Read Western Krahn Chɔɔn 5 Bible Online

Chɔɔn 5 - Western Krahn bible

Chɔɔn 5

¹Ɛ̀ la ɛ̍ sì-a i̍-ɛ, iě Jusu mu̍ Juu nyɔ̍-a peě kɛ̍n dǒ Juluslɛn wlɔ̀ di̍i̍.

²Nɛ̀ u̍h blě pa̍la̍ wɔ̍n due dǒ wlɔ̀ laa̍ di̍i̍ u̍h-a dǎɛ ɛ̍ Blawɛ̌-a Pa̍la̍ Wɔ̍n. Nɛ̀ dǒ dle-e wloo nɛ, ɛ̍ nynɛ̌ bo Bɛsata dě Iblu wlu̍ di̍i̍. Ɛ̍ blě fùnǐ m̀m̌.

³Dǒ i̍h sɔ̀n bo wɛ̌ᵻ nyɔ̍ dɔu wèla i̍. Dɔ̌-nyɔ̍ o, i̍ kɔ̌-nyɔ̍ o, klɔ-nyɔ̍ o, dǒ u̍h nɛ. [U̍h-a chlì nǐ-a sèke-ɛ we̍ i̍.

⁴Dɛ̍nu̍ɛ, Joi-a ǐnchɔ̀-a ji̍ dǒ dle-e wloo laa̍ kɛ̍n sɔ̀ngbɛ̀jɛ̀ iě ɛ̍ sèke nǐ i̍. Nɛ̀ pò ɛ̍ sèke i̍-ɛ, nyɔ̍ sàǐtòò ɔ̀ mu̍-a dǒ ɛ̍ kɛ̍n gbǎ-ɛ, wɛ̌ tu̍ ɛ̀ nɛ-a dǒ ɔ̍ pùn-ɛ, nɛ̀ dǒ ɛ̍ nyna ɛ̍ bɔ̌.]

⁵Nɛ̀ dǒ jɔ̍gbau due nɛ, ɔ̍ poa-ɛ sɔ̀nᵻá kwela ta̍a̍n jɔ̌ mɛ̀ta̍a̍n (38) wɛ̀.

⁶Jusu jě-a ɔ̍-ɛ, sɔ ka ɔ̍ nu̍-a bloɔ̍ wlè sɔɛn-ɛ, ɔ̍ juo-o dɛ̍ i̍. Iě ɔ̍ la̍a̍ dě ɔ̍ we̍, “Àn pɔ̀n pǔh-ɛ i̍ ae?”

⁷Jɔ̍gbau laa̍ ɔ̍ la̍a̍, “Nyɔ̍ klaa, pò wloo la ɛ̍ sèke i̍-ɛ, nɛ̀ nyɔ̍ se̍ nɛ ɔ̍ iě ǐn dǒ ɛ̍ kɛ̍n po̍. Nɛ̀ pò ǐn ja dɛ̍ we̍ fɔ̀n iě-o gbǎ-ɛ, nɛ̀ nyɔ̍ dɔɔ chɛ̍n ǐn jǔ ɔ̍ gbǎ-o.”

⁸Jusu la̍a̍ dě ɔ̍ we̍, “Sɔ bloɔ̍, dǔ àn slɛ-ɛ ìè na.”

⁹Dǒ ɔ̍ nyna ɔ̍ pǔh, iě ɔ̍ dǔ ɔ̍ slɛ-ɛ ɔ̍ na. Weɛ̍ laa̍ nɛ̀ ɛ̍ nu̍ Juu nyɔ̍-a wlè-weɛ̍.

¹⁰Wɛ̀ Juu nyɔ̍-a nyɔ̍ klaaᵻ la̍a̍ dě jɔ̍gbau ɔ̀ pǔh-aɛ we̍, “Sèàn nu̍ wlè-weɛ̍. À telě la̍ ɛ̍ se̍ i̍ slɛ̀ ìè àn slɛ kwa̍ blě.”

¹¹Iě jǔ la̍a̍, “Jɔ̍gbau ɔ̀ pǔh-ia m-ɛ, ɔ̍ la̍ ǐn dǔ ǎn slɛ iě na.”

¹²Iě u̍h tèle ɔ̍ i̍, u̍h la̍a̍, “Jɔ̍gbau ɔ̀ la̍ dǔ àn slɛ-ɛ ìè na-ɛ, ɔ̍ nynɛ̌ ɛ?”

¹³Jɛ jǔ se̍ nyɔ̍ ɔ̀ pǔh-ia ɔ̍-ɛ juo, dɛ̍nu̍ɛ, nɛ̀ nyɔ̍ tlùgbei̍ nɛ-o. Wɛ̀ Jusu wɔ̍ dlɔ̍ dě u̍h nynɛ̌ ke.

¹⁴Ɛ̀ la ɛ̍ wɔ̀-a nɛ-ɛ, wɛ̀ Jusu jě ɔ̍ dě Nyɔsoa-a slaǎ sà gbò sɔ̀n. Iě Jusu la̍a̍ dě ɔ̍ we̍, “Gbɛ̀n-e, ìn nɛ blee wɛ̀. Bɔ̌ gblɛ̍n sɔ̀ɛ̀n nu̍-ɛ dɛ wɛ̀ gboklan dɛ̍ je̍e ìn pùn nɛ.”

¹⁵Wɛ̀ jɔ̍gbau laa̍ ɔ̍ mu̍, iě ka Jusu pǔh-ia ɔ̍-ɛ, wɛ̀ ɔ̍ dǔ Juu nyɔ̍-a nyɔ̍ klaaᵻ wlùh sèàɛ̍-ɛ.

¹⁶Ɛ̍ kɔn tìh u̍h tè Jusu klě jě-eɛ gbɔ̀, dɛ̍nu̍ɛ, ɔ̍ pǔh-i nyɔ̍ dǒ wlè-weɛ̍ di̍i̍.

¹⁷Wɛ̀ Jusu la̍a̍, “Ǐn Baa-a nu̍ dbo̍ ma̍u̍, ɛ̍ kɔn ǎn nu̍ dbo̍ ke.”

¹⁸Ɛ̍-ɛ bo ɛ̀ po̍ Juu nyɔ̍-a nyɔ̍ klaaᵻá jlu̍h dě de̍i̍ u̍h iě ɔ̍ dbǎ. Dɛ̍nu̍ɛ, ɔ̍ se̍ wlè-weɛ̍ nɛ due-a telě wa̍ dɛ, jɛ ɔ̍ dǎɛ Nyɔsoa ɔ̍ kɔn-ɔ Baa, nɛ̀ ɔ̍ po̍ la̍ ɔ̍ chɛ̀ Nyɔsoa we̍ bo.

¹⁹Wɛ̀ Jusu la̍a̍ dě u̍h we̍, “Mɔ̀ bɔ̌ ǐn sèàɛ̍ mɔ̀ tìh-a taǐn wlùh. Nyɔsoa-a Jǔ se̍ dɛ̍ nu̍-ɛ bɛ̌ɛ dǒ ɔ̍ chɛ̀-a gbǐh we̍. Jɛ dɛ̍ ɔ̍ jě-a ɔ̍ Baa kwa̍a̍-ɛ, ɛ̍-ɛ bo ɔ̍ nu̍. Dɛ̍nu̍ɛ, dɛ̍ Baa nu̍-aɛ, nɛ̀ ɛ̍ bo ɔ̍ Jǔ-a nu̍ ke.

²⁰Dɛ̍nu̍ɛ, Baa jbɛɛ Jǔ-u iě ɔ̍ toe ɔ̍ dɛ̍ᵻ kli̍hgbɛ̍ ɔ̍ chɛ̀-a nu̍-aɛ. Jɛ ɔ̍ mu̍ ɔ̍ wɔ̍n ku̍ dɛ̍ᵻ jih sìì-a jih la-a toe, wɛ̀ ɛ̍ iě mɔ̀ wɔ̍n flɔn-ɛ.

²¹Ka Baa-a sà-e mɛ̌-nyɔ̍ iě ɔ̍ nyǐ-a u̍h feɛ-ɛ, kǎ Jǔ-a nu̍ nyɔ̍ ɔ̍ pɔ̀n-a feɛ nyǐ-ɛ i̍-ɛ ke.

²²Baa se̍ nyɔ̍-o-nyɔ̍-a taɔ pa̍, dɛ̍nu̍ɛ, taɔ pa̍-a kli̍hgbɛ̍ ɔ̍ tèè ɛ̍ Jǔ kwa̍.

²³Ɔ̍ nu̍ ɛ̍-ɛ wɛ̀ nyɔ̍ kli̍hgbɛ̍ iě Jǔ la ja̍ tè, ɛ̀ kɔn ba̍ u̍h-a nu̍-a Baa ja̍ tè-ɛ ke-ɛ. Nyɔ̍ ɔ̀ se̍-a Jǔ ja̍ tè-ɛ, nɛ̀ Baa jɔ dbo̍-a Jǔ-a chɛ̀-ɛ bo ɔ̍ se̍ ja̍ tè.

²⁴“Tìh-a taǐn ǎn sèàɛ̍ mɔ̀ wlùh, pò nyɔ̍ wɔ̌n ǎn wlu̍ wɛ̀ ɔ̍ iě nyɔ̍ ɔ̀ dbo̍-a m-ɛ wlùh gbaɛ-ɛ, nɛ̀ ɔ̍ blě kmɔ̌ sie feɛ. Nɛ̀ tìh se̍ ɔ̍ gbɛ̍n mu̍ dɛ, nɛ̀ ɔ̍ chɛ̍n dǒ mɛ̌ɛ we̍ tìè iě ɔ̍ jɛɛ feɛ.

²⁵Bɔ̌ ǐn sèàɛ̍ mɔ̀ tìh-a taǐn wlùh, ɛ̍ mu̍ ti̍ kɔn, ti̍-a chɛ̀ nyni̍ wɛ̀, wɛ̀ mɛ̌-nyɔ̍ iě Nyɔsoa-a Jǔ-a wlu̍ wɔ̌n. Nɛ̀ nyɔ̍ ùh-a mu̍-a ɔ̍ wlu̍ wɔ̌n-ɛ, u̍h-a mu̍ kmɔ̌ nɛ.

²⁶Ka Baa Nyɔsoa-a chɛ̀ nu̍-a nyɔ̍ feɛ nyǐ gbǐh blě-ɛɛ, kǎ ɔ̍ nu̍ ɔ̍ Jǔ wɛ̀ ke.

²⁷Wɛ̀ ɔ̍ tù Jǔ-a chɛ̀ tùn kwa̍a̍ ɔ̍ iě taɔ pa̍, dɛ̍nu̍ɛ, ɔ̍-ɔ bo ɔ̀ nu̍ Nyi̍ɔ̍-a Jǔ.

²⁸Ɛ̀ la ɛ̍ bɔ̌ mɔ̀ wɔ̍n flɔn-ɛ, dɛ̍nu̍ɛ, ti̍-a nyni̍ la̍-ɛ wɛ̀ ùh kli̍hgbɛ̍ nɛ-a gbàlɔ̍ᵻ biěᵻ di̍i̍ i̍-ɛ, u̍h iě ɔ̍ wlu̍ wɔ̌n.

²⁹Nɛ̀ u̍h-a mu̍ sɔ̀n i̍ sǐ. Nɛ̀ juh nu̍-a dɛ̍ᵻ chɛ̀ i̍-ɛ, u̍h-a mu̍-e wlǔh wɛ̀ u̍h iě kmɔ̌ nɛ. Wɛ̀ juh nu̍-a dɛ̍ᵻ sɔ̀nᵻ i̍-ɛ, u̍h iě-e wlǔh wɛ̀ u̍h iě kɛ̀n sà-ɛ.

³⁰“Ǐn se̍ dɛ̍ nu̍-ɛ bɛ̌ɛ dǒ ǎn chɛ̀-a gbǐh we̍. Dɛ̍ ǐn wɔ̌n-a dě Baa wɔ̍ɔ̍n-ɛ, ɛ̍ bo ǎn chɛ̍n-ɛ tìh i̍, nɛ̀ ǎn tìh i̍ chɛ̍n-ɛ bo ɛ̀ slɛ̌ i̍. Dɛ̍nu̍ɛ, ǎn chɛ̀-a wlùh i̍ pɛ̌n-ɛ tìh se̍ ǐn i̍ gbɛ̍n, jɛ nyɔ̍ dbo̍-a m-ɛ, ɔ̍ wlùh-a i̍ pɛ̌n-ɛ tìh bo ɛ̀ gbɛ̍n ǐn i̍.

³¹“Pò ǐn ja ǎn chɛ̀-a sàànsi̍i̍h nu̍-ɛ, nɛ̀ ǎn wlu̍ fǒ gbɔ̀.

³²Jɛ nyɔ̍ dɔɔ bo ɔ̀ nu̍ ǎn sàànsi̍i̍h. Ǐn juo ɛ̍-ɛ dɛ̍ ɔ̍ sà-a dǒ ǐn pùn-ɛ, tìh-a taǐn bo.

³³Mɔ̀ dbo̍ nyɔ̍ dě Chɔɔn we̍ wɛ̀ ɔ̍ sà tìh-a taǐn dǒ ǐn pùn.

³⁴Nyi̍ɔ̍-a ǎn sàànsi̍i̍h nu̍-ɛa chɛ̀ nɔ̀ɔ̍, ǐn se̍ ɛ̍ wlì tè, jɛ ǎn sà ɛ̍-ɛ sǔh wɛ̀ ɛ̍ iě mɔ̀ pǔh-i.

³⁵Chɔɔn bo ɔ̀ wɔ̀ wa̍n-nape̍ ɛ̀ fa̍n, jɛ ti̍ gbɔ̍ bo mɔ̀ wɔ̌ɛn mɔ̀ iě nmɔ dě ɔ̍ sɔ̀npli di̍i̍.

³⁶Jɛ ǎn sàànsi̍i̍h ǐn blě-aɛ, ɛ̍ ku̍ wɔ̍n ɛ̍ sìì Chɔɔn naɛ. Dɛ̍nu̍ɛ, dbo̍ ǐn Baa nyǐ-a m iě-a i̍ wɔ̀ ɛ̀ ǎn nu̍-a ka-ɛ, ɛ̍ bo ɛ̀ nu̍ ǎn sàànsi̍i̍h ka Baa dbo̍-a m-ɛ.

³⁷Ǐn Baa ɔ̀ dbo̍-a m-ɛ, ɔ̍ chɛ̀ nu̍ ǎn sàànsi̍i̍h. Mɔ̀ɔ̍ se̍a ɔ̍ wlu̍ wɔ̌n, iě mɔ̀ɔ̍ se̍a ɔ̍ jua̍a̍ jě.

³⁸Mɔ̀-ɔ gbɛ̍n-ɛ ɔ̍ wlu̍ dounᵻ i̍, dɛ̍nu̍ɛ, nyɔ̍ ɔ̍ dbo̍-aɛ, mɔ̀ se̍ ɔ̍ wlùh gbaɛ.

³⁹Nyɔsoa-a wlu̍ bo mɔ̀-a slè-e wlùh i̍, dɛ̍nu̍ɛ, mɔ̀ jajeɛ̍ dě i̍h di̍i̍ mɔ̀-a mu̍ kmɔ̌ sie feɛ jě-e. I̍h-a chɛ̀ bo ìh nu̍ ǎn sàànsi̍i̍h.

⁴⁰Jɛ mɔ̀-ɔ wɔ̌ɛn nɔ̌ ǐn we̍ ji̍ tìh i̍, wɛ̀ mɔ̀ iě feɛ jě.

⁴¹“Ǐn se̍ pɔ̀n nyi̍ɔ̍ iě ǐn tìhwe̍ po̍.

⁴²Jɛ ǐn juo mɔ̀-a tìh, Nyɔsoa-a tìh kma dɛ se̍ dě mɔ̀ di̍i̍ nɛ.

⁴³Dǒ ǐn Baa-a nynɛ̌ kɛ̍n bo ǐn jii, iě mɔ̀-ɔ gbɛ̍n ǎn tìh i̍. Jɛ pò nyɔ̍ dɔɔ jii dǒ ɔ̍ chɛ̀-a nynɛ̌ kɛ̍n-ɛ, nɛ̀ ɔ̍ kɔn tìh bo mɔ̀-a mu̍ i̍ gbɛ̍n.

⁴⁴Po̍ ìn ba̍ tìhwe̍ ìn ba̍ po̍ ìn tìhwe̍ bo ɛ̀ po̍ mɔ̀ gbǐh. Nyɔsoa nɛ due-a mɔ̀ tìhwe̍ po̍-ɛ se̍ mɔ̀ i̍ gbɛ̍n. Nɛ̀ ka mɔ̀-a mu̍ ǐn wlùh gbaɛ nu̍ ɛ?

⁴⁵Ɛ̍ se̍ mɔ̍ ɔ̀ se̍ mɔ̀ tìh i̍ blaɛ mu̍ dě ǐn Baa we̍. Ɛ̍ tìh-ɛ, mɔ̀ bɔ̌ ɛ̍ wlùh kɛ̍n tè-ɛ. Mose mɔ̀ tè-a wlì-ɛ, ɔ̍-ɔ bo ɔ̀ mu̍ mɔ̀ tìh i̍ bla̍-ɛ.

⁴⁶Pò mɔ̀ po̍ Mose tìh chɛ̀ de-ɛ, nɛ̀ mɔ̀-a mu̍ ǐn tìh chɛ̀ po̍ ke de. Dɛ̍nu̍ɛ, ìh ɔ̍ chlǐh-aɛ, i̍h kɔ̍ dǒ ǐn pùn i̍.

⁴⁷Jɛ dɛ̍ ɔ̍ chlǐh-aɛ, pò mɔ̀ se̍ ɛ̍ tìh chɛ̀ po̍-ɛ, nɛ̀ ka mɔ̀-a mu̍ ǎn wlu̍ tìh chɛ̀ po̍-ɛ nu̍ ɛ?”