Read Western Krahn Chɔɔn 20 Bible Online

Chɔɔn 20 - Western Krahn bible

Chɔɔn 20

¹Ɛ̍ nu̍ Sɔnde̍ bla-a klàɛ̍we̍ gbàìn nɛ̀ dě sɔ̀n se̍ i̍ flɔn ke̍, iě Mɛle Makalin mu̍ dě Jusu-a gbàlɔ̍ we̍. Ɔ̍ iě-ae gbɛ̀n-ɛ, nɛ̀ sɔɔ̌ ɛ̀ nɛ-a dǒ ɛ̍ wɔ̍i̍n-ɛ, nɛ̀ ɛ̍ sɔ-o wɛ̀.

²Wɛ̀ ɔ̍ gba̍ ple̍-ɛ dě Samo Pitɛ ke kòà ɔ̀ kɔn tìh Jusu kma-a we̍. Iě ɔ̍ la̍a̍ dě u̍h we̍, “U̍h sà Joi-a kǔ dě gbàlɔ̍ biě di̍i̍ o, jɛ tà u̍h gba̍-a ɛ̍-ɛ, à se̍-o juo.”

³Wɛ̀ Pitɛ ke kòà dɔɔ laa̍ wa̍n bloɔ̍, iě u̍h mu̍ dě gbàlɔ̍ biě-a chɛ̀ we̍.

⁴U̍h gba̍-a ple̍-ɛɛ, wɛ̀ kòà laa̍ ɔ̍ si̍e̍ Pitɛ bu̍hᵻ i̍ iě ɔ̍ nyni̍ dě gbàlɔ̍ biě we̍ sàǐtòò.

⁵Iě ɔ̍ bla̍ jii̍wlù wɛ̀ ɔ̍ gbɛ̀n deě, sɔ ɔ̍ jě flɛmɛ̍ jlii̍ nɛ̀ i̍h pɛ̌n-ɛɛ i̍, jɛ ɔ̍ se̍-e pa̍.

⁶Samo Pitɛ jɔ wɔ̀-a de̍-ɛ, ɔ̍ ji̍-aɛ, wɛ̀ ɔ̍ pa̍ dě biě-a chɛ̀ di̍i̍. Dǒ ɔ̍ jě-e flɛmɛ̍ jlii̍ nɛ̀ i̍h pɛ̌n-ɛɛ i̍,

⁷ɛ̍ ke jliɛ̍ jɛ u̍h pìàɛ̍n-a Jusu dlǔ i̍-ɛ ke. Jɛ jliɛ̍ jɛ u̍h pìàɛ̍n-a ɔ̍ dlǔ i̍-ɛ, nɛ̀ ɛ̍ nu̍ gbo̍ iě ɛ̍ pɛ̌n dɔɔ̌.

⁸Wɛ̀ kòà jɔ jɛɛ-a gbàlɔ̍-a chɛ̀ sàǐtòò-ɛ, iě ɔ̍ pa̍ ke. Ɔ̍ jě-a deě i̍-ɛ, wɛ̀ ɔ̍ po̍ ɛ̍ tìh chɛ̀ ka Jusu wlǔh-a dě-eɛ. (

⁹Jɛ nɛ̀ Nyɔsoa-a wlu̍ ɛ̀ la̍ ɔ̍ kɔn ɔ̍ iě-ae wlǔh-ɛ, nɛ̀ u̍h se̍ ɛ̍ we̍i̍ wɔ̌n ke̍.)

¹⁰Wɛ̀ kòà laa̍ u̍h mu̍ de̍ u̍h blǐ i̍.

¹¹Wɛ̀ Mɛle nyna i̍ dǒ gbàlɔ̍ biě wɔ̍i̍n ɔ̍ fìn. Ɔ̍ nɛ dǒ fìn la̍-a iě ɔ̍ bla̍ jii̍wlù ɔ̍ gbɛ̀n dě gbàlɔ̍ biě di̍i̍.

¹²Dǒ ɔ̍ jě-e Nyɔsoa-a ǐnchɔ̀ sɔɔ̌n i̍h pa̍ jlii̍ plǔᵻ i̍, nɛ̀ tà Jusu pɛ̌n-a i̍ de-ɛ, dǒ i̍h tè i̍. Due wɔ̀ dě ɔ̍ dlǔ we̍, wɛ̀ dɛɛ wɔ̀ dě ɔ̍ bu̍hᵻ we̍.

¹³I̍h la̍a̍, “Nynɔ̌ chɛ̀, dɛ̍-ɛ tìh àn fìn ɛ?” Mɛle la̍a̍, “Ǎn Joi bo u̍h dǔ-u, iě tà u̍h gba̍-ɛa ɔ̍-ɛ, ǐn se̍-o juo.”

¹⁴Ɔ̍ wɔ̀-a wlu-ɛɛ, iě ɔ̍ bǐi kwa̍. Wɛ̀ ɔ̍ jě Jusu nɛ̀ ɔ̍ nyna i̍. Jɛ ka ɛ̍ iě-a Jusu nu̍-ɛ, ɔ̍ se̍ i̍h juo.

¹⁵Jusu la̍a̍, “Nynɔ̌ chɛ̀, dɛ̍-ɛ tìh àn fìn ɛ? Nyɔ̍ bo àn pɔ̀n i̍ ɛ?” Sɔ ɔ̍ jajeɛ̍ gbàɛ̍gbà we̍ i̍ gbɛ̀n nyɔ̍ bo de. Wɛ̀ ɔ̍ la̍a̍ dě ɔ̍ we̍, “Nyɔ̍ klaa, pò ɛ̍ tù mɔ̀ ɔ̀ iě ɔ̍-ɔ dǔ-ɛ, nɛ̀ tà ìn gba̍-ɛa ɔ̍-ɛ, sà-o tà wɛ̀ iě ɔ̍-ɔ dǔ.”

¹⁶Jusu la̍a̍, “Mɛle.” Mɛle fèàɛ̀-a dě ɔ̍ we̍-ɛ, iě ɔ̍ la̍a̍ dě Iblu wlu̍ di̍i̍, “Wlaboni.” (Ɛ̍ gbɔ̀ nu̍ Nǎ Po̍ Nyɔ̍.)

¹⁷Wɛ̀ Jusu la̍a̍ dě ɔ̍ we̍, “Bɔ̌ ǐn i̍ gbɛ̍n-ɛ, dɛ̍nu̍ɛ, nɛ̌ se̍a dě ǐn Baa we̍ ja̍i̍ mu̍ ke̍. Jɛ mu̍ dě ǐn de̍di̍i̍ᵻ we̍ ìè u̍h wlùh sèàɛ̍ ka ǎn mu̍-a la̍ dě u̍h ke ǐn ke à Baa we̍ ja̍i̍-ɛ, ɔ̀ nu̍-a u̍h ke ǐn ke à Nyɔsoa-a.”

¹⁸Iě Mɛle Makalin mu̍, wɛ̀ ɔ̍ sèàɛ̍ kòà laa̍ wlùh ka ɔ̍ jě-a Joi, iě ɔ̍ sèàɛ̍-a ɔ̍ ìh kli̍hgbɛ̍ la wlùh-ɛ.

¹⁹Ɛ̍ nu̍ Sɔnde̍ bla-a flìwe̍ pɛɛ̍, wɛ̀ kòà laa̍ u̍h gbǎ tàdùè dě gbò. Wɛ̀ u̍h gbà dǒ gbò wɔ̍i̍n, dɛ̍nu̍ɛ, u̍h-a ple̍ Juu nyɔ̍-a nyɔ̍ klaaᵻ jǔ. Wɛ̀ Jusu ji̍ iě ɔ̍ nyna i̍ dě u̍h nynɛ̌, iě ɔ̍ la̍a̍ dě u̍h we̍, “Wlùh-a i̍ tè-ɛ dǒ mɔ̀ we̍.”

²⁰Ɔ̍ wɔ̀-a dɛ̍ la wlu-ɛɛ, wɛ̀ ɔ̍ to ɔ̍ sɔ̍nᵻ dě u̍h we̍, ɛ̍ ke dǒ ɔ̍ gbèɛ̀n we̍ ke. Ti̍ kòà jě-a Joi-ɛ, sɔ ɛ̍ po̍ u̍h mɔna̍-a kaa̍.

²¹Wɛ̀ Jusu la̍a̍ dě u̍h we̍ dɛ, “Wlùh-a i̍ tè-ɛ dǒ mɔ̀ we̍. Ka Baa dbo̍-a m-ɛ, ǎn dbo̍ la̍ mɔ̀ ke.”

²²Ɔ̍ bla̍-a ɛ̀ la-ɛ, wɛ̀ ɔ̍ po̍ u̍h poɔ. Iě ɔ̍ la̍a̍ dě u̍h we̍, “Mɔ̀ jě Nyɔsoa-a Sùù.

²³Pò mɔ̀ tǎli nyɔ̍-o-nyɔ̍-a gblɛ̍n sɔ̀ɛ̀n-a tìh i̍-ɛ, nɛ̀ i̍h tǎli-ɛ i̍. Jɛ pò mɔ̀ se̍ i̍h i̍ tǎli-ɛ, nɛ̀ i̍h se̍ i̍ tǎli-ɛ.”

²⁴Tɔmɔ ɔ̀ nu̍-a kòà-a pùè jɔ̌ sɔɔ̌n-a due u̍h-a dǎɛ-a Gbàju-ɛ, ɔ̍ se̍ dě u̍h nynɛ̌ nɛ wɛ̀ Jusu ji̍.

²⁵Wɛ̀ u̍h sèàɛ̍ ɔ̍ wlùh, u̍h la̍a̍, “À jě Joi wɛ̀.” Tɔmɔ la̍a̍, “Pò ǐn se̍ tulǔ-a pǎᵻ nɛ-a dě ɔ̍ kwa̍a̍-a jě, wɛ̀ iě i̍h ke dǐ-a pǎ nɛ-a dǒ ɔ̍ gbèɛ̀n we̍-ɛ i̍ tǔh-ɛ, nɛ̀ ǐn se̍ mɔ̀-a wlu̍ tìh chɛ̀ po̍ mu̍.”

²⁶Wǐh mɛ̀ta̍a̍n sì-aɛ, wɛ̀ ɔ̍ kòà gbǎ tàdùè dɛ dě gbò. Nɛ̀ u̍h ke Tɔmɔ nɛ-o, iě u̍h gbà dǒ gbò-a chɛ̀ wɔ̍i̍n. Dǒ Jusu ji̍-i iě ɔ̍ nyna i̍ dě u̍h nynɛ̌. Ɔ̍ la̍a̍, “Wlùh-a i̍ tè-ɛ dǒ mɔ̀ we̍.”

²⁷Wɛ̀ ɔ̍ la̍a̍ dě Tɔmɔ we̍, “Gbɛ̀n dě ǐn kwa̍a̍ ìè-e i̍ tǔh, nɛ̀ ìn slɛ̌-ɛ sɔ̍n i̍ ìè dǒ ǐn gbèɛ̀n we̍ i̍ tǔh. Dě ìn di̍i̍ iě-e i̍ gbe-e tìh bɔ̌, ìè wlùh gbaɛ blě.”

²⁸Tɔmɔ la̍a̍ dě ɔ̍ we̍, “Ǎn Joi ke ǎn Nyɔsoa.”

²⁹Wɛ̀ Jusu la̍a̍ dě ɔ̍ we̍, “Ìn jě m wɛ̀ dɛbo, ɛ̍ kɔn ìn gbaɛ ǐn wlùh ae? Nyɔ̍ ùh se̍-a ǐn jě wɛ̀ ùh gbaɛ-a ǐn wlùh-ɛ, nɛ̀ u̍h nmɔ i̍.”

³⁰Jusu po̍ jbaɛdih dɔu diih dǒ ɔ̍ kòà jlǐhwai. Jɛ i̍h nɔ̀ɔ̍, i̍h se̍ chlǐh-ɛ nɔ̌ chlǐh-dɛ̍ la di̍i̍.

³¹Ìh la i̍h chlǐh-ɛ, wɛ̀ mɔ̀ iě ɛ̍ tìh chɛ̀ po̍ ka Jusu nu̍-a Nyɔsoa-a Jǔ ɔ̀ nu̍-a ɔ̍ Chèɛ̀ Tba̍ju-ɛ. Nɛ̀ wlùh gbaɛ blě-ɛ bo ɛ̀ mu̍ mɔ̀ feɛ nyǐ dǒ ɔ̍ nynɛ̌ kɛ̍n.