Read Western Krahn Chɔɔn 18 Bible Online

Chɔɔn 18 - Western Krahn bible

Chɔɔn 18

¹Ti̍ Jusu wɔ̀-a ba̍le-ɛɛ, wɛ̀ ɔ̍ ke ɔ̍ kòà mu̍ dě tɔ̀ùn dlǔ u̍h-a dǎɛ-a Kedlɔn-ɛ de̍e̍. Nɛ̀ dě tù-dɛ̍ᵻá klè due nɛ, iě u̍h mu̍ dě ɛ̍ di̍i̍.

²Nɛ̀ Juda ɔ̀ sà-a Jusu kwlǎ-a, ɔ̍ juo dě tà-a chɛ̀ ke, dɛ̍nu̍ɛ, dě Jusu ke ɔ̍ kòà-a po̍ wìè-i.

³Wɛ̀ Juda mu̍ deě. Ɔ̍ wɔ̌an mu̍-u tìh-ɛ, ɔ̍ gba̍ Wloma nyɔ̍-a fledlǔ-a gbɔ̀ù ke Nyɔsoa-a slaǎ sà gbò kɛ̍ɛ̍n fuo nyɔ̍ ùh sɔ-a dě slaǎ sà nyɔ̍ klaaᵻ ke Fɛlesii nyɔ̍ we̍-ɛ. U̍h gba̍ nape̍ᵻ ke tàùᵻ ke fɔ̀n-dɛ̍ᵻ.

⁴Jɛ Jusu juo dɛ̍ᵻ ìh-a mu̍-a ɔ̍ jii̍ nɛ-ɛ, wɛ̀ ɔ̍ mu̍ u̍h wlì. Wɛ̀ ɔ̍ la̍a̍ dě u̍h we̍, “Nyɔ̍ mɔ̀-a pɔ̀n i̍ ɛ?”

⁵U̍h la̍a̍, “Jusu ɔ̀ sɔ-a dǒ Naaslɔɛ wlɔ̀ di̍i̍-ɛ bo à pɔ̀n i̍.” Ɔ̍ la̍a̍, “Mɔ̍ la.” Juda jɔ nu̍-a nyɔ̍ kwlǎ sà nyɔ̍-ɛ, nɛ̀ ɔ̍ nyna u̍h pùn.

⁶Ti̍ ɔ̍ wlu-a dě u̍h we̍ ɔ̍ la̍a̍, “Mɔ̍ la-ɛ,” wɛ̀ u̍h sàɛ̀ kɛ̍n iě u̍h kèàɛ i̍ dǒ bloɔ̍.

⁷Wɛ̀ Jusu tèle u̍h i̍ dɛ. Ɔ̍ la̍a̍, “Nyɔ̍ mɔ̀-a pɔ̀n i̍ ɛ?” U̍h la̍a̍, “Jusu ɔ̀ sɔ-a Naaslɔɛ bo à pɔ̀n i̍.”

⁸Wɛ̀ Jusu la̍a̍, “Ǐn sèàɛ̍ mɔ̀ wlùh, na̍ mɔ̍ la. Pò mɔ̀ ja ǐn i̍ pɔ̀n-ɛ, nɛ̀ mɔ̀ tǎli juh la i̍ o.” (

⁹Ti̍ Jusu la̍a̍, “Baa, nyɔ̍ ìn nyǐ-a m-ɛ, u̍h-a nyɔ̍ se̍-e gbɔ̀lɔ-oɛ,” ɛ̍ kɔn ɔ̍ bla̍ dɛ̍ la, wɛ̀ ɛ̍ iě ɔ̍ wlu̍ kɛ̀ǐn po̍.)

¹⁰Ɛ̍ ti̍ laa̍ nɛ̀ Samo Pitɛ blě plàn chlɛ̀n. Wɛ̀ ɔ̍ chlì ɛ̍, iě ɔ̍ tba̍ slaǎ sà nyɔ̍-a dlǔtu-a kèi̍ dɛ̍, wɛ̀ ɔ̍ chɛ̍n ɔ̍ di̍na̍ doun i̍. Pòi̍ju-a chɛ̀ ɔ̍ nynɛ̌ bo Makɔɔ.

¹¹Wɛ̀ Jusu la̍a̍ dě Pitɛ we̍, “Po̍ àn plàn chlɛ̀n laa̍ dě de̍ gbla̍-a. Ìn jajeɛ̍ kàu̍n la ǐn Baa nyǐ-a m-ɛ, ǐn se̍ ɛ̍ di̍i̍ nǎ-ɛ mu̍ de ae?”

¹²Wɛ̀ fledlǔ-a gbɔ̀ù ke u̍h-a chape nyɔ̍ ke Juu nyɔ̍-a slaǎ sà gbò we̍ i̍ gbɛ̀n nyɔ̍ gbɛ̍n Jusu, iě u̍h sa̍n ɔ̍.

¹³Wɛ̀ u̍h gba̍ ɔ̍ dě Anna we̍ sàǐtòò, dɛ̍nu̍ɛ, Kaifa ɔ̀ nu̍-a slaǎ sà nyɔ̍-a dlǔtu dǒ sɔ̀n laa̍ di̍i̍-ɛ, ɔ̍ nynɔ̌ baa bo.

¹⁴Kaifa laa̍ bo ɔ̀ sà ɛ̍-ɛ dě Juu nyɔ̍-a nyɔ̍ klaaᵻ we̍ ka ɛ̍ nmɔ-a jii̍ nyɔ̍ due iě-a mɛ̌ dǒ blǔh nyɔ̍-a tàà-ɛ.

¹⁵Wɛ̀ Samo Pitɛ ke Jusu-a kòà dɔɔ wɔ̀ dǒ Jusu de̍e̍. Nɛ̀ kòà jɔ laa̍ ɔ̍ ke slaǎ sà nyɔ̍-a dlǔtu ju̍o̍e i̍ se̍e̍. Sɔ ɔ̍ bo ɔ̀ ke Jusu pa̍ dě slaǎ sà nyɔ̍-a dlǔtu-a gbò-a gbàɛ̍gbà di̍i̍.

¹⁶Wɛ̀ Pitɛ sie dǒ gbàɛ̍gbà-a wɔ̍n we̍. Iě jɔ ke slaǎ sà nyɔ̍-a dlǔtu ju̍o̍e-a i̍-ɛ ji̍ de̍. Wɛ̀ ɔ̍ wlu dě nynɔ̌gbaɔ jǔ ɔ̀ tù-a gbàɛ̍gbà-a wɔ̍n jlǐhɛ̍-ɛ we̍. Iě ɔ̍ pa̍-ɛ Pitɛ dě gbò.

¹⁷Wɛ̀ nynɔ̌gbaɔ jǔ-a chɛ̀ la̍a̍ dě Pitɛ we̍, “Na̍ mɔ̀ jɔ̍gbau la ɔ̍ kòà-a due lě.” Pitɛ la̍a̍, “Sakǒ, ɛ̍ se̍ mɔ̍.”

¹⁸Ɛ̍ ti̍ laa̍ nɛ̀ seɔn-a ji̍-i, wɛ̀ pòi̍nynuu̍ ke slaǎ sà gbò-a kɛ̍ɛ̍n fuo nyɔ̍ tbà kɔɔn-a nɛ̍, iě u̍h nyna i̍ u̍h-a wěla. Wɛ̀ Pitɛ mu̍ dǒ u̍h we̍, ɔ̍ wěla ke.

¹⁹Nɛ̀ kǎ slaǎ sà nyɔ̍-a dlǔtu-a chlɛ̌ Jusu wɔ̍ɔ̍n i̍ dǒ ɔ̍ kòà dɛ we̍, ɛ̍ ke dɛ̍ ɔ̍ poe-a nyɔ̍ nǎ-ɛ ke.

²⁰Wɛ̀ Jusu la̍a̍, “Dǒ gbaɛ̍we̍ bo ǎn wlu-i dě kmɔ̌ nyɔ̍ kli̍hgbɛ̍ we̍. Nɛ̀ dě wɛɛ sà gbòᵻ ke slaǎ sà gbò kɔn sɔ̀n nyɔ̍-a gbǎ-ɛa tàdùè-ɛ, dě ǎn poe nǎ. Nɛ̌ sà dɛ̍-ɛ dě kwile-e.

²¹Dɛ̍nu̍ àn tèle ǐn i̍ ɛ? Nyɔ̍ ùh wɔ̌n-a ǎn wlu̍ wɛ̀ sàì-ɛ, u̍h bo ìè i̍ tèle, u̍h juo dɛ̍ ǐn sà-aɛ.”

²²Ti̍ Jusu wlu-a dɛ̍ la-ɛ, slaǎ sà gbò-a kɛ̍ɛ̍n fuo nyɔ̍ due nɛ-a doǒ-ɛ, sɔ ɔ̍ tba̍ ɔ̍ gbǎ sǔh. Ɔ̍ la̍a̍, “Kǎ nyɔ̍-a nu̍ dě slaǎ sà nyɔ̍-a dlǔtu we̍ wlu-ɛ ae?”

²³Wɛ̀ Jusu la̍a̍, “Pò dɛ̍ ǐn sà-aa ɛ̍ klǐ-ɛ, nɛ̀ ìn sà ɛ̍-ɛ sǔh. Jɛ pò ɛ̍ slɛ̌ i̍-ɛ, nɛ̀ dɛ̍-ɛ tìh àn tba̍ ǐn gbǎ ɛ?”

²⁴Iě ka due ɔ̍ nɛ-a dě dbǔᵻáɛ, kǎ ɔ̍ nɛ iě Anna dbo̍ ɔ̍ dě slaǎ sà nyɔ̍-a dlǔtu Kaifa we̍.

²⁵Nɛ̀ kǎ Samo Pitɛ nyna i̍ ɔ̍ wěla. Wɛ̀ nyɔ̍ tèle ɔ̍ i̍, u̍h la̍a̍, “Na̍ mɔ̀ jɔ̍gbau la ɔ̍ kòà-a due lě.” Jɛ Pitɛ tòlo ɛ̍-ɛ, ɔ̍ la̍a̍, “Sakǒ, ɛ̍ se̍ mɔ̍.”

²⁶Wɛ̀ slaǎ sà nyɔ̍-a dlǔtu-a pòi̍ju due ɔ̀ kɔn wloa̍ nyɔ̍-a doun Pitɛ chɛ̍n-a i̍-ɛ, iě ɔ̍ la̍a̍, “Ɛ̍ se̍ mɔ̀ ǐn se̍ jě dǒ Jusu we̍ dě tù-dɛ̍ᵻá klè di̍i̍ ae?”

²⁷Wɛ̀ Pitɛ tòlo ɛ̍-ɛ dɛ, sɔ suuh slò-e sǔh.

²⁸Wɛ̀ u̍h sà Jusu dě Kaifa blǐ gbò, iě u̍h gba̍ ɔ̍ dě kɔ̀mla̍ Pale blǐ gbò. Nɛ̀ ɛ̍ nu̍ klàɛ̍we̍ gbàìn. Jɛ Juu nyɔ̍-a nyɔ̍ klaaᵻ nɔ̀ɔ̍, u̍h se̍ dě gbò laa̍ pa̍, dɛ̍nu̍ɛ, u̍h-a pɔ̀n u̍h iě dě Nyɔsoa jlǐh i̍ nmɔ, wɛ̀ u̍h iě Sììkɛ̍n Peě-a di̍-dɛ̍ᵻ di̍-ɛ bɛ̌ɛ.

²⁹Iě kɔ̀mla̍ Pale sǐ dě u̍h we̍ sɔ̀n i̍. Iě ɔ̍ la̍a̍, “Dɛ̍-ɛ tìh mɔ̀ blě dǒ jɔ̍gbau la pùn ɛ?”

³⁰U̍h la̍a̍, “Pò jɔ̍gbau la ɔ̍ se̍ dɛ̍ sɔ̀n nu̍ de-ɛ, nɛ̀ à se̍ ɔ̍ ìn we̍ ja mu̍ de.”

³¹Pale la̍a̍, “Iě nɛ̀ mɔ̀ dǔ ɔ̍, mɔ̀-a chɛ̀ iě dě ɔ̍ tìh-a chɛ̀ di̍i̍ gbɛ̀n dě mɔ̀-a chɛ̀-a telě di̍i̍.” Iě u̍h la̍a̍, “Jɛ à nɔ̀ɔ̍, à se̍ wlu̍ kɛ̍n sà-ɛ à iě nyɔ̍-o-nyɔ̍ dbǎ.” (

³²Ka Jusu-a mu̍-a mɛ̌-ɛ sɔɛn nu̍-ɛ, ɔ̍ sà ɛ̍-ɛ se̍e̍. Ɛ̍ kɔn ɛ̀ la ɛ̍ nɛ, ɛ̍ iě ɔ̍ wlu̍ kɛ̀ǐn po̍.)

³³Wɛ̀ Pale pa̍ dě de̍ gbò, iě ɔ̍ dǎ Jusu, wɛ̀ ɔ̍ la̍a̍ dě ɔ̍ we̍, “Mɔ̀ bo ɔ̀ nu̍ Juu nyɔ̍-a blǔh baa ae?”

³⁴Jusu la̍a̍, “Àn tèle ǐn i̍ dǒ àn chɛ̀-a sɔ̍n kɛ̍n ɛɛ, àe̍e̍ nyɔ̍ duuh sèàɛ̍ ìn wlùh dǒ ǎn dɛ we̍ ae?”

³⁵Wɛ̀ Pale la̍a̍, “Àn dǎɛ ǐn Juu jǔ ae? Àn chɛ̀-a nyɔ̍ ke slaǎ sà nyɔ̍ klaaᵻ bo ùh sà ìn kwlǎ nɔ̌ ǐn we̍. Dɛ̍ ìn nu̍ wɛ̀ u̍h ja m̀ ɛ?”

³⁶Iě Jusu la̍a̍, “Ǎn blǔh baa dɛ se̍ nɔ̌ kmɔ̌ la we̍ kɔn. Pò ɛ̍ kɔn nɔ̌ kmɔ̌ la we̍ de-ɛ, nɛ̀ ǎn pòi̍nynuu̍-a mu̍ fɔ̀n wɛ̀ Juu nyɔ̍-a nyɔ̍ klaaᵻ je̍e ǐn gbɛ̍n de. Jɛ ǎn blǔh baa dɛ se̍ nɔ̌ kmɔ̌ la we̍ kɔn dɛbo.”

³⁷Pale la̍a̍, “Iě nɛ̀ mɔ̀ blǔh baa lě.” Jusu la̍a̍, “Nàa̍, mɔ̍ blǔh baa. Ɛ̍ kɔn tìh ǐn wlǔh iě ǐn ji̍ da̍a kmɔ̌ la we̍, wɛ̀ iě tìh-a taǐn-a sàànsi̍i̍h nu̍. Nyɔ̍ juh kɔn-a dǒ tìh-a taǐn we̍-ɛ, u̍h bo ùh-a wɔ̌n ǎn wlu̍-i i̍.”

³⁸Wɛ̀ Pale la̍a̍ dě ɔ̍ we̍, “Dɛ̍ bo ɛ̀ nu̍ tìh-a taǐn ɛ?” Iě Pale sǐ dě nyɔ̍gbei laa̍ we̍ sɔ̀n i̍ dɛ. Wɛ̀ ɔ̍ la̍a̍ dě u̍h we̍, “Dɛ̍ sɔ̀n jɔ̍gbau la ɔ̍ iě-a nu̍-ɛ, nɛ̌ jě ɛ̍.

³⁹Jɛ mɔ̀ blě mɔ̀-a tǐwai dɛ. Ɛ̍ nu̍ iě gbɛ̍n-nyɔ̍ due sèìe dǒ mɔ̀ we̍ dǒ Sììkɛ̍n-a Peě kɛ̍n. Mɔ̀-a pɔ̀n iě Juu nyɔ̍-a blǔh baa sèìe ae?”

⁴⁰Wɛ̀ u̍h sà slɛ̀ wɔ̍n u̍h la̍a̍, “Iěe, ɛ̍ se̍ ɔ̍ mɔ. À pɔ̀n Bawlaba.” (Bawlaba bo ɔ̀ nu̍ jlǐ-nyɔ̍.)