Read Western Krahn Chɔɔn 2 Bible Online

Chɔɔn 2 - Western Krahn bible

Chɔɔn 2

¹Dǒ wǐh ta̍a̍n naɛ di̍i̍ wɛ̀ u̍h tù nynɔ̌ jla̍ ja peě dǒ Keina wlɔ̀ di̍i̍ dě Kaladii bloa̍ kɛ̍n. Nɛ̀ Jusu de̍ nɛ-o.

²U̍h dǎ Jusu ke ɔ̍ kòà dǒ peě laa̍ kɛ̍n ke.

³Iě u̍h-a nmɔ̍ wɛ̀, wɛ̀ Jusu de̍ la̍a̍ dě ɔ̍ we̍, “U̍h-a nmɔ̍ wɛ̀-ɛ wa.”

⁴Jusu la̍a̍, “Nynɔ̌ chɛ̀, tǎli ǐn i̍ sǔh, ǎn dɛ̍ nu̍ ti̍ se̍-o nyni̍ ke̍.”

⁵Wɛ̀ Jusu de̍ la̍a̍ dě pòi̍nynuu̍ nɛ-a dǒ-ɛ we̍, “Dɛ̍-o-dɛ̍ ɔ̍ mu̍-a mɔ̀ wlùh sèàɛ̍-ɛ, mɔ̀ nu̍ ɛ̍ o.”

⁶Nɛ̀ tee̍ᵻ u̍h nui-a sɔɔ̌ᵻɛ́, i̍h-a mɛ̀o̍ nyna-o i̍. I̍h bo Juu nyɔ̍-a po̍ nǐ di̍i̍ wɛ̀ u̍h-a dle i̍ u̍h iě dě Nyɔsoa jlǐh i̍ nmɔ. I̍h-a jɛ-ɛ, nɛ̀ nǐ bi̍ᵻá kwela sɔɔ̌n ke kwela ta̍a̍n bo ìh-a pa̍ dě ɛ̍ di̍i̍.

⁷Wɛ̀ Jusu la̍a̍ dě pòi̍nynuu̍ laa̍ we̍, “Mɔ̀ jǐ-i tee̍ᵻ la dǒ nǐ we̍.” Wɛ̀ u̍h jǐ-i i̍h fɛ̍ɛ̍n.

⁸Iě ɔ̍ la̍a̍ dě u̍h we̍, “Mɔ̀ plǐn ɛ̍ la̍ sǔh mɔ̀ iě ɛ̍ peě-a wlu̍ i̍ kɔn nyɔ̍ gba̍.” Wɛ̀ u̍h gba̍ ɛ̍ ɔ̍.

⁹Iě ɔ̍ tɛ̀n ɛ̍ wɔ̍n, nɛ̀ ɛ̍ sàɛ̀ nmɔ̍ wɛ̀. Sɔ tà ɛ̍ sɔ-aɛ, ɔ̍ se̍-o juo, jɛ pòi̍nynuu̍ juh plǐn-a nǐ laa̍-ɛ, u̍h juo-o. Wɛ̀ ɔ̍ dǎ ɔ̀ kɔn nynɔ̌ u̍h ja-a jla̍-ɛ.

¹⁰Iě ɔ̍ la̍a̍ dě ɔ̍ we̍, “Pò ɛ̍ nɛ ka-ɛ, nɛ̀ nyɔ̍ kli̍hgbɛ̍-a ja nmɔ̍ chɛ̀ sàǐtòò, jɛ nmɔ̍ sìèè-a nyɔ̍gbei wlì wɛ̀-ɛ, iě plǒai nmɔ̍ tba̍-o dlǔ. Jɛ nɛ̀ nmɔ̍ chɛ̀ bo ìn tè i̍ te̍e̍ sǔh wɛ̀ ti̍ nɛka ae?”

¹¹Ɛ̀ la bo ɛ̀ nu̍ Jusu-a jbaɛdih-a sàǐtòò naɛ ɔ̍ po̍ dǒ Keina dě Kaladii bloa̍ kɛ̍n, iě ɛ̍ to ɔ̍ tìh-a i̍ bɛ̌-ɛ. Wɛ̀ ɔ̍ kòà gbaɛ ɔ̍ wlùh.

¹²Ɛ̀ la ɛ̍ sì-a i̍-ɛ, wɛ̀ Jusu ke ɔ̍ de̍ ke, ɔ̍ de̍di̍i̍ᵻ ke, ɔ̍ kòà ke iě u̍h mu̍ dǒ Kepanium wlɔ̀ di̍i̍. Dǒ u̍h sì wǐh gbɔ̍.

¹³Juu nyɔ̍-a Sììkɛ̍n Weɛ̍-a Peě nɛ kɛkɛ wɛ̀ sǔh iě Jusu mu̍ dǒ Juluslɛn.

¹⁴Dǒ ɔ̍ jě-e nyɔ̍gbei nɛ̀ u̍h-a ple̍ bliᵻ ke, blawɛ̌ᵻ ke, pawo̍o̍ᵻ dě Nyɔsoa-a slaǎ sà gbò-a gbàɛ̍gbà di̍i̍. Nɛ̀ duuh tìèe̍ teble̍ᵻ de̍e̍ i̍ u̍h-a sìi̍ wlǐ we̍.

¹⁵Wɛ̀ ɔ̍ nu̍ tɔ̌n jɔɛ̍ klaklǎ-a bliku, iě ɔ̍ poe ɛ̍ nɛadɛᵻ ple̍-nyɔ̍ kli̍hgbɛ̍ ke u̍h-a nɛadɛᵻ nɛ-a deě-ɛ sɔ̀n i̍. Wɛ̀ ɔ̍ gbà wlǐ we̍ sìi̍ nyɔ̍-a wlǐ ja̍i̍. Iě ɔ̍ tba̍ u̍h-a teble̍ᵻ jii̍ wlù.

¹⁶Wɛ̀ ɔ̍ la̍a̍ dě pawo̍o̍ᵻ ple̍-nyɔ̍ we̍, “Mɔ̀ sà ìh la da̍a, mɔ̀ bɔ̌ ǐn Baa-a gbò dɔɔ̌ gbò we̍i̍ nu̍-ɛ.”

¹⁷Sɔ dɛ̍ Nyɔsoa-a wlu̍ bla̍-ɛ, i̍h sǐ dǒ ɔ̍ kòà wlì i̍ sǔh. Ɛ̍ la̍a̍, “Àn gbò dɛ-a jàjà nɛ-a dě ǐn di̍i̍-ɛ, ɛ̍ mu̍ ǐn i̍ gbɔ̀lɔ.”

¹⁸Wɛ̀ Juu nyɔ̍-a nyɔ̍ klaaᵻ la̍a̍ dě ɔ̍ we̍, “Ka ìn tba̍-a nyɔ̍ gbɔ̀ i̍ ìè-a ìh la nu̍-ɛ, nɛ̀ jbaɛdih-a dɛ̍ we̍ àn mu̍ po̍ wɛ̀ ɛ̍ iě ɛ̍ we̍i̍ flɔn-ɛ ɛ?”

¹⁹Jusu la̍a̍, “Mɔ̀ wlǎ slaǎ sà gbò la, nɛ̀ ǎn mu̍ ɛ̍ po̍ dǒ wǐh ta̍a̍n di̍i̍ dode̍.”

²⁰Wɛ̀ u̍h la̍a̍, “Ɛ̀ la ɛ̀ dǔ-a sɔ̀nᵻá kwela nyìɛ̍ jɔ̌ mɛ̀o̍ (46) dǒ ɛ̍ po̍ la̍-ɛ, ɛ̍ bo nà àn mu̍ po̍ dǒ wǐh ta̍a̍n di̍i̍ dode̍ ae?”

²¹Jɛ ɛ̍ se̍ slaǎ sà gbò nyi̍ɔ̍ po̍-a ɔ̍ se̍ dǎ, ɔ̍ ku̍ bo ɔ̍ dǎ.

²²Ti̍ Jusu wlǔh-ae wɛ̀-ɛ, iě wlu̍ la ɔ̍ bla̍-aɛ, wɛ̀ ɛ̍ dǔ dǒ ɔ̍ kòà wlì i̍ sǐ-ɛ. Dǒ u̍h poe Nyɔsoa-a wlu̍ ke dɛ̍ Jusu bla̍-aɛ tìh chɛ̀.

²³Ti̍ Jusu nɛ-a Juluslɛn dǒ Sììkɛ̍n Weɛ̍-a Peě tù ti̍ we̍-ɛ, jbaɛdih ɔ̍ po̍-aɛ bo nyɔ̍ dɔu jě iě u̍h gbaɛ ɔ̍ wlùh.

²⁴Jɛ ɔ̍ se̍ u̍h wlùh dlǔ i̍ wlǎ, dɛ̍nu̍ɛ, ɔ̍ ju̍o̍e nyɔ̍ kli̍hgbɛ̍ we̍ i̍.

²⁵Ɔ̍ se̍ pɔ̀n nyɔ̍-o-nyɔ̍ iě nyi̍ɔ̍-a tìh we̍ i̍ sèàɛ̍ dě ɔ̍ we̍, dɛ̍nu̍ɛ, ɔ̍ nɔ̀ɔ̍, ɔ̍ juo dɛ̍ nɛ-a dě nyi̍ɔ̍ di̍i̍-ɛ.