Read Western Krahn Chɔɔn 16 Bible Online

Chɔɔn 16 - Western Krahn bible

Chɔɔn 16

¹“Ǎn sèàɛ̍ mɔ̀ ìh kli̍hgbɛ̍ la wlùh wɛ̀ mɔ̀-ɔ je̍e mɔ̀-a wlùh gbaɛ kɛ̍n i̍ poe.

²U̍h-a mu̍ mɔ̀ sɔ̀n i̍ po̍ wɛɛ sà gbòᵻ sɔ̀n i̍. Ɛ̍ mu̍ ti̍ kɔn wɛ̀ nyɔ̍ ɔ̀ mu̍-a mɔ̀ dbǎ-ɛ ɔ̍ iě ɛ̍ Nyɔsoa wɛɛ sà-a dǎɛ.

³U̍h-a mu̍ mɔ̀ ìh la pùn i̍ nu̍, dɛ̍nu̍ɛ, u̍h se̍ ǐn ke Baa juo.

⁴Ǎn sèàɛ̍ mɔ̀ ìh la wlùh duedɛ, wɛ̀ pò i̍h-a ti̍ nyni̍-ɛ, wɛ̀ i̍h iě dǒ mɔ̀ wlì i̍ sǐ ka ǐn sà-a i̍h-i dě mɔ̀ we̍-ɛ. “Ǐn se̍ mɔ̀ ìh la wlùh sèàɛ̍ dě bloɔ̍ i̍ sà, dɛ̍nu̍ɛ, nɛ̀ mɔ̀ ke ǐn ke à na.

⁵Jɛ kaka la̍ nyɔ̍ ɔ̀ dbo̍-a m-ɛ, dě ɔ̍ we̍ bo ǎn mu̍ la̍. Jɛ mɔ̀-a nyɔ̍ se̍ ǐn i̍ tèle tà ǎn mu̍-aɛ tìh.

⁶Jɛ ìh la ǐn sà-a dě mɔ̀ we̍-ɛ, ɛ̍ bo ɛ̀ po̍ mɔ̀-a wlùh seɔn kaa̍.

⁷Tìh-a taǐn ǎn sèàɛ̍ mɔ̀ wlùh, ɛ̍ nmɔ jii̍ dǒ mɔ̀ we̍ iě ǎn mu̍. Dɛ̍nu̍ɛ, pò ǐn se̍ mu̍-ɛ, nɛ̀ Sùù ɛ̀ naɛ-a nyɔ̍ sɔ̍nᵻ we̍ i̍-ɛ ɛ̍ se̍ mɔ̀ we̍ ji̍ mu̍. Jɛ pò ǐn mu̍-ɛ, nɛ̀ ǎn mu̍ ɛ̍ nɔ̌ mɔ̀ we̍ dbo̍.

⁸Pò ɛ̍ ji̍-ɛ, nɛ̀ ɛ̍ mu̍ ɛ̍ we̍i̍ flɔn-ɛ dě kmɔ̌ nyɔ̍ we̍ ka u̍h klǐ-a dǒ gblɛ̍n sɔ̀ɛ̀n ke, i̍ slɛ̌-ɛ ke, tìh-a gbɛ̍n-ɛ we̍-ɛ.

⁹U̍h klǐ-i dǒ gblɛ̍n sɔ̀ɛ̀n we̍, dɛ̍nu̍ɛ, u̍h se̍ ǐn wlùh gbaɛ.

¹⁰U̍h klǐ-i dǒ i̍ slɛ̌-ɛ dɛ we̍, dɛ̍nu̍ɛ, ǎn mu̍ la̍ ǐn baa we̍. Mɔ̀ se̍ ǐn jě mu̍ dɛ.

¹¹U̍h klǐ-i dǒ tìh-a gbɛ̍n-ɛ dɛ we̍, dɛ̍nu̍ɛ, Nyɔsoa sà ɛ̀ blě-a kmɔ̌ la ɛ̍ wlu̍ kwa̍-ɛ kɛ̀n wɛ̀.

¹²“Ǐn blě dɛ̍ᵻ dɔu iě-e sà dě mɔ̀ we̍, jɛ nɛ̀ i̍h-a mu̍ mɔ̀ wɔ̍ɔ̍n sìì kaka.

¹³Jɛ ti̍ Sùù ɛ̀ sèàɛ̍-a nyɔ̍ Nyɔsoa-a tìh-a taǐn wlùh-ɛ ɛ̍ mu̍-a ji̍-ɛ, nɛ̀ ɛ̍ mu̍ ɛ̍ nu̍ mɔ̀ iě tìh-a taǐn kli̍hgbɛ̍ juo. Ɛ̍ se̍ dǒ ɛ̍ chɛ̀-ɛ sɔ̍n kɛ̍n wlu-i mu̍. Jɛ dɛ̍ ɛ̍ wɔ̌n-aɛ bo ɛ̍ mu̍ wlu, wɛ̀ ɛ̍ iě mɔ̀ dɛ̍ᵻ ìh-a mu̍-a nɛ dě nya̍-ɛ wlùh sèàɛ̍.

¹⁴Ɛ̍ mu̍ ǎn nynɛ̌ i̍ bɛ̌-ɛ, dɛ̍nu̍ɛ, dɛ̍ ǐn blě-a iě-a sà-a bo ɛ̍ mu̍-u dǔ ɛ̍ iě mɔ̀ wlùh sèàɛ̍.

¹⁵Dɛ̍ᵻ kli̍hgbɛ̍ ǐn Baa blě-aɛ, mɔ̍ kɔn i̍h. Ɛ̍ kɔn na̍ Sùù-a mu̍ dɛ̍ ǐn blě-a iě-a sà-ɛ dǔ, wɛ̀ ɛ̍ iě ɛ̍ mɔ̀ wlùh sèàɛ̍.

¹⁶“Ɛ̍ mu̍-o wlè wɛɛ nɛ̀ mɔ̀ se̍ ǐn jě mu̍ dɛ. Nɛ̀ pò ɛ̍ wlè-o dɛ wɛɛ-ɛ, nɛ̀ mɔ̀-a mu̍ ǐn jě dɛ dode̍.”

¹⁷Wɛ̀ Jusu-a kòà duuh-a tèle-e we̍ i̍, u̍h la̍a̍, “Jɛ ɔ̍ bla̍-a ka nɔ̌ à we̍ ɔ̍ la̍ ɛ̍ mu̍-o wlè wɛɛ nɛ̀ à se̍ ɔ̍ jě mu̍ dɛ-ɛ, nɛ̀ pò ɛ̍ wlè-o dɛ wɛɛ-ɛ, nɛ̀ à mu̍-a ɔ̍ jě dɛ-ɛ, ɛ̍ gbɔ̀-a nynɛ̌ ɛ? Ɔ̍ mu̍ la̍ dě ɔ̍ Baa we̍ nɔ̀ɔ̍-ɛ, ɛ̍ gbɔ̀-a nynɛ̌ ɛ?

¹⁸Ɛ̍ mu̍-o wlè wɛɛ nɔ̀ɔ̍, ɛ̍ gbɔ̀-a nynɛ̌ ɛ? À-a wɔ̌n ɛ̍ we̍i̍.”

¹⁹Sɔ Jusu juo-o dɛ̍ i̍ ka u̍h-a pɔ̀n-a ɔ̍ i̍ tèle-ɛ i̍-ɛ, iě ɔ̍ la̍a̍ dě u̍h we̍, “Na̍a̍, ‘Ɛ̍ mu̍-o wlè wɛɛ nɛ̀ mɔ̀ se̍ ǐn jě mu̍ dɛ. Nɛ̀ pò ɛ̍ wlè-o dɛ wɛɛ-ɛ, nɛ̀ mɔ̀-a mu̍ ǐn jě dɛ dode̍-ɛ,’ ɛ̍ kɔn tìh mɔ̀-a tèle-e we̍ i̍ ae?

²⁰Tìh-a taǐn ǎn sèàɛ̍ mɔ̀ wlùh, mɔ̀-a mu̍ fìn mɔ̀ iě sùàɛ̀n pa̍, wɛ̀ kmɔ̌ nyɔ̍ iě nmɔ. Mɔ̀-a wlùh-a mu̍ seɔn gbǎ. Jɛ mɔ̀-a wlùh-a seɔn gbǎ-a mu̍ nmɔ-ɛ sàɛ̀.

²¹Pò nynɔ̌ ja la̍ gbàɔ̀n sà mu̍-ɛ, nɛ̀ ɔ̍ ku̍-a kma wɔ̍n, dɛ̍nu̍ɛ, nɛ̀ ti̍ nyni̍ wɛ̀ ɔ̍ iě jua̍i̍ sàɛ̀. Jɛ pò ɔ̍ sà ɔ̍ gbàɔ̀n-ɛ, nɛ̀ ɔ̍ mǎle ku̍-a wɔ̍n kma tìh we̍. Jɛ nɛ̀ ɔ̍ nmɔ-ɛ, dɛ̍nu̍ɛ, jǔ wlǔh wɛ̀ da̍a kmɔ̌ we̍.

²²Kǎ ɛ̍ nɛ ke dǒ mɔ̀ we̍, mɔ̀-a wlùh gbǎ seɔn kaka, jɛ ǎn mu̍ mɔ̀ jě dode̍. Nɛ̀ mɔ̀-a mu̍ nmɔ. Jɛ ɛ̍ nɔ̀ɔ̍, nyɔ̍-o-nyɔ̍ se̍ ɛ̍ mɔ̀ kwa̍a̍ sà mu̍.

²³“Dǒ weɛ̍ laa̍ di̍i̍-ɛ, nɛ̀ mɔ̀ se̍ ǐn dɛ̍-o-dɛ̍-a tìh i̍ tèle mu̍ dɛ. Tìh-a taǐn ǎn sèàɛ̍ mɔ̀ wlùh, dɛ̍ jɛ mɔ̀-a mu̍-a jbǎ dě ǐn Baa we̍-ɛ, ɔ̍ mu̍ ɛ̍ mɔ̀ nyǐ dǒ ǎn nynɛ̌ kɛ̍n.

²⁴Sɔ dě ti̍-a ti̍ we̍-ɛ, mɔ̀-ɔ se̍a dɛ̍ jbǎ dǒ ǎn nynɛ̌ kɛ̍n. Mɔ̀ jbǎ dɛ̍, nɛ̀ mɔ̀-a mu̍ ɛ̍ jě, wɛ̀ mɔ̀-a nmɔ-ɛ iě kwlǎ wɛ̀.

²⁵“Nɛnǎᵻ bo ǎn po̍ wɛ̀ ǎn sà tìh i̍ dě mɔ̀ we̍. Jɛ ti̍ ǐn se̍-a nɛnǎᵻ po̍ mu̍-ɛ, ɛ̍ mu̍ ji̍, wɛ̀ iě ǐn Baa-a tìh i̍ sà te̍gbe̍i̍n dě mɔ̀ we̍.

²⁶Dǒ weɛ̍ laa̍ di̍i̍-ɛ, nɛ̀ mɔ̀-a mu̍ dɛ̍ jbǎ dǒ ǎn nynɛ̌ kɛ̍n. Jɛ ǐn se̍ la̍ mɔ̍ bo ɔ̀ mu̍ ǐn Baa dɛ̍ jbǎ-ɛ dǒ mɔ̀ we̍ o.

²⁷Baa-a chɛ̀ jbɛɛ mɔ̀ɔ̍ se̍e̍, dɛ̍nu̍ɛ, mɔ̀ jbɛɛ m, iě mɔ̀ po̍ ɛ̍ tìh chɛ̀ ka ǐn sɔ-a dě ɔ̍ we̍-ɛ.

²⁸Ǐn sɔ dě ǐn Baa we̍ wɛ̀ ǐn ji̍ nɔ̌ kmɔ̌ we̍. Wɛ̀ ǎn sɔ la̍ da̍a kmɔ̌ we̍, iě ǎn mu̍ la̍ dě de̍ ǐn Baa we̍.”

²⁹Wɛ̀ ɔ̍ kòà la̍a̍, “Jɛwɛ̀ àn wlu te̍gbe̍i̍n nɛ̀ po̍ nɛnǎᵻ dɛ.

³⁰Ka ìn juo-a dɛ̍ᵻ kli̍hgbɛ̍-ɛ, jɛwɛ̀ à jě ɛ̍. Nyɔ̍ se̍ ìn dɛ̍ i̍ tèle mu̍ dɛ. Ka ɛ̍ nɛ-a ka-ɛ, nɛ̀ à po̍ ɛ̍ tìh chɛ̀ ka ìn sɔ-a dě Nyɔsoa we̍-ɛ.”

³¹Jusu la̍a̍, “Mɔ̀ gbaɛ ǐn wlùh wɛ̀ ae?

³²Ti̍-a nyni̍ la̍-ɛ o, ɛ̍ chɛ̀ nyni̍ wɛ̀ o. Dǒ mɔ̀-a mu̍ ja̍i̍ gbà-ɛ, wɛ̀ mɔ̀ iě ǐn gbo̍ka̍a̍ sie mɔ̀ iě mɔ̀ blǐ gbòᵻ i̍ mu̍. Jɛ nɛ̀ ǐn se̍ gbo̍ka̍a̍ sie, dɛ̍nu̍ɛ, ǐn Baa nɛ dǒ ǐn we̍.

³³Ǐn sèàɛ̍ mɔ̀ ìh la wlùh wɛ̀ mɔ̀ iě wlùh-a i̍ tè-ɛ blě dě ǐn ja̍a̍. Mɔ̀-a mu̍ tìh jě da̍a kmɔ̌ la we̍, jɛ mɔ̀ ku̍ wlùh o, dɛ̍nu̍ɛ, ǐn sà kmɔ̌ la klà wɛ̀.”