Read Western Krahn Chɔɔn 19 Bible Online

Chɔɔn 19 - Western Krahn bible

Chɔɔn 19

¹Wɛ̀ Pale dǔ Jusu-u iě ɔ̍ bla̍ ɔ̍.

²Wɛ̀ fledlǔ dba̍ wiǎᵻá blawɛ̌ iě u̍h tèè ɛ̍ ɔ̍. Wɛ̀ u̍h pa̍-ɛ ɔ̍ jliɛ̍ sàɛ̀n-a plɛ̀i̍-i.

³Nɛ̀ pò jɔ mu̍ dǒ ɔ̍ we̍-ɛ, nɛ̀ ɔ̍ la̍a̍, “À tba̍ àn sɔ̍n o Juu nyɔ̍-a Blǔh Baa.” Iě u̍h-a tbaɛ ɔ̍ gbǎᵻ i̍.

⁴Wɛ̀ Pale sǐ dǒ sɔ̀n i̍ dɛ. Iě ɔ̍ la̍a̍ dě u̍h we̍, “Mɔ̀ gbɛ̀n-e, ǎn ja la̍ jǔ la nɔ̌ mɔ̀ we̍ sɔ̀n mɔ̀ iě ɛ̍ juo ka dɛ̍ sɔ̀n ɔ̍ iě-a nu̍-ɛ, nɛ̌ jě-a ɛ̍-ɛ.”

⁵Wɛ̀ Jusu sǐ sɔ̀n, nɛ̀ ɔ̍ tèè wiǎᵻá blawɛ̌, iě ɔ̍ pa̍ jliɛ̍ sàɛ̀n-a plɛ̀i̍-i. Wɛ̀ Pale la̍a̍ dě u̍h we̍, “Jɔ̍gbau-a chɛ̀ la o.”

⁶Ti̍ slaǎ sà nyɔ̍ klaaᵻ ke slaǎ sà gbò-a kɛ̍ɛ̍n fuo nyɔ̍ jě-a ɔ̍-ɛ, wɛ̀ u̍h sà slɛ̀ wɔ̍n, u̍h la̍a̍, “Kɔ̍ ɔ̍ dǒ gbàɛ̍ kɛ̍n i̍ tu̍ wlì, kɔ̍ ɔ̍ dǒ gbàɛ̍ kɛ̍n i̍ tu̍ wlì.” Pale la̍a̍ dě u̍h we̍, “Nɛ̀ mɔ̀-a chɛ̀ dǔ ɔ̍ la̍ mɔ̀ iě ɔ̍ kɔ̍. Jɛ mɔ̍ɔ, dɛ̍ sɔ̀n ɔ̍ iě-a nu̍-ɛ nɛ̌ jě ɛ̍.”

⁷Wɛ̀ nyɔ̍gbei la̍a̍, “À blě telě, ɛ̍ la̍ ɔ̍ kɔn ɔ̍ iě mɛ̌, dɛ̍nu̍ɛ, ɔ̍ dǎɛ ɔ̍ chɛ̀ Nyɔsoa-a Jǔ.”

⁸Ti̍ Pale wɔ̌n-a u̍h-a wlu̍ la-ɛ, sɔ ɔ̍ gbǎ faɔn dɛ kaa̍.

⁹Iě ɔ̍ pa̍ dě de̍ gbò, wɛ̀ ɔ̍ tèle Jusu i̍. Ɔ̍ la̍a̍, “Tà ìn sɔ-ɔ ɛ?” Jɛ Jusu se̍ ɔ̍ tɔ̍n-ɔ sà.

¹⁰Wɛ̀ Pale la̍a̍ dě ɔ̍ we̍, “Ìn se̍ dě ǐn we̍ wlu-i mu̍ ae? Ìn se̍ i̍h juo ka ǐn blě-a gbǐh iě-a ìn sèìe wɛ̀ ǐn blě-a gbǐh iě-a ìn kɔ̍-ɛ ae?”

¹¹Jusu la̍a̍, “Pò Nyɔsoa se̍ ìn gbǐh nyǐ de-ɛ, nɛ̀ ìn se̍ ǐn wlu̍ i̍ kɔn-ɛ bɛ̌ɛ mu̍. Ɛ̍ tìh-ɛ, nyɔ̍ ɔ̀ sà-a ǐn kwlǎ dě ìn we̍-ɛ, gblɛ̍n sɔ̀ɛ̀n-a gboklan naɛ bo ɔ̍ nu̍.”

¹²Sɔ Pale-a pɔ̀n la̍ jii la̍ i̍ sǔh ɔ̍ iě Jusu sèìe. Jɛ nyɔ̍gbei sà-ɛ ɔ̍ slɛ̀ wɔ̍n. U̍h la̍a̍, “Pò ìn sèìe jǔ la-ɛ, nɛ̀ ìn ke Wloma nyɔ̍-a Bloa̍ Joi se̍ jbɛɛ mu̍ o. Dɛ̍nu̍ɛ, nyɔ̍ ɔ̀ pɔ̀n-a ɔ̍ chɛ̀ blǔh baa we̍i̍ nu̍-ɛ i̍-ɛ, nɛ̀ ɔ̍ tbaɛ Bloa̍ Joi bu̍hᵻ i̍.”

¹³Ti̍ Pale wɔ̌n-a wlu̍ la-ɛ, iě ɔ̍ sǐ-i Jusu sɔ̀n. Wɛ̀ Pale tè i̍ dǒ sàwi̍h sì gbalǎ kɛ̍n. Dǒ-a nynɛ̌ nu̍ Sɔɔ̌ᵻ Paɔ Kɛ̍n. (Ɛ̍ nynɛ̌ bo Kabata dě Iblu wlu̍ di̍i̍.)

¹⁴Weɛ̍ ɛ̀ sì-ɛ wɛ̀ ɛ̍ iě-a Sììkɛ̍n-a Peě nu̍-ɛ, dǒ ɛ̍ di̍i̍ bo ìh la i̍h nɛ-ɛ. Ɛ̍ ji̍ la̍ jlǔhgbàɔ̀ nu̍ la̍ iě Pale la̍a̍ dě nyɔ̍gbei laa̍ we̍, “Mɔ̀-a blǔh baa la o.”

¹⁵Iě u̍h sà slɛ̀ wɔ̍n, u̍h la̍a̍, “Sà ɔ̍ da̍a, sà ɔ̍ da̍a, ìè ɔ̍ kɔ̍.” Pale la̍a̍, “Mɔ̀-a blǔh baa bo iě kɔ̍ ae?” Wɛ̀ slaǎ sà nyɔ̍-a klaaᵻ la̍a̍, “Bloa̍ Joi nɛ due à blě ɔ̀ nu̍ blǔh baa.”

¹⁶Wɛ̀ Pale sà-ɛ u̍h Jusu kwlǎ ɔ̍ iě kɔ̍-ɛ dǒ gbàɛ̍ kɛ̍n i̍ tu̍ wlì. Sɔ u̍h dǔ ɔ̍ sǔh

¹⁷iě u̍h sà ɔ̍ dǒ wlɔ̀ ɔ̍ gba̍ ɔ̍ chɛ̀-a gbàɛ̍ kɛ̍n i̍ tu̍ dǒ tà u̍h-a dǎɛ-a Dlǔ Gbǎ Tlu̍h-ɛ. (Ɛ̍ nynɛ̌ bo Kaokota dě Iblu wlu̍ di̍i̍.)

¹⁸Dě u̍h kɔ̍-ɛ ɔ̍ ke nyɔ̍ sɔɔ̌n duuh. Due nɛ dǒ ɔ̍ kwe̍na̍ we̍, iě dɔɔ nɛ dǒ ɔ̍ di̍na̍ we̍.

¹⁹Wɛ̀ Pale chlǐh dɛ̍, iě ɔ̍ po̍ ɛ̍ dǒ gbàɛ̍ kɛ̍n i̍ tu̍ wlì. Ɛ̍ wlu̍ la̍a̍, “Jusu nu̍-a Naaslɔɛ jǔ-ɛ, Juu nyɔ̍-a Blǔh Baa bo.”

²⁰Nyɔ̍ dɔu slè wlu̍-a chɛ̀, dɛ̍nu̍ɛ, tà u̍h kɔ̍-ɛa Jusu dǒ gbàɛ̍ kɛ̍n i̍ tu̍ wlì-ɛ, dǒ se̍ wlɔ̀ we̍ i̍ ti̍ɛ̍ɛn. Iě u̍h chlǐh ɛ̍ dě Iblu ke Latin ke Klii wlu̍ di̍i̍.

²¹Wɛ̀ slaǎ sà nyɔ̍-a klaaᵻ la̍a̍ dě Pale we̍, “Bɔ̌ ka nu̍, ‘Juu nyɔ̍-a Blǔh Baa.’ Jɛ nɛ̀ nàa̍, ‘Jǔ la ɔ̍ la̍ ɔ̍-ɔ Juu nyɔ̍-a Blǔh Baa.’ ”

²²Wɛ̀ Pale la̍a̍, “Dɛ̍ ǐn chlǐh-aɛ, nɛ̀ ka ɛ̍ mu̍ sie.”

²³Fledlǔ wɔ̀-a Jusu kɔ̍-ɛɛ, wɛ̀ u̍h dǔ ɔ̍ jliɛ̍-ɛ, iě u̍h nu̍ ɛ̍ fɔ̌ᵻ nyìɛ̍. Fledlǔ jɔ-ɛ, nɛ̀ ɔ̍ gba̍ fɔ̌ due. Iě u̍h dǔ ɔ̍ plɛ̀i̍-i ke. Jɛ ɔ̍ plɛ̀i̍ nɔ̀ɔ̍, u̍h dba̍ ɛ̍-ɛ, sɔ ɛ̍ se̍ i̍ tùi la̍ kɔn.

²⁴Iě u̍h la̍a̍, “Mɔ̀ à bɔ̌ ɛ̍ fǎle-ɛ. Jɛ mɔ̀ à po̍ nibo, nyɔ̍ mu̍-a wlǔh-ɛ, ɔ̍ iě ɛ̍ gba̍.” Ɛ̀ la ɛ̍ nɛ-ɛ, wɛ̀ ɛ̍ iě Nyɔsoa-a wlu̍ kɛ̀ǐn po̍. Ɔ̍ wlu̍-a chɛ̀ la̍a̍, “U̍h gblè-e ǎn jlii̍ kwa̍a̍ i̍, wɛ̀ u̍h fɔ̀n-ɛ ǎn plɛ̀i̍ nibo.” Ɛ̍-ɛ bo fledlǔ laa̍ u̍h nu̍-a.

²⁵Gbàɛ̍ kɛ̍n i̍ tu̍ kɔn wlì u̍h kɔ̍-ɛa Jusu-ɛ, ùh nyna-a ɛ̍ pùn-ɛ, ɛ̍ nu̍ ɔ̍ de̍ ke, ɔ̍ de̍ de̍di̍i̍ nynɔ̌gbaɔ ke, Mɛle ɔ̀ nu̍-a Klopa-a nynɔ̌-ɛ ke, ɛ̍ ke Mɛle Makalin ke.

²⁶Ti̍ Jusu jě-a ɔ̍ de̍ ke, ɔ̍ kòà ɔ̀ kɔn tìh ɔ̍ kma-ɛ, nɛ̀ u̍h kɔǎn-ɛ ɔ̍ we̍ i̍, iě u̍h nyna i̍. Wɛ̀ ɔ̍ la̍a̍ dě ɔ̍ de̍ we̍, “Nynɔ̌ chɛ̀, àn jǔ nɛ-ao o.”

²⁷Wɛ̀ ɔ̍ la̍a̍ dě ɔ̍ kòà laa̍ we̍, “Ìn de̍ nɛ-ao o.” Sɔ dǒ ti̍ laa̍ di̍i̍-ɛ, kòà laa̍ ɔ̍ gba̍ Jusu de̍ gbò we̍.

²⁸Ti̍ Jusu juo-ao dɛ̍ i̍ ka dɛ̍ᵻ kli̍hgbɛ̍ wɛ̀-a i̍ wɛ̀-ɛ, iě ɔ̍ la̍a̍, “Dǒ ǐn wlì-a bǔ-i.” Ɔ̍ bla̍ ɛ̀ la wɛ̀ ɔ̍ iě Nyɔsoa-a wlu̍ kɛ̀ǐn po̍.

²⁹Nɛ̀ boo̍ jǐ gba̍n nmɔ̍ di̍i̍ ɛ̍ tè doǒ i̍. Wɛ̀ u̍h gba̍ fuu̍ dě ɛ̍ we̍, iě u̍h tù ɛ̍ esa tu̍ i̍, wɛ̀ u̍h gba̍ ɛ̍ dǒ Jusu wɔ̍i̍n.

³⁰Ti̍ Jusu tɛ̀n-a nmɔ̍ laa̍ wɔ̍n-ɛ, iě ɔ̍ la̍a̍, “Ɛ̍ wɛ̀ i̍ wɛ̀.” Ɔ̍ po̍-a dlǔ wlù-ɛ, ɔ̍ chɛ̍n feɛ kleǐn.

³¹Wɛ̀ Juu nyɔ̍-a nyɔ̍ klaaᵻ sèàɛ̍ Pale wlùh ɔ̍ iě wɔ̌n u̍h iě nyɔ̍ u̍h kɔ̍-a dǒ tu̍ i̍-ɛ, u̍h-a bu̍hᵻ i̍ chlà-ɛ u̍h iě mɛ̌ suei̍, wɛ̀ u̍h iě u̍h dǒ tu̍ i̍ sà-a dǔ. Nɛ̀ weɛ̍ ɛ̀ sì-ɛ wɛ̀ ɛ̍ iě-a u̍h-a wlè-weɛ̍ klaa nu̍-ɛ, dǒ ɛ̍ di̍i̍ bo. Sɔ nɛ̀ u̍h se̍ pɔ̀n kǔ iě dǒ tu̍ i̍ nɛ wɛ̀ ɛ̍ iě u̍h-a wlè-weɛ̍ klaa nu̍.

³²Nyɔ̍ sɔɔ̌n ùh ke Jusu plɛɛn-a dǒ tu̍ i̍-ɛ, wɛ̀ fledlǔ ji̍ iě u̍h chlà-ɛ u̍h-a bu̍hᵻ i̍ sàǐtòò.

³³Jɛ u̍h iě-a dǒ Jusu we̍ mu̍-ɛ, nɛ̀ ɔ̍ mɛ̌ wɛ̀ se̍e̍. Ɛ̍ kɔn u̍h se̍ ɔ̍ bu̍hᵻ i̍ chlà-ɛ.

³⁴Jɛ fledlǔ jǔ due nynǎ ɔ̍ dǐ gbèɛ̀n we̍, iě nǐ ke nymɔ̍ sɔ-o. (

³⁵Nyɔ̍ ɔ̀ jě-a ìh la i̍h-a nɛ la̍-ɛ, ɔ̍ bo ɔ̀ nu̍ i̍h-a sàànsi̍i̍h. Dɛ̍ ɔ̍ sà-aɛ, tìh-a taǐn bo. Ɔ̍ juo i̍h dɛ̍ ɔ̍ sà-aɛ tìh-a taǐn bo, ɛ̍ kɔn ɔ̍ sà i̍h-i wɛ̀ mɔ̀ iě wlùh gbaɛ blě ke.)

³⁶Ìh la i̍h nɛ-ɛ, wɛ̀ ɛ̍ iě Nyɔsoa-a wlu̍ kɛ̀ǐn po̍. Wlu̍-a chɛ̀ la̍a̍, “Ɔ̍ gbǎ due-a chɛ̀ bo ɛ̀ se̍ chlà mu̍.”

³⁷Nyɔsoa-a wlu̍ la̍a̍ dɛ-ɛ, “Nyɔ̍ ɔ̀ u̍h nynǎ-a dǐ-ɛ, nyɔ̍ɔ-a mu̍ ɔ̍ i̍ jě.”

³⁸Ɛ̀ la ɛ̍ wɔ̀-a nɛ-ɛ, wɛ̀ Josɛ ɔ̀ sɔ-a dǒ Awlematia wlɔ̀ di̍i̍-ɛ, iě ɔ̍ sèàɛ̍ Pale wlùh ɔ̍ iě Jusu-a kǔ dǒ ja̍i̍ sà. (Josɛ laa̍ Jusu-a kòà bo, jɛ ɔ̍ nɔ̀ɔ̍, ɔ̍ nui ɛ̍ dě kwile-e, dɛ̍nu̍ɛ, ɔ̍ ple̍ Juu nyɔ̍-a nyɔ̍ klaaᵻ jǔ.) Wɛ̀ Pale sà Josɛ wlu̍ kɛ̍n iě ɔ̍ sà Jusu-a ku̍ dǒ ja̍i̍.

³⁹Nikodima ɔ̀ mu̍-a dě Jusu we̍ maɔ̍ dǒ ti̍ due di̍i̍-ɛ, ɔ̍ bo ɔ̀ ke Josɛ mu̍. Nikodima gba̍ nyɔ̍ i̍ tè-e chlǎn-a pèbèè dɔu. U̍h-a dǎɛ i̍h maa ke alo. Nyɔ̍ se̍ i̍h-a gbɛ̀ dǒ bloɔ̍ dǔ-iɛ bɛ̌ɛ.

⁴⁰Wɛ̀ u̍h dǔ Jusu-a kǔ-u, iě u̍h fùn i̍ ɛ̍ nyɔ̍ i̍ tè-e dɛ̍ᵻ ja̍i̍, wɛ̀ u̍h pìàɛ̍n ɛ̍ flɛmɛ̍ i̍. Kǎ Juu nyɔ̍-a nu̍ iě u̍h-a tè kǔ i̍.

⁴¹Tà u̍h kɔ̍-ɛa Jusu-ɛ, nɛ̀ gbàɛ̍gbà due nɛ-o. Wɛ̀ gbàlɔ̍ biě delee nɛ dě ɛ̍ di̍i̍, u̍h-u se̍-ae nyɔ̍ i̍ tè sàǐtòò.

⁴²Nɛ̀ sɔ̀n sɛ̀n-ɛ, ɛ̍ mu̍ Juu nyɔ̍-a wlè-weɛ̍ nu̍. Ɛ̍ kɔn gbàlɔ̍ biě ɛ̀ kɔǎn-ɛa dǒ tà-a chɛ̀ i̍-ɛ, wɛ̀ u̍h tè-o Jusu i̍.