la̍a̍ dě ɔ̍ we̍, “Joi, dɛ̍nu̍ àn mu̍ àn chɛ̀ tà sà nɔ̌ àɔ̀ we̍, iě ìn se̍ àn chɛ̀ tà sà mu̍ dě kmɔ̌ nyɔ̍ we̍ ɛ?”

²³Iě Jusu la̍a̍, “Pò nyɔ̍ jbɛɛ m-ɛ, nɛ̀ ɔ̍ mu̍ ǎn wlu̍ nu̍, nɛ̀ ǐn Baa-a mu̍ ɔ̍-ɔ jbɛɛ. Nɛ̀ à mu̍ dě ɔ̍ we̍ ji̍, wɛ̀ dě ɔ̍ we̍ iě à blǐ nu̍.

²⁴Nyɔ̍ jɔ se̍-a ǐn jbɛɛ-ɛ, nɛ̀ ɔ̍-ɔ nu̍ ǎn wlu̍. Wlu̍ la mɔ̀-a wɔ̌n-aɛ, ɛ̍ se̍ ǎn chɛ̀-a wlu̍, jɛ ɛ̍ sɔ dě Baa ɔ̀ dbo̍-a m-ɛ we̍.

²⁵“Ǎn bla̍ ìh la ka ǐn nɛ-a da̍a mɔ̀ we̍ ke̍-ɛ.

²⁶Jɛ Nyɔsoa-a Sùù ɛ̀ naɛ-a nyɔ̍ sɔ̍nᵻ we̍ i̍-ɛ, Baa-a mu̍ ɛ̍ dbo̍ dǒ ǎn nynɛ̌ kɛ̍n, nɛ̀ ɛ̍ mu̍ mɔ̀ dɛ̍ᵻ kli̍hgbɛ̍ nǎ poe. Wɛ̀ ɛ̍ iě dɛ̍ᵻ kli̍hgbɛ̍ ǎn bla̍-a ka dě mɔ̀ we̍-ɛ dǒ mɔ̀ wlì i̍ sǐ-i.

²⁷“Ǎn siee mɔ̀ wlùh-a i̍ tè-ɛ. Ǎn wlùh-a i̍ tè-ɛ ǎn nyǐ-a mɔ̀-ɛ, ǐn se̍ ɛ̍ mɔ̀ nyǐ ka kmɔ̌-a nyɔ̍ nyǐ nyɔ̍ wlùh-a i̍ tè-ɛ. Mɔ̀-a wlùh bɔ̌ i̍ na-a, mɔ̀ wɔ̍ bɔ̌ faɔn ple̍-ɛ ke.

²⁸Dɛ̍ ǐn sà-a dě mɔ̀ we̍-ɛ, mɔ̀ wɔ̌n ǎn wlu̍, na̍a̍, ‘Ǎn mu̍-i, wɛ̀ iě mɔ̀ we̍ ji̍ dode̍.’ Pò mɔ̀ jbɛɛ m chɛ̀ɛ̌chɛ̀-ɛ, nɛ̀ mɔ̀-a mu̍ mɔna̍-a gbǎ ka ǎn mu̍-a dě Baa we̍-ɛ. Dɛ̍nu̍ɛ, ɔ̍ ku̍ wɔ̍n ɔ̍ sìì m.

²⁹Ǐn sèàɛ̍ mɔ̀ wlùh wɛ̀ duedɛ, wɛ̀ ɛ̍ iě nɛ-ɛ dǔ. Wɛ̀ pò ɛ̍ nɛ-ɛ, mɔ̀ iě ɛ̍ tìh chɛ̀ po̍.

³⁰Ǐn se̍ dɛ̍ dɔu wlu mu̍ dɛ dě mɔ̀ we̍, dɛ̍nu̍ɛ, ɛ̀ blě-a kmɔ̌ la ɛ̍ wlu̍ kwa̍-ɛ, ɛ̍ ji̍ la̍-ɛ. Ɛ̍ se̍ gbǐh blě dǒ ǐn we̍.

³¹Ka ǐn kma-a ǐn Baa-a tìh-ɛ, kmɔ̌ iě ɛ̍ juo, ɛ̍ kɔn ǎn nu̍ dɛ̍ᵻ kli̍hgbɛ̍ ɔ̍ po̍-a ǐn slǔh iě-a nu̍-ɛ. “Mɔ̀ sɔ-ɔ à iě mu̍.