Read Western Krahn Nu̍-dɛ̍ᵻ 1 Bible Online

Nu̍-dɛ̍ᵻ 1 - Western Krahn bible

Nu̍-dɛ̍ᵻ 1

¹Tiɔfelɔ, sɔ dě Jusu-a dbo̍ gbɔ̀ tè la̍, wɛ̀ ɛ̍ iě-a dě ɔ̍ ja̍i̍wlɔ̀ gba̍ weɛ̍ kɛ̍n jɛɛ-ɛ, ɔ̍ nu̍-dɛ̍ᵻ ke ɔ̍ nyɔ̍ nǎ po̍-ɛ kli̍hgbɛ̍ ǐn chlǐh i̍h dě ǎn sàǐtòò chlǐh-dɛ̍ di̍i̍. Ɛ̍ ti̍ laa̍ nɛ̀ ɔ̍ wɔ̀ ɔ̍ gba̍tòà ɔ̍ tba̍-a chèɛ̀-ɛ slɛ̌ chèɛ̀ i̍ po̍-ɛ wɛ̀ dě Nyɔsoa-a Sùù ja̍a̍.

³Ɔ̍ wɔ̀-a klàn tìh i̍ jě-ɛ wɛ̀-ɛ, wɛ̀ ɔ̍ to ɔ̍ chɛ̀ dě u̍h we̍. Iě ɔ̍ nu̍ dɛ̍ᵻ dɔu i̍h iě ɛ̍ we̍i̍ flɔn-ɛ ka ɔ̍ nɛ-a kmɔ̌-ɛ. Ɛ̍ nu̍ ɛ̍ wɛ̀ ɔ̍ wlǔh-i ɔ̍ kòà i̍ dǒ wǐh-a kwela nyìɛ̍ di̍i̍. Wɛ̀ ɔ̍ wlu dě u̍h we̍ dǒ Nyɔsoa-a nyɔ̍ wlu̍ i̍ kɔn dɛ we̍.

⁴Ti̍ ɔ̍ ke u̍h gbǎ-a tàdùè-ɛ, wɛ̀ ɔ̍ sèàɛ̍ u̍h wlùh, ɔ̍ la̍a̍, “Mɔ̀ bɔ̌ dǒ Juluslɛn sɔ-ɛ, jɛ mɔ̀ fuo nyǐ-dɛ̍ kɔn wlu̍ ǐn Baa po̍-a tɔ̀ma̍a̍-ɛ, ɛ̀ kɔn tìh ǐn sèàɛ̍-a mɔ̀ wlùh-ɛ.

⁵Chɔɔn po̍ nyɔ̍ nǐ dlǔ dǒ nǐ we̍, jɛ mɔ̀ɔ̍ nɔ̀ɔ̍, wǐh gbɔ̍ iě sì-ɛ nɛ̀ Nyɔsoa-a Sùù bo ɛ̀ mu̍ nǐ nu̍ mɔ̀ iě dlǔ po̍.”

⁶Ti̍ Jusu ke ɔ̍ gba̍tòà wèla-a tàdùè i̍-ɛ, wɛ̀ u̍h tèle ɔ̍ i̍, u̍h la̍a̍, “Joi, àn mu̍ Eslɔɛ nyɔ̍ tùn kwa̍a̍ tù dode̍ ti̍laa ae?”

⁷Jusu la̍a̍ dě u̍h we̍, “Nɔɔ ke ti̍ la ǐn Baa chɛ̍n-a dǒ ɔ̍ chɛ̀-a tùn we̍-ɛ, mɔ̀ se̍ i̍h nɔ̀ɔ̍ juo mu̍.

⁸Jɛ ti̍ Nyɔsoa-a Sùù-a mu̍-a mɔ̀ kɛ̍n gbǎ-ɛ, nɛ̀ mɔ̀-a mu̍ gbǐh blě, wɛ̀ mɔ̀ iě ǎn sàànsi̍i̍h nu̍ dǒ Juluslɛn, ɛ̍ ke Judia ke Sɛmewlea bloa̍ kli̍hgbɛ̍ kɛ̍n i̍. Ɛ̍ ke dě bloa̍-a siee la̍ ke.”

⁹Ɔ̍ wɔ̀-a dɛ̍ laa̍ bla̍-a dě u̍h we̍-ɛ, wɛ̀ ɔ̍ dǔ-iɛ ja̍i̍. U̍h nɛ dǒ ɔ̍ kɛ̍n i̍ gbɛ̀n la̍ sǔh iě nǐgban kaɛn ɔ̍ i̍, wɛ̀ ɔ̍ mǎ-ɛ u̍h jlǐh.

¹⁰Dě ɔ̍ we̍ ja̍i̍ u̍h-a jlǐh maɛ, u̍h iě-a kèle-ɛ nɛ̀ jɔ̍gbauᵻ sɔɔ̌n pa̍ jlii̍ plǔᵻ iě u̍h nyna u̍h pùn.

¹¹Iě u̍h la̍a̍, “Kaladii nynuu̍, dɛ̍ kɔn da̍a mɔ̀ nyna i̍ iě mɔ̀-a gbɛ̀n dě ja̍u̍n we̍ ɛ? Jusu la ɔ̀ sà-ɛa da̍a mɔ̀ we̍ ɔ̀ gba̍-ɛa ja̍i̍wlɔ̀-ɛ, ka mɔ̀ nu̍-a ɔ̍ ja̍i̍wlɔ̀ mu̍ la̍ jě-ɛɛ, kǎ ɔ̍ mu̍ de̍ ji̍-ɛ nu̍.”

¹²Dě Ɔle-Tu̍ᵻá Tlu̍h kɛ̍n bo u̍h nɛ wɛ̀ ìh kli̍hgbɛ̍ la i̍h gbǎ. Dě u̍h sɔ-ɔ wɛ̀ u̍h ji̍ de̍ dǒ Juluslɛn wlɔ̀ di̍i̍. Sɔ deě ìè wlɔ̀ ji̍ nu̍ tlu̍h gbɔ̍ɔ̍ gbɔ̀ tile.

¹³U̍h nyni̍-a wlɔ̀-ɛ, ja̍i̍ gbòju kɔn di̍i̍ u̍h tè-a i̍ se̍e̍-ɛ, dě u̍h mu̍. U̍h-u nɛ-a dě gbò-a chɛ̀-ɛ, Pitɛ ke, Chɔɔn ke, Chiin ke, Andlu ke, Felɔ ke, Tɔmɔ ke, Batalamio ke, Matio ke, Afia-a jǔ Chiin ke, Samo ɔ̀ fɔ̀n-a bloa̍-a tìh we̍-ɛ ke, ɛ̍ ke Chiin-a jǔ Juda ke.

¹⁴U̍h bo ùh-a gbèɛ̀ɛn chɛ̍chɛ̍ iě u̍h-a ba̍le, u̍h ke nynɔ̌gbaɔᵻ ke. Ɛ̍ ke Jusu de̍ Mɛle ke ɔ̍ de̍di̍i̍ᵻ jɔ̍gbauᵻ ke.

¹⁵Ɛ̍ bo u̍h nu̍ dǒ wǐh gbɔ̍ di̍i̍, iě Pitɛ nyna i̍ dě u̍h nynɛ̌ ɔ̍ iě wlu. Nyɔ̍ ùh gbèɛ̀ɛn-a dǒ tà-a chɛ̀-ɛ, u̍h wɛ̀ kmɛ due kwela sɔɔ̌n (120) nu̍-ɛ.

¹⁶Ɔ̍ la̍a̍, “Mɔ̀ɔ̍ de̍di̍i̍ᵻ kli̍hgbɛ̍ wɛ̀-a de̍-ɛ, Nyɔsoa-a wlu̍ kɔn ɛ̍ iě chɛ̀-ɛ gbǎ. Nyɔsoa-a Sùù wlu-i dě Depe ja̍a̍ tɛin iě ɔ̍ po̍ gbànwli dǒ Juda pùn, ɔ̀ nyɔ̍gbei jii-a iě u̍h gbɛ̍n-a Jusu-ɛ.

¹⁷Juda laa̍ à nyɔ̍ due bo dě à gbɔ̀ù di̍i̍. Ɔ̍ blě ɔ̍ naɛ nu̍-dɛ̍ ke de nɔ̌ dbo̍ la di̍i̍.” (

¹⁸Ɔ̍ kà kɔn wlǐ ɔ̍ jě-aɛ, i̍h bo ɔ̍ tɛ̀n-ɛ blǔh. Dǒ blǔh-a chɛ̀ kɛ̍n bo ɔ̍ kà-ɛ i̍ iě ɔ̍ wa̍ i̍. Wɛ̀ ɔ̍ di̍i̍ dɛ̍ᵻ kli̍hgbɛ̍ wlǎ sɔ̀n.

¹⁹Nyɔ̍ kli̍hgbɛ̍ tǐn-a dǒ Juluslɛn-ɛ, u̍h wɔ̌n pɔ̀n la. Ɛ̍ kɔn u̍h-a dǎɛ blǔh-a chɛ̀ Akedama dě u̍h blǐ wlu̍ di̍i̍. Ɛ̍ gbɔ̀ nu̍ Nymɔ̍ Blǔh.)

²⁰“Ɛ̍ chlǐh-ɛ dě Duǐh Chlǐh-dɛ̍ di̍i̍, ɛ̍ la̍a̍, ‘Ɔ̍ gbò kɔn ɛ̍ iě flu̍h nu̍, nɛ̀ nyɔ̍ se̍ kɔn ɔ̍ iě-e tǐn.’ Ɛ̍ la̍a̍ dɛ-ɛ, ‘Nɛ̀ nyɔ̍ dɔɔ kɔn ɔ̍ iě dǒ ɔ̍ wɔ̀ɔ̀ gbǎ-ɛ.’

²¹“Nɛ̀ɛ̍, ɛ̍ blaɛ i̍ à iě nyɔ̍ chèɛ̀ tba̍ dǒ ɔ̍ wɔ̀ɔ̀. Jɛ nyɔ̍ ɔ̀ ke à sà-a na-a dě à ke Joi Jusu-a mu̍-ɔn ji̍-ɔn ti̍ we̍-ɛ,

²²ɛ̍ ke sɔ dě Chɔɔn-a nyɔ̍ nǐ dlǔ po̍-ɛa gbɔ̀ tè la̍ wɛ̀ ɛ̍ iě-a weɛ̍ Jusu sà-a dǒ à we̍ ɔ̍ gba̍-ɛa ja̍i̍wlɔ̀-ɛ kɛ̍n jɛɛ-ɛ, ɛ̍ we̍ nyɔ̍ bo à iě-e dǔ. Wɛ̀ ɔ̍ ke à iě ɔ̍ mɛ̌ wlǔh-ea sàànsi̍i̍h nu̍.”

²³Wɛ̀ u̍h tba̍ nyɔ̍ sɔɔ̌n chèɛ̀, Josɛ u̍h-a dǎɛ-a Basaba-a, ɔ̍ nynɛ̌ diih nu̍ Jɔslu, ɛ̍ ke Matataia ke.

²⁴Wɛ̀ u̍h ba̍le, u̍h la̍a̍, “Joi, ìn juo nyɔ̍ kli̍hgbɛ̍-a wlùh, ɛ̍ tìh-ɛ, nyɔ̍ ìn tba̍-a dě ùh sɔɔ̌n la nynɛ̌-ɛ, toe ɔ̍ àɔ̀.

²⁵Iě gba̍tòà dbo̍ ɛ̀ Juda tǎli-a i̍ iě ɔ̍ mu̍-a tà ɔ̍ kɔn-aɛ, wɛ̀ ɔ̍ iě dǒ ɔ̍ wɔ̀ɔ̀ gbǎ-ɛ.”

²⁶Wɛ̀ u̍h tèle dɛ̍ i̍ dǒ nyɔ̍ sɔɔ̌n laa̍ we̍. Sɔ Matataia-a sɛ̌ bo ɛ̀ ji̍ ja̍i̍, iě ɔ̍ gbǎ dǒ Klai-a gba̍tòà-a pùè jɔɛ̍ due laa̍ kɛ̍n.