Read Western Krahn Chɔɔn 7 Bible Online

Chɔɔn 7 - Western Krahn bible

Chɔɔn 7

¹Ɛ̀ la ɛ̍ sì-a i̍-ɛ, nɛ̀ dǒ Kaladii bloa̍ kɛ̍n nɛ due bo Jusu-a ple̍ la̍ i̍ sǔh. Nɛ̀ ɔ̍ se̍ pɔ̀n ɔ̍ iě dě Judia bloa̍ kɛ̍n mu̍, dɛ̍nu̍ɛ, Juu nyɔ̍-a nyɔ̍ klaaᵻ nɛ-a deě-ɛ, u̍h-a pɔ̀n ɔ̍ dbǎ-a i̍.

²Ti̍ kɔǎn-a we̍ wɛ̀ Juu nyɔ̍ iě-a Wɛ̀ɛ̀ Sɔ̍n Wlù-a Peě tù-ɛ,

³wɛ̀ Jusu de̍di̍i̍ᵻ la̍a̍ dě ɔ̍ we̍, “Sɔ da̍a ìè Judia mu̍, wɛ̀ dbo̍ àn nu̍-aɛ àn kòà iě i̍h jě.

⁴Dɛ̍nu̍ɛ, nyɔ̍ ɔ̀ pɔ̀n-a nyɔ̍ iě-a ɔ̍ juo-ɛ, nɛ̀ ɔ̍-ɔ po̍ ɔ̍ nu̍-dɛ̍ᵻ dě kwile-e. Ka àn nu̍-a ìh la-ɛ, nɛ̀ ìn to i̍h bloa̍ kli̍hgbɛ̍ i̍.” (

⁵Ɔ̍ de̍di̍i̍ᵻá chɛ̀ la u̍h se̍ ɔ̍ wlùh gbaɛ.)

⁶Jusu la̍a̍ dě u̍h we̍, “Ǎn ti̍ se̍-o nyni̍ ke̍. Mɔ̀ɔ̍ nɔ̀ɔ̍, mɔ̀-a blě ti̍ ma̍u̍.

⁷Mɔ̀ɔ̍ nɔ̀ɔ̍, kmɔ̌ se̍ mɔ̀-ɔ faɛn, jɛ mɔ̍ɔ, ɛ̍ faɛn m. Dɛ̍nu̍ɛ, ǎn sèàɛ̍ ɛ̍ wlùh ma̍u̍ ka ɛ̍ nu̍-a dɛ̍ᵻ sɔ̀nᵻɛ́.

⁸Mɔ̀ɔ̍ bo ùh iě peě la kɛ̍n mu̍. Mɔ̍ɔ, ǐn se̍ ɛ̍ kɛ̍n mu̍ mu̍, dɛ̍nu̍ɛ, ǎn dɛ̍ nu̍ ti̍ se̍-o nyni̍ ke̍ chɛ̀ka.”

⁹Ɔ̍ wɔ̀-a ɛ̀ la bla̍-aɛ, iě ɔ̍ sie dě de̍ Kaladii.

¹⁰Ɔ̍ de̍di̍i̍ᵻ mu̍-a peě laa̍ kɛ̍n wɛ̀-ɛ, wɛ̀ ɔ̍ jlǐ ɔ̍ chɛ̀ soɛɛ iě ɔ̍ mu̍ u̍h kɛ̍n i̍.

¹¹Nɛ̀ Juu nyɔ̍-a nyɔ̍ klaaᵻá pɔ̀n ɔ̍ i̍ dǒ peě laa̍ kɛ̍n. Nɛ̀ u̍h-a nu̍, “Tà ɔ̍ nɛ-ɛ o?”

¹²Nɛ̀ nyɔ̍ duuh-a nu̍, “Jɔ̍gbau la nyɔ̍ chɛ̀ bo.” Nɛ̀ duuh la̍a̍, “Iěe, ɔ̍ se̍ nyɔ̍ chɛ̀, ɔ̍ boe nyɔ̍ɔ i̍.” Nɛ̀ ɛ̍ wìi̍nwìi̍n bo ɛ̀ jǐ dǒ peě-a chɛ̀ kɛ̍n.

¹³Jɛ u̍h-a ple̍ Juu nyɔ̍-a nyɔ̍ klaaᵻ jǔ, sɔ u̍h se̍ ɔ̍ nynɛ̌ wlɔ̀-ɔ po̍.

¹⁴Peě-a chɛ̀ u̍h nɛ dě ɛ̍ wèa̍ wɛ̀ sǔh, wɛ̀ Jusu mu̍ dě Nyɔsoa-a slaǎ sà gbò sɔ̀n. Iě ɔ̍ tè nǎ po̍-ɛ gbɔ̀.

¹⁵Sɔ ɛ̍ flɔn-ɛ Juu nyɔ̍-a nyɔ̍ klaaᵻ wɔ̍n, iě u̍h la̍a̍, “Jɔ̍gbau la ɔ̀ nyɔ̍-ɔ se̍a telě toe-ɛ, ka ɛ̍ nu̍ wɛ̀ ɔ̍ juo dɛ̍ᵻ dɔu ɛ?”

¹⁶Wɛ̀ Jusu la̍a̍, “Nǎ ǎn po̍-aɛ, ǐn se̍ ɛ̍ kɔn. Ɛ̍ sɔ dě nyɔ̍ ɔ̀ dbo̍-a m-ɛ we̍.

¹⁷Nyɔ̍-o-nyɔ̍ ɔ̀ pɔ̀n-a Nyɔsoa-a wlùh nu̍-ɛ i̍-ɛ, nɛ̀ pò ǎn nǎ po̍-ɛ sɔ dě Nyɔsoa we̍ o, iě pò ǐn ja nyɔ̍ nǎ po̍ dǒ ǎn chɛ̀-a sɔ̍n kɛ̍n-ɛ, nɛ̀ ɔ̍ mu̍ ɛ̍ juo.

¹⁸Nyɔ̍ ɔ̀ wlu-ia dǒ ɔ̍ chɛ̀-a sɔ̍n kɛ̍n-ɛ, nɛ̀ ɔ̍ chɛ̀-a ja̍ tè-ɛ bo ɔ̍ pɔ̀n i̍. Jɛ pò ɔ̍ ja ɛ̍ nu̍ wɛ̀ nyɔ̍ɔ iě nyɔ̍ dbo̍-a ɔ̍-ɛ ja̍ tè-ɛ, nɛ̀ tìh-a taǐn nyɔ̍ bo. Nɛ̀ ɔ̍ dɛ se̍ si̍h i̍ nɛ fu̍u̍.

¹⁹Na̍ Mose nyǐ mɔ̀ telě lě. Jɛ mɔ̀-a due-a chɛ̀ bo ɔ̀ se̍ ɛ̍ dɛ̍ɛ̍ jě. Dɛ̍nu̍ mɔ̀-a pɔ̀n ǐn dbǎ-a i̍ ɛ?”

²⁰Nyɔ̍ tlùgbei̍ laa̍ u̍h la̍a̍, “Àn chɛ̀ la jeědih nɛ ìn de̍e̍ o. Nyɔ̍ bo ɔ̍ pɔ̀n ìn dbǎ-a i̍ ɛ?”

²¹Wɛ̀ Jusu la̍a̍ dě u̍h we̍, “Jbaɛdih-a due bo ǐn po̍, wɛ̀ ɛ̍ flɔn-ɛ mɔ̀ kli̍hgbɛ̍ wɔ̍n.

²²Mose nyǐ mɔ̀ telě mɔ̀ iě mɔ̀-a jɔ̍gbauᵻ nynuu̍ plɔ̀n po̍. Ɛ̍ se̍ Mose ɔ̀ se̍ ɛ̍ wlɔ̀ ja, mɔ̀ baaᵻá baaᵻ bo, iě mɔ̀-a po̍ jɔ̍gbauᵻ plɔ̀n dǒ wlè-weɛ̍ di̍i̍.

²³Nɛ̀ pò mɔ̀ ja la̍ jɔ̍gbauᵻ plɔ̀n po̍ dǒ wlè-weɛ̍ di̍i̍ Mose-a telě je̍e wa̍-ɛ, nɛ̀ dɛ̍nu̍ pò ǐn pǔh-i nyi̍ɔ̍ buǒ dǒ wlè-weɛ̍ di̍i̍-ɛ, wɛ̀ mɔ̀-a gbǎ-ɛ ǐn jlu̍h ɛ?

²⁴Mɔ̀ bɔ̌ dǒ dɛ̍ kɛ̍n jě-ɛ wɛ̀ mɔ̀ bɔ̌ tìh i̍ chɛ̍n-ɛ, jɛ mɔ̀ chɛ̍n tìh i̍ i̍ slɛ̌-ɛ ka.”

²⁵Wɛ̀ Juluslɛn nyɔ̍ duuh la̍a̍, “Jɔ̍gbau u̍h-a pɔ̀n-a dbǎ-a i̍-ɛ, ɛ̍ se̍ ɔ̀ la ae?

²⁶Ɔ̍-ɔ la ɔ̀ wlu-ia wlɔ̀gbàɛ̀ da̍a, wɛ̀ nyɔ̍ klaaᵻ se̍ nɛ u̍h iě ɔ̍ we̍ wlu wa. Nɛ̀ nyɔ̍ klaaᵻ wɔ̌n-ɛ ɔ̍ iě Nyɔsoa-a Chèɛ̀ Tba̍ju nu̍ ɛɛ?

²⁷Jɛ ti̍ Chèɛ̀ Tba̍ju-a mu̍-a ji̍-ɛ, nyɔ̍ se̍ ɔ̍ sɔ la̍ juo mu̍. Iě à juo jɔ la nɔ̀ɔ̍ ɔ̍ sɔ la̍.”

²⁸Nɛ̀ kǎ Jusu-a po̍ nǎ dě Nyɔsoa-a slaǎ sà gbò sɔ̀n. Wɛ̀ ɔ̍ wǐ, ɔ̍ la̍a̍, “Mɔ̀ jajeɛ̍ mɔ̀ juo m, iě mɔ̀ juo ǎn sɔ la̍ ae? Jɛ ǐn se̍ ǎn chɛ̀-a ka̍ ji̍. Nyɔ̍ ɔ̀ dbo̍-a m-ɛ, tìh-a taǐn nyɔ̍ bo. Mɔ̀ se̍ ɔ̍ juo.

²⁹Jɛ mɔ̍ bo ɔ̀ juo ɔ̍, dɛ̍nu̍ɛ, ǐn sɔ dě ɔ̍ we̍. Ɔ̍ bo ɔ̀ dbo̍ m.”

³⁰Sɔ u̍h-a fɔ̀n la̍ dɛ̍ we̍ sǔh u̍h iě ɔ̍ gbɛ̍n, jɛ nyɔ̍ se̍ ɔ̍ sɔ̍n ja̍ po̍. Dɛ̍nu̍ɛ, nɛ̀ ɛ̍ ti̍ se̍-o nyni̍ ke̍.

³¹Jɛ nɛ̀ nyɔ̍ dɔu duuh gbaɛ ɔ̍ wlùh dě nyɔ̍ tlùgbei̍ laa̍ nynɛ̌. Iě u̍h la̍a̍, “Pò Chèɛ̀ Tba̍ju ji̍-ɛ, nɛ̀ ɔ̍ naɛ jbaɛdih-a mu̍ i̍ tìè i̍h iě jih jɔ̍gbau la ɔ̍ po̍-aɛ sìì ae?”

³²Wɛ̀ Fɛlesii nyɔ̍-a nyɔ̍ duuh wɔ̌n dɛ̍ nyɔ̍gbei-a bla̍-a dǒ Jusu pùn-ɛ. Ɛ̍ kɔn u̍h ke Nyɔsoa-a slaǎ sà nyɔ̍ klaaᵻ dbo̍ slaǎ sà gbò kɛ̍ɛ̍n fuo nyɔ̍ u̍h iě ɔ̍ gbɛ̍n.

³³Wɛ̀ Jusu la̍a̍, “Ǎn mu̍ da̍a mɔ̀ we̍ nɛ dǒ ti̍ gbɔ̍ di̍i̍ sǔh, wɛ̀ iě nyɔ̍ dbo̍-a m-ɛ we̍ mu̍.

³⁴Mɔ̀-a mu̍ ǐn i̍ pɔ̀n, nɛ̀ mɔ̀ se̍ ǐn jě mu̍. Tà ǎn mu̍-a nɛ-ɛ, mɔ̀ se̍-e ji̍-ɛ bɛ̌ɛ mu̍.”

³⁵Iě Juu nyɔ̍-a nyɔ̍ klaaᵻá sǔh-a pu̍e̍e ɛ̍ wɔ̍ɔ̍n i̍, u̍h la̍a̍, “Nɛ̀ tà jɔ̍gbau la ɔ̍ pɔ̀n mu̍-ɛ i̍ iě à se̍ ɔ̍ jě-ɛ bɛ̌ɛ mu̍ ɛ? Dě Klii bloa̍ kɛ̍n tà Juu nyɔ̍ nɛ-aɛ, dě ɔ̍ pɔ̀n mu̍-ɛ i̍ wɛ̀ ɔ̍ iě Klii nyɔ̍ nǎ po̍ ae?

³⁶Ɛ̀ ɔ̍ la̍a̍, ‘Mɔ̀-a mu̍ ǐn i̍ pɔ̀n, nɛ̀ mɔ̀ se̍ ǐn jě mu̍, nɛ̀ tà ǎn mu̍-a nɛ-ɛ, mɔ̀ se̍-e ji̍-ɛ bɛ̌ɛ mu̍-ɛ,’ nɛ̀ ɛ̍ naɛ gbɔ̀-a nynɛ̌ ɛ?”

³⁷Peě-a bɔ̌ɛ-o weɛ̍ ɛ̀ ku̍-a wɔ̍n-ɛ, dǒ ɛ̍ di̍i̍ bo Jusu nyna-ɛ i̍ iě ɔ̍ wǐ, ɔ̍ la̍a̍, “Nyɔ̍-o-nyɔ̍ ɔ̀ kɔn wlì-a bǔ-aɛ, nɛ̀ ɔ̍ ji̍ nɔ̌ ǐn we̍ ɔ̍ iě nǐ nǎ.

³⁸Ɛ̍ kɔn Nyɔsoa-a wlu̍ la̍a̍, ‘Nyɔ̍ ɔ̀ gbaɛ-a ǐn wlùh-ɛ, nɛ̀ nǐ ɛ̀ nyǐ-a nyɔ̍ feɛ-ɛ ɛ̍ kao̍dlu-a mu̍ wlù wlǔh dě ɔ̍ wlùh di̍i̍.’ ”

³⁹Dɛ̍ ɔ̍ bla̍-aɛ, nɛ̀ Nyɔsoa-a Sùù ɛ̀ wlùh gbaɛ blě nyɔ̍-a mu̍-a jě dě nya̍-ɛ bo ɔ̍ dǎ. Nɛ̀ Nyɔsoa-a se̍a nyɔ̍ ɔ̍ Sùù nyǐ ke̍, dɛ̍nu̍ɛ, nɛ̀ Jusu se̍-e wlǔh ke̍ dě tìh-a i̍ bɛ̌-ɛ di̍i̍.

⁴⁰U̍h wɔ̌n-a ɔ̍ wlu̍ la-ɛ, iě nyɔ̍ duuh la̍a̍, “Ɔ̀ la̍ la, Nyɔsoa-a tu̍owli po̍ nyɔ̍ ɔ̀ kɔn tìh à gbaɛ-a bo.”

⁴¹Duuh la̍a̍, “Ɔ̀ la Nyɔsoa-a Chèɛ̀ Tba̍ju bo.” Iě duuh la̍a̍, “Nɛ̀ dě Kaladii bloa̍ kɛ̍n bo Chèɛ̀ Tba̍ju-a mu̍-u sɔ ae?

⁴²Nyɔsoa-a wlu̍ se̍ la̍ Chèɛ̀ Tba̍ju ɔ̀ mu̍-a Depe-a tloemlai nu̍-ɛ, Bɛfleɛɛn ɛ̀ nu̍-a Depe-a wlɔ̀-ɛ, dǒ ɛ̍ di̍i̍ ɔ̍ se̍-e sɔ mu̍ ae?”

⁴³Sɔ wlu̍-a se̍ due nɛ ji̍ wlɔ̀ dě nyɔ̍ tlùgbei̍ laa̍ nynɛ̌ Jusu tìh.

⁴⁴Duuh-a pɔ̀n ɔ̍ gbɛ̍n-ɛ i̍ de, jɛ u̍h-a nyɔ̍ se̍ ɔ̍ sɔ̍n ja̍ po̍.

⁴⁵Wɛ̀ Nyɔsoa-a slaǎ sà gbò kɛ̍ɛ̍n fuo nyɔ̍ mu̍ dě de̍ slaǎ sà nyɔ̍ klaaᵻ ke Fɛlesii nyɔ̍ we̍. Iě u̍h tèle u̍h i̍, u̍h la̍a̍, “Dɛ̍nu̍ mɔ̀ se̍ ɔ̍ ja ɛ?”

⁴⁶Gbò kɛ̍ɛ̍n fuo nyɔ̍ la̍a̍, “Ɛ̀ jɔ̍gbau la ɔ̍ nu̍-a wlu-ɛɛ, à-a se̍a ɛ̍ we̍ nyɔ̍ jě sàì.”

⁴⁷Wɛ̀ Fɛlesii nyɔ̍ la̍a̍, “Iě nɛ̀ ɔ̍ boe mɔ̀ i̍ wɛ̀ ke lě.

⁴⁸Mɔ̀ jě Juu nyɔ̍-a nyɔ̍ klaaᵻ ke Fɛlesii-a nyɔ̍ gbaɛ jǔ la wlùh wɛ̀ sàì ae?

⁴⁹Jɛ nyɔ̍ tlùgbei̍ la ùh se̍-a Mose-a telě juo-ɛ, u̍h bo Nyɔsoa po̍ wlu̍we̍i̍.”

⁵⁰Wɛ̀ Nikodima ɔ̀ nu̍-a Fɛlesii jǔ ɔ̀ mu̍-a dě Jusu we̍ wɛ̀ sàì-ɛ, iě ɔ̍ la̍a̍ dě u̍h we̍,

⁵¹“À telě la̍ pò mɔ̀ iě nyɔ̍ kɛ̀n sà-ɛ, nɛ̀ mɔ̀ wɔ̌n ɔ̍ wlu̍ mɔ̀ iě dɛ̍ ɔ̍ nu̍-aɛ juo sasǎ.”

⁵²Iě u̍h la̍a̍ dě ɔ̍ we̍, “Àn chɛ̀ la, Kaladii bo ìn sɔ ke ae? Gbɛ̀n dě Nyɔsoa-a wlu̍ di̍i̍ ìè jě ka Nyɔsoa-a tu̍owli po̍ nyɔ̍ se̍-a dě Kaladii sɔ mu̍-ɛ.”