Read Western Krahn Chɔɔn 6 Bible Online

Chɔɔn 6 - Western Krahn bible

Chɔɔn 6

¹Ɛ̀ la ɛ̍ sì-a i̍-ɛ, iě pɛ̍nu̍ klaa ɛ̀ nɛ-a dě Kaladii fɔɔ-ɛ, wɛ̀ Jusu mu̍ dě ɛ̍ fɔ̌ dɛɛ we̍. (Ɛ̍ nynɛ̌ diih nu̍ Taɛbiwlia Pɛ̍nu̍.)

²Iě nyɔ̍ tlùgbei̍ wɔ̀ dǒ ɔ̍ de̍e̍, dɛ̍nu̍ɛ, u̍h jě jbaɛdih ɔ̍ po̍-a dǒ wɛ̌ᵻ nyɔ̍ pùn-ɛ.

³Wɛ̀ ɔ̍ jǎ dǒ tlu̍h kɛ̍n iě ɔ̍ ke ɔ̍ kòà tìèe̍ i̍.

⁴Nɛ̀ Juu nyɔ̍-a Sììkɛ̍n-a Peě kɔǎn we̍ wɛ̀.

⁵Jusu dǔ-a dlǔ ja̍i̍-ɛ, iě ɔ̍ jě nyɔ̍ tlùgbei̍ u̍h-a ji̍ dǒ ɔ̍ we̍. Iě ɔ̍ la̍a̍ dě Felɔ we̍, “Tàwe̍ à mu̍ di̍-dɛ̍ᵻ tɛ̀n-ɛ wɛ̀ nyɔ̍ la u̍h iě di̍ ɛ?” (

⁶Ɔ̍ tèle jɛ la i̍ sǔh ɔ̍ iě Felɔ-ɔ tɛ̀n, jɛ nɛ̀ ɔ̍ juo dɛ̍ ɔ̍ mu̍-a nu̍-ɛ wɛ̀ se̍e̍.)

⁷Wɛ̀ Felɔ la̍a̍, “Ɔ̍ɔ̍, juh la nɔ̀ɔ̍, sebla̍ wlǐ-a kmɛ sɔɔ̌n-a (200) di̍-dɛ̍ᵻá chɛ̀ se̍ dě u̍h wɔ̍ɔ̍n i̍ tǔh mu̍ wa.”

⁸Iě ɔ̍ kòà due ɔ̀ nu̍-a Samo Pitɛ de̍di̍i̍ Andlu-ɛ, ɔ̍ la̍a̍ dě Jusu we̍,

⁹“Jɔ̍gbau jǔ due nɛ da̍a ɔ̍ blě ìh u̍h-a dǎɛ-a baale-ɛ i̍h-a blèe̍ gba̍nᵻ m̀m̌ ke smìi̍ sɔɔ̌n. Jɛ dɛ̍ i̍h-a mu̍ nu̍ dǒ ùh dɔu la we̍ ɛ?”

¹⁰Jusu la̍a̍, “Mɔ̀ nu̍ ɛ̍ u̍h iě i̍ tìèe̍.” (Nɛ̀ pei dɔu nɛ dǒ tà-a chɛ̀.) Nyɔ̍ ùh tìèe̍-a i̍-ɛ, jɔ̍gbauᵻ bɛ̌ɛ wlǔ m̀m̌ (5,000) nu̍-ɛ dě u̍h nynɛ̌.

¹¹Wɛ̀ Jusu dǔ blèe̍ laa̍ iě ɔ̍ po̍ Nyɔsoa tlɔ̌, wɛ̀ ɔ̍ po̍ i̍h chɛ̌-ɛ i̍ dǒ nyɔ̍ laa̍ we̍. Kǎ ɔ̍ nu̍ smìi̍-a tìh ke. Iě u̍h kli̍hgbɛ̍ jě ka u̍h-a pɔ̀n-a u̍h iě-a jě-ɛ nu̍-ɛ.

¹²Ùh kli̍hgbɛ̍ di̍-a dɛ̍-ɛ, u̍h dbo̍-e. Wɛ̀ Jusu la̍a̍ dě ɔ̍ kòà we̍, “Mɔ̀ tɛ̌n i̍h-a chɛblih sie-a i̍-ɛ, i̍h-a dɛ̍-ɛ je̍e gbɔ̀lɔ.”

¹³Wɛ̀ u̍h tɛ̌n baale-a blèe̍ gba̍nᵻ m̀m̌-a chɛblih nyɔ̍ laa̍ u̍h seaɛ-aɛ, iě i̍h jǐ taaᵻá pùè jɔ̌ sɔɔ̌n.

¹⁴Nyɔ̍ laa̍ u̍h jě-a jbaɛdih la Jusu po̍-aɛ, wɛ̀ u̍h la̍a̍, “À po̍ ɛ̍ tìh chɛ̀, ɔ̀ la, Nyɔsoa-a tu̍owli po̍ nyɔ̍ ɔ̀ kɔn ɔ̀ iě-a nɔ̌ kmɔ̌ we̍ ji̍-ɛ, ɔ̍-ɔ bo.”

¹⁵Sɔ Jusu juo-o dɛ̍ i̍, nyɔ̍ laa̍ u̍h-a pɔ̀n ɔ̍ kloǒ nu̍-ɛ i̍ ɔ̍ iě blǔh baa nu̍. Ɛ̍ kɔn ɔ̍ sɔ dě u̍h nynɛ̌ dɛ, wɛ̀ ɔ̍ nɛ due mu̍ dě tlu̍hᵻ di̍i̍.

¹⁶Flì wlǎ-a i̍-ɛ, wɛ̀ Jusu-a kòà mu̍ dě pɛ̍nu̍ klaa nɛ-a Kaladii-ɛ wɔ̍i̍n.

¹⁷U̍h gbǎ dě blǎgbè di̍i̍ iě u̍h tàn u̍h-a mu̍ dǒ Kepanium wlɔ̀ di̍i̍. Nɛ̀ wlù wɔ̀ wɛ̀, jɛ nɛ̀ Jusu-u se̍a u̍h we̍ ji̍.

¹⁸Dǒ poɔ chɛ̍n-ɛ ja̍i̍, iě ɛ̍ nu̍ nǐ-a sàkǎsàkǎ.

¹⁹Nɛ̀ dɛ̍ u̍h na-ɛ, ɛ̍ wɛ̀ tlu̍hᵻ gbɔ̍ɔ̍ᵻ ta̍a̍n ke nyìɛ̍ nu̍-ɛ wɛ̀. Dǒ u̍h jě-e Jusu nɛ̀ ɔ̍ na nǐ kɛ̍n i̍ iě ɔ̍ ji̍ blǎgbè kɔn di̍i̍ u̍h nɛ-a wlì. Sɔ ɛ̍ wa̍ u̍h dɛ̍we̍.

²⁰Iě Jusu la̍a̍, “Mɔ̍ bo, mɔ̀ bɔ̌ faɔn ple̍-ɛ.”

²¹Sɔ ɛ̍ nu̍ u̍h-a wlùh dɛ u̍h iě ɔ̍ dě u̍h we̍ blǎgbè di̍i̍ po̍. Ɔ̍ gbǎ-e ka-a, nɛ̀ ɛ̍ nyni̍ tà u̍h-a mu̍-a wɛ̀.

²²Sɔ̀n sɛ̀n-aɛ, nyɔ̍ tlùgbei̍ juh sie-a dě pɛ̍nu̍ klaa de̍e̍-ɛ, iě u̍h la̍ blǎgbè due bo u̍h jě sɔ̀nwa̍n dǒ tà u̍h nɛ-aɛ. Ɛ̍-ɛ bo kòà laa̍ u̍h nɛ due gbǎ di̍i̍ u̍h mu̍, jɛ Jusu se̍ dě u̍h we̍ gbǎ.

²³Wɛ̀ blǎgbè diih sɔ dǒ Taɛbiwlia wlɔ̀ di̍i̍ i̍h ji̍ dǒ tà Joi poe-a Nyɔsoa tlɔ̌ iě nyɔ̍ tlùgbei̍ iě-a blèe̍ di̍-ɛ.

²⁴Nyɔ̍ laa̍ u̍h se̍-a Jusu ke ɔ̍ kòà jě-ɛ, iě u̍h gbǎ dě blǎgbè jih laa̍ di̍i̍ u̍h-a mu̍ ɔ̍ i̍ pɔ̀n la̍-a dǒ Kepanium wlɔ̀ di̍i̍.

²⁵Ti̍ u̍h jě-a Jusu dě pɛ̍nu̍ klaa-a fɔ̌ dɛɛ we̍-ɛ, wɛ̀ u̍h la̍a̍, “Dlǔtu, ti̍we̍ ìn nyni̍ nɔ̍ɔ̀ ɛ?”

²⁶Wɛ̀ Jusu la̍a̍, “Tìh-a taǐn ǎn sèàɛ̍ mɔ̀ wlùh, jbaɛdih mɔ̀ jě-a ǐn po̍-aɛ, ɛ̍ se̍ i̍h-a tìh mɔ̀ se̍ ka ǐn i̍ pɔ̀n o. Jɛ mɔ̀ di̍-a blèe̍ mɔ̀ dbo̍-aɛ, ɛ̍ kɔn tìh mɔ̀-a pɔ̀n ǐn i̍ o.

²⁷Di̍-dɛ̍ᵻ jih-a mu̍-a sɔ̀n-ɛ, mɔ̀ bɔ̌ i̍h-a dbo̍ nu̍-ɛ. Jɛ di̍-dɛ̍ jɛ mu̍-a mɔ̀ i̍ kui wɛ̀ mɔ̀ iě-a kmɔ̌ sie feɛ blě-ɛ, ɛ̍ kɔn dbo̍ bo mɔ̀ iě nu̍. Di̍-dɛ̍ ǎn dǎ-aɛ, ɛ̍ bo ɔ̀ nu̍-a Nyi̍ɔ̍-a Jǔ-ɛ ɔ̍ mu̍-a mɔ̀ nyǐ. Dɛ̍nu̍ɛ, ɔ̍ bo Baa Nyɔsoa wɔ̌ɛn we̍.”

²⁸Wɛ̀ u̍h la̍a̍ dě ɔ̍ we̍, “Nɛ̀ ka à iě nu̍ wɛ̀ à iě Nyɔsoa-a dbo̍ nu̍ ɛ?”

²⁹Iě Jusu la̍a̍, “Ɛ̀ nu̍-a Nyɔsoa-a dbo̍ nu̍-ɛɛ, ɛ̍ nu̍ mɔ̀ iě nyɔ̍ ɔ̍ dbo̍-aɛ wlùh gbaɛ.”

³⁰Wɛ̀ u̍h la̍a̍ dě Jusu we̍, “Ɛ̀ ɛ̍ nɛ-a ka-ɛ, nɛ̀ jbaɛdih jɛwe̍ àn mu̍ po̍ à iě jě wɛ̀ à iě àn wlu̍ tìh dǎɛ ɛ? Dɛ̍ àn mu̍ nu̍ ɛ?

³¹Di̍-dɛ̍ᵻ u̍h-a dǎɛ-a mana-a, i̍h bo à baaᵻá baaᵻ di̍ dě kwlǎslò we̍. Ɛ̍ kɔn Nyɔsoa-a wlu̍ la̍a̍, ‘Blèe̍ sɔ-a dě ja̍i̍wlɔ̀-ɛ, i̍h bo ɔ̍ nyǐ u̍h u̍h iě di̍.’ ”

³²Iě Jusu la̍a̍ dě u̍h we̍, “Bɔ̌ ǐn sèàɛ̍ mɔ̀ tìh-a taǐn wlùh, Mose se̍ mɔ̀ blèe̍ ìh sɔ-a dě ja̍i̍wlɔ̀-ɛ nyǐ. Ǐn Baa bo ɔ̀ nyǐ la̍ mɔ̀ blèe̍-a gblangbai̍ ìh sɔ-a dě ja̍i̍wlɔ̀-ɛ.

³³Nyɔ̍ ɔ̀ sɔ-a dě ja̍i̍wlɔ̀ ɔ̀ ji̍-a nɔ̌ bloɔ̍ wɛ̀ ɔ̍ nyǐ-a kmɔ̌ nyɔ̍ feɛ-ɛ, ɔ̍ bo ɔ̀ nu̍ blèe̍ Nyɔsoa-a nyǐ nyɔ̍.”

³⁴Wɛ̀ u̍h la̍a̍ dě Jusu we̍, “Nyɔ̍ klaa, nɛ̀ blèe̍ la bo ìè à nyǐ te̍e̍ la̍ sǔh o.”

³⁵Iě ɔ̍ la̍a̍, “Mɔ̍ bo ɔ̀ nu̍ blèe̍ ɛ̀ nyǐ-a nyɔ̍ feɛ-ɛ. Nyɔ̍ ɔ̀ ji̍-a ǐn we̍-ɛ, nɛ̀ mɔ̌ se̍ gba̍ ɔ̍ nu̍. Nɛ̀ nyɔ̍ ɔ̀ gbaɛ-a ǐn wlùh-ɛ, nɛ̀ dǒ ɔ̍ wlì se̍ gba̍ bǔ.

³⁶Jɛ kǎ ǐn dǎ, na̍ mɔ̀ jě m̌ wɛ̀, jɛ mɔ̀ se̍ ǐn wlùh gbaɛ.

³⁷Jɛ nyɔ̍ kli̍hgbɛ̍ ǐn Baa nyǐ-a m-ɛ, u̍h-a mu̍ ǐn we̍ ji̍. Nɛ̀ nyɔ̍ jɔ mu̍-a ǐn we̍ ji̍-ɛ, ǐn se̍ gba̍ ɔ̍ i̍ nu̍.

³⁸Dɛ̍nu̍ɛ, dě ja̍i̍wlɔ̀ ǐn sɔ-a wɛ̀ ǐn ji̍-a nɔ̌ bloɔ̍-ɛ, ǐn se̍ ji̍ iě ǎn chɛ̀-a wlùh nu̍. Jɛ ǐn ji̍-i nyɔ̍ ɔ̀ dbo̍-a m-ɛ, iě ɔ̍ wlùh nu̍.

³⁹Ɔ̀ dbo̍-a m-ɛ, ɔ̍ wlùh nu̍-ɛ nu̍, ùh kli̍hgbɛ̍ ɔ̍ nyǐ-a m-ɛ, nɛ̌ je̍e u̍h-a nyɔ̍ wɛ-a chɛ̀ mǎ-ɛ. Jɛ ǐn kɔn iě u̍h kli̍hgbɛ̍ bloɔ̍ sà dǒ bɔ̌ɛ-o weɛ̍ di̍i̍.

⁴⁰Nɛ̀ ǐn Baa-a wlùh dɛ nu̍, nyɔ̍ juh jě-a Jǔ la sǔh wɛ̀ u̍h gbaɛ-a ɔ̍ wlùh-ɛ, nɛ̀ u̍h-a mu̍ kmɔ̌ sie feɛ blě. Nɛ̀ ǎn mu̍ u̍h bloɔ̍ sà dǒ bɔ̌ɛ-o weɛ̍ di̍i̍.”

⁴¹Dɛ̍ Jusu la̍ ɔ̍-ɔ bo ɔ̀ nu̍ blèe̍ ɔ̀ sɔ dě ja̍i̍wlɔ̀ ɔ̀ ji̍ nɔ̌ bloɔ̍-ɛ, ɛ̍ kɔn nyɔ̍gbei-a wlu-i wɔ̍ɔ̍n i̍.

⁴²U̍h la̍a̍, “Na̍ Josɛ-a jǔ Jusu ɔ̀ kɔn de̍ ke baa à juo-aɛ, ɛ̍ se̍ ɔ̍ mɔ ae? Nɛ̀ ka ɛ̍ nu̍ wɛ̀ ɔ̍ la̍ ɔ̍ bo ɔ̀ sɔ dě ja̍i̍wlɔ̀ ɔ̀ ji̍ nɔ̌ bloɔ̍ ɛ?”

⁴³Wɛ̀ Jusu la̍a̍, “Mɔ̀ tǎli wɔ̍ɔ̍n i̍ wlu-i dɛ i̍.

⁴⁴Nyɔ̍ se̍ bɛ̌ɛ ɔ̍ iě ǐn we̍ ji̍. Ǐn Baa ɔ̀ dbo̍-a m-ɛ, nyɔ̍ ɔ̍ mu̍-a ǐn we̍ ja-a, ɔ̍ kɔn tɛ̀ ǐn sà-o. Nɛ̀ ǎn mu̍ ɔ̍ bloɔ̍ sà dǒ bɔ̌ɛ-o weɛ̍ di̍i̍.

⁴⁵Ɛ̀ chlǐh-a dě Nyɔsoa-a tu̍owli po̍ nyɔ̍-a chlǐh-dɛ̍ di̍i̍-ɛ, ɛ̍ la̍a̍, ‘Nyɔsoa-a mu̍ u̍h kli̍hgbɛ̍ nǎ po̍.’ Nyɔ̍ jɔ wɔ̌n-a Baa-a wlu̍ wɛ̀ ɔ̍ iě ɛ̍ dɛ̍we̍ cheǎn-ɛɛ, nɛ̀ ɔ̍ ji̍ nɔ̌ ǐn we̍.

⁴⁶Ɛ̍ se̍ nɛ̀ nyɔ̍ dɔɔ jě Baa wɛ̀ ka i̍, jɛ nyɔ̍ ɔ̀ sɔ-a dě ja̍i̍wlɔ̀-ɛ, ɔ̍ kɔn tɛ̀ ǐn sà-o. Ɔ̍ bo ɔ̀ jě ɔ̍ wɛ̀.

⁴⁷Tìh-a taǐn ǎn sèàɛ̍ mɔ̀ wlùh, nyɔ̍ jɔ gbaɛ-a ǐn wlùh-ɛ, nɛ̀ ɔ̍ blě kmɔ̌ sie feɛ.

⁴⁸Mɔ̍ bo ɔ̀ nu̍ blèe̍ ɛ̀ nyǐ-a nyɔ̍ feɛ-ɛ.

⁴⁹Di̍-dɛ̍ᵻ u̍h-a dǎɛ-a mana-a, i̍h bo mɔ̀ baaᵻá baaᵻ di̍ dě kwlǎslò we̍. Jɛ u̍h nɔ̀ɔ̍, u̍h mɛ̌-ɛ.

⁵⁰Jɛ blèe̍ sɔ-a dě ja̍i̍wlɔ̀ ɛ̀ ji̍-a nɔ̌ bloɔ̍-ɛ, ɛ̍ bo pò nyɔ̍ di̍-ɛ nɛ̀ ɔ̍ se̍ mɛ̌ mu̍.

⁵¹Mɔ̍ bo ɔ̀ nu̍ blèe̍ ɛ̀ nyǐ-a nyɔ̍ feɛ-ɛ, ɛ̀ sɔ-a dě ja̍i̍wlɔ̀ ɛ̀ ji̍-a nɔ̌ bloɔ̍-ɛ. Pò nyɔ̍-o-nyɔ̍ di̍ blèe̍ la-ɛ, nɛ̀ ɔ̍ mu̍ kmɔ̌ nɛ nɔ̌ kmɔ̌-a kmɔ̌. Blèe̍ ǎn mu̍-a to ɛ̀ iě-a kmɔ̌ la ɛ̍ feɛ nu̍-ɛ, ǎn ku̍ bo.”

⁵²Sɔ ɛ̍ po̍ nyɔ̍gbei jlu̍h-u iě ɛ̍ feǎn dǒ u̍h wlì. U̍h la̍a̍, “Jɔ̍gbau la ka ɔ̍ mu̍ ɔ̍ ku̍ àɔ̀ nyǐ-ɛ nu̍ à iě di̍ ɛ?”

⁵³Iě Jusu la̍a̍ dě u̍h we̍, “Tìh-a taǐn ǎn sèàɛ̍ mɔ̀ wlùh, ɔ̀ nu̍-a Nyi̍ɔ̍-a Jǔ-ɛ, pò mɔ̀ se̍ ɔ̍ ku̍ la di̍, mɔ̀ se̍ ɔ̍ nymɔ̍ nǎ-ɛ, nɛ̀ mɔ̀ se̍ kmɔ̌ nɛ mu̍.

⁵⁴Nyɔ̍ jɔ ɔ̀ di̍-a ǎn ku̍ ɔ̀ nǎ-a ǎn nymɔ̍-ɛ, nɛ̀ ɔ̍ blě kmɔ̌ sie feɛ. Nɛ̀ ǎn mu̍ ɔ̍ bloɔ̍ sà dǒ bɔ̌ɛ-o weɛ̍ di̍i̍.

⁵⁵Dɛ̍nu̍ɛ, ǎn ku̍ bo ɛ̀ nu̍ di̍-dɛ̍ chɛ̀ɛ̌chɛ̀, iě ǎn nymɔ̍ nu̍ nǎ-dɛ̍ chɛ̀ɛ̌chɛ̀.

⁵⁶Nyɔ̍ jɔ di̍-a ǎn ku̍, iě ɔ̍ nǎ-a ǎn nymɔ̍-ɛ, nɛ̀ ɔ̍ nɛ dě ǐn ja̍a̍, iě ǐn nɛ dě ɔ̍ ja̍a̍.

⁵⁷Baa ɔ̀ nyǐ-a nyɔ̍ feɛ-ɛ ɔ̍ dbo̍ m. Ɔ̍ tìh bo ɛ̀ nɛ-ɛ ǐn kmɔ̌. Nɛ̀ɛ̍, nyɔ̍ jɔ mu̍-a ǎn ku̍ di̍-ɛ, nɛ̀ ǎn mu̍ ɛ̍ nu̍ ɔ̍ iě kmɔ̌ nɛ ke.

⁵⁸Blèe̍ sɔ-a dě ja̍i̍wlɔ̀ ɛ̀ ji̍-a nɔ̌ bloɔ̍-ɛ, ɛ̍ se̍ jih à baaᵻá baaᵻ di̍-a iě u̍h mɛ̌-aɛ wɔ̀. Nyɔ̍ jɔ di̍-a blèe̍ jɛ la nɔ̀ɔ̍-ɛ, nɛ̀ ɔ̍ mu̍ kmɔ̌ nɛ nɔ̌ kmɔ̌-a kmɔ̌.”

⁵⁹Ti̍ ɔ̍ po̍-a nyɔ̍ nǎ dě Juu nyɔ̍-a wɛɛ sà gbò sɔ̀n dǒ Kepanium wlɔ̀ di̍i̍-ɛ, dǒ ɔ̍ bla̍-ɛ ìh la.

⁶⁰Ɔ̍ kòà dɔu wɔ̌n-a ɛ̀ la-ɛ, iě u̍h la̍a̍, “Nǎ jɛ la ɛ̍ kma i̍. Nyɔ̍ bo ɔ̀ bɛ̌ɛ ɛ̍ i̍ gbɛ̍n-ɛ nɔ̌ kmɔ̌ ɛ?”

⁶¹Sɔ Jusu juo ka ɔ̍ kòà-a wlu-ia wɔ̍ɔ̍n i̍ dǒ ɛ̍ we̍-ɛ, iě ɔ̍ la̍a̍ dě u̍h we̍, “Ɛ̍ nyaɛ mɔ̀ wɔ̍i̍n ae?

⁶²Nɛ̀ pò mɔ̀ jě Nyi̍ɔ̍-a Jǔ wɛ̀ ɔ̍ iě dě de̍ ja̍i̍ tà ɔ̍ nɛ-a se̍e̍-ɛ mu̍-ɛ, nɛ̀ ka mɔ̀-a mu̍ nɛ ɛ?

⁶³Nyɔsoa-a Sùù bo ɛ̀ nyǐ nyɔ̍ feɛ, ku̍ nɔ̀ɔ̍, ɛ̍ se̍ dɛ̍kɛ̍n gbǎ. Wlu̍ ǐn wlu-ia dě mɔ̀ we̍-ɛ, ɛ̍ bo ɛ̀ ja Nyɔsoa-a Sùù ɛ̀ nyǐ-a nyɔ̍ feɛ-ɛ.

⁶⁴Jɛ mɔ̀-a nyɔ̍ duuh nɛ-o u̍h se̍ wlùh gbaɛ blě.” (Sɔ dě ti̍ Jusu tè-a nyɔ̍ nǎ po̍-ɛ gbɔ̀-ɛ we̍-ɛ, ɔ̍ juo nyɔ̍ juh se̍-a ɔ̍ wlùh gbaɛ mu̍-ɛ se̍e̍, ɛ̍ ke nyɔ̍ jɔ mu̍-a ɔ̍ kwlǎ sà-a ke.)

⁶⁵Iě ɔ̍ la̍a̍, “Ɛ̍ kɔn ǐn sèàɛ̍ mɔ̀ wlùh, na̍ nyɔ̍ se̍ ǐn we̍ ji̍-ɛ bɛ̌ɛ. Nyɔ̍ Baa-a mu̍-a gbǐh nyǐ-ɛ ɔ̍ kɔn tɛ̀ ǐn sà-o.”

⁶⁶Sɔ dǒ ti̍ laa̍ di̍i̍-ɛ, ɔ̍ kòà dɔu chlìì de̍, u̍h-a nyɔ̍ se̍ ɔ̍ we̍ na dɛ fu̍u̍.

⁶⁷Wɛ̀ Jusu la̍a̍ dě kòà-a pùè jɔ̌ sɔɔ̌n laa̍ we̍, “Mɔ̀ɔ̍ nɔ̀ɔ̍, mɔ̀-a pɔ̀n mu̍-ɛ i̍ ke ae?”

⁶⁸Wɛ̀ Samo Pitɛ la̍a̍, “Joi, mɔ̀ jɔ blě-a wlu̍ ɛ̀ nyǐ-a nyɔ̍ kmɔ̌ sie feɛ-ɛ, pò à tǎli ìn i̍-ɛ, nɛ̀ nyɔ̍ dɔɔ we̍ à mu̍ we̍ mu̍ ɛ?

⁶⁹À gbaɛ ìn wlùh wɛ̀, iě à juo ɛ̍ ka ìn nu̍-a Nɛi̍ Wɛ̀ Nyɔ̍ ìn sɔ-a dě Nyɔsoa we̍-ɛ.”

⁷⁰Iě Jusu la̍a̍ dě u̍h we̍, “Mɔ̀ɔ̍ nu̍-a pùè jɔ̌ sɔɔ̌n-ɛ, ɛ̍ se̍ mɔ̍ ɔ̀ se̍ mɔ̀ chèɛ̀ tba̍ ae? Jɛ Kǔ kɔn mɔ̀-a nyɔ̍ due wlu̍ i̍.”

⁷¹Nɛ̀ Juda ɔ̀ nu̍-a Samo Ɛkɛlia-a jǔ-ɛ, ɔ̍ bo ɔ̍ dǎ. Kòà-a pùè jɔ̌ sɔɔ̌n laa̍ u̍h-a due bo nɔ̀ɔ̍ kleǐn, jɛ nɛ̀ ɔ̍ bo ɔ̀ mu̍ Jusu kwlǎ sà-a bɔ̌ɛ.