Read Western Krahn Chɔɔn 3 Bible Online

Chɔɔn 3 - Western Krahn bible

Chɔɔn 3

¹Jɔ̍gbau due ɔ̍ nynɛ̌ bo Nikodima. Gbɔ̀ù u̍h-a dǎɛ-a Fɛlesii-ɛ, dě ɛ̍ di̍i̍ bo ɔ̍ nɛ, iě ɔ̍ nu̍ Juu nyɔ̍-a nyɔ̍ klaa dɛ.

²Ɔ̍-ɔ bo ɔ̀ mu̍ dě Jusu we̍ maɔ̍, iě ɔ̍ la̍a̍ dě ɔ̍ we̍, “Dlǔtu, à juo ɛ̍-ɛ mɔ̀ bo ɔ̀ nu̍ nǎ po̍ nyɔ̍ ɔ̀ sɔ dě Nyɔsoa we̍. Dɛ̍nu̍ɛ, nyɔ̍ ɔ̀ Nyɔsoa se̍-a we̍ nɛ-ɛ, nɛ̀ ɔ̍ se̍ jbaɛdih la po̍-ɛ bɛ̌ɛ.”

³Wɛ̀ Jusu la̍a̍ dě ɔ̍ we̍, “Bɔ̌ ǐn sèàɛ̍ ìn tìh-a taǐn wlùh, pò nyɔ̍ iě Nyɔsoa-a kmɔ̌ wlu̍ i̍ kɔn-ɛ jě-ɛ, nɛ̀ ɔ̍ mu̍ wlǔh dode̍.”

⁴Nikodima la̍a̍ dě ɔ̍ we̍, “Pò nyɔ̍ wlǔh wɛ̀-ɛ, nɛ̀ ka ɔ̍ mu̍ wlǔh-ɛ nu̍ dɛ ɛ? Nɛ̀ ɔ̍ bɛ̌ɛ dě ɔ̍ de̍ di̍i̍ pa̍-a dɛ wɛ̀ ɔ̍ iě wlǔh-ɛa sɔɔ̌n naɛ nu̍ ae?”

⁵Jusu la̍a̍, “Tìh-a taǐn ǎn sèàɛ̍ ìn wlùh, pò nyɔ̍ wlǔh dode̍ dǒ nǐ ke Nyɔsoa-a Sùù we̍-ɛ, nɛ̀ ɛ̍ kɔn tɛ̀ ǐn sà-o. Jɛ pò ɛ̍ se̍ la̍a̍n nɛ-ɛ, nɛ̀ ɔ̍ se̍ dě Nyɔsoa-a kmɔ̌ wlu̍ i̍ kɔn-ɛ di̍i̍ i̍ sǐ mu̍.

⁶Wlɔ̀ nyi̍ɔ̍-a wlǔh-i wlɔ̀ nyi̍ɔ̍. Jɛ Nyɔsoa-a Sùù bo ɛ̀ nɛ-ɛ ɔ̍ kmɔ̌.

⁷Nyɔ̍ kɔn nyɔ̍ iě wlǔh dode̍ tìh ǎn sà-a dě ìn we̍-ɛ, ɛ̍ bɔ̌ ìn i̍ kèle-ɛ.

⁸Poɔ ja ji̍-ɛ, tà ɛ̍ jbɛɛ-ɛ, nɛ̀ dě ɛ̍ mu̍. Àn wɔ̌n ɛ̍ wlu̍ jɛ ìn se̍ ɛ̍ sɔ la̍ ke ɛ̍ mu̍-i la̍ juo. Kǎ ɛ̍ nɛ ke dǒ nyɔ̍ juh Nyɔsoa-a Sùù wlǔh-ia we̍.”

⁹Nikodima la̍a̍, “Nɛ̀ ka ɛ̍ mu̍ nɛ-ɛ nu̍ ɛ?”

¹⁰Jusu la̍a̍, “Mɔ̀ jɔ nu̍-a nǎ po̍ nyɔ̍ klaa dǒ Eslɔɛ nyɔ̍ we̍-ɛ, wɛ̀ ìn se̍ ɛ̀ la i̍ wɔ̌n ae?

¹¹Tìh-a taǐn ǎn sèàɛ̍ ìn wlùh, dɛ̍ à juo-aɛ, ɛ̍ bo à sà-a. Dɛ̍ à jě-aɛ, ɛ̍ kɔn sàànsi̍i̍h bo à nu̍. Jɛ mɔ̀-a sà à wlu̍ dounᵻ i̍.

¹²Ǐn sèàɛ̍ mɔ̀ kmɔ̌ we̍ dɛ̍ᵻá tìh wlùh wɛ̀ mɔ̀ se̍ i̍h tìh dǎɛ. Nɛ̀ pò ǐn sèàɛ̍ mɔ̀ wlùh dɛ̍ᵻ nɛ-a dě ja̍i̍wlɔ̀-ɛ tìh-ɛ, nɛ̀ ka mɔ̀-a mu̍ i̍h tìh dǎɛ nu̍ ɛ?

¹³Nyɔ̍ dɔɔ se̍a dě ja̍i̍wlɔ̀ mu̍, jɔ nu̍-a Nyi̍ɔ̍-a Jǔ ɔ̀ sɔ-a dě ja̍i̍wlɔ̀-ɛ, ɔ̍ kɔn tɛ̀ ǐn sà-o.”

¹⁴Tìɛ̀n Mose nu̍-a sɛ̍ we̍i̍-ɛ, ka ɔ̍ nu̍-a ɛ̍ dǒ tu̍ wlì pèle-ɛ dě kwlǎslò we̍-ɛ, kǎ u̍h-a mu̍ Nyi̍ɔ̍-a Jǔ ja̍i̍ pèle-ɛ nu̍ ke.

¹⁵Wɛ̀ nyɔ̍ ùh-a mu̍-a ɔ̍ wlùh gbaɛ-ɛ u̍h iě kmɔ̌ sie feɛ blě.

¹⁶Dɛ̍nu̍ɛ, Nyɔsoa jbɛɛ kmɔ̌ la-a kaa̍, ɛ̍ kɔn ɔ̍ to ɔ̍ Jǔ jɔɛ̍ due gbài̍. Nɛ̀ nyɔ̍ jɔ mu̍-a ɔ̍ wlùh gbaɛ-ɛ, ɔ̍ se̍ mɛ̌ mu̍, jɛ nɛ̀ ɔ̍ mu̍ kmɔ̌ sie feɛ blě.

¹⁷Nyɔsoa se̍ ɔ̍ Jǔ dbo̍ da̍a kmɔ̌ we̍ ɔ̍ iě ɛ̍ tìh gbɛ̍n-ɛ, jɛ wɛ̀ ɔ̍ iě ɛ̍ sèìe.

¹⁸Nyɔ̍ jɔ gbaɛ-a ɔ̍ wlùh-ɛ, nɛ̀ tìh se̍ ɔ̍ gbɛ̍n. Jɛ jɔ se̍-a ɔ̍ wlùh gbaɛ-ɛ, nɛ̀ tìh gbɛ̍n ɔ̍ wɛ̀ se̍e̍, dɛ̍nu̍ɛ, ɔ̍ se̍ Nyɔsoa-a Jǔ due gbài̍ wlùh gbaɛ.

¹⁹Ɛ̀ mu̍-a tìh-a gbɛ̍n-ɛ blě-ɛ, ɛ̍-ɛ la. Sɔ̀npli ji̍ nɔ̌ kmɔ̌ we̍, jɛ nyɔ̍ɔ jbɛɛ kwile-e iě u̍h se̍ sɔ̀npli-i jbɛɛ. Dɛ̍nu̍ɛ, u̍h-a nu̍ dɛ̍ᵻ sɔ̀nᵻ.

²⁰Nyɔ̍-o-nyɔ̍ ɔ̀ nu̍-a dɛ̍ᵻ sɔ̀nᵻɛ́, nɛ̀ ɔ̍ faɛn sɔ̀npli, nɛ̀ ɔ̍-ɔ ji̍ dǒ sɔ̀npli we̍. Dɛ̍nu̍ɛ, nɛ̀ ɔ̍ dɛ̍ᵻ sɔ̀nᵻá mu̍ kɛ̍n nyɛ.

²¹Jɛ nyɔ̍ ɔ̀ nu̍-a dɛ̍ᵻ ìh Nyɔsoa la̍ ìh slɛ̌-a i̍-ɛ, nɛ̀ ɔ̍-ɔ bo ɔ̀ ji̍ dǒ sɔ̀npli we̍, wɛ̀ dɛ̍ ɔ̍ nu̍-aɛ ɛ̍ iě jě-eɛ te̍gbe̍i̍n ka ɔ̍ jě-a Nyɔsoa dɛ̍ɛ̍-ɛ.

²²Ɛ̀ la ɛ̍ sì-a i̍-ɛ, wɛ̀ Jusu ke ɔ̍ kòà mu̍ Judia fɔɔ. Dě ɔ̍ ke u̍h sì wǐh, iě ɔ̍ po̍ nyɔ̍ɔ nǐ dlǔ.

²³Nɛ̀ kǎ Chɔɔn-a po̍ nyɔ̍ nǐ dlǔ ke dǒ Inaa wlɔ̀ di̍i̍, dɛ̍nu̍ɛ, nǐᵻ dɔu nɛ-e. Ɛ̍ se̍ Salim wlɔ̀ we̍ i̍ ti̍ɛ̍ɛn. Wɛ̀ nyɔ̍gbei ji̍ iě ɔ̍ po̍ u̍h nǐ dlǔ. (

²⁴Nɛ̀ u̍h se̍ Chɔɔn kasoo po̍ ke̍.)

²⁵Wɛ̀ wɔ̍ɔ̍n i̍ sà-a wlǔh ja̍i̍ dǒ Chɔɔn-a kòà duuh ke Juu jǔ due nynɛ̌ dǒ dle i̍ ìè dě Nyɔsoa jlǐh i̍ nmɔ dɛ we̍.

²⁶Wɛ̀ u̍h mu̍ dě Chɔɔn we̍, iě u̍h la̍a̍, “Dlǔtu, jɔ̍gbau ɔ̀ ke ìn nɛ-a dě Jɔɔdɛn nǐ-a fɔ̌ dɛɛ we̍, ɔ̀ kɔn sàànsi̍i̍h ìn nu̍-aɛ, ɔ̍ po̍ la̍ nyɔ̍ nǐ dlǔ de̍à. Iě nyɔ̍ kli̍hgbɛ̍-a mu̍ dě ɔ̍ we̍.”

²⁷Chɔɔn la̍a̍, “Nyɔsoa-a se̍ nyɔ̍ dɛ̍ nyǐ wɛ̀ ɔ̍-ɔ blě ɛ̍.

²⁸Mɔ̀-a chɛ̀ nu̍ ǎn sàànsi̍i̍h ka na̍a̍, ‘Ǐn se̍ Nyɔsoa-a Chèɛ̀ Tba̍ju, jɛ Nyɔsoa dbo̍ m nɔ̌ ɔ̍ jǔ.’

²⁹Nynɔ̌ delee kɔn dǒ ɔ̍ kɔan ɔ̍ ji̍-ia jla̍-a we̍. Nɛ̀ pò kɔan delee ba̍ nyna doǒ i̍ wɛ̀ ɔ̍ iě kɔan-a wlu̍ wɔ̌n-ɛ, nɛ̀ ɛ̍ po̍ ɔ̍ mɔna̍-a kaa̍. Ɛ̍ bo ɛ̀ po̍ m ke, ǎn nmɔ-ɛ wɛ̀ kwlǎ wɛ̀ kaka.

³⁰Chèɛ̀ Tba̍ju bo ɔ̀ kɔn nynɛ̌ iě mu̍ la̍ sǔh, wɛ̀ naɛ̍ nynɛ̌ iě i̍ pa̍.”

³¹Nyɔ̍ ɔ̀ sɔ-a dě ja̍i̍wlɔ̀-ɛ, ɔ̍ nɛ dǒ nyɔ̍ kli̍hgbɛ̍ dlǔwèàì. Nɛ̀ nyɔ̍ ɔ̀ sɔ-a nɔ̌ bloɔ̍-ɛ, ɔ̍ kɔn nɔ̌ bloɔ̍ iě ɔ̍ wlu nɔ̌ bloɔ̍ nɛ dɛ̍. Jɔ sɔ-a dě ja̍i̍wlɔ̀-ɛ, ɔ̍ nɛ dǒ nyɔ̍ kli̍hgbɛ̍ dlǔwèàì.

³²Dɛ̍ ɔ̍ wɔ̌n-a wɛ̀ ɔ̍ gba̍-a jlǐhɛ̍ pùn-ɛ, ɛ̍ kɔn sàànsi̍i̍h bo ɔ̍ nu̍. Jɛ nyɔ̍ se̍ ɔ̍ wlu̍ tìh dǎɛ.

³³Nyɔ̍ jɔ gbɛ̍n-a ɔ̍ wlu̍ i̍-ɛ, nɛ̀ ɔ̍ juo ɛ̍ i̍ ka Nyɔsoa nu̍-a tìh-a taǐn nyɔ̍-ɛ.

³⁴Nɛ̀ nyɔ̍ ɔ̀ Nyɔsoa dbo̍-aɛ, Nyɔsoa-a wlu̍ bo ɔ̍ wlu-i, dɛ̍nu̍ɛ, Nyɔsoa se̍ ɔ̍ Sùù-a kwlǎgbàì nyǐ.

³⁵Baa Nyɔsoa jbɛɛ ɔ̍ Jǔ-u, iě ɔ̍ tèè ɔ̍ dɛ̍ᵻ kli̍hgbɛ̍ kwa̍.

³⁶Nyɔ̍ jɔ gbaɛ-a Jǔ la wlùh-ɛ, nɛ̀ ɔ̍ blě kmɔ̌ sie feɛ. Jɛ nyɔ̍ jɔ se̍-a Jǔ la ɔ̍ wlu̍ nu̍-ɛ, ɔ̍ se̍ feɛ jě mu̍. Jɛ nɛ̀ Nyɔsoa-a mu̍ ɔ̍ kàn gbɛ̍n.