Read Western Krahn Chɔɔn 15 Bible Online

Chɔɔn 15 - Western Krahn bible

Chɔɔn 15

¹“Mɔ̍ bo ɔ̀ nu̍ tlo-dɛ̍ᵻá tu̍ chɛ̀ɛ̌chɛ̀, wɛ̀ ǐn Baa nu̍ ɛ̍ gbàɛ̍gbà de̍e̍ i̍ sìì nyɔ̍.

²Bu̍h jɛ nɛ-a dǒ ǐn pùn ɛ̀-ɛ tlo-aɛ, nɛ̀ ɔ̍ chɛ̍n ɛ̍ doǒ. Jɛ jɛ tlo-aɛ, nɛ̀ ɔ̍ gbɛ̀n dǒ ɛ̍ we̍ i̍, wɛ̀ ɛ̍ iě dɛ̍ dɔu tlo.

³Wlu̍ la ǐn bla̍-a dě mɔ̀ we̍-ɛ, ɛ̍ wɔ̀ mɔ̀ flɛ̀n wɛ̀ se̍e̍.

⁴Mɔ̀ nɛ dě ǐn ja̍a̍, nɛ̀ ǎn mu̍ dě mɔ̀ ja̍a̍ nɛ. Ka pò bu̍hᵻ se̍ tu̍ i̍ tbaɛ, nɛ̀ i̍h se̍-a tlo-ɛ bɛ̌ɛ-ɛ, kǎ ɛ̍ nu̍ nɛ-ɛ ke, pò mɔ̀ se̍ dě ǐn ja̍a̍ nɛ-ɛ, nɛ̀ mɔ̀ se̍ tlo-ɛ bɛ̌ɛ mu̍.

⁵“Mɔ̍ bo ɔ̀ nu̍ tlo-dɛ̍ᵻá tu̍, mɔ̀ɔ̍ bo ùh nu̍ ɛ̍ bu̍hᵻ. Nyɔ̍ ɔ̀ nɛ-a dě ǐn ja̍a̍-ɛ, nɛ̀ ǐn nɛ dě ɔ̍ ja̍a̍ ke. Nɛ̀ ɔ̍-ɔ bo ɔ̀ mu̍ buǒᵻ dɔu tlo. Pò mɔ̀ sà ǐn sɔ̍nᵻ i̍-ɛ, nɛ̀ mɔ̀ se̍ dɛ̍ nu̍-ɛ bɛ̌ɛ mu̍.

⁶Nyɔ̍-o-nyɔ̍ ɔ̀ se̍-a dě ǐn ja̍a̍ nɛ-ɛ, nɛ̀ ɔ̍ mu̍ de̍ po̍-eɛ ɔ̍ iě klǎn ka tu̍ bu̍hᵻɛ́. Nɛ̀ u̍h-a dǔ i̍h-i, iě u̍h-a tù i̍h jlǐh, wɛ̀ i̍h-a si̍n.

⁷Pò mɔ̀ nɛ dě ǐn ja̍a̍ iě ǎn wlu̍ iě dě mɔ̀ ja̍a̍ nɛ ke-ɛ, nɛ̀ dɛ̍-o-dɛ̍ mɔ̀-a pɔ̀n-aɛ, mɔ̀ jbǎ ɛ̍, nɛ̀ mɔ̀-a mu̍ ɛ̍ jě.

⁸Mɔ̀-a buǒᵻ dɔu tlo-ɛ bo ɛ̀ bɛ̌-ɛ ǐn Baa-a nynɛ̌ i̍. Ɛ̍ bo ɛ̀ flɔn-ɛ ɛ̍ we̍i̍ ka mɔ̀ nu̍-a ǎn kòà-ɛ.

⁹Ka ǐn Baa nu̍-a ǐn jbɛɛ-ɛ, kǎ ǐn nu̍ mɔ̀-ɔ jbɛɛ ke. Mɔ̀ sie dě ǎn jbɛɛ di̍i̍.

¹⁰Pò mɔ̀ ja-o ǎn telě i̍ tè-ɛ, nɛ̀ mɔ̀-a mu̍ dě ǎn jbɛɛ di̍i̍ sie ɛ̀ kɔn ba̍ ǎn tè-ao ǐn Baa-a telě i̍ wɛ̀ ǐn nɛ-a dě ɔ̍ jbɛɛ di̍i̍-ɛ.

¹¹“Ǐn sèàɛ̍ mɔ̀ ìh la wlùh wɛ̀ ǎn nmɔ-ɛ iě dě mɔ̀ ja̍a̍ nɛ, wɛ̀ mɔ̀-a nmɔ-ɛ iě kwlǎ wɛ̀.

¹²Ɛ̀ la bo ɛ̀ nu̍ ǎn telě, ka ǐn nu̍-a mɔ̀-ɔ jbɛɛ-ɛ, kǎ mɔ̀ iě we̍ jbɛɛ nu̍ ke.

¹³Nyɔ̍ ɔ̀ sà-a ɔ̍ feɛ kwlǎ dǒ ɔ̍ jbɛɛ nyɔ̍ we̍-ɛ, nɛ̀ jbɛɛ dɛɛ se̍ wɔ̍n ku̍ ɛ̍ se̍ ɔ̍ naɛ sìì.

¹⁴Dɛ̍ ǐn poe-a mɔ̀ slǔh-ɛ, pò mɔ̀ ja ɛ̍ nu̍-ɛ, nɛ̀ mɔ̀ɔ̍ ǎn jbɛɛ nyɔ̍.

¹⁵Nɛ̌ dǎɛ mɔ̀ pòi̍nynuu̍ dɛ, dɛ̍nu̍ɛ, pòi̍ju-u wɔ̌n ɔ̍ dlǔtu-a di̍i̍ wlu̍. Ɛ̍ kɔn ǎn dǎɛ la̍ mɔ̀ jbɛɛ nyɔ̍, dɛ̍nu̍ɛ, dɛ̍ᵻ kli̍hgbɛ̍ ǐn wɔ̌n-a dě ǐn Baa wɔ̍ɔ̍n-ɛ, ǐn sèàɛ̍ i̍h mɔ̀ wlùh wɛ̀.

¹⁶Mɔ̀ se̍ ǐn chèɛ̀ tba̍, mɔ̍ bo ɔ̀ tba̍ mɔ̀ chèɛ̀ iě ǐn dbo̍ mɔ̀ mɔ̀ iě buǒᵻ ìh se̍-a jii̍ nyni la̍ kɔn-ɛ po̍. Nɛ̀ pò mɔ̀ jbǎ-ɛ Baa dɛ̍ dǒ ǎn nynɛ̌ kɛ̍n-ɛ, nɛ̀ ɔ̍ mu̍ ɛ̍ mɔ̀ nyǐ.

¹⁷Ɛ̀ la bo ɛ̀ nu̍ telě ǐn siee mɔ̀, ɛ̍ nu̍ mɔ̀ jbɛɛ we̍.

¹⁸“Kmɔ̌ faɛn mɔ̀-ɔ. Jɛ mɔ̀ juo ɛ̍, mɔ̍ bo ɛ̍ faɛn sasǎ iě ɛ̍ dǔ mɔ̀ faɛn-ɛ.

¹⁹Pò mɔ̀ kɔn dǒ kmɔ̌ we̍ de-ɛ, nɛ̀ kmɔ̌-a mu̍ mɔ̀-ɔ jbɛɛ de ka ɛ̍ chɛ̀-a nyɔ̍-ɛ. Jɛ mɔ̀ se̍ dǒ kmɔ̌ we̍ kɔn dɛ. Ǎn mɔ̀ chèɛ̀ tba̍-a sà mɔ̀ dě kmɔ̌ di̍i̍ wɛ̀. Ɛ̍ kɔn tìh kmɔ̌ faɛn mɔ̀.

²⁰Dɛ̍ ǐn sà-a dě mɔ̀ we̍-ɛ, ɛ̍ bo mɔ̀ iě wlùh we̍ nu̍. Na̍a̍, ‘Pòi̍ju-u ku̍ wɔ̍n ɔ̍-ɔ sìì ɔ̍ dlǔtu.’ Ka u̍h jě-ea ǐn klě-ɛ, nɛ̀ u̍h-a mu̍ mɔ̀ klě jě-e ke. Ka u̍h nu̍-a ǎn wlu̍-ɛ, nɛ̀ kǎ u̍h-a mu̍ mɔ̀-a wlu̍ nu̍ ke.

²¹Jɛ ǎn tìh bo u̍h-a mu̍ mɔ̀ ìh kli̍hgbɛ̍ la jii̍ nu̍, dɛ̍nu̍ɛ, u̍h se̍ nyɔ̍ ɔ̀ dbo̍-a m-ɛ juo.

²²Pò ǐn se̍ ji̍ ǐn se̍ dě u̍h we̍ wlu de-ɛ, nɛ̀ nyɔ̍ se̍ u̍h gblɛ̍n sɔ̀ɛ̀n nyɔ̍ slè-e mu̍ de. Jɛ kaka la̍ u̍h se̍ gblɛ̍n sɔ̀ɛ̀n tìh-i tòlo-ɛ bɛ̌ɛ dɛ.

²³Nyɔ̍ jɔ faɛn-a m-ɛ, nɛ̀ ɔ̍ faɛn ǐn Baa ke.

²⁴Dbo̍ nyɔ̍ dɔɔ se̍a nu̍ pò ǐn se̍ i̍h nu̍ de nɔ̌ u̍h nynɛ̌-ɛ, nɛ̀ nyɔ̍ se̍ u̍h gblɛ̍n sɔ̀ɛ̀n nyɔ̍ slè-e mu̍ de. Jɛ kaka la̍ i̍h-i bo u̍h jě-a iě u̍h faɛn-a ǐn ke ǐn Baa.

²⁵Jɛ ìh la i̍h iě u̍h-a telě chlǐh-dɛ̍-a wlu̍ kɛ̀ǐn po̍ dɛbo. Ɛ̍ la̍a̍, ‘Tìh se̍ tìh iě u̍h faɛn m.’

²⁶“Sùù ɛ̀ sèàɛ̍-a nyɔ̍ Nyɔsoa-a tìh-a taǐn wlùh-ɛ, ɛ̀ naɛ-a nyɔ̍ sɔ̍nᵻ we̍ i̍-ɛ, ǎn mu̍ ɛ̍ nu̍ wɛ̀ ɛ̍ iě dě Baa we̍ sɔ ɛ̍ iě nɔ̌ mɔ̀ we̍ ji̍. Pò ɛ̍ sɔ dě ɔ̍ we̍-ɛ, nɛ̀ ɛ̍-ɛ bo ɛ̀ mu̍ ǎn sàànsi̍i̍h nu̍.

²⁷Nɛ̀ mɔ̀-a mu̍ ǎn sàànsi̍i̍h nu̍ ke, dɛ̍nu̍ɛ, mɔ̀ ke ǐn ke à sà na-a dě bloɔ̍ i̍.